NǓ E È ÐE XLƐ́ JAAN É

1 Jezu Klísu wɛ ɖe* nǔ élɔ́ lɛ́ xlɛ́; Mawu wɛ ɖe nǔ énɛ́ lɛ́ xlɛ́ ɛ, bónú é ná dó xlɛ́ nǔ e ɖó ná jɛ ɖo malínmálín mɛ lɛ́ é kannumɔ tɔn lɛ́. É sɛ́ wɛnsagun tɔn dó kannumɔ tɔn Jaan, bo zán wuntun lɛ́ dó ɖe nǔ lɛ́ xlɛ́ ɛ gbɔn wɛnsagun ɔ jí. 2 Jaan ɖe kúnnu nú xó Mawu tɔn kpó kúnnuɖiɖe Jezu Klísu tɔn kpó, ɛɛn, é ɖe kúnnu nú nǔ e é mɔ lɛ́ é bǐ. 3 Awǎjijɛnɔ wɛ nyí mɛ e ɖo nǔɖɔɖayǐ élɔ́ sín xó lɛ́ xa d’aga wɛ é, mɛ e ɖo sise wɛ lɛ́ é kpó mɛ e ɖo nǔ e è wlán d’é mɛ lɛ́ é xwedó wɛ lɛ́ é kpó, ɖó hwenu e è ɖó dó é ko sɛkpɔ́.

4 Nyɛ Jaan wɛ ɖo wěma wlán sɛ́dó agun tɛ́nwe e ɖo tokpɔn Azíi tɔn mɛ lɛ́ é wɛ:

“Mɛ e tíin, bo ko tíin ɖ’ayǐ, lobo jawě é” kpó gbigbɔ tɛ́nwe e ɖo axɔ́súzinkpo tɔn nukɔn lɛ́ é kpó ní ná fɛ́nú kpó fífá kpó mi; 5 Jezu Klísu e nyí “Kúnnuɖetɔ́ gbejínɔtɔ́” ɔ, bo nyí “mɛ nukɔntɔn e fɔ́n ɖo mɛkúkú lɛ́ mɛ é,” lobo lɛ́ nyí “Mɛ e kpa acɛ nú axɔ́sú ayǐkúngban ɔ jí tɔn lɛ́ é” lɔmɔ̌ ní ná mi.

É yí wǎn nú mǐ, bo tún kan nú mǐ sín hwɛ mǐtɔn lɛ́ sí gbɔn hun éɖésúnɔ tɔn gblamɛ; 6 é bló bónú mǐ ná nyí axɔ́súɖuto ɖé kpó vɔ̌sánúxwlémawutɔ́ lɛ́ kpó nú Mawu tɔn, éé lɛ́ nyí Tɔ́ tɔn é. Susu kpó hlɔ̌nhlɔ́n kpó ní nyí étɔn káká sɔ́yi. Amǐ.

7 Éɖíe! É jawě ɖo akpɔ́kpɔ́ mɛ, bɔ nukún lɛ́ bǐ ná mɔ ɛ, káká jɛ mɛ e sɔ́ hwǎn ɛ lɛ́ é jí; akɔta e ɖo ayǐkúngban ɔ jí lɛ́ é bǐ ná ná alě ɖó éyɛ́ wú. Ɛɛn, nǔ ná nyí mɔ̌ nǔgbó. Amǐ.

8 Jexóva* Mawu ɖɔ: “Nyɛ wɛ nyí Alúfa, bo lɛ́ nyí Omɛ́ga,* Mɛ e tíin, bo tíin ɖ’ayǐ, lobo jawě é, nyɛ wɛ nyí Ajalɔ̌nlɔn ɔ.”

9 Nyɛ Jaan e nyí nɔví mitɔn, bo lɛ́ ɖó mǐmá xá mi ɖo wǔvɛ́, axɔ́súɖuto kpó didɛ kpó mɛ, ɖo bǔ e mǐ ɖe xá Jezu é mɛ é ɔ, un ɖo tɔtɛ́ntinto e è nɔ ylɔ́ ɖɔ Patimɔ́si é mɛ, ɖó un ɖɔ xó dó Mawu wú, bo lɛ́ ɖe kúnnu nú Jezu wútu. 10 Gbɔn gbigbɔ mímɛ́ gblamɛ ɔ, un mɔ nyiɖée ɖo Aklúnɔ sín azǎn gbe, bo se gbe syɛ́nsyɛ́n ɖé ɖo gǔdo ce bɔ é ɖɔ nǔ kpɛn ɖɔhun, 11 bo ɖɔ: “Nǔ e mɔ wɛ a ɖe é ɔ, wlǎn dó wěma mlámlá ɖé jí, bo sɛ́ dó agun tɛ́nwe élɔ́ lɛ́: éé ɖo Efɛ́zi é, éé ɖo Simíini é, éé ɖo Pɛɛgámu é, éé ɖo Tiatíi é, éé ɖo Saadu é, éé ɖo Filadɛlufíi é kpó éé ɖo Lawodisée é kpó.”

12 Un lílɛ́ bo ná kpɔ́n mɛ e ɖo xó ɖɔ nú mì wɛ é, bɔ ée un lílɛ́ é ɔ, un mɔ zogbɛ́nhɛnnú e è sɔ́ siká dó bló é tɛ́nwe, 13 bɔ mɛɖé ɖo zogbɛ́nhɛnnú lɛ́ tɛ́ntin bo cí gbɛtɔ́ví ɖɔhun, bo ɖo awu e ɖi ga káká yi afɔ é ɖé mɛ, lobo sin akɔ́ntablánú e è sɔ́ siká dó bló é dó akɔ́nta. 14 Gɔ́ ná ɔ, ta tɔn kpó ɖa tɔn lɛ́ kpó wé bo cí lɛ̌ngbɔ́fún wěwé ɖɔhun, lobo cí laglási linfín ɖɔhun, lobɔ nukún tɔn lɛ́ cí myɔ hɛhɛ ɖɔhun, 15 afɔ tɔn lɛ́ cí ganvɔ ɖagbe ɖagbe e ɖo kínkɔ́n wɛ ɖo myɔkpó mɛ é ɖɔhun, bɔ gbe tɔn nɔ ɖɔ nǔ sin gěgé ɖo ayǐ kɔn nyi wɛ ɖɔhun. 16 É hɛn sunví tɛ́nwe dó alɔ tɔn ɖisí ɔ mɛ, bɔ hwǐ nuwenɔ e ɖá bo lɛ́ ɖi ga é ɖokpó ɖo nu tɔn mɛ tɔ́n sín wɛ, lobɔ nukúnmɛ tɔn nɔ kɔ́n lěe hwe nɔ kɔ́n hwemɛ cíɖíɖí é ɖɔhun. 17 Ée un mɔ ɛ é ɔ, un j’ayǐ ɖo afɔ tɔn lɛ́ kɔn bo cí mɛkúkú ɖɔhun.

Bɔ é sɔ́ alɔ tɔn ɖisí ɔ ɖó jǐ ce bo ɖɔ: “Ma ɖi xɛsi ó. Nyɛ wɛ nyí Mɛ nukɔntɔn ɔ, bo lɛ́ nyí Mɛ gǔdo tɔn ɔ, 18 nyɛ wɛ nyí mɛ gbɛɖe ɔ, un ko kú ɖ’ayǐ, amɔ̌ kpɔ́n, un ɖo gbɛ káká sɔ́yi mavɔmavɔ, lobɔ kú kpó Yɔdo* kpó sín cávi ɖo así ce. 19 Énɛ́ wú ɔ, wlǎn nǔ e a mɔ lɛ́ é, nǔ e ɖo jijɛ wɛ din lɛ́ é kpó nǔ ɖěɖěe ná wá jɛ ɖo énɛ́ lɛ́ gúdo lɛ́ é kpó. 20 Nǔbúdo Mawu tɔn wɛ nyí sunví tɛ́nwe e a mɔ ɖo alɔ ce ɖisí ɔ mɛ lɛ́ é kpó zogbɛ́nhɛnnú e è sɔ́ siká dó bló é tɛ́nwe lɛ́ kpó, bɔ tínmɛ tɔn ɖíe: Sunví tɛ́nwe lɛ́ ɔ, agun tɛ́nwe lɛ́ sín wɛnsagun lɛ́ wɛ, bɔ zogbɛ́nhɛnnú tɛ́nwe lɛ́ nyí agun tɛ́nwe lɛ́.

2 “Wlǎn sɛ́dó agun e ɖo Efɛ́zi é sín wɛnsagun ɖɔ: Mɛ e hɛn sunví tɛ́nwe lɛ́ ɖó alɔ tɔn ɖisí ɔ mɛ, bo ɖo zɔnlin ɖi wɛ ɖo zogbɛ́nhɛnnú tɛ́nwe e è sɔ́ siká dó bló lɛ́ é tɛ́ntin é ɔ, xó e é ɖɔ lɛ́ é ɖíe: 2 ‘Un tuun nǔ e a wa lɛ́ é, azɔ̌ syɛ́nsyɛ́n e wa wɛ a ɖe é kpó didɛ towe kpó, un lɛ́ tuun ɖɔ a kún nɔ ba mɛdídá lɛ́ xó ó. Gɔ́ ná ɔ, a tɛ́n mɛ ɖěɖěe nɔ ɖɔ ɖɔ émí nyí mɛsɛ́dó bo ma ka nyí mɔ̌ ǎ lɛ́ é kpɔ́n, bo mɔ ɖɔ adingbannɔ wɛ nú yě. 3 A lɛ́ ɖo didɛ wɛ, a syɛ́nlǐn ɖó nyǐkɔ ce wú, bɔ awakanmɛ lɛ́ kú we ǎ. 4 É ɖo mɔ̌ có, nǔ towe e vɛ́ wǔ ce é ɖíe: a sɔ́ ɖó wǎnyíyí e a ɖó ɖo bǐbɛ́mɛ é ǎ.

5 “‘Énɛ́ wú ɔ, flín fí e a j’ayǐ sín é, bónú hwɛ towe lɛ́ ní vɛ́ nú we,* lobonú a ní wa nǔ e a wa ɖo bǐbɛ́mɛ lɛ́ é. Ényí a ma wa mɔ̌ ǎ ɔ, un ná wá gɔ̌n towe, bo ná ɖe zogbɛ́nhɛnnú towe sín tɛn tɔn mɛ, afi nú hwɛ towe lɛ́ vɛ́ nú we* ɔ nɛ́. 6 Amɔ̌, nǔ ɖagbe ɖé tíin bɔ a wa, é wɛ nyí ɖɔ a gbɛ́ wǎn nú nǔ e sinsɛngbɛ́ta Nikoláa tɔn nɔ wa lɛ́ é, lěe nyi lɔ gbɛ́ wǎn ná gbɔn é. 7 Mɛ e ɖó tó é ní se nǔ e ɖɔ nú agun lɛ́ wɛ gbigbɔ ɔ ɖe lɛ́ é: Un ná ná gbe mɛ e ná ɖu ɖ’é jí é, bɔ é ná ɖu atín e nɔ ná gbɛ mɛ, bo ɖo palaɖísi Mawu tɔn mɛ é sín sínsɛ́n.’

8 “Wlǎn sɛ́dó agun e ɖo Simíini é sín wɛnsagun ɖɔ: Mɛ e nyí ‘Mɛ nukɔntɔn ɔ,’ bo lɛ́ nyí ‘Mɛ gǔdo tɔn ɔ,’ bo kú, bo lɛ́ fɔ́n wá gbɛ é ɔ, xó e é ɖɔ lɛ́ é ɖíe: 9 ‘Un tuun wǔvɛ́ e mɛ a ɖe é, bo tuun ɖɔ a jɛ hɛ̌n, loɔ, dɔkunnɔ wɛ nú we, un lɛ́ tuun nu e mɛ ɖěɖěe nɔ ylɔ́ yěɖée ɖɔ Jwifu bo ma ka nyí ǎ lɛ́ é nɔ nylá é; gbɛ̌ta* Satáan tɔn wɛ nú yě. 10 Nǔ e sín wǔvɛ́ ná se wɛ a ɖe lɛ́ é ní ma dó xɛsi we ó. Éɖíe! Awǒvi ná kpo ɖo mi mɛ ɖé lɛ́ bɛ́ nyi gan mɛ wɛ, bónú è ní dó sixú tɛ́n mi kpɔ́n bǐ mlɛ́mlɛ́, bɔ mi ná se wǔvɛ́ nú azǎn wǒ. Nɔ gbejí káká yi kú, énɛ́ ɔ, un ná ná we axɔ́súgbákún gbɛ tɔn. 11 Mɛ e ɖó tó é ní se nǔ e ɖɔ nú agun lɛ́ wɛ gbigbɔ ɔ ɖe lɛ́ é: Kú wegɔ́ ɔ ná wa nǔ dó mɛ e ná ɖu ɖ’é jí é wú ɖo ali ɖěbǔ nu ǎ.’

12 “Wlǎn sɛ́dó agun e ɖo Pɛɛgámu é sín wɛnsagun ɖɔ: Mɛ e ɖó hwǐ nuwenɔ e ɖá, bo lɛ́ ɖi ga é ɔ, xó e é ɖɔ lɛ́ é ɖíe: 13 ‘Un tuun fí e a nɔ nɔ é, énɛ́ wɛ nyí, fí e axɔ́súzinkpo Satáan tɔn ɖe é; é ɖo mɔ̌ có, a kpo ɖo nyǐkɔ ce wú tɛ́ dó wɛ gbánwúngbánwún, bɔ é ná bo tlɛ nyí ɖo kúnnuɖetɔ́ ce gbejínɔtɔ́ Antipási e è hu ɖo akpá mitɔn, fí e Satáan nɔ nɔ é hwenu ɔ, a sa nǔɖiɖi e a ɖó nú mì é ǎ.

14 “‘É ɖo mɔ̌ có, nǔ towe ɖé lɛ́ vɛ́ wǔ ce, é wɛ nyí ɖɔ mɛɖé lɛ́ ɖo gɔ̌n towe, bo nɔ tɛ́ dó nǔkplɔ́nmɛ Baláamu tɔn wú; nya énɛ́ wɛ kplɔ́n nǔ Baláki ɖɔ é ní sɔ́ afɔklɛ́nnú ɖó nukɔn nú Izlayɛ́li ví lɛ́, énɛ́ wɛ nyí ɖɔ yě ní ɖu nǔ e è sɔ́ dó sá vɔ̌ nú vodún lɛ́ é, bo lɛ́ lɛ aga.* 15 Mɔ̌ ɖokpó ɔ, mɛɖé lɛ́ lɛ́ ɖo gɔ̌n towe, bo nɔ tɛ́ dó sinsɛngbɛ́ta Nikoláa tɔn sín nǔkplɔ́nmɛ wú. 16 Énɛ́ wú ɔ, hwɛ towe lɛ́ ní vɛ́ nú we.* É ma nyí mɔ̌ ǎ ɔ, un jawě gɔ̌n towe ɖo yǐyá mɛ, bo ná sɔ́ hwǐ gaga e nɔ tɔ́n sín nu ce mɛ é dó fun ahwan xá yě.

17 “‘Mɛ e ɖó tó é ní se nǔ e ɖɔ nú agun lɛ́ wɛ gbigbɔ ɔ ɖe lɛ́ é: Mɛ e ná ɖu ɖ’é jí é ɔ, un ná ná ɛ mǎna e ɖo hwlǎhwlá é kpɛɖé, un ná lɛ́ ná ɛ kɛ́n wěwé ɖokpó; è wlán nyǐkɔ yɔ̌yɔ́ ɖokpó dó kɛ́n ɔ jí, bɔ mɛ ɖěbǔ tuun zɛ mɛ e è ná é wú ǎ.’

18 “Wlǎn sɛ́dó agun e ɖo Tiatíi é sín wɛnsagun ɖɔ: V ǐ Mawu tɔn e nukún tɔn lɛ́ cí myɔ hɛhɛ ɖɔhun, bɔ afɔ tɔn lɛ́ cí ganvɔ ɖagbe ɖagbe ɖɔhun é ɔ, xó e é ɖɔ lɛ́ é ɖíe: 19 ‘Un tuun nǔ e wa wɛ a ɖe lɛ́ é, wǎnyíyí towe, nǔɖiɖi towe, sinsɛnzɔ́ towe kpó didɛ towe kpó, bo lɛ́ tuun ɖɔ nǔ e wa wɛ a ɖe din lɛ́ é hú gǎn ée a wa ɖo bǐbɛ́mɛ lɛ́ é.

20 “‘É ɖo mɔ̌ có, nǔ towe e vɛ́ wǔ ce é ɖíe: a jó nyɔ̌nu Jezabɛ́li énɛ́ e nɔ ylɔ́ éɖée ɖɔ gbeyíɖɔ é dó, bɔ é nɔ kplɔ́n nǔ kannumɔ ce lɛ́, lobo nɔ flú yě bónú yě ná lɛ aga,* lobo ɖu nǔ e è sɔ́ dó sá vɔ̌ nú vodún lɛ́ é. 21 Un ná ɛ hwenu bónú hwɛ tɔn lɛ́ ní vɛ́ n’i,* amɔ̌, é jló ná jó aga* e lɛ wɛ é ɖe é dó ǎ. 22 Éɖíe! Un ɖo nǎ sɔ́ ɛ nyi dó azɔnzan jí wɛ, bo ná ɖó wǔvɛ́ ɖaxó nú mɛ e nɔ lɛ aga* xá ɛ lɛ́ é, afi nú nǔ e é nɔ sísɛ́ yě bɔ yě nɔ wa lɛ́ é vɛ́ nú yě* ɔ nɛ́. 23 Un ná sɔ́ jɛmɛjí e nɔ hu mɛ é dó hu vǐ tɔn lɛ́, mɔ̌ mɛ ɔ, agun lɛ́ bǐ ná tuun ɖɔ nyi wɛ nyí mɛ e nɔ kíjé linlin e gɔ́ngɔ́n lɛ́ é kpó ayi kpó kpɔ́n é, bɔ un ná sú axɔ́ mɛ ɖokpó ɖokpó sɔgbe xá nǔwiwa tɔn lɛ́.

24 “‘É ɖo mɔ̌ có, mi mɛ e kpo ɖo agun Tiatíi tɔn mɛ lɛ́ é ɔ, un ɖo ɖiɖɔ nú midɛɛ lɛ́ e ma xwedó nǔkplɔ́nmɛ énɛ́ ǎ, bo ma kplɔ́n bo tuun nǔ e mɛ lɛ́ nɔ ylɔ́ ɖɔ “Satáan sín nǔ e gɔ́ngɔ́n lɛ́ é” ǎ lɛ́ é bǐ wɛ ɖɔ: Un ɖo agban kpinkpɛn ɖěvo ɖěbǔ ɖó kɔ jí nú mi wɛ ǎ. 25 Nǔ ɔ kpowun wɛ nyí ɖɔ mi ní tɛ́ dó nǔ e mi ɖó é wú gbánwúngbánwún, káká jɛ hwenu e un ná wá é. 26 Mɛ e ná ɖu ɖ’é jí bo ná xwedó nǔwiwa ce lɛ́ káká jɛ vivɔnu é ɔ, un ná ná ɛ acɛ dó akɔta lɛ́ jí, 27 lěe Tɔ́ ce ná mì gbɔn é, bɔ é ná zán gankpo dó xlɛ́ ali togun ɔ lɛ̌ngbɔ́nyitɔ́ ɖɔhun, mɔ̌ mɛ ɔ, yě ná gba hánnyá kozɛ́n ɖɔhun. 28 Bɔ un ná ná ɛ sunví zǎnzǎn tɔn. 29 Mɛ e ɖó tó é ní se nǔ e ɖɔ nú agun lɛ́ wɛ gbigbɔ ɔ ɖe lɛ́ é.’

