WĚMA NUKƆNTƆN E È WLÁN SƐ́DÓ TIMƆTÉE É

1 Nyɛ Pɔ́lu e Mawu Mɛhwlɛ́ngántɔ́ mǐtɔn kpó Klísu Jezu, éé nyí nukúnɖíɖó mǐtɔn é kpó ɖe gbe bɔ un nyí mɛsɛ́dó Klísu Jezu tɔn é, 2 wɛ ɖo wěma wlán sɛ́dó Timɔtée,* éé nyí vǐ jɔ vǐ ɖo nǔɖiɖi mɛ é wɛ:

Mawu Tɔ́ ɔ kpó Klísu Jezu Aklúnɔ mǐtɔn kpó ní ná fɛ́nú we, bo kú nǔbláwǔ nú we, lobo ná fífá we.

3 Un ɖo wǔsyɛ́n dó lanmɛ nú we wɛ din ɖɔ a ní nɔ Efɛ́zi, lěe un ko dó wǔsyɛ́n tɔn lanmɛ nú we gbɔn hwenu e un xwe Masedwáni é, bónú a ní ɖe gbe nú mɛɖé lɛ́ ɖɔ yě ní ma fúnfún adingban-núkplɔ́nmɛ lɛ́ kpé ó, 4 yě ní ma nɔ lɛ́ sɔ́ ayi ɖó xɛxó lɛ́ kpó kanfifɔ kpó jí ó. Nǔ mɔ̌hun lɛ́ nɔ hɛn le ɖě wá ǎ, é nyɔ́ wa ɔ, nǔkanbyɔ́ lɛ́ wɛ yě nɔ fɔ́n nyi te kpowun, yě nɔ hɛn nǔ e gosín Mawu gɔn bo kunkplá nǔɖiɖi é ɖě wá ǎ. 5 Nǔgbó ɔ, linlin wěɖexámɛ* énɛ́ tɔn wɛ nyí ɖɔ mɛ bǐ ní ɖó wǎnyíyí e ayi mímɛ́, ayixa ɖagbe kpó nǔɖiɖi e ma nyí yɛmɛnúwiwa tɔn ǎ é kpó nɔ sísɛ́ mɛ bɔ è nɔ ɖó é. 6 Ðó mɛɖé lɛ́ jó nǔ énɛ́ lɛ́ dó wútu ɔ, yě ko dó ta xó maɖótaɖé lɛ́ mɛ. 7 Yě jló ná nyí sɛ́nkplɔ́nmɛtɔ́, amɔ̌, yě mɔ nǔ jɛ nǔ e ɖɔ wɛ yě ɖe lɛ́ é mɛ ǎ, mɔ̌ jɛ́n yě ma ka lɛ́ mɔ nǔ jɛ nǔ e jí tɛ ɖɛ̌ wɛ yě ɖe syɛ́nsyɛ́n lɛ́ é mɛ ǎ é nɛ́.

8 Mǐ tuun ɖɔ Sɛ́n ɔ nyɔ́, ényí è xwedó ganjí ɔ nɛ́; 9 mǐ ka tuun ɖɔ é kún nyí nǔjlɔ́jlɔ́watɔ́ lɛ́ wú wɛ è nɔ dó sɛ́n ó, loɔ, mɛ élɔ́ lɛ́ wú wɛ: sɛ́ngbatɔ́ lɛ́ kpó gǔfɔ́ntɔ́ lɛ́ kpó, mɛ e ma nɔ ɖó sísí nú Mawu ǎ lɛ́ é kpó hwɛhutɔ́ lɛ́ kpó, gbejímanɔtɔ́ lɛ́* kpó suɖutɔ́ lɛ́ kpó, mɛ e nɔ hu tɔ́ yětɔn lɛ́ é kpó mɛ e nɔ hu nɔ yětɔn lɛ́ é kpó, mɛhutɔ́ lɛ́, 10 agalɛtɔ́* lɛ́, súnnu e nɔ ɖóxó xá súnnu lɛ́ é,* mɛfintɔ́ lɛ́, adingbannɔ lɛ́, mɛ e nɔ xwlé nǔ dó nǔvú jí lɛ́ é kpó mɛ e nɔ wa nǔ ɖěvo e sɔ́ ta nǔkplɔ́nmɛ ɖagbe lɛ́ é* bǐ lɛ́ é kpó. 11 Nǔkplɔ́nmɛ énɛ́ sɔgbe xá wɛn ɖagbe susunɔ Mawu awǎjijɛnɔ ɔ tɔn, éé è sɔ́ d’así nú mì é.

