Idu Uwem Idahaemi ke Ndiọkeyo

BIBLE ama ọdọdọhọ ke “ndiọkeyo” oyodu “ke mme akpatre usen.” (2 Timothy 3:1-5; 2 Peter 3:3-7) Jesus Christ ama etịn̄ n̄ko aban̄a ini emi ke ini enye ọkọbọrọde mbụme oro mme mbet esie ẹkebụpde ẹban̄a “utịt editịm n̄kpọ emi.” (Matthew 24:3) Ndi nnyịn idu uwem idahaemi ke mme akpatre usen? Men se Bible ekebemde etịn̄ domo ye se ẹtịn̄de ke idak emi, nyụn̄ da oro biere m̀mê idu uwem ke mme akpatre usen.

Se Bible ekebemde iso etịn̄: ekọn̄ ke kpukpru ebiet—Luke 21:10; Ediyarade 6:4.

Mbụk n̄kpọntịbe ndondo emi ọdọhọ ete: “Mbon oro ẹkpan̄ade ke ekọn̄ oro ẹn̄wanade ke ọyọhọ isua ikie 20 ẹwak utịm ikata ẹkan ofụri ibat mbon oro ẹkekpan̄ade ke ekọn̄ toto ke emana Christ.”—Worldwatch Institute.

Se Bible ekebemde iso etịn̄: akan̄ ye udọn̄ọ—Luke 21:11; Ediyarade 6:5–8.

Mbụk n̄kpọntịbe ndondo emi ọdọhọ ete: Ẹdọhọ ke ibat mbon oro mîkenyeneke eti udia idia ke 2004 ẹkedi miliọn 863, ndien emi enen̄ede awak akan eke 2003 emi ekedide owo miliọn 856.—United Nations Food and Agriculture Organization.

N̄kpọ nte biliọn owo kiet ẹdụn̄ọ ke ebiet oro etiede nte ifụm; se iwakde ibe biliọn iba ye ubak inyeneke ekwe ye ebiet uduọn̄ọ mbio; se iwakde ibe biliọn kiet inyeneke eti mmọn̄.—Worldwatch Institute.

Ke 2005, owo miliọn 500 ẹkedọn̄ọ utoenyịn; miliọn 40 ẹnyene HIV-AIDS; akpaikpai ikọn̄ owot se ibede owo miliọn kiet ye ubak.—Esop Kaban̄a Nsọn̄idem Ererimbot.

Se Bible ekebemde iso etịn̄: edisobo isọn̄—Ediyarade 11:18.

Mbụk n̄kpọntịbe ndondo emi ọdọhọ ete: “Se mme owo ẹnamde ke isọn̄ ekeme ndisobo ata ediwak orụk unam ye mme eto.” “N̄kpọ-obot ikemeke aba ndinen̄ede nnam ata ekese n̄kpọ oro enye ekesinamde man uwem odu ke isọn̄.”—Millennium Ecosystem Assessment.

“Nte mme owo ẹsabarede ofụm anam isọn̄ emi enen̄ede ofiop, ndien emi ekeme ndibiat isọn̄.”—NASA, Goddard Institute for Space Studies.

Se Bible ekebemde iso etịn̄: ẹyekwọrọ eti mbụk Obio Ubọn̄ Abasi ke ofụri isọn̄—Matthew 24:14; Ediyarade 14:6, 7.

Mbụk n̄kpọntịbe ndondo emi ọdọhọ ete: Ke 2007, Mme Ntiense Jehovah oro ẹkewakde ẹsịm 6,957,854 ẹma ẹbiat n̄kpọ nte biliọn hour kiet ye ubak ẹkwọrọ eti mbụk Obio Ubọn̄ Abasi ke idụt 236.—2008 Yearbook of Jehovah’s Witnesses.

Nte ima ikebebem iso itịn̄, Bible ama ọdọhọ ke okposụkedi n̄kpọ ọdiọkde ntem, ke ini iso ọyọfọn. Jesus ama etịn̄ aban̄a “eti mbụk” Obio Ubọn̄ Abasi. Nso idi Obio Ubọn̄ Abasi? Didie ke enye ọnọ ubonowo idotenyịn ke ini iso ọyọfọn? Ndien nso ke enye edinam ọnọ fi?

[Se ẹwetde ke ikpọ abisi ke page 5]

Bible ama etetịn̄ ke ererimbot editie ntem