3 “Wlǎn sɛ́dó agun e ɖo Sáadu é sín wɛnsagun ɖɔ: Mɛ e ɖó gbigbɔ tɛ́nwe Mawu tɔn lɛ́ kpó sunví tɛ́nwe lɛ́ kpó é ɔ, xó e é ɖɔ lɛ́ é ɖíe: ‘Un tuun nǔ e wa wɛ a ɖe lɛ́ é, bo lɛ́ tuun ɖɔ a ɖo gbɛ bɔ è nɔ ɖɔ,* loɔ, mɛkúkú wɛ nú we. 2 Bo nɔ acéjí, bo ná hlɔ̌nhlɔ́n nǔ e kpo ɖo así towe bo ko ɖo kú lixo lɛ́ é, ɖó un mɔ bɔ a w’azɔ̌ towe bǐ mlɛ́mlɛ́* ɖo Mawu ce nukɔn ǎ. 3 Énɛ́ wú ɔ, kpo ɖo ayi hɛn dó nǔ e a mɔ yí é kpó nǔ e a se é kpó wú wɛ,* nɔ ɖo xwixwedó wɛ, hwɛ towe lɛ́ ní vɛ́ nú we.* É ɖo wɛn ɖɔ, ényí a ma fɔ́n ǎ ɔ, un ná wá ajotɔ́ ɖɔhun, bɔ a ná tuun gan e mɛ un ná wá gɔ̌n towe é ǎ.

4 “‘É ɖo mɔ̌ có, a ɖó mɛ* kpɛɖé ɖo Sáadu bɔ yě hɛn awu yětɔn lɛ́ blí ǎ, yě ná ɖi zɔnlin xá mì ɖo awu wěwé mɛ, ɖó yě jɛxá. 5 Hǔn, mɛ e ná ɖu ɖ’é jí é ná dó awu wěwé, bɔ un ná súnsún nyǐkɔ tɔn sín gbɛwéma ɔ mɛ ɖo ali ɖěbǔ nu ǎ, loɔ, un ná yí gbe ɖo Tɔ́ ce kpó wɛnsagun tɔn lɛ́ kpó nukɔn ɖɔ un tuun nyǐkɔ tɔn. 6 Mɛ e ɖó tó é ní se nǔ e ɖɔ nú agun lɛ́ wɛ gbigbɔ ɔ ɖe lɛ́ é.’

7 “Wlǎn sɛ́dó agun e ɖo Filadɛlufíi é sín wɛnsagun ɖɔ: Mɛ e nyí mɛ mímɛ́ é, mɛ titewungbe* ɔ, mɛ e sí cávi Davídi tɔn ɖe é, mɛ e nɔ hun bónú mɛ ɖěbǔ ní ma sú ó, bo nɔ sú bónú mɛ ɖěbǔ ní ma hun ó é ɔ, xó e é ɖɔ lɛ́ é ɖíe: 8 ‘Un tuun nǔ e wa wɛ a ɖe lɛ́ é. Éɖíe! Un hun hɔn ɖé ɖo nukɔn towe, bɔ mɛ ɖěbǔ sixú sú ǎ. Un tuun ɖɔ hlɔ̌nhlɔ́n kpɛɖé wɛ a ɖó, é ɖo mɔ̌ có, a xwedó xó ce, bo nɔ gbejí nú nyǐkɔ ce. 9 Éɖíe! Mɛ ɖěɖěe ɖo gbɛ̌ta* Satáan tɔn mɛ bo nɔ ɖo adingban ɖó wɛ, bo nɔ ɖɔ ɖɔ émí nyí Jwifu bo ma ka nyí ǎ lɛ́ é ɔ, un ná bló, ɛɛn, un ná bló bɔ yě ná wá, bo ná ɖe kɔ́* ɖo afɔ towe lɛ́ kɔn; un ná bló bɔ yě ná tuun ɖɔ un yí wǎn nú we. 10 Ðó a hɛn xó e a se dó didɛ ce wú é* wútu ɔ, ée mɛtɛ́nkpɔ́n sín hwenu e jawě ayǐkúngban ɔ blěbú jí, bo ná tɛ́n mɛ e nɔ nɔ ayǐkúngban ɔ jí lɛ́ é kpɔ́n é ná wá é ɔ, nyi lɔ ná nya xɛ ɖo jǐ we. 11 Un jawě gɔ̌n towe ɖo yǐyá mɛ. Kpo ɖo títɛ́dó nǔ e a ɖó é wú wɛ gbánwúngbánwún, bónú mɛ ɖěbǔ ní ma yí axɔ́súgbákún towe ó.

12 “ ‘Mɛ e ná ɖu ɖ’é jí é ɔ, un ná bló bɔ é ná nyí dotín ɖé ɖo tɛ́npli Mawu ce tɔn mɛ, bɔ é sɔ́ ná gosín mɛ gbeɖé ǎ; un ná wlán Mawu ce sín nyǐkɔ kpó toxo Mawu ce tɔn sín nyǐkɔ kpó dó wǔ tɔn, toxo énɛ́ wɛ nyí Jeluzalɛ́mu yɔ̌yɔ́ e gosín Mawu ce gɔ́n, bo ɖo te jɛ sín jǐxwé wɛ é; un ná lɛ́ wlán nyiɖésúnɔ sín nyǐkɔ yɔ̌yɔ́ ɔ dó wǔ tɔn. 13 Mɛ e ɖó tó é ní se nǔ e ɖɔ nú agun lɛ́ wɛ gbigbɔ ɔ ɖe lɛ́ é.’

14 “Wlǎn sɛ́dó agun e ɖo Lawodisée é sín wɛnsagun ɖɔ: Mɛ e nyí Amǐ, bo nyí kúnnuɖetɔ́ gbejínɔtɔ́ titewungbe* ɔ, lobo nyí bǐbɛ́mɛ nǔɖíɖó Mawu tɔn lɛ́ tɔn é ɔ, xó e é ɖɔ lɛ́ é ɖíe: 15 ‘Un tuun nǔ e wa wɛ a ɖe lɛ́ é, bo tuun ɖɔ a kún fá ó, a kún ka lɛ́ hun zo ó. É ná ko jló mì ɖɔ a ní fá alǒ hun zo. 16 Énɛ́ wú ɔ, ɖó gblɔ̌ wɛ a gblɔ́, bo ma hun zo alǒ fá ǎ wútu ɔ, un ná vi we sín nu ce mɛ. 17 Ðó a nɔ ɖɔ: “Un jɛ dɔkun, bo xo dɔkun gěgé kplé, bɔ nǔ ɖěbǔ hwedó mì ǎ,” bɔ a ma ka tuun ɖɔ émí nyí hɛ̌ntɔ́nɔ, lelenɔ, wamamɔnɔ, nukúntɔ́nnɔ, bo lɛ́ nyí mɛ̌tɔ́nɔ ǎ wútu ɔ, 18 un ɖo wě ɖe xá we wɛ ɖɔ a ní xɔ siká e è sɔ́ myɔ dó klɔ́ ná é ɖo gɔ̌n ce, bo ná dó sixú húzú dɔkunnɔ, ɖɔ a ní xɔ awu wěwé ɖo gɔ̌n ce bo ná dó sixú ɖó awu ɖo kɔ, bónú mɛ̌ e a ɖe bɔ é nyí winnyánú é ní ma jɛ wě ó; lɛ̌ xɔ nukúntínkɛ́n ɖo gɔ̌n ce bá gbídí dó nukún towe lɛ́ jí, bo ná dó sixú mɔ nǔ.

19 “‘Mɛ e un yí wǎn ná lɛ́ é bǐ wɛ un nɔ kɛ nu dó nǔ wú ná, bo nɔ kplɔ́n. Énɛ́ wú ɔ, hwɛ towe lɛ́ ní vɛ́ nú we,* bónú a ní nɔ ɖó kan dó nǔ wú. 20 Éɖíe! Un ɖo te ɖo hɔn ta bo ɖo hɔn xúxú wɛ. Mɛ ɖěbǔ e ná se gbe ce, bo ná hun hɔn é ɔ, un ná byɔ́ xwé tɔn gbe, bo ná ɖu gbadanu núɖuɖu xá ɛ, bɔ é ná ɖu xá mì. 21 Mɛ e ná ɖu ɖ’é jí é ɔ, un ná ná ɛ gbe bɔ é ná jínjɔ́n ayǐ xá mì ɖo axɔ́súzinkpo ce jí, lěe nyi lɔ ɖu ɖ’é jí bo jínjɔ́n ayǐ xá Tɔ́ ce ɖo axɔ́súzinkpo tɔn jí gbɔn é. 22 Mɛ e ɖó tó é ní se nǔ e ɖɔ nú agun lɛ́ wɛ gbigbɔ ɔ ɖe lɛ́ é.’”

4 Énɛ́ gúdo ɔ, un mɔ hɔn ɖé ɖo hunhun ɖo jǐxwé, bɔ gbe nukɔntɔn e un se bɔ é ɖo xó ɖɔ nú mì wɛ é ɖɔ nǔ kpɛn ɖɔhun, bo ɖɔ: “Wǎ aga fí, bónú má xlɛ́ nǔ e ɖó ná jɛ lɛ́ é we.” 2 Énɛ́ gúdo ɔ, gbigbɔ wá jǐ ce tlóló, bɔ un mɔ axɔ́súzinkpo ɖé ɖo jǐxwé, bɔ mɛɖé ɖo ayǐjínjɔ́n ɖo axɔ́súzinkpo ɔ jí. 3 Mɛ e ɖo ayǐjínjɔ́n é sín nukúnmɛ cí awǐnnya jasipée kpó awǐnnya sadwáni* kpó ɖɔhun, bɔ nyǐ ɖi lɛ́ lɛ̌ dó axɔ́súzinkpo ɔ bǐ bo cí emɛlódu* ɖɔhun.

4 Axɔ́súzinkpo 24 lɛ́ lɛ̌ dó axɔ́súzinkpo ɔ, bɔ un mɔ mɛxó 24 ɖo ayǐjínjɔ́n ɖo axɔ́súzinkpo énɛ́ lɛ́ jí, bɔ yě dó awu wěwé, lobɔ axɔ́súgbákún e è sɔ́ siká dó bló ná lɛ́ é ɖo ta nú yě. 5 Jǐ nɔ kɛwun, gbe ɖé lɛ́ nɔ ɖi, bɔ xɛbyoso nɔ dó gbe sín axɔ́súzinkpo ɔ kɔn; bɔ zogbɛ́n tɛ́nwe ɖo títá ɖo axɔ́súzinkpo ɔ nukɔn; zogbɛ́n lɛ́ nɔ te nú gbigbɔ tɛ́nwe Mawu tɔn lɛ́. 6 Nǔɖé ɖo axɔ́súzinkpo ɔ nukɔn, bo ɖi xu e cí wěkpɛ́n ɖɔhun é ɖé, bo cí klisutálu ɖɔhun.

Nǔɖogbɛ ɛnɛ ɖo axɔ́súzinkpo ɔ tɛ́ntin,* bo lɛ́vɔ́ lɛ́ lɛ̌ dó axɔ́súzinkpo ɔ, bɔ nukún kpé yě wú ɖo gǔdo nukɔn. 7 Nǔɖogbɛ nukɔntɔn ɔ cí kinnikínní ɖɔhun, nǔɖogbɛ wegɔ́ ɔ cí nyibúsú wínnyáwínnyá ɖɔhun, nǔɖogbɛ atɔngɔ́ ɔ sín nukúnmɛ cí gbɛtɔ́ nukúnmɛ ɖɔhun, bɔ nǔɖogbɛ ɛnɛgɔ́ ɔ cí hɔ̌n e ɖo zinzɔn wɛ é ɖɔhun. 8 Nǔɖogbɛ ɛnɛ lɛ́ ɖokpó ɖokpó ɖó awa ayizɛ́n; nukún kpé awa lɛ́ wú gbɔn wěxo kpó xomɛ kpó bǐ. Zǎn kéze ɔ, yě nɔ ɖo ɖiɖɔ wɛ ɖɔ: “Mǐmɛ́, mǐmɛ́, mǐmɛ́ wɛ nyí Jexóva* Mawu, Ajalɔ̌nlɔn, éé tíin ɖ’ayǐ, bo tíin din bo lɛ́ jawě é.”

9 Ényí nǔɖogbɛ lɛ́ kpa susu nú Mɛ e ɖo ayǐjínjɔ́n ɖo axɔ́súzinkpo ɔ jí é, Mɛ e ɖo gbɛ káká sɔ́yi mavɔmavɔ é, bo wlí yɛ̌yi n’i, bo lɛ́ dó kú n’i hweɖébǔnu lě ɔ, 10 mɛxó 24 lɛ́ nɔ jɛ kpo ɖo Mɛ e ɖo ayǐjínjɔ́n ɖo axɔ́súzinkpo ɔ jí é nukɔn, bo nɔ sɛn Mɛ e ɖo gbɛ káká sɔ́yi mavɔmavɔ é, lobo nɔ nyi axɔ́súgbákún yětɔn dó axɔ́súzinkpo ɔ nukɔn, bo nɔ ɖɔ: 11 “Jexóva* Mawu mǐtɔn, susu, yɛ̌yi kpó hlɔ̌nhlɔ́n kpó jɛxá we, ɖó a dá nǔ lɛ́ bǐ, jlǒ towe wɛ zɔ́n bɔ yě tíin, bɔ è dá yě.”

5 Un mɔ wěma mlámlá e jí è wlán nǔ dó ɖo akpáxwé we lɛ́ bǐ,* bo ɖó wuntun* gbánwúngbánwún ɖo fí tɛ́nwe é ɖokpó ɖo ɖisílɔ mɛ nú Mɛ e ɖo ayǐjínjɔ́n ɖo axɔ́súzinkpo ɔ jí é. 2 Un mɔ wɛnsagun hlɔ̌nhlɔ́nnɔ ɖokpó ɖo xó sú wɛ tlílí, bo nɔ jlá ɖɔ: “Mɛ̌ ka jɛxá bo ná gba wěma mlámlá ɔ sín wuntun lɛ́, lobo hun wěma mlámlá ɔ?” 3 Amɔ̌, mɛ ɖěbǔ ɖo jǐxwé, alǒ ayǐkúngban jí, alǒ ayǐkúngban glɔ́, bo kpé wú bo ná hun wěma mlámlá ɔ alǒ kpɔ́n mɛ ǎ. 4 Un jɛ avǐ ya jí hoho, ɖó è mɔ mɛ e jɛxá bo ná hun wěma mlámlá ɔ, alǒ kpɔ́n mɛ é ɖě ǎ. 5 Amɔ̌, mɛxó lɛ́ ɖokpó ɖɔ nú mì ɖɔ: “Ma sɔ́ y’avǐ ɖě ó. Kpɔ́n! Kinnikínní akɔta Judáa tɔn tɔn, éé nyí kúnkan Davídi tɔn é ko ɖu ɖ’é jí, énɛ́ wú ɔ, é jɛxá bo ná gba wěma mlámlá ɔ sín wuntun tɛ́nwe lɛ́, lobo hun wěma mlámlá ɔ.”

6 Un mɔ lɛ̌ngbɔ́ví e é cí ɖɔ hu wɛ è hu i ɖɔhun é ɖokpó ɖo axɔ́súzinkpo ɔ tɛ́ntin, ɖo nǔɖogbɛ ɛnɛ lɛ́ kpó mɛxó lɛ́ kpó tɛ́ntin; é ɖó zo tɛ́nwe bo lɛ́ ɖó nukún tɛ́nwe, bɔ nukún lɛ́ nɔ te nú gbigbɔ tɛ́nwe Mawu tɔn e è sɛ́ dó ayǐkúngban ɔ bǐ jí é. 7 Tlóló ɔ, Lɛ̌ngbɔ́ví ɔ sɛ yi nukɔn, bo yí wěma mlámlá ɔ ɖo ɖisílɔ Mɛ e ɖo ayǐjínjɔ́n ɖo axɔ́súzinkpo ɔ jí é tɔn mɛ. 8 Ée Lɛ̌ngbɔ́ví ɔ yí wěma mlámlá ɔ é ɔ, nǔɖogbɛ ɛnɛ lɛ́ kpó mɛxó 24 lɛ́ kpó jɛ kpo ɖo nukɔn tɔn, bɔ yě mɛ ɖokpó ɖokpó hɛn agǐdigbo* kpó gannú e è sɔ́ siká dó bló bɔ zǎlínkpɔ́n gɔ́ é kpó. (Zǎlínkpɔ́n ɔ nɔ te nú mɛ mímɛ́ lɛ́ sín ɖɛ.) 9 Bɔ yě nɔ ɖo han yɔ̌yɔ́ ɖé ji wɛ, bo nɔ ɖɔ: “A jɛxá bo ná yí wěma mlámlá ɔ, bo gba wuntun tɔn lɛ́, ɖó è hu we, bɔ gbɔn hun towe gblamɛ ɔ, a xɔ gbɛtɔ́ lɛ́ nú Mawu ɖo hɛ̌nnu bǐ, gbe bǐ, togun bǐ kpó akɔta bǐ kpó mɛ; 10 a bló bɔ yě nyí axɔ́súɖuto ɖé kpó vɔ̌sánúxwlémawutɔ́ lɛ́ kpó nú Mawu mǐtɔn, bɔ yě ná nyí axɔ́sú bo kpa acɛ dó ayǐkúngban ɔ jí.”

11 Bɔ un mɔ, bo lɛ́ se wɛnsagun gěgé sín gbe, bɔ yě lɛ́ lɛ̌ dó axɔ́súzinkpo ɔ, nǔɖogbɛ lɛ́ kpó mɛxó lɛ́ kpó; kɛ́n yětɔn nyí wɔ̌blíwɔ̌va,* 12 bɔ yě sú xó tlílí bo ɖo ɖiɖɔ wɛ ɖɔ: “Lɛ̌ngbɔ́ví e è hu é jɛxá bo ná mɔ acɛ, dɔkun, nǔnywɛ́, hlɔ̌nhlɔ́n, yɛ̌yi, susu kpó nyɔ̌ná kpó yí.”

13 Un se bɔ nǔɖíɖó e ɖo jǐxwé, ayǐkúngban jí, ayǐkúngban glɔ́ kpó xu mɛ kpó lɛ́ é bǐ, ɛɛn, yě bǐ ɖo ɖiɖɔ wɛ ɖɔ: “Kpikpa, yɛ̌yi, susu kpó hlɔ̌nhlɔ́n kpó ní nyí Mɛ e ɖo ayǐjínjɔ́n ɖo axɔ́súzinkpo ɔ jí é kpó Lɛ̌ngbɔ́ví ɔ kpó tɔn káká sɔ́yi mavɔmavɔ.” 14 Nǔɖogbɛ ɛnɛ lɛ́ ɖo ɖiɖɔ wɛ ɖɔ: “Amǐ!” Bɔ mɛxó lɛ́ jɛ kpo, bo sɛn Mawu.

6 Bɔ un mɔ hwenu e Lɛ̌ngbɔ́ví ɔ gba wuntun tɛ́nwe lɛ́ ɖokpó é, lobɔ un se bɔ nǔɖogbɛ ɛnɛ lɛ́ ɖokpó ɖɔ kpó gbe e ɖɔ nǔ xɛbyoso ɖɔhun é kpó ɖɔ: “Wǎ!” 2 Bɔ un mɔ sɔ́ wěwé ɖokpó, lobɔ mɛ e ɖ’é jí é hɛn gǎ ɖokpó; è ná ɛ axɔ́súgbákún ɖokpó, bɔ é ɖidó bo ná ɖu ɖ’é jí, lobo ná ɖu ɖ’é jí bǐ mlɛ́mlɛ́.

