EZAYÍI

 2 Jǐxwé è, ɖǒtó! Ayǐkúngban è, tɛ́ tó!

Ðó Jexóva ɖɔ xó:

“Un kpé nukún dó vǐ súnnu lɛ́ wú bɔ yě su, bɔ un lɛ́ kplɔ́n yě,

amɔ̌, yě fɔ́n gǔ dó jǐ ce.

 3 Nyibúsú nɔ tuun mɛ e xɔ ɛ é ganjí,

bɔ tócí nɔ tuun nǔ e mɛ mɛ e ɖó è é nɔ ná ɛ nǔɖuɖu dó é;

amɔ̌, Izlayɛ́li tuun mì* ǎ,

togun nyiɖésúnɔ tɔn nɔ wa nǔ kpó nukúnnúmɔjɛnǔmɛ kpó ǎ.”

 4 Heelú akɔta hwɛhutɔ́ ɔ,

togun e nǔwanyido kpɛn é,

mɛdídá kúnkan, vǐ gblégblé lɛ́!

Yě jó Jexóva dó;

yě wa nǔ xá Mɛ mímɛ́ Izlayɛ́li tɔn ɔ kpó mɛmasí kpó;

yě dó gǔdo è.

Ta mitɔn blěbú ɖo azɔn jɛ wɛ,

bɔ ayi mitɔn blěbú ɖo azɔn jɛ wɛ.

Akpa, fí e só hun lɛ́ é kpó agadá kpó wɛ;

è kpé nukún d’é wú,* blá, alǒ ɖó ami mɛ ǎ.

 8 È jó vǐ nyɔ̌nu Sinyɔ́ɔ tɔn dó xɔ* e ɖo vǐwungbo mɛ é ɖɔhun,

è jó è dó goxɔ e ɖo kɔnkɔ́nbugle mɛ é ɖɔhun,

è jó è dó toxo e è ján go dó é ɖɔhun.

 9 Ényí Jexóva ahwankpá lɛ́ tɔn ma ko jó ahwanɖukpo kwínwe ɖé dó nú mǐ wɛ ǎ ɔ,

mǐ ná ko cí Sodɔ́mu ɖɔhun,

bo ná ko cí Gomɔ́ɔ ɖɔhun.

“Nǔníná agbo tɔn e mi nɔ dó zo lɛ́ é kpó jǒ kanlin e è ná nǔɖuɖu ganjí lɛ́ é tɔn kpó ci mì,

nyibúsú wínnyáwínnyá, lɛ̌ngbɔ́ví kpó gbɔ̌ kpó sín hun nɔ dó xomɛhunhun ɖě nú mì ǎ.

12 Hwenu e mi nɔ xwetɔ́n ɖo nukɔn ce é ɔ,

mɛ̌ ka byɔ́ mi ɖɔ

mi ní nɔ gbídí kɔ́xota ce lɛ́?

Sunwájǐxwe, gbɔjɛzánxwe, kplé e mi nɔ ylɔ́ lɛ́ é . . . ,

un sixú dɛ ɖo hlɔ̌nhlɔ́n majíki tɔn e mi nɔ zán ɖo kplé bǔnɔ mitɔn domɛ é nu ǎ.

Agban wɛ yě húzú nú mì;

hinhɛn tɔn ci kɔ nú mì.

15 Nú mi dlɛ́n alɔ mitɔn lɛ́ ɔ,

un nɔ kpɔ́n mi ǎ.

mi nɔ xo ɖɛ gěgé có,

un nɔ ɖótó ǎ;

alɔ mitɔn lɛ́ kɔn hun gěgé kɔn nyi ayǐ.

16 Mi lɛ miɖée wé, mi slá wǔ nú miɖée;

mi ma sɔ́ nɔ wa nǔ nyanya ɖě ɖo nukún ce mɛ ó;

mi ɖó nǔnyanyawiwa te.

17 Mi ní nɔ kplɔ́n bo nɔ wa ɖagbe, mi ní nɔ ba hwɛjijɔ,

mi ní nɔ gbɛ́ nǔ nú yadónúmɛtɔ́,

mi ní nɔ jɛ hun dó acɛ e tɔ́cyɔvǐ ɖó lɛ́ é jí,

mi ní nɔ jɛ ahwan asúkúsi jí.”

“Hwɛ mitɔn lɛ́ ná bo myá cɛ́cɛ́ ɔ,

è ná bló bɔ yě ná wé laglási linfín ɖɔhun;

yě ná bo myá avɔ e myá tawun é ɖɔhun ɔ,

yě ná wá cí lɛ̌ngbɔ́fún ɖɔhun.

19 Ényí mi ɖe xlɛ́ ɖɔ émí ɖó jlǒ ɖagbe, bo lɛ́ se tónú ɔ,

mi ná ɖu nǔ ɖagbe e ɖo to ɔ mɛ lɛ́ é.

20 Amɔ̌, ényí mi gbɛ́ bo fɔ́n gǔ ɔ,

hwǐ ná vɔ mi,

ɖó xó e tɔ́n sín Jexóva nu mɛ é nɛ́.”

Hwɛjijɔ wɛ gɔ́ mɛ ɖ’ayǐ;

nǔjlɔ́jlɔ́wiwa wɛ nɔ nɔ mɛ ɖ’ayǐ,

amɔ̌ din ɔ, mɛhutɔ́ lɛ́ wɛ ɖ’é mɛ.

22 Kpatágan towe húzú nǔ kwíji,

bɔ bǐya towe* ɔ, è dó sin jí.

Yě nɔ ɖɔ hwɛ jlɔ́jlɔ́ nú tɔ́cyɔvǐ ǎ,

yě nɔ ké ya nú hwɛɖiɖɔxó asúkúsi tɔn gbeɖé ǎ.

24 Énɛ́ wɛ zɔ́n bɔ Aklúnɔ nǔgbó ɔ, Jexóva ahwankpá lɛ́ tɔn,

Mɛ hlɔ̌nhlɔ́nnɔ Izlayɛ́li tɔn ɔ ɖɔ:

“Éénɛ́! Un ná sú kún dó nú mɛ e ma ɖo jǐ ce ǎ lɛ́ é,

un ná ba hlɔn kɛntɔ́ ce lɛ́ wú.

25 Alɔ ce ná jɛ wǔ we,

un ná ɖe nǔ kwíji sín wǔ we bǐ mlɛ́mlɛ́,

bo ná ɖe nǔ blíblí towe lɛ́ bǐ síin.

26 Un ná lɛ́ sɔ́ hwɛɖɔtɔ́ towe lɛ́ ɖó nu towe, lěe é nyí gbɔn ɖo bǐbɛ́mɛ é.

Bo ná lɛ́ sɔ́ wěɖexámɛtɔ́ towe lɛ́ ɖó nu towe, lěe é nyí gbɔn ɖo bǐbɛ́mɛ é.

27 È ná vɔ́ Sinyɔ́ɔ xɔ gbɔn hwɛjijɔ gblamɛ,

bo ná vɔ́ mɛ tɔn e lɛ́ kɔ lɛ́ é xɔ gbɔn nǔjlɔ́jlɔ́wiwa gblamɛ.

28 È ná sú gǔfɔ́ntɔ́ lɛ́ kpó hwɛhutɔ́ lɛ́ kpó sín kún dó ɖó kpɔ́,

bɔ mɛ ɖěɖěe jó Jexóva dó lɛ́ é sín xó ná fó.

29 Ðó winnyá ná hu yě dó atín ɖaxó ɖaxó e mi jló lɛ́ é wú,

bɔ wi mitɔn ná kɔ́n ɖó jikpá e mi sɔ́ lɛ́ é wútu.*

30 Ðó mi ná cí atín ɖaxó e mlú ɖa é ɖɔhun,

bo ná cí jikpá e ba sin kpo é ɖɔhun.

31 Súnnu hlɔ̌nhlɔ́nnɔ ná húzú nǔywɛ́,

bɔ azɔ̌ tɔn ná húzú myɔkán;

yě mɛ we lɛ́ bǐ ná ji ɖó kpɔ́,

bɔ mɛ ɖěbǔ ná cí myɔ ɔ ǎ.”

 2 Ðo azǎn gǔdo gúdo tɔn lɛ́ mɛ ɔ,

só e jí xwé Jexóva tɔn ɖe é

ná lí dǒ syɛ́nsyɛ́n bo ná yi jǐ hú só ɖaxó lɛ́,

é ná yi jǐ hú só kpɛví lɛ́,

bɔ akɔta lɛ́ bǐ ná nɔ nyi ahwan yi kɔn.

“Mi wá, mi nú mǐ ní yi só Jexóva tɔn jí,

mǐ ní yi Mawu Jakɔ́bu tɔn sín xwégbe.

É ná kplɔ́n nǔ mǐ dó ali tɔn lɛ́ wú,

bɔ mǐ ná ɖi zɔnlin gbɔn ali tɔn lɛ́ jí.”

Ðó sɛ́n* ná tɔ́n sín Sinyɔ́ɔ,

bɔ xó Jexóva tɔn ná tɔ́n sín Jeluzalɛ́mu.

 4 É ná ɖɔ hwɛ ɖo akɔta lɛ́ tɛ́ntin,

bo ná jlá nǔ lɛ́ ɖó nú togun gěgé.

Yě ná sɔ́ hwǐ yětɔn lɛ́ dó tun glelɛmɔlín* ná,

bo ná sɔ́ hwǎn yětɔn lɛ́ dó tun nǔkúnyanú ná.

Akɔta ɖě sɔ́ ná sɔ́ hwǐ dó akɔta ɖěvo jí ɖě ǎ,

mɔ̌ jɛ́n yě ma ka sɔ́ ná kplɔ́n ahwanfunfun ɖě ǎ é nɛ́.

 5 Kúnkan Jakɔ́bu tɔn è, wǎ!

Mi nú mǐ ní ɖi zɔnlin ɖo wěziza Jexóva tɔn nu.

 6 Mawu è, a wɔn togun towe, kúnkan Jakɔ́bu tɔn ɔ,

ɖó nǔ e gosín Zǎnzǎnhwe jí lɛ́ é gɔ́ to ɔ;

yě nɔ bló majíki Filisitɛ́ɛn lɛ́ ɖɔhun,

bɔ toɖévomɛnu lɛ́ sín vǐ sukpɔ́ ɖo yě gɔ́n.

 7 Kpatágan kpó siká kpó gɔ́ to yětɔn,

bɔ dɔkun yětɔn lɛ́ ɔ, è sixú sɔ́ kɛ́n yětɔn ǎ.

Sɔ́ gɔ́ to yětɔn,

bɔ kɛkɛ́ví yětɔn lɛ́ ɔ, è sixú sɔ́ kɛ́n yětɔn ǎ.

Yě nɔ ɖe kɔ́ nú nǔ e alɔ yěɖésúnɔ tɔn lɛ́ wa é,

nú nǔ e alɔví yěɖésúnɔ tɔn lɛ́ bló é.

 9 Mɔ̌ mɛ ɔ, gbɛtɔ́ nɔ ɖe éɖée kpo, bo nɔ ɖu winnyá,

a sixú sɔ́ hwɛ kɛ yě ǎ.

10 Mi byɔ́ só lɛ́ mɛ, bo hwlá miɖée dó kɔ́gúdu mɛ,

ɖó xomɛsin Jexóva tɔn hu ado,

bɔ susu tɔn d’agba.

11 Nukún e nɔ yí go lɛ́ é ɔ, è ná dɔn dó do,

bo ná dó winnyá mɛ e nɔ mɔ yěɖée lɛ́ é.

Azǎn énɛ́ ná wá mɛ e nɔ mɔ yěɖée lɛ́ é kpó mɛ e nɔ yí go lɛ́ é kpó jí,

é ná wá mɛ bǐ jí, mɛ e è sɔ́ su é, alǒ mɛ e è sɔ́ hwe é.

13 É ná wá sɛ́dlutín Libáan tɔn e yi jǐ lɛ́ é kpó ée è sɔ́ yi aga lɛ́ é kpó jí,

bo ná wá cɛ́nitín Basáni tɔn lɛ́ bǐ jí.

14 É ná wá só ɖaxó lɛ́ bǐ jí,

bo ná wá só kpɛví lɛ́ bǐ jí.

15 É ná wá atɔxwɛ ɖaxó lɛ́ bǐ kpó ahohó syɛ́nsyɛ́n lɛ́ bǐ kpó jí,

16 é ná wá tɔjíhún Taasísi tɔn lɛ́ bǐ jí,

bo ná wá tɔjíhún e nɔ jló mɛ lɛ́ é bǐ jí.

17 Mɛ e nɔ yí go lɛ́ é ɔ, è ná zin yě dɛ́,

bo ná dó winnyá mɛ e nɔ mɔ yěɖée lɛ́ é.

19 Gbɛtɔ́ lɛ́ ná byɔ́ só xomɛ,

bo ná byɔ́ do mɛ ɖo kɔ́ glɔ́,

ɖó xomɛsin Jexóva tɔn hu ado,

bɔ susu tɔn d’agba,

hwenu e é ná sí te, bo ná húnhún ayǐkúngban ɔ, lobo ná dó xɛsi gbɛtɔ́ lɛ́ é.

20 Ðo azǎn énɛ́ gbe ɔ, gbɛtɔ́ lɛ́ ná bɛ́ nǔmɛsɛn maɖótaɖé yětɔn ɖěɖěe è sɔ́ kpatágan kpó siká kpó dó bló ná,

bɔ yě bló nú yěɖée bo ná ɖe kɔ́ ná lɛ́ é,

bo ná bɛ́ nyi dó tɔn lɛ́* kpó afluflwi lɛ́ kpó.

21 Yě ná byɔ́ sónu lɛ́ mɛ,

bo ná byɔ́ sóvla lɛ́ mɛ,

ɖó xomɛsin Jexóva tɔn hu ado,

bɔ susu tɔn d’agba,

hwenu e é ná sí te, bo ná húnhún ayǐkúngban ɔ, lobo ná dó xɛsi gbɛtɔ́ lɛ́ é.

22 Ðó ɖagbe mitɔn wútu ɔ, mi ma sɔ́ nɔ ɖeji dó gbɛtɔ́ yǎyá wú ɖě ó,

funfún e nɔ tɔ́n sín awɔntín tɔn mɛ é kpowun wɛ é nyí,*

3 Éɖíe! Aklúnɔ nǔgbó ɔ, Jexóva ahwankpá lɛ́ tɔn

ɖo nǔ alɔkpa alɔkpa e wú è nɔ gán jɛ lɛ́ é kpó nǔɖuɖu kpó ɖe sín Jeluzalɛ́mu kpó Judáa kpó wɛ,

wɔ̌xúxú kpó sin kpó bǐ,

 2 súnnu hlɔ̌nhlɔ́nnɔ kpó ahwanfuntɔ́ kpó,

hwɛɖɔtɔ́ kpó gbeyíɖɔ kpó, amɔɛkantɔ́ kpó mɛxó kpó,

 3 gǎn e kp’acɛ nú gbɛtɔ́ 50 é, tonukún kpó wěɖexámɛtɔ́ kpó,

majíkiblótɔ́ xéɖéxéɖé kpó nǔnyíylɔ́númɛtɔ́ alɔsekpɛ́nnánɔ kpó.

 4 Un ná bló bɔ súnnuví lɛ́ ná nyí axɔ́ví yětɔn lɛ́,

bɔ mɛ e ma lí dǒ ǎ é* ná kp’acɛ dó yě nu.

 5 Mɛ e ɖo togun ɔ mɛ lɛ́ é ná nɔ dó ya nú yěɖée lɛ́,

mɛ ɖokpó ɖokpó ná nɔ dó ya nú nɔzo tɔn.

Súnnuví ná tɔ́n ahwan degénɔ,

bɔ mɛ e ma ɖó wi káká ɖé ɖo ta ǎ é ná gbɛ́ gbe nú mɛ e sísí jɛxá é.

“Un ná nyí akpaklɔ́tɔ́* mitɔn ǎ;

un ɖó nǔɖuɖu, alǒ awu ɖě ɖo xwé ce gbe ǎ.

 8 Ðó Jeluzalɛ́mu klɛ́n afɔ,

bɔ Judáa j’ayǐ,

ɖó yě fɔ́n gǔ dó Jexóva jí ɖo xó kpó nǔwalɔ kpó mɛ;

yě wa nǔ kpó ta syɛ́nsyɛ́n kpó ɖo susu tɔn nukɔn.*

 9 Nukúnmɛ yětɔn sín xlɛ̌ lɛ́ nɔ ɖe kúnnu dó yě wú,

bɔ yě nɔ jlá hwɛ yětɔn Sodɔ́mu ɖɔhun;

yě tɛ́n kpɔ́n bo ná hwlá ǎ.

10 Ðɔ nú nǔjlɔ́jlɔ́watɔ́ lɛ́ ɖɔ nǔ bǐ ná yi ganjí nú yě;

è ná dó nǔ e wa wɛ yě ɖe é sín ajɔ yě.*

Awě ná xo è,

ɖó nǔ e alɔ tɔn lɛ́ wa é wɛ è ná wa n’i!

12 Togun ce sín azɔ̌gán lɛ́ nɔ xo dǎka wǔ tɔn,

bɔ nyɔ̌nu lɛ́ nɔ kp’acɛ dó jǐ tɔn.

Togun ce, nukɔntɔ́ towe lɛ́ zɔ́n bɔ a ɖo flúflú wɛ,

yě wlú fí e ali towe lɛ́ tunta é.

13 Jexóva ɖo nǔ sɔ́ wɛ bo ná dó hwɛ mɛ;

é ɖo te bo ná ɖɔ hwɛ xá togun lɛ́.

“Mi dó vǐwungbo ɔ zo,

bɔ nǔ e mi fin ɖo wamamɔnɔ lɛ́ sí é ɖo xwé mitɔn lɛ́ gbe.

15 Mi glá káká bo nyínyɛ́ togun ce,

lobo dó ya nú wamamɔnɔ lɛ́ syɛ́nsyɛ́n wɛ a?” wɛ Aklúnɔ Nǔbǐwúkpétɔ́, Jexóva ahwankpá lɛ́ tɔn ɖɔ.

16 Jexóva ɖɔ: “Ðó vǐ nyɔ̌nu Sinyɔ́ɔ tɔn lɛ́ nɔ yí go,

nɔ hlɔ́n kpó* bo nɔ ɖo yiyi wɛ,

nɔ ɖú alɔlwɛ́ xá mɛ kpó nukún yětɔn lɛ́ kpó, nɔ ɖo lǐnlɔ́n wɛ,

bo nɔ bló bɔ acɔ́ɖónú e ɖo afɔ yětɔn lɛ́ é nɔ ɖo nǔ ɖɔ wɛ wútu ɔ,

17 Jexóva ná bló bɔ vǐ nyɔ̌nu Sinyɔ́ɔ tɔn lɛ́ sín ta ná ɖó zǎ,

Jexóva ná bló bɔ ahɔn yětɔn ná mɔ́.

18 Azǎn énɛ́ gbe ɔ, Jexóva ná ɖe ɖɛkpɛ yětɔn síin,

acɔ́ɖónú e è nɔ dó dó afɔ lɛ́ é, tablá lɛ́ kpó acɔ́ɖónú e nɔ cí sunwájǐ ɖɔhun lɛ́ é kpó,

19 tógbé lɛ́,* alɔgan lɛ́ kpó avɔ e è nɔ cyɔ́n nukúnmɛ lɛ́ é kpó,

20 nǔ e è nɔ dó ba acɔ́ nú ta ná lɛ́ é, cɛ́ni e è nɔ dó afɔ lɛ́ é kpó anɔ̌wlínú* lɛ́ kpó,

célu sín go lɛ́ kpó tílá lɛ́ kpó,

21 alɔkɛ́ lɛ́ kpó awɔntínganví lɛ́ kpó,

22 agɔ̌ sín awu gaga lɛ́, awu ɖaxó lɛ́, awu aga tɔn lɛ́ kpó akwɛ́kpo lɛ́ kpó,

23 wěkpɛ́n kpɛví kpɛví lɛ́, awu e è sɔ́ lɛ̌ɛnkan dó bló lɛ́ é,*

tablá lɛ́ kpó avɔ e è nɔ cyɔ́n nukúnmɛ lɛ́ é kpó.

24 Wǎn gblégblé wɛ ná tíin ɖo balusámumi tɛnmɛ;

kan ná nɔ gǒjíblánú tɛnmɛ;

ahɔn súnsún wɛ ná nɔ ɖa ɖɛkpɛ ɖɛkpɛ tɛnmɛ;

ati sín awu wɛ ná nɔ awu axivɛ́nú tɛnmɛ;

wuntun e è sɔ́ gan zozo dó ɖó mɛ é wɛ ná nɔ ɖɛkpɛ nyínyɔ́ tɛnmɛ.

25 Súnnu towe lɛ́ ná kú hwǐ kú,

súnnu hlɔ̌nhlɔ́nnɔ towe lɛ́ ná j’ayǐ ɖo ahwangbénu.

26 Fí e è nɔ gbɔn bo nɔ byɔ́ toxo ɔ mɛ lɛ́ é ná ná alě, bo nɔ aluwɛ mɛ,

é ná jínjɔ́n kɔ́mɛ, bo dán ɖěwagbɛn.”

“Mǐ ná nɔ ɖu wɔ̌xúxú mǐɖésúnɔ tɔn,

bo ná nɔ dó awu mǐɖésúnɔ tɔn lɛ́,

yǐ gbe kpowun bónú mǐ ní ɖó nyǐkɔ towe ɖo ta,

bo ná dó ɖe winnyá mǐtɔn síin.”*

5 Mi kɛnklɛ́n nú má ji han nú wǎnyínámɔ ce,

han ɔ ɖɔ xó dó mɛ e un yí wǎn ná é kpó vǐwungbo tɔn kpó wú.

É tun vǐwuntín vɔvɔ ɖagbe ɖagbe ɖokpó ɖ’é jí,

bo gbá atɔxwɛ ɖokpó ɖó tɛ́ntin tɔn,

lobo kun vǐwunto ɖokpó ɖ’é jí.

Énɛ́ gúdo ɔ, é ɖo nukún ɖó wɛ ɖɔ é ní ná vǐwun ɖagbe,

loɔ, vǐwun nyanya kɛ́ɖɛ́ wɛ é ná.

 3 “Din ɔ, mi mɛ e nɔ nɔ Jeluzalɛ́mu lɛ́ é kpó súnnu Judáa tɔn lɛ́ kpó è mi,

mi kɛnklɛ́n bo gbo hwɛ nú nyɛ kpó vǐwungbo ce kpó.

 4 Nǔ ɖěvo tɛ́ ka kpo bɔ un sixú bló nú vǐwungbo ce,

bɔ un ma ko bló ǎ?

Étɛ́wú hwenu e un ɖo nukún ɖó wɛ ɖɔ é ní ná vǐwun ɖagbe é ɔ,

é ka ná vǐwun nyanya kɛ́ɖɛ́?

 5 Din ɔ, mi kɛnklɛ́n nú má ɖɔ

nǔ e un ná wa nú vǐwungbo ce é nú mi:

Un ná hɔn kpá tɔn lɛ́,

bɔ è ná dó zo.

Un ná gba dǒ tɔn e è sɔ́ awǐnnya dó bló ná lɛ́ é hánnyá,

bɔ è ná sɔ́ afɔ dó gbídí.

 6 Un ná bló bɔ é ná jɛ vɔ̌;

è ná ɖe ala ná ǎ, è ka ná lɛ́ xwa gbo tɔn mɛ ǎ.

Wunkan kpó gběhan nyanya kpó ná vun blá ɛ,

un ná ɖe gbe nú akpɔ́kpɔ́ lɛ́ ɖɔ yě ní ma sɛ́ jǐ ɖěbǔ d’é mɛ ó.

 7 Ðó togun Izlayɛ́li tɔn wɛ nyí Jexóva ahwankpá lɛ́ tɔn sín vǐwungbo;

súnnu Judáa tɔn lɛ́ wɛ nyí gle e é yí wǎn ná é.

É nɔ fɔ́n bo nɔ ɖo nukún ɖó hwɛjijɔ wɛ,

amɔ̌, nǔagɔwiwa wɛ é nɔ mɔ;

é nɔ fɔ́n bo nɔ ɖo nukún ɖó nǔjlɔ́jlɔ́wiwa wɛ,

amɔ̌, gbɛvíhan wɛ é nɔ se.”

 8 Heelú mɛ e nɔ ɖo xwé sá dó xwé jí wɛ,

bo nɔ ɖo gle yí dó gle jí wɛ,

káká bɔ tɛn ɖě ma sɔ́ nɔ wá ɖe ǎ,

bɔ yěɖokpónɔ nɔ wá nɔ to ɔ mɛ lɛ́ é!

 9 Un se bɔ Jexóva ahwankpá lɛ́ tɔn xwlé nǔ bo ɖɔ ɖɔ

xwé gěgé d’agba bo nyɔ́ ɖɛkpɛ có,

yě ná húzú dǒglin,

bo ná jɛ vɔ̌.

10 Ðó vǐwungbo ɛtáa ɛnɛ* ɔ, nǔjlɛ́nú bǎti* tɔn ɖokpó jɛ́n é ná nɔ ná,

nǔkún nǔjlɛ́nú omɛ́ɛ* ɖokpó ɔ, nǔjlɛ́nú éfa* ɖokpó jɛ́n é ná nɔ ná.

11 Heelú mi mɛ e nɔ fɔ́n zǎnzǎn tɛɛn, bo ná dó nu ahan syɛ́nsyɛ́n,

bo nɔ cí kɔn káká jɛ zǎn xóxó mɛ bɔ vɛ̌ɛn nɔ mú mi lɛ́ é!

12 Yě ɖó agǐdigbo kpó kanhún kpó,

hǔn, kpete kpó vɛ̌ɛn kpó ɖo agɔ̌ yětɔn lɛ́ domɛ;

amɔ̌, yě nɔ lin tamɛ dó azɔ̌ Jexóva tɔn jí ǎ,

yě nɔ mɔ alɔ tɔn núwiwa lɛ́ ǎ.

13 Énɛ́ wú ɔ, togun ce ná yi kannumɔgbénu,

ɖó nǔtuuntuun hwedó è wútu;

xovɛ́ ná sin súnnu yětɔn e è nɔ sɔ́ su lɛ́ é,

bɔ togun yětɔn bǐ ná wɛ́n vɛ̌.

14 Énɛ́ wɛ zɔ́n bɔ Yɔdo* gbló éɖée d’é jí,

bo hun nu tɔn waa;

ɖɛkpɛ tɔn,* ahwan tɔn e nɔ ɖo xó sú wɛ lɛ́ é kpó kpacaɖútɔ́ tɔn lɛ́ kpó

ná byɔ́ mɛ dandan.

15 Gbɛtɔ́ ná ɖe kɔ́,

è ná ɖe gbɛtɔ́ kpo,

bo ná dɔn goyítɔ́ sín nukún dó do.

16 È ná sɔ́ Jexóva ahwankpá lɛ́ tɔn su gbɔn hwɛɖiɖɔ* tɔn gblamɛ;

Mawu nǔgbó ɔ, Mɛ mímɛ́ ɔ ná xlɛ́ ɖɔ émí nyí mɛ mímɛ́ gbɔn nǔjlɔ́jlɔ́wiwa gblamɛ.

17 Lɛ̌ngbɔ́ví lɛ́ ná nɔ ɖu ama amagbo yětɔn mɛ wɛ yě ɖe ɖɔhun;

toɖévomɛnu lɛ́ ná ɖu nǔ ɖo fí e jɛ vɔ̌, bɔ kanlin e è ná nǔɖuɖu ganjí lɛ́ é nɔ ɖ’ayǐ lɛ́ é.

18 Heelú mɛ ɖěɖěe nɔ ɖo nǔwanyido yětɔn dɔn kpé wɛ kpó kan mɛblɛ́blɛ́ tɔn lɛ́ kpó,

bo nɔ ɖo hwɛhuhu yětɔn dɔn kpé wɛ kpó agbankɛkɛ́ sín kan lɛ́ kpó lɛ́ é!

19 Heelú mɛ ɖěɖěe nɔ ɖɔ xó élɔ́ lɛ́ é: “É ní yá wǔ wa azɔ̌ tɔn;

azɔ̌ tɔn ní yá wǔ wá bónú mǐ ní mɔ.

Mɛ mímɛ́ Izlayɛ́li tɔn ɔ sín linlin* ní jɛnu,

bónú mǐ ní mɔ nukúnnú jɛ mɛ!”

20 Heelú mɛ ɖěɖěe nɔ ɖɔ ɖɔ nǔ ɖagbe nyí nǔ nyanya bɔ nǔ nyanya nyí nǔ ɖagbe lɛ́ é!

Heelú mɛ ɖěɖěe nɔ ylɔ́ zǐnflú ɖɔ wěziza bo nɔ ylɔ́ wěziza ɖɔ zǐnflú lɛ́ é!

Heelú mɛ ɖěɖěe nɔ sɔ́ nǔ vívɛ́ ɖó nǔ víví tɛnmɛ bo nɔ sɔ́ nǔ víví ɖó nǔ vívɛ́ tɛnmɛ lɛ́ é!

