JAAN NUKƆNTƆN

1 Mǐ ɖo nǔ wlán sɛ́dó mi wɛ dó mɛ e ko tíin sín bǐbɛ́mɛ é, mɛ e ɖo xó ɖɔ wɛ bɔ mǐ se é, mɛ e mǐ mɔ ɖó nukún wú é, mɛ e mǐ kpɔ́n nǔ e é wa lɛ́ é bo ɖó alɔ wǔtu tɔn é wú; mǐ ɖo nǔ wlán sɛ́dó mi wɛ dó xó e nɔ ná gbɛ mɛ é wú. 2 (Ɛɛn, è ɖe gbɛ mavɔmavɔ ɔ xlɛ́ mǐ, bɔ mǐ mɔ bo ɖo kúnnu ɖe ná wɛ, lobo ɖo xó ɖɔ d’é wú nú mi wɛ. Gbɛ mavɔmavɔ énɛ́ ɔ, Tɔ́ ɔ gɔ́n wɛ é gosín bɔ è ɖe xlɛ́ mǐ). 3 Mǐ lɛ́ ɖo xó ɖɔ nú mi wɛ dó mɛ e mǐ mɔ, bɔ é ɖo xó ɖɔ wɛ bɔ mǐ se é wú, bónú mi lɔ ná dó sixú nɔ bǔ* xá mǐ. Bɔ bǔ énɛ́ e mǐ ɖe é ɔ, mǐ lɛ́ ɖe xá Tɔ́ ɔ, bo lɛ́ ɖe xá Vǐ tɔn Jezu Klísu. 4 Mǐ ɖo nǔ énɛ́ lɛ́ wlán wɛ bónú awǎjijɛ mǐtɔn ná dó sixú túnflá.

5 Wɛn e mǐ se sín gɔ̌n tɔn bo ɖo dǐdó mi wɛ é ɖíe: Mawu ɔ, wěziza wɛ é nyí, bɔ ablu ɖěbǔ ɖo éyɛ́ mɛ ǎ.* 6 Ényí mǐ ɖɔ: “Mǐ ɖo bǔ xá ɛ,” bo ka lɛ́ kpo ɖo zɔnlin ɖi wɛ ɖo ablu mɛ hǔn, adingban ɖó wɛ mǐ ɖe, bo ɖo gbɛ zán sɔgbe xá nǔgbó ɔ wɛ ǎ. 7 Amɔ̌, ényí mǐ ɖo zɔnlin ɖi wɛ ɖo wěziza nu, lěe éɖésúnɔ ɖo wěziza nu gbɔn é hǔn, mǐ mɛ bǐ ɖo bǔ bɔ Vǐ tɔn Jezu sín hun lɛ mǐ wé sín hwɛ bǐ mɛ.

8 Ényí mǐ ɖɔ: “Hwɛ ɖě ɖo kɔ nú mǐ ǎ” hǔn, mǐɖée blɛ́ wɛ mǐ ɖe, bɔ nǔgbó ɔ ɖo mǐ mɛ ǎ. 9 Ényí mǐ ɖɔ hwɛ mǐtɔn lɛ́ ɔ, gbejínɔtɔ́ wɛ n’i bo lɛ́ nyí nǔjlɔ́jlɔ́watɔ́, énɛ́ wú ɔ, é ná sɔ́ hwɛ mǐtɔn lɛ́ kɛ mǐ, bo ná lɛ mǐ wé sín nǔagɔwiwa lɛ́ bǐ mɛ. 10 Ényí mǐ ɖɔ: “Mǐ hu hwɛ kpɔ́n ǎ” hǔn, adingbannɔ ylɔ́ ɛ ɖɔ wɛ mǐ ɖe nɛ́, bɔ xó tɔn ɖo mǐ mɛ ǎ.

