MICÉE
1 Xó e Jexóva ɖɔ nú Micée* Mɔlɛcɛ́tinu ɔ, ɖo axɔ́sú Judáa tɔn Jotámu, Akázi kpó Ezekiyási kpó hwenu, bɔ è ɖe xlɛ́ ɛ ɖo nǔmimɔ e kunkplá Samalíi kpó Jeluzalɛ́mu kpó é mɛ é ɖíe:
2 “Togun lɛ́ bǐ è mi, mi ɖótó!
Ayǐkúngban è, hwi kpó nǔ e ɖo jǐ we lɛ́ é kpó, mi tɛ́ tó
bo se nǔ e Aklúnɔ Nǔbǐwúkpétɔ́ Jexóva ná ɖɔ dó dó hwɛ mi é.
Jexóva ná dó hwɛ mi sín sinsɛnxɔ mímɛ́ tɔn mɛ.
3 Ðó éɖíe! Jexóva ɖo nɔtɛn tɔn tɔ́n sín wɛ;
é ná jɛ te bo ɖi zɔnlin gbɔn só e ɖo ayǐkúngban ɔ jí lɛ́ é jí.
4 Só lɛ́ ná sínsín ɖo glɔ̌ tɔn,
bɔ tɔdo* lɛ́ ná má,
lěe aɖuwa nɔ sínsín ɖo myɔ nu gbɔn é ɖɔhun,
lěe sin e è kɔn dó kpó jí é nɔ sa wá dodomɛ gbɔn é ɖɔhun.
5 Nǔ énɛ́ lɛ́ bǐ nyí mɔ̌, ɖó gǔfínfɔ́n Jakɔ́bu tɔn wútu,
ɖó hwɛ e kúnkan* Izlayɛ́li tɔn hu lɛ́ é wútu.
Mɛ̌ wú gǔfínfɔ́n Jakɔ́bu tɔn ka sín?
É má nyí Samalíi wɛ ǎ cé?
Bɔ mɛ̌ è ka ná dó nɔtɛn ɖeɖóvo Judáa tɔn lɛ́ sín hwɛ?
É má nyí Jeluzalɛ́mu wɛ ǎ cé?
6 Un ná bló bɔ Samalíi ná húzú aglingbigba ɖo gletoxo mɛ,
nɔtɛn ɖé bɔ è ná tun vǐwuntín ɖó;
un ná nyi* awǐnnyaglo tɔn lɛ́ dó tɔdo ɔ mɛ,
bo ná ɖe dodónu tɔn lɛ́ nyi wěxo.
7 È ná gba bǒcyɔ kpikpa tɔn lɛ́ bǐ hánnyá,
bɔ nǔníná ɖěɖěe è nɔ ná ɛ bo nɔ ɖóxó xá ɛ lɛ́ é bǐ* ɔ, è ná fyɔ́ yě ɖo myɔ mɛ.
Un ná vívá bǒcyɔ tɔn lɛ́ bǐ.
Ðó axɔ́ e è nɔ sú i ɖó tonyinya tɔn wú lɛ́ é wɛ é sɔ́ dó xo nǔ énɛ́ lɛ́ kplé,
bɔ è ná bɛ́ yě bo ná yi sú axɔ́ tonyatɔ́ fí ɖěvo tɔn lɛ́ ná.”
8 Un ná dó gbɛvíhan, bo ná alě ɖó énɛ́ wú;
un ná ɖi zɔnlin afɔvɔ́, bo lɛ́ zɔn mɛ̌.
Gbɛvíhan e un ná dó é ná cí cukú gbě tɔn lɛ́ sín gbɛvíhan ɖɔhun,
bɔ alě e un ná ná é ná cí alě e gowungo lɛ́ nɔ ná é ɖɔhun.
9 Ðó akpa tɔn sixú kú ǎ;
é tlɛ wa nǔ dó Judáa lɔ wú.
Jɛmɛjí ɔ gba nǔ káká yi mɛ ce lɛ́ sín hɔntogbó ta, ɛɛn, káká yi Jeluzalɛ́mu.
10 “Mi ma ɖɔ xó tɔn ɖo Gati ó;
mi ɖó ná ya avǐ ǎ.
Mi blí gbo gbɔn kɔ́gúdu mɛ ɖo Bɛ́ti-Afla.*
11 Mɛ* e nɔ nɔ Cafíi lɛ́ é mi, mi zɔn mɛ̌ kpó winnyá kpó bo ɖidó.
Mɛ* e nɔ nɔ Saanáni lɛ́ é tɔ́n ǎ.
È ná ná alě ɖo Bɛ́ti-Esɛ́li, è ná ɖó gǔdo e é nɔ nɔ nú mi é te.
12 Nǔ ɖagbe wɛ mɛ* e nɔ nɔ Malɔ́ti lɛ́ é ɖó nukún,
amɔ̌, nǔ nyanya wɛ gosín Jexóva gɔ́n wá hɔntogbó Jeluzalɛ́mu tɔn ta.
13 Mi mɛ* e nɔ nɔ Lakíci lɛ́ é mi, mi sin kɛkɛ́ví ɔ dó sɔ́ lɛ́ wú.
Vǐ nyɔ̌nu Sinyɔ́ɔ tɔn sín hwɛ ɔ, mi wú wɛ é sín,
ɖó è mɔ gǔfínfɔ́n Izlayɛ́li tɔn lɛ́ ɖo gɔ̌n towe.*
14 Énɛ́ wú ɔ, a ná ná nǔníná éɖabɔ* tɔn lɛ́ Mɔlɛcɛ́ti-Gati.
Mɛ e nɔ nɔ Akizíbu lɛ́ é* flú axɔ́sú Izlayɛ́li tɔn lɛ́.
