WĚMA WEGƆ́ E È WLÁN SƐ́DÓ TIMƆTÉE É

1 Nyɛ Pɔ́lu e nyí mɛsɛ́dó Klísu Jezu tɔn gbɔn jlǒ Mawu tɔn gblamɛ, sɔgbe xá gbɛ e sín akpá è dó, bɔ è ná mɔ gbɔn Klísu Jezu gblamɛ é, 2 wɛ ɖo wěma wlán sɛ́dó vǐ ce vívɛ́ná Timɔtée wɛ:

Mawu Tɔ́ ɔ kpó Klísu Jezu Aklúnɔ mǐtɔn kpó ní ná fɛ́nú we, bo kú nǔbláwǔ nú we lobo ná fífá we.

3 Un nɔ dó kú nú Mawu e wa sinsɛnzɔ́ mímɛ́ ná wɛ un ɖe lěe tɔ́gbó ce lɛ́ wa gbɔn é; kpó ayixa mímɛ́ kpó wɛ un ɖo sinsɛnzɔ́ mímɛ́ wa wɛ, bo nɔ lɛ́ flín we hwebǐnu ɖo vo e un nɔ sa nú Mawu zǎn kéze lɛ́ é mɛ. 4 Un nɔ flín ɖasin towe lɛ́, bɔ é jló mì tawun ɖɔ má mɔ we, bónú awǎjijɛ ce ní dó sixú túnflá. 5 Ðó un nɔ flín nǔɖiɖi e ma nyí yɛmɛnúwiwa tɔn ǎ bɔ a ɖó é; nɔ towe sín nɔ Lɔyísi kpó nɔ towe Enísi kpó wɛ ɖó nǔɖiɖi énɛ́ jɛ nukɔn, amɔ̌, un kú d’é jí ɖɔ hwi lɔ ɖó.

6 Hwɛjijɔ énɛ́ wú wɛ un ɖo flínflín we wɛ ɖɔ a ní bló bónú nǔníná Mawu tɔn e è sɔ́ d’así nú we, hwenu e un sɔ́ alɔ ɖó jǐ towe é ní nɔ ɖo jiji wɛ myɔ ɖɔhun. 7 Ðó Mawu ná mǐ gbigbɔ xɛsiɖiɖi tɔn ǎ, loɔ, gbigbɔ hlɔ̌nhlɔ́n, wǎnyíyí kpó ayiɖote kpó tɔn wɛ é ná mǐ. 8 Énɛ́ wú ɔ, ma nú winnyá hu we dó kúnnuɖiɖe dó Aklúnɔ mǐtɔn alǒ nyɛ mɛ e nyí gantɔ́ ɖó éyɛ́ wú é wú ó, loɔ, ɖo gbesisɔmɛ bo ná se wǔvɛ́ dó wɛn ɖagbe ɔ tamɛ gbɔn hlɔ̌nhlɔ́n Mawu tɔn wú gíngánjɛ gblamɛ. 9 É hwlɛ́n mǐ bo ylɔ́ mǐ bónú mǐ ná nyí mɛ mímɛ́, é nyí ɖó nǔwiwa mǐtɔn lɛ́ wú ǎ, loɔ, linlin éɖésúnɔ tɔn kpó fɛ́nú tɔn kpó wú wɛ. É ná fɛ́nú énɛ́ mǐ sín hwenu línlín ɖíe, ɖó bǔ e mǐ ɖe xá Klísu Jezu é wú, 10 amɔ̌ din ɔ, è ko bló bɔ é jɛ wě bǐ mlɛ́mlɛ́ gbɔn Mɛhwlɛ́ngántɔ́ mǐtɔn Klísu Jezu ɖiɖexlɛ́ gblamɛ, é wɛ sú kú sín kún dó, bo tá wěziza dó gbɛ kpó agbaza e ma nɔ gblé ǎ é kpó jí gbɔn wɛn ɖagbe ɔ gblamɛ; 11 wɛn ɖagbe énɛ́ wú wɛ è sɔ́ mì wɛnjlátɔ́, mɛsɛ́dó kpó nǔkplɔ́nmɛtɔ́ kpó.

