WĚMA E È WLÁN SƐ́DÓ KOLÓSINU LƐ́ É

1 Nyɛ Pɔ́lu e nyí mɛsɛ́dó Klísu Jezu tɔn gbɔn jlǒ Mawu tɔn gblamɛ é kpó nɔví mǐtɔn Timɔtée kpó 2 wɛ ɖo wěma wlán sɛ́dó mɛ mímɛ́ lɛ́ kpó nɔví gbejínɔtɔ́ e ɖo bǔ xá Klísu ɖo Kolósi lɛ́ é kpó wɛ:

Mawu Tɔ́ mǐtɔn ní ná fɛ́nú kpó fífá kpó mi.

3 Mǐ nɔ dó kú nú Mawu, Aklúnɔ mǐtɔn Jezu Klísu sín Tɔ́, hweɖébǔnu e mǐ ɖo ɖɛ xo dó ta mitɔn mɛ wɛ é, 4 ɖó mǐ se nǔɖiɖi e mi ɖó nú Klísu Jezu é kpó wǎnyíyí e mi ɖó nú mɛ mímɛ́ lɛ́ bǐ é kpó sín xó, 5 bɔ nukúnɖíɖó e sɔ́ ɖó te nú mi wɛ è ɖe ɖo jǐxwé é wɛ zɔ́n bɔ mi wa nǔ gbɔn mɔ̌. Mi ko se nukúnɖíɖó énɛ́ sín xó wá yi gbɔn wɛn nǔgbó ɔ tɔn, énɛ́ wɛ nyí wɛn ɖagbe ɔ gblamɛ; 6 wɛn ɖagbe énɛ́ wá gɔ̌n mitɔn. Lěe wɛn ɖagbe ɔ ɖo sínsɛ́n ná wɛ, bo ɖo gbigba kpé gbɛ ɔ bǐ mɛ wɛ gbɔn é ɔ, é lɛ́ ɖo mɔ̌ nyí wɛ ɖo tɛ́ntin mi lɔ tɔn sín hwenu e mi se fɛ́nú Mawu tɔn sín xó, bo lɛ́ ɖó nukúnnúmɔjɛnǔmɛ e sɔgbe é d’é wú nǔgbó nǔgbó é. 7 Kannumɔ hǎtɔ́ vívɛ́ mǐtɔn Epaflási e nyí sinsɛnzɔ́watɔ́ gbejínɔtɔ́ nú Klísu dó ta mǐtɔn mɛ é wɛ ɖɔ xó tɔn nú mi. 8 É lɛ́ ɖɔ lěe mi ɖó wǎnyíyí ɖo gbigbɔ lixo* gbɔn é sín xó nú mǐ.

9 Nǔ e wú, sín gbe e gbe mǐ se mɔ̌ é ɔ, mǐ ma nɔ gɔn ɖɛ xo dó ta mitɔn mɛ gbeɖé ǎ é nɛ́, bo nɔ ɖo byɔ̌byɔ́ Mawu wɛ ɖɔ mi ní tuun nǔ e jlǒ tɔn nyí tawun é mlɛ́mlɛ́, bo ɖó nǔnywɛ́ bǐ kpó nukúnnúmɔjɛnǔmɛ e gbigbɔ mímɛ́ nɔ ná mɛ é kpó. 10 Mɔ̌ mɛ ɔ, mi ná nɔ zán gbɛ lěe é jɛxá Jexóva* gbɔn é bo ná dó nyɔ́ nukún tɔn mɛ bǐ mlɛ́mlɛ́, ée mi ná ɖo sínsɛ́n ná wɛ ɖo nǔɖagbewiwa bǐ mɛ, bo ná lɛ́ ɖo nukɔn yi wɛ ɖo nǔtuuntuun e sɔgbe é bǐ mɛ dó Mawu wú é; 11 mǐ nɔ lɛ́ xo ɖɛ ɖɔ mi ní mɔ hlɔ̌nhlɔ́n bǐ yí sɔgbe xá hlɔ̌nhlɔ́n tɔn susunɔ ɔ, bónú mi ní dó sixú dɛ bǐ mlɛ́mlɛ́ kpó suúlu kpó, kpódó awǎjijɛ kpán, 12 bo ná nɔ dó kú nú Tɔ́ ɔ; é wɛ bló bɔ mi jɛxá bo ná ɖó mǐmá ɖo mɛ mímɛ́ e ɖo wěziza nu lɛ́ é sín gǔ mɛ.