15 Mɛ* e nɔ nɔ Maléca lɛ́ é mi, mɛ e ɖu ɖ’é jí é* ɔ, un ná kplá ɛ wá mi gɔ́n.
Susu Izlayɛ́li tɔn ná hun káká yi Adulámu.
16 Mi mɔ́ ahɔn nú miɖée, bo xwlɛ́ ta ɖó vǐ vívɛ́ mitɔn lɛ́ wú.
Mi mɔ́ ahɔn nú miɖée bónú ta mitɔn ní cí aklasú* sín ta ɖɔhun,
ɖó è xo vǐ mitɔn lɛ́ yí sín mi sí bo kplá yě yi kannumɔgbénu.”
2 “Heelú mɛ ɖěɖěe nɔ bló tuto bá hɛn nǔ gblé dó mɛ wú lɛ́ é,
mɛ ɖěɖěe nɔ bló tuto nǔnyanyawiwa tɔn ɖo zan yětɔn jí lɛ́ é!
Nú zǎnzǎn su ɔ, yě nɔ bló ɖ’é jí,
ɖó yě ɖó hlɔ̌nhlɔ́n tɔn.
2 Ényí gle ɖé jló yě ɔ, yě nɔ klá jɛ nu,
gɔ́ ná ɔ, ényí xwé ɖé jló yě ɔ, yě nɔ yí;
yě nɔ hízí gbɛtɔ́ bá dó yí xwé tɔn,
bá dó yí gǔ tɔn.
3 Énɛ́ wú ɔ, xó e Jexóva ɖɔ é ɖíe:
‘Din ɔ, un ɖo awě e togun* élɔ́ ma ná xo gló* ǎ é ɖé ná sɔ́ xo mi ná wɛ.
Mi sɔ́ ná ɖi zɔnlin kpó goyíyí kpó ɖě ǎ, ɖó awěxomɛ sín hwenu ɖé wɛ é ná nyí.
4 Gbe énɛ́ gbe ɔ, è ná ɖɔ xó lómílómí dó mi wú,
bo ná ná alě syɛ́nsyɛ́n dó mi jí.
Yě ná ɖɔ: “È vɔ mǐ bǐ!
É yí ayǐkúngban e nyí togun mǐtɔn tɔn é sín mǐ sí, bo sɔ́ jó nú mɛ ɖěvo lɛ́.
É sɔ́ gle mǐtɔn lɛ́ jó nú gbejímanɔtɔ́ lɛ́.”
5 Énɛ́ wú ɔ, a ná ɖó mɛ e ná sɔ́ kan dó jlɛ́ ayǐkúngban ɔ,
bo ná má é ɖě ɖo agun Jexóva tɔn mɛ ǎ.
6 Yě nɔ jlá ɖɔ: “Mi ma sɔ́ jlá wɛn ɖě ó!
È ɖó ná jlá nǔ énɛ́ lɛ́ ǎ;
mǐ ná ɖu winnyá ǎ!”
7 Kúnkan Jakɔ́bu tɔn è mi, mi nɔ ɖɔ:
“Gbigbɔ Jexóva tɔn sɔ́ nɔ ɖó suúlu ǎ wɛ a?
É ka ná bló nǔ énɛ́ lɛ́ dóó a?”
Xó ce lɛ́ nɔ hɛn le wá nú mɛ e nɔ wa nǔ jlɔ́jlɔ́ lɛ́ é ǎ cé?
8 Amɔ̌, agaɖanu din ɔ, togun ce jɛ nǔ wa jí kɛntɔ́ ɖɔhun.
Mi nɔ xo acɔ́banú ɖagbe ɖagbe yí, gɔ́ nú awu,*
sín mɛ ɖěɖěe ɖo dǐndín wɛ kpó jiɖiɖe kpó, kɔ wɛ yě lɛ́ sín ahwangbénu ɖɔhun lɛ́ é sí ɖo agbawungba.
9 Mi nɔ nya nyɔ̌nu e ɖo togun ce mɛ lɛ́ é sín xwé yětɔn ɖagbe ɖagbe lɛ́ gbe;
mi nɔ yí susu ce sín vǐ yětɔn lɛ́ sí káká sɔ́yi.
10 Mi sí te bo ɖidó, ɖó gbɔjɛtɛn ɖě ɖo fí ǎ.
Ðó nǔblíblíwiwa wútu ɔ, è ná sú kún dó nú nǔ, ɛɛn, è ná sú kún dó nú nǔ bɛ́ ná vɛ́ jlɛ́.
11 Ényí mɛ e nɔ ɖo jɔhɔn gúdo bo nɔ blɛ́ mɛ é ɖé ɖó adingban élɔ́ ɖɔ:
“Un ná jlá wɛn mi dó vɛ̌ɛn kpó ahan syɛ́nsyɛ́n kpó wú” ɔ,
tlóló jɛ́n é ná nyí wɛnjlátɔ́ nú togun élɔ́!
12 Jakɔ́bu è, é ɖo wɛn ɖɔ un ná xo kúnkan towe lɛ́ bǐ kplé,
é ɖo wɛn ɖɔ un ná xo mɛ e kpo ɖo Izlayɛ́li lɛ́ é kplé.
Un ná xo yě kplé bɔ yě ná nɔ bǔ, lɛ̌ngbɔ́ lɛ́ ɖo kpó mɛ ɖɔhun,
lɛ̌ngbɔ́hwan ɖo amagbo mɛ ɖɔhun;
nǔxweɖɔ gbɛtɔ́ tɔn ná sukpɔ́ ɖo fínɛ́.’
13 Mɛ e nɔ hun ali é ná ɖo nukɔn nú yě;
yě ná hun ali bo ná gbɔn hɔntogbó ɔ nu, bo ná tɔ́n gbɔn fínɛ́.
Axɔ́sú yětɔn ná jɛ nukɔn nú yě,
bɔ Jexóva ná ɖo nukɔn nú yě bǐ.”