3 Ée é gba wuntun wegɔ́ ɔ é ɔ, un se bɔ nǔɖogbɛ wegɔ́ ɔ ɖɔ: “Wǎ!” 4 Sɔ́ ɖěvo tɔ́n, bo ɖó sinmɛ vɔvɔ cɛ́cɛ́, bɔ è ná gbe mɛ e ɖ’é jí é ɖɔ é ní ɖe fífá sín ayǐkúngban ɔ jí, bónú mɛ lɛ́ ní hu yěɖée lɛ́, lobɔ è ná ɛ hwǐ ɖaxó ɖokpó.

5 Ée é gba wuntun atɔngɔ́ ɔ é ɔ, un se bɔ nǔɖogbɛ atɔngɔ́ ɔ ɖɔ: “Wǎ!” Bɔ un mɔ sɔ́ wiwi ɖokpó, lobɔ nǔdagan ɖokpó ɖo mɛ e ɖ’é jí é sín alɔ mɛ. 6 Bɔ un se bɔ nǔ gbe ɖɔhun ɖé ɖi ɖo nǔɖogbɛ ɛnɛ lɛ́ tɛ́ntin bo ɖɔ: “È nɔ xɔ blěe nǔjlɛ́nú* ɖokpó yí deníye* ɖokpó, bo nɔ xɔ ɔ́ji nǔjlɛ́nú atɔn yí deníye ɖokpó; è ma hɛn olívumi kpó vɛ̌ɛn kpó gú ó.”

7 Ée é gba wuntun ɛnɛgɔ́ ɔ é ɔ, un se nǔɖogbɛ ɛnɛgɔ́ ɔ sín gbe, bɔ é ɖɔ: “Wǎ!” 8 Bɔ un mɔ sɔ́ e ɖó sinmɛ afínnɔ é ɖokpó, bɔ mɛ e ɖ’é jí é nɔ nyí Kú. Bɔ Yɔdo* ɖo xwixwedó è wɛ tútútú. È ná yě acɛ dó ɛnɛvlɔ́ɖó ayǐkúngban ɔ tɔn jí bónú yě ná sɔ́ hwǐ gaga, nǔɖuɖuhwedómɛ, jɛmɛjí e nɔ hu mɛ é kpó gběkanlin ayǐkúngban ɔ tɔn lɛ́ kpó dó hu mɛ.

9 Ée é gba wuntun atɔ́ɔ́ngɔ́ ɔ é ɔ, un mɔ mɛ ɖěɖěe è hu ɖó xó Mawu tɔn kpó kúnnu e yě ɖe é kpó wú lɛ́ é sín lǐndɔ̌n* lɛ́ ɖo vɔ̌sákpe ɔ glɔ́. 10 Yě sú xó tlílí bo ɖɔ: “Aklúnɔ Nǔbǐwúkpétɔ́, mɛ mímɛ́, mɛ titewungbe* ɔ, káká jɛ hwetɛ́nu a ka ná nɔ te yi ɖó, bo ná ɖɔ hwɛ xá mɛ e ɖo ayǐkúngban ɔ jí lɛ́ é, lobo ná ba hlɔn hun mǐtɔn tɔn?” 11 Bɔ è ná awu gaga wěwé ɖokpó yě mɛ ɖokpó ɖokpó, bo ɖɔ nú yě ɖɔ yě ní lɛ́ gbɔjɛ kpɛɖé, káká jɛ hwenu e kannumɔ hǎtɔ́ yětɔn lɛ́ kpó nɔví yětɔn e hu gbé è ja yěɖɔhun lɛ́ é kpó sín kɛ́n ná sɔgbe é.

12 Un mɔ hwenu e é gba wuntun ayizɛ́ngɔ́ ɔ é, bɔ ayǐkúngban dán wǔ syɛ́nsyɛ́n; hwesivɔ́ wi ati e è sɔ́ kanlinfún* dó bló é ɖɔhun, bɔ sun ɔ blěbú cí hun ɖɔhun, 13 lobɔ sunví jǐxwé tɔn lɛ́ j’ayǐ jɛ ayǐkúngban jí, lěe ényí jɔhɔn syɛ́nsyɛ́n dán fígitín ɔ, fígi xɛ́lú lɛ́ nɔ j’ayǐ gbɔn é ɖɔhun. 14 Jǐnukúnsin bú, lěe è nɔ mlá wěma ɖé gbɔn é ɖɔhun, bɔ è ɖe só lɛ́ bǐ kpó tɔtɛ́ntinto lɛ́ bǐ kpó sín tɛn yětɔn lɛ́ mɛ. 15 Énɛ́ ɔ, axɔ́sú ayǐkúngban ɔ tɔn lɛ́, axɔ́súzɔ́watɔ́ nukúnɖéjí lɛ́, sɔ́ja afatɔ́ngán lɛ́, dɔkunnɔ lɛ́, hlɔ̌nhlɔ́nnɔ lɛ́, kannumɔ lɛ́ bǐ kpó mɛ e ɖo yěɖée sí lɛ́ é bǐ kpó hwlá cí sónu lɛ́ mɛ kpó só lɛ́ vlamɛ kpó. 16 Bɔ yě nɔ ɖo ɖiɖɔ nú só lɛ́ kpó awǐnnya lɛ́ kpó wɛ ɖɔ: “Mi mu jɛ jǐ mǐtɔn, bo hwlá mǐ dó Mɛ e ɖo ayǐjínjɔ́n ɖo axɔ́súzinkpo ɔ jí é kpó xomɛsin Lɛ̌ngbɔ́ví ɔ tɔn kpó, 17 ɖó xomɛsinzán ɖaxó yětɔn ko wá; mɛ̌ ka ná kpé wú bo nɔ te ɖo nukɔn tɔn?”

7 Énɛ́ gúdo ɔ, un mɔ wɛnsagun ɛnɛ, bɔ yě ɖo te ɖo wɛ̌kɛ́zo ɛnɛ ayǐkúngban ɔ tɔn lɛ́ jí, bo hɛn jɔhɔn ɛnɛ ayǐkúngban ɔ tɔn lɛ́ ɖó te gbánwúngbánwún, bónú jɔhɔn ɖěbǔ ní ma nyi dó ayǐkúngban ɔ, alǒ xu, abǐ atín ɖěbǔ jí ó. 2 Un mɔ wɛnsagun ɖěvo, bɔ é gosín zǎnzǎnhwe jí* bo ɖo jǐ yi wɛ, bo hɛn wuntun Mawu gbɛɖe ɔ tɔn ɖokpó, bɔ é sú xó tlílí sɛ́dó wɛnsagun ɛnɛ e è ná acɛ ɖɔ yě ní wa nǔ dó ayǐkúngban ɔ kpó xu kpó wú lɛ́ é, 3 bo ɖɔ: “Mi ma wa nǔ dó ayǐkúngban ɔ, alǒ xu, abǐ atín lɛ́ wú káká cóbónú mǐ ná ɖó wuntun Mawu mǐtɔn sín kannumɔ lɛ́ ɖó nukɔn fó ó.”

4 Un se mɛ nabí e è ɖó wuntun é sín kɛ́n, mɛ 144 000 wɛ è ɖó wuntun ɖo akɔta Izlayɛ́li ví lɛ́ tɔn bǐ mɛ:

9 Énɛ́ gúdo ɔ, un mɔ ahwan ɖaxó ɖé, bɔ mɛ ɖěbǔ sixú xa yě ǎ; yě gosín to bǐ, akɔta bǐ, togun bǐ kpó gbe bǐ kpó mɛ, bo ɖo te ɖo axɔ́súzinkpo ɔ kpó Lɛ̌ngbɔ́ví ɔ kpó nukɔn, bɔ yě dó awu gaga wěwé; bɔ děma ɖo alɔ mɛ nú yě. 10 Yě nɔ ɖo xó sú wɛ tlílí ɖɔ: “Mawu mǐtɔn e ɖo ayǐjínjɔ́n ɖo axɔ́súzinkpo ɔ jí é kpó Lɛ̌ngbɔ́ví ɔ kpó gɔ́n wɛ hwlɛngán mǐtɔn gosín.”

11 Wɛnsagun lɛ́ bǐ ɖo te bo lɛ́ lɛ̌ dó axɔ́súzinkpo ɔ kpó mɛxó lɛ́ kpó, kpódó nǔɖogbɛ ɛnɛ lɛ́ kpán, bɔ yě xwe agbɔ̌nnusú do ɖo axɔ́súzinkpo ɔ nukɔn, bo sɛn Mawu, 12 bo nɔ ɖɔ: “Amǐ! Kpikpa, susu, nǔnywɛ́, kúdídó, yɛ̌yi, acɛ kpó hlɔ̌nhlɔ́n kpó ní nyí Mawu mǐtɔn tɔn káká sɔ́yi mavɔmavɔ. Amǐ.”

13 Énɛ́ ɔ, mɛxó lɛ́ ɖokpó ɖɔ nú mì ɖɔ: “Mɛ énɛ́ lɛ́ e ɖo awu gaga wěwé mɛ é ɔ, mɛ̌ mɛ̌ e ka wɛ, bɔ fítɛ́ yě ka gosín?” 14 Bɔ tlóló ɔ, un ɖɔ n’i ɖɔ: “Aklúnɔ ce, hwi wɛ tuun.” Bɔ é ɖɔ nú mì ɖɔ: “Mɛ énɛ́ lɛ́ wɛ nyí mɛ ɖěɖěe xo wǔvɛ́ ɖaxó ɔ zlɛ́ lɛ́ é, bɔ yě nya awu gaga yětɔn lɛ́ dó Lɛ̌ngbɔ́ví ɔ sín hun mɛ, bɔ awu lɛ́ wé. 15 Énɛ́ wú wɛ yě ɖo te ɖo axɔ́súzinkpo Mawu tɔn nukɔn, bo ɖo sinsɛnzɔ́ mímɛ́ wa n’i wɛ zǎn kéze ɖo tɛ́npli tɔn mɛ; bɔ Mɛ e ɖo ayǐjínjɔ́n ɖo axɔ́súzinkpo ɔ jí é ná vlɔ́n goxɔ tɔn dó yě jí. 16 Xovɛ́ sɔ́ ná sin yě ɖě ǎ, kɔ ka sɔ́ ná xú yě ɖě ǎ, mɔ̌ jɛ́n hwesivɔ́ ma ná mɛ yě ǎ é nɛ́, yě ka ná lɛ́ mɔ yǒzo ɖě ǎ, 17 ɖó Lɛ̌ngbɔ́ví ɔ, éé ɖo axɔ́súzinkpo ɔ tɛ́ntin é ná nyí lɛ̌ngbɔ́nyitɔ́ yětɔn, bo ná xlɛ́ ali yě yi jɔtɛn* sin e nɔ ná gbɛ mɛ é tɔn lɛ́ kɔn. Bɔ Mawu ná súnsún ɖasin bǐ sín nukún yětɔn mɛ.”

8 Ée é gba wuntun tɛ́nwegɔ́ ɔ é ɔ, fí bǐ cí tóó ɖo jǐxwé nú ganxixo ɖokpó sín vlɔ̌ mɔ̌. 2 Bɔ un mɔ wɛnsagun tɛ́nwe ɖo te ɖo Mawu nukɔn, bɔ è sɔ́ kpɛn tɛ́nwe nú yě.

3 Wɛnsagun ɖěvo hɛn zǎlínkpɔ́nhɛnnú* e è sɔ́ siká dó bló é ɖé, bo wá lobo nɔ te ɖo vɔ̌sákpe ɔ kɔn; è ná ɛ zǎlínkpɔ́n gěgé bónú é ná xwlé Mawu ɖo vɔ̌sákpe e è sɔ́ siká dó bló, bɔ é ɖo axɔ́súzinkpo ɔ nukɔn é jí, ɖo hwe ɖokpó ɔ nu xá mɛ mímɛ́ lɛ́ bǐ sín ɖɛ lɛ́. 4 Zǎlínkpɔ́n e wɛnsagun ɔ dó zo é sín azizɔ yi jǐ ɖó kpɔ́ xá mɛ mímɛ́ lɛ́ sín ɖɛ lɛ́ ɖo Mawu nukɔn. 5 Amɔ̌ tlóló ɔ, wɛnsagun ɔ zé zǎlínkpɔ́nhɛnnú ɔ, bo bɛ́ myɔkán* e ɖo vɔ̌sákpe ɔ jí lɛ́ é ɖě d’é mɛ bɔ é gɔ́, lobo nyi dó ayǐkúngban ɔ jí. Xɛbyoso dó gbe, gbe ɖé lɛ́ ɖi, jǐ kɛwun, bɔ ayǐkúngban dán wǔ. 6 Wɛnsagun tɛ́nwe e hɛn kpɛn tɛ́nwe lɛ́ é sɔ́ nǔ bo ná kún kpɛn lɛ́.

7 Wɛnsagun nukɔntɔn ɔ kún kpɛn tɔn. Bɔ kɛ́njí kpó myɔ kpó cáká kpó kanjɔ kpó, bo kɔn nyi ayǐkúngban ɔ jí; ayǐkúngban ɔ sín atɔnvlɔ́ɖó fyɔ́, bɔ atín lɛ́ sín atɔnvlɔ́ɖó fyɔ́, lobɔ gběhan mǔ lɛ́ bǐ fyɔ́.

8 Wɛnsagun wegɔ́ ɔ kún kpɛn tɔn. Bɔ è nyi nǔ e cí só ɖaxó ɖɔhun bo ɖo myɔ ji wɛ é ɖé dó xu mɛ. Bɔ xu sín atɔnvlɔ́ɖó húzú kanjɔ; 9 nǔɖogbɛ e ɖo xu mɛ lɛ́ é* sín atɔnvlɔ́ɖó kú, bɔ tɔjíhún lɛ́ sín atɔnvlɔ́ɖó gba.

10 Wɛnsagun atɔngɔ́ ɔ kún kpɛn tɔn. Sunví ɖaxó e ɖo kínkɔ́n wɛ zogbɛ́n ɖɔhun é j’ayǐ sín jǐxwé, bo jɛ tɔsisa lɛ́ kpó tɔjɔtɛn* lɛ́ kpó sín atɔnvlɔ́ɖó mɛ. 11 Sunví ɔ sín nyǐkɔ nɔ nyí V ǐvɛ́.* Bɔ sin lɛ́ sín atɔnvlɔ́ɖó húzú nǔ vívɛ́, bɔ sin lɛ́ zɔ́n bɔ mɛ gěgé kú ɖó vɛ̌ e yě vɛ́ é wútu.

12 Wɛnsagun ɛnɛgɔ́ ɔ kún kpɛn tɔn. Bɔ è dó nǔ hwesivɔ́ sín atɔnvlɔ́ɖó, bo dó nǔ sun sín atɔnvlɔ́ɖó, lobo dó nǔ sunví lɛ́ sín atɔnvlɔ́ɖó bónú atɔnvlɔ́ɖó yětɔn ní d’ablu, lobonú kéze sín atɔnvlɔ́ɖó ní ba wěziza kpo, bónú é ní lɛ́ nyí nǔ ɖokpó ɔ nú zǎn lɔmɔ̌.

13 Bɔ un mɔ, bo lɛ́ se bɔ hɔ̌n e ɖo zinzɔn gbɔn jǐnukúnsin tɛ́ntin wɛ é ɖé ɖo xó sú wɛ tlílí ɖɔ: “Heelú, heelú, heelú mi mɛ e nɔ nɔ ayǐkúngban ɔ jí lɛ́ é, ɖó nǔ ɖiɖɔ kpɛn e kpo bɔ wɛnsagun atɔn lɛ́ ɖo nǎ kún wɛ lɛ́ é tɔn wútu.”

9 Wɛnsagun atɔ́ɔ́ngɔ́ ɔ kún kpɛn tɔn. Bɔ un mɔ sunví ɖé, bɔ é j’ayǐ sín jǐxwé jɛ ayǐkúngban jí, bɔ è sɔ́ dotɔ domaɖó-azan ɔ tɔn sín cávi n’i. 2 É hun dotɔ domaɖó-azan ɔ tɔn, bɔ azizɔ tɔ́n sín dotɔ ɔ mɛ bo cí myɔkpó ɖaxó ɖé sín azizɔ ɖɔhun, bɔ dotɔ ɔ sín azizɔ zɔ́n bɔ hwesivɔ́ d’ablu, lobɔ jɔhɔn mɛ lɔmɔ̌ d’ablu. 3 Kle lɛ́ tɔ́n sín azizɔ ɔ mɛ wá ayǐkúngban jí, bɔ è ná yě acɛ, bɔ é nyí ɖokpó ɔ kpó acɛ e hɔnkéklě ayǐkúngban ɔ tɔn lɛ́ ɖó é kpó. 4 È ɖɔ nú yě ɖɔ yě ní ma wa nǔ dó gběhan ayǐkúngban ɔ tɔn lɛ́, alǒ ama e ɖo mǔ lɛ́ é ɖěbǔ, alǒ atín ɖěbǔ wú ó, loɔ, yě ní wa nǔ dó mɛ e wuntun Mawu tɔn ma ɖo nukɔn ná ǎ lɛ́ é kɛ́ɖɛ́ wú.

5 È ná gbe kle lɛ́ bónú yě ná hu mɛ énɛ́ lɛ́ ǎ, loɔ, è ná gbe yě bónú yě ná ɖó wǔvɛ́ nú yě nú sun atɔ́ɔ́n, bɔ wǔvɛ́ yětɔn* cí lěe hɔnkéklě mɛ mɛ ɔ, è nɔ se wǔvɛ́ tɔn gbɔn é ɖɔhun. 6 Gbɛtɔ́ lɛ́ ná ba kú ɖo azǎn énɛ́ lɛ́ gbe, bo ka ná mɔ ɖo ali ɖěbǔ nu ǎ; yě ná jló tawun bo ná kú, kú ka ná hɔn nú yě.

7 Kle lɛ́ cí sɔ́ e ɖo gbesisɔmɛ bo ná yi ahwan lɛ́ é ɖɔhun; nǔɖé lɛ́ ɖo ta nú yě, bo cí axɔ́súgbákún e è sɔ́ siká dó bló lɛ́ é ɖɔhun, bɔ nukúnmɛ yětɔn lɛ́ cí gbɛtɔ́ nukúnmɛ ɖɔhun, 8 amɔ̌, ɖa yětɔn lɛ́ cí nyɔ̌nu sín ɖa ɖɔhun. Bɔ aɖǔ yětɔn lɛ́ cí kinnikínní sín aɖǔ ɖɔhun, 9 nǔ e nɔ cyɔ́n alɔ akɔ́nta yětɔn jí é cí ganwu ɖɔhun, bɔ awa yětɔn lɛ́ nɔ ɖɔ nǔ sɔ́ ɖo wezun jí bo ɖo kɛkɛ́ví* dɔn xwe ahwan wɛ ɖɔhun. 10 Gɔ́ ná ɔ, yě ɖó sí e ɖó aɖǐ lɛ́ é hɔnkéklě lɛ́ ɖɔhun, bɔ sí yětɔn lɛ́ mɛ wɛ acɛ e yě ɖó bo ná wa nǔ dó gbɛtɔ́ lɛ́ wú nú sun atɔ́ɔ́n é ɖe. 11 Axɔ́sú ɖé ɖo yě nu, wɛnsagun domaɖó-azan ɔ tɔn wɛ. Ðo Ebléegbe mɛ ɔ, nyǐkɔ tɔn nɔ nyí Abadɔ́ɔn,* bɔ ɖo Glɛ̌kigbe mɛ ɔ, é nɔ nyí Apolyɔ́ni.*

12 Heelúnú ɖokpó nɛ́ wá yi nɛ́. Éɖíe! Heelúnú we ɖěvo jawě ɖo nǔ énɛ́ lɛ́ gúdo.

13 Wɛnsagun ayizɛ́ngɔ́ ɔ kún kpɛn tɔn. Bɔ un se bɔ gbe ɖé ɖi sín vɔ̌sákpe e è sɔ́ siká dó bló, bɔ é ɖo Mawu nukɔn é sín zo lɛ́ mɛ, 14 bo ɖɔ nú wɛnsagun ayizɛ́ngɔ́ e sí kpɛn ɔ ɖe é ɖɔ: “Tún wɛnsagun ɛnɛ e ɖo blǎblá ɖo tɔsisa ɖaxó Efláti tó lɛ́ é.” 15 Bɔ è tún wɛnsagun ɛnɛ e è ko sɔ́ nǔ ná nú gan ɔ mɛ, azǎn ɔ, sun ɔ kpó xwe ɔ kpó lɛ́ é bónú yě ná hu atɔnvlɔ́ɖó gbɛtɔ́ lɛ́ tɔn.