2 Vǐ ce vívɛ́ná lɛ́ mi, un ɖo nǔ élɔ́ lɛ́ wlán sɛ́dó mi wɛ bónú mi ní ma hu hwɛ ó. É ɖo mɔ̌ có, ényí mɛɖé ka wá hu hwɛ ɔ, mǐ ɖó alɔgɔ́númɛtɔ́* ɖokpó ɖo Tɔ́ ɔ gɔ́n, é wɛ nyí Jezu Klísu, mɛ e nɔ wa nǔ jlɔ́jlɔ́ ɖo Mawu nukúnmɛ é. 2 É nyí vɔ̌sísá hwɛsúnsúnsínkɔnúmɛ tɔn* nú hwɛ mǐtɔn lɛ́, é ka nyí nú mǐdɛɛ lɛ́ tɔn lɛ́ kɛ́ɖɛ́ ǎ, loɔ, é lɛ́ nyí nú gbɛ ɔ bǐ tɔn. 3 Bɔ ényí mǐ kpo ɖo tónú se nú sɛ́n tɔn lɛ́ wɛ ɔ, é ná xlɛ́ vaan ɖɔ mǐ tuun i. 4 Ényí mɛɖé ɖɔ: “Un kplɔ́n bo tuun i,” bo ma ka nɔ se tónú nú sɛ́n tɔn lɛ́ ǎ ɔ, adingbannɔ wɛ nú mɛ énɛ́, bɔ nǔgbó ɔ ɖo mɛ énɛ́ mɛ ǎ. 5 Amɔ̌, ényí mɛɖé nɔ xwedó xó tɔn ɔ, énɛ́ ná xlɛ́ ɖɔ é yí wǎn nú Mawu nǔgbó nǔgbó. Mɔ̌ mɛ ɔ, mǐ nɔ tuun ɖɔ mǐ ɖo bǔ xá ɛ. 6 É ɖo dandan ɖɔ mɛ e ɖɔ ɖɔ émí kpo ɖo bǔ xá Jezu é ní kpo ɖo gbɛ zán wɛ lěe éyɛ́ zán gbɛ gbɔn é.

7 Mɛ vívɛ́ná ce lɛ́ mi, un ɖo sɛ́n ɖé wlán sɛ́dó mi wɛ, é ka nyí sɛ́n yɔ̌yɔ́ ɖé wɛ ǎ, loɔ, sɛ́n xóxó e mi ko ɖó sín bǐbɛ́mɛ é wɛ. Sɛ́n xóxó énɛ́ ɔ, xó e mi se é wɛ. 8 Un lɛ́ ɖo sɛ́n yɔ̌yɔ́ ɖé wlán sɛ́dó mi wɛ, sɛ́n ɖé wɛ bɔ Jezu xwedó bɔ mi lɔ xwedó, ɖó ablu ɔ ɖo wǐwá yi wɛ, bɔ wěziza nǔgbó ɔ ko ɖo hǐnhɔ́n wɛ.

9 Mɛ e ɖɔ ɖɔ émí ɖo wěziza nu, bo ka gbɛ́ wǎn nú nɔví tɔn é kpo ɖo ablu mɛ. 10 Mɛ e yí wǎn nú nɔví tɔn é ɖo wěziza nu, bɔ nǔ ɖěbǔ nɔ nyí afɔklɛ́nnú n’i ǎ. 11 Amɔ̌, mɛ e gbɛ́ wǎn nú nɔví tɔn é ɖo ablu mɛ, bo ɖo zɔnlin ɖi wɛ ɖo ablu mɛ, lobo tuun fí e yi wɛ é ɖe é ǎ, ɖó ablu ɔ tɔ́n nukún i.

12 Vǐ ce vívɛ́ná lɛ́ mi, un ɖo nǔ wlán sɛ́dó mi wɛ, ɖó è ko sɔ́ hwɛ mitɔn lɛ́ kɛ mi, ɖó nyǐkɔ tɔn wútu. 13 Vǐtɔ́ lɛ́ mi, un ɖo nǔ wlán sɛ́dó mi wɛ, ɖó mi kplɔ́n bo tuun éyɛ́ mɛ e tíin sín bǐbɛ́mɛ é. Dɔ̌nkpɛvú lɛ́ mi, un ɖo nǔ wlán sɛ́dó mi wɛ, ɖó mi ɖu ɖo mɛ nyanya ɔ jí. Vǐ ce vívɛ́ná lɛ́ mi, un wlán nǔ sɛ́dó mi, ɖó mi kplɔ́n bo tuun Tɔ́ ɔ. 14 Vǐtɔ́ lɛ́ mi, un wlán nǔ sɛ́dó mi, ɖó mi kplɔ́n bo tuun éyɛ́ mɛ e tíin sín bǐbɛ́mɛ é. Dɔ̌nkpɛvú lɛ́ mi, un wlán nǔ sɛ́dó mi, ɖó mi ɖó hlɔ̌nhlɔ́n, bo ɖi nǔ nú xó Mawu tɔn, lobo ɖu ɖo mɛ nyanya ɔ jí.