3 Un ɖɔ: “Tatɔ́ Jakɔ́bu tɔn lɛ́,
kpó acɛkpatɔ́ e ɖo togun Izlayɛ́li tɔn mɛ lɛ́ é kpó è mi, mi kɛnklɛ́n bo ɖótó.
Mi ɖó ná tuun nǔ e nyí nǔ jlɔ́jlɔ́ é ǎ cé?
2 Amɔ̌, mi nɔ gbɛ́ wǎn nú nǔ ɖagbe, bo nɔ yí wǎn nú nǔ nyanya;
mi nɔ tlɛ́n anyǔ sín togun ce wú, bo nɔ tlɛ́n lanti sín xú yětɔn lɛ́ wú.
3 Mi nɔ lɛ́ ɖu togun ce sín lan,
bo nɔ kɔ́n anyǔ yětɔn,
lobo nɔ gba xú yětɔn lɛ́, bo nɔ nyínyɛ́ yě
nǔ e è ɖa ɖo zɛ̌n* mɛ é ɖɔhun, lan e ɖo nǔɖazɛ́n mɛ é ɖɔhun.
4 Hweɖénu ná su bɔ yě ná ylɔ́ Jexóva bo byɔ́ alɔdó,
amɔ̌, é ná sɔ nú yě ǎ.
Hwe énɛ́ nu ɔ, é ná hwlá éɖée dó yě,
ɖó nǔnyanyawiwa yětɔn lɛ́ wútu.
5 Gbeyíɖɔ ɖěɖěe ɖo togun ce dɔn bú wɛ lɛ́ é ɔ,
yě mɛ e nɔ jlá ‘Fífá!’ hwenu e nǔɖé ɖo aɖǔ yětɔn lɛ́ jí é,*
bɔ nú mɛɖé ma sɔ́ nǔɖé dó nu mɛ nú yě ǎ ɔ, yě nɔ tɔ́n ahwan mɛ ɔ lɛ́ é ɔ, nǔ e Jexóva ɖɔ dó yě wú é ɖíe:
6 ‘Zǎn ná kú dó mi; mi ná mɔ nǔmimɔ ɖěbǔ ǎ;
zǐnflú kɛ́ɖɛ́ jɛ́n mi ná mɔ, mi sɔ́ ná kan amɔɛ ɖě ǎ.
Hwesivɔ́ ná yi xɔ dó gbeyíɖɔ lɛ́ jí,
bɔ kéze ná d’ablu dó yě.
7 Nǔmɔtɔ́ lɛ́ ná ɖu winnyá,
bɔ mɛ e nɔ kan amɔɛ lɛ́ é ná flú.
Yě mɛ bǐ ɖó ná cyɔ́n nǔ dó awɔnnufún yětɔn,*
ɖó yě ná mɔ xósin ɖě sín Mawu gɔ́n ǎ wútu.’”
8 Amɔ̌, nyɛ ɔ, gbigbɔ Jexóva tɔn zɔ́n bɔ un ɖó hlɔ̌nhlɔ́n,
bɔ é lɛ́ d’alɔ mì bónú má wa nǔ kpó hwɛjijɔ kpó, kpódó akɔ́nkpinkpan kpó,
bo ná dó ɖɔ gǔ e Jakɔ́bu fɔ́n é n’i, bo ná lɛ́ ɖɔ hwɛ e Izlayɛ́li hu é n’i.
9 Mi kɛnklɛ́n ɖótó nǔ élɔ́, mi mɛ xwé Jakɔ́bu tɔn sín tatɔ́ lɛ́,
kpó mi mɛ acɛkpatɔ́ e ɖo togun Izlayɛ́li tɔn mɛ lɛ́ é kpó è mi,
midɛɛ lɛ́ mɛ e nɔ gbɛ́ wǎn nú hwɛjijɔ, bo nɔ sló kɔ nú nǔ e nyí nǔ jlɔ́jlɔ́ lɛ́ é bǐ é,
10 mi mɛ e nɔ sɔ́ gbɛtɔ́ kanjɔ dó gbá Sinyɔ́ɔ, bo nɔ sɔ́ nǔagɔwiwa dó gbá Jeluzalɛ́mu lɛ́ é.
11 Gǎn* tɔn lɛ́ nɔ ɖu nǔ ɖo nǔ mɛ cóbó nɔ ɖɔ hwɛ,
vɔ̌sánúxwlémawutɔ́ tɔn lɛ́ nɔ yí akwɛ́ cóbó nɔ kplɔ́n nǔ mɛ,
bɔ gbeyíɖɔ tɔn lɛ́ nɔ yí akwɛ́* bo nɔ kan amɔɛ.
É ɖo mɔ̌ có, yě nɔ ɖeji dó Jexóva wú* bo nɔ ɖɔ:
“Jexóva ɖo kpɔ́ xá mǐ ǎ cé?
Awě ɖě ná xo mǐ ǎ.”
12 Énɛ́ wú ɔ, é ná sín mi wú,
bɔ è ná lɛ Sinyɔ́ɔ gle ɖɔhun,
Jeluzalɛ́mu ná húzú aglingbigba.
Bɔ só ɖaxó Xwé ɔ tɔn* ná cí só kpɛví lɛ́ ɖo zungbó mɛ* ɖɔhun.
4 Ðo azǎn gǔdo gúdo tɔn lɛ́ mɛ ɔ,*
só e jí xwé Jexóva tɔn ɖe é
ná lí dǒ syɛ́nsyɛ́n bo ná yi jǐ hú só ɖaxó lɛ́,
é ná yi jǐ hú só kpɛví lɛ́,
bɔ togun lɛ́ ná nɔ nyi ahwan yi kɔn.
2 Akɔta gěgé ná wá, bo ná ɖɔ:
“Mi wá, mi nú mǐ ní yi só Jexóva tɔn jí,
mǐ ní yi Mawu Jakɔ́bu tɔn sín xwégbe.