16 Sɔ́xátɔ́ lɛ́ sín ahwankpá sín kɛ́n yi afatɔ́n donu ko donu afatɔ́n donu wǒ;* è ɖɔ kɛ́n yětɔn bɔ un se. 17 Lěe sɔ́ lɛ́ kpó mɛ e ɖo yě jí lɛ́ é kpó cí, bɔ un mɔ ɖo nǔmimɔ ɔ mɛ é ɖíe: Sɔ́xátɔ́ lɛ́ dó ganwu ɖěɖěe ɖó sinmɛ vɔvɔ myɔ ɖɔhun kpó sinmɛ fɛ́sinnɔ kpó, kpódó sinmɛ koklójónɔ hwemí ɖɔhun kpán lɛ́ é, bɔ sɔ́ lɛ́ sín ta cí kinnikínní sín ta ɖɔhun, lobɔ myɔ, azizɔ kpó hwemí kpó nɔ tɔ́n sín nu yětɔn mɛ. 18 È sɔ́ awě atɔn énɛ́ lɛ́ dó hu atɔnvlɔ́ɖó gbɛtɔ́ lɛ́ tɔn; awě lɛ́ wɛ nyí myɔ, azizɔ kpó hwemí kpó e nɔ tɔ́n sín sɔ́ lɛ́ nu mɛ é. 19 Ðó sɔ́ lɛ́ sín acɛ ɖo nu yětɔn lɛ́ kpó sí yětɔn lɛ́ kpó mɛ, ɖó sí yětɔn lɛ́ cí dan ɖɔhun bo ɖó ta, bɔ yě nɔ sɔ́ dó wa nǔ dó mɛ wú ná.

20 Amɔ̌, mɛ ɖěɖěe kpo bɔ awě énɛ́ lɛ́ ma hu ǎ lɛ́ é ɔ, nǔ e yě sɔ́ alɔ yětɔn dó wa lɛ́ é vɛ́ nú yě* ǎ; yě ɖó awǒvi lɛ́ sinsɛn te ǎ; yě lɛ́ ɖó bǒcyɔ e è sɔ́ siká dó bló lɛ́ é, ée è sɔ́ kpatágan dó bló lɛ́ é, ée è sɔ́ ganvɔ dó bló lɛ́ é, ée è sɔ́ awǐnnya dó bló lɛ́ é kpó ée è sɔ́ atín dó bló lɛ́ é kpó sinsɛn te ǎ; bǒcyɔ énɛ́ lɛ́ ka sixú mɔ nǔ, se nǔ, alǒ ɖi zɔnlin ǎ. 21 Gɔ́ ná ɔ, hwɛ yětɔn lɛ́ vɛ́ nú yě,* bónú yě ɖó mɛhuhu, awǒvinúwiwa, agalilɛ,* alǒ ajojija te ǎ.

10 Bɔ un mɔ wɛnsagun hlɔ̌nhlɔ́nnɔ ɖěvo ɖo te jɛ sín jǐxwé wɛ, bo zɔn akpɔ́kpɔ́ mɛ,* bɔ nyǐ ɖo ta n’i, bɔ nukún tɔn mɛ cí hwesivɔ́ ɖɔhun, lobɔ zǎkɛ́tɛ́* tɔn lɛ́ cí dotín myɔnɔ ɖɔhun, 2 bɔ wěma mlámlá kpɛví ɖokpó ɖo alɔ tɔn mɛ bo ko ɖo vlɔ̌nvlɔ́n jí. É tɛ afɔ tɔn ɖisí ɔ xu jí, bo tɛ amyɔ ɔ ayǐkúngban jí, 3 bo sú xó tlílí lěe kinnikínní nɔ dó gbe gbɔn é. Ée é sú xó é ɔ, xɛbyoso tɛ́nwe lɛ́ sín gbe ɖi.

4 Ée xɛbyoso tɛ́nwe lɛ́ sín gbe ɖi é ɔ, un ko ja nǔ wlán gbé, loɔ, un se bɔ gbe ɖé ɖi sín jǐxwé, bo ɖɔ: “Hwlǎ nǔ e xɛbyoso tɛ́nwe lɛ́ ɖɔ lɛ́ é; ma wlán ó.” 5 Wɛnsagun e un mɔ bɔ é ɖo te ɖo xu jí, bo lɛ́ ɖo te ɖo ayǐkúngban jí é dlɛ́n alɔ tɔn ɖisí ɔ dó jǐxwé, 6 bo xwlé Mɛ e ɖo gbɛ káká sɔ́yi mavɔmavɔ, bo dá jǐxwé kpó nǔ e ɖ’é mɛ lɛ́ é kpó, ayǐkúngban kpó nǔ e ɖ’é jí lɛ́ é kpó, gɔ́ nú xu kpó nǔ e ɖ’é mɛ lɛ́ é kpó é, bo ɖɔ: “È sɔ́ ná ná hwenu ɖě d’é jí ǎ. 7 Amɔ̌, hwenu e wɛnsagun tɛ́nwegɔ́ ɔ ná ja kpɛn tɔn kún gbé é ɔ, é ɖo wɛn ɖɔ nǔbúdo Mawu tɔn e sín wɛn ɖagbe é jlá kannumɔ tɔn gbeyíɖɔ lɛ́ é ná ko jɛnu.”

8 Un se bɔ gbe e ɖi sín jǐxwé é lɛ́ ɖɔ nú mì ɖɔ: “Yi yí wěma mlámlá e ɖo hunhun ɖo wɛnsagun e ɖo te ɖo xu jí, bo lɛ́ ɖo te ɖo ayǐkúngban jí é sín alɔ mɛ é.” 9 Un yi wɛnsagun ɔ gɔ́n, bo ɖɔ n’i ɖɔ é ní sɔ́ wěma mlámlá kpɛví ɔ nú mì. É ɖɔ nú mì ɖɔ: “Yǐ bo ɖu, é ná zɔ́n bɔ adɔgo towe mɛ ná vɛ́, amɔ̌, é ná víví wǐin ɖɔhun ɖo nu towe mɛ.” 10 Un yí wěma mlámlá kpɛví ɔ ɖo wɛnsagun ɔ lɔ mɛ, bo ɖu, bɔ é víví wǐin ɖɔhun ɖo nu ce mɛ, amɔ̌, ée un ɖu fó é ɔ, adɔgo ce mɛ vɛ́. 11 Bɔ è ɖɔ nú mì ɖɔ: “A ɖó ná lɛ́ ɖɔ nǔ e ná jɛ dó togun lɛ́, akɔta lɛ́, gbe lɛ́ kpó axɔ́sú gěgé kpó wú lɛ́ é ɖ’ayǐ.”

11 Bɔ è sɔ́ fántín e cí kpo* ɖɔhun é ɖé nú mì bo ɖɔ: “Sí te bo jlɛ́ tɛ́npli Mawu tɔn sín tɛn mímɛ́ ɔ kpó vɔ̌sákpe ɔ kpó, lobo xa mɛ e nɔ sɛn Mawu ɖo tɛ́npli ɔ mɛ lɛ́ é. 2 Amɔ̌, kɔ́xota e ma ɖo tɛn mímɛ́ tɛ́npli ɔ tɔn mɛ ǎ é ɔ, jǒ éyɛ́ dó bo ma jlɛ́ ó, ɖó è ko ná gbe akɔta lɛ́, bɔ yě ná gbídí toxo mímɛ́ ɔ ɖó afɔ wú nú sun 42. 3 Un ná bló bɔ kúnnuɖetɔ́ ce we lɛ́ ná dó ati bo wa gbeyíɖɔzɔ́* nú azǎn 1 260.” 4 Kúnnuɖetɔ́ we énɛ́ lɛ́ wɛ olívutín we lɛ́ kpó zogbɛ́nhɛnnú we lɛ́ kpó nɔ te ná, bɔ yě ɖo te ɖo Aklúnɔ ayǐkúngban ɔ tɔn nukɔn.

5 Ényí mɛ ɖěbǔ jló ná wa nǔ dó yě wú ɔ, myɔ nɔ tɔ́n sín nu yětɔn mɛ, bo nɔ fyɔ́ kɛntɔ́ yětɔn lɛ́. Ényí mɛ ɖěbǔ jló ná wa nǔ dó yě wú ɔ, lěe è ɖó ná hu mɛ ɔ gbɔn é nɛ́. 6 Yě ɖó acɛ bo ná sú jǐnukúnsin* bónú jǐ ní ma ja hwenu e yě ná ɖo gbeyíɖɔzɔ́* yětɔn wa wɛ é ó; yě lɛ́ ɖó acɛ bo ná sɔ́ sin dó húzú kanjɔ, lobo sɔ́ awě alɔkpa lɛ́ bǐ dó xo ayǐkúngban ɔ hwɛhwɛ, lěe é jló yě gbɔn é.

7 Ée yě ná ko fó kúnnuɖiɖe yětɔn é ɔ, gběkanlin e ɖo tíntɔ́n sín domaɖó-azan ɔ mɛ wɛ é ná fun ahwan xá yě, bo ná ɖu ɖo yě jí, lobo hu yě. 8 Cyɔ yětɔn lɛ́ ná nɔ toxo ɖaxó e è nɔ ylɔ́ ɖɔ Sodɔ́mu kpó Ejípu kpó ɖo nǔjlɛ́dónǔwú linu é sín ali ɖaxó ɔ jí; fínɛ́ wɛ è xwe Aklúnɔ yětɔn lɔmɔ̌ nyi atín wú ɖe. 9 Mɛ ɖěɖěe ɖo togun lɛ́, akɔta lɛ́, gbe lɛ́ kpó to lɛ́ kpó mɛ lɛ́ é ná kpɔ́n cyɔ yětɔn lɛ́ nú azǎn atɔn adaɖé; yě ka ná yí gbe bónú è ná sɔ́ cyɔ yětɔn lɛ́ ɖó yɔdo mɛ ǎ. 10 Mɛ e nɔ nɔ ayǐkúngban jí lɛ́ é ná j’awǎ ɖó kú yětɔn wú, bo lɛ́ ɖu xwe, lobo sɛ́ nǔníná dó yěɖée lɛ́, ɖó gbeyíɖɔ we énɛ́ lɛ́ dó ya nú mɛ e nɔ nɔ ayǐkúngban jí lɛ́ é wútu.

11 Ðo azǎn atɔn adaɖé lɛ́ gúdo ɔ, gbigbɔ e nɔ ná gbɛ mɛ é gosín Mawu gɔ́n, bo byɔ́ yě mɛ, bɔ yě sí te, lobɔ xɛsi ɖaxó jɛ mɛ ɖěɖěe mɔ yě lɛ́ é jí. 12 Yě se bɔ gbe ɖaxó ɖé ɖi sín jǐxwé bo ɖɔ nú yě ɖɔ: “Mi wá aga fí.” Bɔ yě zɔn akpɔ́kpɔ́ mɛ ɖidó jǐxwé, lobɔ kɛntɔ́ yětɔn lɛ́ mɔ yě.* 13 Ðo ganxixo énɛ́ mɛ ɔ, ayǐkúngban dán wǔ syɛ́nsyɛ́n, bɔ toxo ɔ sín mǎɖówǒ mu; gbɛtɔ́ 7 000 wɛ ayǐkúngban dán wǔ ɔ hu, bɔ xɛsi jɛ mɛ e kpo lɛ́ é jí, bɔ yě kpa susu nú Mawu jǐxwé tɔn.

14 Heelúnú wegɔ́ ɔ nɛ́ wá yi nɛ́. Éɖíe! Heelúnú atɔngɔ́ ɔ jawě wunnawúnná.

15 Wɛnsagun tɛ́nwegɔ́ ɔ kún kpɛn tɔn. Gbe ɖé lɛ́ ɖi tlílí ɖo jǐxwé bo ɖɔ: “Axɔ́súɖuto gbɛ ɔ tɔn húzú Axɔ́súɖuto Aklúnɔ mǐtɔn kpó Klísu tɔn kpó tɔn, bɔ é ná ɖu axɔ́sú káká sɔ́yi mavɔmavɔ.”

16 Bɔ mɛxó 24 e ɖo ayǐjínjɔ́n ɖo Mawu nukɔn, ɖo axɔ́súzinkpo yětɔn jí lɛ́ é xwe agbɔ̌nnusú do, bo sɛn Mawu, 17 bo ɖɔ: “Jexóva* Mawu Nǔbǐwúkpétɔ́, hwi mɛ e tíin, bo lɛ́ tíin ɖ’ayǐ é ɔ, mǐ dó kú nú we, ɖó a jɛ hlɔ̌nhlɔ́n towe ɖaxó ɔ zán jí, bo jɛ axɔ́sú ɖu jí. 18 Amɔ̌, xomɛ sin akɔta lɛ́, bɔ xomɛ sin hwi lɔ, bɔ hwenu e a ɖó dó é su, bɔ è ná ɖɔ hwɛ xá mɛkúkú lɛ́, bo ná d’ajɔ kannumɔ towe gbeyíɖɔ lɛ́, mɛ mímɛ́ lɛ́, gɔ́ nú mɛ ɖěɖěe nɔ ɖó sísí e gɔ́ngɔ́n é nú nyǐkɔ towe lɛ́ é, yɔkpɔ́vú kpó mɛxó kpó bǐ, lobo lɛ́ sú kún dó nú mɛ ɖěɖěe nɔ hɛn ayǐkúngban ɔ gblé lɛ́ é.”*

19 È hun tɛ́npli Mawu tɔn sín tɛn mímɛ́ ɖo jǐxwé, bɔ è mɔ akɔjijɛ tɔn sín gbǎ ɖo tɛ́npli tɔn sín tɛn mímɛ́ mɛ, bɔ jǐ kɛwun, gbe ɖé lɛ́ ɖi, xɛbyoso dó gbe, ayǐkúngban dán wǔ, bɔ kɛ́njí ɖaxó ja.

12 Énɛ́ gúdo ɔ, è mɔ wuntun ɖaxó ɖé ɖo jǐxwé: Nyɔ̌nu ɖé dó hwesivɔ́, bɔ sun ɖo afɔ tɔn lɛ́ glɔ́, lobɔ axɔ́súgbákún e è sɔ́ sunví 12 dó bló é ɖo ta n’i, 2 bɔ é ɖo xo. Ðó é ja vǐ ji gbé wútu ɔ, é ɖo xó sú wɛ, ɖó vǐjiji sín wǔvɛ́ e se wɛ é ɖe lɛ́ é wú.

3 È mɔ wuntun ɖěvo ɖo jǐxwé. Éɖíe! Dlagɔ́ɔn vɔvɔ cɛ́cɛ́ ɖaxó ɖokpó ɖó ta tɛ́nwe, zo wǒ, bɔ axɔ́súgbákún ɖokpó ɖo ta tɔn lɛ́ ɖokpó ɖokpó jí; 4 sí tɔn dɔn sunví jǐxwé tɔn lɛ́ sín atɔnvlɔ́ɖó, bɔ é nyi yě dó ayǐkúngban jí. Dlagɔ́ɔn ɔ sɛ tɛn sín nyɔ̌nu e ja vǐ ji gbé é nukɔn ǎ, bónú é ji vǐ ɔ, é ná mɔ tɛn dó vún vǐ tɔn ɖu.

5 Bɔ nyɔ̌nu ɔ ji vǐ súnnu ɖokpó; é wɛ ná zán gankpo dó xlɛ́ ali akɔta lɛ́ bǐ lɛ̌ngbɔ́nyitɔ́ ɖɔhun. È yá wǔ sɔ́ vǐ tɔn yi Mawu kpó axɔ́súzinkpo tɔn kpó nukɔn. 6 Nyɔ̌nu ɔ hɔn yi gbětótló mɛ, yi fí e Mawu ko sɔ́ nǔ ná ɖ’ayǐ n’i, bɔ è ná ná ɛ nǔɖuɖu ɖe xɔ azǎn 1 260 é.

7 Bɔ ahwan bɛ́ ɖo jǐxwé: Micɛ́li* kpó wɛnsagun tɔn lɛ́ kpó fun ahwan xá dlagɔ́ɔn ɔ, bɔ dlagɔ́ɔn ɔ kpó wɛnsagun tɔn lɛ́ kpó lɔmɔ̌ fun ahwan, 8 yě ka ɖu ɖ’é jí ǎ,* tɛn ɖě ka sɔ́ lɛ́ ɖe nú yě ɖo jǐxwé ǎ. 9 Énɛ́ ɔ, è sɔ́ dlagɔ́ɔn ɖaxó ɔ, dan xóxó e è nɔ ylɔ́ ɖɔ Awǒvi bo nɔ lɛ́ ylɔ́ ɖɔ Satáan é nyi dó do, é wɛ ɖo ayǐkúngban ɔ bǐ flú wɛ; è sɔ́ ɛ nyi dó ayǐkúngban jí, é kpó wɛnsagun tɔn lɛ́ kpó. 10 Un se bɔ gbe ɖé ɖi tlílí ɖo jǐxwé, bo ɖɔ:

“Hwlɛngán Mawu mǐtɔn tɔn, hlɔ̌nhlɔ́n tɔn kpó Axɔ́súɖuto tɔn kpó, kpódó Klísu tɔn sín acɛ kpán wá lo! Ðó è ko sɔ́ mɛ e nɔ dó hwɛ nɔví mǐtɔn lɛ́ é nyi dó do, é wɛ nɔ ɖo hwɛ dó yě wɛ zǎn kéze ɖo Mawu mǐtɔn nukɔn. 11 Yě ɖu ɖo jǐ tɔn, ɖó Lɛ̌ngbɔ́ví ɔ sín hun kpó kúnnuɖiɖe yětɔn* kpó wú. Gɔ́ ná ɔ, yě yí wǎn nú lǐndɔ̌n* yěɖésúnɔ tɔn lɛ́ ǎ, é ná bo tlɛ nyí ɖo kú nukɔn ɔ nɛ́. 12 Énɛ́ wú ɔ, jǐxwé kpó mi mɛ e nɔ nɔ jǐxwé lɛ́ é kpó ní j’awǎ! Amɔ̌, heelú ayǐkúngban kpó xu kpó, ɖó Awǒvi jɛ te wá mi gɔ́n kpó xomɛsin ɖaxó kpó, ɖó é tuun ɖɔ hwenu kpɛɖé wɛ kpo nú émí.”