12 Énɛ́ wú wɛ nyi lɔ ɖo wǔvɛ́ énɛ́ lɛ́ se wɛ, amɔ̌, winnyá hu mì ǎ. Ðó un tuun Mɛ e un ɖi nǔ ná é, bo kú d’é jí ɖɔ é kpé wú bo ná nya xɛ ɖo nǔ e un sɔ́ dó así n’i é jí, káká jɛ azǎn énɛ́ gbe. 13 Nɔ tɛ́ dó xó ɖagbe e a se ɖo gɔ̌n ce lɛ́ é* sín kpɔ́ndéwú wú gbánwúngbánwún, gɔ́ nú nǔɖiɖi kpó wǎnyíyí kpó, éé nɔ tɔ́n sín bǔ e è ɖe xá Klísu Jezu é mɛ é. 14 Nya xɛ ɖo nǔ xɔ akwɛ́ énɛ́ lɛ́ e è sɔ́ dó así nú we é jí gbɔn gbigbɔ mímɛ́ e ɖo mǐ mɛ é gblamɛ.

15 Lěe a tuun gbɔn é ɔ, mɛ e ɖo tokpɔn Azíi tɔn mɛ lɛ́ é bǐ lɛ́ kɔ sín gǔdo ce, káká jɛ Fijɛ́lu kpó Ɛɛmɔjɛ́ni kpó jí. 16 Aklúnɔ ní kú nǔbláwǔ nú mɛ e ɖo Onɛzifɔ́ɔ xwé lɛ́ é, ɖó é fá kɔ nú mì hwɛhwɛ, bɔ winnyá ka lɛ́ hu i dó wlɔ mɛ e un ɖe ɖo gankpá mɛ é wú ǎ. 17 É nyɔ́ wa ɔ, hwenu e é ɖo Hlɔ̌ma é ɔ, é ba mì kpó sɔxwixwe kpó bo mɔ mì. 18 Aklúnɔ ní bló bónú é ní mɔ nǔbláwǔkúnúmɛ Jexóva* tɔn yí ɖo azǎn énɛ́ gbe. A tuun alɔ tobutóbú e é dó mɛ ɖo Efɛ́zi é ganjí.

2 Énɛ́ wú ɔ, hwɛ vǐ ce ɔ, fɛ́nú e ɖo Klísu Jezu mɛ é ní kpo ɖo hlɔ̌nhlɔ́n ná we wɛ; 2 nǔ ɖěɖěe a se ɖo gɔ̌n ce, bɔ mɛ gěgé ɖe kúnnu ná lɛ́ é ɔ, sɔ́ nǔ énɛ́ lɛ́ d’así nú súnnu gbejínɔtɔ́ lɛ́, bónú yě lɔ ná jɛxá mlɛ́mlɛ́ bo ná kplɔ́n mɛ ɖěvo lɛ́. 3 Ðo gbesisɔmɛ bo ná se wǔvɛ́ sɔ́ja Klísu Jezu tɔn ɖagbe ɖé ɖɔhun. 4 Sɔ́ja e jló ná nyɔ́ ɖo mɛ e yí i dó sɔ́jahwan mɛ é sí é ɖě nɔ dó ta ajɔ̌wiwaxó* mɛ ǎ. 5 Mɔ̌ ɖokpó ɔ, ényí mɛɖé ɖo alɔ ɖó ɖo agbahwlɛ́nhwlɛ́n ɖé mɛ wɛ, bo ma ka xwedó agbahwlɛ́nhwlɛ́n ɔ sín sɛ́n lɛ́ ǎ ɔ, é ná mɔ ajɔ ɔ yí ǎ. 6 Glesi e w’azɔ̌ syɛ́nsyɛ́n é wɛ ɖó ná ɖu jinukún e é dó é sín sínsɛ́n jɛ nukɔn. 7 Nɔ lin tamɛ dó nǔ e ɖɔ wɛ un ɖe lɛ́ é jí hwebǐnu; Aklúnɔ ná ná nukúnnúmɔjɛnǔmɛ* we ɖo nǔ lɛ́ bǐ mɛ.