É ná kplɔ́n nǔ mǐ dó ali tɔn lɛ́ wú,
bɔ mǐ ná ɖi zɔnlin gbɔn ali tɔn lɛ́ jí.”
Ðó sɛ́n* ná tɔ́n sín Sinyɔ́ɔ,
bɔ xó Jexóva tɔn ná tɔ́n sín Jeluzalɛ́mu.
3 É ná ɖɔ hwɛ ɖo togun gěgé tɛ́ntin,
bo ná jlá nǔ lɛ́ ɖó* nú akɔta hlɔ̌nhlɔ́nnɔ lɛ́ káká yi fí e jɛ zɔ tawun lɛ́ é.
Yě ná sɔ́ hwǐ yětɔn lɛ́ dó tun glelɛmɔlín* ná,
bo ná sɔ́ hwǎn yětɔn lɛ́ dó tun nǔkúnyanú ná.
Akɔta ɖě sɔ́ ná sɔ́ hwǐ dó akɔta ɖěvo jí ɖě ǎ,
mɔ̌ jɛ́n yě ma ka sɔ́ ná kplɔ́n ahwanfunfun ɖě ǎ é nɛ́.
4 Yě mɛ ɖokpó ɖokpó ná jínjɔ́n* vǐwuntín yětɔn yětɔn sá, bo ná jínjɔ́n fígitín yětɔn yětɔn sá,
bɔ mɛ ɖěbǔ ná dó xɛsi yě ǎ,
ɖó Jexóva ahwankpá lɛ́ tɔn* wɛ ɖɔ xó.
5 Ðó togun lɛ́ bǐ ná ɖi zɔnlin, ɖo nǔmɛsɛn yětɔn yětɔn nyíkɔ mɛ,
amɔ̌, mǐdɛɛ lɛ́ ɔ, mǐ ná ɖi zɔnlin ɖo Jexóva Mawu mǐtɔn nyíkɔ mɛ káká sɔ́yi mavɔmavɔ.
6 “Ðo azǎn énɛ́ gbe ɔ,” wɛ Jexóva ɖɔ,
“un ná xo yě mɛ e ɖo tintɔn wɛ lɛ́ é kplé,
bo ná cyán yě mɛ e gba kpé lɛ́ é kplé,
gɔ́ nú mɛ ɖěɖěe un dó ya ná syɛ́nsyɛ́n lɛ́ é.
7 Un ná bló bɔ é ná kpo yě mɛ e ɖo tintɔn wɛ lɛ́ é ɖě,
bo ná bló bɔ mɛ ɖěɖěe è fúnfún gbɔn fí línlín lɛ́ é ná húzú akɔta hlɔ̌nhlɔ́nnɔ ɖé;
bɔ nyɛ Jexóva ná ɖu axɔ́sú dó yě nu ɖo Sinyɔ́ɔ só jí,
sín din káká sɔ́yi.
8 Amɔ̌ hwi, atɔxwɛ e nɔ nya xɛ ɖo kanlinhwan jí é ɔ,
hwi vǐ nyɔ̌nu Sinyɔ́ɔ tɔn sín só kpɛví ɔ,
é ná wá gɔ̌n towe, ɛɛn, acɛkpikpa nukɔntɔn* ɔ ná wá,
énɛ́ wɛ nyí axɔ́súɖuto e nyí vǐ nyɔ̌nu Jeluzalɛ́mu tɔn tɔn é.
9 Din ɔ, étɛ́wú a ka ɖo xó sú wɛ tlílí?
A ɖó axɔ́sú ɖě ǎ,
alǒ wěɖexámɛtɔ́ towe kú
wɛ zɔ́n bɔ a byɔ́ wǔvɛ́ mɛ nyɔ̌nu ɖo ajidonu ɖɔhun a?
10 Vǐ nyɔ̌nu Sinyɔ́ɔ tɔn è, sló hwiɖée bo wɛn azɔn,
nyɔ̌nu e ɖo ajidonu é ɖɔhun,
ɖó din ɔ, a ná gosín toxo ɔ mɛ, bo ná yi nɔ gle mɛ.
A ná hun káká yi Babilɔ́nu,
bɔ ɖo fínɛ́ ɔ, è ná hwlɛ́n we gán;
ɖo fínɛ́ ɔ, Jexóva ná vɔ́ we xɔ, sín kɛntɔ́ towe lɛ́ lɔ mɛ.
11 Din ɔ, akɔta gěgé ná xísí dó we,
yě ná ɖɔ: ‘È ní kɔ́n wi tɔn,
bónú nukún mǐtɔn ní mɔ nú nǔ énɛ́ ní jɛ dó Sinyɔ́ɔ jí.’
12 Amɔ̌, yě tuun linlin Jexóva tɔn lɛ́ ǎ,
yě mɔ nukúnnú jɛ tuto* tɔn wú ǎ;
ɖó é ná xo yě kplé, jinukún yɔ̌yɔ́ e è sɛ́n ɖó sonu sonu ɖo nǔkúnsótɛn é ɖɔhun.
13 Vǐ nyɔ̌nu Sinyɔ́ɔ tɔn è, sí te bo só nǔkún,
ɖó un ná sɔ́ zo towe lɛ́ dó húzú gan,
bo ná sɔ́ hwɛ̌ towe lɛ́ dó húzú ganvɔ,
bɔ a ná nyínyɛ́ togun gěgé.
A ná sɔ́ le e yě hízí mɛ bo ɖu lɛ́ é jó nú Jexóva,
bo ná sɔ́ nǔɖókan yětɔn lɛ́ jó nú Aklúnɔ nǔgbó ayǐkúngban ɔ bǐ tɔn ɔ.”
Yě sɔ́ kpo dó xo hwɛɖɔtɔ́ Izlayɛ́li tɔn dó klɛ̌n jí.