13 Din ɔ, ée dlagɔ́ɔn ɔ mɔ ɖɔ è sɔ́ émí nyi dó ayǐkúngban jí é ɔ, é dó ya nú nyɔ̌nu e ji vǐ súnnu ɔ é. 14 Amɔ̌, è ná hɔ̌n ɖaxó ɖé sín awa we lɛ́ nyɔ̌nu ɔ, bónú é ní dó sixú zɔn yi gbětótló mɛ yi nɔtɛn tɔn, fí e è ɖó ná ná ɛ nǔɖuɖu ɖe ɖo zɔ nú dan ɔ xɔ hwenu ɖokpó, gɔ́ nú hwenu we* kpó hwenu ɖokpó sín vlɔ̌ kpó* é.

15 Bɔ dan ɔ tún sin e cí tɔsisa ɖɔhun é sín nu mɛ, bónú é ná jɛ nyɔ̌nu ɔ gúdo, lobonú tɔsisa ɔ ní zɔ́n bónú nyɔ̌nu ɔ ní kú tɔ. 16 Amɔ̌, ayǐkúngban d’alɔ nyɔ̌nu ɔ. Ayǐkúngban ɔ hun nu, bo mì tɔsisa e dlagɔ́ɔn ɔ tún sín nu mɛ é. 17 Énɛ́ wú ɔ, dlagɔ́ɔn ɔ sin xomɛ dó nyɔ̌nu ɔ syɛ́nsyɛ́n, bo ɖidó bo ná yi fun ahwan xá mɛ ɖěɖěe kpo ɖo kúnkan* tɔn mɛ lɛ́ é; yě wɛ nɔ xwedó gbeɖiɖe Mawu tɔn lɛ́, bɔ è lɛ́ sɔ́ kúnnuɖiɖe dó Jezu wú sín azɔ̌ d’así nú yě.

13 Bɔ é* cí te ɖo xu sín nyɛ̌kɛ́n lɛ́ jí.

Un mɔ gběkanlin ɖokpó bɔ é ɖo xu mɛ tɔ́n sín wɛ; é ɖó zo wǒ, ta tɛ́nwe, bɔ axɔ́súgbákún ɖokpó ɖo zo tɔn lɛ́ ɖokpó ɖokpó jí, amɔ̌, nunylánylá sín nyǐkɔ lɛ́ ɖo ta tɔn lɛ́ wú. 2 Gběkanlin e un mɔ é cí kpɔ ɖɔhun, amɔ̌, afɔ tɔn lɛ́ cí lɔnmɔ sín afɔ lɛ́ ɖɔhun, bɔ nu tɔn cí kinnikínní sín nu ɖɔhun. Bɔ dlagɔ́ɔn ɔ ná hlɔ̌nhlɔ́n tɔn, axɔ́súzinkpo tɔn kpó acɛ ɖaxó kpó gběkanlin ɔ.

3 Un mɔ ta tɔn lɛ́ ɖokpó, bɔ é cí è gblé wǔ ta ɔ bɔ kú hwɛ́n wǎn d’è ɖɔhun, amɔ̌, akpa e ɖo nǎ hu i wɛ é kú, bɔ é jí wǔ nú ayǐkúngban ɔ bǐ, lobɔ yě xwedó gběkanlin ɔ. 4 Yě sɛn dlagɔ́ɔn ɔ, ɖó é ná acɛ gběkanlin ɔ wútu; yě lɛ́ sɛn gběkanlin ɔ, bo nɔ ɖɔ: “Mɛ̌ ka cí gběkanlin ɔ ɖɔhun? Mɛ̌ ka sixú fun ahwan xá ɛ?” 5 È ná ɛ nu, bónú é ná nɔ ɖɔ goyíyí sín xó lɛ́, bo ná nɔ lɛ́ nylá nu; è lɛ́ ná ɛ acɛ bónú é ná wa nǔ nú sun 42. 6 É hun nu tɔn, bo ná nylá nu dó Mawu wú; énɛ́ wɛ nyí dó nyǐkɔ tɔn kpó nɔtɛn tɔn kpó wú, káká jɛ mɛ e nɔ nɔ jǐxwé lɛ́ é jí. 7 È ná ɛ gbe, bónú é ná fun ahwan xá mɛ mímɛ́ lɛ́ lobo ɖu ɖo yě jí; è lɛ́ ná ɛ acɛ dó akɔta bǐ, togun bǐ, gbe bǐ kpó to bǐ kpó jí. 8 Bɔ mɛ e nɔ nɔ ayǐkúngban jí lɛ́ é bǐ ná sɛn ɛ. Sín hwenu e è ɖó gbɛ ɔ ayǐ é* ɔ, è wlán nyǐkɔ yě mɛ ɖě tɔn dó wěma mlámlá gbɛ tɔn Lɛ̌ngbɔ́ví e è hu é tɔn mɛ ǎ.

9 Ényí mɛ ɖěbǔ ɖó tó hǔn, mɛ ɔ ní se. 10 Ényí mɛɖé ɖó ná yi kannumɔgbénu ɔ, mɛ ɔ ná yi kannumɔgbénu. Ényí mɛɖé sɔ́ hwǐ dó hu mɛ ɔ,* è ɖó ná sɔ́ hwǐ dó hu i. Énɛ́ wɛ zɔ́n bɔ mɛ mímɛ́ lɛ́ ɖó hudó didɛ kpó nǔɖiɖi kpó tɔn.

11 Énɛ́ gúdo ɔ, un mɔ gběkanlin ɖěvo bɔ é ɖo ayǐkúngban mɛ tɔ́n sín wɛ; é ɖó zo we, bɔ zo lɛ́ cí lɛ̌ngbɔ́ví sín zo ɖɔhun, amɔ̌, é jɛ xó ɖɔ jí dlagɔ́ɔn ɖɔhun. 12 É nɔ zán acɛ ɖokpó ɔ e gběkanlin nukɔntɔn ɔ ɖó é ɖo nukún tɔn mɛ. É nɔ bló bɔ ayǐkúngban ɔ kpó mɛ e ɖ’é jí lɛ́ é kpó nɔ sɛn gběkanlin nukɔntɔn e akpa e ɖo nǎ hu i wɛ é kú é. 13 É nɔ bló nǔjíwǔ ɖaxó ɖaxó lɛ́; é tlɛ bló bɔ myɔ jɛ te sín jǐxwé wá ayǐkúngban jí ɖo gbɛtɔ́ lɛ́ nukúnmɛ.

14 É nɔ flú mɛ e ɖo ayǐkúngban jí lɛ́ é, gbɔn nǔjíwǔ e è ná ɛ gbe, bɔ é bló ɖo gběkanlin ɔ nukúnmɛ lɛ́ é gblamɛ, bo nɔ lɛ́ ɖɔ nú mɛ e ɖo ayǐkúngban jí lɛ́ é ɖɔ yě ní bló gběkanlin e è xú hwǐ, bɔ é lɛ́ wá gbɛ é sín akpajlɛ́. 15 È ná ɛ gbe bónú é ná ná funfún* gběkanlin ɔ sín akpajlɛ́, mɔ̌ mɛ ɔ, gběkanlin ɔ sín akpajlɛ́ ná ɖɔ xó, bo lɛ́ bló bónú è ná hu mɛ ɖěɖěe nɔ gbɛ́ ɖɔ émí kún ná sɛn gběkanlin ɔ sín akpajlɛ́ ó lɛ́ é bǐ.

16 É hɛn gbɛtɔ́ lɛ́ bǐ gǎnnugǎnnu, yɔkpɔ́vú kpó mɛxó kpó, dɔkunnɔ kpó wamamɔnɔ kpó, mɛ e ɖo éɖée sí é kpó kannumɔ kpó bǐ, bónú è ní ɖó wuntun yě ɖó alɔ ɖisí alǒ ɖó nukɔn, 17 bónú mɛ ɖěbǔ ní ma kpé wú bo xɔ nǔ, alǒ sa nǔ ó, afi nú wuntun ɔ ɖo mɛ ɔ wú ɔ nɛ́; énɛ́ wɛ nyí gběkanlin ɔ sín nyǐkɔ, alǒ kɛ́n e sɔgbe xá nyǐkɔ tɔn é. 18 Fí e é byɔ́ ɖɔ è ní ɖó nǔnywɛ́ ɖe é ɖíe: Mɛ e ɖó nukúnnúmɔjɛnǔmɛ é ní lɛ́n gběkanlin ɔ sín kɛ́n, ɖó gbɛtɔ́ sín kɛ́n wɛ; kɛ́n énɛ́ ɔ, 666 wɛ.

14 Énɛ́ gúdo ɔ, un mɔ Lɛ̌ngbɔ́ví ɔ ɖo te ɖo Sinyɔ́ɔ só ɔ jí, bɔ mɛ 144 000 e è wlán nyǐkɔ tɔn kpó Tɔ́ tɔn sín nyǐkɔ kpó ɖó nukɔn ná lɛ́ é ɖo fínɛ́ xá ɛ. 2 Un se gbe ɖé ɖi sín jǐxwé bo ɖɔ nǔ sin gěgé ɖo ayǐ kɔn nyi wɛ ɖɔhun, bo lɛ́ ɖɔ nǔ xɛbyoso dó gbe kpó hlɔ̌nhlɔ́n kpó ɖɔhun; gbe e un se é cí hansinɔ lɛ́ ɖo han ji wɛ, bo ɖo agǐdigbo yětɔn lɛ́ xo d’é mɛ wɛ ɖɔhun. 3 Bɔ yě ɖo han e é cí ɖɔ han yɔ̌yɔ́ ɖé wɛ é ji wɛ ɖo axɔ́súzinkpo ɔ kpó nǔɖogbɛ ɛnɛ lɛ́ kpó, kpódó mɛxó lɛ́ kpan nukɔn, bɔ mɛ ɖěbǔ kpé wú bo nyɔ́ han énɛ́ ji zɛ mɛ 144 000 e è xɔ sín ayǐkúngban ɔ jí lɛ́ é wú ǎ. 4 Mɛ énɛ́ lɛ́ wɛ ma hɛn yěɖée blí kpó nyɔ̌nu kpó ǎ; nǔgbó ɔ, yě ɖo alɔjí. Mɛ énɛ́ lɛ́ wɛ nɔ ɖo Lɛ̌ngbɔ́ví ɔ xwedó wɛ yi fí ɖěbǔ e é yi é. È xɔ mɛ énɛ́ lɛ́ ɖo gbɛtɔ́ lɛ́ mɛ, bɔ yě nyí sínsɛ́n nukɔntɔn lɛ́ nú Mawu kpó Lɛ̌ngbɔ́ví ɔ kpó; 5 è se mɛblɛ́blɛ́xó ɖě ɖo nu yětɔn ǎ; yě ɖó blɔ̌ ǎ.

6 Un mɔ wɛnsagun ɖěvo, bɔ é ɖo zinzɔn gbɔn jǐnukúnsin tɛ́ntin* wɛ; é ɖó wɛn ɖagbe mavɔmavɔ bo ná dó mɛ e nɔ nɔ ayǐkúngban jí lɛ́ é: to bǐ, akɔta bǐ, gbe bǐ kpó togun bǐ kpó. 7 É nɔ ɖo xó sú wɛ tlílí ɖɔ: “Mi ní ɖó sísí e gɔ́ngɔ́n é nú Mawu bo kpa susu n’i, ɖó hwenu e é ná ɖɔ hwɛ xá mɛ dó é ko su, énɛ́ wú ɔ, mi sɛn Mɛ e bló jǐxwé, ayǐkúngban, xu kpó tɔjɔtɛn lɛ́ kpó é.”

8 Wɛnsagun ɖěvo bɔ dó wǔ tɔn, énɛ́ wɛ nyí wegɔ́ ɔ, bo nɔ ɖɔ: “É j’ayǐ! Babilɔ́nu ɖaxó ɔ j’ayǐ! É wɛ bló bɔ akɔta lɛ́ bǐ nɔ nu vɛ̌ɛn tɔn, énɛ́ wɛ nyí, jlǒ agalilɛ* tɔn syɛ́nsyɛ́n e é nɔ ɖó é.”

9 Wɛnsagun ɖěvo xwedó yě, énɛ́ wɛ nyí atɔngɔ́ ɔ, bo sú xó tlílí ɖɔ: “Ényí mɛɖé sɛn gběkanlin ɔ kpó akpajlɛ́ tɔn kpó, bɔ è ɖó wuntun i ɖó nukɔn, alǒ ɖó alɔ ɔ, 10 é ná lɛ́ nu xomɛsin Mawu tɔn sín vɛ̌ɛn e è kɔn dó xomɛsin tɔn sín kɔ́fu mɛ, bo ma cáká ǎ é; è ná sɔ́ myɔ kpó hwemí kpó dó dó ya n’i ɖo wɛnsagun mímɛ́ lɛ́ kpó Lɛ̌ngbɔ́ví ɔ kpó nukúnmɛ. 11 Bɔ yadónúmɛ ɔ sín azizɔ ná ɖo sisi wɛ káká sɔ́yi mavɔmavɔ. Mɛ ɖěɖěe nɔ sɛn gběkanlin ɔ kpó akpajlɛ́ tɔn kpó, bɔ è sɔ́ nyǐkɔ tɔn dó ɖó wuntun yě lɛ́ é ɔ, gbɔjɛ ɖěbǔ ɖ’é mɛ nú yě zǎn kéze ǎ. 12 Énɛ́ wɛ zɔ́n bɔ mɛ mímɛ́ lɛ́ ɖó hudó didɛ tɔn; mɛ énɛ́ lɛ́ wɛ nɔ xwedó gbeɖiɖe Mawu tɔn lɛ́, bo nɔ tɛ́ dó nǔɖiɖi ɖíɖó nú Jezu* wú gbánwúngbánwún.”

13 Un se bɔ gbe ɖé ɖi sín jǐxwé, bo ɖɔ: “Wlǎn ɖɔ: Awǎjijɛnɔ wɛ nyí mɛ ɖěɖěe kú bɛ́sín din ɖo bǔ e yě ɖe xá Aklúnɔ é mɛ lɛ́ é. Gbigbɔ ɔ ɖɔ: ɛɛn, yě ní ɖó azɔ̌syɛ́nsyɛ́nwiwa yětɔn te, ɖó nǔ e yě wa lɛ́ é xwedó yě.”

14 Énɛ́ gúdo ɔ, un mɔ akpɔ́kpɔ́ wěwé ɖokpó, bɔ mɛɖé cí gbɛtɔ́ví ɖɔhun bo ɖo ayǐjínjɔ́n ɖo akpɔ́kpɔ́ ɔ jí; axɔ́súgbákún e è sɔ́ siká dó bló é ɖo ta tɔn, bɔ é hɛn nǔkúnyanú ɖíɖá ɖokpó alɔ mɛ.

15 Wɛnsagun ɖěvo tɔ́n sín tɛn mímɛ́ tɛ́npli ɔ tɔn mɛ, bo sú xó tlílí ylɔ́ mɛ e ɖo ayǐjínjɔ́n ɖo akpɔ́kpɔ́ ɔ jí é, bo ɖɔ: “Sɔ́ nǔkúnyanú towe, bo ya nǔkún, ɖó hwenu e è ná ya nǔ dó é ko su, ɖó nǔkún e ɖo ayǐkúngban jí lɛ́ é ko nyɔ́ bǐ mlɛ́mlɛ́.” 16 Mɛ e ɖo ayǐjínjɔ́n ɖo akpɔ́kpɔ́ ɔ jí é dlɛ́n nǔkúnyanú tɔn dó ayǐkúngban jí, bɔ è ya nǔkún e ɖo ayǐkúngban jí lɛ́ é.

17 Wɛnsagun ɖěvo lɛ́ tɔ́n sín tɛn mímɛ́ tɛ́npli ɔ tɔn e ɖo jǐxwé é mɛ, bɔ é lɔ ɖó nǔkúnyanú ɖíɖá ɖokpó.

18 Bɔ wɛnsagun ɖěvo gosín vɔ̌sákpe ɔ kɔn, bo ɖó acɛ dó myɔ jí. É sú xó tlílí ylɔ́ mɛ e hɛn nǔkúnyanú ɖíɖá ɔ é, bo ɖɔ: “Sɔ́ nǔkúnyanú ɖíɖá towe bo xo vǐwun sín hwǐn e ɖo ayǐkúngban jí lɛ́ é kplé, ɖó sínsɛ́n yětɔn lɛ́ ko nyɔ́.” 19 Wɛnsagun ɔ dlɛ́n nǔkúnyanú tɔn dó ayǐkúngban jí, bo xo vǐwun e ɖo ayǐkúngban jí lɛ́ é kplé, lobo kɔn dó xomɛsin Mawu tɔn sín vǐwunto ɖaxó ɔ mɛ. 20 È li vǐwun sín sínsɛ́n lɛ́ ɖo vǐwunto mɛ ɖo toxo ɔ gúdo, bɔ hun tɔ́n sín vǐwunto ɔ mɛ, bo yi jǐ wá gan e è dó nu nú sɔ́ lɛ́ é há jí, lobɔ ga tɔn yi kilomɛ́tlu 296* mɔ̌.

15 Un mɔ wuntun ɖěvo ɖo jǐxwé, é d’agba bo lɛ́ jí wǔ: wɛnsagun tɛ́nwe hɛn awě tɛ́nwe. Awě gǔdo tɔn lɛ́ nɛ́, ɖó xomɛsin Mawu tɔn ná wá vivɔnu gbɔn gbla yětɔn mɛ.

2 Un mɔ nǔɖé bɔ é ɖi xu e cí wěkpɛ́n ɖɔhun, bɔ myɔ gbɔn mɛ é ɖé, bɔ mɛ ɖěɖěe ɖu ɖo gběkanlin ɔ, akpajlɛ́ tɔn kpó kɛ́n e sɔgbe xá nyǐkɔ tɔn é kpó jí lɛ́ é ɖo te ɖo xu e cí wěkpɛ́n ɖɔhun é kpá, bo hɛn agǐdigbo Mawu tɔn lɛ́. 3 Yě ɖo kannumɔ Mawu tɔn Mɔyízi sín han kpó Lɛ̌ngbɔ́ví ɔ sín han kpó ji wɛ, bo nɔ ɖɔ:

“Jexóva* Mawu, Nǔbǐwúkpétɔ́, azɔ̌ towe lɛ́ d’agba bo lɛ́ jí wǔ. Axɔ́sú mavɔmavɔ, nǔwiwa towe lɛ́ jlɔ́ bo lɛ́ nyí nǔgbó. 4 Jexóva,* hwiɖokpónɔ wɛ ɖo gbejí. Énɛ́ wú ɔ, mɛ̌ ma ka ná ɖó sísí e gɔ́ngɔ́n é nú we, bo lɛ́ kpa susu nú nyǐkɔ towe ǎ? Ðó akɔta lɛ́ bǐ ná wá nukɔn towe bo sɛn we, ɖó è ko ɖe gbetakɛ́n jlɔ́jlɔ́ towe lɛ́ xlɛ́.”

5 Énɛ́ gúdo ɔ, un mɔ bɔ è hun goxɔ kúnnuɖiɖe tɔn sín tɛn mímɛ́ ɔ ɖo jǐxwé, 6 bɔ wɛnsagun tɛ́nwe e hɛn awě tɛ́nwe lɛ́ é tɔ́n sín tɛn mímɛ́ ɔ mɛ; yě dó lɛ̌ɛnkanvɔ mímɛ́ e nɔ kɔ́n é, bo lɛ́ sin akɔ́ntablánú e è sɔ́ siká dó bló é dó akɔ́nta. 7 Nǔɖogbɛ ɛnɛ lɛ́ ɖokpó bɛ́ gannú e è sɔ́ siká dó bló é tɛ́nwe nú wɛnsagun tɛ́nwe lɛ́, bɔ Mawu e ɖo gbɛ káká sɔ́yi mavɔmavɔ é sín xomɛsin gɔ́ gannú lɛ́. 8 Azizɔ kpé tɛn mímɛ́ ɔ bǐ mɛ, ɖó susu Mawu tɔn kpó hlɔ̌nhlɔ́n tɔn kpó wú, bɔ mɛ ɖěbǔ kpé wú bo byɔ́ tɛn mímɛ́ ɔ mɛ, káká cóbónú awě tɛ́nwe e wɛnsagun tɛ́nwe lɛ́ hɛn é wá vivɔnu ǎ.