12 Un dó kú nú Klísu Jezu Aklúnɔ mǐtɔn e ná mì hlɔ̌nhlɔ́n é, ɖó é kpɔ́n mì dó mɔ gbejínɔtɔ́, bo sɔ́ sinsɛnzɔ́ ɖé d’así nú mì, 13 có ɖ’ayǐ ɔ, un nɔ nylá nu, un nɔ dó ya nú mɛ, bɔ un nɔ lɛ́ sí mɛ ǎ. É ɖo mɔ̌ có, è kú nǔbláwǔ nú mì, ɖó manywɛ́ mɛ wɛ un wa nǔ ɖe, un ka lɛ́ ɖi nǔ ǎ. 14 Amɔ̌, fɛ́nú Aklúnɔ mǐtɔn tɔn túnflá tawun, gɔ́ nú nǔɖiɖi kpó wǎnyíyí e ɖo Klísu Jezu mɛ é kpó. 15 Xó ɖejidéwú wɛ nyí xó élɔ́, bɔ é jɛxá ɖɔ è ní yí gbe ná bǐ mlɛ́mlɛ́: Klísu Jezu wá gbɛ ɔ mɛ, bo ná hwlɛ́n hwɛhutɔ́ lɛ́ gán. Nyɛ wɛ ka nyí hwɛhutɔ́ hú hwɛhutɔ́ lɛ́ bǐ. 16 É ɖo mɔ̌ có, è kú nǔbláwǔ nú mì, bónú gbɔn nyɛ mɛ e nyí hwɛhutɔ́ hú hwɛhutɔ́ lɛ́ bǐ é gblamɛ ɔ, Klísu Jezu ní dó sixú ɖe suúlu tɔn bǐ xlɛ́; é bló bɔ un nyí kpɔ́ndéwú nú mɛ ɖěɖěe ná ɖi nǔ n’i, bo ná mɔ gbɛ mavɔmavɔ lɛ́ é.

17 Yɛ̌yi kpó susu kpó ní nyí Axɔ́sú mavɔmavɔ e ma nɔ kú ǎ, bɔ è ma nɔ mɔ ǎ, lobɔ é nyí Mawu ɖokpó ɔ é tɔn káká sɔ́yi mavɔmavɔ. Amǐ.

18 Vǐ ce Timɔtée, un ɖo wě élɔ́ ɖe xá we wɛ,* sɔgbe xá nǔ e è ko ɖɔ ɖ’ayǐ dó wǔtu towe lɛ́ é, bónú gbɔn yě gblamɛ ɔ, a ní dó sixú kpo ɖo ahwan ɖagbe ɔ fun wɛ; 19 tɛ́ dó nǔɖiɖi wú bo kpo ɖo ayixa ɖagbe ɖó wɛ; ayixa ɖagbe énɛ́ wɛ mɛɖé lɛ́ xo nyi kɛ́n, bɔ é sín énɛ́ wú bɔ nǔɖiɖi yětɔn syɔ́ tɔjíhún ɖɔhun. 20 Imɛnɛ́ɛ kpó Alɛsándlu kpó ɖo mɛ énɛ́ lɛ́ mɛ; un jó yě nú Satáan, bónú tódɔnnúmɛ énɛ́ ní dó sixú kplɔ́n yě ɖɔ yě ní ma sɔ́ nylá nu ɖě ó.

2 Jɛ nukɔn hwɛ̌ ɔ, un ɖo byɔ̌byɔ́ wɛ vɛ́návɛ́ná ɖɔ mɛ bǐ ní nɔ sa vo dó gbɛtɔ́ alɔkpa lɛ́ bǐ tamɛ, nɔ xo ɖɛ dó ta yětɔn mɛ, nɔ byɔ́ nǔ dó ta yětɔn mɛ, nɔ dó kú nú Mawu dó ta yětɔn mɛ, 2 bo nɔ lɛ́ wa nǔ énɛ́ lɛ́ bǐ dó axɔ́sú lɛ́ kpó mɛ e ɖo tɛn ɖaxó* mɛ lɛ́ é bǐ kpó tamɛ, bónú mǐ ní dó sixú kpo ɖo gbɛ zán wɛ ɖo vivo kpó fífá kpó mɛ, lobo nɔ gbejí nú Mawu mlɛ́mlɛ́ dó nǔjɔnǔ mɛ. 3 Nǔ e nyɔ́ Mawu, Mɛhwlɛ́ngántɔ́ mǐtɔn nukúnmɛ, bɔ é lɛ́ yí gbe ná é nɛ́; 4 jlǒ tɔn wɛ nyí ɖɔ mɛ alɔkpa lɛ́ bǐ ní mɔ hwlɛngán, bo lɛ́ ɖó nukúnnúmɔjɛnǔmɛ e sɔgbe é dó nǔgbó ɔ wú. 5 Ðó Mawu ɖokpó wɛ ɖe, bɔ hwɛdógbɔtɔ́ ɖokpó ɖe ɖo Mawu kpó gbɛtɔ́ lɛ́ kpó tɛ́ntin, é wɛ nyí Klísu Jezu; mɛ énɛ́ wɛ nyí 6 mɛ e sɔ́ éɖée jó dó sú axɔ́ e è ɖó ná sú dó xɔ gbɛ nú mɛ bǐ* é: nǔ e sín kúnnu è ɖó ná ɖe ɖo hwetɔnnu é nɛ́. 7 Ðó kúnnuɖiɖe énɛ́ wú wɛ è sɔ́ mì wɛnjlátɔ́, bo sɔ́ mì mɛsɛ́dó, lobo lɛ́ sɔ́ mì nú má kplɔ́n nǔ akɔta lɛ́ dó nǔɖiɖi kpó nǔgbó kpó wú. Nǔgbó ɖɔ wɛ un ɖe, un ɖo adingban ɖó wɛ ǎ.

