XABAKÚKU
1 Xó e è ɖɔ nú gbeyíɖɔ Xabakúku* ɖo nǔmimɔ ɖé mɛ é:
2 Jexóva è, káká jɛ hwetɛ́nu wɛ un ná sú xó bo byɔ́ alɔdó, bɔ a ma ka ná ɖótó mì ǎ yi jɛ?
Káká jɛ hwetɛ́nu wɛ un ná byɔ́ we ɖɔ a ní xɔ mì ɖo dǎkaxixo sí, bɔ a ma ka ná kɛ nu d’é mɛ* ǎ yi jɛ?
3 Étɛ́wú a ka yí gbe bɔ un ɖo nǔnyanyawiwa mɔ wɛ?
Étɛ́wú a ka yí gbe bɔ è nɔ ɖo acɛ gannaganna kpa nú mɛ wɛ?
Étɛ́wú nǔhɛngblé kpó dǎkaxixo kpó ka lɛ́ lɛ̌ dó mì?
Étɛ́wú jlɛ kpó hwɛgbe kpó ka sukpɔ́ sɔmɔ̌?
4 Sɛ́n sɔ́ ɖó hlɔ̌nhlɔ́n ǎ,
bɔ è nɔ ɖɔ hwɛ jlɔ́jlɔ́ gbeɖé ǎ.
Mɛ nyanya lɛ́ nɔ gb’acɛ nǔjlɔ́jlɔ́watɔ́ lɛ́ wú;
énɛ́ wú wɛ hwɛ jlɔ́jlɔ́ ɖiɖɔ hán.
5 “Mi kpɔ́n akɔta lɛ́ bo ɖ’ayi nǔ e ɖo jijɛ wɛ é wú!
Mi hun nu ɖó nuvo, bónú nǔ yětɔn ní kpácá mi;
ɖó nǔɖé ná jɛ ɖo hwe mitɔn nu,
bɔ nú è na bo tlɛ ɖɔ nú mi ɔ, mi ná ɖi ǎ.
6 Éɖíe! Un ná sɛ́ Kaludéenu lɛ́,
akɔta alǎnnúwatɔ́ e ma nɔ kú nǔbláwǔ nú mɛ ǎ é dó.
Yě nɔ vun blá ayǐkúngban gěgé,
bo nɔ klá jɛ xwé e ma nyí yětɔn ǎ lɛ́ é nu.
7 Yě dó xɛsi tawun, bɔ mɛ lɛ́ nɔ ɖi xɛsi nú yě.
Yě nɔ ɖó hwɛjijɔ kpó acɛkpikpa* kpó yěɖésúnɔ tɔn ayǐ.
8 Sɔ́ yětɔn lɛ́ yá afɔ hú kpɔ lɛ́,
bɔ adǎn e yě nɔ wa lɛ́ é hú gǎn ée hla lɛ́ nɔ wa ɖo zǎnmɛ é.
Ahwansɔ́ yětɔn lɛ́ sín afɔ lɛ́ nɔ ba kɔ́ kpo hwenu e yě ɖo yiyi wɛ é;
fí línlín tawun wɛ sɔ́ yětɔn lɛ́ gosín.
Yě nɔ zɔn wá do, lěe hɔ̌n nɔ yá wǔ zɔn nǔ e wlí ɖu gbé é ja é jí gbɔn é ɖɔhun.
9 Dǎkaxixo wú wɛ yě mɛ bǐ wá.
Ényí è xo nukúnmɛ yětɔn lɛ́ kplé ɔ, yě cí jɔhɔn zǎnzǎnhwe jí tɔn ɖɔhun,
bɔ yě nɔ xo ahwankannumɔ lɛ́ kplé nyɛ̌kɛ́n ɖɔhun.
10 Yě nɔ cá axɔ́sú lɛ́ ko,
bo nɔ ko axɔ́súzɔ́watɔ́ nukúnɖéjí lɛ́.
Yě nɔ ko fí e è mɛ ahohó lɛ́ lɛ̌ dó lɛ́ é bǐ;
yě nɔ kplé kɔ́ yi jǐ, bo nɔ yí yě.
11 Énɛ́ gúdo ɔ, yě nɔ ɖidó jɔhɔn ɖɔhun bo nɔ gbɔn to ɔ mɛ dín,
amɔ̌, yě ná kú hwɛ,
ɖó yě nɔ sɔ́ hlɔ̌nhlɔ́n yětɔn sín susu jó nú nǔmɛsɛn yětɔn.”*
12 Jexóva è, a ko tíin sín hwenu mavɔmavɔ ɖíe ǎ cé?
Mawu ce, Mɛ mímɛ́ ce, a nɔ kú ǎ.*
Jexóva è, a sɔ́ yě bo ná ɖó hwɛ nú yě;
Só ce, a sɔ́ yě bo ná dɔn tó nú* yě.
