WĚMA NUKƆNTƆN E È WLÁN SƐ́DÓ TƐSALONÍKINU LƐ́ É

1 Nyɛ Pɔ́lu, Siivɛ́ɛn* kpó Timɔtée kpó wɛ ɖo wěma wlán sɛ́dó agun Tɛsaloníkinu e ɖo bǔ xá Mawu Tɔ́ ɔ kpó Aklúnɔ Jezu Klísu kpó lɛ́ é tɔn wɛ:

Fɛ́nú kpó fífá kpó ní nɔ kpɔ́ xá mi.

2 Mǐ nɔ dó kú nú Mawu hweɖébǔnu e mǐ flín mi mɛ bǐ ɖo ɖɛ mǐtɔn lɛ́ mɛ é, 3 ɖó hwebǐnu ɖo Mawu mǐtɔn e lɛ́ nyí Tɔ́ mǐtɔn é nukɔn ɔ, mǐ nɔ flín azɔ̌ e mi wa kpó nǔɖiɖi kpó é, azɔ̌ syɛ́nsyɛ́n e mi wa kpó wǎnyíyí kpó é, kpódó dɛ e mi dɛ ɖó nukúnɖíɖó e mi ɖó ɖo Aklúnɔ mǐtɔn Jezu Klísu mɛ é wú é kpán. 4 Nɔví e Mawu yí wǎn ná lɛ́ é mi, mǐ tuun ɖɔ Mawu sɔ́ mi, 5 ɖó wɛn ɖagbe e mǐ nɔ jlá é ɔ, mǐ jlá mi ɖó nu wú kɛ́ɖɛ́ ǎ, loɔ, mǐ lɛ́ wa mɔ̌ kpó hlɔ̌nhlɔ́n kpó, kpódó alɔdó gbigbɔ mímɛ́ tɔn kpán, bo lɛ́ kú dó wɛn ɖagbe ɔ jí syɛ́nsyɛ́n. Mi tuun mɛ alɔkpa e mǐ húzú ɖo tɛ́ntin mitɔn dó ta mitɔn mɛ é. 6 Bɔ mi wa nǔ mǐɖɔhun, bo lɛ́ wa nǔ Aklúnɔ ɖɔhun, ɖó mi ɖo wǔvɛ́ gěgé mɛ có, mi yí xó ɔ kpó awǎjijɛ e gbigbɔ mímɛ́ nɔ zɔ́n bɔ è nɔ ɖó é kpó, 7 énɛ́ zɔ́n bɔ mi húzú kpɔ́ndéwú nú nǔɖitɔ́ e ɖo Masedwáni kpó Akáyi kpó lɛ́ é bǐ.

8 Nǔgbó ɔ, é nyí Masedwáni kpó Akáyi kpó kɛ́ɖɛ́ wɛ é sín mi wú bónú è se xó Jexóva* tɔn ɖe ǎ, loɔ, nǔ e mi ɖi nú Mawu é sín xó lɛ́ gba kpé fí bǐ, bɔ é sɔ́ byɔ́ ɖɔ mǐ ní ɖɔ xó ɖé ǎ. 9 Ðó mɛ lɛ́ ɖésúnɔ nɔ fɔ́n bo nɔ ɖo lěe mǐ mɔ mi gbɔn azɔn nukɔntɔn ɔ é xó ɖɔ wɛ, yě nɔ lɛ́ fɔ́n bo nɔ ɖo lěe mi lɛ́ kɔ sín bǒcyɔ lɛ́ gúdo, bo wá Mawu gbɛɖe e lɛ́ nyí Mawu nǔgbó ɔ é gɔ́n, bo ná wa azɔ̌ n’i kannumɔ ɖɔhun gbɔn é xó ɖɔ wɛ. 10 Gɔ́ ná ɔ, mi lɛ́ kɔ wá Mawu gɔ́n bo ná nɔ te kpɔ́n Vǐ tɔn e gosín jǐxwé é; Vǐ tɔn énɛ́ e nyí Jezu é wɛ é fɔ́n sín kú; é wɛ hwlɛ́n mǐ ɖo xomɛsin e ja é mɛ.