8 Énɛ́ wú ɔ, un jló ɖɔ súnnu lɛ́ ní nɔ ɖo ɖɛ xo wɛ ɖo fí ɖěbǔ e mi ná kplé ɖe é, yě ní nɔ sɔ́ alɔ yětɔn lɛ́ dó jǐ kpó gbejíninɔ kpó, é ní ma nyí kpó xomɛsin kpó, kpódó nǔdindɔn kpán ó. 9 Mɔ̌ ɖokpó ɔ, nyɔ̌nu lɛ́ ɖó ná nɔ sɔ́ nǔzínzán e jɛxá lɛ́ é* dó ba acɔ́ ná kpó jlɛ̌jíninɔ kpó, kpódó ayiɖote* kpán, é ní ma nyí kpó ɖa gɛ́dɛ́gɛ́dɛ́ lɛ́ bláblá kpó, kpódó siká, alǒ jɛ̌, alǒ avɔ e vɛ́ axi tawun lɛ́ é kpán ó, 10 loɔ, yě ní nɔ ba acɔ́ lěe é jɛxá ɖɔ nyɔ̌nu e zé yěɖée jó nú Mawu lɛ́ é ní nɔ ba acɔ́ gbɔn é, énɛ́ wɛ nyí, gbɔn azɔ̌ ɖagbe lɛ́ gblamɛ.

11 Nyɔ̌nu ní nɔ nɔ xwíí dó kplɔ́n nǔ, lobo nɔ hwíhwɛ́ éɖée bǐ mlɛ́mlɛ́. 12 Un yí gbe bónú nyɔ̌nu ná nɔ kplɔ́n nǔ mɛ, alǒ kpa acɛ dó súnnu jí ǎ, loɔ, é ɖó ná nɔ nɔ xwíí. 13 Ðó Adámu wɛ è dá jɛ nukɔn, énɛ́ gúdo ɔ, è dá Ɛvu. 14 Gɔ́ ná ɔ, Adámu wɛ è blɛ́ ǎ, loɔ, nyɔ̌nu ɔ wɛ è blɛ́ bǐ mlɛ́mlɛ́, bɔ é húzú sɛ́ngbatɔ́. 15 É ɖo mɔ̌ có, ényí nyɔ̌nu lɛ́ nɔ zán gbɛ ɖo nǔɖiɖi, wǎnyíyí kpó mǐmɛ́ kpó mɛ, bo nɔ lɛ́ zán gbɛ kpó ayiɖote* kpó ɔ, è ná hɛn yě ɖó ayijayǐ mɛ, gbɔn vǐ jiji gblamɛ.

3 Xó ɖejidéwú wɛ nyí xó élɔ́: Ényí súnnu ɖé ɖo gǎn dó wɛ bo ná nyí nukúnkpénǔwútɔ́ ɔ, azɔ̌ ɖagbe ɖé wɛ jló è. 2 Énɛ́ wú ɔ, nukúnkpénǔwútɔ́ ɖé ɖó ná nyí mɛ e wú è ma nɔ mɔ nǔ ɖě ɖɔ dó ǎ é, asi ɖokpó wɛ é ɖó ná ɖó, é ɖó ná nɔ nɔ jlɛ̌ jí ɖo walɔ tɔn lɛ́ mɛ, é ɖó ná nɔ ɖó ayi te,* é ɖó ná nɔ nɔ tuto jí, é ɖó ná nɔ yí mɛ, é ɖó ná ɖó nǔwúkpíkpé bo ná kplɔ́n nǔ mɛ, 3 é ɖó ná nyí ahannumúnɔ ǎ, é ɖó ná nɔ wa alǎnnú* ǎ, loɔ, é ɖó ná nɔ nɔ jlɛ̌ jí, é ɖó ná nyí jlɛɖɔtɔ́ ǎ, é ɖó ná nyí mɛ e yí wǎn nú akwɛ́ é ǎ, 4 é ɖó ná nyí mɛ e nɔ kpé nukún dó xwédo éɖésúnɔ tɔn wú ɖo ali ɖagbe nu, bɔ vǐ tɔn lɛ́ nɔ hwíhwɛ́ yěɖée dó nǔjɔnǔ mɛ bǐ mlɛ́mlɛ́ é 5 (ɖó ényí súnnu ɖé ma tuun lěe é ná kpé nukún dó xwédo éɖésúnɔ tɔn wú gbɔn é ǎ ɔ, nɛ̌ é ka ná kpé nukún dó agun Mawu tɔn wú gbɔn?), 6 é ɖó ná nyí mɛ e húzú nǔɖitɔ́ yɔ̌yɔ́ é ǎ, ɖó é táá wá jɛ go yí jí, bo ná jɛ hwɛ e è ɖó nú Awǒvi é mɛ. 7 Gɔ́ ná ɔ, mɛ e ma ɖo agun ɔ mɛ ǎ lɛ́ é ɖó ná nɔ ɖe kúnnu ɖagbe n’i,* bónú è ní ma wá mɔ xó ɖɔ dó wǔ tɔn* ó, bónú é ní ma lɛ́ jɛ mɔ Awǒvi tɔn ɖé mɛ ó.

8 Mɔ̌ ɖokpó ɔ, mɛsɛntɔ́ agun tɔn lɛ́ ɖó ná nyí mɛ e sísí jɛxá é, yě ɖó ná nyí gbɛtɔ́ nuwenɔ* ǎ, yě ɖó ná nɔ jó yěɖée dó nú vɛ̌ɛn gěgé nunu ǎ, yě ɖó ná yí wǎn nú afu ǎ, 9 yě ɖó ná nɔ tɛ́ dó nǔbúdo Mawu tɔn e kunkplá nǔɖiɖi ɔ é wú kpó ayixa mímɛ́ kpó.

