በጸሎት አማካኝነት ወደ አምላክ ቅረብ

ሕይወትህን እንዴት መምራት እንዳለብህ የሚነግርህ አካል እንደሚያስፈልግህ ተሰምቶህ ያውቃል? መልስ ያላገኘህላቸው አንገብጋቢ ጥያቄዎች አሉህ? ማጽናኛና ማበረታቻ ያስፈልግሃል? ወደ ይሖዋ ይበልጥ መቅረብ ትፈልጋለህ? ጸሎት እነዚህን ሁሉ ፍላጎቶችህን ለማሟላት ሊረዳህ ይችላል። ሆኖም መጸለይ ያለብን እንዴት ነው? አምላክ ለሁሉም ጸሎቶች መልስ ይሰጣል? አንተ የምታቀርበው ጸሎት በአምላክ ዘንድ ተሰሚነት እንዲያገኝ ምን ማድረግ ይኖርብሃል? በዚህ ምዕራፍ ውስጥ የእነዚህን ጥያቄዎች መልስ እንመለከታለን።

1. መጸለይ ያለብን ወደ ማን ነው? ስለ ምን ነገሮችስ ልንጸልይ እንችላለን?

ኢየሱስ መጸለይ ያለብን በሰማይ ወዳለው አባታችን ብቻ እንደሆነ አስተምሯል። እሱ ራሱም ወደ ይሖዋ ጸልዮአል። እንዲህ ብሏል፦ “እናንተ በዚህ መንገድ ጸልዩ፦ ‘በሰማያት የምትኖር አባታችን ሆይ . . .’” (ማቴዎስ 6:9) ወደ ይሖዋ ስንጸልይ ከእሱ ጋር ያለን ወዳጅነት ይጠናከራል።

ስለፈለግነው ነገር ወደ አምላክ ልንጸልይ እንችላለን። እርግጥ ነው፣ አምላክ ለጸሎታችን መልስ እንዲሰጠን ከፈለግን የምንጠይቀው ነገር ከፈቃዱ ጋር የሚስማማ መሆን አለበት። “የምንጠይቀው ነገር ምንም ይሁን ምን [ከአምላክ ፈቃድ] ጋር በሚስማማ ሁኔታ እስከለመንን ድረስ ይሰማናል።” (1 ዮሐንስ 5:14) ኢየሱስ በጸሎታችን ላይ ልናካትታቸው የሚገቡ ነገሮችን የሚያሳይ ናሙና ሰጥቶናል። (ማቴዎስ 6:9-13⁠ን አንብብ።) በግል ስላሳሰቡን ነገሮች ከመጸለይ በተጨማሪ ላደረገልን ነገሮች አምላክን ማመስገናችንን መርሳት የለብንም፤ አምላክ ሌሎች ሰዎችን እንዲረዳቸውም መጸለይ ይኖርብናል።

2. መጸለይ ያለብን እንዴት ነው?

መጽሐፍ ቅዱስ ‘ልባችንን በአምላክ ፊት እንድናፈስ’ ያበረታታናል። (መዝሙር 62:8) ስለዚህ ጸሎታችን ከልብ የመነጨ መሆን አለበት። ድምፃችንን አውጥተንም ሆነ በልባችን እንዲሁም በየትኛውም ሰዓትና ቦታ ወደ አምላክ መጸለይ እንችላለን። አምላክ ወደ እሱ ስንጸልይ መቆም፣ መቀመጥ ወይም መንበርከክ እንዳለብን አልተናገረም። ዋናው ነገር ለእሱ አክብሮት እንዳለን በሚያሳይ መንገድ መጸለያችን ነው።

3. አምላክ ለጸሎታችን መልስ የሚሰጠው እንዴት ነው?

በተለያዩ መንገዶች መልስ ሊሰጠን ይችላል። ይሖዋ ቃሉን መጽሐፍ ቅዱስን የሰጠን ሲሆን በመጽሐፍ ቅዱስ ውስጥ ለበርካታ ጥያቄዎቻችን መልስ እናገኛለን። የአምላክን ቃል ማንበብ “ተሞክሮ የሌለውን ጥበበኛ ያደርጋል።” (መዝሙር 19:7፤ ያዕቆብ 1:5⁠ን አንብብ።) አምላክ የሚያስጨንቁ ሁኔታዎች ሲያጋጥሙን ውስጣዊ ሰላም ይሰጠናል። እንዲሁም እርዳታ በሚያስፈልገን ጊዜ አገልጋዮቹን ተጠቅሞ ይደግፈናል።

ማጠቃለያ

ከልብ በመነጨ ስሜት መጸለያችን ወደ አምላክ ይበልጥ እንድንቀርብ፣ ውስጣዊ ሰላም እንዲኖረንና ይሖዋን ለማስደሰት የሚያስፈልገንን ብርታት እንድናገኝ ይረዳናል።

ክለሳ

• መጸለይ ያለብን ወደ ማን ነው?

• መጸለይ ያለብን እንዴት ነው?

• ጸሎት ከሚያስገኝልን ጥቅሞች መካከል አንዳንዶቹ የትኞቹ ናቸው?

ምርምር አድርግ

መጸለይ ያለብህ ለምን እንደሆነና የጸሎትህን ይዘት ማሻሻል የምትችለው እንዴት እንደሆነ አንብብ።

“መጸለይ ጥቅም አለው?” (ድረ ገጻችን ላይ የወጣ ርዕስ)

መጽሐፍ ቅዱስ የሚያስተምረው ወደ ማን እንድንጸልይ ነው?

“ወደ ቅዱሳን መጸለይ ይገባኛል?” (ድረ ገጻችን ላይ የወጣ ርዕስ)

የምንጸልይበት ቦታና ጊዜ ለውጥ ያመጣል? መልሱን ከዚህ የሙዚቃ ቪዲዮ ላይ ተመልከት።

ሁልጊዜ ጸልይ (1:22)