15 Mi ma yí wǎn nú gbɛ ɔ ó, mi ma ka lɛ́ yí wǎn nú nǔ e ɖo gbɛ ɔ mɛ lɛ́ é ó. Ényí mɛɖé yí wǎn nú gbɛ ɔ hǔn, é ɖó wǎnyíyí Tɔ́ ɔ tɔn ǎ; 16 ɖó nǔ e ɖo gbɛ ɔ mɛ lɛ́ é, ɖi jlǒ agbaza tɔn lɛ́, jlǒ nukún tɔn lɛ́, kpó nǔɖókan mɛtɔn lɛ́ jíjlá* kpó ɖě gosín Tɔ́ ɔ gɔ́n ǎ, loɔ, gbɛ ɔ tɔn wɛ yě nyí. 17 Gɔ́ ná ɔ, gbɛ ɔ ɖo wǐwá yi wɛ kpó jlǒ tɔn lɛ́ kpó, amɔ̌, mɛ e nɔ wa jlǒ Mawu tɔn ɔ ná nɔ gbɛ káká sɔ́yi.

18 Vǐ ce vívɛ́ná lɛ́ mi, gan gǔdo gúdo tɔn ɔ ko xo, bɔ lěe mi ko se ɖɔ kɛntɔ́ Klísu tɔn ɔ jawě gbɔn é ɔ, kɛntɔ́ Klísu tɔn gěgé wɛ tlɛ ko xwetɔ́n din, énɛ́ wú ɔ, mǐ tuun ɖɔ gan gǔdo gúdo tɔn ɔ wɛ xo. 19 Gɔ̌n mǐtɔn wɛ yě gosín, amɔ̌, yě nyí mɛ mǐtɔn ǎ,* ɖó ényí yě ko nyí mɛ mǐtɔn ɖ’ayǐ wɛ ɔ, yě ná ko nɔ kpɔ́ xá mǐ. Amɔ̌, yě gosín gɔ̌n mǐtɔn, bónú énɛ́ ná xlɛ́ nyi wɛn ɖɔ mɛ bǐ kún nyí mɛ mǐtɔn ó. 20 Mɛ mímɛ́ ɔ sɔ́ mi, bɔ mi mɛ bǐ tuun nǔgbó ɔ. 21 É nyí ɖɔ mi tuun nǔgbó ɔ ǎ wútu wɛ un wlán nǔ sɛ́dó mi ǎ, amɔ̌, un wlán nǔ sɛ́dó mi ɖó mi tuun nǔgbó ɔ, bɔ adingban ɖěbǔ ka nɔ tɔ́n sín mɛ ǎ.

22 Mɛ̌ ka nyí adingbannɔ ɔ zɛ mɛ e gbɛ́ ɖɔ Jezu kún nyí Klísu ó é wú? Kɛntɔ́ Klísu tɔn ɔ ɖíe: mɛ e gbɛ́ Tɔ́ ɔ kpó Vǐ ɔ kpó é. 23 Mɛ ɖěbǔ e gbɛ́ Vǐ ɔ é ɖo bǔ xá Tɔ́ ɔ lɔmɔ̌ ǎ. Amɔ̌, mɛ ɖěbǔ e ɖɔ ɖɔ émí ɖi nǔ nú Vǐ ɔ é ɖo bǔ xá Tɔ́ ɔ lɔmɔ̌. 24 Midɛɛ lɛ́ ɔ, nǔ e mi se sín bǐbɛ́mɛ lɛ́ é ɖó ná nɔ ayi mitɔn mɛ. Ényí nǔ e mi se sín bǐbɛ́mɛ lɛ́ é nɔ ayi mitɔn mɛ ɔ, mi lɔ ná nɔ bǔ xá Vǐ ɔ bo ná nɔ bǔ xá Tɔ́ ɔ. 25 Gɔ́ ná ɔ, nǔ e sín akpá éɖésúnɔ dó nú mǐ é wɛ nyí gbɛ mavɔmavɔ.

26 Un wlán nǔ énɛ́ lɛ́ sɛ́dó mi dó mɛ ɖěɖěe ɖo tíntɛ́nkpɔ́n wɛ bo ná blɛ́ mi lɛ́ é wú. 27 Amɔ̌ midɛɛ lɛ́ ɔ, Mawu ko sɔ́ mi gbɔn hlɔ̌nhlɔ́n tɔn gblamɛ, bɔ hlɔ̌nhlɔ́n énɛ́ ɖo mi mɛ, lobɔ é byɔ́ ɖɔ mɛɖé ní kplɔ́n nǔ mi ǎ. Amɔ̌, hlɔ̌nhlɔ́n énɛ́ e gosín gɔ̌n tɔn é nyí nǔgbó, é nyí adingban ǎ, bo ɖo nǔ bǐ kplɔ́n mi wɛ. Mi bo nɔ bǔ xá Mawu lěe é ko kplɔ́n mi gbɔn é. 28 Énɛ́ wú ɔ, vǐ ce vívɛ́ná lɛ́ mi, mi bo nɔ bǔ xá ɛ, bónú hwenu e è ná ɖe è xlɛ́ é ɔ, mǐ ná sixú ɖɔ xó kpó jiɖiɖe kpó, bo sɔ́ ná sɛ yi zɔ n’i kpó winnyá kpó, ɖo fí ɖiɖe tɔn hwenu ǎ. 29 Ényí mi tuun ɖɔ é nyí nǔjlɔ́jlɔ́watɔ́ hǔn, mi lɛ́ tuun ɖɔ mɛ ɖěbǔ e nɔ wa nǔ jlɔ́jlɔ́ é nyí vǐ tɔn.

