Nùɖuɖu Aklunɔ Tɔn ɔ Nyí Nǔwiwa ɖé bo Nɔ Kpa Susu nú Mawu

È ÐEGBE nú Klisanwun lɛ ɖɔ ye ni nɔ bló Flǐn kú Klisu tɔn. È nɔ lɛ́ ylɔ nǔwiwa enɛ ɖɔ “Aklunɔ sín nùɖuɖu.” (1 Kolɛntinu lɛ 11:20) Etɛwu nǔwiwa enɛ ka nyí nǔ taji? Hwetɛnu è ka ɖó na nɔ bló? Nɛ̌ è ka ɖó na nɔ bló gbɔn?

Jezu Klisu sɔ́ nǔwiwa enɛ ɖ’ayǐ ɖò xwè 33 H.M ɖò zǎn e mɛ Jwifu lɛ nɔ ɖu Dindinwayi-xwè é. Azɔn ɖokpo ɖò xwè ɖokpo mɛ wɛ è nɔ ɖu Dindinwayi-xwè ɖò sunzan Jwifu lɛ tɔn e nɔ nyí Nizán é sín azǎn 14gɔ́ ɔ gbè. Sunzan Nizán ɔ nɔ bɛ́ ɖò hwenu e è sixu mɔ sun yɔyɔ̌ ɔ bɔ é tɔ́n ɖò Xwèjísun ɔ mɛ é. Hweɖelɛnu ɔ, è nɔ mɔ ɖò aklunɔzán gblamɛ nukɔntɔn ɔ gudo. Azǎn 14 gudo ɔ, Jwifu lɛ nɔ ɖu Dindinwayi-xwè ɔ ɖò hwenu e hwe ko yì xɔ gudo é.

Jezu ɖu Dindinwayi-xwè ɔ kpodo mɛsɛ́dó tɔn lɛ kpo. Ee é nya Juda Isikaliɔti gudo é ɔ, é sɔ́ Aklunɔ Sín Nùɖuɖu ɔ ɖ’ayǐ. Nùɖuɖu enɛ jɛ Dindinwayi-xwè Jwifu lɛ tɔn sín tɛnmɛ, bɔ é sín enɛ wu ɔ, è ɖó na nɔ bló nǔwiwa enɛ ɔ azɔn ɖokpo ɖò xwè ɖokpo mɛ.

Wɛnɖagbe Matie tɔn ɖɔ: “Jezu zé wɔxúxú bo dó kú nú Mawu, bo kán, lobo na ahwanvu tɔn lɛ bo ɖɔ: ‘Mi yí, bo ɖu, elɔ ɔ, [nɔte nú] agbaza ce . . .’ É lɛ́ sɔ́ kɔfo e mɛ vɛɛn ɖè ɔ ɖokpo, bo dó kú nú Mawu, bo sɔ́ nú ahwanvu tɔn lɛ, bo ɖɔ: ‘Mi yí, bonu mi bǐ ni nu. Ðó elɔ ɔ, [nɔte nú] hun ce . . . hun e Mawu dó sɔ́ akɔjijɛ sín afɔ ɖó te na ɔ wɛ. É wɛ kɔn nyì ayǐ, dó gbɛtɔ́ gègě tamɛ, nú hwɛ sɔ́ kɛ mɛ.’”—Matie 26:26-28.

Mɛ ɖé lɛ ɖi nǔ ɖɔ Jezu sɔ́ wɔxúxú ɔ dó huzu agbaza éɖesu tɔn lobo sɔ́ vɛɛn ɔ dó huzu hun éɖesu tɔn. Amɔ̌, nǔ ɖebǔ ka kán fɛn agbaza Jezu tɔn hwenu e é na nùɖuɖu enɛ ye é ǎ. Mɛsɛ́dó Jezu tɔn lɛ ka ɖu agbaza tɔn bo nu hun tɔn dóó à? Eǒ. Ðó enyi ye wà mɔ̌ hǔn, ye ɖu gbɛtɔ́ lan bo gbà sɛ̀n Mawu tɔn nɛ. (Genèse 9:3, 4; Lévitique 17:10) Sɔgbe kpo 1 Kolɛntinu lɛ 11:25 kpo ɔ, Jezu zé kɔfo e mɛ vɛɛn ɖè ɔ bo ɖɔ: “Elɔ ɔ, akɔjijɛ yɔyɔ̌ Mawu tɔn e sín afɔ hun ce sɔ́ ɖó te ɔ wɛ.” Kɔfo enɛ ɖesu wɛ huzu “akɔjijɛ yɔyɔ̌” ɔ à? Nǔ sixu nyí mɔ̌ ǎ, ɖó alɛ̀ nunu wɛ nyí akɔjijɛ, é nyí nǔ hɛn kpo alɔ kpo ɖé ǎ.

