JONÁSI

1 Xó e Jexóva ɖɔ nú Jonási* Amitáyi ví ɔ é ɖíe: 2 “Sí te, bo yi Ninívu, toxo ɖaxó ɔ mɛ bo ɖɔ nú toxo ɔ mɛ nu lɛ́ ɖɔ un ná ɖó hwɛ nú yě, ɖó nǔnyanyawiwa yětɔn hun káká wá gɔ̌n ce.”

3 Amɔ̌, Jonási hɔn sín Jexóva nukɔn, bo ɖidó Taasísi. É yi Jopée bo mɔ tɔjíhún ɖé bɔ é xwe Taasísi. Énɛ́ ɔ, é sú hǔnkwɛ́ lobo byɔ́ tɔjíhún ɔ mɛ, bá xwedó yě yi Taasísi, bo ná dó hɔn sín Jexóva nukɔn.

4 Énɛ́ wú ɔ, Jexóva sɛ́ jɔhɔn ɖaxó ɖé dó xu ɔ jí, bɔ jɔhɔn ɔ ɖo adǎn jí sɔmɔ̌ bɔ tɔjíhún ɔ ɖibla gba. 5 Xɛsi jɛ tɔjíhúnkuntɔ́ lɛ́ jí káká bɔ mɛ ɖokpó ɖokpó jɛ nǔmɛsɛn tɔn ylɔ́ jí ɖɔ é ní d’alɔ émí. Bɔ yě jɛ agban e ɖo tɔjíhún ɔ mɛ lɛ́ é nyi dó xu ɔ mɛ jí, bónú é ná dó fúɖá. Jonási ka ko yi fí e yi do bǐ ɖo tɔjíhún ɔ mɛ é, bo mlɔ́ ayǐ, bo byɔ́ sɛnmlɔ mɛ nɛ́. 6 Tɔjíhúnkuntɔ́gán ɔ sɛkpɔ́ ɛ, bo ɖɔ n’i ɖɔ: “Étɛ́wú a ka ɖo amlɔ dɔ́ wɛ? Sí te, bo sa vo nú nǔmɛsɛn towe! Bóyá Mawu nǔgbó ɔ ná kú nǔbláwǔ nú mǐ, bɔ mǐ ná dɔn ǎ.”

7 Énɛ́ gúdo ɔ, tɔjíhúnkuntɔ́ lɛ́ ɖɔ nú yěɖée lɛ́ ɖɔ: “Mi wá, nú mǐ ná nyi akɔ, bo ná tuun mɛ e wú awě élɔ́ sín é.” Énɛ́ ɔ, yě nyi akɔ bɔ é jɛ Jonási jí. 8 Yě ɖɔ n’i ɖɔ: “Kɛnklɛ́n ɖɔ nú mǐ, hwi wú wɛ awě élɔ́ ɖo mǐ xo wɛ a? Azɔ̌ tɛ́ a ka nɔ wa? Fítɛ́ a ka gosín? To tɛ́ mɛ nu ka nú we? Togun tɛ́ mɛ a ka gosín?”

9 É yí gbe ɖɔ: “Eblée wɛ nú mì, bɔ un nɔ ɖó sísí e gɔ́ngɔ́n é nú* Jexóva Mawu jǐxwé tɔn ɔ, mɛ e bló xu kpó ayǐkúngban xúxú kpó é.”

10 Ée yě se mɔ̌ é ɔ, xɛsi lɛ́ jɛ yě jí d’é jí, ɖó é ko ɖɔ nú yě ɖɔ émí ɖo hinhɔn nú Jexóva wɛ wútu. Énɛ́ ɔ, yě kanbyɔ́ ɛ ɖɔ: “Étɛ́ a ka wa nɛ́?” 11 Bɔ yě ɖɔ n’i ɖɔ: “Étɛ́ mǐ ka ɖó ná wa nú we bɔ xu ɔ ná hwíhwɛ́?” Ðó xu ɔ fɔ́n bo ɖo adǎn wa d’é jí wɛ. 12 É yí gbe ɖɔ: “Mi zé mì, bo nyi mì dó xu ɔ mɛ, énɛ́ ɔ, xu ɔ ná hwíhwɛ́; ɖó un tuun ɖɔ nyi wú wɛ jɔhɔn ɖaxó élɔ́ ɖo ya dó nú mi wɛ.” 13 É ɖo mɔ̌ có, tɔjíhúnkuntɔ́ lɛ́ dó gǎn tawun bá kun tɔjíhún ɔ* yi agě jí, yě ka kpé wú ǎ, ɖó xu ɔ fɔ́n bo ɖo adǎn wa d’é jí wɛ lɛ́ lɛ̌ dó yě.