13 Nukún towe lɛ́ mɛ́ dín bo ná kpɔ́n nǔ nyanya,
bɔ a sixú yí gbe nú nǔnyanyawiwa ǎ.
Énɛ́ wú ɔ, étɛ́wú a ka yí gbe bɔ mɛblɛ́tɔ́ lɛ́ tíin,
bo nɔ tin hwenu e mɛ nyanya sɔ́ mɛ e nyí nǔjlɔ́jlɔ́watɔ́ hú i é mì é?
14 Étɛ́wú a ka yí gbe bɔ è nɔ wa nǔ xá gbɛtɔ́ xumɛhweví lɛ́ ɖɔhun,
xumɛkanlin ɖěɖěe gǎn ɖě ma ɖo nu yětɔn ǎ é ɖɔhun?
15 É* nɔ wlí mɛ énɛ́ lɛ́ bǐ kpó mlɛ kpó.
É nɔ wlí yě dó ɖɔgbó tɔn mɛ,
bo nɔ xo yě kplé dó ɖɔ tɔn mɛ.
Énɛ́ wɛ zɔ́n bɔ xomɛ nɔ hun i tawun.
16 Énɛ́ wú wɛ é nɔ xwlé vɔ̌sánú ɖɔgbó tɔn,
bo nɔ sá vɔ̌* nú ɖɔ tɔn;
ɖó é sín yě wú bɔ mǐmá tɔn dó jǒ,*
lobɔ nǔɖuɖu tɔn nyí bǔnɔ.
17 Énɛ́ wú ɔ, é ná kpo ɖo ɖɔgbó tɔn nyi wɛ, lobo ná kpo ɖo hǔzúhúzú i wɛ wɛ a?*
É ná kpo ɖo akɔta lɛ́ hu tɛ́ wɛ, ma kú nǔbláwǔ nú mɛ wɛ a?
2 Un ná nɔ te ɖo mɛcɔ́tɔ́ sín nɔtɛn ce,
un ná nɔ te ɖo ahohó ɔ jí.
Un ná nɔ te* bo kpɔ́n xó e é* ná ɖɔ gbɔn jǐ ce é
kpó xósin e un ná ná hwenu e è ná gbɛ́ nǔ nú mì é kpó.
2 Énɛ́ gúdo ɔ, Jexóva ɖɔ nú mì ɖɔ:
“Wlǎn nǔmimɔ ɔ ɖ’ayǐ, wlǎn nú é ní za wě ganjí dó awǐnnyatɛ lɛ́ jí,
mɔ̌ mɛ ɔ, xixa tɔn ná bɔ wǔ* nú mɛ e ná xa dó jǐ é.
3 Ðó hwenu e è ɖó bɔ nǔmimɔ ɔ ná jɛnu dó é ko su ǎ,
amɔ̌, hwenu e é ná jɛnu dó é* ɖo wǐwá wɛ wunnáwúnná; é ná gblá ǎ.
Ényí é tlɛ lín hǔn,* kpo ɖo nukúnɖíɖó mɛ!*
Ðó é ná jɛnu jɛ́n wɛ.
É ná gbɔ hwenu ǎ!
Loɔ, nǔjlɔ́jlɔ́watɔ́ ná nɔ gbɛ gbɔn gbejíninɔ* tɔn gblamɛ.
5 Nǔgbó ɔ, ɖó vɛ̌ɛn nɔ flú mɛ wútu ɔ,
mɛ e nɔ yí go é ná kpé nǔ e gbé nya wɛ é ɖe é wú ǎ.
É nɔ ɖo akɔta lɛ́ bǐ xo kplé wɛ,
bo nɔ ɖo togun lɛ́ bǐ xo kplé nú éɖée wɛ.
6 Mɛ énɛ́ lɛ́ bǐ ma ná dó lǒ dó wǔ tɔn, nyi mǎ ɛ, bo lɛ́ zán nǔbasɔ́ lɛ́ dó cá ɛ ko ǎ cé?
Yě ná ɖɔ:
‘Heelú mɛ e nɔ xo nǔ e ma nyí étɔn ǎ lɛ́ é kplé,
bo tlɛ nɔ lɛ́ ɖo axɔ́ ɖu dó axɔ́ jí wɛ é!
Káká jɛ hwetɛ́nu?
