Nola izan daiteke zoriontsu zure familia?

1. Zergatik da ezinbestekoa legezko ezkontza familiaren zoriontasunerako?

Berri onak Jehoba, Jainko zoriontsuaren eskutik datoz. Beraz, familiak zoriontsu izatea nahi du (1 Timoteori 1:11). Berak sortu zuen ezkontza. Familiaren zoriontasunerako legezko ezkontza funtsezkoa da, haurrak hazteko giro segurua ematen baitu. Kristauek ezkontza erregistroari buruzko tokiko legedia errespetatu behar lukete.​—Irakurri Lukas 2:1, 4, 5.

Zer deritzo Jainkoak ezkontzari buruz? Gizonezko eta emakumezkoaren arteko harreman iraunkorra izatea nahi du. Jehobak senar-emazteak elkarri leialak izatea nahi du (Hebrearrei 13:4). Dibortzioari gorroto dio (Malakias 2:16). Beraz, ez die kristauei dibortziatu eta berriro ezkontzen uzten «lizunkeriagatik izan ezik» (Mateo 19:9, NM).​—Irakurri Mateo 19:3-6.

2. Zein tratu eman behar diote elkarri senar-emazteak?

Jehobak gizon eta emakumeak, ezkonlagun bezala, elkarren osagarri izateko sortu zituen (Hasiera 2:18). Familia-buru izanda, senarrak aurre hartu behar luke familiaren behar fisikoak asetzen, baita Jainkoari buruz irakasten ere. Bere buruari uko egin behar lioke bere emazteari dion maitasunarengatik. Senar-emazteek elkar maitatu eta errespetatu behar lukete. Perfektuak ez direnez, barkatzen ikastea da ezkontideen zorionerako gakoa.​—Irakurri Efesoarrei 4:31, 32; 5:22-25, 33; 1 Pedro 3:7.

3. Bertan behera utzi behar al zenuke zoriontsua ez den ezkontza?

Zuen ezkontzan zailtasunak badituzue, biok elkarri maitasuna azaltzeko ahaleginak egin behar dituzue (1 Korintoarrei 13:4, 5). Jainkoaren Hitzak ez du senar-emazteak banantzea gomendatzen ezkontzetan arruntak diren arazoen konponbide gisa.​—Irakurri 1 Korintoarrei 7:10-13.

4. Seme-alabak, zer nahi du Jainkoak zuentzako?

Jehobak zu zoriontsu izatea nahi du. Gaztaroaz gozatzeko aholkurik onenak ematen dizkizu. Zure gurasoen jakinduria eta esperientziari onura ateratzea nahi du (Kolosarrei 3:20). Zure Sortzailea eta bere Semearen alde gauzak egiteaz gozatzea ere nahi du Jehobak.​—Irakurri Kohelet 11:9–12:1; Mateo 19:13-15; 21:15, 16.

5. Gurasoak, nola izan daitezke zoriontsu zuen seme-alabak?

Gogor lan egin behar duzue zuen seme-alabei janaria, etxebizitza eta jantziak emateko (1 Timoteori 5:8). Baina, zuen seme-alabak zoriontsu izan daitezen, Jainkoa maitatu eta ezagut dezaten irakatsi behar diezue (Efesoarrei 6:4). Zuek Jainkoari diozuen maitasunaren ereduak beraien bihotzean eragin sakona izan dezake. Zuen irakaspenak Jainkoaren Hitzean oinarriturik badaude, zuen seme-alaben pentsaera onerako molda dezakete.​—Irakurri Deuteronomioa 6:4-7; Esaera Zaharrak 22:6.

Zuek seme-alabei adore emateak eta goraipatzeak mesede egingo die. Zuzenketa eta diziplina ere behar dituzte. Prestakuntza honek zoriontasuna lapurtu ahal dieten jokabideetatik babesten ditu (Esaera Zaharrak 22:15). Hala ere, diziplina ez da inoiz gogorregia edo krudela izan behar.​—Irakurri Kolosarrei 3:21.

Jehobaren lekukoek guraso eta seme-alabei laguntzeko bereziki idatzitako hainbat liburu argitaratu dituzte. Liburu hauek Biblian oinarritzen dira.​—Irakurri 19. Salmoa 8, 12 [19:7, 11, NW].