21 Heelú mɛ ɖěɖěe nɔ mɔ ɖɔ émí nyí nǔnywɛ́tɔ́,

bo nɔ lin ɖɔ émí nɔ ɖó ayi te lɛ́ é!

22 Heelú mɛ ɖěɖěe syɛ́n ɖo vɛ̌ɛn nunu mɛ lɛ́ é,

kpó súnnu ɖěɖěe alɔ se kpɛ́n ná ɖo ahan syɛ́nsyɛ́n cícáká mɛ lɛ́ é kpó!

23 Heelú mɛ ɖěɖěe nɔ ɖɔ hwɛ jó mɛdídá ɖó nǔɖuɖonǔmɛ wú,

bo nɔ lɛ́ tɛ hwɛjijɔ nǔjlɔ́jlɔ́watɔ́ lɛ́ é!

24 Énɛ́ wú ɔ, lěe zoɖɛ́ nɔ fyɔ́ nǔywɛ́,

bɔ gběhan xúxú nɔ ji kɛn ɖo myɔ mɛ gbɔn é ɔ,

mɔ̌ ɖokpó ɔ, ɖɔ yětɔn lɛ́ ná nyɔ,

bɔ sɛ́ yětɔn lɛ́ ná funfún kpé afúntúntún ɖɔhun,

ɖó yě gbɛ́ Jexóva ahwankpá lɛ́ tɔn ɔ sín sɛ́n,*

bo ɖó sísí ɖěbǔ nú Mɛ mímɛ́ Izlayɛ́li tɔn ɔ sín xó ǎ.

25 Énɛ́ wɛ zɔ́n bɔ xomɛ sin Jexóva syɛ́nsyɛ́n dó togun tɔn wú,

bɔ é ná dlɛ́n alɔ tɔn lobo ná xo yě.

Só ɖaxó lɛ́ ná dán wǔ,

bɔ cyɔ yětɔn lɛ́ ná cí zunkɔ́ ɖɔhun ɖo ali lɛ́ jí.

Ðó nǔ énɛ́ lɛ́ bǐ wú ɔ, xomɛsin tɔn kpo ɖo te,

bɔ alɔ tɔn kpo ɖo dlɛ̌ndlɛ́n jí, bónú é ná xo yě.

26 É sɔ́ wuntun* ɖé dó jǐ nú akɔta e ɖo fí línlín é ɖé;

É kwínkwín dó ylɔ́ yě sín fí e ayǐkúngban ɔ kponu ɖó lɛ́ é.

Éɖíe! Yě jawě kpó wezun kpó.

Gǒjíblánú e ɖo alin yětɔn é tún ǎ,

mɔ̌ jɛ́n afɔkpakan yětɔn lɛ́ ma wɛ́n ǎ é nɛ́.

28 Gǎ yětɔn lɛ́ bǐ wɛ ɖá,

bɔ daswé* yětɔn lɛ́ bǐ ɖo dlɛ̌ndlɛ́n jí.*

Sɔ́ yětɔn lɛ́ sín hwɛ̌ cí awǐnnya syɛ́nsyɛ́n ɖɔhun,

kɛkɛ́ví sín afɔ yětɔn lɛ́ cí axásáxásá jɔhɔn syɛ́nsyɛ́n ɖɔhun.

29 Yě ɖo gbe dó wɛ kinnikínní ɖɔhun;

yě nɔ dó gbe kinnikínní wínnyáwínnyá lɛ́* ɖɔhun.

Yě ná dó adǎn gbe bo ná zɔn kanlin e yě jló ná wlí é jí,

lobo ná dɔn ɖidó bɔ mɛ ɖěbǔ ná yí sín yě sí ǎ.

30 Azǎn énɛ́ gbe ɔ, yě ná dó adǎn gbe dó nǔ e yě jló ná wlí é jí,

lěe xu nɔ w’adǎn gbɔn é ɖɔhun.

Mɛ ɖěbǔ e kpɔ́n to ɔ sɛ́dó é ná mɔ zǐnflú kpó aluwɛ kpó;

wěziza tlɛ ná dó zǐnflú ɖó akpɔ́kpɔ́ lɛ́ wútu.

Un kú lo,*

ɖó un nyí mɛɖé bɔ nufló ce blí,

bɔ un nɔ nɔ togun e sín nufló blí é tɛ́ntin;

ɖó nukún ce lɛ́ mɔ Axɔ́sú ɔ, Jexóva ahwankpá lɛ́ tɔn ɖésúnɔ!”

È ɖe nǔwanyido towe síin,

bo súnsún hwɛ towe.”

‘Mi ná se azɔn gěgé,

amɔ̌, mi ná mɔ nukúnnú jɛ mɛ ǎ;

mi ná mɔ azɔn gěgé,

amɔ̌, mi ná tuun nǔtí ǎ.’

10 Blǒ bónú togun élɔ́ sín ayi ní kú atli,

blǒ bónú tó yětɔn lɛ́ ní sú,

sú nukún yětɔn lɛ́,

bónú yě ní ma wá kpé wú, bo mɔ nǔ ɖó nukún yětɔn lɛ́ wú,

lobo se nǔ ɖó tó yětɔn lɛ́ wú ó.

Mɔ̌ mɛ ɔ, ayi yětɔn ná mɔ nukúnnú jɛ nǔ mɛ ǎ,

yě ka ná lɛ́ kɔ, bónú è ná gbɔ azɔn nú yě ǎ.”

“Káká jɛ hwenu e toxo lɛ́ ná gba hánnyá, bɔ mɛ ɖěbǔ ma sɔ́ ná ɖo yě mɛ ǎ,

lobɔ mɛ ɖěbǔ ma sɔ́ ná ɖo xwé lɛ́ gbe ǎ,

bɔ to ɔ ná gba, bo ná jɛ vɔ̌ é;

12 káká jɛ hwenu e Jexóva ná bɛ́ súnnu lɛ́ yi fí línlín,

bɔ lěe to ɔ jɛ vɔ̌ gbɔn é ná syɛ́n tawun é.

“É ná kpa yě ǎ,

mɔ̌ jɛ́n nǔ mɔ̌hun ma ná jɛ ǎ é nɛ́.

 8 Ðó Damási wɛ nyí azinkan* Silíi tɔn,

bɔ Hlesíni nyí axɔ́sú* Damási tɔn.

Ðo xwe 65 kpowun vlamɛ ɔ,

è ná gba Eflayímu togun ɔ hánnyá bǐ mlɛ́mlɛ́, bɔ é sɔ́ ná tíin nyǐ ǎ.

 9 Samalíi wɛ nyí azinkan* Eflayímu tɔn,

bɔ vǐ súnnu Hlemalíya tɔn nyí axɔ́sú* Samalíi tɔn.

Ényí nǔɖiɖi mitɔn ma lí dǒ ǎ ɔ,

mi ná dó ɖɔ do syɛ́nsyɛ́n ǎ.” ’ ”

 6 “Ðó togun élɔ́ gbɛ́ Silowée* sín tɔsisa wlɛ́wlɛ́ lɛ́,

bɔ Hlesíni kpó Hlemalíya ví ɔ kpó wɛ nɔ dó xomɛhunhun n’i wútu ɔ,

 7 éɖíe! Jexóva ná fɔ́n Tɔsisa ɔ*

sín sin hlɔ̌nhlɔ́nnɔ tobutóbú lɛ́ dó yě jí,

bo ná fɔ́n axɔ́sú Asilíi tɔn ɔ kpó susu tɔn bǐ kpó dó yě jí.

É ná cyɔ́n tɔzan tɔn lɛ́ bǐ jí,

bo ná ɖí bú agě tɔn lɛ́ bǐ,

 8 lobo za nǔ gbɔn Judáa.

É ná cí tɔgbamɛ ɖɔhun, bo ná gba Judáa, lobo ná gbɔn mɛ dín, bo ná fán mɛ dó kɔ;

Emanuwɛ́li* è,

awa towe e vlɔ́n lɛ́ é ná cyɔ́n to towe blěbú!”

Mi ní ɖɔ nǔ e jló mi é, amɔ̌, é ná yi ta ǎ,

ɖó Mawu ɖo kpɔ́ xá mǐ!*

Mi ma ɖi xɛsi nú nǔ e yě nɔ ɖi xɛsi ná é ó;

mi ma sísɔ́ ɖó énɛ́ wú ó.

13 Jexóva ahwankpá lɛ́ tɔn wɛ nyí Mɛ e mi ɖó ná kpɔ́n dó mɔ mɛ mímɛ́ é,

é wɛ nyí Mɛ e mi ɖó ná ɖi xɛsi ná é,

é wɛ nyí Mɛ e ɖó ná zɔ́n bɔ mi ná sísɔ́ é.”

14 É ná cí tɛn mímɛ́ ɖé ɖɔhun,

amɔ̌, é ná lɛ́ cí awǐnnya e ná gba nǔ hánnyá é ɖɔhun,

bo ná cí awǐnnya e wú è ná klɛ́n afɔ dó é ɖɔhun

nú xwé Izlayɛ́li tɔn we lɛ́ bǐ,

bo ná cí fɛ́ca kpó mɔ kpó ɖɔhun

nú mɛ e nɔ nɔ Jeluzalɛ́mu lɛ́ é.

15 Gěgé yětɔn ná klɛ́n afɔ, j’ayǐ, bo gba hánnyá;

yě ná jɛ mɔ mɛ, bɔ è ná wlí yě.

16 Mlǎ kúnnuɖenú e è wlán ɖ’ayǐ é,

ɖǒ wuntun sɛ́n* ɔ ɖo ahwanvú ce lɛ́ tɛ́ntin!

 2 Togun e nɔ ɖi zɔnlin ɖo ablu mɛ ɖ’ayǐ é

mɔ wěziza ɖaxó.

Mɛ ɖěɖěe nɔ nɔ ablu gɔngɔn sín to mɛ lɛ́ é ɔ,

wěziza hɔ́n dó yě jí.

 3 A bló bɔ mɛ e ɖo akɔta ɔ mɛ lɛ́ é sukpɔ́;

a bló bɔ yě ɖó awǎjijɛ ɖaxó.

Yě nɔ j’awǎ ɖo nukɔn towe,

lěe mɛ lɛ́ nɔ j’awǎ ɖo nǔkúnyiyahwenu gbɔn é ɖɔhun,

mɛ ɖěɖěe nɔ má nǔ e yě bɛ́ ɖo ahwangbénu lɛ́ é kpó awǎjijɛ kpó lɛ́ é ɖɔhun.

 4 Ðó a gba agbanhɛnkpo yětɔn hánnyá,

bo gba kpo e ɖo abɔ̌ yětɔn lɛ́ ta é kpó azɔ̌gán ɔ sín kpo kpó hánnyá,

lěe é nyí gbɔn ɖo Madiyáni sín azǎn gbe é.

 5 Ahwanfɔkpa e nɔ húnhún ayǐkúngban ɔ hwenu e è ɖo zɔnlin ɖi wɛ lɛ́ é bǐ,

kpó awu e mɛ kanjɔ kpé é bǐ kpó

ná húzú myɔflɔ́nú.

 6 Ðó è ji vǐ ɖokpó nú mǐ,

è ná vǐ súnnu ɖokpó mǐ;

acɛkpikpa* ná nɔ abɔ̌ tɔn ta.

 7 Acɛkpikpa* tɔn ná kpé fí bǐ,

bɔ fífá e ná tíin ɖo axɔ́súzinkpo Davídi tɔn jí, bo ná tíin ɖo axɔ́súɖuto tɔn mɛ é

ná ɖó vivɔnu ǎ,

bónú è ná ɖó acɛkpikpa ɔ ayǐ, lobo hɛn ɛ ɖó te

gbɔn hwɛjijɔ kpó nǔjlɔ́jlɔ́wiwa kpó gblamɛ,

sín din káká sɔ́yi.

 8 Jexóva sɛ́ wɛn hwɛɖónúmɛ tɔn ɖé dó Jakɔ́bu,

bɔ é jɛnu dó Izlayɛ́li jí.

 9 Bɔ mɛ lɛ́ bǐ ná tuun,

ɛɛn, Eflayímu kpó mɛ e nɔ nɔ Samalíi lɛ́ é kpó,

mɛ e nɔ ɖɔ xó élɔ́ kpó goyíyí kpó, kpódó mɛmasí kpán lɛ́ é:

10 “Blǐki lɛ́ mu,

amɔ̌, mǐ ná zán awǐnnya kpikpa dó vɔ́ mɛ.

È gbo sikomɔ́ɔtín lɛ́,

amɔ̌, mǐ ná sɔ́ sɛ́dlutín lɛ́ dó ɖyɔ́ yě ná.”

11 Jexóva ná fɔ́n Hlesíni sín kɛntɔ́ lɛ́ dó jǐ tɔn,

bo ná sísɛ́ kɛntɔ́ tɔn lɛ́ bɔ yě ná tɔ́n ahwan ɛ,

12 Silíi ná gosín zǎnzǎnhwe jí, bɔ Filisitɛ́ɛn lɛ́ ná gosín gbadahwe jí,*

yě ná kɛ nu baa bo ná vún Izlayɛ́li ɖu.

Ðó nǔ énɛ́ lɛ́ bǐ wú ɔ, xomɛsin tɔn kpo ɖo te,

bɔ alɔ tɔn kpo ɖo dlɛ̌ndlɛ́n jí, bónú é ná xo yě.

13 Ðó togun ɔ lɛ́ kɔ wá Mɛ e dɔn tó nú yě é gɔ́n ǎ;

yě ba Jexóva ahwankpá lɛ́ tɔn ɔ ǎ.

14 Jexóva ná sɔ́ azǎn ɖokpó ɖó te,

bo ná sɛ́n ta kpó sí kpó, ala kpó fɛ́n kpó* sín Izlayɛ́li wú.

15 Mɛxómɔ kpó mɛ e è nɔ ɖó sísí ná tawun é kpó wɛ nyí ta ɔ,

bɔ gbeyíɖɔ e nɔ kplɔ́n adingban mɛ é wɛ nyí sí ɔ.

16 Mɛ ɖěɖěe ɖo ali xlɛ́ togun élɔ́ wɛ lɛ́ é ɖo yě bú wɛ,

bɔ nǔ bǐ wlú dó mɛ ɖěɖěe xlɛ́ ali wɛ è ɖe lɛ́ é.

17 Énɛ́ wú wɛ xomɛ ma ná hun Jexóva dó dɔ̌nkpɛvú yětɔn lɛ́ wú ǎ,

é ná kú nǔbláwǔ ɖěbǔ nú tɔ́cyɔvǐ yětɔn lɛ́ kpó asúkúsi yětɔn lɛ́ kpó ǎ,

ɖó yě mɛ bǐ wɛ nyí gǔfɔ́ndómawujítɔ́ kpó nǔnyanyawatɔ́ kpó,

bɔ yě mɛ bǐ nɔ ɖo xó maɖótaɖé lɛ́ ɖɔ wɛ.

Ðó nǔ énɛ́ lɛ́ bǐ wú ɔ, xomɛsin tɔn kpo ɖo te,

bɔ alɔ tɔn kpo ɖo dlɛ̌ndlɛ́n jí, bónú é ná xo yě.

18 Ðó nǔnyanyawiwa ɖo jiji wɛ myɔ ɖɔhun,

bo ɖo wunkan lɛ́ kpó gběhan nyanya lɛ́ kpó fyɔ́ wɛ.

É ná flɔ́ myɔ dó zun e ɖo zungbó ɔ mɛ lɛ́ é mɛ,

bɔ yě ná ji, bo ná mlí azizɔ yi jǐ.

19 Xomɛsin Jexóva ahwankpá lɛ́ tɔn tɔn zɔ́n bɔ

è dó to ɔ zo,

bɔ gbɛtɔ́ lɛ́ ná húzú myɔflɔ́nú.

20 Mɛɖé ná sɛ́n nǔ ɖo ɖisíxwé,

amɔ̌, xovɛ́ ná kpo ɖo sinsin i wɛ;

mɛɖé ná ɖu nǔ ɖo amyɔxwé,

amɔ̌, é ná gɔ́ xo ǎ.

Mɛ ɖokpó ɖokpó ná vún awa éɖésúnɔ tɔn sín lan ɖu,

21 Manasée ná vún Eflayímu ɖu,

bɔ Eflayímu ná vún Manasée ɖu.

Ðó nǔ énɛ́ lɛ́ bǐ wú ɔ, xomɛsin tɔn kpo ɖo te,

bɔ alɔ tɔn kpo ɖo dlɛ̌ndlɛ́n jí, bónú é ná xo yě.

10 Heelú mɛ e nɔ ɖe gbetakɛ́n e nɔ hɛn nǔ gblé dó mɛ wú lɛ́ é tɔ́n lɛ́ é,

mɛ ɖěɖěe nɔ ɖo sɛ́n e nɔ gbídí kɔ nú mɛ lɛ́ é wlán wɛ magbokɔ lɛ́ é!

 2 Yě nɔ wa mɔ̌ dó sú ali dó hwɛ wamamɔnɔ lɛ́ tɔn ɖiɖɔ,

dó tɛ hwɛjijɔ mɛmaɖómɛɖé e ɖo togun ce mɛ lɛ́ é.

Yě nɔ bɛ́ nǔɖókan asúkúsi lɛ́ tɔn,

bo nɔ vɔ tɔ́cyɔvǐ lɛ́!

 3 Étɛ́ mi ka ná wa ɖo gbeɖíɖózán* gbe,

hwenu e nǔ e ná sú kún dó nú mi é ná gosín fí línlín wá é?

Mɛ̌ gɔ́n mi ka ná hɔn yi bo ná byɔ́ alɔdó?

Fítɛ́ mi ka ná jó dɔkun* mitɔn dó nyi?

 4 Mi sɔ́ ná sixú wa nǔ ɖěbǔ zɛ mi ná jɛ kpo ɖo gantɔ́ lɛ́ tɛ́ntin,

alǒ j’ayǐ ɖo mɛ e è hu lɛ́ é tɛ́ntin wú ǎ.

Ðó nǔ énɛ́ lɛ́ bǐ wú ɔ, xomɛsin tɔn kpo ɖo te,

bɔ alɔ tɔn kpo ɖo dlɛ̌ndlɛ́n jí, bónú é ná xo yě.

 5 “Mi kpɔ́n! Asilíinu ɔ,

é wɛ nyí kpo e ná ɖe xomɛsin ce xlɛ́ é,

ɛɛn, kpo e ɖo alɔ tɔn mɛ, bo ná ɖe xomɛ e sin mì syɛ́nsyɛ́n é xlɛ́ é!

 6 Un ná sɛ́ ɛ dó bɔ é ná tɔ́n ahwan togun gǔfɔ́ndómawujítɔ́ ɖé,

é ná tɔ́n ahwan togun e dó xomɛsin ɖaxó nú mì é;

un ná ɖe gbe n’i ɖɔ é ní bɛ́ nǔɖókan tɔn lɛ́, lobo vɔ ɛ,

é ní sɔ́ afɔ dó gbídí yě babá e ɖo toxomɛli lɛ́ jí é ɖɔhun.

 7 Amɔ̌, é ná ba ná wa nǔ gbɔn mɔ̌ ǎ,

ayi tɔn ná bló tuto énɛ́ ǎ;

ɖó nǔ e ɖo ayi tɔn mɛ é wɛ nyí ɖɔ é ná sú kún dó nú nǔ mlɛ́mlɛ́,

é ná gba akɔta gěgé, é nyí kpɛɖé ǎ.

 8 Ðó é ɖɔ:

‘Axɔ́ví ce lɛ́ bǐ wɛ nyí axɔ́sú ǎ cé?

10 Alɔ ce jɛ axɔ́súɖuto e nǔmɛsɛn yětɔn lɛ́ ma nyí nǔɖéwanú ǎ,

bɔ bǒcyɔ kpikpa yětɔn lɛ́ sukpɔ́ hú Jeluzalɛ́mu kpó Samalíi kpó tɔn lɛ́ é wú!

11 Nǔ e un wa nú Samalíi kpó nǔmɛsɛn tɔn e ma nyí nǔɖéwanú ǎ lɛ́ é kpó é,

wɛ un ná lɛ́ wa nú Jeluzalɛ́mu kpó bǒcyɔ tɔn lɛ́ kpó ǎ cé?’

12 “Hwenu e Jexóva ná fó azɔ̌ tɔn bǐ ɖo Sinyɔ́ɔ só ɔ jí, bo ná fó ɖo Jeluzalɛ́mu é ɔ, É* ná dɔn tó nú Asilíi xɔ́sú ɔ ɖó mɛmasí tɔn, goyíyí tɔn kpó nyi wɛ sɔ lě tɔn kpó wú. 13 Ðó é ɖɔ:

‘Un ná wa mɔ̌ kpó alɔ ce sín hlɔ̌nhlɔ́n kpó,

kpó nǔnywɛ́ ce kpó, ɖó un nyɔ́nǔi.

Un ná ɖe dogbó togun lɛ́ tɔn lɛ́ síin,

bo ná vɔ dɔkun yětɔn lɛ́,

lobo ná ɖu ɖo mɛ e ɖo to ɔ mɛ lɛ́ é jí, mɛ hlɔ̌nhlɔ́nnɔ ɖé ɖɔhun.

14 Alɔ ce ná bɛ́ dɔkun togun lɛ́ tɔn lɛ́,

lěe mɛɖé nɔ sɔ́ alɔ dó adɔ̌ mɛ gbɔn é ɖɔhun;

un ná xo ayǐkúngban ɔ blěbú kplé,

mɛ e ɖo azin e è jó dó lɛ́ é xo kplé wɛ é ɖɔhun!

16 Énɛ́ wú ɔ, Aklúnɔ nǔgbó ɔ, Jexóva ahwankpá lɛ́ tɔn,

ná bló bɔ mɛ tɔn* e ɖó hlɔ̌nhlɔ́n lɛ́ é ná xú gǒ,

bo ná flɔ́ myɔ hɛhɛ dó susu tɔn glɔ́.

17 Wěziza Izlayɛ́li tɔn ná húzú myɔ,

bɔ Mɛ mímɛ́ tɔn ná húzú myɔ;

é ná ji, bo ná fyɔ́ gběhan nyanya tɔn lɛ́ kpó wunkan tɔn lɛ́ kpó ɖo azǎn ɖokpó jí.

18 É ná sú zungbó tɔn kpó atínsínsɛ́ngbo tɔn kpó sín susu dó mlɛ́mlɛ́;

é ná cí mɛ e ɖo azɔn jɛ wɛ bo ɖo gǒ xú wɛ é ɖɔhun.

19 Atín nabí e ná kpo ɖo zungbó tɔn mɛ é

ná hwe sɔmɔ̌ bɔ vǐ kpɛví ɖé ná kpé wú bo sɔ́ kɛ́n yětɔn.

20 Azǎn énɛ́ gbe ɔ, Izlayɛ́li sín mɛ e kpo lɛ́ é

kpó kúnkan Jakɔ́bu tɔn sín mɛ e gán lɛ́ é kpó

sɔ́ ná nɔ gán jɛ mɛ e xo yě é wú ɖě ǎ;

amɔ̌, yě ná gán jɛ Jexóva,

Mɛ mímɛ́ Izlayɛ́li tɔn ɔ wú kpó gbejíninɔ kpó.

21 Mɛ kpɛɖé jɛ́n ná lɛ́ kɔ wá Mawu hlɔ̌nhlɔ́nnɔ ɔ gɔ́n,

ɛɛn, Jakɔ́bu sín mɛ e kpo lɛ́ é.

22 Ðó Izlayɛ́li è, togun towe

sukpɔ́ nyɛ̌kɛ́n e ɖo xutó é ɖɔhun có,

yě mɛ kpɛɖé jɛ́n ná lɛ́ kɔ.

È ko wá gbeta ɔ kɔn bo ná sú kún dó nú yě,

bɔ hwɛjijɔ* ná mì yě.

23 Ɛɛn, kún yětɔn súsú dó sín gbeta e kɔn Aklúnɔ Nǔbǐwúkpétɔ́, Jexóva ahwankpá lɛ́ tɔn wá é,

ná jɛnu ɖo to ɔ bǐ mɛ.

27 Ðo azǎn énɛ́ gbe ɔ, agban tɔn ná gosín abɔ̌ta towe,

bɔ agbanhɛnkpo tɔn ná gosín kɔ towe,

lobɔ è ná wɛ́n agbanhɛnkpo ɔ, ɖó ami ɔ wú.”

28 É wá Ayáti;

é gbɔn Miglɔ́ni dín;

é sɔ́ agban tɔn ɖó Mikumási.

29 Yě gbɔn tɔgbotɛn ɔ;

yě nɔ Geba zǎn ɔ mɛ;

Hlǎma sísɔ́, Gibéya Sawúlu tɔn hɔn.

É myɔ́ akpotokwín dó vǐ nyɔ̌nu Sinyɔ́ɔ tɔn sín só ɔ jí,

énɛ́ wɛ nyí Jeluzalɛ́mu só ɔ.

33 Kpɔ́n! Aklúnɔ nǔgbó ɔ, Jexóva ahwankpá lɛ́ tɔn

ɖo ala lɛ́ sɛ́n síin wɛ kpó zǐngídi ɖaxó ɖé kpó;

è ɖo atín ɖaxó ɖaxó lɛ́ gbo zin dɛ́ wɛ,

bɔ ɖěɖěe yi aga lɛ́ é ɔ, è dɔn yě dó do.

34 É zán azɔ̌wanú e è sɔ́ gan dó bló é* dó xo zun e ɖo zungbó ɔ mɛ lɛ́ é,

mɛ hlɔ̌nhlɔ́nnɔ ɖé ná zin atín e ɖo Libáan lɛ́ é dɛ́.

11 Alaví ɖé ná tɔ́n sín atínta Jɛsée tɔn mɛ,

bɔ kun e ná tɔ́n sín ɖɔ tɔn lɛ́ mɛ é ná ná sínsɛ́n.

 2 Bɔ gbigbɔ Jexóva tɔn ná wá bo ná nɔ jǐ tɔn,

gbigbɔ nǔnywɛ́ kpó nukúnnúmɔjɛnǔmɛ kpó tɔn,

gbigbɔ wěɖexámɛ kpó hlɔ̌nhlɔ́n kpó tɔn,

gbigbɔ nǔtuuntuun kpó sísí e gɔ́ngɔ́n é ɖíɖó nú Jexóva kpó tɔn.

É ná zɔn dó nǔ e nukún tɔn mɔ lɛ́ é jí dó ɖɔ hwɛ xá mɛ ǎ,

mɔ̌ jɛ́n é ma ná zɔn dó nǔ e é se lɛ́ é jí kpowun dó kɛ nu dó nǔ wú nú mɛ ǎ é nɛ́.

 4 É ná ɖɔ hwɛ xá mɛmaɖómɛɖé kpó hwɛjijɔ* kpó,

é ná kɛ nu dó nǔ wú nú mɛ dó mɛɖéesɔ́hwetɔ́ e ɖo ayǐkúngban ɔ jí lɛ́ é tamɛ kpó nǔjlɔ́jlɔ́wiwa kpó.

É ná xo ayǐkúngban ɔ kpó kpo e ɖo nu tɔn mɛ é kpó,

bo ná zán xó tɔn lɛ́* dó hu mɛdídá ná.

 5 Nǔjlɔ́jlɔ́wiwa ná nyí gǒjíblánú ɖo alin tɔn,

bɔ gbejíninɔ ná nyí gǒjíblánú ɖo alin tɔn.

 6 Hla ná nɔ kpɔ́ xá lɛ̌ngbɔ́ví nú hwenu ɖé,

bɔ gbɔ̌ví kpó kpɔ kpó ná mlɔ́ kpɔ́,

nyibúví kpó kinnikínní* kpó, kpódó kanlin e dó jǒ é bǐ kpán ná nɔ kpɔ́;*

súnnuví ɖé wɛ ná kplá yě.

 7 Nyibú kpó lɔnmɔ kpó ná ɖu nǔ ɖó kpɔ́,

bɔ vǐ yětɔn lɛ́ ná mlɔ́ kpɔ́.

 8 Vǐ e ɖo anɔ̌ nu é ná d’ayihún ɖo do e mɛ xlibó nɔ nɔ é nu,

bɔ vǐ e è ɖe anɔ̌ ná é ná sɔ́ alɔ tɔn ɖó do e mɛ dan aɖǐvɛ́nɔ nɔ nɔ é nu.

 9 È ná wa nǔ nyanya ɖěbǔ,

alǒ hɛn nǔ ɖěbǔ gblé ɖo só mímɛ́ ce blěbú jí ǎ,

ɖó é ɖo wɛn ɖɔ nǔtuuntuun dó Jexóva wú ná gɔ́ ayǐkúngban ɔ jí,

lěe sin cyɔ́n xuzan jí gbɔn é ɖɔhun.

Akɔta lɛ́ ná ba wěɖexámɛ ɖo gɔ̌n tɔn,*

bɔ gbɔjɛtɛn tɔn ná ɖó susu.

13 Wǔhwinhwan Eflayímu tɔn ná yi xɔ,

bɔ mɛ ɖěɖěe nɔ ɖe kɛnfɔ xá Judáa lɛ́ é ɔ, è ná hu yě.

Eflayímu ná nɔ hwan wǔ Judáa ǎ,

mɔ̌ jɛ́n Judáa ma ná nɔ ɖe kɛnfɔ xá Eflayímu ǎ é nɛ́.