16 Un se gbe ɖaxó ɖé ɖi sín tɛn mímɛ́ ɔ mɛ, bo ɖɔ nú wɛnsagun tɛ́nwe lɛ́ ɖɔ: “Mi yi, bo yi húzú xomɛsin Mawu tɔn e ɖo gannú tɛ́nwe lɛ́ mɛ é kɔn nyi ayǐkúngban jí.”

2 Wɛnsagun nukɔntɔn ɔ yi, bo húzú gannú éyɛ́tɔn kɔn nyi ayǐkúngban jí. Énɛ́ ɔ, agadá baɖabaɖa nyinyɔ ɖé tɔ́n ɖo mɛ e ɖó wuntun gběkanlin ɔ tɔn ɖo wǔtu, bo ɖo akpajlɛ́ tɔn sɛn wɛ lɛ́ é wú.

3 Wɛnsagun wegɔ́ ɔ húzú gannú éyɛ́tɔn kɔn nyi xu mɛ. Énɛ́ ɔ, xu ɔ húzú kanjɔ e cí mɛkúkú tɔn ɖɔhun é, bɔ nǔɖogbɛ* lɛ́ bǐ kú, ɛɛn, nǔ e ɖo xu ɔ mɛ lɛ́ é.

4 Wɛnsagun atɔngɔ́ ɔ húzú gannú éyɛ́tɔn kɔn nyi tɔsisa lɛ́ kpó tɔjɔtɛn* lɛ́ kpó mɛ. Bɔ yě húzú kanjɔ. 5 Un se bɔ wɛnsagun e ɖó acɛ dó sin lɛ́ jí é ɖɔ: “Hwi Mɛ e tíin, bo ko tíin ɖ’ayǐ, bo nyí gbejínɔtɔ́ é ɔ, nǔjlɔ́jlɔ́watɔ́ wɛ a nyí, ɖó a ɖɔ hwɛ énɛ́ lɛ́; 6 yě kɔn mɛ mímɛ́ lɛ́ kpó gbeyíɖɔ lɛ́ kpó sín kanjɔ kɔn nyi ayǐ, énɛ́ wú ɔ, a ná kanjɔ yě bɔ yě nu; yě jɛxá.” 7 Un se bɔ gbe ɖé gosín vɔ̌sákpe ɔ kɔn, bo ɖɔ: “Ɛɛn, Jexóva* Mawu, Nǔbǐwúkpétɔ́, hwɛɖiɖɔ* towe lɛ́ nyí nǔgbó, bo jlɔ́.”

8 Wɛnsagun ɛnɛgɔ́ ɔ húzú gannú éyɛ́tɔn kɔn nyi hwesivɔ́ jí, bɔ è ná gbe hwesivɔ́, bónú é ná sɔ́ myɔ dó mɛ gbɛtɔ́ lɛ́. 9 Énɛ́ ɔ, yǒzo ɖaxó mɛ gbɛtɔ́ lɛ́, bɔ yě nylá nu dó Mawu e ɖó acɛ dó awě énɛ́ lɛ́ jí é sín nyǐkɔ wú, lobɔ hwɛ yětɔn lɛ́ vɛ́ nú yě,* bónú yě kpa susu n’i ǎ.

10 Wɛnsagun atɔ́ɔ́ngɔ́ ɔ húzú gannú éyɛ́tɔn kɔn nyi axɔ́súzinkpo gběkanlin ɔ tɔn jí. Énɛ́ ɔ, ablu cyɔ́n axɔ́súɖuto tɔn, bɔ gbɛtɔ́ lɛ́ jɛ aɖǔ hɛn ɖɛ̌ yěɖésúnɔ tɔn lɛ́ jí, ɖó wǔvɛ́ e mɔ wɛ yě ɖe é wú. 11 Yě nylá nu dó Mawu jǐxwé tɔn ɔ wú, ɖó wǔvɛ́ yětɔn lɛ́ kpó agadá yětɔn lɛ́ kpó wú, lobɔ nǔwiwa yětɔn lɛ́ vɛ́ nú yě* ǎ.

12 Wɛnsagun ayizɛ́ngɔ́ ɔ húzú gannú éyɛ́tɔn kɔn nyi tɔsisa ɖaxó Efláti mɛ, bɔ tɔsisa ɔ sín sin mɛ, dó ɖe ali nú axɔ́sú e gosín zǎnzǎnhwe jí* lɛ́ é.

13 Un mɔ nǔɖɔɖayǐ* blíblí e cí běsé ɖɔhun é atɔn, bɔ yě tɔ́n sín dlagɔ́ɔn ɔ sín nu mɛ, bo tɔ́n sín gběkanlin ɔ sín nu mɛ, lobo tɔ́n sín gbeyíɖɔ-nyíjɛtɔ́ ɔ sín nu mɛ. 14 Nǔgbó ɔ, awǒvi lɛ́ sín nǔɖɔɖayǐ lɛ́ wɛ yě nyí, bɔ yě nɔ bló nǔjíwǔ lɛ́; yě ɖidó axɔ́sú e ɖo ayǐkúngban ɔ bǐ jí lɛ́ é gɔ́n, bo ná xo yě bǐ kplé nú ahwan e è ná fun ɖo Mawu Nǔbǐwúkpétɔ́ ɔ sín azǎn ɖaxó ɔ gbe é.

15 “Éɖíe! Un jawě ajotɔ́ ɖɔhun. Awǎjijɛnɔ wɛ nyí mɛ e nɔ wunzɛn, bo hɛn awu tɔn aga tɔn lɛ́ é, énɛ́ ɔ, é ná zɔn mɛ̌, bɔ mɛ lɛ́ ná mɔ winnyá tɔn ǎ.”

16 Nǔɖɔɖayǐ* lɛ́ xo axɔ́sú lɛ́ kplé dó fí e è nɔ ylɔ́ ɖɔ Aamagedɔ́ni* ɖo Ebléegbe mɛ é.

17 Wɛnsagun tɛ́nwegɔ́ ɔ húzú gannú éyɛ́tɔn kɔn nyi jɔhɔn mɛ. Énɛ́ ɔ, gbe ɖaxó ɖé ɖi sín tɛn mímɛ́ ɔ mɛ, sín axɔ́súzinkpo ɔ kɔn bo ɖɔ: “É sɔgbe lo!” 18 Jǐ kɛwun, xɛbyoso dó gbe, bɔ ayǐkúngban dán wǔ syɛ́nsyɛ́n, bɔ ɖě ko dán wǔ syɛ́nsyɛ́n kpó hlɔ̌nhlɔ́n kpó sɔmɔ̌, sín hwenu e gbɛtɔ́ ɖo ayǐkúngban ɔ jí é ǎ. 19 Toxo ɖaxó ɔ má ɖó atɔn, bɔ toxo akɔta lɛ́ tɔn lɛ́ mu; Mawu flín Babilɔ́nu ɖaxó ɔ, bo ná kpé xomɛsin tɔn ɖaxó ɔ sín vɛ̌ɛn kɔ́fu n’i. 20 Gɔ́ ná ɔ, tɔtɛ́ntinto lɛ́ bǐ bú, bɔ è sɔ́ mɔ só lɛ́ ǎ. 21 Énɛ́ gúdo ɔ, kɛ́njí ɖaxó ɖaxó e ɖokpó nɔ da taláan* ɖokpó mɔ̌ é ja sín jǐxwé dó gbɛtɔ́ lɛ́ jí, bɔ gbɛtɔ́ lɛ́ nylá nu dó Mawu wú, ɖó nǔ nyanya e kɛ́njí ɔ dó sin é wú, ɖó nǔ nyanya ɖé wɛ, bo hɛn nǔ gblé tawun.

17 Wɛnsagun tɛ́nwe e hɛn gannú tɛ́nwe lɛ́ é ɖokpó wá, bo ɖɔ nú mì ɖɔ: “Wǎ, bónú má xlɛ́ we hwɛ e è ná ɖó nú tonyatɔ́ ɖaxó ɔ, éé jínjɔ́n sin gěgé jí é; 2 axɔ́sú ayǐkúngban ɔ tɔn lɛ́ lɛ aga* xá ɛ, bɔ mɛ e nɔ nɔ ayǐkúngban ɔ jí lɛ́ é nu agalilɛ* tɔn sín vɛ̌ɛn mú.”

3 É zé mì yi gbětótló mɛ, gbɔn hlɔ̌nhlɔ́n gbigbɔ ɔ tɔn gblamɛ. Un mɔ nyɔ̌nu ɖé ɖo ayǐjínjɔ́n ɖo gběkanlin vɔvɔ cɛ́cɛ́ e ɖó ta tɛ́nwe, zo wǒ é jí; nunylánylá sín nyǐkɔ kpé gběkanlin ɔ wú bǐ. 4 Nyɔ̌nu ɔ dó avɔ vɔvɔ e wi d’é mɛ é kpó avɔ vɔvɔ cɛ́cɛ́ kpó, bo sɔ́ siká, awǐnnya xɔ akwɛ́ lɛ́ kpó jɛ̌ lɛ́ kpó dó ba acɔ́ ná; kɔ́fu e è sɔ́ siká dó bló é ɖo alɔ tɔn mɛ, bɔ nǔ e xyɔ́ wǔ lɛ́ é kpó agalilɛ* tɔn sín nǔ blíblí lɛ́ kpó gɔ́. 5 È wlán nyǐkɔ ɖé dó nukɔn tɔn; nyǐkɔ ɔ bú do: “Babilɔ́nu ɖaxó ɔ, tonyatɔ́ lɛ́ kpó ayǐkúngban ɔ sín nǔ e xyɔ́ wǔ lɛ́ é kpó sín nɔ.” 6 Un mɔ ɖɔ nyɔ̌nu ɔ nu mɛ mímɛ́ lɛ́ sín hun kpó kúnnuɖetɔ́ Jezu tɔn lɛ́ sín hun kpó mú.

Ée un mɔ ɛ é ɔ, é kpácá mì tawun. 7 Énɛ́ wú ɔ, wɛnsagun ɔ ɖɔ nú mì ɖɔ: “Aniwú é ka kpácá we? Un ná ɖɔ nyɔ̌nu ɔ kpó kanlin e sɔ́ ɛ, bo ɖó ta tɛ́nwe, zo wǒ é kpó sín nǔbúdo nú we: 8 Gběkanlin e a mɔ é tíin ɖ’ayǐ, amɔ̌, é sɔ́ tíin din ǎ, é ka ko ɖo domaɖó-azan ɔ mɛ ná tɔ́n sín wɛ, bo ná yi dɔn. Hwenu e mɛ e nɔ nɔ ayǐkúngban ɔ jí lɛ́ é, énɛ́ wɛ nyí, mɛ e sín nyǐkɔ è ma wlán dó wěma mlámlá gbɛ tɔn ɔ mɛ, sín hwenu e è ɖó gbɛ ɔ ayǐ é* ǎ lɛ́ é ná mɔ ɖɔ gběkanlin ɔ ko tíin ɖ’ayǐ, kún sɔ́ tíin din ó, bo ka ná lɛ́ wá tíin é ɔ, é ná kpácá yě.

9 “Énɛ́ byɔ́ ɖɔ è ní ɖó nukúnnúmɔjɛnǔmɛ gɔ́ nú nǔnywɛ́: Ta tɛ́nwe lɛ́ nɔ te nú só tɛ́nwe; yě jí wɛ nyɔ̌nu ɔ jínjɔ́n ɖo aga. 10 Axɔ́sú tɛ́nwe wɛ yě nyí: Atɔ́ɔ́n ko j’ayǐ, ɖokpó ɖo acɛ kpa wɛ, ɖě ɔ ka ko wá ǎ, amɔ̌, hwenu e é ná wá é ɔ, é ɖó ná nɔ ayǐ nú hwenu kpɛɖé. 11 Gběkanlin e tíin ɖ’ayǐ, bo ma sɔ́ tíin din ǎ é ɔ, axɔ́sú tántɔngɔ́ ɔ wɛ; axɔ́sú tɛ́nwe lɛ́ mɛ wɛ é gosín, bo ka ná yi dɔn.

12 “Zo wǒ e a mɔ lɛ́ é nɔ te nú axɔ́sú wǒ e è ma ko ná axɔ́súɖuto ɖé ǎ lɛ́ é, amɔ̌, è ná acɛ yě bónú yě ná ɖu axɔ́sú xá gběkanlin ɔ nú ganxixo ɖokpó. 13 Linlin ɖokpó ɔ wɛ yě ɖó, énɛ́ wú ɔ, yě ná hlɔ̌nhlɔ́n yětɔn kpó acɛ yětɔn kpó gběkanlin ɔ. 14 Yě ná fun ahwan xá Lɛ̌ngbɔ́ví ɔ, amɔ̌, ɖó Lɛ̌ngbɔ́ví ɔ wɛ nyí Aklúnɔ aklúnɔ lɛ́ tɔn, bo lɛ́ nyí Axɔ́sú axɔ́sú lɛ́ tɔn wútu ɔ, é ná ɖu ɖo yě jí. Gɔ́ ná ɔ, mɛ ɖěɖěe ɖo kpɔ́ xá ɛ, bɔ è ylɔ́ yě, bo sɔ́ yě, bɔ yě ɖo gbejí lɛ́ é lɔ ná ɖu ɖ’é jí.”

15 É ɖɔ nú mì ɖɔ: “Sin e a mɔ ɖo fí e tonyatɔ́ ɔ jínjɔ́n lɛ́ é nɔ te nú togun lɛ́, ahwan lɛ́, akɔta lɛ́ kpó gbe lɛ́ kpó. 16 Bɔ zo wǒ e a mɔ lɛ́ é kpó gběkanlin ɔ kpó ná gbɛ́ wǎn nú tonyatɔ́ ɔ, bo ná bɛ́ nǔ e é ɖó lɛ́ é bǐ, lobo jó è dó nyi mɛ̌; yě ná ɖu lan tɔn, bo ná sɔ́ myɔ dó fyɔ́ ɛ bǐ mlɛ́mlɛ́. 17 Ðó Mawu sɔ́ dó ayi yětɔn mɛ ɖɔ yě ní wa nǔ sɔgbe xá linlin émítɔn, ɛɛn, yě ní wa nǔ sɔgbe xá linlin ɖokpó ɔ e yě ɖó é, gbɔn axɔ́súɖuto yětɔn níná gběkanlin ɔ gblamɛ, káká jɛ hwenu e xó Mawu tɔn lɛ́ ná jɛnu é. 18 Nyɔ̌nu e a mɔ é nɔ te nú toxo ɖaxó e kp’acɛ dó axɔ́sú ayǐkúngban ɔ tɔn lɛ́ jí é.”

18 Énɛ́ gúdo ɔ, un mɔ wɛnsagun ɖěvo ɖo te jɛ sín jǐxwé wɛ, bɔ é ɖó acɛ ɖaxó, bɔ susu tɔn hɔ́n dó ayǐkúngban jí. 2 É sú xó tlílí bo ɖɔ: “É j’ayǐ! Babilɔ́nu ɖaxó ɔ j’ayǐ! É húzú nɔtɛn awǒvi lɛ́ tɔn, bo lɛ́ húzú fí e gbigbɔ* nyanya lɛ́ bǐ kpó xɛ blíblí, xɛ e è nɔ gbɛ́ wǎn ná lɛ́ é bǐ kpó nɔ hwlá cí é! 3 Ðó akɔta lɛ́ bǐ ko nu jlǒ agalilɛ* tɔn syɛ́nsyɛ́n e é nɔ ɖó é sín vɛ̌ɛn mú; axɔ́sú ayǐkúngban ɔ tɔn lɛ́ lɛ aga xá ɛ, bɔ ajɔ̌tɔ́* ayǐkúngban ɔ tɔn lɛ́ jɛ dɔkun, ɖó dɔkunnɔgbɛ e hu winnyá bɔ é nɔ zán é sín hlɔ̌nhlɔ́n wú.”

4 Un se gbe ɖěvo ɖi sín jǐxwé, bo ɖɔ: “Togun ce, mi tɔ́n sín tɛ́ntin tɔn, ényí mi ma jló ná ɖó mǐmá ɖo hwɛ e é hu lɛ́ é mɛ, bo ɖó mǐmá ɖo awě e ná xó è lɛ́ é mɛ ǎ ɔ nɛ́. 5 Ðó hwɛ tɔn lɛ́ kplé káká bo yi sɔ́ jǐnukúnsin, bɔ Mawu flín nǔ agɔ e é wa lɛ́ é.* 6 Mi sú lěe é wa nǔ xá mɛ ɖěvo lɛ́ gbɔn é sín axɔ́ ɛ, ɛɛn, mi sú nǔ e é wa lɛ́ é donu we sín axɔ́ ɛ; kɔ́fu e mɛ é cáká ahan dó é ɔ, mi cáká donu we d’é mɛ n’i. 7 Bǎ e mɛ é xɔ susu nú éɖée, lobo zán dɔkunnɔgbɛ e hu winnyá é yi ɖó é ɔ, mi dó ya n’i, bo sɔ́ ɛ ɖó aluwɛ mɛ yi ɖó bǎ énɛ́ mɛ. Ðó é nɔ ɖo ɖiɖɔ dó ayi mɛ wɛ ɖɔ: ‘Axɔ́si wɛ nú mì, bɔ un ɖo zinkpo jí, un nyí asúkúsi ǎ, un ná jɛ aluwɛ mɛ gbeɖé ǎ.’ 8 Énɛ́ wú wɛ awě e ná xo è lɛ́ é ná xo è gbe ɖokpó ɔ; yě wɛ nyí kú, aluwɛ kpó adɔ kpó, bɔ è ná sɔ́ myɔ dó fyɔ́ ɛ bǐ mlɛ́mlɛ́, ɖó Jexóva* Mawu e ɖɔ hwɛ xá ɛ é ɖó hlɔ̌nhlɔ́n.

9 “Axɔ́sú ayǐkúngban ɔ tɔn e lɛ aga* xá ɛ, bo lɛ́ zán dɔkunnɔgbɛ e hu winnyá é xá ɛ lɛ́ é ná y’avǐ, bo ná alě dó ta tɔn mɛ, hwenu e yě ná mɔ myɔ e ɖo fyɔ́fyɔ́ ɛ wɛ é sín azizɔ é. 10 Yě ná cí zɔ, ɖó xɛsi e dó yě wɛ ya e dó n’i wɛ è ɖe é ɖe é wú, bo ná ɖɔ: ‘Áo! Áo! Hwi Babilɔ́nu toxo ɖaxó, toxo hlɔ̌nhlɔ́nnɔ ɔ! Ðo ganxixo ɖokpó vlamɛ ɔ, è ɖɔ hwɛ towe!’