2 Bɔ hwɛ, Bɛteleyɛ́mu Efláta è,
hwi mɛ e hwe tawun bo ná nyí ɖokpó ɖo hɛ̌nnu* Judáa tɔn lɛ́ mɛ é,
hwi mɛ wɛ mɛ e ná kpa acɛ ɖo Izlayɛ́li é ná tɔ́n sín nú mì,
é ko tíin sín hwexónu, sín hwenu línlín lɛ́ ɖíe.
3 Énɛ́ wú ɔ, Mawu ná jó yě dó,
káká jɛ hwenu e nyɔ̌nu e ɖó ná ji vǐ é ná ji dó é.
Bɔ nɔví tɔn e kpo lɛ́ é ná lɛ́ kɔ yi togun Izlayɛ́li tɔn mɛ.
4 É ná sí te bo ná nyí lɛ̌ngbɔ́nyitɔ́ nú togun tɔn ɖo hlɔ̌nhlɔ́n Jexóva tɔn mɛ,
ɖo nyǐkɔ Jexóva Mawu tɔn tɔn sín susu mɛ.
Yě ná nɔ ayijayǐ mɛ,
ɖó hwenɛ́nu ɔ, acɛkpikpa tɔn ná yi káká fí e ayǐkúngban ɔ kponu ɖó é.
5 É ná hɛn fífá wá.
Ényí Asilíinu ɔ wá byɔ́ to mǐtɔn mɛ gǎnnugǎnnu, bo sɔ́ afɔ dó gbídí atɔxwɛ syɛ́nsyɛ́n mǐtɔn lɛ́ ɔ,
mǐ ná fɔ́n lɛ̌ngbɔ́nyitɔ́ tɛ́nwe, ɛɛn, axɔ́ví* tántɔn ɖo gbɛtɔ́ lɛ́ mɛ dó jǐ tɔn.
6 Yě ná sɔ́ hwǐ dó dɔn tó nú* Asilíi to ɔ,
gɔ́ nú Nɛmulɔ́di to ɔ ɖo dogbó tɔn lɛ́ jí.
É ná hwlɛ́n mǐ sín Asilíinu ɔ sí,
hwenu e é ná byɔ́ to mǐtɔn mɛ gǎnnugǎnnu, bo ná sɔ́ afɔ dó gbídí ayǐkúngban mǐtɔn é.
7 Ðo togun gěgé tɛ́ntin ɔ, Jakɔ́bu sín mɛ e kpo lɛ́ é
ná cí ahǔn e nɔ ja sín Jexóva gɔ́n é ɖɔhun,
fo e nɔ gba kɔn nyi gběhan jí,
bo ma nɔ ɖó nukún gbɛtɔ́,
alǒ nɔ te kpɔ́n gbɛtɔ́ví lɛ́ ǎ é ɖɔhun.
8 Ðo togun gěgé tɛ́ntin, ɖo akɔta lɛ́ mɛ ɔ,
Jakɔ́bu sín mɛ e kpo lɛ́ é
ná cí kinnikínní ɖo gběkanlin e nɔ nɔ zungbó mɛ lɛ́ é tɛ́ntin ɖɔhun,
kinnikínní wínnyáwínnyá* ɖo lɛ̌ngbɔ́hwan lɛ́ tɛ́ntin ɖɔhun,
é nɔ gbɔn tɛ́ntin yětɔn, zɔn yě jí, bo nɔ tlɛ́n yě ɖó yɔywɛ,
bɔ mɛ ɖě ɖe bo ná hwlɛ́n yě ǎ.
9 Mi ná zé alɔ mitɔn lɛ́ dó kɛntɔ́ mitɔn lɛ́ jí dó ɖu ɖo yě jí,
bɔ è ná sú kún dó nú kɛntɔ́ mitɔn lɛ́ bǐ.”
10 “Gbe énɛ́ gbe ɔ,” wɛ Jexóva ɖɔ,
“un ná hu sɔ́ mitɔn lɛ́ sín tɛ́ntin mitɔn, bo ná vívá ahwankɛkɛ́ mitɔn lɛ́.
11 Un ná sú kún dó nú toxo e ɖo to mitɔn mɛ lɛ́ é,
bo ná mu ahohó mitɔn lɛ́.
12 Un ná ɖó nǔ azě sín nǔwiwa mitɔn lɛ́* nu,
bɔ majíkiblótɔ́ ɖě sɔ́ ná kpo ɖo tɛ́ntin mitɔn ǎ.
13 Un ná gba bǒcyɔ kpikpa mitɔn lɛ́ kpó dotín mitɔn lɛ́ kpó hánnyá sín tɛ́ntin mitɔn,
bɔ mi sɔ́ ná jɛ kpo ɖě nú nǔ e mi sɔ́ alɔ mitɔn dó bló ná lɛ́ é ǎ.
14 Un ná hɔn dotín mímɛ́* mitɔn lɛ́ sín tɛ́ntin mitɔn,
bo ná sú kún dó nú toxo mitɔn lɛ́ mlɛ́mlɛ́.
15 Kpó xomɛsin ɖaxó kpó wɛ un ná ba hlɔn
akɔta e ma se tónú ǎ lɛ́ é wú.”
6 Mi kɛnklɛ́n bo ɖótó nǔ e ɖɔ wɛ Jexóva ɖe é.
Mi sí te, bo sɔ́ hwɛɖiɖɔxó mitɔn yi só ɖaxó lɛ́ nukɔn,
bónú só kpɛví lɛ́ ní se gbe mitɔn.
2 Só lɛ́ mi, mi ɖótó hwɛɖiɖɔxó Jexóva tɔn,
mi dodónu syɛ́nsyɛ́n ayǐkúngban ɔ tɔn lɛ́,
ɖó Jexóva ɖó hwɛɖiɖɔxó ɖé xá togun tɔn,
Izlayɛ́li ná ɖɔ hwɛ xá wɛ é ɖe:
3 “Togun ce, étɛ́ un ka wa nú we?