14 Énɛ́ gúdo ɔ, yě sa vo nú Jexóva, bo ɖɔ: “Áo, Jexóva è, kɛnklɛ́n, ma lɔn nú mǐ dɔn ɖó nya élɔ́ wú ó! Jexóva è, ma lɛ́n xomɛvɔ́nɔ sín hun dó kɔ nú mǐ ó, ɖó lěe é nyɔ́ nú we gbɔn é wɛ a bló gbɔn.” 15 Énɛ́ ɔ, yě sɔ́ Jonási, bo nyi i dó xu ɔ mɛ, bɔ adǎn e jí xu ɔ ɖe é xwɛ. 16 Énɛ́ gúdo ɔ, xɛsi ɖaxó ɖé jɛ tɔjíhúnkuntɔ́ lɛ́ jí dó Jexóva wú, bɔ yě xwlé vɔ̌sánú ɖé Jexóva, bo lɛ́ dó akpá n’i.

17 Bɔ Jexóva sɛ́ hweví ɖaxó ɖé dó bónú é ná mì Jonási; Jonási nɔ hweví ɔ xomɛ nú kéze atɔn zǎn atɔn.

2 Hwenu e Jonási ɖo hweví ɔ xomɛ é ɔ, é xo ɖɛ sɛ́dó Jexóva Mawu tɔn, 2 bo ɖɔ:

“Hwenu e un ɖo wǔvɛ́ mɛ é ɔ, un sa vo nú Jexóva, bɔ é ɖótó mì.

Hwenu e un ɖo Yɔdo* gɔngɔn* mɛ é ɔ, un sú xó bo byɔ́ alɔdó.

A se gbe ce.

Aslɔkɛ́ agbɔ̌nnɔ e a fɔ́n lɛ́ é ɖi bú mì.

 4 Bɔ un ɖɔ: ‘È ko nya mì sín nukɔn towe!

Un ka sɔ́ sixú lɛ́ wá kpɔ́n sinsɛnxɔ mímɛ́ towe tlítlí gbeɖé a?

Xumɛgbéhan nyanya lɛ́ lɛ́ dó ta ce.

 6 Un syɔ́ káká yi só lɛ́ glɔ́.

Ayǐkúngban ɔ sín hɔntogbó lɛ́ sú dó mì káká sɔ́yi.

Amɔ̌, Jexóva Mawu ce, a ɖe mì sín do gɔngɔn mɛ wá gbɛ.

 7 Hwenu e un* ɖo kú donu é ɔ, hwi Jexóva wɛ nyí mɛ e un flín é.

Énɛ́ ɔ, ɖɛ ce wá gɔ̌n towe, káká wá sinsɛnxɔ mímɛ́ towe mɛ.

 8 Mɛ ɖěɖěe zé yěɖée jó nú bǒcyɔ ma xɔ akwɛ́ lɛ́ é wɔn mɛ e nyí jɔtɛn wǎnyíyí e ma nɔ sɛ do ǎ é tɔn nú yě é.*

 9 Amɔ̌ nyɛ ɔ, un ná sɔ́ gbe ce dó dó kú nú we, bo lɛ́ xwlé vɔ̌sánú we.

Akpá e un dó é ɔ, un ná ɖe.

Jexóva gɔ́n wɛ hwlɛngán nɔ gosín.”

10 É wá yá é ɔ, Jexóva ɖe gbe nú hweví ɔ, bɔ é vi Jonási nyi agě jí.

3 Énɛ́ gúdo ɔ, Jexóva ɖɔ nú Jonási azɔn wegɔ́ ɔ ɖɔ: 2 “Sí te, bo yi Ninívu, toxo ɖaxó ɔ mɛ, bo dó wɛn e dó we wɛ un ɖe é yě.”

3 Énɛ́ ɔ, Jonási se tónú nú xó Jexóva tɔn, bo yi Ninívu. Toxo e d’agba tawun é ɖé* wɛ Ninívu nyí, bɔ é nɔ byɔ́ azǎn atɔn cóbɔ è ná ɖi zɔnlin gbɔn mɛ. 4 Jonási byɔ́ toxo ɔ mɛ, bo ɖi zɔnlin nú azǎn ɖokpó blěbú, bɔ é ɖo yiyi wɛ ɔ, é nɔ jlá ɖɔ: “Ðo azǎn 40 kpowun gbe ɔ, è ná gba Ninívu.”