8 Flín ɖɔ sɔgbe xá wɛn ɖagbe e jlá wɛ un ɖe é ɔ, Jezu Klísu fɔ́n sín mɛkúkú lɛ́ mɛ, bɔ é lɛ́ nyí kúnkan* Davídi tɔn; 9 wɛn ɖagbe ɔ wú wɛ un ɖo wǔvɛ́ se wɛ, bɔ è lɛ́ wlí mì dó gan mɛ dǎnúwatɔ́ wɛ un nyí ɖɔhun. É ɖo mɔ̌ có, xó Mawu tɔn ɖo wlɔ mɛ ǎ. 10 Hwɛjijɔ énɛ́ wú wɛ un nɔ fɔ́n, bo nɔ ɖo didɛ wɛ ɖo nǔ lɛ́ bǐ nu, ɖó mɛ e è cyán lɛ́ é wú, bónú yě lɔ ní dó sixú mɔ hwlɛngán e è nɔ mɔ gbɔn bǔ e è ɖe xá Klísu Jezu é gblamɛ é yí, bo lɛ́ mɔ susu mavɔmavɔ yí. 11 Xó ɖejidéwú wɛ nyí xó élɔ́: É ɖo wɛn ɖɔ ényí mǐ kú ɖó kpɔ́ xá ɛ ɔ, mǐ ná lɛ́ nɔ gbɛ ɖó kpɔ́ xá ɛ; 12 ényí mǐ fɔ́n bo ɖo didɛ wɛ ɔ, mǐ ná lɛ́ ɖu axɔ́sú xá ɛ; ényí mǐ gbɛ́ ɛ ɔ, é lɔmɔ̌ ná gbɛ́ mǐ; 13 ényí mǐ ma nɔ gbejí ǎ ɔ, éyɛ́ ná kpo ɖo gbejí, ɖó é sixú gbɛ́ éɖée ǎ.

14 Kpo ɖo nǔ énɛ́ lɛ́ flín yě wɛ, bo kpo ɖo wě ɖe xá yě wɛ* ɖo Mawu nukɔn ɖɔ yě ní ma nɔ dɔn nǔ dó xókwín lɛ́ jí ó; nǔɖé wɛ bo ɖó le ɖěbǔ ǎ, ɖó é nɔ wa nǔ dó mɛ e ɖo tó ɖó wɛ lɛ́ é wú.* 15 Wa nǔ e wú a kpé é bǐ, bo xlɛ́ ɖɔ émí nyí mɛ e Mawu nɔ ɖe gbě ná é, azɔ̌watɔ́ e winnyá ma nɔ hu dó nǔ ɖěbǔ wú ǎ, b’ɛ nɔ kplɔ́n nǔgbó ɔ mɛ ganjí, bo nɔ lɛ́ tínmɛ ganjí é. 16 Amɔ̌ hɔn nú xó vɔ̌tɔ́ e nɔ kɔn cí dó nǔ mímɛ́ lɛ́ wú lɛ́ é, ɖó xó énɛ́ lɛ́* ná fɔ́n bo ná ɖo sísí ma ɖó nú Mawu dɔn wá wɛ; 17 xó mɔ̌hun lɛ́ ná vun kan akpavívó ɖɔhun. Imɛnɛ́ɛ kpó Filetɔ́si kpó ɖo mɛ e nɔ ɖɔ xó mɔ̌hun lɛ́ é mɛ. 18 Súnnu énɛ́ lɛ́ lɛ́ kɔ sín nǔgbó ɔ gúdo, ɖó yě nɔ ɖɔ ɖɔ è ko fɔ́n mɛkúkú lɛ́; énɛ́ zɔ́n bɔ nǔɖiɖi mɛɖé lɛ́ tɔn ɖo davudavu xo wɛ. 19 É ɖo mɔ̌ có, dodónú syɛ́nsyɛ́n Mawu tɔn ɔ kpo ɖo te, bɔ nǔwlánwlán élɔ́ lɛ́ nyí wuntun bo ɖ’é wú: “Jexóva* tuun mɛ e nyí étɔn lɛ́ é,” kpó: “Mɛ e nɔ ylɔ́ nyǐkɔ Jexóva* tɔn lɛ́ é ní jó nǔagɔwiwa dó” kpó.

