NAXÚMU
1 Wɛn hwɛɖónúmɛ tɔn dó Ninívu wú. Nǔmimɔ Naxúmu* Elikɔ́cinu ɔ tɔn sín wěma:
2 Jexóva nyí Mawu ɖé bo nɔ byɔ́ ɖɔ è ní zé mɛɖée jó nú émí bǐ mlɛ́mlɛ́, lobo nɔ lɛ́ ba hlɔn;
Jexóva nɔ ba hlɔn, bo ɖo gbesisɔmɛ bo ná ɖe xomɛsin tɔn xlɛ́.
Jexóva nɔ ba hlɔn kɛntɔ́ tɔn lɛ́ wú,
bo nɔ xo xomɛsin tɔn kplé nú kɛntɔ́ tɔn lɛ́.
3 Jexóva nɔ yá wǔ sin xomɛ ǎ, bɔ hlɔ̌nhlɔ́n tɔn d’agba,
é ɖo mɔ̌ có, Jexóva ná gɔn tó e è jɛxá é dɔn nú mɛ ɖo ali ɖěbǔ nu ǎ.
Ali tɔn ɖo jɔhɔn kpó jɔhɔn syɛ́nsyɛ́n kpó e nɔ vívá nǔ é mɛ,
bɔ akpɔ́kpɔ́ lɛ́ wɛ nyí afúntúntún e afɔ tɔn lɛ́ nɔ fɔ́n é.
4 É gbɛ́ nǔ nú xu, bo bló bɔ é xú;
é bló bɔ tɔsisa lɛ́ bǐ xú.
Nǔ e ɖo Basáni kpó Kaamɛ́li kpó ta lɛ́ é yɔ́,
folówa e ɖo Libáan lɛ́ é yɔ́.
5 Só ɖaxó lɛ́ dán wǔ ɖó éyɛ́ wú,
bɔ só kpɛví lɛ́ sínsín.
Ayǐkúngban ɔ ná sísɔ́ ɖó nukúnmɛ tɔn wú,
gɔ́ nú gbɛ ɔ kpó mɛ e ɖ’é mɛ lɛ́ é bǐ kpó.
6 Mɛ̌ ka sixú nɔ te ɖo xomɛsin tɔn nukɔn?
Mɛ̌ ka sixú nɔ te ɖo xomɛsin tɔn sín zozo nukɔn?
Xomɛsin tɔn ná ji myɔ ɖɔhun,
bɔ awǐnnya lɛ́ ná gba hánnyá ɖó éyɛ́ wú.
7 Jexóva nyɔ́, bo nyí ahohó ɖo adǎngbomɛzángbe.
É nɔ ɖó ayi* mɛ ɖěɖěe nɔ ba bibɛtɛn ɖo gɔ̌n tɔn lɛ́ é wú.
8 É ná sú nɔtɛn tɔn* dó mlɛ́mlɛ́ gbɔn tɔgbamɛ e nɔ vívá nǔ é ɖé gblamɛ,
bɔ zǐnflú ná jɛ kɛntɔ́ tɔn lɛ́ gúdo.
9 Étɛ́ sín gbě mi ka ná blá dó Jexóva wú?
É ná sú kún dó nú mi bǐ mlɛ́mlɛ́.
É ná dɔn wǔvɛ́ wá azɔn wegɔ́ ɔ ǎ.
10 Ðó yě hízí dó yěɖée lɛ́ mɛ wunkan ɖɔhun,
bɔ yě cí mɛ e nu ahan syɛ́nsyɛ́n* mú lɛ́ é ɖɔhun;
loɔ, è ná fyɔ́ yě hankán xúxú ɖɔhun.
11 Hwi gɔ́n wɛ mɛ e nɔ blá gbě nyanya dó Jexóva wú é ná gosín,
bo ná ɖe wě maɖótaɖé lɛ́ xá mɛ.
12 Nǔ e Jexóva ɖɔ é ɖíe:
“Yě ɖó hlɔ̌nhlɔ́n ɖésú bo lɛ́ sukpɔ́, é ɖo mɔ̌ có,
è ná sú kún dó nú yě bɔ yě ná blí bú.*
Un ko dó ya nú we,* amɔ̌, un sɔ́ ná dó ya nú we ɖě ǎ.