2 Nɔví lɛ́ mi, miɖésúnɔ tuun ganjí ɖɔ ba e mǐ wá ba mi kpɔ́n é kún nyí dó wǔvɔ́ ó. 2 Ðó lěe mi tuun gbɔn é ɔ, jɛ nukɔn hwɛ̌ ɔ, mǐ se wǔvɛ́ bɔ è lɛ́ xo dǎka mǐ wú ɖo Filípu, é ɖo mɔ̌ có, Mawu mǐtɔn bló bɔ mǐ gbó adɔ,* bo jlá wɛn ɖagbe Mawu tɔn ɔ mi ɖo gbeklánxámɛ ɖaxó nukɔn.* 3 Ðó nǔ e mǐ nɔ byɔ́ mi ɖɔ mi ní wa lɛ́ é jínjɔ́n nǔwanyido alǒ nǔ blíblí jí ǎ, mǐ ka nɔ lɛ́ wa mɔ̌ kpó mɛblɛ́blɛ́ kpó ǎ, 4 é nyɔ́ wa ɔ, ɖó Mawu yí gbe nú mǐ, bo sɔ́ wɛn ɖagbe ɔ d’así nú mǐ wútu ɔ, mǐ nɔ ɖɔ xó bo ná dó nyɔ́ ɖo gbɛtɔ́ lɛ́ nukúnmɛ ǎ, loɔ, bo ná dó nyɔ́ Mawu e nɔ gbéjé ayi mǐtɔn kpɔ́n é nukúnmɛ.

5 Nǔgbó ɔ, mi tuun ɖɔ mǐ kún zán mɛklɔ́klɔ́xó alǒ sɔ́ ninɔmɛ mɛblɛ́blɛ́ tɔn ɖěbǔ dó, ɖó linlin nukúnkɛndídó tɔn lɛ́ wú kpɔ́n ó; Mawu nyí kúnnuɖetɔ́ énɛ́ tɔn! 6 Mɔ̌ jɛ́n mǐ ma ba ɖɔ gbɛtɔ́ lɛ́ ní xɔ susu nú mǐ ǎ é nɛ́, é ná bo nyí midɛɛ lɛ́ alǒ mɛ ɖěvo lɛ́ ɔ nɛ́, có mǐ hɛn ɔ, ɖó mǐ nyí mɛsɛ́dó Klísu tɔn lɛ́ wútu ɔ, mǐ ná ko nyí agban kpinkpɛn nú mi. 7 Amɔ̌, mǐ nyɔ́ xomɛ ɖo tɛ́ntin mitɔn, vǐnɔ e ɖó vǐ ɖo anɔ̌nu, bo ɖo nukún kpé dó vǐ tɔn lɛ́ wú wɛ* kpó wǎnyíyí kpó é ɖɔhun. 8 Énɛ́ wú ɔ, ɖó mǐ ɖó wǎnyíyí e gɔ́ngɔ́n é nú mi wútu ɔ, mǐ kán ɖ’é jí bo ná* jlá wɛn ɖagbe Mawu tɔn ɔ mi, énɛ́ kɛ́ɖɛ́ ka wɛ ǎ, mǐ lɛ́ kán ɖ’é jí bo ná* sɔ́ mǐɖésúnɔ* bǐ jó dó ta mitɔn mɛ, ɖó mi vɛ́ nú mǐ tawun wútu.