3 Mi kpɔ́n wǎnyíyí alɔkpa e Tɔ́ ɔ ɖe xlɛ́ mǐ, bónú è ní dó ylɔ́ mǐ ɖɔ vǐ Mawu tɔn lɛ́ é! Vǐ tɔn wɛ mǐ ka nyí nǔgbó. Amɔ̌, gbɛ ɔ tuun mǐ ǎ, ɖó é tuun Mawu ǎ. 2 Mɛ vívɛ́ná ce lɛ́ mi, vǐ Mawu tɔn wɛ mǐ nyí din, amɔ̌, è ko ɖe nǔ e mǐ ná wá nyí é xlɛ́ ǎ. Mǐ ka tuun ɖɔ hwenu e é ná ɖe éɖésúnɔ xlɛ́ é ɔ, mǐ ná cí éɖɔhun, ɖó mǐ ná mɔ ɛ, lěe é ɖe gbɔn é. 3 Bɔ mɛ ɖěbǔ e ɖo nukún ɖó è wɛ mɔ̌ é nɔ slá wǔ nú éɖée, ɖó mɛ mímɛ́ wɛ é nyí.

4 Mɛ ɖěbǔ e nɔ ɖo hwɛ hu wɛ é ɔ, sɛ́n gba wɛ é lɛ́vɔ́ ɖe, ɖó hwɛhuhu ɔ, sɛ́ngbigba wɛ. 5 Mi ka lɛ́ tuun ɖɔ Jezu wá, bo ná ɖe hwɛ mǐtɔn lɛ́ síin; é hu hwɛ kpɔ́n ǎ. 6 Mɛ ɖěbǔ e ɖo bǔ xá ɛ é nɔ fɔ́n bo nɔ ɖo hwɛ hu wɛ ǎ; mɛ ɖěbǔ e nɔ fɔ́n bo nɔ ɖo hwɛ hu wɛ é mɔ ɛ ǎ, é ka lɛ́ kplɔ́n bo tuun i ǎ. 7 Vǐ ce vívɛ́ná lɛ́ mi, mi ma nú mɛɖé blɛ́ mi ó, mɛ e nɔ wa nǔ jlɔ́jlɔ́ é ɔ, nǔjlɔ́jlɔ́watɔ́ wɛ é nyí lěe Jezu nyí nǔjlɔ́jlɔ́watɔ́ gbɔn é ɖɔhun. 8 Mɛ e nɔ fɔ́n bo nɔ ɖo hwɛ hu wɛ é ɔ, Awǒvi gɔ́n wɛ é gosín, ɖó Awǒvi ɔ ko ɖo hwɛ hu wɛ sín bǐbɛ́mɛ ɖokpóo.* Linlin e wú Vǐ Mawu tɔn ɔ wá é ɖíe: é ná sú kún dó nú nǔwiwa Awǒvi tɔn lɛ́.

9 Mɛ ɖěbǔ e nyí vǐ Mawu tɔn é nɔ fɔ́n bo nɔ ɖo hwɛ hu wɛ ǎ, ɖó gbigbɔ Mawu tɔn* ɖo kpɔ́ xá mɛ mɔ̌hun, é sixú fɔ́n bo ɖo hwɛ hu wɛ ǎ, ɖó vǐ Mawu tɔn wɛ é nyí. 10 Nǔ e nɔ ɖe vǐ Mawu tɔn lɛ́ kpó vǐ Awǒvi tɔn lɛ́ kpó xlɛ́ é ɖíe: mɛ ɖěbǔ e ma nɔ wa nǔ jlɔ́jlɔ́ ǎ é gosín Mawu gɔ́n ǎ; mɔ̌ wɛ é nyí gbɔn nú mɛ e ma yí wǎn nú nɔví tɔn ǎ é lɔ. 11 Ðó wɛn e mi se sín bǐbɛ́mɛ é ɖíe: mǐ ɖó ná yí wǎn nú mǐɖée lɛ́; 12 mǐ ná cí Kanyɛ́ɛ, éé gosín mɛ nyanya ɔ gɔ́n bo hu nɔví tɔn é ɖɔhun ǎ. Étɛ́wú é ka hu i? Ðó éyɛ́ wa nǔ nyanya, bɔ nɔví tɔn ka wa nǔ jlɔ́jlɔ́ wútu.

