JAAN ATƆNGƆ́

1 Nyɛ mɛxómɔ* ɔ wɛ ɖo nǔ wlán sɛ́dó Gayiwúsi, mɛ vívɛ́ná ce, ée un yí wǎn ná nǔgbó nǔgbó é wɛ.

2 Mɛ vívɛ́ná ce, un ɖo ɖɛ xo wɛ ɖɔ nǔ bǐ ní kpo ɖo yiyi nú we wɛ, bónú a ní ɖó lanmɛ syɛ́n hunsin ɖagbe, lěe nǔ bǐ ɖo yiyi nú we* wɛ gbɔn din é. 3 Ðó xomɛ hun mì tawun, hwenu e nɔví lɛ́ wá bo ɖe kúnnu dó gbejí e a ɖe nú nǔgbó ɔ é wú é; ɛɛn, un tuun ɖɔ a ɖo nǔgbó ɔ sín ali xwedó wɛ. 4 Ényí un se ɖɔ vǐ ce lɛ́ ɖo nǔgbó ɔ sín ali xwedó wɛ ɔ, nǔɖé sɔ́ nɔ hun xomɛ nú mì* hú mɔ̌ ǎ.

5 Mɛ vívɛ́ná ce, a nɔ ɖe gbejíninɔ towe xlɛ́ ɖo nǔ e a nɔ wa nú nɔví lɛ́ é mɛ, a ka tlɛ tuun yě ɖ’ayǐ ǎ. 6 Yě ɖe kúnnu dó wǎnyíyí towe wú ɖo agun ɔ nukɔn. Ényí yě wá xweyǐgbe hǔn, kɛnklɛ́n d’alɔ yě, lěe é jɛxá Mawu gbɔn é. 7 Ðó nyǐkɔ tɔn wútu wɛ yě yi fí vovo lɛ́, yě ka yí nǔɖé ɖo mɛ e ɖo akɔta ɖě lɛ́ mɛ lɛ́ é sí ǎ. 8 Énɛ́ wú ɔ, é ɖo dandan ɖɔ mǐ ní yí mɛ mɔ̌hun lɛ́, bónú mǐ ní dó sixú húzú azɔ̌gbɛ́ ɖo nǔgbó ɔ mɛ.

9 Un wlán nǔɖé sɛ́dó agun ɔ, amɔ̌, Diotlefɛ́si, éé nɔ ba ná nɔ tɛn nukɔntɔn ɔ mɛ ɖo tɛ́ntin yětɔn é, nɔ ɖó sísí nú nǔ e mǐ ɖɔ lɛ́ é ɖě ǎ. 10 Énɛ́ wú wɛ ényí un wá ɔ, un ná dɔn ayi mɛ lɛ́ tɔn wá azɔ̌ nyanya e wa wɛ é ɖe lɛ́ é jí, ɖi xó nyanya e fúnfún kpé dó mǐ wú wɛ é ɖe lɛ́ é.* Énɛ́ víví hwe, bɔ é nɔ gbɛ́ ɖɔ émí kún ná yí nɔví lɛ́ kpó sísí kpó ó; bɔ mɛ e nɔ jló ná yí yě lɛ́ é ɔ, é nɔ tɛ́n kpɔ́n bo ná sú ali tɔn dó yě, lobo ná lɛ́ ɖe yě sín agun ɔ mɛ.

11 Mɛ vívɛ́ná ce, ma xwedó kpɔ́ndéwú nyanya lɛ́ ó, loɔ, xwedó kpɔ́ndéwú ɖagbe lɛ́. Mɛ e nɔ wa nǔ ɖagbe é ɔ, Mawu gɔ́n wɛ é gosín. Mɛ e nɔ wa nǔ nyanya é kplɔ́n bo tuun Mawu ǎ. 12 Nɔví lɛ́ bǐ wɛ nɔ ɖɔ xó ɖagbe dó Demɛtliwúsi wú, bɔ nǔgbó ɔ lɔ nɔ ɖe kúnnu n’i. Nǔgbó ɔ, mǐ lɔ ɖo kúnnu ɖe n’i wɛ, bɔ a ka tuun ɖɔ kúnnuɖiɖe mǐtɔn nyí nǔgbó.

13 Un ɖó xó gěgé bo ná ɖɔ nú we, amɔ̌, un ba bo ná ɖo wětín kpó wěmasin kpó zán dó ɖo nǔ wlán sɛ́dó we wɛ ǎ. 14 Un ɖo nukún ɖó wɛ bo ná mɔ we ɖo malínmálín mɛ, bɔ mǐ ná kpé nu bo ɖɔ xó.

Fífá ní nɔ kpɔ́ xá we.

Xɔ́ntɔn e ɖo fí lɛ́ é dó gbe sɛ́dó we. Dǒ gbe xɔ́ntɔn e ɖo dɔ̌n lɛ́ é ɖokpó ɖokpó nú mì.