13 É hwlɛ́n mǐ sín zǐnflú sín acɛ mɛ, bo kplá mǐ yi Vǐ vívɛ́ná tɔn sín axɔ́súɖuto mɛ. 14 Vǐ tɔn wɛ zɔ́n bɔ è tún kan mǐ gbɔn gbɛxixɔ ɔ gblamɛ, bo sɔ́ hwɛ mǐtɔn lɛ́ kɛ mǐ. 15 É wɛ nyí akpajlɛ́ Mawu e è ma nɔ mɔ ǎ é tɔn, bo nyí nukɔngbéví ɖo nǔɖíɖó lɛ́ bǐ mɛ; 16 ɖó gbla tɔn mɛ wɛ Mawu dá nǔ ɖě lɛ́ bǐ gbɔn: nǔ e ɖo jǐxwé lɛ́ é kpó nǔ e ɖo ayǐkúngban jí lɛ́ é kpó, nǔ e è nɔ mɔ lɛ́ é kpó nǔ e è ma nɔ mɔ ǎ lɛ́ é kpó, é ná bo nyí axɔ́súzinkpo lɛ́, axɔ́sú lɛ́, acɛkpikpa lɛ́ alǒ gǎn lɛ́ ɔ nɛ́. Gbla tɔn mɛ wɛ è dá nǔ ɖě lɛ́ bǐ gbɔn, bo lɛ́ dá yě n’i. 17 Gɔ́ ná ɔ, é ko tíin jɛ nukɔn nú nǔ ɖě lɛ́ bǐ, bɔ gbla tɔn mɛ wɛ è bló bɔ nǔ ɖě lɛ́ bǐ tíin gbɔn; 18 é wɛ nyí ta nú agbaza ɔ, énɛ́ wɛ nyí agun ɔ. É wɛ nyí bǐbɛ́mɛ ɔ, é wɛ nyí mɛ nukɔntɔn e fɔ́n ɖo mɛkúkú lɛ́ mɛ é, bónú é ná dó sixú húzú mɛ e jɛ nukɔn ɖo nǔ bǐ mɛ é; 19 ɖó é nyɔ́ Mawu nukúnmɛ ɖɔ émí ní bló bónú nǔ lɛ́ bǐ ní nyí nǔ kpíkpé ɖo éyɛ́ mɛ, 20 lobonú gbɔn gbla tɔn mɛ ɔ, émí ní dó hwɛ gbɔ xá nǔ ɖě lɛ́ bǐ, é ná bo nyí nǔ e ɖo ayǐkúngban jí lɛ́ é alǒ nǔ e ɖo jǐxwé lɛ́ é ɔ nɛ́, dó bló bónú fífá ní tíin gbɔn hun e é kɔn nyi ayǐ ɖo yatín* jí é gblamɛ.

21 Nǔgbó ɔ, midɛɛ lɛ́ mɛ e lín dó Mawu tawun ɖ’ayǐ, bo nyí kɛntɔ́ tɔn lɛ́, ɖó linlin mitɔn lɛ́ nɔ ɖo nǔnyanyawiwa jí wútu lɛ́ é ɔ, 22 é dó hwɛ gbɔ xá mi din gbɔn mɛ énɛ́ e sɔ́ agbaza tɔn jó bo kú é gblamɛ, bónú mi ná nyí mɛ mímɛ́, mɛ e wú blɔ̌ ɖěbǔ ma ɖe ǎ é kpó mɛ e è ma sixú dó hwɛ ɖěbǔ ǎ é kpó ɖo nukɔn tɔn. 23 É ɖo mɔ̌ có, mi ní kpo ɖo nǔɖiɖi mɛ, bo lí dǒ ɖo dodónú ɔ jí lobo gbí dɔn; è ní ma sɛ do nú mi sín wɛn ɖagbe énɛ́ e mi se bɔ è jlá nǔɖíɖó e ɖo hwe glɔ́ lɛ́ é bǐ é sín nukúnɖíɖó kɔn ó. Nyɛ Pɔ́lu ɔ, un húzú sinsɛnzɔ́watɔ́ wɛn ɖagbe énɛ́ tɔn.