13 Nɔví lɛ́ mi, mi ma nú é kpácá mi ɖɔ gbɛ ɔ gbɛ́ wǎn nú mi ó. 14 Mǐ tuun ɖɔ mǐ gosín kú wá gbɛ ɖó mǐ yí wǎn nú nɔví lɛ́. Mɛ e ma yí wǎn nú mɛ ǎ é kpo ɖo kú. 15 Mɛ ɖěbǔ e gbɛ́ wǎn nú nɔví tɔn é ɔ, mɛhutɔ́ wɛ n’i, bɔ mi ka tuun ɖɔ mɛhutɔ́ ɖě kún ná mɔ gbɛ mavɔmavɔ ó. 16 Mǐ kplɔ́n bo tuun nǔ e wǎnyíyí nyí é, ɖó Jezu Klísu kú* dó ta mǐtɔn mɛ, bɔ mǐ lɔ ɖó ná ɖo gbesisɔmɛ bo ná kú* dó nɔví mǐtɔn lɛ́ tamɛ. 17 Amɔ̌, mɛ ɖěbǔ e ɖó nǔɖókan gbɛ élɔ́ tɔn lɛ́, bo mɔ nɔví tɔn ɖo hudó mɛ, lobo ka gbɛ́ ɖɔ émí kún ná se wǔvɛ́ xá ɛ ó é ɔ, nɛ̌ é ka sixú ɖɔ ɖɔ émí yí wǎn nú Mawu gbɔn? 18 Vǐ ce vívɛ́ná lɛ́ mi, mǐ ɖó ná yí wǎn nú mɛ, é ka ná nyí ɖo xó mɛ alǒ ɖo nu kpowun ǎ, loɔ, ɖo walɔ kpó nǔgbó kpó mɛ.

19 Mɔ̌ mɛ ɔ, mǐ ná tuun ɖɔ mǐ nyí nǔgbó ɔ tɔn, bɔ mǐ ná ɖeji* ɖo ayi mǐtɔn mɛ ɖɔ Mawu yí wǎn nú mǐ, 20 ényí ayi mǐtɔn ná bo tlɛ ɖó hwɛ nú mǐ ɖó nǔ ɖěbǔ wú ɔ nɛ́; mi nú mǐ ní flín ɖɔ Mawu kló hú ayi mǐtɔn bo tuun nǔ bǐ. 21 Mɛ vívɛ́ná ce lɛ́ mi, ényí ayi mǐtɔn ma ɖó hwɛ nú mǐ ǎ ɔ, mǐ sixú sɛkpɔ́ Mawu ma ɖi xɛsi; 22 bɔ nǔ ɖěbǔ e mǐ byɔ́ ɛ é ɔ, mǐ nɔ mɔ yí, ɖó mǐ nɔ se tónú nú sɛ́n tɔn lɛ́ bo nɔ wa nǔ e nɔ nyɔ́ nukún tɔn mɛ lɛ́ é. 23 Nǔgbó ɔ, sɛ́n e é dó é ɖíe: mǐ ní ɖó nǔɖiɖi nú Vǐ tɔn Jezu Klísu sín nyǐkɔ, lobo yí wǎn nú mǐɖée lɛ́, lěe é ɖe gbe tɔn nú mǐ gbɔn é. 24 Gɔ́ ná ɔ, mɛ e nɔ se tónú nú sɛ́n tɔn lɛ́ é nɔ nɔ bǔ xá ɛ, bɔ éyɛ́ nɔ nɔ bǔ xá mɛ mɔ̌hun. Lobɔ gbɔn gbigbɔ e é ná mǐ é gblamɛ ɔ, mǐ tuun ɖɔ é nɔ nɔ bǔ xá mǐ.

4 Mɛ vívɛ́ná ce lɛ́ mi, mi ma nɔ ɖi nǔ nú nǔɖɔɖayǐ lɛ́* bǐ ó, é nyɔ́ wa ɔ, mi ní nɔ gbéjé nǔɖɔɖayǐ* lɛ́ kpɔ́n ɖɔ Mawu gɔ́n jɛ́n yě gosín a jí, ɖó gbeyíɖɔ adingbannɔ gěgé wɛ ɖo gbɛ ɔ mɛ din.