Étɛ́ un ka wa bo nyí agban nú we?
Xlɛ́ ɖɔ hwɛ ce kún jɔ ó.
4 Ðó un ɖe we tɔ́n sín Ejípu to mɛ,
bo vɔ́ we xɔ sín to e mɛ a nyí kannumɔ ɖe é;
un sɛ́ Mɔyízi, Aalɔ́ɔn kpó Miliyámu kpó dó bɔ yě jɛ nukɔn nú we.
5 Togun ce, kɛnklɛ́n, flín nǔ e axɔ́sú Mɔwábu tɔn Baláki lin ná wa é,
kpó xósin e Baláamu Bosɔ́ɔ ví ɔ ná ɛ é kpó,
(nǔ e jɛ ɖo Citímu kpó Gilugálu kpó vlamɛ é),
énɛ́ ɔ, a ná tuun nǔwiwa jlɔ́jlɔ́ Jexóva tɔn lɛ́.”
6 Étɛ́ un ka ná hɛn yi Jexóva nukɔn?
Étɛ́ un ka ná hɛn bo ná ɖe kɔ́ ɖo Mawu jǐxwé tɔn ɔ nukɔn?
Nǔníná e è nɔ dó blěbú tɔn zo lɛ́ é, ɛɛn,
nyibúví e ɖó xwe ɖokpó lɛ́ é wɛ un ná hɛn yi nukɔn tɔn a?
7 Agbo afatɔ́n mɔ̌kpán, ɛɛn,
ami nǔjlɛ́nú afatɔ́n donu wǒ donu mɔ̌kpán wɛ nɔ hun xomɛ nú Jexóva a?
8 Gbɛtɔ́ è, é ɖɔ nǔ e nyí nǔ ɖagbe é nú we.
Étɛ́ ɖó nukún* ɖo así towe wɛ Jexóva ka ɖe?
Nǔ e ba wɛ é ɖe kpowun é wɛ nyí ɖɔ, a ní nɔ wa nǔ kpó hwɛjijɔ kpó,* yí wǎn nú gbejíninɔ,*
bo nɔ zán gbɛ kpó mɛɖéesɔ́hwe kpó ɖo Mawu towe nukɔn.
9 Gbe Jexóva tɔn ɖɔ nǔ sɛ́dó toxo ɔ mɛ;
mɛ ɖěɖěe ɖó nǔnywɛ́ e nyɔ́ zán lɛ́ é ná ɖó sísí e gɔ́ngɔ́n é nú nyǐkɔ towe.
Mi ɖó ayi kpo ɔ kpó mɛ e ɖó ayǐ é kpó wú.
10 Dɔkun e è jɛ gbɔn nǔnyanyawiwa gblamɛ lɛ́ é kpo ɖo mɛ nyanya sín xwégbe,
bɔ nǔjlɛ́nú éfa* e ma sɔgbe ǎ, bɔ è gbɛ́ wǎn ná é lɔmɔ̌ gɔ́ ná wɛ a?
11 Ényí un zán nǔdagan e ma sɔgbe ǎ lɛ́ é ɔ, ɛɛn,
sáki e mɛ nǔdanú mɛ hízíhízí tɔn lɛ́ ɖe é ɔ, un ka ná sixú mɛ́* ɖo walɔ ɖagbe lixo a?
12 Ðó dɔkunnɔ tɔn lɛ́ nɔ ɖo alǎnnú wa wɛ hwebǐnu,
bɔ mɛ tɔn lɛ́ nɔ ɖó adingban;
ɖɛ̌ e nɔ blɛ́ mɛ é wɛ ɖo nu yětɔn mɛ.
13 “Énɛ́ wú ɔ, un ná xo we káká bɔ a ná gblé wǔ,
bo ná bló bɔ a ná dán ɖěwagbɛn ɖó hwɛ towe lɛ́ wú.
14 A ná ɖu nǔ, é ka ná jɛmɛ nú we ǎ;
a ná nɔ adɔvɔ́.
Nǔ e a bɛ́ lɛ́ é ɔ, a ná hɛn yě yi wǔyɛ́yɛ́ afɔyɛ́yɛ́ ǎ,
bɔ ée a hɛn yi lɛ́ é ɔ, un ná jó yě nú kɛntɔ́ towe lɛ́.
15 A ná dó nǔkún, amɔ̌, a ná ya ǎ.
A ná li olívu, amɔ̌, a ná zán ami ɔ ǎ;
A ná li vǐwun bo ná mɔ vɛ̌ɛn yɔ̌yɔ́, amɔ̌, a ná nu vɛ̌ɛn ɖě ǎ.
16 Ðó mi nɔ xwedó tuto Ɔmúli tɔn lɛ́ gɔ́ nú nǔwiwa Akábu kpó xwédo tɔn kpó tɔn lɛ́ bǐ,
bɔ mi nɔ lɛ́ wa nǔ sɔgbe xá wěɖexámɛ yětɔn lɛ́.
Énɛ́ wú wɛ un ná sɔ́ we dó húzú nǔ e xyɔ́ wǔ é,
bɔ mɛ tɔn lɛ́ ná húzú nǔkiko;*
mi ná hɛn zun e togun lɛ́ nɔ zun mi é sín agban.”
7 Heelú mì! Un cí mɛ e,
ɖó è ko xo atínsínsɛ́n alǔun mɛ tɔn lɛ́ kplé,
bo ko cyán vǐwun e è jó dó ɖo vǐwun yiya sín hwenu lɛ́ é fó wútu ɔ,
é ma mɔ vǐwun sín kɔ ɖě bá ɖu,
alǒ fígi nukɔntɔn e sín kɔ xú i* tawun é ǎ é ɖɔhun.