24 Din ɔ, xomɛ ɖo hunhun mì wɛ ɖó wǔvɛ́ e un se dó ta mitɔn mɛ lɛ́ é wú, bɔ un ɖo wǔvɛ́ e Klísu se bɔ é ma ko kpé agbaza ce mɛ ǎ lɛ́ é se dó agbaza tɔn, éé nyí agun ɔ é tamɛ wɛ. 25 Un húzú sinsɛnzɔ́watɔ́ agun énɛ́ tɔn sɔgbe xá sinsɛnzɔ́ nǔjíkpɔ́ntɔ́ tɔn e Mawu sɔ́ d’así nú mì dó ta mitɔn mɛ é, bo ná dó jlá xó Mawu tɔn bǐ mlɛ́mlɛ́, 26 énɛ́ wɛ nyí nǔbúdo Mawu tɔn e è sɔ́ hwlá dó gbɛ* e wá yi é kpó jijimɛ e wá yi lɛ́ é kpó é. Amɔ̌ din ɔ, è ko ɖe xlɛ́ mɛ mímɛ́ tɔn lɛ́; 27 yědɛɛ lɛ́ wɛ é nyɔ́ Mawu nukúnmɛ ɖɔ émí ní bló bónú yě ní tuun dɔkun susunɔ nǔbúdo énɛ́ tɔn ɖo akɔta lɛ́ mɛ; nǔbúdo énɛ́ wɛ nyí bǔninɔ Klísu tɔn xá mi, énɛ́ wɛ nyí nukúnɖíɖó ɔ bo ná ɖó mǐmá ɖo susu tɔn mɛ. 28 É wɛ nyí mɛ e jlá wɛ mǐ ɖe é, bo ɖo akpá gba nú mɛ bǐ wɛ, lobo nɔ sɔ́ nǔnywɛ́ bǐ dó kplɔ́n nǔ mɛ bǐ, bo ná dó sixú bló bɔ mɛ bǐ ná zin ɖo bǔ e yě ɖe xá Klísu é mɛ, lobo ná dó sixú lɛ́ sɔ́ yě xwlé Mawu. 29 Nǔgbó ɔ, bo ná dó kpé énɛ́ wú ɔ, un nɔ dó gǎn bo nɔ wa azɔ̌ syɛ́nsyɛ́n, gbɔn hlɔ̌nhlɔ́n tɔn e ɖo azɔ̌ wa wɛ ɖo nyɛ mɛ é gblamɛ.

2 Ðó un jló ɖɔ mi ní mɔ nǔ jɛ wú ɖɔ ahwan e syɛ́n tawun é fun dó ta mitɔn mɛ wɛ un ɖe, bo lɛ́ ɖo funfun dó mɛ e ɖo Lawodisée lɛ́ é kpó mɛ e ma mɔ mì* cɔɔ lě ǎ lɛ́ é bǐ kpó tamɛ wɛ. 2 Nǔ nyí mɔ̌, bónú è ní dó sixú dó gbɔ nú yě, lobonú yě ní dó sixú nɔ bǔ ganjí ɖo wǎnyíyí mɛ, bo ná dó sixú lɛ́ ɖó dɔkun e nɔ tɔ́n sín nukúnnúmɔjɛnǔmɛ e wú è sixú gán jɛ mlɛ́mlɛ́ é mɛ lɛ́ é bǐ, lobo ná mɔ tɛn dó tuun nǔ e nǔbúdo Mawu tɔn nyí tawun é, énɛ́ wɛ nyí, Klísu. 3 É mɛ wɛ è xwe sɔ bo hwlá nǔnywɛ́ kpó nǔtuuntuun kpó sín dɔkun lɛ́ bǐ dó. 4 Un ɖo mɔ̌ ɖɔ wɛ bónú mɛ ɖěbǔ ní ma zán xó e nɔ ɖu ɖo mɛ jí lɛ́ é dó flú mi ó. 5 Un ɖo kpɔ́ xá mi cɔɔ lě* ǎ có, un ɖo kpɔ́ xá mi ɖo ayi* mɛ, bɔ tuun e un tuun ɖɔ mi ɖo tuto jí ganjí lobɔ nǔɖiɖi mitɔn lí dǒ ɖo Klísu mɛ é nɔ dó xomɛhunhun nú mì.