20 Agbǎn* e è sɔ́ siká alǒ kpatágan dó bló lɛ́ é kɛ́ɖɛ́ wɛ è nɔ mɔ ɖo xwé ɖaxó ɖé gbe ǎ, é nyɔ́ wa ɔ, è nɔ lɛ́ mɔ agbǎn e è sɔ́ atín dó bló lɛ́ é kpó ée è sɔ́ ko dó bló lɛ́ é kpó, bɔ è nɔ zán ɖé lɛ́ nú nǔ e wlí yɛ̌yi lɛ́ é, bo ka nɔ zán ɖěvo lɛ́ nú nǔ e ma wlí yɛ̌yi ǎ lɛ́ é. 21 Énɛ́ wú ɔ, ényí mɛ ɖěbǔ nɔ zɔ nú mɛ ɖěɖěe cí nǔzínzán* e è nɔ zán nú nǔ e ma wlí yɛ̌yi ǎ lɛ́ é ɖɔhun lɛ́ é ɔ, mɛ énɛ́ ná nyí nǔzínzán e è nɔ zán nú nǔ e wlí yɛ̌yi é ɖé, bo ná lɛ́ nyí mɛ e è ɖe ɖó vo bɔ é nyɔ́ zán nú gǎn tɔn, lobo ɖo gbesisɔmɛ nú azɔ̌ ɖagbe bǐ é. 22 Hɔn nú jlǒ wǐnnyáwínnyáhwenu tɔn lɛ́, loɔ, nya nǔjlɔ́jlɔ́wiwa, nǔɖiɖi, wǎnyíyí kpó fífá kpó gbé, hwi kpó mɛ ɖěɖěe nɔ ylɔ́ Aklúnɔ kpó ayi mímɛ́ kpó lɛ́ é kpó.

23 Gɔ́ ná ɔ, nɔ zɔ nú nǔdindɔn ɖěɖěe nyí taɖunɔxó kpó xlonɔxó kpó lɛ́ é, lobo tuun ɖɔ hunxixo wɛ nǔdindɔn énɛ́ lɛ́ nɔ dɔn wá. 24 Ðó kannumɔ Aklúnɔ tɔn ɖó ná xo hun ǎ, é nyɔ́ wa ɔ, é ɖó ná nɔ nyɔ́ xomɛ dó mɛ bǐ wú,* é ɖó ná ɖó nǔwúkpíkpé bo ná kplɔ́n nǔ mɛ, lobo ná nɔ ɖu ɖo éɖée jí hwenu e è jɛ agɔ dó è é. 25 É ɖó ná nɔ ɖe wě xá gbeklánxámɛtɔ́ lɛ́ kpó gbe fífá kpó. Bóyá Mawu sixú bló bɔ hwɛ yětɔn lɛ́ ná vɛ́ nú yě,* bɔ énɛ́ ná zɔ́n bɔ yě ná ɖó nukúnnúmɔjɛnǔmɛ e sɔgbe é dó nǔgbó ɔ wú; 26 yě sixú lɛ́ byɔ́ yěɖée mɛ, bo xo gló mɔ Awǒvi tɔn, ɖó é ko wlí yě gbɛɖe bónú yě ná wa jlǒ tɔn.