2 Lěe mi ná tuun ɖɔ nǔɖɔɖayǐ ɖé gosín Mawu gɔ́n gbɔn é ɖíe: Nǔɖɔɖayǐ e yí gbe ɖɔ Jezu Klísu zɔn agbaza mɛ wá é bǐ wɛ gosín Mawu gɔ́n. 3 Amɔ̌, nǔɖɔɖayǐ e ma yí gbe nú xó énɛ́ dó Jezu wú ǎ lɛ́ é ɖě gosín Mawu gɔ́n ǎ. Gɔ́ ná ɔ, mi ko se ɖɔ kɛntɔ́ Klísu tɔn ɔ ná wá ɖɔ nǔ mɔ̌hun lɛ́ ɖ’ayǐ; bɔ din ɔ, xó énɛ́ lɛ́ ko gba kpé gbɛ ɔ mɛ.

4 Vǐ ce vívɛ́ná lɛ́ mi, Mawu gɔ́n wɛ mi gosín, bɔ mi ko ɖu ɖo gbeyíɖɔ adingbannɔ lɛ́ jí, ɖó mɛ e ɖo bǔ xá mi é hú gǎn mɛ e ɖo bǔ xá gbɛ ɔ é. 5 Gbɛ ɔ tɔn wɛ yě nyí; énɛ́ wú wɛ yě nɔ ɖɔ nǔ e nyí gbɛ ɔ tɔn lɛ́ é, bɔ gbɛ ɔ nɔ ɖótó yě. 6 Mawu gɔ́n wɛ mǐdɛɛ lɛ́ gosín. Mɛ ɖěbǔ e kplɔ́n bo tuun Mawu é nɔ ɖótó mǐ; mɛ ɖěbǔ e ma gosín Mawu gɔ́n ǎ é nɔ ɖótó mǐ ǎ. Lěe mǐ nɔ tuun nǔɖɔɖayǐ e nyí nǔgbó é kpó nǔɖɔɖayǐ e nyí adingban é kpó gbɔn ɔ nɛ́.

7 Mɛ vívɛ́ná ce lɛ́ mi, mi nú mǐ ní yí wǎn nú mǐɖée lɛ́, ɖó wǎnyíyí ɔ, Mawu gɔ́n wɛ é gosín, bɔ mɛ ɖěbǔ e yí wǎn nú mɛ é nyí vǐ Mawu tɔn bo tuun Mawu. 8 Ényí mɛɖé ma yí wǎn nú mɛ ǎ ɔ, é kplɔ́n bo tuun Mawu ǎ, ɖó Mawu ɔ, wǎnyíyí wɛ é nyí. 9 Lěe Mawu ɖe wǎnyíyí tɔn xlɛ́ ɖo ninɔmɛ mǐtɔn mɛ gbɔn é ɖíe: Mawu sɛ́ Vǐɖokpónɔ tɔn dó gbɛ ɔ mɛ, bónú mǐ ní dó sixú mɔ gbɛ gbɔn jǐ tɔn. 10 Mawu sɛ́ Vǐ tɔn dó, vɔ̌sísá hwɛsúnsúnsínkɔnúmɛ tɔn* ɖé ɖɔhun, dó hwɛ mǐtɔn lɛ́ tamɛ. É wa mɔ̌, ɖó é yí wǎn nú mǐ, é nyí mǐ yí wǎn n’i wútu wɛ ǎ.

11 Mɛ vívɛ́ná ce lɛ́ mi, ényí mɔ̌ wɛ Mawu yí wǎn nú mǐ gbɔn hǔn, é ɖo dandan ɖɔ mǐ lɔ ní yí wǎn nú mǐɖée lɛ́. 12 Mɛ ɖěbǔ mɔ Mawu kpɔ́n ǎ. Ényí mǐ kpo ɖo wǎn yí nú mǐɖée lɛ́ wɛ ɔ, Mawu kpo ɖo kpɔ́ xá mǐ, bɔ wǎnyíyí tɔn ɖo mǐ mɛ bɔ nǔ bǐ vɔ ɖ’é wú nɛ́. 13 Mǐ tuun ɖɔ mǐ kpo ɖo bǔ xá ɛ, bɔ é lɔ ɖo bǔ xá mǐ, ɖó é ná mǐ gbigbɔ tɔn. 14 Gɔ́ ná ɔ, mǐɖésúnɔ mɔ bo lɛ́ ɖo kúnnu ɖe ná wɛ ɖɔ Tɔ́ ɔ sɛ́ Vǐ tɔn dó b’ɛ nyí hwlɛngántɔ́ gbɛ ɔ tɔn. 15 Mɛ ɖěbǔ e yí gbe ɖɔ Jezu nyí Vǐ Mawu tɔn é ɔ, Mawu ɖo bǔ xá mɛ mɔ̌hun, bɔ é lɔ ɖo bǔ xá Mawu. 16 Mǐ ko kplɔ́n bo tuun wǎnyíyí e Mawu ɖó nú mǐ é, lobo ɖi nǔ nú wǎnyíyí énɛ́.