6 Énɛ́ wú ɔ, ɖó mi ko yí Klísu Jezu Aklúnɔ ɔ wútu ɔ, mi ní kpo ɖo zɔnlin ɖi wɛ ɖo bǔ e mi ɖe xá ɛ é mɛ; 7 lěe è ko kplɔ́n mi gbɔn é ɔ, mi ní dó ɖɔ do, bo nɔ lɛ́ dó wǔsyɛ́n lanmɛ nú miɖée lɛ́ ɖo éyɛ́ mɛ, mi ní syɛ́nlǐn ɖo nǔɖiɖi mɛ, mi ní nɔ dó kú nú Mawu hwebǐnu.

8 Mi cɔ́ miɖée bónú mɛ ɖěbǔ ní ma sɔ́ tamɛ-núkplɔ́nmɛ lɛ́ kpó mɛblɛ́blɛ́xó vɔ̌tɔ́ lɛ́ kpó dó dó gɛdɛ mi* ó; hwɛndonúwiwa gbɛtɔ́ lɛ́ tɔn lɛ́ kpó nǔ dodónú tɔn gbɛ ɔ tɔn lɛ́ kpó jí wɛ nǔ énɛ́ lɛ́ jínjɔ́n, yě jínjɔ́n Klísu jí ǎ; 9 ɖó éyɛ́ mɛ wɛ jijɔ Mawu tɔn lɛ́ jɛ wě ɖe bǐ mlɛ́mlɛ́. 10 Énɛ́ wú ɔ, mi ɖó nǔ bǐ gbɔn gbla tɔn mɛ; éyɛ́ wɛ nyí ta nú acɛkpikpa bǐ kpó gǎn bǐ kpó. 11 Gbɔn bǔ e mi ɖe xá éyɛ́ é gblamɛ ɔ, è lɛ́ gbo ada nú mi, é ka nyí kpó alɔ gbɛtɔ́ tɔn kpó ǎ, loɔ, è ɖe hwɛhuhu gbaza ɔ síin, énɛ́ wɛ nyí adagbigbo e nyí Klísu tɔn é. 12 Ðó è ɖi mi ɖó kpɔ́ xá ɛ ɖo batɛ́mu tɔn mɛ, bɔ gbɔn bǔ e mi ɖe xá ɛ é gblamɛ ɔ, è lɛ́ fɔ́n mi ɖó kpɔ́ xá ɛ, ɖó nǔ e mi ɖi nú azɔ̌ jí wǔ Mawu e fɔ́n ɛ sín mɛkúkú lɛ́ mɛ é tɔn é wútu.

13 Gɔ́ ná ɔ, mi kú ɖo hwɛ mitɔn lɛ́ mɛ, bo lɛ́ kú ɖo adamagbo sín ninɔmɛ e mɛ agbaza mitɔn ɖe é mɛ có, Mawu fɔ́n mi ɖó kpɔ́ xá ɛ. É sɔ́ hwɛ mǐtɔn lɛ́ bǐ kɛ mǐ kpó xomɛnyínyɔ́ kpó, 14 bo súnsún wěma e è sɔ́ alɔ dó wlán bɔ gbetakɛ́n lɛ́ ɖ’é mɛ, lobɔ é jɛ agɔ dó mǐ é. É xwe wěma ɔ nyi yatín* wú dó sú kún tɔn dó. 15 Gbɔn yatín* ɔ gblamɛ ɔ,* é ɖe mɛ̌ acɛkpikpa lɛ́ kpó gǎn lɛ́ kpó, bo kɔ́n sɛ sín yě jí ɖo agbawungba mɛ e jí è ɖu ɖe lɛ́ é ɖɔhun, lobo ɖo nukɔn nú yě mɛ e ɖu ɖo ahwan jí bo lɛ́ kɔ é ɖɔhun.