10 Gɔ́ ná ɔ, è ní to tɛ́n yě kpɔ́n ɖɔ yě jɛxá a jí hwɛ̌; énɛ́ gúdo ɔ, mi nú yě ní wa mɛsɛntɔ́zɔ́, ényí è ma mɔ nǔ ɖě ɖɔ dó yě wú ǎ ɔ nɛ́.

11 Mɔ̌ ɖokpó ɔ, nyɔ̌nu lɛ́ ɖó ná nyí mɛ e sísí jɛxá lɛ́ é, yě ɖó ná nɔ ɖɔ mɛ nú ǎ, yě ɖó ná nɔ nɔ jlɛ̌ jí ɖo walɔ yětɔn lɛ́ mɛ, yě ɖó ná nɔ nɔ gbejí ɖo nǔ bǐ mɛ.

12 Asi ɖokpó wɛ mɛsɛntɔ́ agun tɔn lɛ́ ɖó ná ɖó, bo ɖó ná nɔ kpé nukún dó vǐ yětɔn lɛ́ kpó xwédo yěɖésúnɔ tɔn lɛ́ kpó wú ɖo ali ɖagbe nu. 13 Ðó súnnu e nɔ wa mɛsɛntɔ́zɔ́ ɖo ali ɖagbe nu lɛ́ é nɔ ɖó nyǐkɔ ɖagbe, bo nɔ lɛ́ vo tawun bo nɔ ɖɔ xó dó nǔɖiɖi e yě ɖó ɖo Klísu Jezu mɛ é wú.

14 Un ɖo nukún ɖó wɛ bo ná wá gɔ̌n towe ɖo malínmálín mɛ có, un ɖo nǔ énɛ́ lɛ́ wlán sɛ́dó we wɛ, 15 bónú ényí un ma yá wǔ wá ǎ ɔ, a ní dó sixú tuun lěe a ɖó ná wa nǔ gbɔn ɖo xwédo Mawu tɔn mɛ é, énɛ́ wɛ nyí agun Mawu gbɛɖe ɔ tɔn, éé nyí dotín ɖé, bo lɛ́ nyí dodónú ɖé nú nǔgbó ɔ é. 16 Nǔgbó ɔ, é ɖo wɛn ɖɔ nǔbúdo Mawu tɔn e kunkplá gbejíninɔ nú Mawu é d’agba: ‘È ɖe è xlɛ́ ɖo agbaza mɛ, è ɖɔ ɖɔ é nyí nǔjlɔ́jlɔ́watɔ́ hwenu e é nyí gbigbɔ é, é tɔ́n dó wɛnsagun lɛ́ jí, è jlá ɛ ɖo akɔta lɛ́ tɛ́ntin, è ɖi nǔ n’i ɖo gbɛ ɔ mɛ, è yí i ɖo jǐxwé bo kpa susu n’i.’

4 É ɖo mɔ̌ có, nǔɖɔɖayǐ* ɔ ɖɔ nyi wɛn ɖɔ, ɖo hwenu gǔdo gúdo tɔn lɛ́ mɛ ɔ, mɛɖé lɛ́ ná lɛ́ kɔ sín nǔɖiɖi ɔ gúdo, bo ná sɔ́ ayi ɖó nǔɖɔɖayǐ* mɛblɛ́blɛ́ tɔn lɛ́ kpó nǔkplɔ́nmɛ awǒvi lɛ́ tɔn lɛ́ kpó jí, 2 gbɔn yɛmɛnúwiwa mɛ e nɔ ɖó adingban lɛ́ é tɔn gblamɛ; mɛ énɛ́ lɛ́ sín ayixa cí gan zozo wɛ è dó ɖó wuntun ná ɖɔhun. 3 Yě nɔ dó alɔwlíwlí sín sɛ́n, bo nɔ ɖe gbe nú mɛ lɛ́ ɖɔ yě ní nɔ zɔ nú nǔɖuɖu e Mawu bló, bónú mɛ ɖěɖěe ɖó nǔɖiɖi bo tuun nǔgbó ɔ bǐ dégbédégbé lɛ́ é ná ɖu kpó kúdídó kpó lɛ́ é. 4 Nǔɖíɖó Mawu tɔn lɛ́ bǐ wɛ nyɔ́, bɔ è ɖó ná xo ɖěbǔ nyi kɛ́n ǎ, ényí è yí kpó kúdídó kpó ɔ nɛ́, 5 ɖó é nyí nǔ mímɛ́ gbɔn xó Mawu tɔn kpó ɖɛ e è xo d’é jí é kpó gblamɛ.