Mawu ɔ, wǎnyíyí wɛ é nyí, bɔ mɛ e nɔ ɖo wǎnyíyí ɖe xlɛ́ wɛ é nɔ nɔ bǔ xá Mawu, bɔ Mawu nɔ nɔ bǔ xá ɛ. 17 Lěe wǎnyíyí ɖo mǐ mɛ, bɔ nǔ bǐ vɔ ɖ’é wú gbɔn é nɛ́, bónú mǐ ní dó sixú vo bo ɖɔ xó* ɖo hwɛɖɔzángbe; ɖó lěe mɛ énɛ́* cí é ɔ, mɔ̌ wɛ mǐɖésúnɔ cí ɖo gbɛ élɔ́ mɛ. 18 Xɛsi ɖěbǔ ɖo wǎnyíyí mɛ ǎ, loɔ, wǎnyíyí e nǔ bǐ vɔ ɖ’é wú é nɔ nya xɛsi dó zɔ, ɖó xɛsi nɔ ɖó dogbó nú mǐ. Nǔgbó ɔ, mɛ e nɔ ɖi xɛsi é ɖó wǎnyíyí e nǔ bǐ vɔ ɖ’é wú é ǎ. 19 Mǐ nɔ yí wǎn nú mɛ, ɖó Mawu yí wǎn nú mǐ jɛ nukɔn.

20 Ényí mɛɖé ɖɔ: “Un yí wǎn nú Mawu,” bo ka gbɛ́ wǎn nú nɔví tɔn ɔ, adingbannɔ wɛ n’i. Ðó mɛ e ma yí wǎn nú nɔví tɔn e mɔ wɛ é ɖe é ǎ é sixú yí wǎn nú Mawu e é ma nɔ mɔ ǎ é ǎ. 21 Sɛ́n e é ná mǐ é ɖíe: mɛ ɖěbǔ e yí wǎn nú Mawu é ɖó ná yí wǎn nú nɔví tɔn lɔmɔ̌.

5 Mɛ ɖěbǔ e ɖi nǔ ɖɔ Jezu wɛ nyí Klísu ɔ é nyí vǐ Mawu tɔn, bɔ mɛ ɖěbǔ e yí wǎn nú Mawu é nɔ yí wǎn nú vǐ Mawu tɔn lɛ́. 2 Lěe mǐ nɔ tuun ɖɔ mǐ yí wǎn nú vǐ Mawu tɔn lɛ́ gbɔn é ɖíe: mǐ nɔ yí wǎn nú Mawu, bo nɔ nyi sɛ́n tɔn lɛ́. 3 Wǎn yí nú Mawu sín tínmɛ wɛ nyí ɖɔ mǐ ní nyi sɛ́n tɔn lɛ́; sɛ́n tɔn lɛ́ ka vɛ́ nyi ǎ, 4 ɖó mɛ e nyí vǐ Mawu tɔn lɛ́ é bǐ* nɔ ɖu ɖo gbɛ ɔ jí. Bɔ nǔ e zɔ́n bɔ mǐ ɖu ɖo gbɛ ɔ jí é wɛ nyí, nǔɖiɖi mǐtɔn.

5 Mɛ̌ ka sixú ɖu ɖo gbɛ ɔ jí? Mɛ e ɖó nǔɖiɖi ɖɔ Jezu nyí Vǐ Mawu tɔn é wɛ ǎ cé? 6 Jezu Klísu wɛ nyí mɛ e wá gbɔn sin kpó hun kpó gblamɛ é, é nyí gbɔn sin kɛ́ɖɛ́ gblamɛ ǎ, loɔ, gbɔn sin kpó hun kpó gblamɛ. Bɔ gbigbɔ ɔ ɖo kúnnu ɖe ná wɛ, ɖó gbigbɔ ɔ nɔ ɖe nǔgbó ɔ xlɛ́. 7 Ðó kúnnuɖetɔ́ atɔn wɛ ɖo kúnnu ɖe wɛ: 8 gbigbɔ ɔ, sin ɔ kpó hun ɔ kpó; bɔ atɔn lɛ́ ɖó gbe kpɔ́.