14 Yě ná wá Filisitɛ́ɛn lɛ́ sín só ɖaxó lɛ́ sín akpá ɖokpó xwé* ajijimɛ ɖo gbadahwe jí;

yě ná nɔ kpɔ́ bo ná bɛ́ togun e ɖo zǎnzǎnhwe jí é sín nǔɖókan lɛ́.

Yě ná dlɛ́n alɔ yětɔn bo ná wa nǔ dó Edɔ́mu kpó Mɔwábu kpó wú,*

Amɔníti lɛ́ ná húzú mɛ e jí è ná kp’acɛ dó lɛ́ é.

15 Jexóva ná má Ejípu xu ɔ sín akpáxwé* ɖé,*

bo ná húnhún alɔ tɔn dó Tɔsisa ɔ* jí.

É ná xo tɔsisa ɔ sín tɔhwín tɛ́nwe lɛ́* kpó funfún* tɔn zozo ɔ kpó,

bo ná bló bɔ mɛ lɛ́ ná ɖo afɔkpa mɛ bo ná ɖi zɔnlin gbɔn mɛ dín.

16 Ali ɖaxó ɖokpó ná gosín Asilíi nú togun tɔn e kpo bɔ è jó dó é,

lěe é nyí gbɔn nú Izlayɛ́li ɖo azǎn e gbe é tɔ́n sín Ejípu to mɛ é ɖɔhun.

“Jexóva è, un dó kú nú we,

ɖó a sin xomɛ dó mì có,

xomɛsin towe fá kpɛɖé kpɛɖé bɔ a dó gbɔ nú mì.

Un ná ɖeji, xɛsi ɖě ná ɖi mì ǎ;

ɖó Jǎa* Jexóva wɛ nyí hlɔ̌nhlɔ́n ce, bo lɛ́ nyí agbɔ̌n e un ɖó é,

é húzú hwlɛngán ce.”

 3 Kpó awǎjijɛ kpó wɛ mi ná nɔ wún sin

ɖo tɔjɔtɛn hwlɛngán tɔn lɛ́ mɛ.

“Mi dó kú nú Jexóva, mi xomlá nyǐkɔ tɔn,

mi bló bónú è ní tuun nǔwiwa tɔn lɛ́ ɖo togun lɛ́ tɛ́ntin!

 6 Hwi mɛ* e ɖo Sinyɔ́ɔ é, zě gbe dó jǐ, bo sú xó kpó awǎjijɛ kpó,

ɖó Mɛ mímɛ́ Izlayɛ́li tɔn e ɖo tɛ́ntin towe é kló.”

Mi sú xó ylɔ́ yě, mi bló alɔ,

bónú yě ní dó sixú wá gbɔn mɛ nukúnɖéjí lɛ́ sín hɔnlinu.

Un ylɔ́ ahwanfuntɔ́ ce lɛ́, bo ná dó ɖe xomɛsin ce xlɛ́,

bɔ yě nɔ j’awǎ kpó goyíyí kpó.

 4 Mi ɖótó! Ahwan ɖé ɖo só ɖaxó lɛ́ jí;

zǐngídi tɔn cí gbɛtɔ́ wɔ̌búwɔ́bú sín zǐngídi ɖɔhun!

Mi ɖótó! Hunnyahunnya axɔ́súɖuto lɛ́ tɔn,

zǐngídi akɔta e kplé ɖó kpɔ́ lɛ́ é tɔn!

 5 Yě gosín to línlín mɛ jawě,

fí e lín hú gǎn ɖo hwe glɔ́ é wɛ yě gosín,

Jexóva kpó xomɛsin tɔn sín ahwanfunnú lɛ́ kpó jawě,

bo ná gba nǔ ɖo ayǐkúngban ɔ bǐ jí.

 7 Énɛ́ wɛ zɔ́n bɔ alɔ lɛ́ bǐ ná kú yɛ,

bɔ xɛsi ná ɖí bú gbɛtɔ́ lɛ́ bǐ.

Yě ɖo kúsúkpɔ́ xo wɛ bo ɖo wǔvɛ́ se wɛ,

nyɔ̌nu e ɖo ajidonu é ɖɔhun.

Yě nɔ kpɔ́n yěɖée lɛ́ kpó xɛsi kpó,

bɔ wǔvɛ́ sise zɔ́n bɔ nukúnmɛ yětɔn jí.

 9 Éɖíe! Azǎn Jexóva tɔn jawě,

é d’abaɖa, bo nyí majijɛ kpó xomɛsin syɛ́nsyɛ́n kpó sín azǎn,

é ná bló bɔ to ɔ ná húzú nǔ e xyɔ́ wǔ é,

lobo ná sú kún dó nú hwɛhutɔ́ lɛ́ sín to ɔ mɛ.

10 Ðó sunví e ɖo jǐnukúnsin lɛ́ é kpó sunvísɛkplé yětɔn lɛ́ kpó*

sɔ́ ná ná wěziza yětɔn ǎ;

hwe tɔ́n ɔ, é ná nɔ dó zǐnflú,

bɔ sun ná ná wěziza tɔn ǎ.

11 Un ná byɔ́ ayǐkúngban ɖɔ é ní ɖó nǔ nyanya e é wa é sín gbe,

bo ná byɔ́ mɛdídá lɛ́ ɖɔ yě ní ɖó nǔ e yě wa nyi do lɛ́ é sín gbe.

Un ná ɖó nǔ goyíyí mɛ e nɔ wa nǔ e sín acɛ é ma ɖó ǎ é tɔn nu,

bo ná hwíhwɛ́ goyíyí acɛgannagannakpanúmɛtɔ́ lɛ́ tɔn.

12 Un ná bló bɔ gbɛtɔ́ ná hán hú siká akú,

bɔ gbɛtɔ́ lɛ́ ná hán hú siká Ofíi tɔn.

13 Énɛ́ wú wɛ un ná bló bɔ jǐnukúnsin ná húnhún,

bɔ ayǐkúngban ná dán wǔ bo ná gosín tɛn tɔn mɛ,

ɖó Jexóva ahwankpá lɛ́ tɔn sín xomɛsin wú, ɖo xomɛsin syɛ́nsyɛ́n tɔn sín azǎn gbe.

14 Tɛ́ e è ɖo nyinya wɛ é kpó kanlinhwan e mɛ ɖěbǔ ma ɖo xixokplé wɛ ǎ é kpó ɖɔhun ɔ,

mɛ ɖokpó ɖokpó ná lɛ́ kɔ yi togun éɖésúnɔ tɔn mɛ;

mɛ ɖokpó ɖokpó ná hɔn yi to éɖésúnɔ tɔn mɛ.

15 È ná sɔ́ nǔ mɛ ɖěbǔ e è mɔ é,

bo ná sɔ́ hwǐ dó hu mɛ ɖěbǔ e è ná wlí é.

16 È ná já vǐ yětɔn lɛ́ ɖó yɔywɛ ɖo nukún yětɔn mɛ;

è ná vɔ xwé yětɔn lɛ́,

bo ná hwlɛ́n kan xá asi yětɔn lɛ́.

17 Éɖíe! Un ɖo Mɛ̌dinu lɛ́ fɔ́n dó yě jí wɛ,

yě mɛ e kpatágan ma nyí nǔɖé ná ǎ

bɔ siká ma nɔ dó xomɛhunhun ɖě ná ǎ lɛ́ é.

18 Gǎ yětɔn lɛ́ ná vúnvún dɔ̌nkpɛvú lɛ́;

vǐ kpɛ́nnyɛ́kpɛ́nnyɛ́ lɛ́ sín nǔ ná blá wǔ nú yě ɖěbǔ ǎ,

mɔ̌ jɛ́n yě ma ná kú nǔbláwǔ nú vǐ lɛ́ ǎ é nɛ́.

19 Bɔ Babilɔ́nu e xɔ susu hú gǎn ɖo axɔ́súɖuto lɛ́ mɛ,*

bo nyí Kaludéenu lɛ́ sín ɖɛkpɛ, bɔ yě nɔ lɛ́ gó ɖó wǔ tɔn é,

ná cí lěe Sodɔ́mu kpó Gomɔ́ɔ kpó cí hwenu e Mawu sú kún yětɔn dó é ɖɔhun.

20 È sɔ́ ná nɔ mɛ gbeɖé ǎ,

bɔ sín jijimɛ ɖě jí jɛ ɖěvo jí ɔ, é sɔ́ ná nyí fí ɖé bónú è ná nɔ ǎ.

Alábu ɖě ná ɖó goxɔ tɔn nyi fínɛ́ ǎ,

lɛ̌ngbɔ́nyitɔ́ ɖě ná kplá lɛ̌ngbɔ́hwan tɔn bɔ yě ná gbɔjɛ ɖo fínɛ́ ǎ.

21 Kanlin gbětótló mɛ tɔn lɛ́ ná nɔ mlɔ́ fínɛ́;

kwlele lɛ́ ná gɔ́ xwé yětɔn lɛ́;

gowungo lɛ́ ná wa xwé nyi fínɛ́,

bɔ gbagbǎ gbě tɔn lɛ́* ná nɔ ɖo jo ki wɛ ɖo fínɛ́.

22 Kanlin e nɔ hó nǔ lɛ́ é ná sú xó ɖo atɔxwɛ tɔn lɛ́ mɛ,

bɔ cukú gbě tɔn lɛ́ ná nɔ hó nǔ ɖo hɔnmɛ tɔn ɖɛkpɛ ɖɛkpɛ lɛ́.

 5 Jexóva wɛ́n mɛ nyanya ɔ sín kpo,

é wɛ́n acɛkpatɔ́ lɛ́ sín kpo,

 6 é sú kún dó nú mɛ e nɔ ɖo togun lɛ́ xo wɛ kpó xomɛsin syɛ́nsyɛ́n kpó magbokɔ é,

éyɛ́ mɛ e nɔ kpa acɛ dó akɔta lɛ́ jí kpó xomɛsin kpó gbɔn ya dídó nú yě magbokɔ gblamɛ é.

 8 Jenɛvliyéetín lɛ́

kpó sɛ́dlutín Libáan tɔn lɛ́ kpó lɔ tlɛ ɖo awǎ jɛ wɛ ɖó hwɛ wú.

Yě nɔ ɖɔ: ‘Sín hwenu e a j’ayǐ é ɔ,

atíngbotɔ́ ɖě sɔ́ tɔ́n mǐ gbo gbé ǎ.’

 9 Akpakpa tlɛ ɖo Yɔdo* e ɖo do é sɔ́ wɛ,

bónú é ná yí we hwenu e a ná wá é.

É sín hwɛ wú bɔ é fɔ́n mɛ ɖěɖěe kú vɔ gǎn ná lɛ́ é,

gǎn kɔgbídínúmɛtɔ́* ayǐkúngban ɔ tɔn lɛ́ bǐ.

10 Yě bǐ jɛ xó ɖɔ jí, bo nɔ ɖɔ nú we ɖɔ:

‘Hwi lɔ wá vɔ́ da mǐɖɔhun wɛ a?

11 È dɔn goyíyí towe

kpó kanhún towe lɛ́ sín nǔɖiɖɔ kpó káká wá Yɔdo* mɛ.

Wě lɛ́ kpé glɔ̌ towe zan ɖɔhun,

bɔ wǎnvú lɛ́ nyí wǔcyɔ́n towe.’

12 Hwi mɛ e nɔ kɔ́n é, vǐ súnnu ayǐtéhɔ̌nnu tɔn è,

ayǐ wɛ a jɛ sín jǐnukúnsin lě a!

Hwi mɛ e ɖu ɖo akɔta lɛ́ jí é,

wɛ è gbo zin dɛ́ lě a!

Un ná sɔ́ axɔ́súzinkpo ce ɖó sunví Mawu tɔn lɛ́ tanu,

bo ná jínjɔ́n só e jí è nɔ kplé ɖe é jí,

ɖo fí e jɛ zɔ hú gǎn ɖo totaligbé lɛ́ é.

14 Un ná hun káká yi akpɔ́kpɔ́ lɛ́ tanu;

un ná bló bo ná cí Ajalɔ̌nlɔn ɔ ɖɔhun.’

15 Loɔ, káká Yɔdo* mɛ wɛ è ná dɔn we yi,

yi fí e gɔ́ngɔ́n hú gǎn ɖo do glɔ́ lɛ́ é.

16 Mɛ e ná mɔ we lɛ́ é ná kpɔ́n we dáán;

yě ná gbéjé we kpɔ́n kpó sɔxwixwe kpó, bo ná nɔ ɖɔ:

‘Nya e nɔ húnhún ayǐkúngban ɔ ɖ’ayǐ é ɖíe a?

Éyɛ́ mɛ e nɔ bló bɔ axɔ́súɖuto lɛ́ nɔ sísɔ́ é ɖíe a?

17 Éyɛ́ mɛ e bló bɔ fí e è nɔ nɔ ɖo ayǐkúngban ɔ jí lɛ́ é cí gbětótló ɖɔhun,

bo sú kún dó nú toxo tɔn lɛ́ é ɖíe a?

Éyɛ́ mɛ e nɔ gbɛ́ ɖɔ émí kún ná jó gantɔ́ émítɔn lɛ́ bónú yě ná yi xwé ó é ɖíe a?’

18 Axɔ́sú akɔta lɛ́ tɔn ɖě lɛ́ bǐ,

ɛɛn, yě mɛ bǐ wɛ mlɔ́ ayǐ ɖo susu mɛ,

bo ɖo yɔdo yětɔn yětɔn mɛ.*

19 Amɔ̌ hwɛ ɔ, è sɔ́ we nyi gbě bɔ a ɖó yɔdo ɖě ǎ,

a cí kun* e è gbɛ́ wǎn ná é ɖé ɖɔhun,

bɔ mɛ ɖěɖěe è sɔ́ hwǐ dó hu,

bɔ yě yi do e mɛ awǐnnya gɔ́ é sín cyɔ lɛ́ cyɔ́n we.

A cí cyɔ e è gbídí ɖó afɔ wú é ɖé ɖɔhun.

20 A ná xo kpóɖó nú yě ɖo yɔdo mɛ ǎ,

ɖó a sú kún dó nú to hwiɖésúnɔ tɔn,

a hu togun hwiɖésúnɔ tɔn.

21 Mi sɔ́ nǔ nú mɛhutɛn ɖé dó vǐ tɔn lɛ́ tamɛ,

ɖó hwɛ e tɔ́gbó yětɔn lɛ́ hu é wú,

bónú yě ní ma wá sí te bo kp’acɛ dó ayǐkúngban ɔ jí,

lobonú toxo yětɔn lɛ́ kpé to ɔ mɛ ó.”

“Lěe un lin gbɔn é ɔ, mɔ̌ wɛ é ná jɛ gbɔn,

bɔ nǔ e sín gbeta kɔn un wá é ɔ, nǔ énɛ́ wɛ ná jɛnu.

25 Un ná nyínyɛ́ Asilíinu ɔ ɖo to ce mɛ,

bo ná gbídí i ɖó afɔ wú ɖo só ce lɛ́ jí.

È ná ɖe agbanhɛnkpo tɔn sín yě jí,

bo ná ɖe agban tɔn sín abɔ̌ yětɔn lɛ́ ta.

26 Gbeta e kɔn è wá* dó ayǐkúngban ɔ bǐ wú é nɛ́,

alɔ e è dlɛ́n bo ná wa nǔ dó akɔta lɛ́ bǐ wú é* nɛ́.

27 Ðó Jexóva ahwankpá lɛ́ tɔn wá gbeta ɔ kɔn,

mɛ̌ ka sixú gbo kpo nyi ali jí ná?

Alɔ tɔn ɖo dlɛ̌ndlɛ́n jí,

mɛ̌ ka sixú sɛ ɛ wún?

29 “Filisitíi è, mi mɛ ɖě ní ma j’awǎ,

ɖó è wɛ́n mɛ e ɖo mi xo wɛ é sín kpo kpowun wútu ó.

Ðó dan aɖǐvɛ́nɔ ɖé ná gosín dan ɔ sín kúnkan mɛ,

bɔ kúnkan tɔn ná nyí dan aɖǐvɛ́nɔ* e nɔ zɔn é ɖé.

30 Hwenu e nukɔngbéví mɛmaɖómɛɖé tɔn ná ɖo nǔ ɖu wɛ,

bɔ wamamɔnɔ ná nɔ mlɔ́ ayǐ ɖo ayijayǐ mɛ é ɔ,

un ná sɔ́ adɔ dó hu togun* towe,

bo ná hu mɛ e kpo nú we lɛ́ é.

ɖó azizɔ ɖé jawě sín totaligbé,

mɛ ɖěbǔ ɖo lɛjɛlɛjɛ dán wɛ ɖo ahwankpá ɔ mɛ ǎ.”

Yě ná ɖɔ nú yě ɖɔ Jexóva ɖó dodónu Sinyɔ́ɔ tɔn ayǐ,

bɔ mɛmaɖómɛɖé e ɖo togun tɔn mɛ lɛ́ é ná sɔ́ dó ɖó bibɛtɛn.

Ðó è sú kún dó nú Áa Mɔwábu tɔn ɖo zǎn ɖokpó mɛ wútu ɔ,

é cí xwíí.

Ðó è sú kún dó nú Kíi Mɔwábu tɔn ɖo zǎn ɖokpó mɛ wútu ɔ,

é cí xwíí.

 2 É hun káká yi xwé ɔ gbe,* bo lɛ́ yi Dibɔ́ni,

ɛɛn, káká yi vodúnxwé lɛ́ bo ná y’avǐ.

Yě bǐ nɔ dó gbɛvíhan ɖo xɔ yětɔn lɛ́ ta kpó tokplétɛn yětɔn lɛ́ kpó;

yě nɔ jɛ te kpó avǐ kpó.

 4 Hɛcibɔ́ni kpó Eleále kpó sú xó;

è se gbe yětɔn ɖo káká Yaxási,

Ée yě ɖo kpó fán wɛ xwe Luxíti sín kpó jí é ɔ, yě ɖo avǐ ya wɛ;

ée yě xwe Holonayímu é ɔ, yě sú xó tlílí, ɖó awě ɔ wú.

 6 Ðó Nimulímu sín sin lɛ́ mɛ bǐ;

gběhan mǔ xú,

gběhan sɔ́ ɖe ǎ, gběhan mǔ ɖě sɔ́ kpo ǎ.

 7 Énɛ́ wɛ zɔ́n bɔ nǔ e kpo ɖo sɛxwetɛn nú yě lɛ́ é kpó dɔkun yětɔn lɛ́ kpó ɔ, è ɖo yě bɛ́ yi wɛ;

yě ɖo tɔdo* pepliyéetín lɛ́ tɔn ɔ d’asá wɛ.

Gbɛvíhan ɔ hun káká yi Eglayímu;

Gbɛvíhan ɔ hun káká yi Beɛ́ɛ-Elímu.

 9 Ðó sin Dimɔ́ni tɔn lɛ́ gɔ́ nú kanjɔ,

bɔ un lɛ́ ɖó awě ɖěvo lɛ́ ɖo sɛxwetɛn nú Dimɔ́ni:

Un ná sɛ́ kinnikínní ɖé dó mɛ ɖěɖěe ná gán ɖo Mɔwábu lɛ́ é,

kpó mɛ ɖěɖěe ná kpo ɖo to ɔ mɛ lɛ́ é kpó.

16 Sɛ́ agbo ɖé dó acɛkpatɔ́ to ɔ tɔn

sín Sɛ́la gbɔn gbětótló mɛ,

yi vǐ nyɔ̌nu Sinyɔ́ɔ tɔn sín só ɔ jí.

 2 Xɛ e è nya sín adɔ̌ tɔn mɛ é ɖɔhun ɔ,

mɔ̌ wɛ vǐ nyɔ̌nu Mɔwábu tɔn lɛ́ ná cí ɖo tɔgbotɛn Aanɔ́ni tɔn lɛ́.

Yadónúmɛtɔ́ ɔ sín xó ná fó,

nǔhɛngblé ná wá vivɔnu,

bɔ mɛ ɖěɖěe nɔ gbídí mɛ ɖěvo lɛ́ ɖó afɔ wú lɛ́ é ɔ, è ná sú kún yětɔn dó sín ayǐkúngban ɔ jí.

Mɛ e ná jínjɔ́n jí ɖo goxɔ Davídi tɔn mɛ é ná nɔ gbejí;

é ná ɖɔ hwɛ jlɔ́jlɔ́, bo ná yá wǔ bló bɔ nǔjlɔ́jlɔ́wiwa ná tíin.”

 6 Mǐ se xó dó goyíyí Mɔwábu tɔn wú, é nɔ yí go tawun.

Mǐ se xó dó éɖée e é nɔ sɔ́ su é, goyíyí tɔn kpó majijɛ tɔn kpó wú;

amɔ̌, xó tɔn tófwé lɛ́ ná ná nǔɖé ǎ.

 7 Énɛ́ wú wɛ Mɔwábu ná dó gbɛvíhan ɖó awě e xo è é wú;

yě bǐ ná dó gbɛvíhan.

 8 Ðó vǐwungbo Hɛcibɔ́ni tɔn lɛ́ mlú ɖa,

vǐwuntín Sibúma tɔn lɛ́ lɔ mlú ɖa,

acɛkpatɔ́ akɔta lɛ́ tɔn gbídí ala tɔn vɔvɔ cɛ́cɛ́ lɛ́* ɖó afɔ wú;

yě hun káká yi Yazɛ́ɛ;

yě ɖi ga káká yi gbětótló mɛ.

Hɛcibɔ́ni kpó Eleále kpó è mi, un ná sɔ́ ɖasin ce dó fá mi,

ɖó xó e sú wɛ è ɖe dó alǔun mɛ sín atínsínsɛ́n mitɔn kpó nǔkúnyiya mitɔn kpó tamɛ é wá vivɔnu.*

10 È ɖe awǎjijɛ kpó xomɛhunhun kpó sín atínsínsɛ́ngbo ɔ mɛ,

bɔ awǎjijɛ sín han ɖě, alǒ xósúsú ɖě ɖo vǐwungbo lɛ́ mɛ ǎ.

Vǐwunlitɔ́ ɖě sɔ́ nɔ li vǐwun ɖo vǐwunto lɛ́ mɛ ǎ,

ɖó un ko bló bɔ xósúsú ɔ nɔ te.

11 Énɛ́ wú wɛ un nɔ ɖo sísɔ́sísɔ́ wɛ ɖo xomɛ dó Mɔwábu tamɛ,

lěe agǐdigbo nɔ ɖo nǔ ɖɔ wɛ gbɔn é ɖɔhun,

bɔ wǔ kú mì tawun ɖó Kíi-Alɛsɛ́ti wú.

“Éɖíe! Damási sɔ́ ná nyí toxo ǎ,

é ná húzú aglingbigba.

 2 È ná wɔn ya nú toxo Alowɛ́ɛ tɔn lɛ́;

yě ná húzú fí e kanlinhwan lɛ́ nɔ mlɔ́ lɛ́ é,

bɔ mɛ ɖěbǔ ná nɔ dó xɛsi yě ǎ.

 3 Toxo e è mɛ ahohó lɛ́ lɛ̌ dó lɛ́ é ná bú sín Eflayímu,

bɔ Damási ná ba axɔ́súɖuto tɔn kpo;

mɛ ɖěɖěe kpo ɖo Silíi lɛ́ é sín susu ná bú,

lěe Izlayɛ́li ví* lɛ́ sín susu bú gbɔn é ɖɔhun,” wɛ Jexóva ahwankpá lɛ́ tɔn ɖɔ.

 4 “Ðo azǎn énɛ́ gbe ɔ, susu Jakɔ́bu tɔn ná ɖe kpo,

bɔ éyɛ́ mɛ e ɖo ganjí ɖo agbaza mɛ é* ná xú gǒ.

 5 É ná cí lěe nǔkúnyatɔ́ nɔ ɖo nǔkún e ɖo te lɛ́ é xo kplé wɛ,

bɔ awa tɔn nɔ ɖo jinukún lɛ́ ya wɛ é ɖɔhun,

é ná cí lěe mɛɖé nɔ ɖo jinukún cyán wɛ ɖo tɔdo* Hlafa ví lɛ́ tɔn mɛ é ɖɔhun.

 6 Nǔ e è ná cyán lɛ́ é kɛ́ɖɛ́ wɛ ná kpo,

olívutín e è húnhún é ɖɔhun wɛ é ná cí:

Olívu e myá é we, alǒ atɔn jɛ́n kpo ɖo ala tɔn e yi jǐ hú gǎn é jí,

ɛnɛ, alǒ atɔ́ɔ́n jɛ́n kpo ɖo ala tɔn e wú sínsɛ́n ɖe lɛ́ é wú,” wɛ Jexóva Mawu Izlayɛ́li tɔn ɖɔ.

 9 Ðo azǎn énɛ́ gbe ɔ, toxo tɔn e è mɛ ahohó lɛ́ lɛ̌ dó lɛ́ é ná cí nɔtɛn e è jó dó nyi zungbó mɛ é ɖɔhun,

é ná cí atínla e è jó dó ɖo Izlayɛ́li ví lɛ́ nukɔn é ɖɔhun;

é ná húzú to e jɛ vɔ̌ é.

10 Ðó a wɔn Mawu mɛhwlɛ́ngántɔ́ towe;

a flín ahohó towe sín Só ɔ ǎ.

Énɛ́ wú wɛ a nɔ bló jikpá ɖagbe ɖagbe lɛ́,*

bo nɔ tun jǒnɔ* sín atínví d’é mɛ.

11 Ðo kéze ɔ, a nɔ dó kpá lɛ́ lɛ̌ dó jikpá towe kpó sɔxwixwe kpó,

ɖo zǎnzǎn ɔ, a nɔ bló bɔ nǔkún towe nɔ tɔ́n kun,

amɔ̌, a ná ya nǔ ɖěbǔ ɖo azɔn kpó wǔvɛ́ magbokɔ kpó zán gbe ǎ.

12 Mi ɖótó! Togun gěgé ɖo zǐngídi jí,

yě ɖo adǎn jí xu ɖɔhun!

Hunnyahunnya ɖo akɔta lɛ́ mɛ,

nǔɖiɖɔ yětɔn cí aslɔkɛ́ ɖaxó ɖaxó lɛ́ ɖo zǐngídi jí ɖɔhun!

É ná gbɛ́ nǔ nú yě, bɔ yě ná hɔn yi zɔ vwéé,

yě ná hɔn yi zɔ jɔhɔn d’alɔ wɔn mɛ ɖo só jí ɖɔhun,

gběhan wunnɔ* ɖo mlǐmlí wɛ ɖo jɔhɔn syɛ́nsyɛ́n nukɔn ɖɔhun.

Nǔ e ná jɛ dó mɛ e nɔ bɛ́ nǔ mǐtɔn lɛ́ é wú é nɛ́,

nǔ e ɖo te kpɔ́n mɛ ɖěɖěe nɔ vɔ mǐ lɛ́ é nɛ́.

18 Heelú to e mɛ awa nǔvínúví lɛ́ tɔn sín nǔɖiɖɔ kpé é,

to e ɖo tɔsisa Etiopíi tɔn lɛ́ sín xá mɛ é!

 2 É sɛ́ afɔsɔ́ɖótetɔ́ lɛ́ dó gbɔn xu jí,

bɔ yě ná zɔn tɔjíhún e è sɔ́ fɛ́n dó bló lɛ́ é mɛ dó d’asá tɔ, é ɖɔ:

“Wɛndótɔ́ e afɔ yá ná lɛ́ è mi, mi yi,

mi yi akɔta e mɛ mɛ lɛ́ ɖi ga bo ɖíɖí wǔ ɖe é* mɛ,

togun e è nɔ ɖi xɛsi ná gbɔn fí bǐ é mɛ,

akɔta e ɖó hlɔ̌nhlɔ́n, bo nɔ lɛ́ ɖu ɖ’é jí,*

bɔ tɔ gba to tɔn é mɛ.”

 3 Mi mɛ e nɔ nɔ to ɔ mɛ lɛ́ é kpó mi mɛ e nɔ nɔ ayǐkúngban ɔ jí lɛ́ é kpó bǐ è mi,

nǔ e mi ná mɔ é ná cí wuntun* e è sɔ́ dó jǐ ɖo só lɛ́ jí é ɖɔhun,

bɔ mi ná se nǔɖiɖɔ ɖé bɔ é ná cí lanzo kún wɛ è ɖe ɖɔhun.

“Nǔ ɖěbǔ ná gba ayi dó nú mì ǎ, bɔ un ná kpɔ́n* nɔtɛn ce e un ɖó ayǐ é,

yǒzo e hɛn mɛ syɛ́nsyɛ́n bɔ wěziza hwesivɔ́ tɔn xo kpóɖó ná é ɖɔhun,

amǔ e sú ɖo yǒzo nǔkúnyiyahwenu tɔn hwenu é ɖɔhun.

 5 Ðó jɛ nukɔn nú nǔkúnyiyahwenu ɔ,

hwenu e sɛ́gbigba fó, bɔ vǐwun lɛ́ jɛ myǎmyá jí é ɔ,

è ná sɔ́ nǔkúnyanú dó sɛ́n alaví lɛ́,

bo ná sɛ́n kan lɛ́, lobo ná ɖe yě síin.

