Xosɛxweta

Enyi è ma nɔ zán nukúnnúmɔjɛnǔmɛ ǎ ɔ, é nɔ xɔ akwɛ sɔmɔ̌ ǎ. Amɔ̌, nǔ e è kplɔ́n lɛ é zinzan nɔ byɔ mɛɖesɔhwe. Xota elɔ na dó wusyɛn lanmɛ nú mǐ, bɔ mǐ na nɔ sɔ́ mǐɖée hwe gbɔn kpɔ́ndéwú Biblu tɔn e kúnkplá mɛ ɖěɖee jla wɛn ɔ gbɛtɔ́ alɔkpa lɛ bǐ, bo nɔ xoɖɛ dó mɛ ɖevo lɛ tamɛ, lobo nɔ nɔte kpɔ́n Jehovah bonu é na wà nǔ lɛ é tɔn xwixwedó gblamɛ.

Ðò hwenu vɛwǔ elɔ lɛ mɛ ɔ, é bɔwǔ bɔ wuvɛ̌ gbɛmɛ tɔn lɛ na dó awakanmɛ kú nú mǐ, alǒ ɖi bú mǐ. Jehovah kpo Jezu kpo nɔ d’alɔ mǐ bɔ mǐ nɔ ɖí xwi xá. Amɔ̌, mǐ bǐ wɛ ɖó na nɔ dó gbɔ nú mǐɖée, bo na nɔ lɛ́ na akɔnkpinkpan mǐɖée. Xota elɔ xlɛ́ lee mǐ sixu hɛn mǐɖée lidǒ ɖò wanyiyi mɛ gbɔn é.

Jehovah nyí Mawu awǎjijɛnɔ ɖé, bo nɔ ba ɖɔ mɛsɛntɔ́ emitɔn lɛ ni nɔ awǎjijɛ mɛ. Amɔ̌, nɛ̌ mɛtɛnkpɔn lɛ kpo tagba gbɛ̀ Satáan tɔn tɔn lɛ kpo ka na ɖò finɛ có, mǐ sixu nyí awǎjijɛnɔ gbɔn? Ðò Mawuxó e Jezu ɖɔ ɖò Só jí é hwenu ɔ, é ɖè wě tawun tawun ɖé lɛ xá mǐ, bɔ ye sixu d’alɔ mǐ bɔ mǐ na ɖó awǎjijɛ e na nɔ ayǐ sɔyi é.

Ðò gbɛ̀ e mɛ cejɛnnabi fɔ́n bo ɖò jijɛji wɛ é ɖé mɛ ɔ, agun Klisanwun tɔn ka nyí weziza ɖé ɖò wanyiyi linu. Ðokpo ɖò ali e nu mǐ sixu ɖè wanyiyi enɛ xlɛ́ ɖè é mɛ wɛ nyí ɖɔ nǔ mɛ ɖevo lɛ tɔn ni nɔ ɖu ayi mɛ nú mǐ, enɛ jí wɛ xota wè elɔ lɛ ɖɔ xó dó. Nukɔntɔn ɔ, mǐ na mɔ lee Jehovah sɔ́ kpɔ́ndéwú jiwǔ ɖé ɖ’ayǐ nú mǐ, bɔ nǔ mɛ ɖevo lɛ tɔn nɔ ɖu ayi mɛ n’i gbɔn é. Enɛ gudo ɔ, mǐ na vɔ́ ali tawun tawun e nu mǐ sixu wà nǔ Jehovah ɖɔhun ɖè é ɖé lɛ gbéjé kpɔ́n.