9 Mǐ nɔ yí gbe nú kúnnuɖiɖe gbɛtɔ́ lɛ́ tɔn, kúnnuɖiɖe Mawu tɔn ka kló hú gǎn. Ðó kúnnu e Mawu ɖe é wɛ nyí kúnnu e é ɖe dó Vǐ tɔn wú é. 10 Mɛ e ɖi nǔ nú Vǐ Mawu tɔn é ɖó kúnnuɖiɖe ɔ ɖo ayi tɔn mɛ. Mɛ e ma ɖi nǔ nú Mawu ǎ é ylɔ́ Mawu ɖɔ adingbannɔ, ɖó é ɖi nǔ nú kúnnu e Mawu ɖe dó Vǐ tɔn wú é ǎ. 11 Kúnnuɖiɖe ɔ ɖíe: Mawu ná mǐ gbɛ mavɔmavɔ, bɔ mǐ mɔ gbɛ énɛ́ gbɔn Vǐ tɔn gblamɛ. 12 Mɛ e ɖo bǔ xá Vǐ ɔ é ɖó gbɛ énɛ́;* mɛ e ma ka ɖo bǔ xá Vǐ ɔ ǎ é ɖó gbɛ énɛ́* ǎ.

13 Un wlán nǔ énɛ́ lɛ́ sɛ́dó mi, bónú mi mɛ e ɖi nǔ nú Vǐ Mawu tɔn sín nyǐkɔ lɛ́ é ní dó sixú tuun ɖɔ émí ɖó gbɛ mavɔmavɔ.* 14 Bɔ jiɖiɖe e mǐ ɖó dó Mawu wú é wɛ nyí ɖɔ* nǔ ɖěbǔ e mǐ byɔ́ sɔgbe xá jlǒ tɔn é ɔ, é nɔ ɖótó mǐ. 15 Bɔ ényí mǐ tuun ɖɔ é nɔ ɖótó nǔ ɖěbǔ e mǐ ɖo byɔ̌byɔ́ wɛ é ɔ, mǐ tuun ɖɔ mǐ ná mɔ nǔ e mǐ byɔ́ lɛ́ é, ɖó mǐ byɔ́ ɛ nǔ énɛ́ lɛ́ wútu.

16 Ényí mɛ ɖěbǔ mɔ nɔví tɔn, bɔ é ɖo hwɛ e ma nɔ dɔn mɛ yi kú ǎ é ɖé hu wɛ hǔn, é ní xo ɖɛ n’i, Mawu ná ná gbɛ nɔví énɛ́. Ɛɛn, é ná ná mɛ e ma nɔ hu hwɛ e nɔ dɔn mɛ yi kú ǎ lɛ́ é. Hwɛ alɔkpa ɖé tíin bo nɔ dɔn mɛ yi kú. É nyí hwɛ énɛ́ tamɛ wɛ un ɖɔ n’i ɖɔ é ní xo ɖɛ dó ǎ. 17 Nǔagɔwiwa bǐ wɛ nyí hwɛhuhu, é ɖo mɔ̌ có, hwɛ alɔkpa ɖé tíin bo nɔ dɔn mɛ yi kú ǎ.

18 Mǐ tuun ɖɔ mɛ ɖěbǔ e nyí vǐ Mawu tɔn é kún nɔ fɔ́n bo nɔ ɖo hwɛ hu wɛ ó, amɔ̌, Vǐ Mawu tɔn ɔ* nɔ nya xɛ ɖo jǐ tɔn, bɔ mɛ nyanya ɔ sixú kpé wǔ tɔn ǎ.* 19 Mǐ tuun ɖɔ Mawu gɔ́n wɛ mǐ gosín, loɔ, gbɛ ɔ bǐ ɖo mɛ nyanya ɔ sín acɛ mɛ. 20 Amɔ̌, mǐ tuun ɖɔ Vǐ Mawu tɔn ɔ wá, bo ná mǐ nukúnnúmɔjɛnǔmɛ,* bónú mǐ ní dó sixú tuun Mawu nǔgbó ɔ. Bɔ mǐ ɖo bǔ xá Mawu nǔgbó ɔ, gbɔn Vǐ tɔn Jezu Klísu gblamɛ. É wɛ nyí Mawu nǔgbó ɔ kpó gbɛ mavɔmavɔ kpó. 21 Vǐ ce vívɛ́ná lɛ́ mi, mi cɔ́ miɖée dó bǒcyɔ lɛ́ wú.