16 Énɛ́ wú ɔ, mi ma nú mɛ ɖěbǔ ɖɔ hwɛ xá mi dó nǔ e mi nɔ ɖu é kpó nǔ e mi nɔ nu é kpó wú, alǒ dó xwe ɖé ɖuɖu, alǒ sun wá jǐ sín azǎn ɖé nyinyi, alǒ gbɔjɛzán ɖé nyinyi wú ó. 17 Yɛ nǔ e jawě lɛ́ é tɔn wɛ nǔ énɛ́ lɛ́ nyí, amɔ̌, Klísu wɛ nyí nǔjɔnǔ ɔ. 18 Mi ma nú mɛ e mɛɖéesɔ́hwe mɛblɛ́blɛ́ tɔn kpó wɛnsagun lɛ́ sinsɛn kpó nɔ víví ná é ɖěbǔ ní zɔ́n bónú mi ba ajɔ ɔ kpo ó; mɛ mɔ̌hun “nɔ gán jɛ”* nǔ e é mɔ lɛ́ é wú. Nǔgbó ɔ, lěe é nɔ lin nǔ gbɔn sɔgbe xá hwɛhuhu gbaza é nɔ zɔ́n bɔ é nɔ yí go, é ka nɔ ɖó hwɛjijɔ e sɔgbe é cóbó nɔ wa mɔ̌ ǎ, 19 é nɔ tɛ́ dó ta* ɔ wú gbánwúngbánwún ǎ; ta ɔ wɛ nyí mɛ e gblamɛ agbaza ɔ blěbú nɔ mɔ nǔ e sín hudó é ɖó lɛ́ é bǐ gbɔn é, bɔ gǒflɛ́mɛ lɛ́ kpó kan lɛ́ kpó nɔ hɛn ɛ ɖó bǔ ganjí; é nɔ bló bɔ agbaza ɔ nɔ su lěe Mawu zɔ́n ɖɔ é ní su gbɔn é.

20 Ényí mi kú ɖó kpɔ́ xá Klísu, bɔ mɔ̌ mɛ ɔ, è tún kan nú mi sín nǔ dodónú tɔn gbɛ ɔ tɔn lɛ́ sí ɔ, étɛ́wú mi ka ɖo gbɛ zán wɛ cí nǔ ɖɔ mi kpo ɖo gbɛ ɔ tɔn nyí wɛ ɖɔhun, bo nɔ hwíhwɛ́ miɖée ɖó gbetakɛ́n élɔ́ lɛ́ glɔ́: 21 “Mi ma zé ó, mi ma ɖɔ́ kpɔ́n ó, mi ma ɖ’alɔ wú ó”? 22 Nǔ ɖěɖěe è ɖu alǒ nu ɔ, xó yětɔn nɔ fó lɛ́ é wɛ gbetakɛ́n énɛ́ lɛ́ kan; gbeɖiɖe kpó nǔkplɔ́nmɛ kpó gbɛtɔ́ lɛ́ tɔn lɛ́ wɛ gbetakɛ́n énɛ́ lɛ́ nyí. 23 Nǔ énɛ́ lɛ́ cí nǔnywɛ́ sín nǔ ɖɔhun; mɛ e nɔ wa nǔ énɛ́ lɛ́ é nɔ sɛn Mawu lěe yěɖésúnɔ jló gbɔn é, yě nɔ sɔ́ yěɖée hwe enyíi, bo nɔ dó ya nú agbaza yětɔn syɛ́nsyɛ́n, é ɖo mɔ̌ có, nǔ énɛ́ lɛ́ nyí nǔtí bo ná fun ahwan xá jlǒ agbaza tɔn lɛ́ ǎ.

3 É ɖo mɔ̌ có, ényí è fɔ́n mi sín kú xá Klísu hǔn, mi ní nɔ ɖo nǔ e nyí jǐxwé tɔn lɛ́ é ba wɛ, fínɛ́ wɛ Klísu jínjɔ́n ɖisíxwé nú Mawu ɖe. 2 Mi ní nɔ sɔ́ ayi mitɔn ɖó nǔ e ɖo jǐxwé lɛ́ é jí hwebǐnu, ní ma nyí ɖó nǔ e ɖo ayǐkúngban jí lɛ́ é jí ó. 3 Ðó mi kú, bɔ è sɔ́ gbɛ mitɔn hwlá xá Klísu e ɖo bǔ xá Mawu é. 4 Hwenu e è ná ɖe Klísu e nyí gbɛ mǐtɔn é xlɛ́ é ɔ, è ná ɖe mi lɔ xlɛ́ ɖó kpɔ́ xá ɛ, bɔ mi ná ɖó mǐmá ɖo susu tɔn mɛ.