6 Ényí a ɖe wě énɛ́ xá nɔví lɛ́ ɔ, a ná nyí sinsɛnzɔ́watɔ́ Klísu Jezu tɔn ɖagbe, bo ná xlɛ́ ɖɔ nǔɖiɖi kpó nǔkplɔ́nmɛ ɖagbe e a xwedó tlélé é kpó sín xó wɛ è zán dó kplɔ́n azɔ̌ we. 7 Amɔ̌, hɔn nú xɛxó e nɔ kɔn cí dó nǔ mímɛ́ lɛ́ wú lɛ́ é, ɖi ée nyɔ̌nu mɛxómɔ ɖé lɛ́ nɔ ɖɔ lɛ́ é. Ðo alɔ ɖěvo mɛ ɔ, kplɔ́n azɔ̌ hwiɖée bo nya gbejíninɔ nú Mawu sín gbě. 8 Ðó lanmɛ bibakpɔ́n* ɔ, le kpɛɖé wɛ é nɔ hɛn wá, amɔ̌, gbejíninɔ nú Mawu nɔ hɛn le wá ɖo nǔ lɛ́ bǐ mɛ, ɖó é nɔ zɔ́n bɔ è nɔ mɔ nyɔ̌ná e sín akpá Mawu dó lɛ́ é yí ɖo gbɛ din tɔn ɔ kpó éé ja é kpó mɛ. 9 Xó ɖejidéwú wɛ nyí xó énɛ́, bɔ é jɛxá ɖɔ è ní yí gbe ná bǐ mlɛ́mlɛ́. 10 Énɛ́ wú wɛ mǐ ɖo azɔ̌ syɛ́nsyɛ́n wa wɛ bo ɖo gǎn dó wɛ tawun, ɖó mǐ sɔ́ nukúnɖíɖó mǐtɔn ɖó Mawu gbɛɖe, éé nyí Mɛhwlɛ́ngántɔ́ gbɛtɔ́ alɔkpa lɛ́ bǐ tɔn, ɖo tají ɔ, gbejínɔtɔ́ lɛ́ tɔn é jí.

11 Kpo ɖo nǔ énɛ́ lɛ́ sín gbe ɖe wɛ, bo kpo ɖo nǔ énɛ́ lɛ́ kplɔ́n mɛ wɛ. 12 Ma lɔn nú mɛ ɖěbǔ ní hu tɛ́ nú we, ɖó mɛ wínnyáwínnyá e a nyí é wú gbeɖé ó. É nyɔ́ wa ɔ, hǔzú kpɔ́ndéwú nú gbejínɔtɔ́ lɛ́ ɖo xóɖiɖɔ mɛ, ɖo walɔ mɛ, ɖo wǎnyíyí mɛ, ɖo nǔɖiɖi mɛ, ɖo mǐmɛ́jíninɔ mɛ. 13 Káká jɛ hwenu e un ná wá é ɔ, kpo ɖo gǎn dó dó* nǔxixa ɖo agbawungba, wǔsyɛ́n dídó lanmɛ nú* mɛ kpó mɛkplɔ́nkplɔ́n kpó wú wɛ. 14 Ma dó vɛ̌ nú nǔníná e a ɖó, bɔ è ná we gbɔn nǔɖɔɖayǐ ɖé gblamɛ, hwenu e kplékplé mɛxó lɛ́ tɔn sɔ́ alɔ ɖó jǐ we é ó. 15 Nɔ lin tamɛ dó nǔ énɛ́ lɛ́ jí; sɔ́ hwiɖée bǐ jó ná, bónú mɛ bǐ ní dó sixú mɔ nǔ jɛ nukɔnyiyi towe wú bǐ mlɛ́mlɛ́. 16 Nɔ hɛn ayi dó hwiɖée kpó nǔ e kplɔ́n mɛ wɛ a ɖe é kpó wú hwebǐnu. Ðǒ kan dó nǔ énɛ́ lɛ́ wú, ɖó nú a ɖo mɔ̌ wa wɛ ɔ, a ná hwlɛ́n hwiɖée kpó mɛ e ɖo tó ɖó we wɛ lɛ́ é kpó bǐ gán.

5 Ma nɔ gbɛ́ nǔ nú súnnu mɛxómɔ ɖé syɛ́nsyɛ́n ó. É nyɔ́ wa ɔ, nɔ sa vo n’i lěe a ná wa gbɔn nú tɔ́ towe é ɖɔhun, bo nɔ sa vo nú dɔ̌nkpɛvú lɛ́ lěe a ná wa gbɔn nú nɔví towe súnnu lɛ́ é ɖɔhun. 2 Nɔ sa vo nú nyɔ̌nu mɛxómɔ lɛ́ lěe a ná wa gbɔn nú nɔ towe é ɖɔhun, bo nɔ sa vo nú ɖyɔ̌vǐ lɛ́ lěe a ná wa gbɔn nú nɔví towe nyɔ̌nu lɛ́ é ɖɔhun, kpó ayi mímɛ́ kpó.

3 Nɔ wlí yɛ̌yi nú asúkúsi ɖěɖěe nyí asúkúsi nǔgbó nǔgbó lɛ́ é.* 4 Amɔ̌, ényí asúkúsi ɖěbǔ ɖó vǐ alǒ vǐvú hǔn, yědɛɛ lɛ́ ní to kplɔ́n bo nɔ ɖe xlɛ́ ɖɔ émí ɖo gbejí nú Mawu ɖo xwédo yěɖésúnɔ tɔn mɛ hwɛ̌, lobo nɔ sú axɔ́ e yě ɖu dó mɛjitɔ́ yětɔn lɛ́, kpó mɛjitɔ́ yětɔn lɛ́ sín mɛjitɔ́ lɛ́ kpó lɛ́ é yě, ɖó nǔ énɛ́ nɔ nyɔ́ Mawu nukúnmɛ. 5 Din ɔ, nyɔ̌nu e nyí asúkúsi nǔgbó nǔgbó, bo ma ɖó mɛɖé ǎ é nɔ sɔ́ nukúnɖíɖó tɔn ɖó Mawu jí; é nɔ ɖo vo sa nú Mawu wɛ, bo nɔ lɛ́ ɖo ɖɛ xo wɛ zǎn kéze. 6 Amɔ̌, asúkúsi e jó éɖée dó nú gbɛɖuɖu é kpo ɖo gbɛ có, é ko kú. 7 Énɛ́ wú ɔ, kpo ɖo wě énɛ́ lɛ́ ɖe xá mɛ wɛ,* bónú è ma wá mɔ nǔ ɖě ɖɔ dó mɛɖé wú ó. 8 Nǔgbó ɔ, ényí mɛɖé ma nɔ kpé nukún dó mɛ tɔn lɛ́ wú ǎ ɔ, ɖo tají ɔ, mɛ e nyí xwédo tɔn sín hǎgbɛ́ lɛ́ é wú ǎ ɔ, mɛ énɛ́ gbɛ́ nǔɖiɖi ɔ, bo lɛ́ nylá hú nǔmaɖitɔ́.