7 Mɛ e a ɖu axɔ́ dó lɛ́ é ná sí te dó jǐ towe ajijimɛ.
Yě ná fɔ́n, bo ná húnhún we syɛ́nsyɛ́n,
lobo ná vɔ we.
8 Mɛ e kpo ɖo togun lɛ́ mɛ lɛ́ é bǐ ná vɔ we,
ɖó a vɔ akɔta gěgé,
ɖó a kɔn gbɛtɔ́ hun kɔn nyi ayǐ,
bo lɛ́ xo dǎka ayǐkúngban ɔ,
toxo lɛ́ kpó mɛ e nɔ nɔ yě mɛ lɛ́ é kpó wú wútu.
9 Heelú mɛ e nɔ wa nǔ nyanya bo nɔ mɔ akwɛ́ dó xwédo* tɔn tamɛ,
bo ná dó sɔ́ adɔ̌tɛn tɔn yi jǐ,
lobo xo gló awěxomɛ é!
10 Gbě e a blá lɛ́ é dɔn winnyá wá xwédo* towe jí.
A hu hwɛ dó hwiɖée* gbɔn kún súsú dó nú togun gěgé gblamɛ.
11 Awǐnnya ɖé ná sú xó sín dǒ mɛ,
bɔ atínkpo ɖé ná yí gbe n’i ɖo xɔtín lɛ́ mɛ.
12 Heelú mɛ e nɔ kɔn hun kɔn nyi ayǐ dó gbá toxo,
bo nɔ ɖó toxo ayǐ gbɔn nǔagɔwiwa gblamɛ é!
13 Éɖíe! É ma nyí Jexóva ahwankpá lɛ́ tɔn wɛ zɔ́n bɔ togun lɛ́ nɔ w’azɔ̌ syɛ́nsyɛ́n dó nǔ ɖěɖěe sín xó ná fó ɖo myɔ mɛ lɛ́ é tamɛ,
bɔ akɔta lɛ́ nɔ dó ya nú yěɖée dó wǔvɔ́ ǎ cé?
14 Ðó susu Jexóva tɔn tuuntuun ná gɔ́ ayǐkúngban ɔ jí,
lěe sin cyɔ́n xuzan jí gbɔn é ɖɔhun.
15 Heelú mɛ e nɔ ná nǔɖé hǎgbɛ́ tɔn lɛ́ ɖɔ yě ní nu,
bo ka nɔ sɔ́ majijɛ kpó xomɛsin kpó gɔ́ ná, bónú yě ná mú,
bɔ mɔ̌ mɛ ɔ, é ná kpɔ́n mɛ̌ yětɔn é!
16 Winnyá gɔtii wɛ a ná ɖu, é nyí susu wɛ a ná xɔ ǎ.
Hwi lɔ ní nu, bo ɖe ninɔmɛ adamagbo tɔn towe xlɛ́.*
Kɔ́fu e ɖo ɖisílɔ Jexóva tɔn mɛ é ná wá gɔ̌n towe,
bɔ winnyá ná cyɔ́n susu towe jí;
17 dǎka e a xo Libáan wú é ná cyɔ́n jǐ towe,
bɔ kúnsúdónúnǔ e dó xɛsi kanlin lɛ́ é ná wá jǐ towe,
ɖó a kɔn gbɛtɔ́ hun kɔn nyi ayǐ,
bo lɛ́ xo dǎka ayǐkúngban ɔ,
toxo lɛ́ kpó mɛ e nɔ nɔ yě mɛ lɛ́ é kpó wú wútu.
18 Ényí bǒcyɔkpatɔ́ ɖé kpa bǒcyɔ ɔ,
le tɛ́ bǒcyɔ kpikpa ɔ ka ná hɛn wá?
Ényí mɛ e bló ganbócyɔ* kpó nǔ e nɔ kplɔ́n adingbannú mɛ é kpó é,
na bo tlɛ nɔ ɖeji dó yě wú gbɔn ɖěbǔ ɔ,
le tɛ́ é ka ná mɔ ɖ’é mɛ? Nǔmɛsɛn maɖótaɖé e ma nɔ sixú ɖɔ xó ǎ lɛ́ é wɛ nǔ e é nɔ bló lɛ́ é nyí.
19 Heelú mɛ e nɔ ɖɔ nú kpoví ɖé ɖɔ: “Fɔ́n!”
alǒ, nɔ ɖɔ nú awǐnnya e ma nɔ ɖɔ xó ǎ é ɖɔ: “Fɔ́n! Kplɔ́n nǔ mǐ!” é!