11 “Gɔ́ ná ɔ, ajɔ̌tɔ́ ayǐkúngban ɔ tɔn lɛ́ ɖo avǐ ya wɛ, bo ɖo aluwɛ mɛ dó ta tɔn mɛ, ɖó mɛ ɖěbǔ sɔ́ ɖe, bo ná xɔ ajɔ̌nú yětɔn lɛ́ ǎ. 12 Ajɔ̌nú énɛ́ lɛ́ wɛ nyí siká, kpatágan, awǐnnya xɔ akwɛ́ lɛ́, jɛ̌ lɛ́, lɛ̌ɛnkanvɔ fɛ́ɖɛ́fɛ́ɖɛ́ lɛ́, avɔ vɔvɔ e wi d’é mɛ lɛ́ é, sɛ́da, avɔ vɔvɔ cɛ́cɛ́ lɛ́, nǔ e è sɔ́ atín wǎnnywɛ́ dó bló ná lɛ́ é bǐ, nǔ e è sɔ́ ajinakúɖú, atín xɔ akwɛ́, ganvɔ, gan kpó mǎblu* kpó dó bló lɛ́ é bǐ; 13 kanɛ́lu, nǔhwɛ́nkún amɔ́mu,* zǎlínkpɔ́n, nǔsáwǔ wǎnɖagbenɔ, zǎlínkpɔ́n wěwé, vɛ̌ɛn, olívumi, linfín ɖagbe ɖagbe, blěe, nyibú, lɛ̌ngbɔ́, sɔ́, kɛkɛ́ví, kannumɔ lɛ́ kpó gbɛtɔ́ ɖěvo lɛ́ kpó. 14 Ɛɛn, sínsɛ́n ɖagbe ɖagbe e nɔ jló we* lɛ́ é bú sín gɔ̌n towe, bɔ nǔɖuɖu e dó jǒ lɛ́ é kpó nǔ ɖagbe ɖagbe lɛ́ kpó bǐ bú sín gɔ̌n towe, bɔ a sɔ́ ná lɛ́ mɔ yě gbeɖé ǎ.

15 “Ajɔ̌tɔ́ e nɔ sa nǔ énɛ́ lɛ́, bɔ é sín wǔ tɔn, lobɔ yě jɛ dɔkun lɛ́ é ná cí te ɖo zɔ, ɖó xɛsi e dó yě wɛ ya e dó n’i wɛ è ɖe é ɖe é wú, bo ná ya avǐ, lobo ná alě, 16 bo ná ɖɔ: ‘Áo! Áo! Toxo ɖaxó e dó lɛ̌ɛnkanvɔ fɛ́ɖɛ́fɛ́ɖɛ́, avɔ vɔvɔ e wi d’é mɛ é, avɔ vɔvɔ cɛ́cɛ́, bo sɔ́ sikánú lɛ́, awǐnnya xɔ akwɛ́ lɛ́ kpó jɛ̌ lɛ́ kpó dó ba acɔ́ ná é! 17 Ðo ganxixo ɖokpó mɛ ɔ, è sú kún dó nú dɔkun tobutóbú énɛ́ lɛ́!’

“Bɔ tɔjíhúnkuntɔ́gán lɛ́ bǐ, mɛ e nɔ gbɔn xu jí lɛ́ é bǐ, mɛ e nɔ w’azɔ̌ ɖo tɔjíhún mɛ lɛ́ é bǐ kpó mɛ ɖěɖěe xu wɛ nɔ ná yě nǔɖuɖu lɛ́ é bǐ kpó cí te ɖo zɔ, 18 lobo sú xó hwenu e yě mɔ myɔ e ɖo fyɔ́fyɔ́ ɛ wɛ é sín azizɔ é, bo ɖɔ: ‘Toxo tɛ́ ka cí toxo ɖaxó ɔ ɖɔhun?’ 19 Yě nyi kɔ́ dó ta, yě ɖo avǐ ya wɛ, bo ɖo alě ná wɛ, lobo sú xó ɖɔ: ‘Áo! Áo! Toxo ɖaxó ɔ, éé mɛ mɛ ɖěɖěe ɖó tɔjíhún ɖo xu jí lɛ́ é bǐ jɛ dɔkun ɖe gbɔn dɔkun tɔn gblamɛ é! Ðo ganxixo ɖokpó mɛ ɔ, è sú kún tɔn dó!’

20 “Jǐnukúnsin! Jɛ awǎ ɖó nǔ e xá ɛ é wú! Mɛ mímɛ́ lɛ́, mɛsɛ́dó lɛ́ kpó gbeyíɖɔ lɛ́ kpó! Mi lɔ ní jɛ awǎ! Ðó Mawu ko ɖɔ hwɛ xá ɛ dó ta mitɔn mɛ.”

21 Wɛnsagun hlɔ̌nhlɔ́nnɔ ɖokpó zé awǐnnya e cí sé ɖaxó ɖɔhun é ɖé dó jǐ, bo nyi dó xu mɛ, lobo ɖɔ: “Lěe è ná yá wǔ sɔ́ Babilɔ́nu toxo ɖaxó ɔ nyi dó do gbɔn é nɛ́, bɔ è sɔ́ ná mɔ ɛ gbeɖé ǎ. 22 È sɔ́ ná se hansinɔ e ɖo han ji wɛ, bo ɖo agǐdigbo xo d’é mɛ wɛ lɛ́ é sín gbe ɖě ɖo Babilɔ́nu ǎ; è ka sɔ́ ná lɛ́ se hanjitɔ́ lɛ́, kpetekúntɔ́ lɛ́ kpó kpɛnkúntɔ́ lɛ́ kpó sín gbe ɖě ɖo fínɛ́ ǎ. È sɔ́ ná mɔ alɔlyɛnzɔ́watɔ́* ɖěbǔ ɖo fínɛ́ gbeɖé ǎ; è ka sɔ́ ná lɛ́ se sé ɖaxó ɖé sín gbe ɖo fínɛ́ gbeɖé ǎ. 23 Zogbɛ́n sín wěziza sɔ́ ná hɔ́n ɖo fínɛ́ gbeɖé ǎ; è sɔ́ ná se asisúnɔ kpó yawó kpó sín gbe ɖo fínɛ́ gbeɖé ǎ. Ðó ajɔ̌tɔ́ towe lɛ́ wɛ nyí nǔsúɖaxó ayǐkúngban ɔ tɔn lɛ́ ɖ’ayǐ, bɔ a flú akɔta lɛ́ bǐ gbɔn awǒvinúwiwa towe lɛ́ gblamɛ. 24 Nǔgbó ɔ, toxo énɛ́ mɛ wɛ è mɔ gbeyíɖɔ lɛ́, mɛ mímɛ́ lɛ́ kpó mɛ e è hu ɖo ayǐkúngban jí lɛ́ é bǐ kpó sín hun ɖe.”

19 Énɛ́ gúdo ɔ, un se gbe ɖaxó ɖé ɖi ɖo jǐxwé, bɔ é cí ahwan ɖaxó ɖé wɛ ɖo xó ɖɔ wɛ ɖɔhun. Yě ɖɔ: “Mi kpa Jǎa!* Mawu mǐtɔn tɔn wɛ nyí hwlɛngán, susu kpó hlɔ̌nhlɔ́n kpó, 2 ɖó hwɛɖiɖɔ tɔn lɛ́ nyí nǔgbó, bo jlɔ́. Ðó é ɖɔ hwɛ xá tonyatɔ́ ɖaxó e hɛn ayǐkúngban ɔ gblé, gbɔn agalilɛ* tɔn gblamɛ é, lobo ba hlɔn kannumɔ tɔn ɖěɖěe sín hun tonyatɔ́ ɔ kɔn nyi ayǐ lɛ́ é tɔn.” 3 Bɔ tlóló ɔ, yě lɛ́ ɖɔ azɔn wegɔ́ ɔ ɖɔ: “Mi kpa Jǎa!* Ðó myɔ e ɖo toxo ɔ fyɔ́ wɛ é sín azizɔ ɖo sisi wɛ káká sɔ́yi mavɔmavɔ.”

4 Mɛxó 24 lɛ́ kpó nǔɖogbɛ ɛnɛ lɛ́ kpó jɛ kpo, bo sɛn Mawu e jínjɔ́n axɔ́súzinkpo ɔ jí é, lobo ɖɔ: “Amǐ! Mi kpa Jǎa!”*

5 Gɔ́ ná ɔ, gbe ɖé ɖi sín axɔ́súzinkpo ɔ kɔn, bo ɖɔ: “Mi kannumɔ Mawu mǐtɔn tɔn e nɔ ɖó sísí e gɔ́ngɔ́n é n’i lɛ́ é bǐ, yɔkpɔ́vú kpó mɛxó kpó, ní ɖo susu kpa nú Mawu mǐtɔn wɛ.”

6 Un se bɔ gbe ɖé ɖi ahwan ɖaxó ɖé sín gbe ɖɔhun, bo ɖɔ nǔ sin gěgé ɖo ayǐ kɔn nyi wɛ ɖɔhun, lobo lɛ́ ɖɔ nǔ xɛbyoso dó gbe kpó hlɔ̌nhlɔ́n kpó ɖɔhun. Yě ɖɔ: “Mi kpa Jǎa!* Ðó Jexóva* Mawu mǐtɔn Nǔbǐwúkpétɔ́ ɔ ko jɛ axɔ́sú ɖu jí! 7 Mi nú mǐ ní j’awǎ, awǎjijɛ mǐtɔn ní túnflá, bónú mǐ ní kpa susu n’i, ɖó alɔwlíwlí Lɛ̌ngbɔ́ví ɔ tɔn sín hwenu ko su, bɔ asi tɔn ko sɔ́ nǔ. 8 Ɛɛn, è ná gbe asi tɔn ɖɔ é ní dó lɛ̌ɛnkanvɔ fɛ́ɖɛ́fɛ́ɖɛ́ mímɛ́ e nɔ kɔ́n é, ɖó lɛ̌ɛnkanvɔ fɛ́ɖɛ́fɛ́ɖɛ́ ɔ nɔ te nú nǔ jlɔ́jlɔ́ e mɛ mímɛ́ lɛ́ wa lɛ́ é.”

9 Bɔ wɛnsagun ɔ ɖɔ nú mì ɖɔ: “Wlǎn: Awǎjijɛnɔ wɛ nyí mɛ ɖěɖěe è ylɔ́ dó alɔwlíwlí Lɛ̌ngbɔ́ví ɔ tɔn sín agɔ̌ domɛ lɛ́ é.” Gɔ́ ná ɔ, é ɖɔ nú mì ɖɔ: “Xó nǔgbó Mawu tɔn lɛ́ wɛ nyí xó énɛ́ lɛ́.” 10 Énɛ́ ɔ, un jɛ kpo ɖo afɔ tɔn lɛ́ kɔn bo ná sɛn ɛ, amɔ̌, é ɖɔ nú mì ɖɔ: “Cɔ́ hwiɖée! Ma bló mɔ̌ ó! Kannumɔ hǎtɔ́ towe wɛ un nyí kpowun, bo lɛ́ nyí kannumɔ hǎtɔ́ nɔví towe ɖěɖěe è sɔ́ kúnnuɖiɖe dó Jezu wú sín azɔ̌ d’así ná lɛ́ é tɔn. Sɛn Mawu! Ðó kúnnuɖiɖe dó Jezu wú wɛ nyí nǔ e wú nǔɖɔɖayǐ lɛ́ dó tíin é.”

11 Jǐnukúnsin hun, bɔ un mɔ sɔ́ wěwé ɖokpó. È nɔ ylɔ́ mɛ e ɖ’é jí é ɖɔ Gbejínɔtɔ́ Nǔgbóɖɔtɔ́, é nɔ ɖɔ hwɛ jlɔ́jlɔ́, bo nɔ lɛ́ fun ahwan jlɔ́jlɔ́. 12 Nukún tɔn lɛ́ cí myɔ hɛhɛ ɖɔhun, bɔ axɔ́súgbákún gěgé ɖo ta tɔn. È wlán nyǐkɔ ɖé dó wǔ tɔn, bɔ mɛ ɖěbǔ tuun nyǐkɔ ɔ zɛ éɖésúnɔ wú ǎ; 13 é dó awu aga tɔn ɖokpó bɔ kanjɔ ɖ’é mɛ,* lobɔ è nɔ ylɔ́ ɛ ɖɔ Xó Mawu tɔn. 14 Gɔ́ ná ɔ, ahwankpá jǐxwé tɔn lɛ́ ɖo sɔ́ wěwé lɛ́ jí, bo ɖo xwixwedó è wɛ, bɔ yě dó lɛ̌ɛnkanvɔ fɛ́ɖɛ́fɛ́ɖɛ́ mímɛ́ wěwé. 15 Hwǐ ɖíɖá gaga ɖé nɔ tɔ́n sín nu tɔn mɛ, bɔ é ná sɔ́ dó xo akɔta lɛ́ ná. É ná zán gankpo dó xlɛ́ ali yě lɛ̌ngbɔ́nyitɔ́ ɖɔhun. Gɔ́ ná ɔ, é ná li vǐwun sín sínsɛ́n lɛ́ ɖo xomɛsin ɖaxó Mawu Nǔbǐwúkpétɔ́ ɔ tɔn sín vǐwunto mɛ. 16 È wlán nyǐkɔ ɖé dó awu tɔn aga tɔn ɔ wú, ɛɛn, ɖo asá tɔn jí; é wɛ nyí: Axɔ́sú axɔ́sú lɛ́ tɔn, Aklúnɔ aklúnɔ lɛ́ tɔn.

17 Un lɛ́ mɔ wɛnsagun ɖokpó ɖo te ɖo hwesivɔ́ mɛ, bɔ é sú xó tlílí, bo ɖɔ nú xɛ e ɖo zinzɔn gbɔn jǐnukúnsin tɛ́ntin* wɛ lɛ́ é bǐ ɖɔ: “Mi wá fí, bo xo miɖée kplé nú agɔ̌ ɖaxó Mawu tɔn, 18 bo ná mɔ tɛn dó ɖu axɔ́sú lɛ́ sín lan, sɔ́ja afatɔ́ngán lɛ́ sín lan, súnnu hlɔ̌nhlɔ́nnɔ lɛ́ sín lan, sɔ́ lɛ́ kpó mɛ e ɖo yě jí lɛ́ é kpó sín lan, gbɛtɔ́ lɛ́ bǐ sín lan, mɛ e ɖo yěɖée sí lɛ́ é sín lan, kannumɔ lɛ́ sín lan, gɔ́ nú yɔkpɔ́vú kpó mɛxó kpó sín lan.”

19 Un mɔ gběkanlin ɔ kpó axɔ́sú ayǐkúngban ɔ tɔn lɛ́ kpó, kpódó ahwankpá yětɔn lɛ́ kpán, bɔ yě xo yěɖée kplé, bo ná fun ahwan xá mɛ e ɖo sɔ́ ɔ jí é kpó ahwankpá tɔn kpó. 20 È wlí gběkanlin ɔ gɔ́ nú gbeyíɖɔ-nyíjɛtɔ́ e bló nǔjíwǔ lɛ́ ɖo nukɔn tɔn dó flú mɛ e wú gběkanlin ɔ sín wuntun ɖe lɛ́ é kpó mɛ e sɛn akpajlɛ́ tɔn lɛ́ é kpó é. È bɛ́ yě mɛ we lɛ́ bǐ nyi tɔgwede myɔ tɔn e mɛ hwemí ɖo jiji ɖe wɛ é mɛ gbɛɖe. 21 Amɔ̌, è sɔ́ hwǐ gaga e tɔ́n sín mɛ e ɖo sɔ́ ɔ jí é sín nu mɛ é dó hu mɛ e kpo lɛ́ é ná. Bɔ xɛ lɛ́ bǐ ɖu lan yětɔn gɔ́ xo.

20 Un mɔ wɛnsagun ɖé ɖo te jɛ sín jǐxwé wɛ, bɔ é hɛn cávi domaɖó-azan ɔ tɔn kpó wlɔ ɖaxó ɖé kpó alɔ mɛ. 2 É wlí dlagɔ́ɔn ɔ, dan xóxó e nyí Awǒvi, bo lɛ́ nyí Satáan é, bo blá ɛ nú xwe 1 000. 3 É zé è nyi dó domaɖó-azan ɔ mɛ, bo sú, lobo ɖó wuntun, bónú é ní ma sɔ́ flú akɔta lɛ́ ɖě ó, káká jɛ xwe 1 000 lɛ́ sín vivɔnu. Énɛ́ gúdo ɔ, è ɖó ná ɖe è nyi te nú hwenu kpɛɖé.

4 Bɔ un mɔ axɔ́súzinkpo ɖé lɛ́, bɔ è ná acɛ mɛ e jínjɔ́n jí lɛ́ é bónú yě ná ɖɔ hwɛ. Ɛɛn, un mɔ lǐndɔ̌n* mɛ ɖěɖěe è hu,* ɖó yě ɖe kúnnu dó Jezu wú, bo lɛ́ ɖɔ xó Mawu tɔn wútu lɛ́ é tɔn; un lɛ́ mɔ lǐndɔ̌n mɛ ɖěɖěe ma sɛn gběkanlin ɔ, alǒ akpajlɛ́ tɔn ǎ, bo ma ka lɛ́ ɖó wuntun ɔ ɖo nukɔn yětɔn kpó alɔ yětɔn kpó ǎ lɛ́ é tɔn. Yě wá gbɛ, bo ɖu axɔ́sú xá Klísu nú xwe 1 000. 5 (Mɛkúkú e kpo lɛ́ é wá gbɛ káká cóbónú xwe 1 000 lɛ́ wá vivɔnu ǎ.) Fínfɔ́n sín kú nukɔntɔn ɔ nɛ́. 6 Awǎjijɛnɔ kpó mɛ mímɛ́ kpó wɛ nyí mɛ ɖěbǔ e ɖó mǐmá ɖo fínfɔ́n sín kú nukɔntɔn ɔ mɛ é; kú wegɔ́ ɔ ɖó acɛ ɖě dó yě jí ǎ, é nyɔ́ wa ɔ, yě ná nyí vɔ̌sánúxwlémawutɔ́ nú Mawu kpó Klísu kpó, bo ná ɖu axɔ́sú xá ɛ* nú xwe 1 000.

7 Tlóló e xwe 1 000 lɛ́ ná wá vivɔnu é ɔ, è ná ɖe Satáan nyi te sín gankpá tɔn mɛ, 8 bɔ é ná tɔ́n, bo ná yi flú akɔta e ɖo wɛ̌kɛ́zo ɛnɛ ayǐkúngban ɔ tɔn lɛ́ mɛ lɛ́ é, énɛ́ wɛ nyí, Gɔ̌gu kpó Magɔ́gu kpó, bo ná xo yě kplé ɖó kpɔ́ bónú yě ná fun ahwan. Yě sukpɔ́ nyɛ̌kɛ́n e ɖo xutó é ɖɔhun. 9 Yě gba kpé ayǐkúngban ɔ bǐ jí, bo lɛ́ lɛ̌ dó fí e mɛ mímɛ́ lɛ́ ɖó gɔnu ɖó é kpó toxo e Mawu yí wǎn ná é kpó. Amɔ̌, myɔ jɛ te sín jǐxwé bo fyɔ́ yě. 10 È zé awǒvi e nɔ ɖo yě flú wɛ é nyi dó tɔgwede myɔ kpó hwemí kpó tɔn ɔ mɛ; fínɛ́ wɛ gběkanlin ɔ kpó gbeyíɖɔ-nyíjɛtɔ́ ɔ kpó ko ɖe; è ná dó ya nú yě* zǎn kéze káká sɔ́yi mavɔmavɔ.