 6 È ná jó yě bǐ nú nǔwlíxɛ sókan mɛ tɔn lɛ́,

kpó kanlin ayǐkúngban jí tɔn lɛ́ kpó.

Nǔwlíxɛ lɛ́ ná nɔ yě jí yǒzohwenu,

bɔ kanlin e ɖo ayǐkúngban ɔ jí lɛ́ é bǐ ná nɔ yě jí nǔkúnyiyahwenu.

 7 Hwe énɛ́ nu ɔ, è ná hɛn nǔníná ɖé wá nú Jexóva ahwankpá lɛ́ tɔn,

sín akɔta e mɛ mɛ lɛ́ ɖi ga bo ɖíɖí wǔ ɖe é* mɛ,

sín togun e è nɔ ɖi xɛsi ná gbɔn fí bǐ é mɛ,

sín akɔta e ɖó hlɔ̌nhlɔ́n, bo nɔ lɛ́ ɖu ɖ’é jí,*

bɔ tɔ gba to tɔn é mɛ,

wá nɔtɛn e wú nyǐkɔ Jexóva ahwankpá lɛ́ tɔn ɖe é mɛ, énɛ́ wɛ nyí Sinyɔ́ɔ só ɔ.”

Nǔmɛsɛn maɖótaɖé Ejípu tɔn lɛ́ ná sísɔ́ ɖo nukɔn tɔn,

bɔ Ejípunu lɛ́ sín ayi ná gba dó.

 2 “Un ná bló bɔ Ejípunu ɖě ná sí te dó ɖě jí,

bɔ yě ná tɔ́n ahwan yěɖée lɛ́,

mɛ ɖokpó ɖokpó ná sí te dó nɔví tɔn kpó nɔzo tɔn kpó jí,

toxo ɖě ná sí te dó ɖě jí, axɔ́súɖuto ɖě ná sí te dó ɖě jí.

 3 Ejípunu lɛ́ sín ayi ná gba dó,

bɔ un ná húzú tuto yětɔn lɛ́.

Yě ná gbɔ bo lílɛ́ kpanta nǔmɛsɛn maɖótaɖé lɛ́,

nǔnyíylɔ́númɛtɔ́ lɛ́, bokantɔ́ lɛ́ kpó amɔɛkantɔ́ lɛ́ kpó.

 4 Un ná jó Ejípu dó alɔ mɛ nú gǎn tasyɛ́ntɔ́ ɖé,

bɔ axɔ́sú hunnylámɔnɔ ɖé ná kp’acɛ dó yě nu,” wɛ Aklúnɔ nǔgbó ɔ, Jexóva ahwankpá lɛ́ tɔn ɖɔ.

 5 Sin e ɖo xu mɛ é ná xú,

bɔ tɔsisa ɔ ná mɛ lobo ná xú.

 6 Tɔsisa lɛ́ ná hwɛ́n wǎn gblégblé;

Nilu Ejípu tɔn sín tɔhwín lɛ́ ná ɖe kpo, bo ná mɛ.

 7 Gběhan e ɖo tɔsisa Nilu tó káká yi lɛ́ é, ɛɛn, éé ɖo Nilu sín nu lɛ́ é,

kpó ayǐkúngban e jí è dó nǔkún ɖó ɖo Nilu sín tó káká yi lɛ́ é bǐ kpó ná xú.

 8 Hwehutɔ́ lɛ́ ná byɔ́ aluwɛ mɛ,

mɛ e nɔ ɖó mlɛ dó Nilu mɛ lɛ́ é ná ná alě,

bɔ mɛ ɖěɖěe nɔ nyi ɖɔ dó tɔ mɛ lɛ́ é sín kɛ́n sɔ́ ná sɔ atɛ́n ǎ.

 9 Mɛ ɖěɖěe nɔ zán lɛ̌ɛnkan dó lɔn avɔ ná lɛ́ é

kpó mɛ ɖěɖěe nɔ lɔn avɔ wěwé ɖo avɔlɔnnú jí lɛ́ é kpó ɔ, è ná dó wínnyá yě.

10 Awakanmɛ ná gbɔjɔ́ avɔlɔntɔ́ lɛ́;

jokóxotɔ́ e è yí lɛ́ é bǐ ná nɔ aluwɛ mɛ.

“Nǔnywɛ́tɔ́ lɛ́ sín kún mɛ wɛ un gosín,

axɔ́sú hwexónu tɔn lɛ́ sín kún mɛ wɛ un gosín” gbɔn?

13 Axɔ́ví Sowáan tɔn lɛ́ nɔ wa xlonɔnú;

è blɛ́ axɔ́ví Nɔfu* tɔn lɛ́;

akɔta tɔn lɛ́ sín gǎn lɛ́ bló bɔ Ejípu zɛ gbě.

14 Jexóva kɔn gbigbɔ e nɔ dɔn nǔ wlú é dó jǐ tɔn;

yě bló bɔ Ejípu zɛ gbě ɖo nǔ ɖěbǔ e é nɔ wa é mɛ,

ahannumúnɔ e ɖo sa fún wɛ gbɔn nǔ e é vi é mɛ é ɖɔhun.

15 Ejípu ná ɖó azɔ̌ ɖě bo ná wa ǎ,

ta alǒ sí, ala alǒ fɛ́n,* ná ɖó azɔ̌ ɖě bo ná wa ǎ.

Nǔɖé jawě, bo cí axásáxásá jɔhɔn e ɖo tofɔligbé za wɛ é ɖɔhun,

é jawě sín gbětótló mɛ, sín to e dó xɛsi é mɛ.

Gbejímanɔtɔ́ ɖo nǔ wa wɛ kpó gbejímanɔ kpó,

bɔ kúnsúdónúnǔtɔ́ ɖo kún sú dó nú nǔ wɛ.

Un ɖo kúsúkpɔ́ xo wɛ,

nyɔ̌nu e ɖo ajidonu é ɖɔhun.

Ado hu mì sɔmɔ̌, bɔ un sixú se nǔ ǎ;

ayi ce gba dó sɔmɔ̌, bɔ un sixú mɔ nǔ ǎ.

 7 É mɔ ahwankɛkɛ́ ɖé kpó sɔ́ lɛ́ sín gbɛ̌ta ɖé kpó,

ahwankɛkɛ́ tócí lɛ́ tɔn ɖé,

ahwankɛkɛ́ lǎkúnmí lɛ́ tɔn ɖé.

“Jexóva è, un nɔ ɖo te hwebǐnu ɖo atɔxwɛ ɔ jí ɖo kéze,

un nɔ ɖo te ɖo nǔcɔ́tɛn ce ɖo zǎn lɛ́ bǐ mɛ.

10 Togun ce, hwi mɛ e è só jinukún ɖɔhun é,

hwi mɛ e nyí jinukún* e tɔ́n sín jinukúnsótɛn ce é,

un ko ɖɔ nǔ e un se sín Jexóva ahwankpá lɛ́ tɔn, Mawu Izlayɛ́li tɔn gɔ́n é nú we.

Tomɛyitɔ́gbɛ́ta Dedáni tɔn lɛ́ mi,

zungbó e ɖo gbětótló ɔ mɛ é mɛ wɛ mi ná dɔ́.

14 Mi mɛ e nɔ nɔ Tema yíkúngban jí lɛ́ é mi,

mi hɛn sin, bo yi kpé mɛ e kɔ xú é,

bo hɛn wɔ̌xúxú yi jó nú mɛ e ɖo hinhɔn wɛ é.

15 Ðó yě hɔn ɖo hwǐ nukɔn, ɖo hwǐ e è sún é nukɔn,

ɖo gǎ e ɖo dlɛ̌ndlɛ́n jí é nukɔn, ɖo lě do ahwan ɔ syɛ́n sɔ é nukɔn.

 2 Toxo e mɛ hunnyahunnya gɔ́ é wɛ a nyí ɖ’ayǐ,

toxo zǐngídinɔ, toxo e nɔ ɖú agbojlaka é.

Hwǐ wɛ è sɔ́ hu mɛ towe e kú lɛ́ é ná ǎ,

yě ka lɛ́ kú ɖo ahwangbénu ǎ.

Mɛ e è mɔ lɛ́ é bǐ sín ahwankannumɔ wɛ è wlí,

có fí línlín tawun wɛ yě hɔn yi.

 4 Énɛ́ wú wɛ un ɖɔ: “Mi ɖe nukún sín jǐ ce,

mi nú má y’avǐ vívɛ́ vívɛ́.

Mi ma ɖɔ dandan ɖɔ émí ná dó gbɔ nú mì,

ɖó kún súsú dó nú togun ce sín vǐ nyɔ̌nu ɔ* wú ó.

 5 Ðó azǎn e gbe è dán ɖěwagbɛn, cí ahwan bo lɛ́ ɖi xɛsi tawun é wɛ é nyí

sín Aklúnɔ Nǔbǐwúkpétɔ́, Jexóva ahwankpá lɛ́ tɔn gɔ́n,

ɖo Tɔdo nǔmimɔ tɔn ɔ mɛ.

È ɖo ahohó ɔ mu wɛ,

bo ɖo xó sú sɛ́dó só ɔ ta wɛ.

 6 Elámu sɔ́ gǎgo,*

bɔ ahwankɛkɛ́ lɛ́ kpó sɔ́* lɛ́ kpó xwedó è,

Kíi ɖe nǔ sín gǎglónú ɔ jí.*

 7 Ahwankɛkɛ́ lɛ́ ná gɔ́

tɔdo towe e nyɔ́ hú gǎn lɛ́ é mɛ,*

bɔ sɔ́* lɛ́ ná sɔ́ tɛnmɛ yětɔn lɛ́ ɖo hɔntogbó ɔ ta,

 8 è ná ɖe nǔ e nɔ nya xɛ ɖo Judáa jí é síin.

12 Ðo azǎn énɛ́ gbe ɔ, Aklúnɔ Nǔbǐwúkpétɔ́, Jexóva ahwankpá lɛ́ tɔn,

ná byɔ́ ɖɔ è ní ya avǐ bo nɔ aluwɛ mɛ,

è ní xwlɛ́ ta bo dó ati.

13 Amɔ̌, é nyɔ́ wa ɔ, agɔ̌ kpó awǎjijɛ kpó wɛ tíin,

è ɖo nyibú hu wɛ, bo ɖo lɛ̌ngbɔ́ hu wɛ,

è ɖo lan ɖu wɛ, bo ɖo vɛ̌ɛn nu wɛ.

 3 Sin gěgé jí wɛ jinukún* Cixɔ́ɔ* tɔn lɛ́

kpó nǔkún e è ya ɖo Nilu sín xá mɛ lɛ́ é kpó nɔ gbɔn, ɛɛn, nǔ e nɔ hɛn le wá nú we lɛ́ é;

yě wɛ nɔ dó dɔkun nú akɔta lɛ́.

 4 Hwi Sidɔ́ɔn e nyí ahohó e è mɛ dó xutó é, winnyá ní hu we,

ɖó xu ɖɔ:

“Un se ajidonu sín wǔvɛ́ ǎ, un ka lɛ́ ji vǐ ǎ,

mɔ̌ jɛ́n un ma kpé nukún dó dɔ̌nkpɛvú lɛ́ wú bɔ yě su, alǒ kplɔ́n ɖyɔ̌vǐ* lɛ́ ǎ é nɛ́.”

 5 Lěe é nyí gbɔn hwenu e mɛ lɛ́ se gbeɖíɖó ɔ dó Ejípu wú é ɔ,

yě ná nɔ aluwɛ mɛ hwenu e yě ná se gbeɖíɖó ɔ dó Tíi wú é.

 8 Mɛ̌ ka wá gbeta énɛ́ kɔn dó Tíi wú,

éyɛ́ mɛ e nɔ má axɔ́súgbákún lɛ́,

bɔ ajɔ̌tɔ́ tɔn lɛ́ nyí axɔ́ví,

lobɔ è nɔ wlí yɛ̌yi nú ajɔ̌tɔ́ tɔn lɛ́ ɖo ayǐkúngban ɔ bǐ jí é?

 9 Jexóva ahwankpá lɛ́ tɔn ɖésúnɔ wɛ wá gbeta énɛ́ kɔn,

bo ná dó ɖó nǔ go e yí wɛ é nɔ ɖe, ɖó ɖɛkpɛ tɔn wú é nu,

lobo ná dó winnyá mɛ ɖěɖěe è nɔ wlí yɛ̌yi ná gbɔn ayǐkúngban ɔ jí lɛ́ é bǐ.

11 É dlɛ́n alɔ tɔn dó xu jí;

é húnhún axɔ́súɖuto lɛ́.

12 Bɔ é ɖɔ: “Ðyɔ̌vǐ ɖo alɔjí Sidɔ́ɔn tɔn, hwi mɛ e è gbídí kɔ ná é,

a sɔ́ ná ɖú agbojlaka ɖě ǎ.

Togun énɛ́ (é nyí Asilíi ǎ),

wɛ bló bɔ é húzú fí e kanlin gbětótló mɛ tɔn lɛ́ nɔ nɔ é.

Yě ko mɛ atɔxwɛ e yě ná zán dó ján go dó è lɛ́ é;

yě gba atɔxwɛ tɔn syɛ́nsyɛ́n lɛ́,

bɔ mɔ̌ mɛ ɔ, é húzú aglingbigba.

14 Tɔjíhún Taasísi tɔn lɛ́ mi, mi dó gbɛvíhan,

ɖó è ko gba ahohó mitɔn hánnyá.

Xo agǐdigbo towe kpó azɔ̌tuuntuun kpó;

ji han gěgé,

bónú yě ná flín we.”

togun ɔ kpó vɔ̌sánúxwlémawutɔ́ ɔ kpó,

mɛsɛntɔ́ súnnu kpó gǎn tɔn súnnu kpó,

mɛsɛntɔ́ nyɔ̌nu kpó gǎn tɔn nyɔ̌nu kpó,

nǔxɔtɔ́ kpó nǔsatɔ́ kpó,

axɔ́tɔ́nɔ kpó axɔ́ɖutɔ́ kpó,

akwɛ́nyanúmɛtɔ́ kpó akwɛ́nyatɔ́ kpó.

 3 È ná ɖe mɛ bǐ sín to ɔ mɛ mlɛ́mlɛ́;

è ná vɔ ɛ bǐ mlɛ́mlɛ́,

ɖó Jexóva wɛ ɖɔ xó énɛ́.

 5 Mɛ e nɔ nɔ to ɔ mɛ lɛ́ é hɛn to ɔ kwíji,

ɖó yě gba sɛ́n lɛ́,

bo ɖyɔ́ gbetakɛ́n lɛ́,

lobo gba akɔjijɛ e ɖo ayǐ káká sɔ́yi é.*

 6 Énɛ́ wɛ zɔ́n bɔ nudómɛ ɔ vɔ to ɔ,

bɔ è dó hwɛ tɔn mɛ e ɖ’é mɛ lɛ́ é.

Énɛ́ wú wɛ mɛ e ɖo to ɔ mɛ lɛ́ é sín kɛ́n ɖe kpo,

bɔ mɛ kwínwe ɖé jɛ́n è jó dó.

 7 Vɛ̌ɛn yɔ̌yɔ́ ɔ ɖo aluwɛ mɛ,* vǐwuntín lɛ́ je,

bɔ mɛ ɖěɖěe sín ayi mɛ awǎjijɛ gɔ́ lɛ́ é bǐ ɖo azɔn wɛn wɛ.

 8 Awǎjijɛ e ná wɛ hǔn lɛ́ ɖe é nɔ te;

kpacaɖútɔ́ lɛ́ sín zǐngídi wá vivɔnu;

awǎjijɛ sín gbe e dó wɛ agǐdigbo ɔ ɖe é nɔ te.

 9 Yě nɔ nu vɛ̌ɛn han mɛvo,

bɔ ahan syɛ́nsyɛ́n nɔ vɛ́ ɖo mɛ ɖěɖěe ɖo nunu wɛ lɛ́ é sín nu mɛ.

10 È gba toxo e è hɔn jó dó é hánnyá;

è sú xwé lɛ́ bǐ bónú mɛ ɖěbǔ ní ma byɔ́ xwé lɛ́ gbe ó.

Awǎjijɛ bǐ blí bú;

awǎjijɛ to ɔ tɔn ko yi.

12 Aglingbigba kɛ́ɖɛ́ wɛ kpo ɖo toxo ɔ mɛ;

è kíjá hɔntogbó ɔ bǐ mlɛ́mlɛ́.

Yě ná cí hwenu e è húnhún olívutín é ɖɔhun,

yě ná cí hwenu e vǐwun yiya nɔ wá vivɔnu bɔ è nɔ cyán vǐwun e è jó dó lɛ́ é ɖɔhun.

14 Yě ná zé gbe dó jǐ,

yě ná sú xó kpó awǎjijɛ kpó.

15 Énɛ́ wú wɛ yě ná kpa susu nú Jexóva ɖo wěziza gbéjí;*

yě ná kpa susu nú Jexóva, Mawu Izlayɛ́li tɔn ɔ sín nyǐkɔ ɖo tɔtɛ́ntinto xu ɔ tɔn lɛ́ mɛ.

Heelú mì! Gbejímanɔtɔ́ lɛ́ wa nǔ kpó gbejímanɔ kpó;

ɛɛn, gbejímanɔtɔ́ lɛ́ nɔ fɔ́n bo nɔ ɖo nǔ wa kpó gbejímanɔ kpó wɛ.”

18 Mɛ ɖěbǔ e ɖo hinhɔn nú nǔɖiɖɔ e ɖo adohu adohu ɖó nú mɛ wɛ é ná jɛ do mɛ,

bɔ mɛ ɖěbǔ e ɖo do mɛ tɔ́n sín wɛ é ná sɔ́ fɛ́ca.

Ðó è ná hun sin e ɖo aga é sín hɔntogbó lɛ́,

bɔ dodónu ayǐkúngban ɔ tɔn lɛ́ ná húnhún.

19 Ayǐkúngban ɔ zɛ ɖó vovo;

ayǐkúngban ɔ húnhún;

ayǐkúngban ɔ dán wǔ kpó zǐngídi kpó.

20 Ayǐkúngban ɔ nɔ fún sa ahannumúnɔ ɖɔhun,

é yi gǔdo ɔ, é nɔ wá nukɔn azava e jɔhɔn ɖo dǐndán wɛ é ɖɔhun.

Nǔwanyido tɔn kpɛn tawun ɖo jǐ tɔn,

é ná j’ayǐ, bo sɔ́ ná lɛ́ sí te ǎ.

21 Ðo azǎn énɛ́ gbe ɔ, Jexóva ná sɔ́ ayi tɔn ɖó ahwankpá e ɖo jǐ aga é jí,

bo ná lɛ́ sɔ́ ɖó axɔ́sú ayǐkúngban jí tɔn lɛ́ jí ɖo ayǐkúngban ɔ jí.

22 È ná xo yě kplé ɖó kpɔ́,

gantɔ́ e è kplé ɖó do mɛ lɛ́ é ɖɔhun,

è ná sú yě dó gankpá do glɔ́ tɔn mɛ;

azǎn gěgé gúdo ɔ, è ná sɔ́ ayi ɖó yě jí.

23 È ná dó winnyá sunkpéká,

bo ná dó winnyá hwe e ɖo kínkɔ́n wɛ é,

ɖó Jexóva ahwankpá lɛ́ tɔn ko húzú Axɔ́sú ɖo Sinyɔ́ɔ só ɔ jí, bo lɛ́ húzú ɖo Jeluzalɛ́mu,

É húzú Axɔ́sú susunɔ ɖo togun tɔn sín tomɛxó lɛ́ nukɔn.*

Un nɔ sɔ́ we su, un nɔ kpa susu nú nyǐkɔ towe,

ɖó a bló nǔ e jí wǔ lɛ́ é,

ɛɛn, a wá nǔ énɛ́ lɛ́ sín gbeta kɔn* sín hwexónu.

A nyí gbejínɔtɔ́, bo lɛ́ nyí mɛ ɖejidéwú.

 2 Ðó a sɔ́ toxo ɔ dó húzú awǐnnyaglo e è kplé é ɖé,

bo sɔ́ toxo e è mɛ ahohó lɛ́ lɛ̌ dó é dó húzú aglingbigba.

Toɖévomɛnu lɛ́ sín toxo e è mɛ ahohó lɛ́ lɛ̌ dó é sɔ́ nyí toxo ǎ;

è sɔ́ ná vɔ́ toxo ɔ gbá gbeɖé ǎ.

 3 Énɛ́ wú wɛ togun hlɔ̌nhlɔ́nnɔ ɖé ná kpa susu nú we;

akɔta acɛgannagannakpanúmɛtɔ́ lɛ́ sín toxo ná ɖi xɛsi nú we.

 4 Ðó a húzú ahohó nú mɛmaɖómɛɖé,

bo húzú ahohó nú wamamɔnɔ e ɖo aluwɛ mɛ é.

A húzú bibɛtɛn ɖo jǐ syɛ́nsyɛ́n hwenu,

bo húzú yɛtɛn ɖo yǒzohwenu.

Hwenu e acɛgannagannakpanúmɛtɔ́ lɛ́ sín xomɛsin cí jǐ syɛ́nsyɛ́n e xo dǒ é ɖɔhun,

 5 bo cí yǒzo ɖɔhun ɖo ayǐkúngban xúxú jí é ɔ,

a ɖó nǔ jǒnɔ lɛ́ sín zǐngídi nu.

Lěe yɛtɛn akpɔ́kpɔ́ lɛ́ tɔn nɔ ɖó nǔ yǒzo nu gbɔn é ɔ,

mɔ̌ ɖokpó ɔ, acɛgannagannakpanúmɛtɔ́ lɛ́ sín han yi xɔ.

 6 Ðo só énɛ́ jí ɔ, Jexóva ahwankpá lɛ́ tɔn ná ylɔ́ agɔ̌ ɖokpó nú togun lɛ́ bǐ,

yě ná ɖu nǔɖuɖu dó jǒ lɛ́,

bo ná nu vɛ̌ɛn ɖagbe ɖagbe lɛ́,

yě ná ɖu nǔɖuɖu dó jǒ e fɔn e nɔ nɔ lanxú mɛ é gɔ́ lɛ́ é,

yě ná nu vɛ̌ɛn ɖagbe, vɛ̌ɛn xwíxwí.

 7 Ðo só énɛ́ jí ɔ, é ná ɖe avɔ e è bú dó togun lɛ́ bǐ é síin,*

bo ná ɖe wǔcyɔ́n* e è lɔn bo tɛ́ dó akɔta lɛ́ bǐ jí é síin.

 8 É ná sɔ́ kú mì* káká sɔ́yi,

Aklúnɔ Nǔbǐwúkpétɔ́ Jexóva ná súnsún ɖasin sín nukún lɛ́ bǐ mɛ.

É ná ɖe winnyá nú togun tɔn gbɔn ayǐkúngban ɔ bǐ jí,

ɖó Jexóva ɖésúnɔ wɛ ɖɔ mɔ̌.

Mǐ ɖó nukún i,

bɔ é ná hwlɛ́n mǐ.

10 Ðó alɔ Jexóva tɔn ná nɔ só énɛ́ jí,

bɔ è ná sɔ́ afɔ dó gbídí Mɔwábu ná ɖo nɔtɛn éɖésúnɔ tɔn,

lěe è nɔ sɔ́ afɔ dó gbídí nǔywɛ́ ná bɔ é nɔ húzú zunkɔ́ gbɔn é ɖɔhun.

11 É ná dlɛ́n alɔ tɔn bo ná xo Mɔwábu,

lěe tɔlintɔ́ nɔ xo sin kpó alɔ tɔn lɛ́ kpó hwenu e é ɖo tɔ lin wɛ é ɖɔhun.

É ná zán alɔ tɔn lɛ́ kpó azɔ̌tuuntuun kpó

dó cí asɔ nú goyíyí tɔn.

12 Toxo e è mɛ ahohó lɛ́ lɛ̌ dó é kpó dǒ towe ɖaxó e nɔ nya xɛ ɖo mɛ jí lɛ́ é kpó ɔ,

é ná mu yě;

é ná zin i dó kɔ́mɛ, ɛɛn, dó afúntúntún mɛ.

 2 Mi hun hɔntogbó lɛ́, bónú akɔta nǔjlɔ́jlɔ́watɔ́ ɔ ní dó sixú byɔ́ mɛ,

akɔta ɖé wɛ bo nɔ wa nǔ kpó gbejíninɔ kpó.

 3 A ná nya xɛ ɖo mɛ e nɔ gán jɛ wǔtu towe bǐ mlɛ́mlɛ́ lɛ́ é* jí;

a ná ná fífá tɛgbɛ tɔn yě,

ɖó hwi wú wɛ yě ɖeji dó.

 4 Mi ɖeji dó Jexóva wú káká sɔ́yi,

ɖó Jǎa* Jexóva wɛ nyí Só mavɔmavɔ ɔ.

É dɔn ɛ wá do,

é dɔn ɛ wá do ɖo ayǐkúngban jí;

é zín i dó afúntúntún mɛ.

 6 È ná sɔ́ afɔ dó gbídí i,

mɛ e ɖo wǔvɛ́ se wɛ é sín afɔ, ɛɛn, mɛmaɖómɛɖé sín afɔ ná gbídí i.”

Ðó a nɔ wa nǔ jlɔ́jlɔ́ wútu ɔ,

a ná bló nǔjlɔ́jlɔ́watɔ́ sín ali ɖó.

 8 Jexóva è, ɖó mǐ ɖo hwɛɖiɖɔ towe lɛ́ sín ali xwedó wɛ wútu ɔ,

mǐ ɖo nukún ɖó we wɛ.

 9 Zǎnmɛ ɔ, un nɔ ba ná mɔ we kpó ayi ce bǐ kpó,*

ɛɛn, gbigbɔ ce nɔ ɖo biba we wɛ;

ɖó ényí a ɖo hwɛ ɖɔ xá ayǐkúngban ɔ wɛ ɔ,

mɛ e nɔ nɔ to ɔ mɛ lɛ́ é nɔ kplɔ́n nǔ dó nǔjlɔ́jlɔ́wiwa wú.

10 Ényí è tlɛ nyɔ́ xomɛ dó mɛdídá wú ɔ,

é ná kplɔ́n nǔjlɔ́jlɔ́wiwa ǎ.

É ná bo tlɛ nyí ɖo nǔjlɔ́jlɔ́wiwa* sín to mɛ ɔ, é ná wa nǔ nyanya;

é ná mɔ susu Jexóva tɔn ǎ.

12 Jexóva è, a ná ná fífá mǐ,

ɖó nǔ e mǐ bló lɛ́ é bǐ ɔ,

hwi wɛ bló nú mǐ.

13 Jexóva Mawu mǐtɔn è, gǎn ɖěvo lɛ́ kp’acɛ dó mǐ jí gbɔn vo nú hwɛ,

amɔ̌, nyǐkɔ towe kɛ́ɖɛ́ wɛ mǐ nɔ ylɔ́.

Ðó a sɔ́ ayi towe ɖó yě jí,

bo ná sú kún dó nú yě mlɛ́mlɛ́, bɔ è sɔ́ ná flín yě ɖě ǎ.

15 A bló bɔ akɔta ɔ sukpɔ́ d’é jí, Jexóva è,

a bló bɔ akɔta ɔ sukpɔ́ d’é jí;

a sɔ́ hwiɖée su.

16 Jexóva è, hwenu e yě ɖo wǔvɛ́ mɛ é ɔ, yě wá gɔ̌n towe;

yě ɖe kpá bo xo ɖɛ sɛ́dó we, bo ɖɔ nǔ e ɖo ayi yětɔn mɛ é bǐ hwenu e a dɔn tó nú yě é.

17 Lěe nyɔ̌nu xoxónɔ e ja vǐ ji gbé é

nɔ ɖo wǔvɛ́ ajidonu tɔn se wɛ bo nɔ ɖo xó sú wɛ, ɖó wǔvɛ́ wú gbɔn é ɔ,

Jexóva è, lěe a bló bɔ nǔ cí nú mǐ é nɛ́.

18 Mǐ mɔ xo, mǐ se ajidonu sín wǔvɛ́,

amɔ̌, é cí nǔ ɖɔ jɔhɔn wɛ mǐ ji ɖɔhun.

Mǐ hɛn hwlɛngán wá to ɔ mɛ ǎ,

mɛ ɖěbǔ ka ji vǐ bónú é ná nɔ to ɔ mɛ ǎ.

Mi mɛ e ɖo kɔ́ glɔ́ lɛ́ é mi,

mi fɔ́n bo sú xó kpó awǎjijɛ kpó!

Ðó amǔ mitɔn cí amǔ zǎnzǎn tɔn* ɖɔhun,

bɔ ayǐkúngban ná jó gǎnmaɖowǔnánɔ e ɖo yɔdo mɛ lɛ́ é dó, bɔ yě ná wá gbɛ.*

20 Togun ce, mi yi, mi byɔ́ xɔnɔnɔ mitɔn lɛ́ mɛ,

bo sú hɔn mitɔn lɛ́ dó ta.

Mi hwlá miɖée nú hwenu kléwún ɖé,

káká bónú xomɛsin syɛ́nsyɛ́n ɔ ní wá yi.