3 Amɔ̌, tuun ɖɔ ɖo azǎn gǔdo gúdo tɔn lɛ́ mɛ ɔ, hwenu e syɛ́n bo vɛ́ wǔ bɔ è ná ɖí xwi xá lɛ́ é ná tíin. 2 Ðó gbɛtɔ́ lɛ́ ná nɔ nyí cejɛ́nnábínɔ,* yě ná nɔ yí wǎn nú akwɛ́, yě ná nɔ jlá ajɔ̌ nú yěɖée, yě ná nɔ yí go, yě ná nɔ nylá nu, yě ná nɔ tlí tó nú mɛjitɔ́ yětɔn lɛ́, yě ná nɔ dó alɔgúdokpɛ́ nú mɛ, yě ná nɔ nɔ gbejí ǎ, 3 yě ná nɔ ɖó wǎnyíyí jɔwámɔ tɔn ɖěbǔ ǎ, yě ná nɔ ba ná ɖó gbe kpɔ́ ǎ, yě ná nɔ dó ji mɛ, yě ná nɔ ɖu ɖo yěɖée jí ǎ, yě ná nɔ nylá hun, yě ná nɔ yí wǎn nú ɖagbewiwa ǎ, 4 yě ná nɔ sa mɛ ɖu, yě ná nɔ syɛ́n ta, yě ná nɔ yí go zɛ xwé wú, yě ná nɔ yí wǎn nú gbɛɖuɖu hú ɖɔ yě ní yí wǎn nú Mawu, 5 yě nɔ nyí gbejínɔnúmawutɔ́ ɖo nukúnta, bo ka nɔ gbɛ́ hlɔ̌nhlɔ́n gbejíninɔ nú Mawu tɔn ɔ; lɛ̌ kɔ sín mɛ énɛ́ lɛ́ gúdo. 6 Mɛɖé lɛ́ ɖo mɛ énɛ́ lɛ́ mɛ bo nɔ lun byɔ́ xwé lɛ́ gbe, yě nɔ blɛ́ nyɔ̌nu e ma ɖó gǎn ǎ bɔ hwɛgban ɖo kɔ ná, lobɔ jlǒ vovo lɛ́ nɔ dɔn yě lɛ́ é, lobo nɔ wlí yě dó mɔ mɛ; 7 nyɔ̌nu énɛ́ lɛ́ nɔ ɖo nǔ kplɔ́n wɛ hwebǐnu, amɔ̌, yě nɔ kpé wú gbeɖé bo nɔ ɖó nukúnnúmɔjɛnǔmɛ e sɔgbe é dó nǔgbó ɔ wú ǎ.

8 Lěe Janɛ́si kpó Janblɛ́si kpó klán gbe xá Mɔyízi gbɔn é ɖɔhun ɔ, mɛ énɛ́ lɛ́* lɔ nɔ ɖo gbe klán xá nǔgbó ɔ wɛ. Mɛ mɔ̌hun lɛ́ sín linlin blí bǐ mlɛ́mlɛ́, bɔ nǔ yětɔn nɔ nyɔ́ Mawu nukúnmɛ ǎ, ɖó yě nɔ ɖi zɔnlin sɔgbe xá nǔɖiɖi ɔ ǎ wútu. 9 É ɖo mɔ̌ có, yě ná yi nukɔn hú mɔ̌ ǎ, ɖó taɖunɔnúwiwa yětɔn ná jɛ wě vaan nú mɛ bǐ, lěe é nyí gbɔn nú súnnu we énɛ́ lɛ́ é. 10 Amɔ̌ hwɛ ɔ, a tɛ́ dó nǔ élɔ́ lɛ́ wú gbánwúngbánwún: nǔkplɔ́nmɛ ce, lěe un nɔ zán gbɛ gbɔn é, nǔ e gbé nya wɛ un ɖe é, nǔɖiɖi ce, suúluɖíɖó ce, wǎnyíyí ce, didɛ ce; 11 a mɔ nǔ jɛ yadónúmɛ kpó wǔvɛ́ kpó e un ɖí xwi xá ɖo Antyɔ́ci, Ikoniyɔ́mu kpó Lisítli kpó é wú. Un dɛ ɖo yadónúmɛ énɛ́ lɛ́ nu bɔ Aklúnɔ hwlɛ́n mì sín bǐ mɛ. 12 Nǔgbó ɔ, mɛ ɖěɖěe jló ná zán gbɛ kpó gbejíninɔ nú Mawu kpó ɖo bǔ e yě ɖe xá Klísu Jezu é mɛ lɛ́ é bǐ ɔ, è ná dó ya nú yě lɔ. 13 Amɔ̌, mɛ nyanya lɛ́ kpó mɛdídá lɛ́ kpó fɔ́n ɔ, yě ná nɔ ɖo nǔ nyanya wa d’é jí wɛ, yě ná nɔ ɖo mɛ blɛ́ wɛ, bɔ è ná nɔ ɖo yě lɔ blɛ́ wɛ.