5 Énɛ́ wú ɔ, mi sú kún dó nú wǔjɔnú agbaza tɔn mitɔn sín jlǒ lɛ́, yě wɛ nyí agalilɛ,* nǔblíblíwiwa, jlǒ xóɖóxámɛ tɔn syɛ́nsyɛ́n e jí è ma ɖu ɖe ǎ é, jlǒ nyanya lɛ́, nukúnkɛndídó; nukúnkɛndídó ɔ cí bǒcyɔsinsɛn ɖɔhun. 6 Nǔ énɛ́ lɛ́ wú wɛ xomɛsin Mawu tɔn jawě. 7 Mi lɔmɔ̌ ɔ, lěe miɖésúnɔ nɔ zán gbɛ* gbɔn ɖ’ayǐ é nɛ́. 8 Amɔ̌ din ɔ, mi ɖó ná jó nǔ élɔ́ lɛ́ bǐ dó: xomɛsin, majijɛ, nǔnyanyawiwa, mɛzunzun kpó xó gblégblé lɛ́ ɖiɖɔ kpó. 9 Mi ma nɔ ɖó adingban nú miɖée lɛ́ ó. Mi ɖe gbɛtɔ́ xóxó ɔ kpó nǔwalɔ tɔn lɛ́ kpó nyi ayǐ, 10 bo sɔ́ gbɛtɔ́ yɔ̌yɔ́ ɔ dó, gbɛtɔ́ yɔ̌yɔ́ énɛ́ nɔ ɖo yɔ̌yɔ́ húzú wɛ sɔgbe xá akpajlɛ́ Mɛ e dá ɛ é tɔn, gbɔn nǔtuuntuun e sɔgbe é gblamɛ. 11 Ðo fí ɔ, Glɛ̌kinu ɖě sɔ́ ɖe ǎ, Jwifu ɖě sɔ́ ɖe ǎ, mɛ e gbo ada é ɖě sɔ́ ɖe ǎ, mɛ e ma gbo ada ǎ é ɖě sɔ́ ɖe ǎ, toɖévomɛnu ɖě sɔ́ ɖe ǎ, Síitu* ɖě sɔ́ ɖe ǎ, kannumɔ ɖě sɔ́ ɖe ǎ, mɛ e ɖo éɖée sí é ɖě sɔ́ ɖe ǎ; amɔ̌, Klísu wɛ nyí nǔ bǐ bo ɖo mɛ bǐ mɛ.

12 Énɛ́ wú ɔ, ɖó mi nyí mɛ e Mawu sɔ́ lɛ́ é, mɛ mímɛ́ lɛ́ kpó mɛ e é yí wǎn ná lɛ́ é kpó wútu ɔ, mi ní sɔ́ wǔvɛ́sexámɛ e gɔ́ngɔ́n é, xomɛnyínyɔ́, mɛɖéesɔ́hwe, xomɛfífá kpó suúlu kpó dó awu ɖɔhun. 13 Mi ní nɔ mɔ miɖée gbɔ, bo nɔ sɔ́ hwɛ kɛ miɖée lɛ́ faa, ényí mɛ ɖěbǔ tlɛ ɖó hwɛjijɔ e wú é ná dó hwɛ mɛ ɖěvo é ɔ nɛ́. Lěe Jexóva* sɔ́ hwɛ kɛ mi faa gbɔn é ɔ, mi lɔ ɖó ná wa nǔ ɖokpó ɔ. 14 Amɔ̌, gɔ́ nú nǔ énɛ́ lɛ́ bǐ ɔ, mi ní sɔ́ wǎnyíyí dó awu ɖɔhun, ɖó wǎnyíyí nɔ dɔn mɛ lɛ́ bǐ ɖó bǔ ganjí.

15 Gɔ́ ná ɔ, mi nú fífá Klísu tɔn ní kpa acɛ ɖo ayi mitɔn mɛ,* ɖó fífá énɛ́ kɔn wɛ è ylɔ́ mi dó, bónú mi ná nyí agbaza ɖokpó. Mi ní nɔ ɖe nǔsumɛnukúnmɛ xlɛ́. 16 Mi nú xó Klísu tɔn ní nɔ mi mɛ bo túnflá, bo bló bónú mi ní nyɔ́nǔi. Mi ní nɔ ɖo nǔ kplɔ́n miɖée lɛ́ wɛ, bo nɔ ɖo wǔsyɛ́n dó lanmɛ nú* miɖée lɛ́ wɛ gbɔn ɖɛhan lɛ́, susu kpikpa nú Mawu kpó han gbigbɔ tɔn e è ji kpó nǔsumɛnukúnmɛ* kpó lɛ́ é kpó gblamɛ; mi ní nɔ ji han nú Jexóva* ɖo ayi mitɔn mɛ.* 17 Nǔ ɖěbǔ e mi ɖo ɖiɖɔ wɛ alǒ ɖo wiwa wɛ é ɔ, mi ní nɔ wa nǔ bǐ ɖo Aklúnɔ Jezu nyíkɔ mɛ; mi ní nɔ dó kú nú Mawu Tɔ́ ɔ gbɔn jǐ tɔn.