10 Ée Mawu nǔgbó ɔ mɔ nǔ e yě wa é, lěe yě jó ali nyanya e yě mlɛ́ lɛ́ é dó gbɔn é ɔ, é húzú linlin dó awě e é ɖɔ émí ná dɔn wá yě jí é wú,* bɔ é sɔ́ dɔn wá ǎ.

4 Amɔ̌, nǔ énɛ́ vɛ́ Jonási wú tawun, bɔ xomɛ sin i ɖésú. 2 Énɛ́ wú ɔ, é xo ɖɛ sɛ́dó Jexóva ɖɔ: “Có Jexóva, nǔ e un lin hwenu e un ɖo to ce mɛ é pɛ́ɛ́ nɛ́. Nǔ e wú un tɛ́n kpɔ́n bo ná hɔn yi Taasísi azɔn nukɔntɔn ɔ é nɛ́; ɖó un tuun ɖɔ a nyí Mawu wǔvɛ́sexámɛtɔ́* kpó nǔbláwǔkúnúmɛtɔ́ kpó, a nɔ yá wǔ sin xomɛ ǎ, lobɔ wǎnyíyí e ma nɔ sɛ do ǎ é túnflá ɖo así towe, awěxomɛ nɔ vɛ́ nú we. 3 Din ɔ, Jexóva è, kɛnklɛ́n bo yí gbɛ* ce, ɖó un kú ɔ, é kpɔ́n te nú mì hú un nɔ gbɛ.”

4 Jexóva kanbyɔ́ ɛ ɖɔ: “É ka sɔgbe ɖɔ xomɛ ní sin we sɔmɔ̌ a?”

5 Énɛ́ gúdo ɔ, Jonási tɔ́n sín toxo ɔ mɛ, bo yi jínjɔ́n ayǐ ɖo zǎnzǎnhwe jí toxo ɔ tɔn. É dó azava ɖokpó ɖó fínɛ́, bo jínjɔ́n yɛtɛn tɔn, bo ná kpɔ́n nǔ e ná jɛ dó toxo ɔ wú é. 6 Énɛ́ gúdo ɔ, Jexóva Mawu bló bɔ kátín ɖé wú ɖo Jonási tanu, bo ná dó dó yɛtɛn n’i bónú wǔvɛ́ tɔn ná ɖe kpo. Xomɛ hun Jonási tawun ɖó kátín ɔ wú.

7 Amɔ̌, ayǐhɔ́ngbe tɔn zǎnzǎn tɛɛn ɔ, Mawu nǔgbó ɔ sɛ́ wǎnvú ɖé dó, bɔ é ɖu kátín ɔ, bɔ é xú. 8 Hwenu e hwesivɔ́ jɛ syɛ́nsyɛ́n jí é ɔ, Mawu lɛ́ sɛ́ zǎnzǎnhwe jí sín jɔhɔn zozo ɖé dó, bɔ hwesivɔ́ ɔ ɖo ta mɛ nú Jonási wɛ, bɔ é jɛ éɖée ba kpo jí. É nɔ ɖo kú byɔ́ wɛ,* bo nɔ ɖo ɖiɖɔ wɛ ɖɔ: “Un kú ɔ, é kpɔ́n te nú mì hú un nɔ gbɛ.”

9 Mawu kanbyɔ́ Jonási ɖɔ: “É ka sɔgbe ɖɔ xomɛ ní sin we sɔmɔ̌ ɖó kátín ɔ wú a?”

Bɔ é ɖɔ: “Ɛɛn, hwɛ ce jɔ ɖɔ un sin xomɛ, bo sin xomɛ káká bo ba ná kú.” 10 Amɔ̌, Jexóva ɖɔ n’i ɖɔ: “Kátín e a ma tun ǎ, bo ma ka lɛ́ tuun do tɔn có é su ǎ é nɛ́ vɛ́ nú we nɛ́. É su ɖo zǎn ɖokpó mɛ, bo lɛ́ kú ɖo zǎn ɖokpó mɛ. 11 Ninívu, toxo ɖaxó e mɛ gbɛtɔ́ 120000 jɛjí ɖe, bɔ yě ma tlɛ tuun ɖagbe ɖó vo nú nyanya ǎ é,* gɔ́ nú kanlin yětɔn tobutóbú lɛ́ sín nǔ ɖó ná blá wǔ nú nyi lɔ ǎ cé?”