9 Nɔví lɛ́ mi, é ɖo wɛn ɖɔ mi flín azɔ̌ syɛ́nsyɛ́n e mǐ wa é kpó kan e mǐ xo é kpó. Hwenu e mǐ jlá wɛn ɖagbe Mawu tɔn ɔ mi é ɔ, mǐ nɔ w’azɔ̌ zǎn kéze bo ma wá sɔ́ agban kpinkpɛn ɖó mi mɛ ɖěbǔ jí ó. 10 Mǐ wa nǔ xá mi mɛ nǔɖitɔ́ lɛ́ kpó gbejíninɔ kpó, mǐ wa nǔ jlɔ́jlɔ́ xá mi bɔ è sixú mɔ nǔ ɖě ɖɔ dó mǐ wú ǎ, mi kpó Mawu lɔmɔ̌ kpó nyí kúnnuɖetɔ́ énɛ́ tɔn. 11 Mi tuun ganjí ɖɔ mǐ nɔ fɔ́n bo nɔ ɖo wǔsyɛ́n dó lanmɛ nú mi wɛ, ɖo gbɔ dó nú mi wɛ, bo nɔ ɖo wě ɖe xá mi mɛ ɖokpó ɖokpó wɛ lěe tɔ́ ɖé nɔ bló gbɔn nú vǐ tɔn lɛ́ é ɖɔhun, 12 bónú mi ní dó sixú nɔ ɖi zɔnlin lěe é jɛxá Mawu gbɔn é, éyɛ́ wɛ ɖo mi ylɔ́ dó Axɔ́súɖuto tɔn kpó susu tɔn kpó mɛ wɛ.

13 Nǔgbó ɔ, nǔ e wú mǐ nɔ lɛ́ ɖo kú dó nú Mawu wɛ magbokɔ é nɛ́, ɖó hwenu e mi yí xó Mawu tɔn e mi se ɖo nu mǐtɔn é ɔ, mi yí dó yí gbɛtɔ́xó ǎ, loɔ, mi yí dó yí xó Mawu tɔn, lěe é nyí gbɔn nǔgbó é, xó énɛ́ wɛ lɛ́ ɖo azɔ̌ wa ɖo mi mɛ nǔɖitɔ́ lɛ́ mɛ wɛ. 14 Ðó nɔví lɛ́ mi, mi wa nǔ agun Mawu tɔn e ɖo bǔ xá Klísu Jezu bo ɖo Judée lɛ́ é ɖɔhun, ɖó wǔvɛ́ e mi se ɖo to miɖésúnɔ tɔn mɛ nu lɛ́ lɔ mɛ é ɖokpó ɔ wɛ yě lɔmɔ̌ ɖo sise wɛ ɖo Jwifu lɛ́ lɔ mɛ; 15 Jwifu énɛ́ lɛ́ tlɛ hu Aklúnɔ Jezu kpó gbeyíɖɔ lɛ́ kpó, bo lɛ́ dó ya nú mǐ. Gɔ́ ná ɔ, nǔ yětɔn nɔ nyɔ́ Mawu nukúnmɛ ǎ, yě ka nɔ lɛ́ ba ɖagbe mɛ ɖěbǔ tɔn ǎ, 16 ɖó yě tɛ́n kpɔ́n bo ná glɔ́n ali nú mǐ bónú mǐ ní ma ɖɔ xó nú mɛ e ɖo akɔta ɖě lɛ́ mɛ lɛ́ é, bónú mɛ énɛ́ lɛ́ ní dó sixú mɔ hwlɛngán ó. Mɔ̌ mɛ ɔ, yě nɔ ɖo hwɛ hu dó hwɛ jí wɛ hwebǐnu. Amɔ̌, wǎgbɔ tɔn ɔ, xomɛsin Mawu tɔn jɛ te dó yě jí.