18 Asi lɛ́ mi, mi ní nɔ hwíhwɛ́ miɖée dó asú mitɔn lɛ́ glɔ́, lěe é jɛxá gbɔn ɖo Aklúnɔ mɛ é. 19 Asú lɛ́ mi, mi ní nɔ ɖo wǎn yí nú asi mitɔn lɛ́ wɛ, bo ma nɔ sin xomɛ dó yě syɛ́nsyɛ́n* ó. 20 Vǐ lɛ́ mi, mi ní nɔ se tónú nú mɛjitɔ́ mitɔn lɛ́ ɖo nǔ lɛ́ bǐ mɛ, ɖó nǔ énɛ́ nɔ nyɔ́ Aklúnɔ nukúnmɛ tawun. 21 Tɔ́ lɛ́ mi, mi ma nɔ dó xomɛsin* nú vǐ mitɔn lɛ́ ó, énɛ́ ɔ, awakanmɛ ná kú yě ǎ. 22 Kannumɔ lɛ́ mi, mi ní nɔ se tónú nú mɛ e nyí gǎn mitɔn ɖo ayǐkúngban jí lɛ́ é ɖo nǔ bǐ mɛ; é ní ma nyí hwenu e yě ɖo mi kpɔ́n wɛ é kɛ́ɖɛ́ wɛ mi ná wa mɔ̌ bá dó nyɔ́ gbɛtɔ́ nukúnmɛ kpowun ó, loɔ, mi ní nɔ wa mɔ̌ kpó ayi bǐ kpó, kpó sísí e gɔ́ngɔ́n é ɖíɖó nú Jexóva* kpó. 23 Nǔ ɖěbǔ e wa wɛ mi ɖe é ɔ, mi ní nɔ wa kpó lǐndɔ̌n* mitɔn bǐ kpó Jexóva* wa ná wɛ mi ɖe ɖɔhun, é nyí nú gbɛtɔ́ lɛ́ ǎ, 24 ɖó mi tuun ɖɔ Jexóva* wɛ ɖo gǔ ɔ ná ná mi wɛ, bɔ é ná nyí ajɔ ɖé nú mi. Mi ní wa azɔ̌ nú Gǎn ɔ kannumɔ ɖɔhun, é wɛ nyí Klísu. 25 É ɖo wɛn ɖɔ mɛ e wa nǔ nyanya é ɔ, è ná sú nǔ nyanya e é wa é sín axɔ́ ɛ, è ka ná ɖe mɛɖé ɖó vo ɖo mɛɖé mɛ ǎ.

4 Gǎn lɛ́ mi, mi ní nɔ wa nǔ xá kannumɔ mitɔn lɛ́ ɖo ali e jlɔ́ bo sɔgbe é nu, bo tuun ɖɔ émí lɔmɔ̌ ɖó Gǎn ɖokpó ɖo jǐxwé.

2 Mi ní nɔ ɖó kan dó ɖɛxixo wú; ée mi ná ɖo mɔ̌ wa wɛ é ɔ, mi nɔ wunzɛn, bo nɔ dó kú nú Mawu. 3 Ðo hwe ɖokpó ɔ nu ɔ, mi ní nɔ lɛ́ xo ɖɛ dó ta mǐtɔn mɛ ɖɔ Mawu ní hun hɔn ɖé nú xó ɔ, bónú mǐ ní dó sixú jlá nǔbúdo Mawu tɔn e kunkplá Klísu é; nǔbúdo énɛ́ wú wɛ un ɖo wlɔ mɛ ɖo gankpá mɛ. 4 Mi nɔ xo ɖɛ bónú má dó sixú jlá nǔbúdo énɛ́ céɖécéɖé tɔn lěe un ɖó ná jlá gbɔn é.