21 Ðó éɖíe! Jexóva jawě sín nɔtɛn tɔn,

bo ná ylɔ́ mɛ e nɔ nɔ to ɔ mɛ lɛ́ é ɖɔ yě ní wá ɖó nǔwanyido yětɔn sín gbe;

to ɔ ná ɖe hun e è kɔn nyi ayǐ ɖ’é mɛ lɛ́ é gba,

bo sɔ́ ná hwlá mɛ tɔn e è hu lɛ́ é ɖě ǎ.”

27 Ðo azǎn énɛ́ gbe ɔ, Jexóva ná sɔ́ hwǐ tɔn e ɖá, d’agba, bo ɖó hlɔ̌nhlɔ́n é,

bo ná sɔ́ ayi tɔn ɖó Levyatáan,* dan e nɔ ɖíɖí é,

énɛ́ wɛ nyí Levyatáan, dan e nɔ ɖíɖí gbɔn adɔgo jí é jí;

é ná hu nǔɖíɖó e d’abaɖa bo ɖo xu mɛ é.

Un nɔ nya xɛ ɖo jǐ tɔn zǎn kéze,

bónú mɛ ɖěbǔ ní ma wa nǔ dó wǔ tɔn ó.

É ní dó hwɛ gbɔ xá mì;

nyɛ wɛ é ná dó hwɛ gbɔ xá.”

 6 Ðo azǎn e jawě lɛ́ é jí ɔ, Jakɔ́bu ná dó ɖɔ do,

Izlayɛ́li ná gba sɛ́, bo ná tɔ́n kun;

yě ná bló bɔ sínsɛ́n ná gɔ́ ayǐkúngban ɔ jí.

 9 Mɔ̌ mɛ ɔ, è ná súnsún nǔwanyido Jakɔ́bu tɔn,

bɔ nǔ e ná jɛ hwenu e è ná ɖe hwɛ tɔn síin é ɖíe:

é ná bló bɔ vɔ̌sákpe ɔ sín awǐnnya lɛ́ bǐ

ná cí hwě e è gba hánnyá lɛ́ é ɖɔhun,

è ná jó dotín mímɛ́* lɛ́, alǒ nǔ e jí è nɔ dó zǎlínkpɔ́n zo ɖe lɛ́ é ɖě dó ǎ.

10 Ðó toxo e è mɛ ahohó lɛ́ lɛ̌ dó é ná jɛ vɔ̌;

è ná wɔn amagbo lɛ́, bo ná jó yě dó gbětótló ɖɔhun.

Nyibúví ná ɖu ama ɖo fínɛ́, bo ná mlɔ́ fínɛ́,

lobo ná ɖu atínla lɛ́.

11 Ényí alaví tɔn lɛ́ xú ɔ,

nyɔ̌nu lɛ́ ná wá, bo ná wɛ́n yě,

lobo ná flɔ́ myɔ ná.

Énɛ́ wú wɛ Mɛ e ɖó yě é ma ná kú nǔbláwǔ ɖě nú yě ǎ,

bɔ Mɛ e bló yě é ná nyɔ́ xomɛ ɖě dó yě wú ǎ.

28 Heelú ahannumúnɔ Eflayímu tɔn lɛ́ sín axɔ́súgbákún* ɖɛkpɛ ɖɛkpɛ* lɛ́

kpó susu tɔn ɖɛkpɛ ɖɛkpɛ ɔ sín sɛ́ e ɖo fyɔ́fyɔ́ wɛ é kpó;

é ɖo ta nú mɛ ɖěɖěe jí vɛ̌ɛn ɖu ɖe lɛ́ é, sín tɔdo e mɛ ji nɔ jɛ ɖe é!

É ná nyi i dó do ɖo ayǐkúngban ɔ jí kpó hlɔ̌nhlɔ́n kpó,

jɔhɔn syɛ́nsyɛ́n nǔhɛngblétɔ́ e ɖo nyinyi wɛ kpó kɛ́njí kpó, bɔ xɛbyoso ɖo nǔ ɖɔ ɖ’é mɛ wɛ é ɖɔhun,

tɔgbamɛ ɖaxó e hwenu jɔhɔn syɛ́nsyɛ́n ɖo nyinyi wɛ, bɔ xɛbyoso lɛ́vɔ́ ɖo nǔ ɖɔ ɖ’é mɛ wɛ é ɖɔhun.

 3 È ná sɔ́ afɔ dó gbídí

ahannumúnɔ Eflayímu tɔn lɛ́ sín axɔ́súgbákún ɖɛkpɛ ɖɛkpɛ* lɛ́ ná.

 4 Susu tɔn ɖɛkpɛ ɖɛkpɛ ɔ sín folówa e ɖo fyɔ́fyɔ́ wɛ,

bo ɖo tɔdo e mɛ ji nɔ jɛ ɖe é ta é,

ná cí fígi nukɔn nukɔntɔn e nɔ tɔ́n jɛ nukɔn nú yǒzohwenu é ɖɔhun.

 7 Vɔ̌sánúxwlémawutɔ́ lɛ́ kpó gbeyíɖɔ lɛ́ kpó nɔ zɛ gbě ɖó vɛ̌ɛn wú;

ahan syɛ́nsyɛ́n lɛ́ nɔ zɔ́n bɔ yě nɔ fún sa;

yě nɔ zɛ gbě ɖó ahan syɛ́nsyɛ́n wú;

vɛ̌ɛn nɔ wlú taká mɛ nú yě,

bɔ yě nɔ fún sa ɖó ahan syɛ́nsyɛ́n wú,

nǔmimɔ yětɔn nɔ zɔ́n bɔ yě nɔ zɛ gbě,

bɔ yě nɔ klɛ́n afɔ ɖo hwɛɖiɖɔ linu.

 8 Ðó nǔ e yě vi lɛ́ é gbɔn fí bǐ ɖo távo yětɔn lɛ́ jí,

fí ɖě yi ɖ’é mɛ ǎ.

 9 Mɛ̌ è ná ná nǔtuuntuun?

Mɛ̌ è ná tínmɛ wɛn ɔ ná?

Mɛ ɖěɖěe è ɖe anɔ̌ ná tlóló lɛ́ é wɛ a?

Mɛ ɖěɖěe è ɖe sín akɔ́nnu tlóló lɛ́ é wɛ a?

10 Ðó hwebǐnu ɔ, é nɔ ɖɔ: “Gbeɖiɖe ɖějɛɖěgúdo, gbeɖiɖe ɖějɛɖěgúdo,

kan ɖějɛɖěgúdo, kan ɖějɛɖěgúdo,*

kpɛɖé ɖo fí, kpɛɖé ɖo dɔ̌n.”

“Gbeɖiɖe ɖějɛɖěgúdo, gbeɖiɖe ɖějɛɖěgúdo,

kan ɖějɛɖěgúdo, kan ɖějɛɖěgúdo,*

kpɛɖé ɖo fí, kpɛɖé ɖo dɔ̌n” nú yě.

Mɔ̌ mɛ ɔ, nú yě ɖo zɔnlin ɖi wɛ ɔ,

yě ná klɛ́n afɔ bo ná j’ayǐ jɛ wɛn,

è ná ɖu ɖo yě jí, bɔ yě ná jɛ mɔ mɛ lobɔ è ná wlí yě.

14 Énɛ́ wú ɔ, mi ɖótó xó Jexóva tɔn, mi mɛ goyítɔ́ lɛ́,

mi mɛ acɛkpatɔ́ togun élɔ́ tɔn e nɔ nɔ Jeluzalɛ́mu lɛ́ é,

15 ɖó mi nɔ ɖɔ:

“Mǐ jɛ akɔ xá kú,

bo wá gbeta ɖé kɔn* xá Yɔdo.*

Hwenu e tɔgbamɛ e ɖo adǎn jí é ná dín kpó wezun kpó é ɔ,

é ná mɔ mǐ ǎ,

ɖó mǐ sɔ́ adingban dó ɖó bibɛtɛn mǐtɔn,

bo hwlá mǐɖée dó nǔgbómaɖɔ mɛ.”

“Éɖíe! Un ɖo awǐnnya e è tɛ́n kpɔ́n é ɖé dó do nyi Sinyɔ́ɔ wɛ, b’ɛ ná nyí dodónu ɖé,

dodónu ɖejidéwú ɖé sín awǐnnya xɔ akwɛ́ zwe jí tɔn ɔ wɛ.

17 Un ná sɔ́ hwɛjijɔ dó ɖó nǔjlɛ́kan,

bo ná sɔ́ nǔjlɔ́jlɔ́wiwa dó ɖó nǔjlɛ́nú.*

Kɛ́njí ná za adingban sín bibɛtɛn ɔ síin,

bɔ tɔ ná gba nɔtɛn e ɖo hwlǎhwlá é.

18 È ná gba akɔ e mi jɛ xá kú é,

bɔ gbeta e kɔn mi wá xá Yɔdo* é ná nɔ te ǎ.

Hwenu e tɔgbamɛ e ɖo adǎn jí é ná dín kpó wezun kpó é ɔ,

é ná nyínyɛ́ mi.

19 É dín hweɖébǔnu ɔ,

é ná nɔ za mi síin,

ɖó é ná nɔ dín zǎnzǎn lɛ́ bǐ,

é ná nɔ dín ɖo kéze kpó zǎnmɛ kpó.

20 Ðó zan ɔ hwe tawun bónú è ná dlɛ́n mɛɖée d’é jí,

bɔ wǔcyɔ́n linlɔn ɔ hwe tawun bónú è ná bú mɛɖée d’é mɛ.

21 Jexóva ná wa nǔ lěe é wa gbɔn ɖo só Pelasímu jí é ɖɔhun;

é ná wa nǔ lěe é wa gbɔn ɖo tɔdo* e sɛkpɔ́ Gabawɔ́ɔn é mɛ é ɖɔhun,

bónú é ná dó wa azɔ̌ e nyí étɔn é, nǔ e d’abaɖa é,

lobonú é ná wa azɔ̌ e nyí étɔn é yi fó, azɔ̌ tɔn bǔnɔ ɔ.

22 Din ɔ, mi ma ɖɔ nyɔmɛ ó,

é ma nyí mɔ̌ ǎ ɔ, gɛdɛ e ɖo mi wú é ná ɖo syɛ́nsyɛ́n d’é jí wɛ,

ɖó un se sín Aklúnɔ Nǔbǐwúkpétɔ́ Jexóva ahwankpá lɛ́ tɔn ɔ gɔ́n ɖɔ,

è wá gbeta ɔ kɔn bo ná sú kún dó nú to ɔ bǐ.*

23 Mi ɖótó gbe ce kpó sɔxwixwe kpó;

mi tɛ́ tó, bo ɖótó nǔ e ɖɔ wɛ un ɖe é.

25 Ényí é jíjé ayǐkúngban ɔ nukúnmɛ gúdo ɔ,

é nɔ fúnfún kumɛ́ɛ wiwi, bo nɔ dó kumɛ́ɛ,

nɔ dó blěe, milɛ́ɛ kpó ɔ́ji kpó dó tɛn yětɔn yětɔn mɛ,

lobo nɔ dó epótlu lɛ́ lɛ̌ dó dogbó tɔn lɛ́ ǎ cé?

26 Mawu tɔn nɔ kplɔ́n ɛ* lěe é jɛxá gbɔn é;

é nɔ kplɔ́n nǔ i.

27 Ðó è nɔ só kumɛ́ɛ wiwi kpó nǔkúnsónú kpó ǎ,

è nɔ kun kɛkɛ́ví sín afɔ gbɔn kumɛ́ɛ jí ǎ,

é nyɔ́ wa ɔ, kpo wɛ è nɔ sɔ́ dó só kumɛ́ɛ wiwi ná,

bo nɔ só kumɛ́ɛ kpó lɛ̌ngbɔ́nyitɔ́kpo kpó.

Éǒ, è nɔ ɖo sísó wɛ gbɛmɛ ǎ;

bɔ ényí é kun kɛkɛ́ví tɔn e dɔn wɛ sɔ́ tɔn lɛ́ ɖe é sín afɔ gbɔn jí ɔ,

é ná li i ǎ.

29 Nǔ énɛ́ lɔ ɔ, Jexóva ahwankpá lɛ́ tɔn gɔ́n wɛ é gosín,

wěɖexámɛ* tɔn jí wǔ,

bɔ nǔwiwa tɔn lɛ́* d’agba.

Xwewú xwewú hǔn, vɛ̌ ko ɖ’é wú;

kpo ɖo xwe e a nɔ ɖu xwewú xwewú lɛ́ é ɖu wɛ.

 2 Amɔ̌, un ná dɔn wǔvɛ́ wá Aliɛ́li jí,

bɔ alěníná kpó gbɛvíhan kpó ná tíin,

lobɔ é ná húzú vɔ̌sákpe sín adogwle nú mì.

 3 Un ná ɖó gɔnu lɛ́ lɛ̌ dó we gbɔn fí bǐ,

un ná dó kpá dó ján go dó we,

un ná wa azɔ̌ ɖaxó ɖaxó e è nɔ wa dó ján go dó toxo ɖé é dó ján go dó we

 4 È ná dɔn we wá do;

kɔ́ glɔ́ wɛ a ná ɖɔ xó sín,

bɔ kɔ́gúdu ná cí asɔ nú nǔ e a ná ɖɔ é.

Gbe towe ná gosín kɔ́ glɔ́,

bokantɔ́ sín gbe ɖɔhun,

bɔ xó towe lɛ́ ná cí è ɖo kɔ́gúdu glɔ́ bo ɖo kpá ɖe mɛ wɛ ɖɔhun.

 5 Kɛntɔ́* towe tobutóbú lɛ́ ná cí afúntúntún ɖɔhun,

acɛgannagannakpanúmɛtɔ́ tobutóbú lɛ́ ná cí fló e mɛ jɔhɔn d’alɔ é ɖɔhun kpowun.

 6 Jexóva ahwankpá lɛ́ tɔn ná sɔ́ ayi tɔn ɖó jǐ towe,

é ná bló mɔ̌ gbɔn xɛbyoso, ayǐkúngban dán wǔ, zǐngídi ɖaxó,

axásáxásá jɔhɔn syɛ́nsyɛ́n, jɔhɔn syɛ́nsyɛ́n kpó myɔ e nɔ fyɔ́ nǔ é kpó gblamɛ.”

 7 Énɛ́ ɔ, akɔta e ɖo ahwan fun xá Aliɛ́li wɛ lɛ́ é bǐ,

ɛɛn, mɛ ɖěɖěe ɖo ahwan fun xá ɛ wɛ lɛ́ é bǐ,

atɔxwɛ e è mɛ dó ján go dó è lɛ́ é

kpó mɛ ɖěɖěe ɖo wǔvɛ́ dɔn wá n’i wɛ lɛ́ é kpó

ná cí dlɔ̌ ɖɔhun, nǔmimɔ zǎnmɛ tɔn ɖɔhun.

 8 Ɛɛn, é ná cí lěe xovɛ́ nɔ sin mɛɖé, bɔ é nɔ kú dlɔ̌ bo nɔ mɔ ɖɔ émí ɖo nǔ ɖu wɛ,

bo ka nɔ fɔ́n adɔvɔ́* é ɖɔhun,

bo ná cí lěe kɔ nɔ xú mɛɖé, bɔ é nɔ kú dlɔ̌ bo nɔ mɔ ɖɔ émí ɖo sin nu wɛ,

bo ka nɔ fɔ́n bɔ nǔ nɔ ci kɔ n’i, bɔ kɔ nɔ kpo ɖo xúxú i wɛ* é ɖɔhun.

Nǔ e ná jɛ dó akɔta e ɖo

ahwan fun xá Sinyɔ́ɔ só ɔ wɛ lɛ́ é bǐ wú é nɛ́.

 9 Mi cí jɛjɛɛ bónú ahwi ní xo mi;

mi tɔ́n nukún miɖée, mi nú è ní tɔ́n nukún mi.

Yě mú, é ka nyí ɖó vɛ̌ɛn wú ǎ;

yě ɖo sa fún wɛ, é ka nyí ɖó ahan syɛ́nsyɛ́n wú ǎ.

10 Ðó Jexóva bló bɔ mi cí mɛ e ɖo amlɔ ɖaxó mɛ lɛ́ é ɖɔhun;

gbeyíɖɔ lɛ́ mi, é sú nukún mitɔn lɛ́,

nǔmɔtɔ́ lɛ́ mi, é cyɔ́n nǔ dó ta mitɔn lɛ́.

13 Jexóva ɖɔ: “Togun élɔ́ nɔ sɛn mì ɖo nu,

yě nɔ wlí yɛ̌yi nú mì kpó nufló yětɔn lɛ́ kpó,

amɔ̌, ayi yětɔn ɖo zɔ tawun dó mì;

gbeɖiɖe gbɛtɔ́ lɛ́ tɔn ɖěɖěe è kplɔ́n yě lɛ́ é jí wɛ yě nɔ zɔn dó dó ɖi xɛsi nú mì.

14 Énɛ́ wú ɔ, nyi wɛ nyí mɛ e ná lɛ́ bló nǔjíwǔ lɛ́ nú togun élɔ́ é,

un ná jlɛ́ nǔ ɖě ɖo ɖě jí;

nǔnywɛ́tɔ́ yětɔn lɛ́ sín nǔnywɛ́ sín xó ná fó,

bɔ è ná sɔ́ ayiɖotenánɔ yětɔn lɛ́ sín nukúnnúmɔjɛnǔmɛ hwlá.”

Yě nɔ wa nǔ e yě nɔ wa lɛ́ é ɖo zǐnflú mɛ,

bo nɔ ɖɔ: “Mɛ̌ ka mɔ mǐ?

17 Ðo hwenu kléwún ɖé gúdo din ɔ, è ná bló bɔ Libáan ná húzú atínsínsɛ́ngbo,

lobɔ è ná nɔ kpɔ́n atínsínsɛ́ngbo ɔ dó mɔ zungbó.

18 Ðo azǎn énɛ́ gbe ɔ, tókúnɔ ná se xó e ɖo wěma ɔ mɛ lɛ́ é,

bɔ nukúntɔ́nnɔ ná mɔ nǔ sín ablu kpó zǐnflú kpó mɛ.

19 Xomɛfátɔ́ lɛ́ ná nɔ j’awǎ tawun ɖó Jexóva wú,

bɔ wamamɔnɔ e ɖo gbɛtɔ́ lɛ́ mɛ lɛ́ é ná nɔ j’awǎ ɖó Mɛ mímɛ́ Izlayɛ́li tɔn ɔ wú.

20 Ðó acɛgannagannakpanúmɛtɔ́ sɔ́ ná tíin ǎ,

goyítɔ́ sín xó ná fó,

bɔ è ná sú kún dó nú mɛ e nɔ nɔ acéjí bo ná wa nǔ nyanya lɛ́ é bǐ,

21 ɛɛn, mɛ e nɔ ɖó adingban dó ɖó hwɛ nú mɛ ɖěvo lɛ́,

bo nɔ ɖó mɔ nú hunjɛdómɛjítɔ́ ɔ* ɖo toxo ɔ sín hɔntogbó ta,

lobo nɔ gbɔn hwɛdómɛ e ma ɖó ta ɖé ǎ lɛ́ é gblamɛ dó tɛ hwɛjijɔ nǔjlɔ́jlɔ́watɔ́ lɛ́ é.

“È sɔ́ ná dó winnyá Jakɔ́bu ɖě ǎ,

bɔ nukúnmɛ tɔn sɔ́ ná kú cyɔ* ɖě ǎ.

23 Ðó hwenu e é ná mɔ

vǐ tɔn ɖěɖěe nyí alɔ ce núwiwa lɛ́ é, bɔ yě ná lɛ́ lɛ̌ dó è é ɔ,

yě ná bló bɔ nyǐkɔ ce ná nyí nǔ mímɛ́;

ɛɛn, yě ná wlí yɛ̌yi nú Mɛ mímɛ́ Jakɔ́bu tɔn ɔ,

bo ná ɖó sísí e gɔ́ngɔ́n é nú Mawu Izlayɛ́li tɔn.

24 Mɛ e nyí banáwatɔ́ ɖo ayi mɛ lɛ́ é ná ɖó nukúnnúmɔjɛnǔmɛ,

bɔ mɛ e nɔ hlún nǔ ɖɔ lɛ́ é ná yí gbe nú nǔkplɔ́nmɛ.”

30 “Heelú vǐ tasyɛ́ntɔ́ lɛ́,” wɛ Jexóva ɖɔ,

“yě nɔ wa nǔ sɔgbe xá tuto e ma nyí ce ǎ lɛ́ é,

bo nɔ jɛ akɔ,* é ka nyí gbɔn gbigbɔ ce gblamɛ ǎ,

bo ná mɔ tɛn dó hu hwɛ dó hwɛ jí.

 2 Yě jɛ te yi Ejípu, yě ka kan nǔ byɔ́ mì* hwɛ̌ ǎ,

bo ná bɛ yɛ ɖo Falawɔ́ɔn sín xɛnyaɖomɛjí glɔ́,*

lobo ná ba bibɛtɛn ɖo Ejípu sín yɛtɛn!

 3 Amɔ̌, xɛnyaɖomɛjí Falawɔ́ɔn tɔn ná húzú hwɛjijɔ e wú winnyá ná hu mi é,

bɔ bibɛtɛn biba ɖo Ejípu sín yɛtɛn ná húzú nǔ e wú è ná kɔ́n wi mitɔn é.

 4 Ðó axɔ́ví tɔn lɛ́ ɖo Sowáan,

bɔ afɔsɔ́ɖótetɔ́ tɔn lɛ́ yi Hanɛ́si.

 5 Togun e ma sixú hɛn le ɖěbǔ wá nú yě ǎ é

ná dó winnyá yě mɛ bǐ.

É sixú d’alɔ ɖě alǒ hɛn le ɖě wá nú yě ǎ,

nǔ e é sixú wa é jɛ́n nyí ɖɔ é ná dó winnyá yě bo kɔ́n wi yětɔn.”

yě nɔ blá dɔkun yětɔn lɛ́ dó tócí lɛ́ sín nɛgbé,

bo nɔ bɛ́ nǔníná yětɔn lɛ́ ɖó lǎkúnmí lɛ́ sín kpó jí,

bo nɔ gbɔn adohu adohu kpó wǔvɛ́ kpó,

kinnikínní, ɛɛn, kinnikínní e ɖo adǎn jí é,

jakpata kpó dan aɖǐvɛ́nɔ* e nɔ zɔn é kpó sín to mɛ.

 8 “Din ɔ, yi, wlǎn dó awǐnnyatɛ ɖokpó jí ɖo nukún yětɔn mɛ,

wlǎn dó wěma ɖé mɛ,

bónú è ná zán ɖo azǎn e ɖo nukɔn ja é ɖé jí

kúnnuɖenú tɛgbɛ tɔn ɖé ɖɔhun.

 9 Ðó togun gǔfɔ́ntɔ́ ɖé wɛ yě nyí, vǐ mɛblɛ́tɔ́ lɛ́,

vǐ e ma ɖó jlǒ bo ná ɖótó sɛ́n* Jexóva tɔn ǎ lɛ́ é.

“Ðó mi gbɛ́ xó énɛ́,

bo gán jɛ ahizi kpó mɛblɛ́blɛ́ kpó wú,

lobo ɖeji dó nǔ énɛ́ lɛ́ wú wútu ɔ,

13 nǔwanyido énɛ́ ná cí dǒ e zɛ é ɖɔhun nú mi,

é ná cí ahohó e nya bo ko jló ná mu é ɖɔhun.

14 È ná gba ɛ zɛ̌nmɛtɔ́ sín zɛ̌n ɖaxó ɖé ɖɔhun,

è ná gba ɛ hánnyá sɔmɔ̌ bɔ é sɔ́ ná kpo fínfɛ́n tɔn ɖě,

bónú è ná ɖe myɔ sín ado mɛ ná,

alǒ xwá sin sín sindo* mɛ ná ǎ.”

“Ényí mi lɛ́ kɔ wá gɔ̌n ce, bo nɔ te kpɔ́n mì ɔ, è ná hwlɛ́n mi gán;

hlɔ̌nhlɔ́n mitɔn wɛ ná nyí ɖɔ mi ní cí xwíí bo ɖeji dó wǔ ce.”

17 Mɛ 1 000 ná sísɔ́ ɖó adǎngblɔ́nnúmɛ mɛ ɖokpó tɔn wú;

adǎngblɔ́nnúmɛ mɛ atɔ́ɔ́n tɔn ná zɔ́n bɔ mi ná hɔn,

káká bɔ mɛ e ná kpo ɖo mi mɛ lɛ́ é ná cí asyákpo e ɖo só ɖaxó ɖé sín ahɔn mɛ é ɖɔhun,

yě ná cí asyá e ɖo só kpɛví ɖé jí é ɖɔhun.

18 Amɔ̌, Jexóva ɖo te nɔ wɛ kpó suúlu kpó* bo ná nyɔ́ xomɛ dó mi wú,

é ná sí te bo ná kú nǔbláwǔ nú mi.

27 Éɖíe! Jexóva* jawě sín fí línlín,

é ɖo xomɛsin ɖaxó jí bo zɔn akpɔ́kpɔ́ tlitli mɛ.

É ɖo xó ɖɔ wɛ kpó xomɛsin kpó,

bɔ ɖɛ̌ tɔn cí myɔ e nɔ fyɔ́ nǔ é ɖɔhun.

28 Gbigbɔ* tɔn cí tɔgbamɛ ɖaxó e fán mɛ dó kɔ é ɖɔhun,

é ná húnhún akɔta lɛ́ ɖo nǔtanú kúnsúdónúnǔ tɔn* ɖé mɛ;

è ná dó gan ɖé aglan mɛ nú togun lɛ́ bɔ é ná dɔn yě bú.

29 Amɔ̌ midɛɛ lɛ́ ɔ, han mitɔn ná cí han e è ji zǎnmɛ

hwenu e mi ɖo xwenú sɔ́ wɛ* é ɖɔhun,

bɔ ayi mitɔn ná j’awǎ

mɛ e ɖo kpete kún wɛ* bo ɖo zɔnlin ɖi wɛ xweyǐgbe

Jexóva e nyí Só Izlayɛ́li tɔn é sín só jí é ɖɔhun.

30 Jexóva ná bló bɔ è ná se gbe tɔn susunɔ ɔ,

é ná ɖe hlɔ̌nhlɔ́n tɔn xlɛ́ hwenu e awa tɔn ná ɖo te jɛ wɛ ɖo xomɛsin ɖaxó mɛ,

ɖo myɔ e nɔ fyɔ́ nǔ é mɛ,

ɖo jǐgbó, xɛbyoso kpó kɛ́njí kpó mɛ é.

31 Ðó gbe Jexóva tɔn wútu ɔ, adohu adohu ná xo Asilíi;

é ná xo è kpó kpo kpó.

32 Hweɖébǔnu e Jexóva ná zán tódɔnnúmɛ sín kpo tɔn

dó xo Asilíi é ɔ,

è ná nɔ xo hǔn kpó agǐdigbo kpó d’é mɛ,

hwenu e é ná dlɛ́n awa tɔn dó jǐ yětɔn ɖo ahwanfunfun mɛ é.

33 Ðó è ko sɔ́ nǔ nú Tofɛ́ti* tɔn;

è ko lɛ́ bló bɔ é ɖo gbesisɔmɛ nú axɔ́sú ɔ.

É bló bɔ fí e è to nakí lɛ́ ɖó é gɔ́ngɔ́n bo gbló,

bɔ myɔ kpó nakí kpó túnflá.

Hwemí wǒkógo ɖé ɖɔhun ɔ, funfún Jexóva tɔn

ná flɔ́ myɔ d’é mɛ.

31 Heelú mɛ ɖěɖěe nɔ jɛ te yi Ejípu, bo ná dó ba alɔdó,

bo nɔ gán jɛ sɔ́ lɛ́ wú,

bo nɔ ɖeji dó ahwankɛkɛ́ví lɛ́ wú ɖó yě sukpɔ́ wútu,

lobo nɔ ɖeji dó ahwansɔ́* lɛ́ wú ɖó yě ɖó agbɔ̌n wútu lɛ́ é.

Yě kpɔ́n Mɛ mímɛ́ Izlayɛ́li tɔn ɔ sín jɛ jí ǎ,

yě ba Jexóva ǎ.

 2 Loɔ, nǔnywɛ́tɔ́ wɛ ka n’i, bɔ é ná dɔn awěxomɛ wá,

é ná dɔn nǔ gbɔn xó tɔn lɛ́ jí ǎ.

É ná sí te dó nǔnyanyawatɔ́ lɛ́ sín xwé jí,

bo ná sí te dó mɛ ɖěɖěe nɔ d’alɔ nǔnyanyawatɔ́ lɛ́ é jí.

 3 Ejípunu lɛ́ ɔ, gbɛtɔ́ kpowun wɛ yě nyí, yě nyí Mawu ǎ;

sɔ́ yětɔn lɛ́ ɔ, kanlin kpowun wɛ yě nyí, yě nyí gbigbɔ ǎ.

Ényí Jexóva dlɛ́n alɔ tɔn ɔ,

mɛ ɖěbǔ e ɖo alɔ dó mɛ wɛ é ná klɛ́n afɔ,

bɔ mɛ ɖěbǔ e è d’alɔ é ná j’ayǐ;

yě mɛ bǐ ná dɔn hwe ɖokpó ɔ nu.