13 Din ɔ, un ná wɛ́n agbanhɛnkpo ɔ sín kɔ towe,
bɔ un ná wɛ́n gɛdɛ towe lɛ́ ɖó we.
14 Jexóva ɖe gbe élɔ́ dó wǔ we:*
‘Kún ɖě sɔ́ ná gosín nyǐkɔ towe mɛ gbeɖé ǎ.
Un ná sú bǒcyɔ e è sɔ́ atín dó kpa lɛ́ é kpó ganbócyɔ lɛ́* kpó dó sín nǔmɛsɛn towe lɛ́ sín xwégbe.*
Un ná sɔ́ nǔ nú yɔdo ɖé nú we, ɖó a nyí nǔɖéwanú ǎ.’
15 Éɖíe! Afɔ mɛ e hɛn wɛn ɖagbe é tɔn lɛ́ ɖo só lɛ́ jí,
ɛɛn, mɛ e ɖo fífá jlá wɛ é.
Judáa è, ɖu xwe towe lɛ́, ɖe akpá e a dó lɛ́ é,
ɖó nǔvɔ́nɔ ɔ sɔ́ ná gbɔn gɔ̌n towe ɖě gbeɖé ǎ.
È ná sú kún dó n’i bǐ mlɛ́mlɛ́.”
2 Mɛ e nɔ fúnfún mɛ kpé é sí te dó jǐ towe.*
Mi cɔ́ ahohó lɛ́.
Mi cɔ́ ali ɔ.
Mi sɔ́ nǔ nú miɖée,* bo tɛ́n kpɔ́n bónú hlɔ̌nhlɔ́n ní ɖo mi wú mɔ̌hunkɔtɔn.
2 Ðó Jexóva ná bló bɔ susu Jakɔ́bu tɔn ná lɛ́ jɛ tɛn tɔn mɛ,
gɔ́ nú susu Izlayɛ́li tɔn;
ɖó mɛ e nɔ vívá nǔ lɛ́ é vívá yě,
bo lɛ́ hɛn ala yětɔn lɛ́ gblé.
3 È sá nǔ vɔvɔ dó súnnu hlɔ̌nhlɔ́nnɔ tɔn lɛ́ sín gǎglónú lɛ́ wú,
ahwanfuntɔ́ tɔn lɛ́ dó nǔ vɔvɔ cɛ́cɛ́.
Gan e ɖo ahwankɛkɛ́ tɔn lɛ́ wú lɛ́ é nɔ kɔ́n myɔ ɖɔhun,
ɖo azǎn e gbe é ɖo nǔ sɔ́ nú ahwanfunfun wɛ é,
bɔ ahwanfuntɔ́ lɛ́ ɖo hwǎn e è sɔ́ jenɛvliyéetín dó bló lɛ́ é mì wɛ.
4 Ahwankɛkɛ́ lɛ́ nɔ ɖo wezun nu mɔ̌hunkɔtɔn ɖo ali lɛ́ jí.
Yě nɔ ɖo wezun nu gbɔn fí bǐ ɖo tokplétɛn lɛ́.
Yě nɔ kɔ́n zogbɛ́n e ɖo títá lɛ́ é ɖɔhun, bo nɔ kán wezun jǐ kɛwun ɖɔhun.
5 É ná ylɔ́ ahwangán tɔn lɛ́ kplé.
Ée yě ná ɖo yiyi wɛ é ɔ, yě ná klɛ́n afɔ.
Yě ná kán wezun yi ahohó tɔn kɔn;
yě ná ná hlɔ̌nhlɔ́n nǔ e ná sú ali dó kɛntɔ́ é.