17 Nɔví lɛ́ mi, ɖ’ayǐ ɔ, è ɖe mǐ sín gɔ̌n mitɔn nú hwenu kléwún ɖé (é ka nyí mɔ̌ ɖo ayi mǐtɔn mɛ ǎ, gɔ̌n mitɔn jɛ́n mǐ ma ɖe cɔɔ lě ǎ), é ɖo mɔ̌ có, ɖó mǐ ɖó jlǒ syɛ́nsyɛ́n wútu ɔ, mǐ dó gǎn lɛ́ bǐ bo ná mɔ tɛn dó mɔ mi cɔɔ lě.* 18 Ðó hwɛjijɔ énɛ́ wú ɔ, mǐ ba bo ná wá gɔ̌n mitɔn, ɛɛn, nyɛ Pɔ́lu ɔ, é nyí azɔn ɖokpó kpowun wɛ un tɛ́n kpɔ́n bo ná wá ǎ, loɔ, azɔn we; Satáan ka sú ali dó mǐ. 19 Ðó étɛ́ ka nyí nukúnɖíɖó mǐtɔn alǒ awǎjijɛ mǐtɔn, alǒ axɔ́súgbákún e wú xomɛ ná hun mǐ dó é ɖo Aklúnɔ mǐtɔn Jezu nukɔn ɖo fí ɖiɖe tɔn hwenu? Midɛɛ lɛ́ wɛ ǎ cé? 20 É ɖo wɛn ɖɔ mi wɛ nyí susu mǐtɔn kpó awǎjijɛ mǐtɔn kpó.

3 Énɛ́ wú ɔ, ée mǐ ma sɔ́ sixú dɛ ɖ’é nu ɖě ǎ é ɔ, mǐ lin ɖɔ é ná nyɔ́ hú gǎn ɖɔ mǐdɛɛ lɛ́ kɛ́ɖɛ́ ní cí Atɛ́ni; 2 bɔ mǐ sɛ́ Timɔtée e nyí nɔví mǐtɔn bo lɛ́ nyí sinsɛnzɔ́watɔ́* Mawu tɔn, bo nɔ jlá wɛn ɖagbe e kunkplá Klísu é dó, bónú é ní bló bónú mi ní lí dǒ,* bo lɛ́ dó gbɔ nú mi dó bló bónú nǔɖiɖi mitɔn ní lí dǒ, 3 bónú wǔvɛ́ énɛ́ lɛ́ ní ma wá dán mɛ ɖěbǔ ó. Ðó miɖésúnɔ tuun ɖɔ mǐ kún sixú gɔn wǔvɛ́ mɔ̌hun lɛ́ se ó.* 4 Hwenu e mǐ ɖo gɔ̌n mitɔn é ɔ, mǐ nɔ ɖɔ nú mi jɛ nukɔn ɖɔ mǐ ná se wǔvɛ́, bɔ nǔ e ka jɛ é nɛ́, lěe mi tuun gbɔn é. 5 Énɛ́ wɛ zɔ́n bɔ ée un ma sɔ́ sixú dɛ ɖ’é nu ɖě ǎ é ɔ, un sɛ́ mɛ dó bo ná se gbejíninɔ mitɔn sín xó, lobo ná kpɔ́n ɖɔ Mɛtɛ́nkpɔ́ntɔ́ ɔ ko tɛ́n mi kpɔ́n ɖo ali ɖé nu, bɔ azɔ̌ syɛ́nsyɛ́n e mǐ wa é cifo wɛ a jí.

6 Amɔ̌, gɔ̌n mitɔn wɛ Timɔtée gosín bo wá mǐ gɔ́n kɛ́ɖɛ́, bo dó wɛn ɖagbe e kunkplá gbejíninɔ mitɔn kpó wǎnyíyí mitɔn kpó é mǐ; é ɖɔ ɖɔ hwebǐnu wɛ mi nɔ flín mǐ kpó wǎnyíyí kpó, bo ɖo biba wɛ tawun bo ná mɔ mǐ, lěe mǐ lɔ ɖo biba wɛ tawun bo ná mɔ mi gbɔn é. 7 Nɔví lɛ́ mi, énɛ́ wɛ zɔ́n bɔ xó e mǐ se dó mi wú é kpó gbejíninɔ e mi ɖe xlɛ́ é kpó dó gbɔ nú mǐ ɖo aluwɛ* mǐtɔn kpó wǔvɛ́ mǐtɔn kpó bǐ mɛ. 8 Ðó ényí mi ɖo dǒ lí wɛ ɖo Aklúnɔ mɛ ɔ, é nɔ zɔ́n bɔ mǐdɛɛ lɛ́ nɔ vɔ́ hlɔ̌nhlɔ́n mɔ.* 9 Ðó nɛ̌ mǐ ka sixú dó kú nú Mawu dó ta mitɔn mɛ, ɖó awǎjijɛ ɖaxó e é sín mi wú bɔ mǐ ɖó ɖo Mawu nukɔn é wútu gbɔn? 10 Zǎn kéze ɔ, mǐ nɔ sa vo syɛ́nsyɛ́n lěe mǐ kpé wú gbɔn é bo ná dó sixú mɔ mi cɔɔ lě,* lobo sú nǔ e hwedó nǔɖiɖi mitɔn é sín do.