14 Amɔ̌ hwɛ ɔ, tɛ́ dó nǔ e a kplɔ́n, bɔ è bló lobɔ a kú d’é jí, bo ɖi nǔ ná lɛ́ é wú, ɖó a tuun mɛ e kplɔ́n nǔ énɛ́ lɛ́ we lɛ́ é. 15 Sín hwenu e a ɖo vǔ é wɛ a ko tuun Nǔwlánwlán mímɛ́ e sixú zɔ́n bɔ a ná nyɔ́nǔi, lobo mɔ hwlɛngán gbɔn nǔɖiɖi ɖíɖó nú Klísu Jezu gblamɛ lɛ́ é. 16 Mawu wɛ sɔ́ Nǔwlánwlán mímɛ́ lɛ́ bǐ dó ayi mɛ nú mɛ e wlán lɛ́ é; é nyɔ́ bónú è ná sɔ́ dó kplɔ́n nǔ mɛ, dó gbɛ́ nǔ nú mɛ, dó jlá nǔ lɛ́ ɖó, dó kplɔ́n lěe è ná nɔ wa nǔ e sɔgbe é gbɔn é mɛ, 17 bónú mɛsɛntɔ́ Mawu tɔn ní dó sixú kpé nǔ wú bǐ mlɛ́mlɛ́, lobonú nǔ e é ná wa azɔ̌ ɖagbe bǐ ná é bǐ ná ɖo así tɔn.

4 Klísu Jezu ɖó ná ɖɔ hwɛ xá mɛ e ɖo gbɛ lɛ́ é kpó mɛkúkú lɛ́ kpó, gbɔn éɖée e é ná ɖe xlɛ́ é kpó Axɔ́súɖuto tɔn kpó gblamɛ. Un ɖe gbe nú we dó nǔjɔnǔ mɛ ɖo é kpó Mawu kpó nukɔn ɖɔ: 2 Nɔ jlá mawuxó ɔ; ní nɔ myá nukún nú we,* ényí hwenu lɛ́ nyɔ́, alǒ vɛ́ wǔ ɔ nɛ́; nɔ kɛ nu dó nǔ wú nú mɛ, nɔ gbɛ́ nǔ nú mɛ, bo nɔ dó wǔsyɛ́n lanmɛ nú mɛ, nɔ wa nǔ énɛ́ lɛ́ kpó suúlu ɖaxó kpó, kpódó nǔwúkpíkpé mɛkplɔ́nkplɔ́n tɔn bǐ kpán. 3 Ðó hwe ɔ nu ná su, bɔ yě ná nɔ dɛ ɖo nǔkplɔ́nmɛ ɖagbe ɔ* nu ǎ, é nyɔ́ wa ɔ, sɔgbe xá jlǒ yěɖésúnɔ tɔn lɛ́ ɔ, yě ná nɔ kplé nǔkplɔ́nmɛtɔ́ lɛ́ lɛ́ lɛ̌ dó yěɖée, bónú yě ná nɔ ɖɔ xó víví dó tó mɛ* nú yě. 4 Yě sɔ́ ná nɔ ɖótó nǔgbó ɔ ǎ, bo ná nɔ wlí tó xɛxó lɛ́ wú. 5 Amɔ̌ hwɛ ɔ, nɔ zán nǔwúkpíkpé tamɛ linlin tɔn towe ɖo nǔ bǐ mɛ, nɔ dɛ ɖo wǔvɛ́ nu, nɔ wa wɛnɖagbejlátɔ́ sín azɔ̌ ɔ,* bo nɔ wa sinsɛnzɔ́ towe bǐ mlɛ́mlɛ́.