6 Tɔsisa lɛ́ sín hɔntogbó lɛ́ ná hun,
bɔ hɔnmɛ ɔ ná hɔ́.*
7 È ko ɖe gbeta ɔ tɔ́n:* È ɖe è nyi mɛ̌,
bo kplá ɛ yi, mɛsɛntɔ́ tɔn nyɔ̌nu lɛ́ ná alě ahwannɛ́ lɛ́ ɖɔhun,
hwenu e yě ɖo akɔ́nta* yětɔn lɛ́ xo wɛ é.
8 Ninívu cí sindo ɖɔhun sín hwenu e é jɔ é,
amɔ̌ din ɔ, mɛ lɛ́ ɖo hinhɔn wɛ.
“Mi nɔ te! Mi nɔ te!”
Loɔ, mɛ ɖěbǔ ɖo kɔ lɛ́ wɛ ǎ.
9 Mi dó wǔ kpatágan mɛ bo bɛ́! Mi dó wǔ siká mɛ bo bɛ́!
Dɔkun tɔn lɛ́ sixú vɔ ǎ.
Nǔ xɔ akwɛ́ tɛnmɛ tɛnmɛ lɛ́ bǐ wɛ ɖ’é mɛ.
10 Toxo ɔ jɛ vɔ̌, nǔ ɖě sɔ́ ɖ’é mɛ ǎ, è vɔ nǔ e ɖ’é mɛ lɛ́ é bǐ!
Ayi yětɔn lɛ́ gba dó, koli yětɔn lɛ́ nɔ sísɔ́, alin yětɔn lɛ́ nɔ sísɔ́;
nukún yětɔn lɛ́ bǐ myá ɖo ta wú.
11 Fítɛ́ adɔ̌tɛn kinnikínní lɛ́ tɔn, fí e kinnikínní wínnyáwínnyá lɛ́* nɔ ɖu nǔ ɖe é ka ɖe?
Fítɛ́ fí e kinnikínní nɔ tɔ́n sín kpó vǐ tɔn kpó,
bɔ mɛɖé ma nɔ dó xɛsi yě ǎ ɖe é ka ɖe?
12 Kinnikínní ɔ vún nǔ e é wlí é kpɔ́ gégé nú vǐ tɔn lɛ́,
bo gbo gbe nǔ e é wlí lɛ́ é nú kinnikínní asi tɔn lɛ́.
É bló bɔ nǔ e é wlí lɛ́ é gɔ́ fí e é nɔ nɔ lɛ́ é,
bɔ kanlin e é vún lɛ́ é gɔ́ adɔ̌tɛn tɔn lɛ́.
13 “Éɖíe! Un ná húzú kpan nukɔn we,” wɛ Jexóva ahwankpá lɛ́ tɔn ɖɔ,
“un ná dó ahwankɛkɛ́ towe lɛ́ zo bɔ yě ná ji kɔn afín,
bɔ hwǐ ná hu kinnikínní wínnyáwínnyá towe lɛ́.*
Un ná ɖó nǔ nǔ e a nɔ wlí ɖo ayǐkúngban ɔ jí lɛ́ é nu,
bɔ è sɔ́ ná se wɛndótɔ́ towe lɛ́ sín gbe ɖě ǎ.”
3 Heelú toxo mɛhutɔ́ ɔ!
Mɛblɛ́blɛ́ kpó ajo kpó wɛ kpé toxo ɔ bǐ mɛ.
É nɔ ba nǔ e é ná wlí ɖu é kpo gbeɖé ǎ!
2 È nɔ se bǎ sín gbe kpó kɛkɛ́vífɔ lɛ́ sín zǐngídi kpó,
sɔ́ nɔ ɖo wezun kán wɛ, bɔ ahwankɛkɛ́ví lɛ́ nɔ ɖo zlɔ̌nzlɔ́n wɛ.
3 Sɔ́xátɔ́ ɖo sɔ́ tɔn jí, hwǐ ɖo kínkɔ́n wɛ, bɔ hwǎn ɖo kínkɔ́n wɛ,
mɛ e è hu tɛ́ lɛ́ é kpó cyɔ e ɖo sonu sonu lɛ́ é kpó ɖo kpaɖaɖa.
Mɛkúkú lɛ́ sín kɛ́n sukpɔ́ b’ɛ vɛ́ jlɛ́.