Enɛ wu ɔ, wuntun kpowun wɛ wɔxúxú ɔ kpo vɛɛn ɔ kpo nyí. Wɔxúxú ɔ nɔte nú agbaza maɖóblɔ̌ Jezu tɔn. Wɔxúxú Dindinwayi-xwè ɔ tɔn e kpò é wɛ Jezu zán. È dó wɔxúxúfɔ́nnú alǒ tɔ́n ɖebǔ wɔxúxú enɛ mɛ ǎ. (Exode 12:8) Biblu nɔ zán wɔxúxúfɔ́nnú hwɛhwɛ bɔ é nɔ nɔte nú hwɛhuhu alǒ blɔ̌. Enɛ wu ɔ, wɔxúxú ɔ nɔte nú agbaza maɖóblɔ̌ Jezu tɔn e é dó savɔ̌ é. Hwɛ ɖebǔ ɖò kɔ n’i ǎ.—Matie 16:11, 12; 1 Kolɛntinu lɛ 5:6, 7; 1 Piyɛɛ 2:22; 1 Jaan 2:1, 2.

Vɛɛn vɔvɔ ɔ nɔte nú hun Jezu tɔn. Hun enɛ wɛ zɔ́n bɔ akɔjijɛ yɔyɔ̌ ɔ dó sɔgbe ɖò sɛ́n linu. Jezu ɖɔ ɖɔ hun emitɔn kɔn nyì ayǐ “nú hwɛ sɔ́ kɛ mɛ.” Enɛ wu ɔ, gbɛtɔ́ lɛ hɛn ɔ, ye na huzu mɛ mímɛ́ ɖò Mawu nukúnmɛ bo lɛ́ hɛn ɔ, ye na byɔ akɔjijɛ tɔn yɔyɔ̌ ɔ mɛ. (Eble lɛ 9:14; 10:16, 17) Akɔjijɛ alǒ alɛ̀ nunu enɛ zɔ́n bɔ Klisanwun gbejinɔtɔ́ 144 000 na yì jixwé. Ye na ɖu axɔsu bo na lɛ́ wà vɔsanúxwlémawutɔ́zɔ́ ɖò dɔ̌n nú ɖagbe gbɛtɔ́ lɛ bǐ tɔn.—Genèse 22:18; Jérémie 31:31-33; 1 Piyɛɛ 2:9; Nǔɖexlɛ́mɛ 20:6; 14:1-3.

Mɛ̌ mɛ̌ e ka ɖó na ɖu wɔxúxú ɔ lobo na nu vɛɛn ɔ ɖò Flǐn ɔ hwenu? É ɖò gaàn ɖɔ mɛ e ɖò akɔjijɛ yɔyɔ̌ ɔ mɛ lɛ é kɛɖɛ wɛ ɖó na ɖu wɔxúxú ɔ bo nu vɛɛn ɔ. Ye wɛ ɖó nukúnɖiɖo bo na yì jixwé. Gbigbɔ mímɛ́ Mawu tɔn wɛ nɔ na ganjɛwu mɛ mɔhun lɛ ɖɔ è cyan ye bɔ ye na nyí axɔsu ɖò jixwé. (Hlɔmanu lɛ 8:16) Ye lɛ́ ɖò akɔjijɛ Axɔsuɖuto tɔn ɔ mɛ xá Jezu.—Luka 22:29.

Etɛ ka nyí mɛ e ɖó nukúnɖiɖo bo na nɔ gbɛ̀ kaka sɔyi ɖò Palaɖisi mɛ ɖò ayikúngban jí lɛ é tɔn lo? Ye nɔ setónú nú gbè e Jezu ɖè é bo nɔ yì nǔwiwa Aklunɔ Sín Nùɖuɖu ɔ tɔn domɛ. Enyi ye na ɖu wɔxúxú ɔ lobo nu vɛɛn ɔ wutu wɛ ye nɔ yì ǎ, amɔ̌, ye nɔ wá kpɔ́n nǔ kpo sísí kpo. Azɔn ɖokpo ɖò xwè ɖokpo mɛ ɔ, Kúnnuɖetɔ́ Jehovah tɔn lɛ nɔ bló nǔwiwa Aklunɔ Sín Nùɖuɖu ɔ tɔn ɖò Nizán sín azǎn 14gɔ́ ɔ gbè hwenu e hwe ko yì xɔ gudo é. Gbɔn gbɛ̀ ɔ bǐ mɛ ɔ, gbɛtɔ́ afatɔ́ɔ́n klewun ɖé jɛn nɔ ɖɔ ɖɔ emi ɖó nukúnɖiɖo bo na yì jixwé có, nǔwiwa enɛ nyí nǔ xɔ akwɛ nú Klisanwun lɛ bǐ. Nǔwiwa ɖé wɛ bo nɔ hun ali nú mɛ bǐ bɔ è hɛn ɔ, è na lin tamɛ kpɔ́n dó wanyiyi ɖaxó Jehovah Mawu kpo Jezu Klisu kpo tɔn jí.—Jaan 3:16.