2 Kún gbejínɔtɔ́ tɔn sú dó sín ayǐkúngban ɔ jí;
nǔjlɔ́jlɔ́watɔ́ ɖě ɖo gbɛtɔ́ lɛ́ mɛ ǎ.
Yě mɛ bǐ nɔ tɔ wu bá kɔn hun kɔn nyi ayǐ.
Mɛ ɖokpó ɖokpó nɔ nya nɔví éɖésúnɔ tɔn gbé gbɔn mɔ ɖíɖó n’i* gblamɛ.
3 Alɔ bí nú yě ɖo nǔnyanyawiwa mɛ;
axɔ́ví nɔ byɔ́ nǔ,
hwɛɖɔtɔ́ nɔ byɔ́ ɖɔ è ní sú axɔ́ émí,
mɛ nukúnɖéjí nɔ ɖe jlǒ tɔn lɛ́* xlɛ́,
bɔ yě nɔ kan ayixa ɖó kpɔ́.
4 Mɛ e nyɔ́ hú gǎn ɖo yě mɛ é cí wunkan ɖɔhun,
mɛ e nyí nǔjlɔ́jlɔ́watɔ́ hú gǎn ɖo yě mɛ é nylá hú wunkan sín kpá.
Azǎn e xó mɛcɔ́tɔ́ towe lɛ́ ɖɔ é, ɛɛn, hwɛɖɔzán ɔ ná wá.
Hwenɛ́nu ɔ, xɛsi ná jɛ yě jí.
5 Ma ɖeji dó nɔzo towe wú
alǒ gán jɛ xɔ́ntɔn vívɛ́ ɖé wú ó.
Hɛn ayi dó nǔ e a nɔ ɖɔ nú nyɔ̌nu e mlɔ́ awa towe mɛ é wú.
6 Ðó vǐ súnnu nɔ gbɛ́ wǎn nú tɔ́ tɔn,
bɔ vǐ nyɔ̌nu nɔ fɔ́n gǔ dó nɔ tɔn jí,
lobɔ vǐsi nɔ sí te dó asú tɔn nɔ jí;
xwé mɛtɔn gbe nu lɛ́ ɖésú wɛ nyí kɛntɔ́ mɛtɔn lɛ́.
7 Amɔ̌, nyɛ ɔ, un ná kpo ɖo nukún ɖó Jexóva wɛ kpó akpakpa sɔ́ mɛ kpó.
Un ná nɔ te kpɔ́n Mawu e nɔ hwlɛ́n mì é kpó suúlu kpó.*
Mawu ce ná ɖótó mì.
8 Kɛntɔ́ ce è, ma j’awǎ ɖó adǎn ɖo gbigbo mì wɛ wú ó.
Un j’ayǐ có, un ná lɛ́ sí te;
un na bo nɔ nɔ ablu mɛ ɔ, Jexóva ná nyí wěziza ce.
9 Un ná dɛ ɖo xomɛsin Jexóva tɔn nu,
(ɖó un hu hwɛ d’è)
káká jɛ hwenu e é ná jɛ hun dó jǐ ce ɖo hwɛ nukɔn, bo ná bló bɔ è ná dá hwɛ jlɔ́jlɔ́ nú mì dó é.
É ná kplá mì wá wěziza nu;
un ná mɔ hwɛjijɔ tɔn.
10 Kɛntɔ́ ce lɔ ná mɔ,
bɔ winnyá ná vun blá éyɛ́ mɛ e ɖɔ xó élɔ́ nú mì é:
“Fítɛ́ Jexóva Mawu towe ka ɖe?”
Nukún ce lɛ́ ná mɔ ɛ.
È ná sɔ́ afɔ dó gbídí i babá e nɔ nɔ ali jí é ɖɔhun.
11 É ná nyí azǎn e gbe è ná mɛ awǐnnya sín dǒ towe lɛ́ é;
gbe énɛ́ gbe ɔ, è ná gbló ada nú dogbó ɔ.*
12 Gbe énɛ́ gbe ɔ, yě ná wá gɔ̌n towe
sín káká Asilíi kpó toxo Ejípu tɔn lɛ́ kpó mɛ,
sín Ejípu káká yi Tɔ ɔ* kɔn;
sín xu ɖé kɔn jɛ xu ɖěvo kɔn, sín só ɖé kɔn jɛ só ɖěvo kɔn.
13 Bɔ to ɔ ná jɛ vɔ̌, ɖó mɛ e ɖ’é mɛ lɛ́ é wútu,
ɛɛn, ɖó nǔ e yě wa lɛ́ é wútu.*
14 Sɔ́ kpo towe dó nyi togun towe, ɛɛn, lɛ̌ngbɔ́hwan e nyí gǔ towe é,
mɛ e nɔ éɖokpónɔ ɖo zungbó mɛ, ɖo atínsínsɛ́ngbo tɛ́ntin é.
Yě ní ɖu nǔ ɖo Basáni kpó Galádi kpó lěe é nɔ nyí gbɔn ɖ’ayǐ é.
15 “Hwenu e a tɔ́n sín Ejípu to mɛ é ɖɔhun ɔ,
un ná xlɛ́ we nǔ ɖagbe ɖagbe lɛ́.
16 Akɔta lɛ́ ɖó hlɔ̌nhlɔ́n tawun có, yě ná mɔ bɔ winnyá ná hu yě.
Yě ná sɔ́ alɔ yětɔn lɛ́ ɖó nu;
tó yětɔn lɛ́ ná kú.
17 Yě ná ɖíɖɔ́ kɔ́ dan lɛ́ ɖɔhun;
kanlin e nɔ sá ɖo ayǐkúngban ɔ jí lɛ́ é ɖɔhun ɔ, yě ná tɔ́n sín ahohó yětɔn lɛ́ mɛ bo ná ɖo sísɔ́ sísɔ́ wɛ.