11 Din ɔ, Mawu mǐtɔn e lɛ́ nyí Tɔ́ mǐtɔn é ɖésúnɔ kpó Aklúnɔ mǐtɔn Jezu kpó ní hun ali ɖé nú mǐ, bónú mǐ ná wá gɔ̌n mitɔn. 12 Gɔ́ ná ɔ, Aklúnɔ ní bló bónú wǎnyíyí e mi ɖó nú miɖée lɛ́ kpó mɛ bǐ kpó é ní jɛjí, ɛɛn, é ní túnflá, lěe mǐ ɖó nú mi gbɔn é, 13 bónú é ní dó sixú bló bónú mi ní lí dǒ, bo nyí mɛ mímɛ́ e wú blɔ̌ ɖěbǔ ma ɖe ǎ é, ɖo Mawu mǐtɔn e lɛ́ nyí Tɔ́ mǐtɔn é nukɔn, ɖo fí ɖiɖe Aklúnɔ mǐtɔn Jezu kpó mɛ mímɛ́ tɔn lɛ́ bǐ kpó tɔn hwenu.

4 Bo ná dó fó ɔ, nɔví lɛ́ mi, mǐ ko ɖɔ lěe mi ɖó ná ɖi zɔnlin gbɔn bo ná nyɔ́ ɖo Mawu nukúnmɛ é nú mi, bɔ mi ka ɖo mɔ̌ wa wɛ nǔgbó. Din ɔ, mǐ ɖo wǔsyɛ́n dó lanmɛ nú mi wɛ, bo lɛ́ ɖo byɔ̌byɔ́ mi wɛ ɖo Aklúnɔ Jezu nyíkɔ mɛ ɖɔ mi ní kpo ɖo mɔ̌ wa wɛ mlɛ́mlɛ́ hú gǎn. 2 Ðó mi tuun gbe e mǐ ɖe nú* mi gbɔn Aklúnɔ Jezu gblamɛ lɛ́ é.

3 Ðó jlǒ Mawu tɔn wɛ nyí ɖɔ mi ní nyí mɛ mímɛ́ bo nɔ zɔ nú agalilɛ.* 4 Mi mɛ ɖokpó ɖokpó ɖó ná tuun lěe é ná ɖó acɛ dó agbaza* éɖésúnɔ tɔn jí, lobo hɛn ɖó mǐmɛ́ jí, bo lɛ́ wlí yɛ̌yi ná gbɔn é; 5 mi ɖó ná jó miɖée dó nú jlǒ xóɖóxámɛ tɔn syɛ́nsyɛ́n e jí è ma ɖu ɖe ǎ b’ɛ zɛ kpá é, akɔta e ma tuun Mawu ǎ lɛ́ é ɖɔhun ǎ. 6 Mɛ ɖěbǔ ɖó ná zɛ dogbó e sɔgbe lɛ́ é wú bo táfú nɔví tɔn ɖo xó énɛ́ mɛ ǎ, ɖó Jexóva* nɔ dɔn tó nú mɛ ɖó nǔ énɛ́ lɛ́ bǐ wú, lěe mǐ ko ɖɔ gbɔn nú mi wá yi, bo lɛ́ gb’akpá tɔn nú mi syɛ́nsyɛ́n é. 7 Ðó Mawu ylɔ́ mǐ bónú mǐ ná wa nǔblíblí ǎ, loɔ, bónú mǐ ná wa nǔ mímɛ́. 8 Énɛ́ wú ɔ, mɛ e nɔ dó vɛ̌ nú akpágbanúmɛ énɛ́ lɛ́ é ɔ, gbɛtɔ́ dó vɛ̌ ná wɛ é ɖe ǎ, loɔ, Mawu e ná mi gbigbɔ mímɛ́ tɔn é dó vɛ̌ ná wɛ é ɖe.