6 Ðó è ko ɖo sísɔ́ mì kɔn nyi ayǐ wɛ nǔníná vɛ̌ɛn tɔn ɖé ɖɔhun, bɔ hwenu e è ná tún kan mì é ɖo kɛ́nnɛ́kɛ́nnɛ́. 7 Un fun ahwan ɖagbe ɔ, un kán wezun ɔ káká jɛ vivɔnu, un hɛn nǔɖiɖi ɔ wú. 8 Bɛ́sín din ɔ, è sɔ́ axɔ́súgbákún nǔjlɔ́jlɔ́wiwa tɔn ɔ ɖ’ayǐ nú mì, bɔ Aklúnɔ hwɛjlɔ́jlɔ́ɖɔtɔ́ ɔ wɛ ná ná mì b’ɛ ná nyí ajɔ ɖé nú mì ɖo azǎn énɛ́ gbe; nyiɖokpónɔ ka wɛ ǎ, loɔ, è lɛ́ sɔ́ ɖ’ayǐ nú mɛ ɖěɖěe yí wǎn nú éɖée e é ɖe xlɛ́ é bǐ.

9 Wa nǔ e wú a kpé é bǐ bo wá gɔ̌n ce ɖo malínmálín mɛ. 10 Ðó Demási jó mì dó, ɖó wǎn e é yí nú gbɛ* élɔ́ é wú; é yi Tɛsaloníki, Klɛsáan yi Galáti, bɔ Titu yi Dalumáti. 11 Luki kɛ́ɖɛ́ wɛ ɖo kpɔ́ xá mì. Kplá Maki wá, ɖó é ná d’alɔ mì tawun ɖo sinsɛnzɔ́ ɔ mɛ. 12 Amɔ̌, un sɛ́ Ticíku dó Efɛ́zi. 13 Nú a jawě hǔn, hɛn awu ɖaxó e un jó dó nyi Tlowási, ɖo Kaapɔ́si gɔ́n é kpó wěma mlámlá lɛ́, tají ɔ, anyǔwéma lɛ́ kpó wá.

14 Alɛsándlu ayǎtɔ́ ganvɔ tɔn ɔ wa nǔ dó wǔ ce tawun. Jexóva* ná sú axɔ́ tɔn ɛ sɔgbe xá nǔwiwa tɔn lɛ́. 15 Hwi lɔ ní cɔ́ hwiɖée dó wǔ tɔn, ɖó é klán gbe xá wɛn mǐtɔn bɔ é zɛ xwé wú.

16 Mɛ ɖěbǔ wá nɔ akpá ce azɔn nukɔntɔn e un jɛ hun dó nyiɖée jí é ǎ, é nyɔ́ wa ɔ, yě bǐ wɛ jó mì dó; è ní ma xa hwɛ tɔn dó kɔ nú yě ó. 17 Aklúnɔ ka wá nɔ akpá ce, bo ná hlɔ̌nhlɔ́n mì, bónú gbɔn gbla ce mɛ ɔ, è ní dó sixú jlá wɛn ɖagbe ɔ bǐ mlɛ́mlɛ́, lobonú akɔta lɛ́ bǐ ní dó sixú se; è lɛ́ hwlɛ́n mì sín kinnikínní nu mɛ. 18 Aklúnɔ ná hwlɛ́n mì sín nǔ nyanya bǐ mɛ, bo ná cyɔ́n alɔ jǐ ce nú Axɔ́súɖuto tɔn jǐxwé tɔn ɔ. Susu ní nyí étɔn káká sɔ́yi mavɔmavɔ. Amǐ.

19 Dǒ gbe Plisílu kpó Akilási kpó, gɔ́ nú mɛ e ɖo Onɛzifɔ́ɔ xwé lɛ́ é nú mì.

20 Elasíti cí Kɔlɛ́nti, amɔ̌, un jó Tlofímu dó nyi Milɛ, ɖó é ɖo azɔn jɛ wɛ. 21 Wa nǔ e wú a kpé é bǐ, bo wá jɛ nukɔn nú avivɔhwenu.

Ebúlu dó gbe sɛ́dó we, Pudɛ́nsi, Linúsi, Klódia kpó nɔví lɛ́ bǐ kpó lɔmɔ̌ dó gbe sɛ́dó we.

22 Aklúnɔ ní nɔ kpɔ́ xá we, hwenu e a ná ɖo jijɔ ɖagbe lɛ́ ɖe xlɛ́ wɛ é. Fɛ́nú tɔn ní nɔ kpɔ́ xá mi.