Éɖíe! Siká kpó kpatágan kpó wɛ è kɔn dó yě,
bɔ funfún ɖě ɖo yě mɛ ǎ.
20 Amɔ̌, Jexóva ɖo sinsɛnxɔ mímɛ́ tɔn mɛ.
Ayǐkúngban ɔ bǐ ní cí xwíí ɖo nukɔn tɔn!’”
3 Ðɛ e gbeyíɖɔ Xabakúku xo dó gbɛvíhan* mɛ é:
2 Jexóva è, un se gbe e è ɖó dó wǔtu towe é.
Jexóva è, azɔ̌ towe nɔ jí wǔ nú mì.
Lɛ̌ vɔ́ wa ɖo xwe lɛ́ vlamɛ!*
Blǒ bónú è ní tuun ɖo xwe lɛ́ vlamɛ.*
Kɛnklɛ́n flín bo kú nǔbláwǔ nú mɛ ɖo hunnyahunnya ɔ hwenu.
3 Mawu gosín Temáni wá,
Mɛ mímɛ́ ɔ gosín Paláni só jí. (Séla)*
Yɛ̌yi tɔn cyɔ́n jǐnukúnsin;
susu tɔn kpé ayǐkúngban ɔ jí.
4 É nɔ kɔ́n wěziza ɖɔhun.
Gǎ wěziza tɔn we tá sín alɔ tɔn mɛ,
fí e hlɔ̌nhlɔ́n tɔn hwlá cí é.
5 É sɛ́ jɛmɛjí dó mɛ e ɖo nukɔn n’i lɛ́ é,
bɔ mɛ e ɖo gǔdo tɔn lɛ́ é ɖó zozo syɛ́nsyɛ́n.
6 É nɔ te bo bló bɔ ayǐkúngban ɔ húnhún.
É kpɔ́n akɔta lɛ́ azɔn ɖokpó kpowun, bo bló bɔ xɛsi jɛ yě jí.
Só ɖaxó mavɔmavɔ lɛ́ gba hánnyá,
bɔ só kpɛví e ko tíin sín hwenu línlín ɖíe lɛ́ é nya.
Ali e é mlɛ́ lɛ́ é ɔ, ali xóxó lɛ́ wɛ.
7 Un mɔ awě ɖo goxɔ Kucáni tɔn lɛ́ mɛ.
Avɔ e ɖo Madiyáni to ɔ sín goxɔ wú lɛ́ é sísɔ́.
8 Jexóva è, tɔsisa lɛ́,
ɛɛn, tɔsisa lɛ́ wɛ a ɖo xomɛ sin dó wɛ syɛ́nsyɛ́n a?
Alǒ xu jí wɛ a jɛ ma dó a?
Ðó a xá sɔ́ towe lɛ́;
ahwankɛkɛ́ towe lɛ́ ɖu ɖ’é jí.*
9 È ɖe daswé* towe jɛ wěxo bɔ é ɖo gbesisɔmɛ.
È ɖe azɔ̌ nú kpo lɛ́* bo xwlé nǔ d’é jí.* (Séla)
A zán tɔsisa lɛ́ dó má ayǐkúngban ɔ.
10 Ée só lɛ́ mɔ we é ɔ, yě xo kúsukpɔ ɖó wǔvɛ́ wú.
Jǐ ɖaxó ja bo kplɔ́ nǔ.
Sin dó gbe sín azan tɔn jí.
É xo yi aga tawun.
11 Hwesivɔ́ kpó sun kpó cí nɔtɛn yětɔn ɖɛkpɛ ɖɛkpɛ lɛ́ ɖo aga.
Gǎ towe lɛ́ tɔ́n wěziza ɖɔhun.
Hwǎn towe nɔ kɔ́n jǐkɛwun ɖɔhun.
12 A ɖi zɔnlin gbɔn ayǐkúngban ɔ jí kpó xomɛsin kpó.
A ɖo xomɛsin jí bo sɔ́ afɔ dó gbídí* akɔta lɛ́.
13 A tɔ́n bo ná hwlɛ́n togun towe gán, bo ná hwlɛ́n mɛ e a sɔ́ é.
A nyínyɛ́ gǎn* e ɖo mɛ nyanya ɔ sín xwégbe é.
È sú kún dó n’i sín dodónu tɔn káká yi aga.* (Séla)
14 A tɔ́n ahwanfuntɔ́ tɔn lɛ́ sín ta kpó ahwanfunnú* éɖésúnɔ tɔn lɛ́ kpó,
hwenu e yě nyi ahwan bo ná gba mì dó é.