9 É ɖo mɔ̌ có, é sɔ́ byɔ́ ɖɔ mǐ ní wlán nǔ sɛ́dó mi dó wǎnyíyí nɔví nɔví tɔn wú ǎ, ɖó Mawu kplɔ́n miɖésúnɔ ɖɔ mi ní yí wǎn nú miɖée lɛ́. 10 Nǔgbó ɔ, nǔ e wa nú nɔví e gbɔn Masedwáni lɛ́ é bǐ wɛ mi ɖe é nɛ́. Amɔ̌, nɔví lɛ́ mi, mǐ byɔ́ mi ɖɔ mi ní nɔ ɖo mɔ̌ wa wɛ bǐ mlɛ́mlɛ́. 11 Mi ní nɔ dó gǎn syɛ́nsyɛ́n bo nɔ zán gbɛ ɖo fífá mɛ, bo nɔ kpé nukún dó nǔ e nyí miɖésúnɔ tɔn lɛ́ é wú, lobo nɔ w’azɔ̌ kpó alɔ mitɔn lɛ́ kpó, lěe mǐ ko ɖe gbe tɔn nú mi gbɔn é, 12 bónú mɛ e ma ɖo agun ɔ mɛ ǎ lɛ́ é ní dó sixú mɔ ɖɔ mi nɔ zán gbɛ mímɛ́, lobonú nǔ ɖěbǔ ní ma lɛ́ hwedó mi ó.

13 Gɔ́ ná ɔ, nɔví lɛ́ mi, mǐ jló ɖɔ mi ní nɔ vi* mɛ dó mɛkúkú lɛ́ xó ɔ wú ǎ, mɔ̌ mɛ ɔ, mi ná nɔ aluwɛ mɛ, mɛ ɖě lɛ́ e ma ɖó nukúnɖíɖó ɖě ǎ é ɖɔhun ǎ. 14 Ðó ényí mǐ ɖi nǔ ɖɔ Jezu kú bo fɔ́n ɔ, mǐ lɛ́ ɖi nǔ ɖɔ Mawu ná fɔ́n mɛ ɖěɖěe kú ɖo bǔ e yě ɖe xá Jezu é mɛ lɛ́ é sín kú xá ɛ. 15 Ðó nǔ e ɖɔ nú mi wɛ mǐ ɖe gbɔn xó Jexóva* tɔn gblamɛ é ɖíe: mǐ mɛ e ná ɖo gbɛ káká jɛ fí ɖiɖe Aklúnɔ tɔn hwenu lɛ́ é ná jɛ nukɔn nú mɛ e kú lɛ́ é ɖo ali ɖěbǔ nu ǎ; 16 ɖó Aklúnɔ ɖésúnɔ ná jɛ te sín jǐxwé, é ná sú xó bo ná ɖe gbe kpó wɛnsagungán ɖé sín gbe kpó, kpódó kpɛn Mawu tɔn kpán, bɔ mɛ ɖěɖěe kú ɖo bǔ e yě ɖe xá Klísu é mɛ lɛ́ é ná fɔ́n jɛ nukɔn. 17 Énɛ́ gúdo ɔ, è ná sɔ́ mǐ mɛ e ná kpo ɖo gbɛ hwenɛ́nu lɛ́ é kpó yě kpó yi akpɔ́kpɔ́ mɛ, bónú mǐ ná yi kpé Aklúnɔ ɖo jɔhɔn mɛ; bɔ mɔ̌ mɛ ɔ, mǐ ná nɔ kpɔ́ xá Aklúnɔ hwebǐnu. 18 Mi ní bo nɔ ɖo gbɔ dó nú miɖée lɛ́ wɛ kpó xó énɛ́ lɛ́ kpó.