5 Mi ní nɔ zán gbɛ kpó nǔnywɛ́ kpó xá mɛ e ma ɖo agun ɔ mɛ ǎ lɛ́ é, bo nɔ zán hwenu mitɔn ganjí.* 6 Mi nú xó mitɔn lɛ́ ní nɔ nyɔ́ se hwebǐnu, bónú jɛ ní nɔ kpé, énɛ́ ɔ, mi ná tuun lěe mi ɖó ná nɔ ná xósin mɛ ɖokpó ɖokpó gbɔn é.

7 Ticíku e nyí nɔví ce vívɛ́ná, bo nyí sinsɛnzɔ́watɔ́ gbejínɔtɔ́, lobo lɛ́ nyí kannumɔ hǎtɔ́ ce ɖo Aklúnɔ mɛ é ná ɖɔ lěe un ɖe gbɔn é bǐ nú mi. 8 Un ɖo sísɛ́ ɛ dó mi wɛ bónú mi ná tuun lěe mǐ ɖe gbɔn é, lobonú é ní dó sixú lɛ́ dó gbɔ nú mi. 9 Nɔví ce vívɛ́ná Onɛzímu gbejínɔtɔ́ ɔ, éé gosín gɔ̌n mitɔn é kpó é kpó wɛ jawě; yě ná ɖɔ nǔ e ɖo jijɛ wɛ ɖo fí lɛ́ é bǐ nú mi.

10 Alisitáki e nyí gantɔ́ hǎtɔ́ ce é dó gbe sɛ́dó mi; Maki e nyí hɛ̌nnumɔ* Baanabási tɔn é lɔmɔ̌ dó gbe sɛ́dó mi. (É wɛ mǐ ɖe gbe ɖɔ ényí é wá mi gɔ́n hǔn, mi ní yí i.) 11 Jezu e è nɔ ylɔ́ ɖɔ Jusitúsi é lɔ dó gbe sɛ́dó mi. Mɛ énɛ́ lɛ́ ɖo mɛ e gbo ada lɛ́ é mɛ. Mɛ énɛ́ lɛ́ kɛ́ɖɛ́ wɛ nyí azɔ̌gbɛ́ ce lɛ́ dó Axɔ́súɖuto Mawu tɔn tamɛ, bɔ yě húzú jɔtɛn gbɔdónúmɛ tɔn ɖaxó ɖé* nú mì. 12 Epaflási e nyí kannumɔ Klísu Jezu tɔn bo gosín gɔ̌n mitɔn é dó gbe sɛ́dó mi. É nɔ xo ɖɛ vívɛ́ dó ta mitɔn mɛ hwebǐnu, bónú ɖo vivɔnu ɔ, mi ní dó sixú nɔ bǔte, bo lɛ́ kú dó jlǒ Mawu tɔn jí bǐ mlɛ́mlɛ́. 13 Ðó un ɖe kúnnu n’i ɖɔ é nɔ dó gǎn syɛ́nsyɛ́n dó ta mitɔn mɛ, bo nɔ lɛ́ wa mɔ̌ dó mɛ ɖěɖěe ɖo Lawodisée kpó Iyelapolísi kpó lɛ́ é tamɛ.

14 Dotóo vívɛ́ná Luki dó gbe sɛ́dó mi; Demási lɔmɔ̌. 15 Mi dó gbe nɔví e ɖo Lawodisée lɛ́ é nú mì, bo lɛ́ dó gbe nɔví nyɔ̌nu Nɛfáa kpó agun e nɔ kplé ɖo xwé tɔn gbe é kpó nú mì. 16 Ényí è xa wěmasɛ́dómɛ élɔ́ ɖo gɔ̌n mitɔn gúdo hǔn, mi bló tuto bónú è ní lɛ́ xa ɖo agun Lawodiséenu lɛ́ tɔn mɛ, lobonú mi lɔ ní xa éé gosín Lawodisée é. 17 Gɔ́ ná ɔ, mi ɖɔ nú Aacípu ɖɔ: “Hɛn ayi dó sinsɛnzɔ́ e Aklúnɔ sɔ́ dó así nú we é wú, bo ná dó sixú wa yi fó.”

18 Nyɛ Pɔ́lu lɔ dó gbe sɛ́dó mi, alɔ nyiɖésúnɔ tɔn wɛ un sɔ́ dó wlán ná. Mi ní hɛn dó ayi mɛ ɖɔ un ɖo wlɔ mɛ ɖo gankpá mɛ. Fɛ́nú Mawu tɔn ní nɔ kpɔ́ xá mi.