11 Un mɔ axɔ́súzinkpo wěwé ɖaxó ɖokpó kpó mɛ e jínjɔ́n jí é kpó. Ayǐkúngban kpó jǐnukúnsin kpó hɔn sín nukɔn tɔn, bɔ è sɔ́ mɔ tɛn ɖě nú yě ǎ. 12 Un mɔ mɛkúkú lɛ́, mɛxó kpó yɔkpɔ́vú kpó, bɔ yě ɖo te ɖo axɔ́súzinkpo ɔ nukɔn, bɔ è hun wěma mlámlá lɛ́. Amɔ̌, è hun wěma mlámlá ɖěvo; wěma mlámlá gbɛ tɔn ɔ wɛ. È zɔn dó nǔ e è wlán dó wěma mlámlá lɛ́ mɛ lɛ́ é wú dó ɖɔ hwɛ xá mɛkúkú lɛ́ sɔgbe xá nǔwiwa yětɔn lɛ́. 13 Xu jó mɛkúkú e ɖo xu mɛ lɛ́ é, bɔ kú kpó Yɔdo* kpó jó mɛkúkú e ɖo yě mɛ lɛ́ é, lobɔ è ɖɔ hwɛ xá yě mɛ ɖokpó ɖokpó sɔgbe xá nǔwiwa yětɔn lɛ́. 14 È bɛ́ kú kpó Yɔdo* kpó nyi dó tɔgwede myɔ tɔn ɔ mɛ. Tɔgwede myɔ tɔn énɛ́ nɔ te nú kú wegɔ́ ɔ. 15 Gɔ́ ná ɔ, è zé mɛ ɖěbǔ e sín nyǐkɔ è ma mɔ ɖo gbɛwéma ɔ mɛ ǎ é nyi dó tɔgwede myɔ tɔn ɔ mɛ.

21 Un mɔ jǐnukúnsin yɔ̌yɔ́ ɖé kpó ayǐkúngban yɔ̌yɔ́ ɖé kpó, ɖó jǐnukúnsin xóxó ɔ kpó ayǐkúngban xóxó ɔ kpó ko bú, bɔ xu sɔ́ tíin ǎ. 2 Un lɛ́ mɔ toxo mímɛ́ ɔ, énɛ́ wɛ nyí, Jeluzalɛ́mu yɔ̌yɔ́ ɔ, bɔ é gosín Mawu gɔ́n bo ɖo te jɛ sín jǐxwé wɛ; é sɔ́ nǔ yawó e è ba acɔ́ ná nú asú tɔn é ɖɔhun. 3 Énɛ́ ɔ, un se bɔ gbe ɖaxó ɖé ɖi sín axɔ́súzinkpo ɔ kɔn, bo ɖɔ: “Éɖíe! Goxɔ Mawu tɔn ɖo kpɔ́ xá gbɛtɔ́ lɛ́; é ná nɔ xá yě, bɔ yě ná nyí togun tɔn. Mawu ɖésúnɔ ná nɔ kpɔ́ xá yě. 4 É ná súnsún ɖasin bǐ sín nukún yětɔn mɛ, kú sɔ́ ná tíin ǎ; mɔ̌ jɛ́n aluwɛ alǒ alěníná alǒ wǔvɛ́ ma sɔ́ ná tíin ǎ é nɛ́. Nǔ xóxó lɛ́ ko bú.”

5 Bɔ mɛ e ɖo ayǐjínjɔ́n ɖo axɔ́súzinkpo ɔ jí é ɖɔ: “Éɖíe! Un ɖo nǔ lɛ́ bǐ bló wɛ yɔ̌yɔ́ tɔn.” É lɛ́ ɖɔ: “Wlǎn, ɖó xó ɖejidéwú wɛ nyí xó énɛ́ lɛ́ bo lɛ́ nyí nǔgbó.” 6 É lɛ́ ɖɔ nú mì ɖɔ: “Yě ko jɛnu! Nyɛ wɛ nyí Alúfa bo lɛ́ nyí Omɛ́ga,* nyɛ wɛ nyí bǐbɛ́mɛ ɔ bo lɛ́ nyí vivɔnu ɔ. Un ná ná tɔjɔtɛn* e nɔ ná gbɛ mɛ é sín sin mɛ ɖěbǔ e kɔ ɖo xúxú wɛ é vɔ̌nu. 7 Mɛ ɖěbǔ e ná ɖu ɖ’é jí é ná ɖu gǔ nǔ énɛ́ lɛ́ tɔn, bɔ un ná nyí Mawu tɔn, lobɔ é ná nyí vǐ ce. 8 Amɔ̌, nǔvɔ́nɔ lɛ́, mɛ e ma ɖó nǔɖiɖi ǎ lɛ́ é, mɛ e kwíji bo xyɔ́ wǔ lɛ́ é, mɛhutɔ́ lɛ́, agalɛtɔ́* lɛ́, mɛ e nɔ ɖ’alɔ ɖo awǒvinúwiwa mɛ lɛ́ é, bǒcyɔsɛntɔ́ lɛ́ kpó adingbannɔ lɛ́ bǐ kpó ɔ, tɔgwede e mɛ myɔ kpó hwemí kpó ɖo jiji ɖe wɛ é wɛ ɖo te kpɔ́n yě. Énɛ́ nɔ te nú kú wegɔ́ ɔ.”

9 Wɛnsagun tɛ́nwe e hɛn gannú tɛ́nwe, bɔ awě tɛ́nwe gǔdo tɔn lɛ́ gɔ́ é ɖokpó wá bo ɖɔ nú mì ɖɔ: “Wǎ, bónú má xlɛ́ we yawó ɔ, énɛ́ wɛ nyí, Lɛ̌ngbɔ́ví ɔ sín asi.” 10 Énɛ́ ɔ, é zé mì yi só ɖaxó e yi jǐ é ɖé jí, gbɔn hlɔ̌nhlɔ́n gbigbɔ ɔ tɔn gblamɛ, bo xlɛ́ mì Jeluzalɛ́mu toxo mímɛ́ ɔ, bɔ é gosín Mawu gɔ́n bo ɖo te jɛ sín jǐxwé wɛ. 11 É ɖó susu Mawu tɔn. É nɔ kɔ́n awǐnnya e xɔ akwɛ́ tawun é ɖé ɖɔhun, bo nɔ kɔ́n awǐnnya jasipée e ɖo kínkɔ́n wɛ klisutálu ɖɔhun é ɖɔhun. 12 É ɖó dǒ ɖaxó e yi jǐ é ɖé, bo ɖó hɔntogbó 12, bɔ wɛnsagun 12 ɖo hɔntogbó lɛ́ ta, lobɔ è wlán Izlayɛ́li ví lɛ́ sín akɔta 12 lɛ́ sín nyǐkɔ dó hɔntogbó lɛ́ wú. 13 Hɔntogbó atɔn ɖo zǎnzǎnhwe jí, atɔn ɖo totaligbé, atɔn ɖo tofɔligbé, bɔ atɔn ɖo gbadahwe jí. 14 Dǒ toxo ɔ tɔn lɔmɔ̌ ɖó awǐnnya dodónú tɔn 12, bɔ mɛsɛ́dó Lɛ̌ngbɔ́ví ɔ tɔn 12 lɛ́ sín nyǐkɔ 12 lɛ́ ɖo yě wú.

15 Mɛ e ɖo xó ɖɔ xá mì wɛ é hɛn fántín e è sɔ́ siká dó bló é, bo ná mɔ tɛn dó jlɛ́ toxo ɔ, hɔntogbó tɔn lɛ́ kpó dǒ tɔn kpó. 16 Toxo ɔ ɖó akpáxwé ɛnɛ, bɔ bǐ ɖo zɛ̌nzɛ̌n; ga tɔn kpó gblǒ tɔn kpó ɖo zɛ̌nzɛ̌n. É sɔ́ fántín ɔ dó jlɛ́ toxo ɔ, bɔ é yi kilomɛ́tlu 2 220 mɔ̌;* ga tɔn, gblǒ tɔn kpó jǐyiyi tɔn kpó ɖo zɛ̌nzɛ̌n. 17 É jlɛ́ dǒ ɔ lɔmɔ̌, bɔ é yi mɛ̌tlu 64 mɔ̌,* sɔgbe xá nǔjlɛ́nú gbɛtɔ́ tɔn, bɔ é lɛ́ sɔgbe xá nǔjlɛ́nú wɛnsagun tɔn ɖo hwe ɖokpó ɔ nu. 18 Awǐnnya jasipée wɛ è sɔ́ dó mɛ dǒ ɔ ná, bo sɔ́ siká akú dó bló toxo ɔ ná, bɔ é cí wěkpɛ́n e mɛ è nɔ mɔ nǔ gbɔn é ɖɔhun. 19 Awǐnnya xɔ akwɛ́ tɛnmɛ tɛnmɛ lɛ́ bǐ wɛ è sɔ́ dó ba acɔ́ nú dǒ toxo ɔ tɔn sín dodónú lɛ́ ná: dodónú nukɔntɔn ɔ nyí jasipée, wegɔ́ ɔ nyí safíi, atɔngɔ́ ɔ nyí kalusedwáni, ɛnɛgɔ́ ɔ nyí emɛlódu, 20 atɔ́ɔ́ngɔ́ ɔ nyí sadonísi, ayizɛ́ngɔ́ ɔ nyí sadwáni, tɛ́nwegɔ́ ɔ nyí klizolíti, tántɔngɔ́ ɔ nyí belílu, tɛ́nnɛgɔ́ ɔ nyí topázi, wǒgɔ́ ɔ nyí klizopázi, wǒɖokpógɔ́ ɔ nyí yasɛ́nti, wěwegɔ́ ɔ nyí amɛtísi. 21 Gɔ́ ná ɔ, hɔntogbó 12 lɛ́ nyí jɛ̌ 12; jɛ̌ ɖokpó wɛ è sɔ́ dó bló hɔntogbó lɛ́ ɖokpó ɖokpó ná. È sɔ́ siká akú dó bló ali ɖaxó toxo ɔ tɔn ná, bɔ é cí wěkpɛ́n e mɛ è nɔ mɔ nǔ gbɔn é ɖɔhun.

22 Un mɔ tɛ́npli ɖo toxo ɔ mɛ ǎ, ɖó Jexóva* Mawu Nǔbǐwúkpétɔ́ ɔ wɛ nyí tɛ́npli tɔn, bɔ Lɛ̌ngbɔ́ví ɔ lɔ nyí tɛ́npli tɔn. 23 Toxo ɔ ɖó hudó hwesivɔ́ alǒ sun tɔn, bónú yě ná hɔ́n dó jǐ tɔn ǎ, ɖó susu Mawu tɔn nɔ ná ɛ wěziza, bɔ Lɛ̌ngbɔ́ví ɔ nyí zogbɛ́n tɔn. 24 Akɔta lɛ́ ná nɔ ɖi zɔnlin ɖo wěziza tɔn nu, bɔ axɔ́sú ayǐkúngban ɔ tɔn lɛ́ ná hɛn susu yětɔn wá mɛ. 25 È ná nɔ sú hɔntogbó tɔn lɛ́ ɖo azǎn ɖěbǔ jí ǎ, ɖó zǎn ná nɔ kú ɖo fínɛ́ ǎ. 26 Bɔ yě ná nɔ hɛn susu akɔta lɛ́ tɔn kpó yɛ̌yi yětɔn kpó wá mɛ. 27 Amɔ̌, nǔ blíblí, mɛ e nɔ wa nǔ e xyɔ́ wǔ é kpó mɛblɛ́tɔ́ kpó ɖěbǔ ná byɔ́ mɛ ɖo ali ɖěbǔ nu ǎ; mɛ e sín nyǐkɔ è wlán dó wěma mlámlá gbɛ tɔn Lɛ̌ngbɔ́ví ɔ tɔn mɛ lɛ́ é kɛ́ɖɛ́ wɛ ná byɔ́ mɛ.

22 Wɛnsagun ɔ xlɛ́ mì sin e nɔ ná gbɛ mɛ é sín tɔsisa, bɔ é za wě klisutálu ɖɔhun, bo ɖo sisa sín Mawu kpó Lɛ̌ngbɔ́ví ɔ kpó sín axɔ́súzinkpo kɔn wɛ, 2 gbɔn toxo ɔ sín ali ɖaxó ɔ tɛ́ntin. Atín e nɔ ná gbɛ mɛ lɛ́ é ɖo tɔsisa ɔ sín awa we lɛ́ bǐ xwé, bo nɔ ná sínsɛ́n azɔn 12; yě nɔ ná sínsɛ́n yětɔn lɛ́ ɖo sun ɖokpó ɖokpó mɛ. Ama atín ɔ tɔn lɛ́ nɔ gbɔ azɔn nú akɔta lɛ́.

3 Nudómɛ ɖěbǔ sɔ́ ná ɖo fínɛ́ ǎ. É nyɔ́ wa ɔ, axɔ́súzinkpo Mawu kpó Lɛ̌ngbɔ́ví ɔ kpó tɔn ná ɖo toxo ɔ mɛ, bɔ kannumɔ tɔn lɛ́ ná nɔ wa sinsɛnzɔ́ mímɛ́ n’i; 4 yě ná mɔ nukún tɔn mɛ, bɔ nyǐkɔ tɔn ná ɖo nukɔn nú yě. 5 Gɔ́ ná ɔ, zǎn sɔ́ ná nɔ kú ɖě ǎ, yě ka ná ɖó wěziza zogbɛ́n tɔn alǒ wěziza hwesivɔ́ tɔn sín hudó ǎ, ɖó Jexóva* Mawu ná tá wěziza dó yě jí, bɔ yě ná ɖu axɔ́sú káká sɔ́yi mavɔmavɔ.

6 É ɖɔ nú mì ɖɔ: “Xó ɖejidéwú wɛ nyí xó énɛ́ lɛ́ bo lɛ́ nyí nǔgbó; ɛɛn, Jexóva,* Mawu e nɔ ɖɔ xó gbɔn gbeyíɖɔ lɛ́ jí é sɛ́ wɛnsagun tɔn dó, bónú é ná ɖe nǔ e ná jɛ ɖo malínmálín mɛ lɛ́ é xlɛ́ kannumɔ tɔn lɛ́. 7 Éɖíe! Un jawě ɖo yǐyá mɛ. Awǎjijɛnɔ wɛ nyí mɛ ɖěbǔ e nɔ xwedó xó nǔɖɔɖayǐ tɔn e ɖo wěma mlámlá élɔ́ mɛ lɛ́ é.”

8 Nyɛ Jaan wɛ ɖo nǔ énɛ́ lɛ́ se wɛ, bo lɛ́ ɖo nǔ énɛ́ lɛ́ mɔ wɛ. Ée un se nǔ énɛ́ lɛ́ bo lɛ́ mɔ yě é ɔ, un jɛ kpo ɖo wɛnsagun e ɖo yě xlɛ́ mì wɛ é sín afɔ lɛ́ kɔn, bo ná sɛn ɛ. 9 Amɔ̌, é ɖɔ nú mì ɖɔ: “Cɔ́ hwiɖée! Ma bló mɔ̌ ó! Kannumɔ hǎtɔ́ towe wɛ un nyí kpowun, bo lɛ́ nyí kannumɔ hǎtɔ́ nɔví towe gbeyíɖɔ lɛ́ kpó mɛ ɖěɖěe nɔ xwedó xó e ɖo wěma mlámlá élɔ́ mɛ lɛ́ é kpó tɔn. Sɛn Mawu.”

10 É lɛ́ ɖɔ nú mì ɖɔ: “Ma hwlá xó nǔɖɔɖayǐ tɔn e ɖo wěma mlámlá élɔ́ mɛ lɛ́ é ó, ɖó hwenu e è ɖó dó é ko sɛkpɔ́. 11 Mɛ e nyí nǔagɔwatɔ́ é ní fɔ́n bo ɖo nǔagɔwatɔ́ nyí wɛ, mɛ e nyí mɛ blíblí é ní fɔ́n bo ɖo mɛ blíblí nyí wɛ; amɔ̌, mɛ e nyí nǔjlɔ́jlɔ́watɔ́ é ní fɔ́n bo ɖo nǔjlɔ́jlɔ́watɔ́ nyí wɛ, mɛ e nyí mɛ mímɛ́ é ní fɔ́n bo ɖo mɛ mímɛ́ nyí wɛ.

12 “‘Éɖíe! Un jawě ɖo yǐyá mɛ, bɔ ajɔ e un ná dó mɛ é ɖo así ce, lobɔ un ná s’axɔ́ mɛ ɖokpó ɖokpó sɔgbe xá azɔ̌ e é wa é. 13 Nyɛ wɛ nyí Alúfa bo lɛ́ nyí Omɛ́ga,* nyɛ wɛ nyí mɛ nukɔntɔn ɔ bo lɛ́ nyí mɛ gǔdo tɔn ɔ, nyɛ wɛ nyí bǐbɛ́mɛ ɔ bo lɛ́ nyí vivɔnu ɔ. 14 Awǎjijɛnɔ wɛ nyí mɛ ɖěɖěe nya awu gaga yětɔn lɛ́, bo ná dó sixú ɖó acɛ bo yi atín gbɛ tɔn lɛ́ kɔn, lobo ná dó sixú lɛ́ byɔ́ toxo ɔ mɛ gbɔn hɔntogbó tɔn lɛ́ nu é. 15 Kɔ́xo wɛ cukú lɛ́,* mɛ e nɔ ɖ’alɔ ɖo awǒvinúwiwa mɛ lɛ́ é, mɛ e nɔ lɛ aga* lɛ́ é, mɛhutɔ́ lɛ́, bǒcyɔsɛntɔ́ lɛ́ kpó mɛ e yí wǎn nú adingbanɖíɖó bo nɔ fɔ́n bo nɔ ɖo adingban ɖó wɛ lɛ́ é bǐ kpó ɖe.’

16 “ ‘Nyɛ Jezu wɛ sɛ́ wɛnsagun ce dó, bónú é ná ɖe kúnnu nú we dó nǔ énɛ́ lɛ́ wú nú agun lɛ́. Nyɛ wɛ nyí ɖɔ Davídi tɔn, bo lɛ́ nyí kúnkan Davídi tɔn; nyɛ wɛ nyí sunví zǎnzǎn tɔn e ɖo kínkɔ́n wɛ é.’ ”

17 Gbigbɔ ɔ kpó yawó ɔ kpó nɔ ɖɔ: “Wǎ!” Mɛ ɖěbǔ e ɖo sise wɛ é ní ɖɔ: “Wǎ!” Mɛ ɖěbǔ e kɔ xú é ní wá; mɛ ɖěbǔ e jló é ní yí sin gbɛ tɔn ɔ vɔ̌nu.

18 Un ɖo kúnnu élɔ́ ɖe nú mɛ ɖěɖěe se xó nǔɖɔɖayǐ tɔn e ɖo wěma mlámlá élɔ́ mɛ lɛ́ é bǐ wɛ: Ényí mɛ ɖěbǔ gɔ́ nǔɖé nú nǔ élɔ́ lɛ́ ɔ, Mawu ná sɛ́ awě ɖěɖěe xó è ɖɔ ɖo wěma mlámlá élɔ́ mɛ lɛ́ é d’è; 19 ényí mɛ ɖěbǔ ɖe nǔ ɖěbǔ sín xó e ɖo wěma mlámlá nǔɖɔɖayǐ élɔ́ tɔn mɛ lɛ́ é mɛ ɔ, Mawu ná ɖe mǐmá e nyí étɔn é sín atín gbɛ tɔn lɛ́ mɛ, énɛ́ wɛ nyí, nǔ ɖěɖěe è wlán dó wěma mlámlá élɔ́ mɛ lɛ́ é, bo ná lɛ́ ɖe sín toxo mímɛ́ ɔ mɛ.

20 “Mɛ e ɖe kúnnu nǔ énɛ́ lɛ́ tɔn é ɖɔ: ‘Ɛɛn, un jawě ɖo yǐyá mɛ.’”

“Amǐ! Wǎ, Aklúnɔ Jezu.”

21 Fɛ́nú Aklúnɔ Jezu tɔn ní nɔ kpɔ́ xá mɛ mímɛ́ lɛ́.