9 É hwe bǐ ɔ, xwe 60 wɛ asúkúsi ɖé ɖó ná ɖó cóbɔ è ná lɛ́n ɛ dó asúkúsi lɛ́ mɛ; asú ɖokpó jɛ́n é ɖó ná da kpɔ́n. 10 È ɖó ná tuun i dó tuun mɛ e nɔ wa azɔ̌ ɖagbe lɛ́ é, é ɖó ná ko kplɔ́n vǐ kpɔ́n, é ɖó ná ko nɔ yí mɛ kpɔ́n, é ɖó ná ko nɔ klɔ́ afɔ nú mɛ mímɛ́ lɛ́ kpɔ́n, é ɖó ná ko nɔ d’alɔ mɛ e ɖo wǔvɛ́ se wɛ lɛ́ é kpɔ́n, é ɖó ná ko nɔ sɔ́ éɖée jó dó azɔ̌ ɖagbe bǐ tamɛ kpɔ́n.

11 Ðo alɔ ɖěvo mɛ ɔ, ma xa asúkúsi wínnyáwínnyá lɛ́ dó asúkúsi lɛ́ mɛ ó, ɖó ényí jlǒ xóɖóxámɛ tɔn yětɔn wá húzú afɔklɛ́nnú ɖo yě kpó Klísu kpó tɛ́ntin ɔ, alɔwlíwlí nɔ jló yě. 12 Yě ná dɔn hwɛɖónúmɛ dó yěɖée jí, ɖó yě jó akpá e yě dó ɖ’ayǐ é* dó wútu. 13 Hwe ɖokpó ɔ nu ɔ, yě nɔ lɛ́ gbɛ́ nǔ wa, bo nɔ ɖo xwé xa ɖó afɔ wú wɛ; ɛɛn, é nyí nǔ wa kɛ́ɖɛ́ wɛ yě gbɛ́ ǎ, loɔ, yě lɛ́ húzú mɛnúɖɔtɔ́, bo nɔ ɖo nu dó mɛɖévoxó mɛ wɛ, lobo nɔ ɖo xó e yě ma ɖó ná ɖɔ ǎ lɛ́ é ɖɔ wɛ. 14 Énɛ́ wú ɔ, un jló ɖɔ asúkúsi wínnyáwínnyá lɛ́ ní wlí alɔ, yě ní ji vǐ, yě ní kpé nukún dó xwédo yětɔn wú, yě ní ma hun ali ɖěbǔ nú gbeklánxámɛtɔ́ lɛ́, bónú yě ní mɔ xó ɖɔ dó mǐ wú ó. 15 Nǔgbó ɔ, yě mɛ ɖé lɛ́ ko jó nǔgbó ɔ dó bo xwedó Satáan. 16 Ényí nyɔ̌nu nǔɖitɔ́ ɖěbǔ sín hɛ̌nnumɔ lɛ́ nyí asúkúsi hǔn, mi nú é ní kpé nukún dó yě wú, bónú è ma wá dó agban nú agun ɔ ó; énɛ́ ɔ, agun ɔ sixú kpé nukún dó mɛ e nyí asúkúsi nǔgbó nǔgbó lɛ́ é* wú.

17 Mɛxó agun tɔn e nɔ xlɛ́ ali agun ɔ ganjí lɛ́ é ɔ, mi nú è ní kpɔ́n yě dó mɔ mɛ e jɛxá yɛ̌yi weɖobǔ lɛ́ é, ɖo tají ɔ, yě mɛ ɖěɖěe nɔ w’azɔ̌ syɛ́nsyɛ́n ɖo xóɖiɖɔ kpó mɛkplɔ́nkplɔ́n kpó mɛ lɛ́ é. 18 Ðó nǔwlánwlán mímɛ́ ɔ ɖɔ: “A ɖó ná dó aja nu nú nyibú e ɖo nǔkún só wɛ é ǎ,” é lɛ́ ɖɔ: “Azɔ̌watɔ́ jɛxá azɔ̌kwɛ́ tɔn.” 19 Ma yí gbe nú hwɛ e è dó súnnu mɛxómɔ* ɖé é ó, afi nú a ɖó kúnnuɖiɖe mɛ we alǒ mɛ atɔn tɔn ɔ nɛ́. 20 Gbɛ̌ nǔ nú mɛ e nɔ fɔ́n bo nɔ ɖo hwɛ hu wɛ lɛ́ é ɖo mɛ bǐ nukɔn, bónú é ní nyí akpágbanúmɛ nú mɛ e kpo lɛ́ é.* 21 Un ɖe gbe nú we dó nǔjɔnǔ mɛ ɖo Mawu, Klísu Jezu kpó wɛnsagun e è cyán lɛ́ é kpó nukɔn ɖɔ a ní xwedó wěɖexámɛ énɛ́ lɛ́; ma ka ɖó linlin agɔ dó mɛɖé wú, alǒ ɖe mɛɖé ɖó vo ɖo mɛɖé mɛ dó wa mɔ̌ ó.