“Lěe kinnikínní, ɛɛn, kinnikínní wínnyáwínnyá e ɖó hlɔ̌nhlɔ́n é,* nɔ dó adǎn gbe dó nǔ e é wlí é jí,

hwenu e lɛ̌ngbɔ́nyitɔ́ gěgé xo yěɖée kplé, bo zun dó jǐ tɔn,

bɔ xɛsi ma nɔ ɖi i, ɖó gbe yětɔn wú ǎ,

lobɔ zǐngídi e jí yě ɖe é ma nɔ hu ado n’i ǎ gbɔn é ɔ,

mɔ̌ ɖokpó ɔ, Jexóva ahwankpá lɛ́ tɔn ná jɛ te, bo ná fun ahwan

dó Sinyɔ́ɔ só ɔ kpó só tɔn kpó tamɛ.

 8 Asilíinu ɔ ná kú hwǐ kú, é ka ná nyí gbɛtɔ́ sín hwǐ ǎ;

hwǐ ná vúnvún i, é ka ná nyí gbɛtɔ́ sín hwǐ ǎ.

É ná hɔn ɖó hwǐ wú,

bɔ è ná ɖó azɔ̌ syɛ́nsyɛ́n kɔ jí nú dɔ̌nkpɛvú tɔn lɛ́.

 9 Só tɔn ná bú ɖó xɛsi ɖaxó wútu,

bɔ ado ná hu axɔ́ví tɔn lɛ́ ɖó asyákpo ɔ wútu,” wɛ Jexóva,

éé sín wěziza* ɖo Sinyɔ́ɔ bɔ myɔkpó tɔn ɖo Jeluzalɛ́mu é ɖɔ.

32 Éɖíe! Axɔ́sú ɖé ná kpa acɛ bónú nǔjlɔ́jlɔ́wiwa ná dó tíin,

bɔ axɔ́ví lɛ́ ná ɖu gǎn bónú hwɛjijɔ ná dó tíin.

 2 Yě mɛ ɖokpó ɖokpó ná cí fí e è nɔ hɔn hwlá cí bo nɔ gló jɔhɔn é ɖɔhun,

yě ná cí fí e è nɔ bɛ sin ɖe ɖo jǐ syɛ́nsyɛ́n mɛ é ɖɔhun,

yě ná cí tɔsisa e ɖo axéko jí é ɖɔhun,

bo ná cí yɛtɛn só ɖaxó ɖé tɔn ɖo ayǐkúngban xúxú jí ɖɔhun.

 3 Énɛ́ gúdo ɔ, mɛ ɖěɖěe ɖo nǔ mɔ wɛ lɛ́ é sín nukún sɔ́ ná tlɛ́ ǎ,

bɔ mɛ ɖěɖěe ɖó tó lɛ́ é ná se nǔ ganjí.

 4 Mɛ ɖěɖěe ma nɔ lin tamɛ cóbó nɔ wa nǔ ǎ lɛ́ é ná lin tamɛ dó nǔ e yě kplɔ́n é jí kpó sɔxwixwe kpó,

bɔ mɛ ɖěɖěe nɔ kúkú ɖɛ̌ lɛ́ é* ná ɖɔ xó faa, bɔ é ná za wě.

 5 È sɔ́ ná ylɔ́ mɛ e ayivɔ vún é ɖɔ nǔnámɛtɔ́ ɖě ǎ,

è sɔ́ ná ylɔ́ mɛ e ma ɖó walɔ ɖagbe ǎ é ɖɔ mɛ nukúnɖéjí ɖě ǎ;

 6 ɖó mɛ e ayivɔ vún é ná ɖɔ xlonɔxó,

bo ná bló nǔ nyanya lɛ́ sín tuto dó ayi mɛ,

bo ná dó sɔ́ gǔfɔ́ndómawují ɖ’ajo,* lobo ná ɖó adingban dó Jexóva kɔ,

é ná jó mɛ e xovɛ́ sin é* dó, bɔ é ná yi adɔvɔ́,

bɔ nǔ e mɛ e kɔ xú é ná nu é ɔ, é ná tɛ ɛ.

 7 Mɛ e ma ɖó walɔ ɖagbe ǎ é sín tuto lɛ́ nɔ nylá;

é nɔ sɔ́ winnyánúwiwa ɖ’ajo,

bo ná dó sɔ́ adingban dó sú kún dó nú mɛ e ɖo wǔvɛ́ se wɛ é,

ényí mɛ e nyí wamamɔnɔ é ná bo tlɛ ɖo nǔgbó ɖɔ wɛ ɔ nɛ́.

 8 Amɔ̌, alɔhundónánǔmɛtɔ́ nɔ ɖó linlin nǔnámɛ tɔn,

é nɔ ɖó kan dó nǔnámɛ* wú.

10 Ðo xwe ɖokpó azǎn yɔywɛ ɖé mɛ ɔ, mi mɛ e ma nɔ ké ya nú nǔɖé ǎ lɛ́ é ná sísɔ́,

ɖó è ná xo atínsínsɛ́n ɖěbǔ kplé ɖo vǐwunyiyahwenu ɔ sín vivɔnu ǎ.

Mi ɖe awu mitɔn lɛ́,

bo sin ati dó alin.

12 Mi xo akɔ́nnu dó dó gbɛvíhan

dó gle ɖagbe ɖagbe lɛ́ kpó vǐwuntín e nɔ ná sínsɛ́n é kpó jí.

13 Ðó wun kpó wunkan kpó ná vun blá togun ce sín ayǐkúngban;

yě ná vun blá xwé e gbe awǎjijɛ ɖe lɛ́ é bǐ,

ɛɛn, toxo awǎjijɛ tɔn ɔ.

14 Ðó è wɔn atɔxwɛ syɛ́nsyɛ́n ɔ;

è jó toxo e mɛ axi nɔ jɛ ɖe é dó.

Ofɛ́lu kpó atɔxwɛ ɔ kpó húzú to e jɛ vɔ̌ káká sɔ́yi é,

bo húzú fí e tócí gbě tɔn lɛ́ nɔ j’awǎ ɖe é,

lobo húzú amagbo nú kanlinhwan lɛ́,

15 káká jɛ hwenu e è gba gbigbɔ kɔn nyi mǐ jí sín aga,

bɔ gbětótló húzú atínsínsɛ́ngbo,

lobɔ è kpɔ́n atínsínsɛ́ngbo ɔ dó mɔ zungbó é.

16 Énɛ́ gúdo ɔ, hwɛjijɔ ná tíin ɖo gbětótló ɔ mɛ,

bɔ nǔjlɔ́jlɔ́wiwa ná tíin ɖo atínsínsɛ́ngbo ɔ mɛ.

17 Nǔjlɔ́jlɔ́wiwa nǔgbó ɔ ná hɛn fífá wá,

bɔ sínsɛ́n e nǔjlɔ́jlɔ́wiwa nǔgbó ɔ ná ná é wɛ nyí vivo kpó ayijayǐ kpó e ma ná vɔ ǎ é.

18 Togun ce ná nɔ fí e ɖo fífá mɛ é,

fí e ɖo ayijayǐ mɛ, bo lɛ́ nyí gbɔjɛtɛn e ɖo tóó lɛ́ é.

19 Amɔ̌, kɛ́njí ná bló bɔ zungbó ɔ ná jɛ jeké,

bɔ è ná gba toxo ɔ bǐ mlɛ́mlɛ́.

20 Awǎjijɛnɔ wɛ nyí mɛ e nɔ dó nǔkún dó fí ɖěbǔ e sin ɖe lɛ́ é,

mi mɛ e nɔ ɖe nyibú kpó tócí kpó tɔ́n* lɛ́ é.”

33 Heelú we, hwi kúnsúdónúnǔtɔ́ e è ma ko sú kún dó ná ǎ é!

Hwi mɛflútɔ́ e è ma ko flú ǎ é!

Hǔzú hlɔ̌nhlɔ́n* mǐtɔn ɖo zǎnzǎn lɛ́ bǐ,

ɛɛn, hwlɛngán mǐtɔn ɖo wǔvɛ́ hwenu.

 4 Lěe bɔkle e ma nɔ gɔ́ xo ǎ lɛ́ é nɔ xo yěɖée lɛ́ kplé gbɔn é ɔ, mɔ̌ wɛ è ná xo nǔ towe e è bɛ́ ɖo ahwangbénu lɛ́ é kplé gbɔn;

mɛ lɛ́ ná zun dó jǐ tɔn bɔklehwan ɖɔhun.

 5 È ná sɔ́ Jexóva su,

ɖó é nɔ nɔ jǐ aga.

 6 É wɛ nɔ bló bɔ gbɛzán towe ma nɔ xo ǎ;

hwlɛngán núwiwa gěgé, nǔnywɛ́, nǔtuuntuun kpó sísí e gɔ́ngɔ́n é ɖíɖó nú Jexóva kpó;

dɔkun tɔn nɛ́.

 7 Éɖíe! Súnnu hlɔ̌nhlɔ́nnɔ yětɔn lɛ́ ɖo xó sú wɛ ɖo toxomɛli jí;

fífáwɛndótɔ́ lɛ́ ɖo avǐ ya wɛ vívɛ́ vívɛ́.

 8 Ali ɖaxó lɛ́ jɛ vɔ̌;

mɛ ɖěbǔ ɖo ali lɛ́ jí ǎ.

É* gba akɔjijɛ ɔ,

é gbɛ́ toxo lɛ́;

é nɔ mɔ wi ɖě ɖo gbɛtɔ́ e nɔ kú é ta ǎ.

Calɔ́ni wá cí gbětótló ɖɔhun,

Basáni kpó Kaamɛ́li kpó ja ama yětɔn lɛ́ kɔn nyi ayǐ.

10 “Din ɔ, un ná sí te,” wɛ Jexóva ɖɔ,

“din ɔ, un ná sɔ́ nyiɖée su;

din ɔ, un ná ɖe hlɔ̌nhlɔ́n ce xlɛ́.

14 Xɛsi ɖaxó jɛ hwɛhutɔ́ e ɖo Sinyɔ́ɔ lɛ́ é jí;

gǔfɔ́ndómawujítɔ́ lɛ́ ɖo sísɔ́sísɔ́ wɛ:

15 Mɛ e nɔ wa nǔ jlɔ́jlɔ́ hwebǐnu é,

mɛ e nɔ ɖɔ nǔgbó é,

mɛ e nɔ nyi alɔ nú nǔgbómaɖɔ kpó mɛ hízíhízí kpó dó ɖu le é,

mɛ e ma nɔ yí gbe nú nǔɖuɖonǔmɛ ǎ, bɔ é nyɔ́ wa ɔ, é nɔ gbɛ́ é,

mɛ e nɔ sú tó tɔn hwenu e è ɖo hun kinkɔn nyi ayǐ xó ɖɔ wɛ é,

mɛ e nɔ sú nukún tɔn lɛ́ bo ma ná mɔ nǔ nyanya ǎ é:

16 é ná nɔ fí e yi aga lɛ́ é;

só syɛ́nsyɛ́n lɛ́ wɛ ná nyí bibɛtɛn tɔn e ɖo ayijayǐ mɛ é,

è ná ná ɛ wɔ̌xúxú tɔn,

bɔ sin ná hán ɛ gbeɖé ǎ.”

17 Nukún towe lɛ́ ná mɔ axɔ́sú ɖokpó ɖo susu tɔn mɛ;

yě ná mɔ to e ɖo zɔ vwéé é ɖé.

19 A sɔ́ ná mɔ mɛ e ma nɔ sí mɛ ǎ lɛ́ é ɖě ǎ,

mɛ ɖěɖěe é vɛ́ wǔ dín bɔ è ná mɔ nukúnnú jɛ gbe yětɔn mɛ lɛ́ é,*

mɛ ɖěɖěe nɔ kúkú ɖɛ̌, bɔ a ma sixú mɔ nukúnnú jɛ nǔ e ɖɔ wɛ yě ɖe é mɛ ǎ lɛ́ é.

Nukún towe lɛ́ ná mɔ Jeluzalɛ́mu dó mɔ nɔtɛn e ɖo xwíí bɔ è ná nɔ é ɖé,

goxɔ e è ma ná sɛ tɛn ná ǎ é ɖé.

È ná sɛ tɛn nú goxɔ tɔn sín só lɛ́ gbeɖé ǎ,

è ná wɛ́n kan tɔn lɛ́ ɖěbǔ ǎ.

21 Amɔ̌, fínɛ́ ɔ, Jexóva Susunɔ ɔ

ná nyí xá e mɛ tɔsisa ɖe é kpó xá e mɛ tɔhwín waɖaɖa ɖe é kpó nú mǐ,

fí e ahwanfunfun sín tɔjíhún lɛ́ ɖě ma ná yi ǎ,

bɔ tɔsisa susunɔ lɛ́ ɖě ma ná gbɔn dín ǎ é.

22 Ðó Jexóva wɛ nyí Hwɛɖɔtɔ́ mǐtɔn,

Jexóva wɛ nyí Sɛ́nnámɛtɔ́ mǐtɔn,

Jexóva wɛ nyí Axɔ́sú mǐtɔn;

é wɛ nyí Mɛ e ná hwlɛ́n mǐ é.

23 Kan lɛ́ ná túntún;

yě ná kpé wú bo hɛn kpo ɔ ɖó te ǎ, mɔ̌ jɛ́n yě ma ná kpé wú bo vlɔ́n avɔ ɔ ǎ é nɛ́.

Ðo hwenɛ́nu ɔ, è ná má nǔ e è yí ɖo ahwangbénu é wɔ̌búwɔ́bú ɖé;

mɛ e tlɛ nyí afɔkponɔ é ná bɛ́ nǔ e è vɔ mɛ bo yí lɛ́ é gěgé.

34 Akɔta lɛ́ mi, mi sɛkpɔ́ bá ɖótó,

togun lɛ́ mi, mi tɛ́ tó.

Ayǐkúngban ɔ kpó nǔ e ɖ’é jí lɛ́ é kpó ní ɖótó,

to ɔ kpó sínsɛ́n tɔn lɛ́ bǐ kpó ní ɖótó.

 2 Ðó Jexóva sin xomɛ dó akɔta lɛ́ bǐ,

bo sin xomɛ dó ahwankpá yětɔn lɛ́ bǐ.

É ná jó yě dó bɔ è ná sú kún yětɔn dó;

é ná jó yě dó bónú è ná hu yě.

 3 È ná bɛ́ mɛ yětɔn e è hu lɛ́ é nyi gbě,

bɔ wǎn gblégblé e hwɛ́n wɛ cyɔ yětɔn lɛ́ ɖe é ná mlí;

só lɛ́ ná sínsín ɖó hun yětɔn wú.*

 4 Ahwankpá jǐxwé tɔn lɛ́ bǐ ná nyɔ,

bɔ è ná mlá jǐnukúnsin wěma mlámlá ɖɔhun.

Ahwankpá yětɔn lɛ́ bǐ ná xú,

lěe ama xúxú nɔ j’ayǐ sín vǐwuntín jí,

bɔ fígi wlówló nɔ j’ayǐ sín fígitín jí gbɔn é ɖɔhun.

É ná jɛ te dó Edɔ́mu jí, bo ná dó ɖɔ hwɛ xá ɛ,

ɛɛn, dó togun e un jó dó bónú è ná sú kún dó ná é jí.

Jǒ ná kpé wǔ tɔn,

gɔ́ nú agbo wínnyáwínnyá lɛ́ kpó gbagbǎ lɛ́ kpó sín hun,

kpódó jǒ e ɖo ayi gbagbǎ lɛ́ tɔn wú é kpó.

Jexóva sɔ́ nǔ nú vɔ̌sísá ɖé ɖo Bosla,

ɛɛn, nǔhuhu ɖaxó ɖé ɖo Edɔ́mu to mɛ.

 7 Agbo gbě tɔn lɛ́ ná jɛ te xá yě,

nyibú wínnyáwínnyá lɛ́ kpó éé dó hlɔ̌nhlɔ́n lɛ́ é kpó.

Hun ná kpé to yětɔn mɛ,

jǒ ná kpé kɔ́gúdu yětɔn mɛ.”

 8 Ðó Jexóva sɔ́ hlɔnbibazán ɖokpó,

xwe e xwe é ná dɔn tó nú mɛ ɖó hwɛɖiɖɔxó e kunkplá Sinyɔ́ɔ é tamɛ é.

 9 È ná sɔ́ tɔsisa tɔn* lɛ́ dó húzú sɛn,

bo ná sɔ́ kɔ́gúdu tɔn dó húzú hwemí,

lobɔ ayǐkúngban tɔn ná cí sɛn e ɖo jiji wɛ é ɖɔhun.

10 É ná cí ɖo zǎnmɛ alǒ ɖo kéze ǎ;

azizɔ tɔn ná ɖo jǐ yi wɛ hwebǐnu.

É ná nɔ vɔ̌ sín jijimɛ ɖě jí jɛ ɖěvo jí;

mɛɖé sɔ́ ná gbɔn mɛ gbeɖé ǎ káká sɔ́yi mavɔmavɔ.

11 É ná nyí tɔkpákpá lɛ́ kpó ajijá lɛ́ kpó tɔn,

bɔ kwlele* lɛ́ kpó avǔnsákɔwó lɛ́ kpó ná nɔ fínɛ́.

Mawu ná zán nǔjlɛ́kan* kpó nǔjlɛ́nú kpó dó jlɛ́ to élɔ́

dó xlɛ́ ɖɔ é ná jɛ vɔ̌ bɔ è ná sú kún tɔn dó.

12 È ná sɔ́ mɛ nukúnɖéjí tɔn lɛ́ ɖě dó axɔ́súzinkpo jí ǎ,

axɔ́ví tɔn lɛ́ ɖě sɔ́ ná tíin ǎ.

13 Wun ná wú ɖo atɔxwɛ syɛ́nsyɛ́n tɔn lɛ́ jí,

wunkan kpó gběhan nyanya kpó ná wú ɖo ahohó tɔn lɛ́ jí.

É ná húzú fí e cukú gbě tɔn lɛ́ nɔ nɔ é,

bo ná húzú gowungo lɛ́ sín kpó.

14 Kanlin gbětótló mɛ tɔn lɛ́ ná xo go kanlin e nɔ hó nǔ lɛ́ é,

bɔ gbɔ̌ gbě tɔn* ná ylɔ́ gbɛ̌ tɔn.

15 Fínɛ́ wɛ dan ná xo do ɖó, bo ná ɖó azin d’é mɛ,

é ná flé yě, bo ná nya xɛ ɖo yě jí.*

kanlin lɛ́ ɖě ná hwe ǎ;

yě mɛ ɖě ná ba gbɛ̌ yětɔn kpo ǎ,

ɖó nu Jexóva tɔn wɛ ɖe gbeta ɔ tɔ́n,

bɔ gbigbɔ tɔn wɛ kplé yě ɖó kpɔ́.

17 É wɛ nyí mɛ e nyi akɔ nú yě é,

bɔ alɔ éɖésúnɔ tɔn wɛ jlɛ́ nɔtɛn e è sɔ́ nú yě é.*

É ná nyí yětɔn káká sɔ́yí;

yě ná nɔ mɛ sín jijimɛ ɖě jí jɛ ɖěvo jí.

35 Gbětótló kpó ayǐkúngban xúxú kpó ná j’awǎ,

gbětótló ná j’awǎ, bo ná gba sɛ́ folówa saflán ɖɔhun.

 2 É ɖo wɛn ɖɔ é ná gba sɛ́;

é ná j’awǎ, bo ná sú xó kpó awǎjijɛ kpó.

È ná sɔ́ susu Libáan tɔn n’i,

gɔ́ nú susu Kaamɛ́li kpó Calɔ́ni kpó tɔn.

 3 Mi ná hlɔ̌nhlɔ́n alɔ e ma ɖó gǎn ǎ lɛ́ é,

bo bló bónú koli e ɖo sísɔ́sísɔ́ wɛ lɛ́ é ní lí dǒ.

Éɖíe! Mawu mitɔn ɖésúnɔ ná wá bo ná ba hlɔn,

Mawu ná wá, bo ná dɔn tó nú mɛ.

 5 Hwe énɛ́ nu ɔ, nukún nukúntɔ́nnɔ lɛ́ tɔn ná hun,

bɔ tó tókúnɔ lɛ́ tɔn ná hun.

 6 Hwe énɛ́ nu ɔ, afɔkponɔ ná lɔ́n zungbɔ́ ɖɔhun,

bɔ ɖɛ̌kúnánɔ* ná sú xó kpó awǎjijɛ kpó.

Sin ná gba wu ɖo gbětótló mɛ,

bɔ tɔsisa ná gba wu ɖo gbětótló mɛ.

 7 Ayǐkúngban xúxú ná húzú sindo e mɛ fántín ɖe é,

bɔ ayǐkúngban e jí sin ma ɖe ǎ é ná húzú tɔjɔtɛn.

Fí e nyí adɔ̌tɛn cukú gbě tɔn lɛ́ tɔn bɔ yě nɔ gbɔjɛ ɖe é ɔ,

gběhan mǔ, fántín kpó fɛ́n kpó ná nɔ fínɛ́.

 8 Ali ɖaxó ɖokpó ná ɖo fínɛ́,

ɛɛn, ali e è nɔ ylɔ́ ɖɔ Ali mímɛ́ é.

È sɔ́ ɖ’ayǐ nú mɛ e ɖo zɔnlin ɖi gbɔn jí wɛ é;

xlonɔ ɖě ná gbɔn jí ǎ.

 9 Kinnikínní ɖě ná ɖo fínɛ́ ǎ,

gběkanlin hunnylámɔnɔ ɖě ná wá jí ǎ.

È ná mɔ yě ɖo fínɛ́ ǎ;

mɛ e è vɔ́ xɔ lɛ́ é kɛ́ɖɛ́ wɛ ná ɖi zɔnlin gbɔn fínɛ́.

Xomɛhunhun kpó awǎjijɛ kpó ná nyí yětɔn,

bɔ aluwɛ kpó azɔnwinwɛn kpó ná blí bú.

Mɛ̌ jí a ka sú xó dó?

Mɛ̌ jí a ka sɔ́ goyíyí nukún towe lɛ́ ɖó?

24 A gbɔn mɛsɛntɔ́ towe lɛ́ jí bo ɖɔ slamɛ Jexóva wú, lobo ɖɔ:

‘Kpó ahwankɛkɛ́ví wɔ̌búwɔ́bú ce lɛ́ kpó ɔ,

un ná yi só lɛ́ sín ahɔn mɛ,

ɛɛn, fí e jɛ zɔ tawun ɖo Libáan lɛ́ é.

25 Un ná kun dotɔ lɛ́, bo ná nu sin;

un ná sɔ́ afɔkpákpá ce lɛ́ dó xú tɔsisa Ejípu tɔn* lɛ́.’

27 Mɛ e nɔ nɔ yě mɛ lɛ́ é ná ba gǎn kpo;

ado ná hu yě, è ná dó winnyá yě.

Yě ná cí gběhan gle mɛ tɔn kpó gběhan mǔ kpó ɖɔhun,

gběhan xɔ ta tɔn e jɔhɔn zǎnzǎnhwe jí tɔn bló bɔ é xú lɛ́ é ɖɔhun.

28 Amɔ̌, un tuun hwenu e a nɔ jínjɔ́n ayǐ é, hwenu e a nɔ tɔ́n é, hwenu e a nɔ lɛ́ kɔ é

kpó hwenu e a sin xomɛ dó mì syɛ́nsyɛ́n é kpó ganjí,

29 ɖó xomɛ e a sin dó mì syɛ́nsyɛ́n é kpó xósúsú towe kpó hun káká wá tó ce lɛ́ mɛ.

Énɛ́ wú ɔ, un ná sɔ́ klɔcée ce dó awɔntín towe mɛ, bo ná sɔ́ gan ce dó nufló towe lɛ́ tɛ́ntin,

bo ná kplá we lɛ́ kɔ gbɔn ali e a gbɔn wá é.”

“É ná byɔ́ toxo énɛ́ mɛ,

alǒ da gǎ ɖě ɖo fínɛ́,

alǒ sɔ́ gǎglónú dó kpé hun xá ɛ,

alǒ sɔ́ nǔ nú nǔ e yě ná zán dó ján go dó è lɛ́ é ɖě ǎ.” ’

34 ‘Ali e é gbɔn bo wá é wɛ é ná gbɔn bo lɛ́ kɔ;

é ná byɔ́ toxo énɛ́ mɛ ǎ,’ wɛ Jexóva ɖɔ.

35 ‘Un ná jɛ hun dó toxo énɛ́ jí bo ná hwlɛ́n ɛ, ɖó nyǐkɔ nyiɖésúnɔ tɔn

kpó nyǐkɔ mɛsɛntɔ́ ce Davídi tɔn kpó wú.’ ”

10 Un ɖɔ: “Hwenu e un ma ko kpo ǎ é ɔ,

un ɖó ná byɔ́ Yɔdo* mɛ.*

Un sɔ́ ná kpɔ́n gbɛtɔ́ lɛ́ ɖě

hwenu e un ná ɖo kpɔ́ xá mɛ e nɔ nɔ fí e nǔ bǐ nɔ fó ɖe é lɛ́ é ǎ.

12 È tún nɔtɛn nyiɖésúnɔ tɔn bo sɔ́ yi

lɛ̌ngbɔ́nyitɔ́ sín goxɔ ɖɔhun.

Un mlá gbɛ ce lěe avɔlɔntɔ́ nɔ mlá avɔ e é lɔn kpé é gbɔn é ɖɔhun;

é sɛ́n mì lěe è nɔ sɛ́n kan e è nɔ dó bo nɔ dó lɔn avɔ ná lɛ́ é gbɔn é ɖɔhun.

É nɔ ɖo xú ce lɛ́ bǐ gba wɛ kinnikínní ɖɔhun;

sín ayǐtéhɔ̌nnu káká jɛ gbadanu ɔ, a nɔ ɖo kplákplá mì wɛ xwe vivɔnu.

14 Azɔnxɛ alǒ títígwetí* ɖɔhun ɔ, un nɔ ɖo finfan wɛ;

un nɔ ɖo finfan wɛ ahwannɛ́ ɖɔhun.

‘Jexóva è, un ɖo wǔvɛ́ syɛ́nsyɛ́n mɔ wɛ;

nyǐ alɔdómɛtɔ́* ce!’

Un ná ɖi zɔnlin kpó mɛɖéesɔ́hwe* kpó nú gbɛhwenu ce bǐ,

ɖó wǔvɛ́ syɛ́nsyɛ́n ce* wú.

16 ‘Jexóva è, gbɛtɔ́ bǐ nɔ nɔ gbɛ gbɔn nǔ énɛ́ lɛ́* gblamɛ,

gbigbɔ ce sín gbɛ ɖo yě mɛ.

17 Éɖíe! Wǔvɛ́ ɖaxó wɛ un mɔ ɖó fífá tɛnmɛ,

amɔ̌, ɖó a yí wǎn nú mì* wútu ɔ,

a hwlɛ́n mì sín kú* sí.

18 Ðó Yɔdo* sixú sɔ́ we su ǎ,

kú sixú kpa susu nú we ǎ.

19 Mɛ e ɖo gbɛ lɛ́ é, ɛɛn, mɛ e ɖo gbɛ lɛ́ é hɛn ɔ, yě ná kpa susu nú we,

lěe un ɖ’é wú gbɔn égbé é ɖɔhun.

20 Jexóva è, hwlɛ̌n mì,

mǐ ná ji han ce lɛ́, bo xo kanhún d’é mɛ

nú gbɛhwenu mǐtɔn bǐ ɖo xwé Jexóva tɔn gbe.’ ”

 2 “Mi ɖɔ xó nú é ní byɔ́ ayi mɛ* nú Jeluzalɛ́mu,

mi jlá ɛ ɖɔ azɔ̌ e è ɖó kɔ jí n’i é ko fó,

ɖɔ hwɛ ɖě kún sɔ́ ɖo kɔ n’i ó.

 4 Tɔdo lɛ́ bǐ ní gɔ́,

só ɖaxó lɛ́ kpó só kpɛví lɛ́ kpó bǐ ní hwíhwɛ́.

Ayǐkúngban e nyí kpó ɖě do ɖě é ná jlɔ́,

bɔ ayǐkúngban kacakaca ná húzú ayǐkúngban wɛnjɛ.

 5 È ná ɖe susu Jexóva tɔn xlɛ́,

bɔ gbɛtɔ́* lɛ́ bǐ ná mɔ,

ɖó nu Jexóva tɔn wɛ ɖɔ xó.”

 7 Gběhan mǔ lɛ́ nɔ xú,

sɛ́ lɛ́ nɔ yɔ́,

ɖó funfún* Jexóva tɔn nɔ nyi dó yě jí.

 8 Gběhan mǔ lɛ́ nɔ xú,

sɛ́ lɛ́ nɔ yɔ́,

amɔ̌, xó Mawu mǐtɔn tɔn nɔ nɔ ayǐ káká sɔ́yi.”

 9 Hwi nyɔ̌nu e hɛn wɛn ɖagbe wá nú Sinyɔ́ɔ é,

fán kpó yi só ɖaxó ɖokpó jí.

