TÀN 95
Lee Jezu Nɔ Kplɔ́n Nǔ Mɛ Gbɔn É
EZU ɖɔ nú nya ɖé gbè ɖokpo ɖɔ é ɖó na yí wǎn nú nɔzo tɔn. Nya ɔ kanbyɔ Jezu ɖɔ: ‘Mɛ̌ ka nyí nɔzo ce?’ Jezu ka tuùn nǔ e lin wɛ nya ɔ ɖè é ganji. Nya ɔ lin ɖɔ akɔ emitɔn lɛ kpo mɛ e ɖò sinsɛn emitɔn mɛ lɛ é kpo kɛɖɛ wɛ nyí nɔzo emitɔn. Enɛ wu ɔ, mi nú mǐ ni kpɔ́n nǔ e Jezu ɖɔ n’i é.
Jezu nɔ kpi tàn dó kplɔ́n nǔ mɛ hweɖelɛnu. Nǔ e é wà dìn é nɛ. É kpi Jwifu ɖé kpo Samaliinu ɖé kpo sín tàn. Mǐ ka ko kplɔ́n ɖɔ Jwifu gègě nɔ gbɛ́ wǎn nú Samaliinu lɛ. Tàn e Jezu kpi é ɖíe:
Jwifu ɖé gbɔn sókan mɛ li bo xwè Jeliko gbè ɖokpo. Amɔ̌, ajotɔ́ lɛ zɔn jǐ tɔn. Ye yí akwɛ tɔn, lobo xò é kaka, bɔ é ɖibla kú.
Vɔsanúxwlémawutɔ́ Jwifu ɖé dín gbɔn finɛ. É mɔ nya ɔ. Etɛ a ka lin ɖɔ é wà? É gbɔn akpá ɖevo xwé, bo yì. Enɛ gudo ɔ, sinsɛnnɔ tewungbeju ɖé lɔ wá jɛ finɛ. Levíinu ɖé wɛ. É ka nɔte à? Eǒ, elɔ nɔte bo d’alɔ nya ɔ ǎ. A na mɔ vɔsanúxwlémawutɔ́ ɔ kpo Levíinu ɔ kpo ɖò ɖiɖe ɔ mɛ, bɔ ye ko zɛ nya ɔ wu bo ɖò zɔ vwéé.
Amɔ̌, kpɔ́n mɛ e kpo nya ɔ kpo ɖò finɛ é. Samaliinu ɖé wɛ, bo ɖò alɔ dó Jwifu ɔ wɛ. É ɖò akpà tɔn lɛ bla n’i wɛ. Enɛ gudo ɔ, é kplá Jwifu ɔ yì fí e é na nɔ bɔ è na kpé nukún dó wutu tɔn ɖè é.
Ee Jezu kpi tàn ɔ fó é ɔ, é kanbyɔ nya e kàn nǔ byɔ ɛ é ɖɔ: ‘Mɛ̌ ka ɖexlɛ́ ɖò mɛ atɔn enɛ lɛ mɛ ɖɔ emi wà nǔ nɔzo nya e jɛ ajotɔ́ lɛ sín alɔ mɛ e tɔn ɖɔhun, bɔ ayi towe mɔ? Vɔsanúxwlémawutɔ́ ɔ wɛ à, Levíinu ɔ wɛ à alǒ Samaliinu ɔ?’
Nya ɔ yí gbè ɖɔ: ‘Samaliinu ɔ wɛ. É nyɔ́ xomɛ dó nya e jɛ ajotɔ́ lɛ sín alɔ mɛ é wu.’
Jezu ɖɔ: ‘A yí gbè ɖó ganji. Enɛ wu ɔ, yì bo nɔ wà nǔ xá mɛ ɖevo lɛ gbɔn mɔ̌.’
A yí wǎn nú lee Jezu nɔ kplɔ́n nǔ mɛ gbɔn é à cé? Enyi mǐ nɔ ɖó ayi nǔ e Jezu ɖɔ ɖò Biblu mɛ lɛ é wu ɔ, mǐ na kplɔ́n nǔ taji gègě, kabǐ?