22 Ma yá wǔ sɔ́ alɔ ɖó súnnu ɖěbǔ jí gbeɖé ó;* ma ɖ’alɔ ɖo hwɛ mɛ ɖěvo lɛ́ tɔn lɛ́ mɛ ó; hɛn hwiɖée ɖó mǐmɛ́ jí.

23 Ma sɔ́ nɔ nu sin ɖě ó,* loɔ, nɔ nu vɛ̌ɛn kpɛɖé kpɛɖé, ɖó xomɛzɔn towe kpó azɔn e jɛ wɛ a nɔ ɖe hwɛhwɛ lɛ́ é kpó wú.

24 Mɛɖé lɛ́ tíin bɔ hwɛ e yě hu lɛ́ é nɔ jɛ wě gannaganna, bɔ è nɔ ɖɔ hwɛ xá yě tlɔlɔ, amɔ̌, mɛ ɖěvo lɛ́ tíin bɔ nukɔnmɛ wɛ hwɛ yědɛɛ lɛ́ tɔn lɛ́ nɔ jɛ wě. 25 Mɔ̌ ɖokpó ɔ, azɔ̌ ɖagbe lɛ́ lɔ nɔ jɛ wě gannaganna, bɔ ɖěɖěe ma nyí mɔ̌ ǎ lɛ́ é lɔ sixú nɔ hwlǎhwlá ǎ.

6 Mɛ e ɖo kannumɔ sín agbanhɛnkpo glɔ́ lɛ́ é ní nɔ kpɔ́n gǎn yětɔn lɛ́ dó mɔ mɛ e jɛxá yɛ̌yi bǐ mlɛ́mlɛ́ lɛ́ é, bónú è ní ma nylá nu dó nyǐkɔ Mawu tɔn kpó nǔkplɔ́nmɛ ɔ kpó wú gbeɖé ó. 2 Gɔ́ ná ɔ, mɛ e ɖó gǎn nǔɖitɔ́ lɛ́ é ɖó ná gɔn sísí ɖó nǔ yě, ɖó yě nyí nɔví ɖo nǔɖiɖi mɛ wútu ǎ. É nyɔ́ wa ɔ, yě ɖó ná wa mɛsɛntɔ́zɔ́ kpó jlǒ kpó hú gǎn, ɖó nǔɖitɔ́ lɛ́ kpó nɔví vívɛ́ná lɛ́ kpó wɛ nɔ ɖu mɛsɛntɔ́zɔ́ ɖagbe e wa wɛ yě ɖe é sín le.

Kpo ɖo nǔ e ɖɔ nú we wɛ un ɖe lɛ́ é kplɔ́n mɛ wɛ, bo lɛ́ kpo ɖo nǔ énɛ́ lɛ́ sín wě ɖe xá mɛ wɛ vɛ́návɛ́ná. 3 Ényí mɛ ɖěbǔ nɔ fúnfún adingban-núkplɔ́nmɛ lɛ́ kpé, bo ma nɔ yí gbe nú wěɖexámɛ ɖagbe e gosín* Aklúnɔ mǐtɔn Jezu Klísu gɔ́n é ǎ, lobo ma ka nɔ lɛ́ yí gbe nú nǔkplɔ́nmɛ e sɔgbe xá gbejíninɔ nú Mawu é ǎ ɔ, 4 goyítɔ́ wɛ n’i, bɔ é lɛ́ mɔ nukúnnú jɛ nǔ ɖě mɛ ǎ. Jlɛɖiɖɔ kpó nǔdindɔn dó xókwín lɛ́ jí kpó sín azɔn jɛ wɛ é ɖe.* Nǔ e nǔ énɛ́ lɛ́ nɔ dɔn wá lɛ́ é ɖíe: mɛnújlójló, jlɛɖiɖɔ, jidómɛ,* nǔnyanyavɛdómɛ; 5 mɛ e linlin yětɔn blí, bɔ yě ma sɔ́ nɔ mɔ nukúnnú jɛ nǔgbó ɔ mɛ ǎ, bo nɔ lin ɖɔ gbejíninɔ nú Mawu nɔ hɛn le mɛɖésúnɔ tɔn lɛ́ wá lɛ́ é nɔ ɖo jlɛ ɖɔ wɛ magbokɔ, dó nǔ e ma hwɛ́n nǔɖé ǎ lɛ́ é jí. 6 Nǔgbó ɔ, ényí nǔ e è ɖó é nɔ kpé mɛ ɔ, gbejíninɔ nú Mawu nɔ hɛn le ɖaxó wá. 7 Ðó mǐ hɛn nǔ ɖěbǔ wá gbɛ ɔ mɛ ǎ, mɔ̌ jɛ́n mǐ ma ka sixú lɛ́ hɛn nǔ ɖěbǔ yi kú ǎ é nɛ́. 8 Énɛ́ wú ɔ, ényí mǐ ɖó nǔɖuɖu kpó avɔ* kpó ɔ, nǔ énɛ́ lɛ́ ná kpé mǐ.