Hwi nyɔ̌nu e hɛn wɛn ɖagbe wá nú Jeluzalɛ́mu é,

sɔ́ gbe towe dó jǐ kpó hlɔ̌nhlɔ́n kpó.

10 Éɖíe! Aklúnɔ Nǔbǐwúkpétɔ́ Jexóva ná wá kpó hlɔ̌nhlɔ́n kpó,

bɔ awa tɔn ná ɖo acɛ kpa wɛ.

Éɖíe! Ajɔ tɔn ɖo así tɔn,

bɔ azɔ̌kwɛ́ e é nɔ sú mɛ é ɖo nukɔn tɔn.

É ná sɔ́ awa tɔn dó xo lɛ̌ngbɔ́ lɛ́ kplé,

bo ná bɛ́ yě ɖó akɔ́nnu.

12 Mɛ̌ ka zán alɔgogo tɔn dó jlɛ́ sin,

bo zán alɔbá tɔn dó jlɛ́ jǐnukúnsin?

Mɛ̌ ka xo kɔ́gúdu ayǐkúngban ɔ tɔn lɛ́ kplé dó nǔjlɛ́nú mɛ,

alǒ da só ɖaxó lɛ́

kpó só kpɛví lɛ́ kpó ɖo nǔdagan lɛ́ jí?

13 Mɛ̌ ka jlɛ́ gbigbɔ Jexóva tɔn?*

Mɛ̌ ka sixú nyí wěɖexámɛtɔ́ tɔn bo kplɔ́n nǔ i?

14 Mɛ̌ é ka nɔ kan nǔ byɔ́ bo ná dó ɖó nukúnnúmɔjɛnǔmɛ?

Mɛ̌ ka nɔ kplɔ́n nǔ i ɖo hwɛjijɔ sín ali jí?

Mɛ̌ ka nɔ kplɔ́n ɛ nǔtuuntuun?

Mɛ̌ ka nɔ xlɛ́ ɛ nukúnnúmɔjɛnǔmɛ nǔgbó sín ali ɔ?

15 Éɖíe! Akɔta lɛ́ cí sin e kun téwún sín tɔká mɛ é ɖɔhun,

è nɔ kpɔ́n yě dó mɔ kɔ́kwín lɛ́ ɖo nǔdagan lɛ́ jí.

16 Atín e ɖo Libáan lɛ́ é ná tlɛ kpé, bo ná bló bɔ myɔ ná kpo ɖo jiji wɛ ǎ,*

bɔ gběkanlin tɔn lɛ́ ná kpé vɔ̌ e è nɔ dó zo é sísá ǎ.

17 Akɔta lɛ́ bǐ cí nǔ e ma tíin ǎ é ɖɔhun ɖo nukɔn tɔn;

é nɔ kpɔ́n yě dó mɔ nǔ yǎyá, ɛɛn, nǔ tófwé.

19 Alɔlyɛnzɔ́watɔ́* kpa bǒcyɔ* ɖokpó,

gankɔntɔ́ kɔn siká dó,

é tun kpatágan sín wlɔ lɛ́.

20 É sɔ́ atín ɖokpó bɔ é nyí nǔníná tɔn,

atín e ma ná jɛ wɔvli ǎ é ɖé.

É nɔ ba alɔlyɛnzɔ́watɔ́* e alɔ se kpɛ́n ná é ɖokpó,

bónú é ná kpa bǒcyɔ e ma ná flí ǎ é ɖé.

22 Mawu nɔ nɔ tobotobo ayǐkúngban ɔ tɔn tanu,

bɔ mɛ e nɔ nɔ jí lɛ́ é cí bɔkle lɛ́ ɖɔhun.

É ɖo jǐxwé vlɔ́n wɛ xɔmɛgbovɔ ɖagbe ɖagbe ɖé ɖɔhun,

é vlɔ́n ɛ goxɔ ɖɔhun bo ná nɔ mɛ.

23 É sɔ́ acɛkpatɔ́ nukúnɖéjí lɛ́ dó húzú nǔ yǎyá,

bo bló bɔ hwɛɖɔtɔ́* ayǐkúngban ɔ jí tɔn lɛ́ húzú nǔ tófwé.

24 È ko tun yě zinzin ǎ,

è ko dó yě zinzin ǎ,

ɖɔ yětɔn lɛ́ ko jínjɔ́n ayǐ ɖo ayǐkúngban lanmɛ zinzin ǎ,

bɔ jɔhɔn nyi dó yě bɔ yě xú,

lobɔ jɔhɔn bɛ́ yě yi nǔywɛ́ ɖɔhun.

Mɛ e nɔ ɖe yě tɔ́n ahwankpá ɖɔhun, bo nɔ sɔ́ kɛ́n yě mɛ ɖokpó ɖokpó tɔn é wɛ;

é nɔ sɔ́ nyǐkɔ yě mɛ ɖokpó ɖokpó tɔn dó ylɔ́ yě ná.

Ðó hlɔ̌nhlɔ́n tɔn aditi e é nɔ dó wa nǔ é kpó hlɔ̌nhlɔ́n tɔn e jí wǔ é kpó wú ɔ,

yě ɖě nɔ hwe sín mɛ ǎ.

27 Jakɔ́bu è, étɛ́wú a ka nɔ ɖɔ, ɛɛn, Izlayɛ́li è, étɛ́wú a ka nɔ ɖɔ:

‘Ali ce ɖo hwlǎhwlá dó Jexóva,

un nɔ mɔ hwɛjijɔ ɖě sín Mawu gɔ́n ǎ’?

29 É nɔ ná hlɔ̌nhlɔ́n mɛ e nǔ ci kɔ ná é,

bo nɔ gɔ́ hlɔ̌nhlɔ́n nú mɛ e hlɔ̌nhlɔ́n* hwedó lɛ́ é.

30 Nǔ ná ci kɔ nú yɔkpɔ́vú lɛ́, bɔ gǎn ná vɔ ɖo yě wú,

dɔ̌nkpɛvú lɛ́ ná klɛ́n afɔ, bo ná j’ayǐ,

31 amɔ̌, mɛ e nɔ ɖó nukún Jexóva lɛ́ é ná lɛ́ vɔ́ hlɔ̌nhlɔ́n mɔ.

Yě ná kán wezun, bɔ gǎn ka ná vɔ ɖo yě wú ǎ;

yě ná ɖi zɔnlin, bɔ nǔ ka ná ci kɔ nú yě ǎ.”

41 “Tɔtɛ́ntinto lɛ́ mi, mi cí xwíí bo ɖótó mì;*

akɔta lɛ́ ní lɛ́ vɔ́ hlɔ̌nhlɔ́n yětɔn mɔ.

 2 Mɛ̌ ka fɔ́n mɛɖé sí te sín hwetɔ́nhwe jí,*

bo ylɔ́ ɛ kpó nǔjlɔ́jlɔ́wiwa kpó wá afɔ Tɔn lɛ́ kɔn,*

bo ná jó akɔta lɛ́ n’i,

lobo ná bló bɔ é ná ɖu ɖo axɔ́sú lɛ́ jí?

Mɛ̌ ka bló bɔ yě húzú afúntúntún ɖo hwǐ tɔn nukɔn,

lěe jɔhɔn nɔ d’alɔ nǔywɛ́ mɛ gbɔn é ɖo gǎ tɔn nukɔn?

 3 É jɛ yě gúdo, nǔɖé ka sú ali dó è ǎ,

bɔ é ɖo ali e jí afɔ tɔn ma ko tɛ kpɔ́n ǎ lɛ́ é jí gbɔn wɛ.

 4 Mɛ̌ sín azɔ̌ ka nyí énɛ́? Mɛ̌ ka wa nǔ énɛ́,

bo ylɔ́ jijimɛ lɛ́ sín bǐbɛ́mɛ?

Nyɛ Jexóva ɔ, nyi wɛ nyí Mɛ nukɔntɔn ɔ;

mɛ ɖokpó ɔ wɛ un ná nyí nú mɛ gǔdo gúdo tɔn lɛ́.”

 6 Mɛ ɖokpó ɖokpó nɔ d’alɔ gbɛ̌ tɔn,

bo nɔ ɖɔ nú nɔví tɔn ɖɔ: “Dǒ hlɔ̌nhlɔ́n.”

 7 Énɛ́ ɔ, alɔlyɛnzɔ́watɔ́* nɔ dó wǔsyɛ́n lanmɛ nú gankɔntɔ́;

mɛ e nɔ sɔ́ zǔn dó tun nǔ ná é

nɔ dó wǔsyɛ́n lanmɛ nú mɛ e nɔ ɖo nǔ zin dó wan jí wɛ é.

 8 “Amɔ̌, hwi Izlayɛ́li è, mɛsɛntɔ́ ce wɛ a nyí,

hwi Jakɔ́bu e un sɔ́ é,

xɔ́ntɔn ce Ablaxámu sín kúnkan,*

 9 hwi mɛ e un kplá sín fí e ayǐkúngban ɔ kponu ɖó lɛ́ é,

hwi mɛ e un ylɔ́ sín fí e lín hú gǎn ɖo ayǐkúngban ɔ jí lɛ́ é.

Un ɖɔ nú we ɖɔ: ‘Hwi wɛ nyí mɛsɛntɔ́ ce;

un sɔ́ we; un gbɛ́ we ǎ.

Un ná ná hlɔ̌nhlɔ́n we, ɛɛn, un ná d’alɔ we,

un ná hɛn we gbánwúngbánwún kpó ɖisílɔ ce nǔjlɔ́jlɔ́wiwa tɔn ɔ kpó.’

12 A ná ba mɛ ɖěɖěe nɔ li za xá we lɛ́ é, loɔ, a ná mɔ yě ǎ;

mɛ e ɖo ahwan fun xá we wɛ lɛ́ é ná cí nǔ e ma tíin ǎ é ɖɔhun, ɛɛn, nǔ yǎyá ɖɔhun.

13 Ðó nyɛ Jexóva Mawu towe ɔ, un hɛn ɖisílɔ towe,

un ɖo ɖiɖɔ nú we wɛ ɖɔ: ‘Ma ɖi xɛsi ó. Un ná d’alɔ we.’

14 Hwi wǎnvú* Jakɔ́bu, ma ɖi xɛsi ó,

súnnu Izlayɛ́li tɔn lɛ́ mi, un ná d’alɔ mi,” wɛ Jexóva, Mɛ e vɔ́ we xɔ é, Mɛ mímɛ́ Izlayɛ́li tɔn ɔ ɖɔ.

15 “Éɖíe! Un sɔ́ we dó bló nǔkúnsónú,

nǔkúnsónú nuwenɔ e ɖó aɖǔ é yɔ̌yɔ́ ɖé.

A ná gba só ɖaxó lɛ́, bo ná li yě,

lobo ná bló bɔ só kpɛví lɛ́ ná húzú fló.

16 A ná fún yě,

bɔ jɔhɔn ná bɛ́ yě yi;

jɔhɔn ɖaxó ná fúnfún yě kpé.

A ná j’awǎ ɖo Jexóva mɛ,

bo ná gó ɖo Mɛ mímɛ́ Izlayɛ́li tɔn ɔ mɛ.”

18 Un ná bló bɔ tɔ ná sa ɖo só kpɛví e jí nǔɖé ma ɖe ǎ lɛ́ é jí,

bɔ tɔjɔtɛn lɛ́ ná ɖo ayǐkúngban wɛnjɛ lɛ́ jí.

Un ná sɔ́ gbětótló dó húzú sindo e mɛ fántín ɖe é,

bo ná sɔ́ ayǐkúngban e jí sin ma ɖe ǎ é dó húzú tɔjɔtɛn.

19 Un ná tun sɛ́dlutín,

kasyatín, mǐititín kpó pínutín kpó ɖó gbětótló ɔ mɛ.

Un ná tun jenɛvliyéetín,

gɔ́ nú flɛ́nitín kpó siplɛ́tín kpó ɖó gbětótló ɔ mɛ,

20 bónú togun lɛ́ bǐ ní dó sixú mɔ bo tuun,

ɖó ayi wú, lobo mɔ nǔ jɛ mɛ

ɖɔ alɔ Jexóva tɔn wɛ bló nǔ énɛ́,

Mɛ mímɛ́ Izlayɛ́li tɔn ɔ wɛ bló bɔ nǔ nyí mɔ̌.”

Mi ɖɔ nǔ xóxó* lɛ́ nú mǐ,

bónú mǐ ní dó sixú lin tamɛ dó yě jí,* lobo tuun nǔ e yě ná ji lɛ́ é.

23 Mi ɖɔ nǔ e ná jɛ ɖo sɔgúdo é nú mǐ,

bónú mǐ ní dó sixú tuun ɖɔ mi nyí mawu.

Ɛɛn, mi ní wa nǔɖé, é sixú nyí nǔ ɖagbe, alǒ nǔ nyanya,

bónú é ní dó sixú jí wǔ nú mǐ hwenu e mǐ ná mɔ é.

24 Éɖíe! Mi tíin ǎ,

azɔ̌ mitɔn nyí nǔtí ǎ.

25 Un ná fɔ́n mɛɖé sí te sín totaligbé, bɔ é ná wá,

mɛ e gosín hwetɔ́nhwe jí* é ná xomlá nyǐkɔ ce.

É ná gbídí acɛkpatɔ́* lɛ́ ɖó afɔ wú cí nǔ ɖɔ ko wɛ yě nyí ɖɔhun,

lěe zɛ̌nmɛtɔ́ ɖé nɔ nya ko kpó afɔ kpó gbɔn é ɖɔhun.

26 Mɛ̌ ka ɖɔ xó dó nǔ énɛ́ wú sín bǐbɛ́mɛ, bónú mǐ ní dó sixú tuun,

alǒ sín hwexónu, bónú mǐ ní dó sixú ɖɔ: ‘Hwɛ tɔn jɔ’?

28 Amɔ̌, un ɖo kpínkpɔ́n wɛ, mɛ ɖěbǔ ka ɖe ǎ;

mɛ ɖěbǔ ɖo yě mɛ, bo ná ɖe wě xá mɛ ǎ.

Un ná ɛ gbigbɔ ce;

é ná hɛn hwɛjijɔ wá nú akɔta lɛ́.

 2 É ná sú xó, alǒ zé gbe dó jǐ ǎ,

é ná bló bónú è ná se gbe tɔn ɖo toxomɛli jí ǎ.

 3 É ná gbídí fántín e ko tɔ é ɖěbǔ ǎ,

é ka ná cí zogbɛ́nkan e ko ɖo azɔ si wɛ é ɖěbǔ ǎ.

 4 Hlɔ̌nhlɔ́n tɔn ná ɖe kpo ǎ, mɔ̌ jɛ́n è ma ná nyínyɛ́ ɛ, káká cóbónú é ná ɖó hwɛjijɔ ayǐ ɖo ayǐkúngban ɔ jí ǎ é nɛ́;

tɔtɛ́ntinto lɛ́ ɖo te kpɔ́n sɛ́n* tɔn.

 5 Mawu nǔgbó ɔ Jexóva,

mɛ e dá jǐnukúnsin é, Mawu ɖaxó e vlɔ́n ɛ é,

mɛ e bló ayǐkúngban ɔ kpó nǔ e ɖ’é jí lɛ́ é kpó é,

mɛ e nɔ ná funfún mɛ e ɖ’é jí lɛ́ é,

bo nɔ ná gbigbɔ mɛ ɖěɖěe nɔ ɖi zɔnlin gbɔn jí lɛ́ é ɔ, xó e é ɖɔ é ɖíe:

 6 “Nyɛ Jexóva ɔ, bo ná dó wa nǔ jlɔ́jlɔ́ ɔ, un ylɔ́ we;

un hɛn alɔ towe.

Un ná nya xɛ ɖo jǐ we, bɔ a ná cí akɔjijɛ ɖé ɖɔhun ɖo nyɛ kpó togun lɛ́ kpó tɛ́ntin,

bɔ a ná cí wěziza ɖɔhun nú akɔta lɛ́,

 7 bónú a ná hun nukún nú nukúntɔ́nnɔ lɛ́,

bo ɖe gantɔ́ lɛ́ sín gankpá do glɔ́ tɔn lɛ́ mɛ,

lobo ɖe mɛ e ɖo ayǐjínjɔ́n ɖo ablu mɛ lɛ́ é sín gankpá mɛ.

 8 Un nyí Jexóva. Nyǐkɔ ce nɛ́;

un nɔ sɔ́ susu ce jó nú mɛ ɖěvo ɖěbǔ ǎ,*

mɔ̌ jɛ́n un ma nɔ sɔ́ susu ce jó nú bǒcyɔ kpikpa lɛ́ ǎ é nɛ́.

 9 Mi kpɔ́n, nǔ nukɔn nukɔntɔn lɛ́ jɛnu,

din ɔ, un ɖo nǔ yɔ̌yɔ́ lɛ́ jlá wɛ.

10 Mi mɛ e xu kpó nǔ e ɖ’é mɛ lɛ́ é kpó nɔ ná nǔɖuɖu lɛ́ é mi,

tɔtɛ́ntinto lɛ́ kpó mɛ e nɔ nɔ mɛ lɛ́ é kpó è mi,

mi ji han yɔ̌yɔ́ ɖé nú Jexóva,

mi kpa susu n’i sín fí e ayǐkúngban ɔ kponu ɖó lɛ́ é.

11 Gbětótló kpó toxo tɔn lɛ́ kpó ní zé gbe dó jǐ,

gletoxo e mɛ Kedáa nɔ nɔ lɛ́ é ní zé gbe dó jǐ.

Mɛ e nɔ nɔ sókan mɛ lɛ́ é ní sú xó kpó awǎjijɛ kpó;

yě ní sú xó sín só ɖaxó lɛ́ tanu.

12 Yě ní kpa susu nú Jexóva,

bo jlá susu tɔn gbɔn tɔtɛ́ntinto lɛ́ mɛ.

É ná sú xó, ɛɛn, é ná sú ahwanfunfun sín xó;

é ná ɖe xlɛ́ ɖɔ émí hú agbɔ̌n kɛntɔ́ émítɔn lɛ́.

Nyɔ̌nu e ɖo vǐ ji wɛ é ɖɔhun ɔ,

un ná wɛn azɔn, zɛn, bo lɛ́ gbɔjɛ syɛ́nsyɛ́n hwe ɖokpó ɔ nu.

15 Un ná gba só ɖaxó lɛ́ kpó só kpɛví lɛ́ kpó mlɛ́mlɛ́,

bo ná bló bɔ gběhan e ɖo yě jí é bǐ ná xú.

Un ná sɔ́ tɔsisa lɛ́ dó húzú tɔtɛ́ntinto,*

bo ná bló bɔ tɔdo e mɛ fántín gɔ́ é ná xú.

16 Un ná kplá nukúntɔ́nnɔ lɛ́ gbɔn ali e yě ma tuun ǎ é jí,

bo ná bló bɔ yě ná ɖi zɔnlin gbɔn ali e ma má dó yě ǎ lɛ́ é jí.

Un ná sɔ́ ablu e ɖo nukɔn yětɔn é dó húzú wěziza,

bo ná sɔ́ ayǐkúngban kacakaca dó húzú ayǐkúngban jlɔ́jlɔ́.

17 Mɛ ɖěɖěe nɔ ɖeji dó bǒcyɔ kpikpa lɛ́ wú lɛ́ é,

mɛ ɖěɖěe nɔ ɖɔ nú ganbócyɔ lɛ́* ɖɔ: “Mi wɛ nyí mawu mǐtɔn” lɛ́ é ɔ,

yě ná dó gǔdofɔ, bɔ è ná dó winnyá yě bǐ mlɛ́mlɛ́.

18 Mi mɛ e nyí tókúnɔ lɛ́ é mi, mi ɖótó;

mi mɛ e nyí nukúntɔ́nnɔ lɛ́ é mi, mi kpɔ́n bo mɔ.

19 Mɛ̌ ka nyí nukúntɔ́nnɔ, bɔ é ma nyí mɛsɛntɔ́ ce ǎ?

Mɛ̌ ka nyí tókúnɔ sɔ wɛndótɔ́ e un sɛ́ dó é?

Mɛ̌ ka nyí nukúntɔ́nnɔ sɔ mɛ e è dó ajɔ é?

Mɛ̌ ka nyí nukúntɔ́nnɔ sɔ mɛsɛntɔ́ Jexóva tɔn?

21 Ðó nǔjlɔ́jlɔ́wiwa tɔn wútu ɔ,

Jexóva ná xlɛ́ ɖɔ sɛ́n* ɔ d’agba, bɔ susu jɛxá.

22 Amɔ̌, togun e è vɔ, bo bɛ́ nǔ tɔn lɛ́ é wɛ togun élɔ́ nyí;

yě mɛ bǐ wɛ è wlí dó do mɛ, bo hwlá yě dó gankpá lɛ́ mɛ.

È vɔ yě, bɔ mɛ ɖěbǔ ɖe bo hwlɛ́n yě ǎ,

è bɛ́ nǔ yětɔn lɛ́, bɔ mɛ ɖěbǔ ɖe bo ɖɔ: “Mi kplá yě lɛ́ kɔ!” ǎ.

24 Mɛ̌ ka jó Jakɔ́bu bɔ è bɛ́ nǔ tɔn lɛ́?

Mɛ̌ ka jó Izlayɛ́li nú mɛ e nɔ vɔ mɛ lɛ́ é?

Yě gbɛ́ ɖɔ émí kún ná ɖi zɔnlin gbɔn ali tɔn lɛ́ jí ó,

yě gbɛ́ ɖɔ émí kún ná se tónú nú sɛ́n* tɔn ó.

25 É kpo ɖo xomɛsin tɔn kɔn dó yě jí wɛ,

xomɛsin tɔn kpó ahwan sín xɔxɔ kpó.

43 Din ɔ, nǔ e Jexóva ɖɔ é ɖíe,

éyɛ́ Mɛ e ɖó hwɛ Jakɔ́bu é, Mɛ e bló hwɛ Izlayɛ́li é; nǔ e é ɖɔ é ɖíe:

 2 Hwenu e a ná ɖo sin mɛ gbɔn wɛ é ɔ, un ná ɖo kpɔ́ xá we,

hwenu e a ná ɖo tɔsisa lɛ́ mɛ gbɔn wɛ é ɔ, yě ná ɖí bú we ǎ.

Hwenu e a ná ɖo zɔnlin ɖi gbɔn myɔ mɛ wɛ é ɔ, a ná ji myɔ ǎ,

mɔ̌ jɛ́n myɔ ɔ ma ná fyɔ́ we ǎ é nɛ́.

 3 Ðó nyɛ wɛ nyí Jexóva Mawu towe,

Mɛ mímɛ́ Izlayɛ́li tɔn, Mɛhwlɛ́ngántɔ́ towe.

Un ko sɔ́ Ejípu jó dó xɔ gbɛ nú we,

bo ko sɔ́ Etiopíi kpó Seba kpó jó dó tɛn towe mɛ.

 4 Ðó a húzú nǔ xɔ akwɛ́ ɖo nukún ce mɛ,

è wlí yɛ̌yi nú we, bɔ nyɛ yí wǎn nú we.

Énɛ́ wú ɔ, un ná sɔ́ togun lɛ́ jó dó tɛn towe mɛ,

bo ná sɔ́ akɔta lɛ́ jó dó gbɛ* towe tɛnmɛ.

Un ná kplá kúnkan* towe sín zǎnzǎnhwe jí,

bo ná xo mi kplé ɖó kpɔ́ sín gbadahwe jí.

Kplá vǐ súnnu ce lɛ́ wá sín fí línlín, bo kplá vǐ nyɔ̌nu ce lɛ́ wá sín fí e ayǐkúngban ɔ kponu ɖó lɛ́ é,

 7 énɛ́ wɛ nyí mɛ e è nɔ ylɔ́ gbɔn nyǐkɔ ce gblamɛ lɛ́ é bǐ,

mɛ e un dá nú susu nyiɖésúnɔ tɔn lɛ́ é,

mɛ e un bló lɛ́ é.’

 8 Ðe togun e ɖó nukún cóbó ka tɔ́n nukún é tɔ́n,

togun e ɖó tó, cóbó ka kú tó é tɔ́n.

 9 Mi nú akɔta lɛ́ bǐ ní kplé ɖó fí ɖokpó,

togun lɛ́ bǐ ní xo kplé ɖó kpɔ́.

Mi nú yě ní ná kúnnuɖenú yětɔn lɛ́, bo ná dó ɖe xlɛ́ ɖɔ hwɛ émítɔn jɔ,

alǒ, mi nú yě ní se, bo ɖɔ: ‘Nǔgbó ɔ wɛ!’ ”

10 “Mi wɛ nyí kúnnuɖetɔ́ ce,” wɛ Jexóva ɖɔ,

“ɛɛn, mɛsɛntɔ́ ce e un sɔ́ é,

bónú mi ní dó sixú tuun, bo ɖi nǔ nú mì,*

lobo mɔ nukúnnú jɛ mɛ ɖɔ mɛ ɖokpó ɔ wɛ un nyí.

Mawu ɖě tíin jɛ nukɔn nú mì ǎ,

ɖě ka lɛ́ tíin ɖo gǔdo ce ǎ.

12 “Nyɛ wɛ nyí mɛ e ɖɔ, bo hwlɛ́n mɛ gán, lobo bló bɔ è tuun é,

hwenu e nǔmɛsɛn to ɖěvo mɛ tɔn ɖě ma ko ɖo tɛ́ntin mitɔn ǎ é.

13 Gɔ́ ná ɔ, mɛ ɖokpó ɔ wɛ un nyí hwebǐnu;

bɔ mɛ ɖěbǔ sixú xo nǔ ɖěbǔ yí sín alɔ ce mɛ ǎ.

“Un ná sɛ́ mɛ ɖokpó dó Babilɔ́nu, bo ná gba hɔntogbó lɛ́ sín gankpo lɛ́ ɖó mi wú,

bɔ Kaludéenu lɛ́ ná ɖo tɔjíhún yětɔn lɛ́ mɛ, bo ná sú xó kpó aluwɛ kpó.

16 Nǔ e Jexóva

mɛ e nɔ ɖe ali gbɔn xu mɛ é,

mɛ e tlɛ nɔ ɖe ali gbɔn sin e ɖo adǎn jí é mɛ é,

17 mɛ e nɔ ɖe ahwankɛkɛ́ kpó sɔ́ kpó,

gɔ́ nú ahwankpá kpó ahwanfuntɔ́ hlɔ̌nhlɔ́nnɔ lɛ́ kpó tɔ́n é ɖɔ é ɖíe:

18 “Mi ma nɔ flín nǔ xóxó lɛ́ ó,

mi ma nɔ ɖo tamɛ lin dó nǔ e ko jɛ wá yi lɛ́ é jí wɛ ó.

19 Éɖíe! Un ɖo nǔ yɔ̌yɔ́ ɖé bló wɛ;

é tlɛ ko ɖo kun tɔ́n wɛ din.

Un ná ɖe ali ɖokpó gbɔn gbětótló mɛ,

bo ná bló bɔ tɔsisa lɛ́ ná sa gbɔn gbětótló ɔ mɛ.

20 Gběkanlin e ɖo gle mɛ lɛ́ é ná wlí yɛ̌yi nú mì,

gɔ́ nú cukú gbě tɔn lɛ́ kpó gowungo lɛ́ kpó,

ɖó un bló bɔ sin ɖo gbětótló ɔ mɛ,

bɔ tɔsisa ɖo gbětótló ɔ mɛ,

bónú togun ce, mɛ e un sɔ́ é ná nu,

21 togun e un ɖó ayǐ nú nyiɖésúnɔ é,

bónú yě ní dó sixú kpa susu nú mì.

22 Amɔ̌, Jakɔ́bu è, a ylɔ́ mì ǎ,

ɖó agbɔ̌n ce kpé we wútu, hwi Izlayɛ́li.

23 A hɛn lɛ̌ngbɔ́ wá nú mì dó sá vɔ̌ e è nɔ dó blěbú tɔn zo lɛ́ é ná ǎ,

a nɔ kpa susu nú mì kpó vɔ̌sísá towe lɛ́ kpó ǎ.

Un hɛn we gǎnnugǎnnu ɖɔ a ní ná nǔ mì ǎ,

mɔ̌ jɛ́n un ma jɛ gǒ mɛ nú we, bo ɖo zǎlínkpɔ́n wěwé byɔ́ we wɛ magbokɔ ǎ é nɛ́.

24 A sɔ́ akwɛ́ towe dó xɔ fántín wǎnɖagbenɔ nú mì ǎ,

a bló bónú vɔ̌sísá towe lɛ́ sín jǒ jɛmɛ nú mì ǎ.

É nyɔ́ wa ɔ, a nɔ sɔ́ hwɛ towe lɛ́ dó dó agban nú mì,

bo nɔ bló bɔ nǔwanyido towe lɛ́ nɔ ci kɔ nú mì.

25 Nyɛ ɔ, nyɛ wɛ ɖo hwɛ* towe lɛ́ súnsún wɛ ɖó nyǐkɔ ce wú,

un sɔ́ ná flín hwɛ towe lɛ́ ǎ.

26 Flín nǔ mì, mǐ ní ylɔ́ hwɛ mǐɖée lɛ́,

ɖɔ akpáxwé towe bo ná dó xlɛ́ ɖɔ hwɛ towe jɔ.