È nɔ ɖo afɔ klɛ́n dó cyɔ lɛ́ wú wɛ ɖo gbɛmɛ.
4 Nǔ nyí mɔ̌, ɖó to e tonyatɔ́ énɛ́ nɔ nya é ɖó dogbó ǎ,
é nyɔ́ ɖɛkpɛ bo nɔ lú mɛ, nyɔ̌nu ɖé wɛ bɔ alɔ bí n’i ɖo azě mɛ,
é nɔ ɖó mɔ nú akɔta lɛ́ gbɔn tonyinya tɔn gblamɛ, bo nɔ ɖó mɔ nú xwédo lɛ́ gbɔn azě tɔn gblamɛ.
5 “Éɖíe! Un ná húzú kpan nukɔn we,”* wɛ Jexóva ahwankpá lɛ́ tɔn ɖɔ,
“un ná kplɔ́ yɛlí* towe dó jǐ káká wá nukún towe mɛ;
un ná bló bɔ akɔta lɛ́ ná mɔ mɛ̌ towe,
bɔ axɔ́súɖuto lɛ́ ná mɔ winnyá towe.
6 Un ná kɔn zunkɔ́ dó jǐ towe,
bo ná bló bɔ è ná gbɛ́ wǎn nú we;
un ná bló bɔ a ná nyí nǔkpínkpɔ́n nú to.
7 Mɛ ɖěbǔ e mɔ we é ná hɔn nú we, bo ná ɖɔ:
‘È vɔ Ninívu!
Mɛ̌ ka ná se wǔvɛ́ xá ɛ?’
Fítɛ́ un ka ná mɔ gbɔdónúmɛtɔ́ lɛ́ nú we ɖe?
8 A kpɔ́n te hú No-Amɔ́ni,* éé ɖo tɔhwín Nilu tɔn lɛ́ kpá ɖ’ayǐ é wɛ a?
Sin wɛ lɛ́ lɛ̌ dó è ɖ’ayǐ;
xu wɛ nyí dɔkun tɔn ɖ’ayǐ, xu wɛ lɛ́ nyí ahohó tɔn ɖ’ayǐ.
9 Etiopíi kpó Ejípu kpó wɛ nyí hlɔ̌nhlɔ́n ma ɖó dogbó e é ɖó ɖ’ayǐ é sín jɔtɛn.
Púti kpó Libíinu lɛ́ kpó wɛ nyí alɔdómɛtɔ́ tɔn* lɛ́ ɖ’ayǐ.
10 É ɖo mɔ̌ có, è ɖe é lɔmɔ̌ sín to tɔn mɛ;
é yi kannumɔgbénu.
È já vǐ tɔn lɛ́ lɔmɔ̌ ɖó yɔywɛ ɖo alikpléhɔ̌nkantɛn lɛ́ bǐ.*
Yě nyi akɔ dó sísíjɛxá tɔn lɛ́,
bɔ è dó wlɔ mɛ nukúnɖéjí tɔn lɛ́ bǐ.
11 Hwi lɔ ná nu ahan mú;
a ná yi hwlá hwiɖée.
A ná yi ba bibɛtɛn bá dó gán sín kɛntɔ́ sí.
12 Ahohó towe lɛ́ bǐ wɛ cí fígitín sín sínsɛ́n nukɔntɔn e myá lɛ́ é ɖɔhun;
ényí è húnhún fígitín lɛ́ ɔ, sínsɛ́n lɛ́ ná jɛ mɛ e xovɛ́ sin lɛ́ é sín nu mɛ.
13 Kpɔ́n! Ahwankpá towe lɛ́ ná ɖó gǎn ǎ nyɔ̌nu lɛ́ ɖɔhun.
È ná hun hɔntogbó e ɖo to towe mɛ lɛ́ é kɛ́ gbaa nú kɛntɔ́ towe lɛ́.
Myɔ ná fyɔ́ hɔntogbó towe lɛ́ sín kpo lɛ́.
14 Dun sin bo sɔ́ nǔ ɖ’ayǐ nú hwenu e è ná ján go dó we é!
Nǎ hlɔ̌nhlɔ́n ahohó towe lɛ́.