Xomɛ hun yě tawun, bɔ yě ná vún mɛ e ɖo wǔvɛ́ se wɛ é ɖu ɖo nǔglɔ́.
15 A gbɔn xu mɛ kpó sɔ́ towe lɛ́ kpó,
ɛɛn, a gbɔn sin e sukpɔ́ tawun lɛ́ é sín aslɔkɛ́ mɛ.
Xú ce lɛ́ jɛ gǎn ba kpo jí;
afɔ ce lɛ́ jɛ sísɔ́sísɔ́ jí.
Amɔ̌, un ná nɔ xwíí bo nɔ te kpɔ́n adǎngbomɛzángbe ɔ,
ɖó é ná wá togun e ɖo ahwan tɔ́n mǐ wɛ é jí.
17 Ényí fígitín ná bo ma gba sɛ́ ǎ,
bɔ vǐwuntín ma ná sínsɛ́n ɖěbǔ ǎ ɔ;
ényí è na bo ma mɔ olívu gbɛ ǎ,
bɔ gle lɛ́ ma ná nǔɖuɖu ǎ ɔ;
ényí kanlinhwan ná bo bú sín kpó mɛ,
bɔ nyibú ɖě ma sɔ́ ɖo kpó mɛ ǎ ɔ;
18 nyɛ ɔ, un ná j’awǎ ɖo Jexóva mɛ;
xomɛ ná hun mì ɖó Mawu e nɔ hwlɛ́n mì gán é wú.
19 Aklúnɔ Nǔbǐwúkpétɔ́ Jexóva wɛ nyí hlɔ̌nhlɔ́n ce;
é ná bló bɔ afɔ ce lɛ́ ná yá zungbɔ́ sín afɔ lɛ́ ɖɔhun,
bo ná bló bɔ un ná ɖi zɔnlin gbɔn fí e yi jǐ tawun lɛ́ é.
Nú hanjigbɛ́gán ɔ; è ná ji kpó kanhún ce lɛ́ kpó.
Vlafo tínmɛ tɔn wɛ nyí “Mɛ zunzunfán kpó akpakpa sɔ́ mɛ kpó.”
Alǒ “hwlɛ́n mì sín dǎkaxixo sí.”
Alǒ “yɛ̌yi.”
Alǒ vlafo, “hlɔ̌nhlɔ́n yětɔn wɛ nyí nǔmɛsɛn yětɔn.”
Alǒ vlafo, “mǐ ná kú ǎ.”
Alǒ “ná gbɛ́ nǔ nú.”
Énɛ́ wɛ nyí, Kaludéenu kɛntɔ́ ɔ.
Alǒ “dó vɔ̌ zo.”
Blǔju tɔn, “ɖó ami tawun.”
Alǒ vlafo, “kpo ɖo hwǐ tɔn nyi wɛ wɛ a?”
Blǔju tɔn, “cɔ́.”
É cí ɖɔ Mawu dó gesí wɛ é ɖe.
Alǒ “ɖíɖí.”
Alǒ “vivɔnu tɔn.”
Alǒ “Ényí é ná bo tlɛ cí ɖɔ é lín hǔn.”
Alǒ “kpo ɖo te kpɔ́n kpó akpakpa sɔ́ mɛ kpó.”
Alǒ “Kpɔ́n! Lǐndɔ̌n tɔn jí.”
Alǒ vlafo, “nǔɖiɖi.”
Alǒ “lǐndɔ̌n tɔn.”
Kpɔ́n Xógbe ɖé lɛ́ sín tínmɛ.
Alǒ “akɔta.”
Alǒ “akɔta.”
Alǒ “lǐndɔ̌n towe.”
Alǒ vlafo, “bo fún sa.”
Alǒ “bǒcyɔ e è tun é.”
Alǒ “nǔwamɛhan.”
Alǒ vlafo, “ɖo hwe mǐtɔn nu.”
Alǒ vlafo, “ɖo hwe mǐtɔn nu.”
Kpɔ́n Xógbe ɖé lɛ́ sín tínmɛ.
Alǒ “hɛn hwlɛngán wá.”
Alǒ “gǎdanú.”
Alǒ vlafo, “gǎ lɛ́.”
Alǒ vlafo, “È ɖɔ akpá e akɔta lɛ́ dó bo xwlé nǔ d’é jí lɛ́ é.”
Blǔju tɔn, “bo só.”
Blǔju tɔn, “ta.”
Blǔju tɔn, “kɔ.”
Blǔju tɔn, “kpo.”
Blǔju tɔn, “bɔ adɔgo ce sísɔ́.”