9 Amɔ̌, mɛ e kán ɖ’é jí bo ná jɛ dɔkun lɛ́ é nɔ jɛ tɛ́nkpɔ́n kpó mɔ kpó mɛ; yě nɔ lɛ́ ɖó jlǒ maɖótaɖé e nɔ wa nǔ dó mɛ wú lɛ́ é gěgé; jlǒ énɛ́ lɛ́ wɛ nɔ dɔn gbɛtɔ́ yi bú, bo nɔ lɛ́ sú kún dó nú mɛ. 10 Ðó wǎn yí nú akwɛ́ wɛ nyí jɔtɛn nǔ nyanya alɔkpa lɛ́ bǐ tɔn, bɔ mɛ e jó yěɖée dó nú wǎnyíyí énɛ́ é ɖé lɛ́ ko zɛ gbě sín nǔɖiɖi ɔ sín ali jí, lobo dɔn wǔvɛ́ gěgé wá nú yěɖée, gbɔn fí bǐ.

11 É ɖo mɔ̌ có, hwi mɛsɛntɔ́ Mawu tɔn è, hɔn nú nǔ énɛ́ lɛ́. Loɔ, nya nǔjlɔ́jlɔ́wiwa, gbejíninɔ nú Mawu, nǔɖiɖi, wǎnyíyí, didɛ kpó xomɛfífá kpó gbé. 12 Fun nǔɖiɖihwan ɖagbe ɔ; zunfán gbɛ mavɔmavɔ e wú è ylɔ́ we, bɔ a ɖɔ xó tɔn ɖo agbawungba ɖo ali ɖagbe nu, ɖo kúnnuɖetɔ́ gěgé nukɔn é gbánwúngbánwún.

13 Ðo Mawu e nɔ hɛn nǔ lɛ́ bǐ ɖó gbɛ é kpó Klísu Jezu e ɖe kúnnu ɖagbe ɖo agbawungba, ɖo Pɔ́nsu Pilátu nukɔn é kpó nukɔn ɔ, un ɖo gbe ɖe nú we wɛ ɖɔ, 14 a ní nɔ xwedó gbeɖiɖe ɔ ɖo ali e mɛ́, bɔ è ma sixú mɔ nǔ ɖěbǔ ɖɔ d’é wú ǎ é nu, káká jɛ hwenu e Aklúnɔ mǐtɔn Jezu Klísu ná ɖe éɖée xlɛ́ é; 15 éyɛ́ mɛ e nyí awǎjijɛnɔ, bɔ éɖokpónɔ wɛ nyí Mɛ e ɖó acɛ ɖaxó é ná ɖe éɖée xlɛ́ ɖo hwetɔnnu. É wɛ nyí Axɔ́sú axɔ́sú lɛ́ tɔn, bo nyí Aklúnɔ aklúnɔ lɛ́ tɔn; 16 éɖokpónɔ wɛ ma sixú kú ǎ; é nɔ nɔ wěziza e è ma sixú sɛkpɔ́ ǎ é mɛ, mɛ ɖěbǔ mɔ ɛ, alǒ sixú mɔ ɛ ǎ. Yɛ̌yi kpó hlɔ̌nhlɔ́n mavɔmavɔ kpó ní nyí étɔn. Amǐ.

17 Ðe wě xá* mɛ e jɛ dɔkun ɖo gbɛ* din tɔn ɔ mɛ lɛ́ é ɖɔ yě ní ma nɔ yí go* ó, yě ní ma nɔ lɛ́ sɔ́ nukúnɖíɖó yětɔn ɖó dɔkun e ma ɖó gǎnjɛwú ǎ lɛ́ é jí ó, loɔ, yě ní sɔ́ nukúnɖíɖó yětɔn ɖó Mawu jí; éyɛ́ wɛ nɔ ná nǔ e sín vǐví mǐ nɔ ɖu lɛ́ é bǐ mǐ, bɔ é nɔ túnflá. 18 Ðɔ nú yě ɖɔ yě ní nɔ wa nǔ ɖagbe, ɛɛn, yě ní nɔ wa nǔ ɖagbe gěgé, yě ní nyí alɔhundónánǔmɛtɔ́, bo nɔ ɖo gbesisɔmɛ bá má nǔ e yě ɖó lɛ́ é xá mɛ ɖěvo lɛ́; 19 mɔ̌ mɛ ɔ, yě ná kplé dɔkun ɖ’ayǐ nú yěɖée dó ayijayǐ mɛ, énɛ́ wɛ nyí dodónú ɖagbe ɖé nú sɔgúdo, bónú yě ní dó sixú zunfán gbɛ jɔ gbɛ ɔ gbánwúngbánwún.

20 Timɔtée, nya xɛ ɖo nǔ e è sɔ́ dó así nú we é jí, bo hɔn nú xó vɔ̌tɔ́ e nɔ hɛn nǔ e nyí nǔ mímɛ́ é blí lɛ́ é, kpó nǔ e mɛ lɛ́ nɔ ylɔ́ ɖɔ “nǔtuuntuun” b’ɛ ma ka nyí mɔ̌ ǎ é sín linlin e nɔ sɔ́ ta yěɖée lɛ́ é kpó. 21 Mɛɖé lɛ́ sɔ́ nǔtuuntuun mɔ̌hun ɖó ajo, bɔ énɛ́ zɔ́n bɔ yě jó nǔɖiɖi ɔ dó.

Fɛ́nú Mawu tɔn ní nɔ kpɔ́ xá mi.