Jɛ te byɔ́ babá mɛ, bo sɔ́ afɔ dó gbídí ko;
sɔ́ to e nɔ sún blǐki é.
15 Amɔ̌, nǔ ná bo nyí mɔ̌ ɔ, myɔ ná fyɔ́ we.
È ná sɔ́ hwǐ dó hu we.
É ná ɖu we vɔ, lěe bɔkle wínnyáwínnyá lɛ́ nɔ ɖu gběhan lɛ́ gbɔn é ɖɔhun.
Nǔ mɛ towe lɛ́ ní sukpɔ́ bɔkle wínnyáwínnyá lɛ́ ɖɔhun!
Ɛɛn, mi ní sukpɔ́ bɔkle lɛ́ ɖɔhun!
16 A bló bɔ ajɔ̌tɔ́ towe lɛ́ sukpɔ́ hú sunví e ɖo jǐnukúnsin lɛ́ é.
Bɔkle wínnyáwínnyá kɔ́n anyǔ, lobo zɔn yi.
17 Mɛcɔ́tɔ́ towe lɛ́ cí bɔkle lɛ́ ɖɔhun,
bɔ ahwangán towe lɛ́ cí bɔklehwan ɖé ɖɔhun.
Yě nɔ ba bibɛtɛn ɖo kpó e è sɔ́ awǐnnya dó mɛ lɛ́ é mɛ ɖo avivɔhwenu,
amɔ̌, ényí hwesivɔ́ hun ɔ, yě nɔ zɔn yi;
bɔ mɛ ɖěbǔ nɔ tuun fí e yě ɖe é ǎ.
18 Axɔ́sú Asilíi tɔn è, lɛ̌ngbɔ́nyitɔ́ towe lɛ́ ɖo kɔmlɔgɔ́ sa wɛ;
mɛ nukúnɖéjí towe lɛ́ cí nɔtɛn yětɔn lɛ́.
Mɛ towe lɛ́ gba dó gbɔn só lɛ́ jí,
bɔ mɛ ɖěbǔ ɖo yě xo kplé wɛ ǎ.
19 A ná mɔ kɔ dó sa fún ɖo awě towe mɛ ǎ.
Akpa towe sixú kú ǎ.
Mɛ ɖěɖěe ná se nǔ e ɖo jijɛ dó wǔ we wɛ lɛ́ é bǐ ná xo asíkpɛ́;
ɖó mɛ̌ ma ka se alǎnnú e a nɔ ɖo wiwa wɛ magbokɔ é sín wǔvɛ́ ǎ?”
Tínmɛ tɔn wɛ nyí “Gbɔdónúmɛtɔ́.”
Alǒ “kpé nukún dó.”
Énɛ́ wɛ nyí, Ninívu sín nɔtɛn.
Alǒ “bǐya e è sɔ́ blěe dó ɖa ná é.”
Alǒ vlafo, “bɔ é ná gbɔn mɛ dín.”
Énɛ́ wɛ nyí, Judáa.
Énɛ́ wɛ nyí, Asilíi.
Alǒ “bǒcyɔ e è xo zo dó lɛ́ é.”
Alǒ “vodúnxwé towe lɛ́.”
Énɛ́ wɛ nyí, Ninívu.
Blǔju tɔn, “Mi ná hlɔ̌nhlɔ́n alin lɛ́.”
Alǒ “sínsín.”
Alǒ “È sɔ́ sixú húzú gbeta ɔ ǎ.”
Blǔju tɔn, “ayi.”
Alǒ “kinnikínní wínnyáwínnyá e ko ɖó kɔjafún lɛ́ é.”
Alǒ “kinnikínní wínnyáwínnyá towe e ko ɖó kɔjafún lɛ́ é.”
Énɛ́ wɛ nyí, Ninívu.
Alǒ “jǐpu.”
Énɛ́ wɛ nyí, Tɛbu.
Blǔju tɔn, “towe.”
Blǔju tɔn, “ali lɛ́ bǐ ta.”