Nǔ Kplɔnkplɔn Mɛ lɛ Bonu Ye Ni Huzu Ahwanvu Ni Nɔ Mya Nukún nú We
1. Cobonu mɛ lɛ na gán ɔ, etɛ é ka byɔ?
1 Sinsɛnzɔ́ e togun Mawu tɔn wà ɖò 2014 bɔ è ɖó gbè tɔn é xlɛ́ ɖɔ ye ɖókan dó wɛnɖagbe Axɔsuɖuto ɔ tɔn jijla wu bo lɛ́ kanɖeji bo na wà mɔ̌. (Mat. 24:14) Gbɔn xwé ɖé gbè jɛ xwé ɖé gbè sín azɔ̌ ɔ, tlati bunɔ lɛ kpo mɛylɔwema lɛ kpo mímá, kpodo kúnnuɖiɖe agbawungba tɔn lɛ kpo gblamɛ ɔ, mǐ ɖò wɛn Biblu tɔn ɔ dó mɛ gègě wɛ hú ɖ’ayǐ tɔn. É ɖò mɔ̌ có, cobonu mɛ lɛ na gán ɔ, mǐ ɖó na d’alɔ ye bɔ ye na huzu ahwanvu Jezu tɔn gbɔn Biblu kplɔnkplɔn xá ye gblamɛ.—1 Tim. 2:4.
2. Nǔ tɛ lɛ kinkanbyɔ mǐɖée ka na d’alɔ mǐ bɔ mǐ na ɖò gbesisɔmɛ hwebǐnu bo na xwlé Biblu kpinkplɔn mɛ?
2 Ðò Gbesisɔmɛ Hwebǐnu Bo Na Xwlé Biblu Kpinkplɔn Mɛ: Enyi mɛɖé ɖè jlǒ xlɛ́ ɔ, a ka nɔ dó gǎn bo nɔ yí adlɛsi tɔn, bo nɔ yawu lɛkɔ yì ba ɛ kpɔ́n bo na mɔ tɛn dó jɛ Biblu kplɔ́n xá ɛ jí à? Hwetɛnu ka nyí azɔn gudo tɔn e a mɔ xwétɔ́ ɖé azɔn nukɔntɔn ɔ bo xlɛ́ ɛ lee Biblu kpinkplɔn ɖé nɔ yì gbɔn é? Hwetɛnu ka nyí azɔn gudo tɔn e a xwlé Biblu kpinkplɔn mɛ ɖěɖee a nɔ fɔ xójlawema lɛ yì jó na é? A ka ko xlɛ́ video Etɛwu È ka Ðó Na Kplɔ́n Biblu? kpo Nɛ̌ Biblu Kpinkplɔn ɖé ka Nɔ Nyí Gbɔn? kpo azɔ̌gbɛ́ towe lɛ, azɔ̌mɛvigbɛ́ towe lɛ, mɛ e ɖò xá towe mɛ lɛ é, hɛnnumɔ towe lɛ, kpo mɛtuùnmɛ towe ɖevo lɛ kpo à? Enyi a ɖò nǔ kɛkɛví ɖɔhun e jí è nɔ tɛ́ wema lɛ dó é zán dó ɖekúnnu wɛ ɔ, a ka nɔ tɛnkpɔn bo nɔ ɖɔ nú mɛ ɖěɖee nɔ zé wema nùkpinkplɔn tɔn ɖé é ɖɔ ye sixu kplɔ́n Biblu ɖ’emɛ vɔ̌nu à?
3. Bonu mǐ na dó sixu kplɔ́n nugbǒ ɔ mɛ bonu é na kpa mǐ ɔ, etɛ é ka byɔ?
3 Jehovah kpo Jezu kpo Na D’alɔ We: Cobonu Jezu na ɖegbe ɖɔ mǐ ni “kplɔ́n nǔ akɔta lɛ bǐ, bonu ye ni huzu ahwanvu” ɔ, é tó ɖɔ hwɛ̌ ɖɔ mǐ ni “yì,” bo dó xlɛ́ ɖɔ mǐ ɖó na dó gǎn bo lɛ́ ɖè afɔ nukɔntɔn ɔ. É ɖò mɔ̌ có, é jó mǐ dó mǐɖokponɔ ǎ, loɔ, é d’akpá ɖɔ emi na nɔ kpɔ́ xá mǐ. (Mat. 28:19, 20) Hú mɔ̌ ɔ, Jehovah na mǐ gbigbɔ mímɛ́ tɔn gɔ́ nú azɔwanú kpodo azɔ̌kplɔnmɛ ɖěɖee sín hudo mǐ ɖó bo na kplɔ́n nugbǒ ɔ mɛ lɛ é kpo. (Zak. 4:6; 2 Kɔ. 4:7) Mǐ sixu xoɖɛ bo byɔ “jlǒ” kpodo hlɔnhlɔn kpo bo na dó sixu ɖ’alɔ ɖò azɔ̌ taji enɛ mɛ.—Fili. 2:13.
4. Etɛwu nǔ kplɔnkplɔn xá mɛ lɛ bonu ye ni huzu ahwanvu ka ɖó na nɔ mya nukún nú mǐ?
4 Wɛnɖagbe ɔ jijla nɔ hɛn awǎjijɛ ɖaxo ɖé wá nú mǐ. Amɔ̌, hwenu e mǐ kplɔ́n nugbǒ ɔ mɛɖé bo d’alɔ ɛ b’ɛ jɛ ‘ali e nɔ yi gbɛ mavɔmavɔ mɛ’ é jí xá mǐ é wɛ awǎjijɛ mǐtɔn nɔ jɛji. (Mat. 7:14; 1 Tɛ. 2:19, 20) Ee lɛ́ ɖò taji hugǎn é wɛ nyí ɖɔ enyi nǔ kplɔnkplɔn xá mɛ lɛ bonu ye huzu ahwanvu nɔ mya nukún nú mǐ ɔ, xomɛ Jehovah e ma “jló ɖɔ mɛɖebǔ ni dɔn ǎ,” bo “jló ɖɔ mɛ bǐ ni mɔ ali, bo lɛkɔ sín nǔnyanyawiwa gudo” é tɔn nɔ hun.—2 Pi. 3:9.