5 Din ɔ, nɔví lɛ́ mi, é byɔ́ ɖɔ è ní wlán nǔ sɛ́dó mi dó gan e mɛ nǔ énɛ́ lɛ́ ná jɛ dó é kpó hwenu e yě ná jɛ dó é kpó wú ǎ. 2 Ðó miɖésúnɔ tuun ganjí ɖɔ lěe ajotɔ́ nɔ wá zǎnmɛ gbɔn é ɖɔhun pɛ́ɛ́ wɛ azǎn Jexóva* tɔn jawě. 3 Hwenu e yě ná ɖo ɖiɖɔ wɛ ɖɔ: “Fífá tíin, bɔ ayi j’ayǐ!” é ɔ, kún yětɔn ná sú dó tlóló ɖo ajijimɛ, lěe vǐnú nɔ jɛ xoxónɔ wa jí gbɔn é ɖɔhun, bɔ yě ná sún gló ɖo ali ɖěbǔ nu ǎ. 4 Amɔ̌ nɔví lɛ́, midɛɛ lɛ́ ɔ, mi ɖo ablu mɛ ajotɔ́ lɛ́ ɖɔhun, bónú azǎn ɔ ná wá fyán mi ǎ, 5 ɖó vǐ wěziza tɔn wɛ mi mɛ bǐ nyí, bo lɛ́vɔ́ nyí vǐ kéze tɔn. Mǐ nyí zǎn tɔn ǎ, mǐ ka lɛ́ nyí ablu tɔn ǎ.

6 Hǔn, mi bo nú mǐ ní ma d’amlɔ mɛ ɖě lɛ́ ɖɔhun ó, é nyɔ́ wa ɔ, mi nú mǐ ní nɔ wunzɛn, bo lɛ́ zán nǔwúkpíkpé tamɛ linlin tɔn mǐtɔn. 7 Ðó mɛ ɖěɖěe nɔ d’amlɔ lɛ́ é ɔ, zǎnmɛ wɛ yě nɔ d’amlɔ, bɔ mɛ ɖěɖěe nɔ nu ahan mú lɛ́ é ɔ, zǎnmɛ wɛ yě nɔ nu ahan mú. 8 Amɔ̌, mǐdɛɛ lɛ́ mɛ e nyí kéze tɔn é ɔ, mi nú mǐ ní nɔ zán nǔwúkpíkpé tamɛ linlin tɔn mǐtɔn, bónú nǔɖiɖi kpó wǎnyíyí kpó ní nyí ganwu bónú mǐ ní sɔ́ dó, lobonú nukún e ɖó hwlɛngán wɛ mǐ ɖe é ní nyí gangbákún bónú mǐ ní sɔ́ xwe, 9 ɖó é nyí bo ná dó dɔn tó nú mǐ wú wɛ Mawu sɔ́ mǐ ǎ, loɔ, bónú mǐ ní mɔ hwlɛngán gbɔn Aklúnɔ mǐtɔn Jezu Klísu gblamɛ wú wɛ. 10 É kú dó ta mǐtɔn mɛ bónú mǐ ná nɔ gbɛ xá ɛ, ényí mǐ ná bo ɖo wunzɛn alǒ ɖo amlɔ dɔ́ wɛ* ɔ nɛ́. 11 Énɛ́ wú ɔ, mi ní nɔ ná akɔ́nkpinkpan* miɖée lɛ́, bo nɔ bló bónú mi ní lí dǒ lěe mi ko ɖ’é wú gbɔn é.

