Ndi Isọn̄ Ọmọn̄ Ebe Efep?
Didie ke ọkpọbọrọ mme mbụme emi?
N̄kpọ editie didie ke isọn̄ ke ini iso?
(a) ndi n̄kpọ ọyọfọn akan emi?
(b) ndi edisụk etie ntem?
(c) ndi edikam ọdọdiọk akan emi?
NDI emesikere ke n̄kpọ ọyọfọn ke ini iso? Ndinyene utọ ekikere emi enyene ekese ufọn. Ndụn̄ọde oro ẹnamde ẹwụt ke mbon oro ẹsikerede n̄kpọ ntem ẹsinen̄ede ẹfiọk n̄wed ẹnyụn̄ ẹkop nsọn̄idem. Ndụn̄ọde kiet owụt ke mbon oro ẹkekerede ke ini iso ọyọfọn ikenyeneke udọn̄ọ esịt nte mbon oro ẹkekerede ke ini iso idifọnke. Ndụn̄ọde emi ekekem ye se Bible eketịn̄de ata ediwak isua emi ẹkebede ete: “Idatesịt ọfọn owo ke idem: edi esịt mfụhọ an̄wan owo ọkpọ.”—Mme N̄ke 17:22.
Nte ededi, se ntaifiọk ẹtịn̄de ẹban̄a nte isọn̄ editiede ke ini iso ananam mme owo ndịk, inyụn̄ iyakke mmọ ẹkere ke n̄kpọ ọyọfọn. Kere ban̄a ndusụk enyene-ndịk n̄kpọ oro ẹdọhọde ke ẹyetịbe ke ini iso.
Isọn̄ Odụk Afanikọn̄
Ke 2002, Itieutom Oro Esede Aban̄a N̄kann̄kụk ọkọdọhọ ke edieke ẹkade iso ẹnam n̄kpọ ke isọn̄ nte ẹsụk ẹnamde idahaemi, ke emi ekeme “ndibiat isọn̄ ofụri ofụri.” Itieutom oro ọkọdọhọ n̄ko ete ke udomo unana oro esịmde isọn̄, ye nte ẹkade iso ẹtụk utụk, ẹnyụn̄ ẹbiatde isọn̄ ẹkeme ndinam “nsio nsio afanikọn̄ esịm isọn̄.”
Ke 2005, Esop Edidiana Mme Idụt ama anam mme owo ẹfiọk ndụn̄ọde isua inan̄ oro ẹkenamde ẹban̄a isọn̄. Ntaifiọk 1,360 emi ẹtode idụt 95 ẹkenam ndụn̄ọde emi. Mmọ ẹketọt ẹte: “Edieke owo mînamke n̄kpọ iban̄a nte mme owo ẹnamde n̄kpọ ke isọn̄ idahaemi, ekeme ndidi uwem ididụhe aba ke isọn̄ emi ke ini iso.” Ntaifiọk emi ẹka iso ẹte ke se idisiode isọn̄ ke afanikọn̄ emi edi “ndikpụhọde nte ẹnamde n̄kpọ idahaemi.”
Anna Tibaijuka emi esede n̄kpọ aban̄a United Nations Human Settlements Programme etịn̄ se ediwak ntaifiọk ẹnịmde ke akpanikọ. Enye ọdọhọ ete: “Enyene-ndịk n̄kpọ eyetịbe ke ini iso edieke nnyịn mîkpụhọkede nte inamde n̄kpọ idahaemi.”
Ntak Ikerede ke N̄kpọ Ọyọfọn
Mme Ntiense Jehovah oro ẹsiode magazine emi ẹnịm n̄ko ke n̄kpọ eyetịbe oro edinen̄erede okpụhọde isọn̄ emi ke mîbịghike. Nte ededi, mmọ ẹfiọk ke se iditịbede idisịnke isọn̄ ke afanikọn̄, edi ke edikam ananam isọn̄ emi ọfọn akan nte enye etiede idahaemi. Ntak mmọ ẹkerede ntre? Koro mmọ ẹnịm se Ikọ Abasi, kpa Bible, ọn̄wọn̄ọde. Kiet ke otu un̄wọn̄ọ emi odu ke Psalm 37:10, 11. Enye ọdọhọ ke “osụk esisịt idiọk owo ididụhe: ndien ke afo etịn̄de enyịn ke ebiet esie, enye ididụhe. Edi mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.”
Ndi utọ un̄wọn̄ọ emi edi ikpîkpu ndap? Mbemiso ọbọrọde mbụme emi, mbọk kere ban̄a emi ise: Ediwak isua ko ke edem, Bible ama etịn̄ nnennen nnennen aban̄a ediwak ikpọ mfịna oro ẹnọmọde isọn̄ ye ubonowo mfịn. Mbọk kot mme itie N̄wed Abasi oro ẹsiakde ẹsịn ke ibuotikọ oro etienede, nyụn̄ men mmọ domo ye se itịbede mfịn. Edieke anamde oro, afo oyokụt ke Bible ekeme nditịn̄ nnennen nnennen se iditịbede ke ini iso.