27 Tɔ́gbó towe nukɔntɔn ɔ hu hwɛ,

bɔ ɖɛ̌mɛnu* hwiɖésúnɔ tɔn lɛ́ fɔ́n gǔ dó jǐ ce.

28 Énɛ́ wú ɔ, un ná kɔ́n wi nú tɛn mímɛ́ ɔ sín axɔ́ví lɛ́,

bo ná sɔ́ Jakɔ́bu jó bɔ è ná sú kún tɔn dó,

lobo ná jó Izlayɛ́li nú zun.*

44 “Mɛsɛntɔ́ ce Jakɔ́bu è, din ɔ, ɖǒtó,

hwɛ Izlayɛ́li, mɛ e un sɔ́ é, ɖǒtó.

 2 Nǔ e Jexóva,

mɛ e bló we bo dá we,

lobo d’alɔ we sín hwenu e a ɖo adɔgo mɛ* é ɖɔ é ɖíe:

‘Mɛsɛntɔ́ ce Jakɔ́bu, ma ɖi xɛsi ó,

hwɛ Yeculúnu* e un sɔ́ é, ma ɖi xɛsi ó.

 3 Ðó un ná gba sin kɔn nyi mɛ* e kɔ xú é jí,

bo ná bló bɔ tɔ ná sa ɖo ayǐkúngban xúxú jí.

Un ná gba gbigbɔ ce kɔn nyi kúnkan* towe jí,

bo ná kɔn nyɔ̌ná ce dó vǐ towe lɛ́ jí.

 4 Yě ná tɔ́n kun gběhan mǔ lɛ́ tɛ́ntin wɛ yě ɖe ɖɔhun,

pepliyéetín e ɖo tɔsisa tó lɛ́ é ɖɔhun.

Mɛ ɖěvo ná ylɔ́ éɖée kpó nyǐkɔ Jakɔ́bu tɔn kpó,

bɔ mɛ ɖěvo ná wlán dó alɔkpákpá éɖésúnɔ tɔn mɛ ɖɔ: “Jexóva tɔn.”

 6 Nǔ e Jexóva,

axɔ́sú Izlayɛ́li tɔn, Mɛ e vɔ́ ɛ xɔ é, Jexóva ahwankpá lɛ́ tɔn ɖɔ é ɖíe:

Sín tɛgbɛ e un ɖó togun ɔ ayǐ é ɔ,

yě ní ɖɔ nǔ e ná wá jɛ lɛ́ é

kpó nǔ e ná wá jɛ ɖo nukɔnmɛ lɛ́ é kpó.

 8 Ado ma hu mi ó,

xɛsi ní ma ka lɛ́ hu mi ɖó akpo ó.

 9 Mɛ e nɔ kpa bǒcyɔ lɛ́ é nyí nǔtí ǎ,

nǔ e yě nɔ wlíbo ná lɛ́ é ná hɛn le ɖě wá ǎ.

Yě nyí kúnnuɖetɔ́ yětɔn, yě* ka nɔ mɔ nǔtí ǎ, mɔ̌ jɛ́n yě ma tuun nǔtí ǎ é nɛ́;

énɛ́ wú wɛ è ná dó winnyá mɛ e bló yě lɛ́ é.

10 Mɛ̌ ka bló nǔmɛsɛn alǒ ganbócyɔ,*

éé ma sixú hɛn le ɖě wá ǎ é?

É nɔ sɔ́ zǔnkpé lɛ́ dó tun gan ɔ,

lobo nɔ zán awa tɔn hlɔ̌nhlɔ́nnɔ ɔ dó w’azɔ̌ ɖ’é wú.

Énɛ́ gúdo ɔ, xovɛ́ nɔ sin i bɔ é nɔ ba hlɔ̌nhlɔ́n kpo;

é nɔ nu sin ǎ bɔ nǔ nɔ ci kɔ n’i.

É nɔ kpɔ́n gbɛtɔ́ dó bló akpajlɛ́ tɔn,

ɛɛn, é nɔ kpɔ́n gbɛtɔ́ sín ɖɛkpɛ dó bló è,

bónú é ná nɔ xwé ɖé gbe.*

É nɔ cyán atín alɔkpa ɖé, énɛ́ wɛ nyí cɛ́nitín,

bo nɔ jó è dó bɔ é nɔ d’agba ɖo atín e ɖo zungbó ɔ mɛ lɛ́ é tɛ́ntin.

É nɔ zán akpáxwé tɔn ɖé bo ná dó glɔ́n yǒzo nú éɖée;

é nɔ bɔ myɔ bo nɔ ɖa wɔ̌xúxú.

16 É nɔ dó vlɔ̌ zo ɖo myɔ mɛ;

é nɔ sɔ́ vlɔ̌ énɛ́ dó hi lan e é nɔ ɖu é bɔ é nɔ jɛmɛ n’i.

18 Yě tuun nǔtí ǎ, yě mɔ nukúnnú jɛ nǔ ɖě mɛ ǎ,

ɖó nukún yětɔn lɛ́ ɖo súsú gbánwúngbánwún bɔ yě sixú mɔ nǔ ǎ,

lobɔ nukúnnúmɔjɛnǔmɛ ɖě ɖo ayi yětɔn mɛ ǎ.

19 Yě mɛ ɖěbǔ nɔ lin nǔ dó ayi mɛ,

alǒ tuun nǔ abǐ mɔ nukúnnú jɛ nǔ mɛ, bo nɔ ɖɔ xó élɔ́ ǎ:

“Un dó vlɔ̌ zo ɖo myɔ mɛ,

bo ɖa wɔ̌xúxú ɖo akán tɔn jí, lobo lɛ́ hi lan ɖ’é jí bá dó ɖu.

21 “Jakɔ́bu è, flín nǔ énɛ́ lɛ́, ɛɛn, hwi Izlayɛ́li è,

ɖó mɛsɛntɔ́ ce wɛ a nyí.

22 Un ná súnsún nǔwanyido towe lɛ́ cí nǔ ɖɔ akpɔ́kpɔ́ wɛ è cyɔ́n dó yě ɖɔhun,

bo ná súnsún hwɛ towe lɛ́ cí nǔ ɖɔ akpɔ́kpɔ́ tlitli wɛ è cyɔ́n dó yě ɖɔhun.

23 Jǐnukúnsin è, sú xó kpó awǎjijɛ kpó,

ɖó Jexóva ko wa nǔ!

Só lɛ́ mi, mi sú xó kpó awǎjijɛ kpó,

zungbó è, hwi kpó atín towe lɛ́ bǐ kpó ní sú xó kpó awǎjijɛ kpó!

Ðó Jexóva vɔ́ Jakɔ́bu xɔ,

é ɖe susu tɔn xlɛ́ Izlayɛ́li.”

24 Nǔ e Jexóva, Mɛ e vɔ́ we xɔ é,

Mɛ e bló we sín hwenu e a ɖo adɔgo mɛ é ɖɔ é ɖíe:

Nyiɖésúnɔ wɛ vlɔ́n jǐnukúnsin,

nyi wɛ tɛ́ ayǐkúngban ɔ.

25 Un ɖo xóvɔ̌tɔ́ɖɔtɔ́* lɛ́ sín wuntun lɛ́ sɔ́ dó húzú nǔ yǎyá wɛ,

nyi wɛ nyí Mɛ e nɔ bló bɔ amɔɛkantɔ́ nɔ wa nǔ xlonɔ ɖɔhun é;

Mɛ e nɔ bló bɔ nǔ bǐ nɔ fan dó súnnu nǔnywɛ́tɔ́ lɛ́,

bo nɔ bló bɔ nǔtuuntuun yětɔn nɔ húzú xlojijɔ é;

26 Mɛ e nɔ bló bɔ mɛsɛntɔ́ tɔn sín xó nɔ jɛnu,

bo nɔ bló bɔ nǔ e wɛndótɔ́ tɔn lɛ́ ɖɔ ɖ’ayǐ lɛ́ é nɔ jɛnu bǐ mlɛ́mlɛ́ é;

Mɛ e ɖo ɖiɖɔ dó Jeluzalɛ́mu wú wɛ ɖɔ: ‘Gbɛtɔ́ ná nɔ mɛ’ é,

bo ɖo ɖiɖɔ dó toxo Judáa tɔn lɛ́ wú wɛ ɖɔ: ‘È ná vɔ́ yě gbá,

un ná jlá dǒglin tɔn lɛ́ ɖó’ é;

27 Mɛ e ɖo ɖiɖɔ nú tɔ e gɔ́ngɔ́n lɛ́ é wɛ ɖɔ: ‘Mi mɛ,

un ná bló bɔ tɔsisa mitɔn lɛ́ bǐ ná xú’ é;

28 Mɛ e ɖo ɖiɖɔ nú Silúsi wɛ ɖɔ: ‘É wɛ nyí lɛ̌ngbɔ́nyitɔ́ ce,

é ná bló bɔ jlǒ ce lɛ́ bǐ ná nyí wiwa mlɛ́mlɛ́’ é;

Mɛ e ɖo ɖiɖɔ dó Jeluzalɛ́mu wú wɛ ɖɔ: ‘È ná vɔ́ ɛ gbá,’

45 Nǔ e Jexóva ɖɔ nú Silúsi, mɛ e é sɔ́

bo hɛn ɖisílɔ tɔn gbánwúngbánwún,

bo ná ɖu ɖo akɔta lɛ́ jí ɖo nukɔn tɔn,

yí ahwanfunnú sín axɔ́sú lɛ́ sí,*

hun hɔn vǐ wenɔ lɛ́ ɖo nukɔn tɔn,

bónú hɔntogbó lɛ́ ní ma sú ó é ɖíe:

 2 “Un ná jɛ nukɔn towe,

bo ná gbígbá só kpɛví lɛ́.

Un ná gba ganvɔhɔn lɛ́ hánnyá,

bo ná sɛ́n gankpo lɛ́.

 3 Un ná ná we dɔkun e ɖo ablu mɛ lɛ́ é,

bo ná ná we dɔkun e ɖo hwlǎhwlá ɖo fí e hwlá lɛ́ é,

bónú a ní dó tuun ɖɔ nyɛ wɛ nyí Jexóva,

Mawu Izlayɛ́li tɔn e sɔ́ nyǐkɔ towe dó ɖo ylɔ̌ylɔ́ we ná wɛ é.

 4 Ðó mɛsɛntɔ́ ce Jakɔ́bu kpó Izlayɛ́li mɛ e un sɔ́ é kpó wú ɔ,

un sɔ́ nyǐkɔ towe dó ɖo ylɔ̌ylɔ́ we wɛ.

A tuun mì ǎ có, un ná ná hlɔ̌nhlɔ́n we,*

 6 bónú gbɛtɔ́ lɛ́ ní dó sixú tuun

sín fí e hwe nɔ tɔ́n sín é, yi fí e é nɔ yi xɔ dó é*

ɖɔ mɛ ɖě kún sɔ́ tíin zɛ nyɛ wú ó.

 7 Un nɔ bló wěziza bo nɔ bló ablu,

un nɔ hɛn fífá wá bo nɔ dɔn awěxomɛ wá;

nyɛ, Jexóva, wɛ ɖo nǔ énɛ́ lɛ́ bǐ bló wɛ.

 8 Hwi jǐnukúnsin è, ja jǐ sín aga!

Akpɔ́kpɔ́ lɛ́ ní kɔn nǔjlɔ́jlɔ́wiwa kɔn nyi ayǐ.

Ayǐkúngban ní hun nu, bo ná sínsɛ́n hwlɛngán tɔn,

é ní bló bónú nǔjlɔ́jlɔ́wiwa ní tɔ́n kun ɖo hwe ɖokpó ɔ nu.

 9 Heelú mɛ e nɔ liza* xá Mɛ e bló è* é,

ɖó kozɛ́n fínfɛ́n ɖé kpowun wɛ é nyí

ɖo kozɛ́n fínfɛ́n ɖěvo e ɖo kɔ́mɛ lɛ́ é mɛ!

“A ná kan nǔ byɔ́ mì dó nǔ e ja lɛ́ é wú,

bo ná ɖe gbe nú mì dó vǐ súnnu ce lɛ́ kpó alɔ ce núwiwa lɛ́ kpó wú wɛ a?

Un vlɔ́n jǐnukúnsin kpó alɔ nyiɖésúnɔ tɔn lɛ́ kpó,

bo ɖe gbe nú ahwankpá tɔn lɛ́ bǐ.”

13 “Un sɔ́ mɛɖé sí te ɖo nǔjlɔ́jlɔ́wiwa mɛ,

bo ná bló bɔ ali tɔn lɛ́ bǐ ná jlɔ́.

É wɛ nyí mɛ e ná gbá toxo ce,

bo ná ɖe mɛ e ɖo kannumɔgbénu lɛ́ é nyi te ma yí akwɛ́, alǒ ɖu nǔ ɖo nǔ mɛ é,” wɛ Jexóva ahwankpá lɛ́ tɔn ɖɔ.

“Le* Ejípu tɔn lɛ́ kpó ajɔ̌nú* Etiopíi tɔn lɛ́ kpó, gɔ́ nú Sébanu lɛ́, énɛ́ wɛ nyí súnnu gaga lɛ́,

ná wá gɔ̌n towe, bo ná húzú towe.

Yě ná ɖɔ nú we kpó sísí ɖaxó kpó ɖɔ: ‘É ɖo wɛn ɖɔ Mawu ɖo kpɔ́ xá we,

mɛ ɖěvo ɖě sɔ́ ɖe ǎ; Mawu ɖěvo ɖě sɔ́ ɖe ǎ.’ ”

15 Hwi Mawu Izlayɛ́li tɔn, Mɛhwlɛ́ngántɔ́ ɔ,

Mawu e nɔ sɔ́ éɖée hwlá é wɛ a nyí nǔgbó.

16 È ná dó winnyá yě bǐ, bo ná kɔ́n wi yětɔn;

mɛ e nɔ bló bǒcyɔ lɛ́ é bǐ ná ɖidó kpó winnyá kpó.

18 Ðó nǔ e Jexóva,

Mɛ e dá jǐnukúnsin é, Mawu nǔgbó ɔ,

Mɛ e bló ayǐkúngban ɔ é, éyɛ́ Mɛ e dó è do nyi dodónu syɛ́nsyɛ́n jí,

bo ma bló è ɖó wǔvɔ́* ǎ, loɔ, bónú gbɛtɔ́ ní dó nɔ jí é ɖɔ é ɖíe:

19 Un ɖɔ xó ɖo fí e hwlá é ɖé, alǒ ɖo to e dó ablu é ɖé mɛ ǎ;

un ɖɔ xó élɔ́ nú kúnkan* Jakɔ́bu tɔn ǎ:

‘Mi ba mì, é ka ná nyí ɖó wǔvɔ́.’

Yě mɛ e nɔ ɖo bǒcyɔ kpikpa lɛ́ hɛn kpé wɛ,

bo nɔ ɖo ɖɛ xo sɛ́dó nǔmɛsɛn e ma sixú hwlɛ́n yě ǎ é wɛ lɛ́ é ɔ, yě tuun nǔtí ǎ.

Mɛ̌ ka ɖɔ nǔ énɛ́ lɛ́ ɖ’ayǐ sín hwenu línlín ɖíe?

Bo jlá yě sín hwexónu?

Mawu ɖěvo ɖe zɛ nyɛ wú ǎ;

Mawu nǔjlɔ́jlɔ́watɔ́, Mɛhwlɛ́ngántɔ́, ɖě ɖe zɛ nyɛ wú ǎ.

22 Mi mɛ e nɔ nɔ fí e ayǐkúngban ɔ kponu ɖó lɛ́ é bǐ è mi, mi wá gɔ̌n ce, bo ná gán,

ɖó nyɛ wɛ nyí Mawu, mɛ ɖěvo ɖě sɔ́ ɖe ǎ.

23 Un xwlé nyiɖée;

xó élɔ́ e tɔ́n sín nu ce mɛ é nyí nǔgbó,

é ná lɛ́ kɔ ǎ:

koli lɛ́ bǐ ná yi do nú mì,

ɖɛ̌ lɛ́ bǐ ná xwlé ɖɔ émí ná nɔ gbejí nú mì,

24 bo ná ɖɔ: ‘Nǔgbó ɔ, Jexóva gɔ́n wɛ nǔjlɔ́jlɔ́wiwa adodwé ɔ kpó hlɔ̌nhlɔ́n kpó ɖe.

25 Kpó alɔdó Jexóva tɔn kpó ɔ, kúnkan* Izlayɛ́li tɔn bǐ sín hwɛ ná jɔ,

bɔ yě ná gó ɖó éyɛ́ wú.’ ”

È dó bǒcyɔ yětɔn lɛ́ sín agban nú kanlin lɛ́, è dó nú kanlin e nɔ hɛn agban lɛ́ é,

yě cí agban e ɖo kanlin e nǔ ci kɔ ná lɛ́ é kpɛn wɛ é ɖɔhun.

 2 Yě mɛ we lɛ́ jɛ tɔ́tɔ́ bo fɛ yi do;

yě sixú hwlɛ́n agban lɛ́* ǎ,

bɔ yěɖésúnɔ lɛ́ yi kannumɔgbénu.

 3 “Kúnkan Jakɔ́bu tɔn è, ɖǒtó mì, hwi kpó mɛ e kpo ɖo togun Izlayɛ́li tɔn mɛ lɛ́ é bǐ kpó,

mi mɛ e un d’alɔ sín jiji hwenu bo hɛn sín adɔgo mɛ lɛ́ é.

 4 Káká jɛ hwenu e mi ná kpo é ɔ, mɛ ɖokpó ɔ jɛ́n un ná nyí;

káká jɛ hwenu e ɖa mitɔn lɛ́ ná wé é ɔ, un ná kpo ɖo mi hɛn wɛ.

 5 Mɛ̌ ɖɔhun mi ka ná ɖɔ un cí? Mɛ̌ mi ka ná ɖɔ nyi kpó é kpó ɖo zɛ̌nzɛ̌n? Mɛ̌ wú mi ka ná sɔ́ mì jlɛ́ dó,

bónú mǐ ní dó sixú ɖi mǐɖée lɛ́?

 6 Mɛɖé lɛ́ tíin bo nɔ bɛ́ siká gěgé sín akwɛ́kpo yětɔn mɛ;

yě nɔ da kpatágan ɖo nǔdagan jí.

 7 Yě nɔ sɔ́ ɖó abɔ̌ yětɔn lɛ́ ta;

yě nɔ hɛn bo nɔ sɔ́ yi ɖó tɛn tɔn mɛ, bɔ é nɔ cí fínɛ́.

Yě nɔ sú xó ylɔ́ ɛ, amɔ̌, é nɔ kɛ nu ǎ;

é sixú hwlɛ́n mɛ ɖěbǔ sín wǔvɛ́ mɛ ǎ.

 9 Mi flín nǔ xóxó* hwenu línlín ɖíe tɔn lɛ́,

mi flín ɖɔ nyɛ wɛ nyí Mawu bɔ ɖěvo ɖě sɔ́ ɖe ǎ.

10 Un ɖɔ nǔ e ná wá jɛ é sín bǐbɛ́mɛ,

bo ɖɔ nǔ e ma ko jɛ ǎ lɛ́ é sín hwenu línlín ɖíe.

Un ɖɔ: ‘Gbeta* ce ná ɖyɔ́ ǎ,

un ná wa nǔ ɖěbǔ e nyɔ́ nukún ce mɛ é.’

11 Un ɖo nǔwlíxɛ ɖé ylɔ́ sín hwetɔ́nhwe jí* wɛ,

bo ɖo mɛɖé ylɔ́ sín to línlín ɖé mɛ wɛ, bónú é ná wa nǔ sɔgbe xá gbeta* ce.

12 Mi ɖótó mì, mi mɛ e sín ayi syɛ́n* lɛ́ é,

mi mɛ e lín dó nǔjlɔ́jlɔ́wiwa tawun lɛ́ é.

13 Un ko bló bɔ nǔjlɔ́jlɔ́wiwa ce sɛkpɔ́;

é ɖo fí línlín ǎ,

hwlɛngán ce ná gbɔ hwenu ǎ.

47 Ðyɔ̌vǐ ɖo alɔjí Babilɔ́nu tɔn è,

jɛ te, bo wá jínjɔ́n kɔ́gúdu mɛ.

Ðyɔ̌vǐ Kaludéenu lɛ́ tɔn è,

jǐnjɔ́n kɔ́mɛ fí e axɔ́súzinkpo ɖě ma ɖe ǎ é,

ɖó gbɛtɔ́ lɛ́ sɔ́ ná ylɔ́ we ɖɔ mɛjɔmɛ alǒ mɛ e è bóɖó é kpɔ́n gbeɖé ǎ.

 4 “Mɛ e ɖo mǐ vɔ́ xɔ wɛ é ɔ,

Jexóva ahwankpá lɛ́ tɔn wɛ nyǐkɔ tɔn nɔ nyí.

É wɛ nyí Mɛ mímɛ́ Izlayɛ́li tɔn.”

 5 Ðyɔ̌vǐ Kaludéenu lɛ́ tɔn è,

jǐnjɔ́n fínɛ́ xwíí, bo byɔ́ ablu mɛ;

è sɔ́ ná ylɔ́ we ɖɔ axɔ́súɖuto lɛ́ sín Gǎn nyɔ̌nu* ɖě ǎ.

Un hɛn gǔ ce blí,

bo bɛ́ yě dó alɔ towe mɛ.

A hɛn nǔ énɛ́ lɛ́ dó ayi mɛ ǎ;

a lin tamɛ dó lěe xó ɔ ná fó gbɔn é jí ǎ.

 8 Din ɔ, ɖǒtó xó élɔ́, hwi mɛ e yí wǎn nú gbɛɖuɖu é,

a jínjɔ́n ayǐ ɖo ayijayǐ mɛ, bo nɔ ɖɔ dó ayi mɛ ɖɔ:

Nǔ énɛ́ lɛ́ bǐ ná gbo we,

ɖó azě towe tobutóbú lɛ́ kpó majíki towe hlɔ̌nhlɔ́nnɔ lɛ́ kpó wútu.

Nǔnywɛ́ towe kpó nǔtuuntuun towe kpó wɛ zɔ́n bɔ a zɛ gbě,

bɔ a nɔ ɖɔ dó ayi mɛ ɖɔ: “Nyi wɛ ɖo mɔ̌ nyí wɛ, mɛ ɖěvo ɖěbǔ sɔ́ ɖe ǎ.”

11 Amɔ̌, awě ná xo we,

bɔ tílá towe lɛ́ ɖě ná ɖó te ǎ.*

12 Énɛ́ wú ɔ, kpo ɖo majíki towe lɛ́ kpó azě towe tobutóbú lɛ́ kpó wú,

lěe a ko ɖó kan d’é wú gbɔn sín wǐnnyáwínnyá mɛ towe é.

Bóyá a sixú ɖu le tɔn;

bóyá a sixú bló bɔ xɛsi jɛ gbɛtɔ́ lɛ́ jí.

Mɛ ɖěɖěe nɔ sɛn jǐnukúnsin,* bo nɔ kpɔ́n sunví lɛ́ tlítlí lɛ́ é,

yě mɛ ɖěɖěe sun yɔ̌yɔ́ tɔ́n ɔ,

yě nɔ ɖɔ nǔ e ná wá jɛ dó jǐ we lɛ́ é

ní bo sí te din lobo hwlɛ́n we gán.

Myɔ énɛ́ lɛ́ cí myɔkán e è nɔ zán dó glɔ́n yǒzo ná é ɖɔhun ǎ,

yě cí myɔ e nukɔn è nɔ jínjɔ́n é ɖɔhun ǎ.

15 Nǔ e nǔnyíylɔ́númɛtɔ́ towe lɛ́ ná húzú nú we é nɛ́,

yě mɛ e kpó hwi kpó wa azɔ̌ syɛ́nsyɛ́n sín wǐnnyáwínnyá mɛ towe lɛ́ é.

48 Kúnkan Jakɔ́bu tɔn è,

mi mɛ e nɔ sɔ́ nyǐkɔ Izlayɛ́li tɔn dó ylɔ́ miɖée,

bo gosín sin Judáa tɔn mɛ lɛ́ é,*

mi mɛ e nɔ xwlé nǔ gbɔn nyǐkɔ Jexóva tɔn gblamɛ,

bo nɔ xomlá Mawu Izlayɛ́li tɔn,

bɔ é ma ka nyí kpó nǔgbó kpó, kpódó nǔjlɔ́jlɔ́wiwa kpán ǎ lɛ́ é mi, mi ɖótó xó élɔ́.

 2 Ðó yě nɔ ylɔ́ yěɖée lɛ́ ɖɔ toxo mímɛ́ ɔ mɛ nu lɛ́,

bo nɔ ba alɔdó Mawu Izlayɛ́li tɔn,

éé sín nyǐkɔ nɔ nyí Jexóva ahwankpá lɛ́ tɔn é tɔn.

yě tɔ́n sín nu nyiɖésúnɔ tɔn mɛ,

bɔ un bló bɔ è tuun yě.

 4 Ðó un tuun lě do a nɔ syɛ́n ta sɔ é,

un tuun ɖɔ kɔxú towe cí gan ɖɔhun, bɔ nukɔn towe cí ganvɔ ɖɔhun.

 5 Un ko ɖɔ nú we sín hwenu línlín ɖíe.

Cóbónú é ná jɛ ɔ, un ko bló bɔ a se,

bónú a ní ma wá ɖɔ xó élɔ́ ó: ‘Bǒcyɔ ce wɛ bló nǔ élɔ́;

bǒcyɔ kpikpa ce kpó ganbócyɔ ce* kpó wɛ ɖe gbe élɔ́.’

Bɛ́ sín din ɔ, un ɖo nǔ yɔ̌yɔ́ lɛ́ ɖɔ nú we wɛ,

nǔbúdo ɖěɖěe è hwlá bɔ a ma tuun ǎ lɛ́ é wɛ.

 7 È jɛ yě dá jí din é ɔ, é ko lín ǎ, din jɛ́n è ɖo yě dá wɛ,

nǔɖé lɛ́ wɛ bɔ káká jɛ égbé ɔ, a ko se kpɔ́n gbeɖé ǎ,

bónú a ní ma wá ɖɔ: ‘Éɖíe! Un ko tuun yě’ ó.

 8 Éǒ, a ko se ǎ, a ko tuun ǎ,

è ko hun tó towe lɛ́ ɖ’ayǐ ǎ.

Ðó un tuun ɖɔ gbejímanɔtɔ́ ɖaxó wɛ nú we,

bɔ sín hwenu e è ji we é wɛ è ylɔ́ we ɖɔ sɛ́ngbatɔ́.

 9 Amɔ̌, ɖó nyǐkɔ ce wú ɔ, un ná ɖu ɖo xomɛsin ce jí;

ɖó susu nyiɖésúnɔ tɔn wú ɔ, un ná ɖu ɖo nyiɖée jí,

bo ná sú kún dó nú we ǎ.

11 Ðó nyiɖésúnɔ wútu, ɛɛn, ɖó nyiɖésúnɔ wútu ɔ, un ná wa nǔ.

Ðó nɛ̌ un ka ná yí gbe bɔ è ná hɛn mì blí gbɔn?

13 Alɔ ce ɖésúnɔ wɛ ɖó dodónu ayǐkúngban ɔ tɔn ayǐ,

bɔ ɖisílɔ ce vlɔ́n jǐnukúnsin.

É ná wa nǔ e nɔ jló è é dó Babilɔ́nu wú,

bɔ awa tɔn ná jɛ Kaludéenu lɛ́ wú.

“Nyɛ Jexóva ɔ, nyɛ wɛ nyí Mawu towe,

Nyi wɛ ɖo nǔ kplɔ́n we wɛ nú le hwiɖésúnɔ tɔn,*

Nyi wɛ ɖo ali xlɛ́ we wɛ ɖo ali e a ɖó ná gbɔn é jí.

fífá towe ná cí tɔsisa ɖɔhun,

bɔ nǔjlɔ́jlɔ́wiwa towe ná cí aslɔkɛ́ xu tɔn lɛ́ ɖɔhun.

19 Kúnkan* towe ná sukpɔ́ kɔ́gúdu ɖɔhun,

bɔ vǐ towe lɛ́ ná sukpɔ́ nyɛ̌kɛ́n ɖɔhun.

É bló bɔ sin sa sín só mɛ nú yě;

é zɛ só, bo bló bɔ sin gba wu sín mɛ.”

49 Tɔtɛ́ntinto lɛ́ mi, mi ɖótó mì,

akɔta e ɖo zɔga lɛ́ é mi, mi tɛ́ tó.

 2 É bló bɔ nu ce cí hwǐ ɖíɖá ɖɔhun;

é hwlá mì dó alɔ tɔn sín yɛtɛn.

É sɔ́ mì dó bló gǎ nu xwíɖíxwíɖí;

é sɔ́ mì hwlá dó gǎgo* tɔn mɛ.

 3 É ɖɔ nú mì ɖɔ: “Mɛsɛntɔ́ ce wɛ a nyí, Izlayɛ́li è,

hwi mɛ e gblamɛ un ná ɖe susu ce xlɛ́ gbɔn é.”