12 Din ɔ, nɔví lɛ́ mi, mǐ ɖo byɔ̌byɔ́ mi wɛ ɖɔ mi ní nɔ ɖó sísí nú mɛ ɖěɖěe ɖo azɔ̌ syɛ́nsyɛ́n wa wɛ ɖo tɛ́ntin mitɔn, bo ɖo ali xlɛ́ mi wɛ ɖo Aklúnɔ mɛ, lobo ɖo wě ɖe xá mi wɛ lɛ́ é; 13 mi ní nɔ lɛ́ wlí yɛ̌yi ɖaxó nú yě kpó wǎnyíyí kpó, ɖó azɔ̌ yětɔn wútu. Mi ní nɔ nɔ fífá mɛ xá miɖée lɛ́. 14 Ðo alɔ ɖěvo mɛ ɔ, nɔví lɛ́ mi, mǐ ɖo byɔ̌byɔ́ mi wɛ ɖɔ mi ní nɔ gb’akpá nú* nǔhannyahannyawatɔ́ lɛ́, mi ní nɔ ɖɔ xó dó dó gbɔ nú mɛ e ɖó linkpɔ́n* lɛ́ é, mi ní nɔ d’alɔ mɛ e ma ɖó gǎn ǎ lɛ́ é, bo nɔ ɖó suúlu dó mɛ bǐ wú. 15 Mi ma lɔn bónú mɛ ɖěbǔ ní nɔ sɔ́ nǔ nyanya dó sú nǔ nyanya xɔ́ mɛ ɖěbǔ ó, é nyɔ́ wa ɔ, mi ní nɔ nya nǔ e ná nyí nǔ ɖagbe nú miɖée lɛ́, bo ná lɛ́ nyí nú mɛ ɖěvo lɛ́ bǐ é gbé hwebǐnu.

16 Mi ní nɔ j’awǎ hwebǐnu. 17 Mi ní nɔ xo ɖɛ hwebǐnu. 18 Mi ní nɔ dó kú ɖó nǔ lɛ́ bǐ wú. Nǔ e Mawu jló nú mi ɖo Klísu Jezu mɛ é nɛ́. 19 Mi ma cí myɔ gbigbɔ ɔ tɔn ó. 20 Mi ma nɔ dó vɛ̌ nú nǔɖɔɖayǐ lɛ́ ó. 21 Mi ní nɔ gbéjé nǔ lɛ́ bǐ kpɔ́n; mi ní nɔ tɛ́ dó nǔ e nyí nǔ ɖagbe é wú. 22 Mi ní nɔ nyi alɔ nú nǔnyanyawiwa alɔkpa bǐ.

23 Mawu fífánɔ ɔ ɖésúnɔ ní bló bónú mi ní nyí mɛ mímɛ́ bǐ mlɛ́mlɛ́. Mawu ní nya xɛ ɖo mi mɛ nɔví lɛ́ sín gbigbɔ,* lǐndɔ̌n* kpó agbaza kpó jí bónú blɔ̌ ɖěbǔ ní ma nɔ mi wú ɖo ali ɖěbǔ nu ó, káká jɛ fí ɖiɖe Aklúnɔ mǐtɔn Jezu Klísu tɔn hwenu. 24 Mɛ e ɖo mi ylɔ́ wɛ é ɔ, gbejínɔtɔ́ wɛ n’i, bɔ é ɖo wɛn ɖɔ é ná wa mɔ̌.

25 Nɔví lɛ́ mi, mi ní nɔ ɖo ɖɛ xo dó ta mǐtɔn mɛ wɛ.

26 Mi kí nɔví nɔví sín si nú nɔví lɛ́ bǐ dó dó gbe yě.

27 Un ɖo byɔ̌byɔ́ mi wɛ dó nǔjɔnǔ mɛ gbɔn Aklúnɔ gblamɛ ɖɔ mi ní xa wěmasɛ́dómɛ élɔ́ nú nɔví lɛ́ bǐ.

28 Fɛ́nú Aklúnɔ mǐtɔn Jezu Klísu tɔn ní nɔ kpɔ́ xá mi.