Yě ná wá Jexóva Mawu mǐtɔn gɔ́n kpó xɛsi ɖaxó kpó,
bɔ yě ná ɖi xɛsi nú we.”
18 Mawu tɛ́ ka cí hwiɖɔhun,
bo nɔ sɔ́ nǔwanyido lɛ́ kɛ mɛ, lobo nɔ jó hwɛhuhu togun* tɔn sín mɛ e kpo lɛ́ é tɔn dó?
É ná nɔ xomɛsin jí káká sɔ́yi ǎ,
ɖó wǎnyíyí e ma nɔ sɛ do ǎ é ɖiɖexlɛ́ wɛ nɔ dó xomɛhunhun n’i.
19 É ná lɛ́ kú nǔbláwǔ nú mǐ; é ná ɖu ɖo nǔwanyido mǐtɔn lɛ́ jí.*
A ná nyi hwɛ yětɔn lɛ́ bǐ dó xuzan mɛ.
20 A ná wa nǔ xá Jakɔ́bu kpó gbejíninɔ kpó,
bo ná ɖe wǎnyíyí e ma nɔ sɛ do ǎ é xlɛ́ Ablaxámu,
sɔgbe xá nǔ e a xwlé nú tɔ́gbó mǐtɔn lɛ́ sín hwexónu é.
Sɛ́nkpo Micɛ́li (tínmɛ tɔn wɛ nyí “Mɛ̌ ka cí Mawu ɖɔhun?”) tɔn alǒ sɛ́nkpo Mikáya (tínmɛ tɔn wɛ nyí “Mɛ̌ ka cí Jexóva ɖɔhun?”) tɔn.
Alǒ “ayǐkúngban wɛnjɛ.”
Blǔju tɔn, “xwé.”
Blǔju tɔn, “kɔn.”
Alǒ “akwɛ́ e è nɔ sú i ɖó tonyinya tɔn wú lɛ́ é bǐ.”
Alǒ “ɖo Afla sín xwégbe.”
Blǔju tɔn, “Nyɔ̌nu.”
Blǔju tɔn, “Nyɔ̌nu.”
Blǔju tɔn, “nyɔ̌nu.”
Blǔju tɔn, “nyɔ̌nu.”
Vlafo vǐ nyɔ̌nu Sinyɔ́ɔ tɔn.
Alǒ “é su hweɖénu.”
Blǔju tɔn, “Xwé Akizíbu tɔn lɛ́.”
Blǔju tɔn, “Nyɔ̌nu.”
Alǒ “mɛ e nɔ xo mɛ ɖěvo sín nǔ yí é.”
“Xókwín Ebléegbe tɔn ɔ sixú lɛ́ dó gesí hɔ̌n.”
Blǔju tɔn, “xwédo.”
Blǔju tɔn, “ɖe kɔ sín mɛ.”
Alǒ vlafo, “yí sín awu wú.”
Alǒ “nǔɖazɛ́n nu gblogblo.”
Alǒ vlafo, “hwenu e yě ɖó nǔɖé bo ná tɛ aɖǔ jí é.”
Alǒ “cyɔ́n nǔ dó nu yětɔn.”
Blǔju tɔn, “Tatɔ́.”
Alǒ “kpatágan.”
Alǒ “yě nɔ ɖɔ ɖɔ émí ɖeji dó Jexóva wú enyíi.”
Alǒ “sinsɛnxɔ ɔ sín só.”
Alǒ “só kpɛví e atín blá ta ná é.”
Alǒ “Ðo akpáxwé gǔdo gúdo tɔn azǎn lɛ́ tɔn ɔ.”
Alǒ “nǔkplɔ́nmɛ.”
Alǒ “sɔ́ nǔ lɛ́ ɖó nǔganjí.”
Alǐn e nɔ nɔ glelɛmɔ nu é wɛ.
Alǒ “nɔ.”
Blǔju tɔn, “Jexóva ahwankpá lɛ́ tɔn sín nu.”
Alǒ “xóxó.”
Alǒ “wěɖexámɛ.”
Blǔju tɔn, “afatɔ́n.”
Alǒ “gǎn.”
Blǔju tɔn, “dó nyi.”
Alǒ “kinnikínní wínnyáwínnyá e ko ɖó kɔjafún é.”
Blǔju tɔn, “éé ɖo alɔ mitɔn lɛ́ mɛ é.”
Kpɔ́n Xógbe ɖé lɛ́ sín tínmɛ.
Alǒ “sínsɛ́n agbaza ce tɔn.”
Alǒ “ɖó lǐndɔ̌n ce sín hwɛ.”
Alǒ “byɔ́.”
Alǒ “wa nǔ e sɔgbe é; nǔ jlɔ́jlɔ́.”
Alǒ “nyɔ́ xomɛ bo lɛ́ nɔ gbejí ɖo wǎnyíyí towe mɛ.” Blǔju tɔn, “yí wǎn nú wǎnyíyí e ma nɔ sɛ do ǎ é.”
Kpɔ́n Mɔj. B14.
Alǒ “nyí xomɛvɔ́nɔ.”
Blǔju tɔn, “nǔ e ta è nɔ kwínkwín dó é.”
Alǒ “lǐndɔ̌n tɔn.”
Blǔju tɔn, “ɖɔ e è nɔ dó nya gbě ná é.”
Alǒ “nǔ e jló lǐndɔ̌n tɔn vɛ́návɛ́ná lɛ́ é.”
Alǒ “kpó linlin e sɔgbe é kpó.”
Alǒ vlafo, “gbetakɛ́n ɔ ná ɖo fí línlín tawun.”
Énɛ́ wɛ nyí, Efláti tɔ ɔ.
Blǔju tɔn, “ɖó nǔwiwa yětɔn lɛ́ sín sínsɛ́n wútu.”
Blǔju tɔn, “gǔ.”
Alǒ “gbídí nǔwanyido mǐtɔn lɛ́.”