Etɛ Ceɔlu kpo Hadɛsi kpo ka Nyí?

BIBLU zán xókwin Eble tɔn sheʼohlʹ kpo xókwin Glɛki tɔn haiʹdes kpo hugǎn azɔn 70 ɖò gbè dòdó lɛ mɛ. Xókwin wè enɛ lɛ nɔ ɖɔ xó dó kú wu. Lilɛdogbeɖevomɛ Biblu tɔn gègě lilɛ xókwin enɛ lɛ dó “kútomɛ.” Lee ye lilɛ xókwin enɛ lɛ dó é sɔgbe ǎ. Ðò Biblu mɛ ɔ, xókwin dòdó enɛ lɛ e è zán é ɖɔ xó dó yɔdo kpaà gbɛtɔ́ lɛ tɔn wu. Mi ni ba dò nú lee è zán ye gbɔn ɖò wemafɔ Biblu tɔn ɖé lɛ mɛ é.

Ecclésiaste 9:10 ɖɔ: “Azɔ̌, wěɖiɖe, nùtuùntuùn, alǒ nùnywɛ ɖebǔ ɖò sheʼohlʹ mɛ fí e a xwè é ǎ.” Xókwin sheʼohlʹ ɔ ka dó gesí yɔdo ɖé tawun bɔ mǐ sixu ɖi mɛ vívɛ́ná mǐtɔn ɖé d’emɛ wɛ à? Eǒ. Biblu nɔ zán sheʼohlʹ kpo haiʹdes kpo hwenu e é ɖò xó ɖɔ dó yɔdo tawun ɖé wu wɛ é ǎ, amɔ̌, é nɔ zán xókwin Eble kpo Glɛki tɔn ɖevo lɛ kpo. (Genèse 23:7-9; Matie 28:1) Gɔ́ na ɔ, Biblu nɔ zán xókwin sheʼohlʹ ɔ nú yɔdo e mɛ è ɖi mɛ gègě dó ɖó kpɔ́ é ǎ.—Genèse 49:30, 31.

Nɔtɛn tɛ sheʼohlʹ ka nɔ dó gesí lo? Nǔ e sheʼohlʹ alǒ haiʹdes nɔ dó gesí bɔ Mawuxówema ɔ xlɛ́ é hugǎn yɔdo e mɛ è tlɛ ɖi mɛ gègě dó é tawun. Ði kpɔ́ndéwú ɖé ɔ, Isaïe 5:14 ɖɔ ɖɔ sheʼohlʹ “d’agba bo kɛ nu zɛ jlɛ̌ wu.” Enyi è na ɖɔ ɔ, sheʼohlʹ ko mì mɛkúkú maxamaxa lɛ. É ɖò mɔ̌ có, é nɔ lɛ́ kpó ɖò biba d’eji wɛ. (Proverbes 30:15, 16) Mɛkúkú nabi e sixu nɔ yɔdo tawun ɖé mɛ é nɔ ɖó dogbó, amɔ̌, sheʼohlʹ tɔn nyí mɔ̌ ǎ; ‘é nɔ gɔ́ gbeɖé ǎ.’ (Proverbes 27:20) Sheʼohlʹ ɖó dogbó ǎ. Enɛ wu ɔ, sheʼohlʹ alǒ haiʹdes nyí nɔtɛn tawun ɖé bo ɖò fí ɖé ǎ. É nyɔ́ wà ɔ, yɔdo kpaà mɛkúkú lɛ tɔn wɛ.

Nùkplɔnmɛ Biblu tɔn dó fínfɔ́n sín kú wu d’alɔ mǐ bɔ mǐ lɛ́ mɔ nukúnnú jɛ tinmɛ sheʼohlʹ kpo haiʹdes kpo tɔn wu gɔ́ na. Xó Mawu tɔn nɔ dɔn sheʼohlʹ kpo haiʹdes kpo cá kpo mɛkúkú e è na fɔ́n lɛ é kpo.a (Job 14:13; Mɛsɛ́dó 2:31; Nǔɖexlɛ́mɛ 20:13) Xó Mawu tɔn lɛ́ ɖexlɛ́ ɖɔ é kún nyí mɛ e sɛ̀n Jehovah lɛ é kɛɖɛ wɛ ɖò sheʼohlʹ alǒ haiʹdes mɛ ó, amɔ̌, mɛ e ma tlɛ sɛ̀n ɛ ǎ lɛ é gègě ɖ’emɛ. (Genèse 37:35; Psaume 55:15) Enɛ wu ɔ, Biblu kplɔ́n mɛ ɖɔ “Mawu na wá fɔ́n mɛ ɖagbe lɛ, kpodo mɛ nyanya lɛ kpo sín kú.”—Mɛsɛ́dó 24:15.