Da Mme N̄kpọ Oro Ẹdude ke N̄wed Bible Ekpep Kwọrọ Ikọ Ọfọn

Ke ini eyen ukpepn̄kpọ Bible ekpepde Bible onyụn̄ adade se enye ekpepde odu uwem, enye ayanam n̄kọri onyụn̄ ọsọn̄ọ ada anam se Abasi oyomde. (Ps. 1:1-3) Man eyen ukpepn̄kpọ nnyịn anam kpukpru emi, imekeme ndida mme n̄kpọ oro ẹdude ke n̄wed Bible Ekpep n̄n̄wam enye.

Mme Mbụme Oro Ẹdude ke Ntọn̄ọ Ibuot Kiet Kiet: Ẹwet mme mbụme oro ẹdibọrọde ke ibuotikọ kiet kiet ke ntọn̄ọ ntọn̄ọ ibuotikọ oro. Emekeme ndibụp eyen ukpepn̄kpọ fo mme mbụme emi edi unọhọ ibọrọ kan̄a man enen̄ede ọdọn̄ enye ndikpep n̄kpọ oro. Mîdịghe emekeme ndidọhọ enye ọnọ mbio mbio ibọrọ ke mme mbụme oro. Edieke ibọrọ oro enye ọnọde mînenke, kûnen̄ede enye kan̄a. Ibọrọ oro ayan̄wam fi ọdiọn̄ọ mme akpan n̄kpọ oro edinamde an̄wan̄a enye.—N̄ke 16:23; 18:13.

Se Ẹwetde Ẹdian: Edieke se afo ekpepde eyen ukpepn̄kpọ an̄wan̄ade enye, enye onyụn̄ enịm se ekpepde oro, emekeme ndidọhọ enye okot se ẹwetde ẹdian ke idemesie. Ke ini ukpepn̄kpọ en̄wen, emekeme ndida minit ifan̄ nse m̀mê se enye okokotde an̄wan̄a enye. Edi edieke mîn̄wan̄ake, da ini dụn̄ọde se ẹwetde ẹdian ye enye, mîdịghe neme n̄kpọ ifan̄ do ye enye. Kot mme ikpehe oro nyụn̄ bụp enye mme mbụme oro afo eketịmde.

Ekebe Ndụn̄ọde: Ekebe ndụn̄ọde oro odude ke utịt ibuot kiet kiet ọdọn̄ọ ibọrọ mbụme oro ẹbụpde ke ntọn̄ọ ntọn̄ọ ibuotikọ oro. Ekebe emi ayan̄wam fi ọdiọn̄ọ m̀mê se afo ekpepde an̄wan̄a eyen ukpepn̄kpọ, m̀mê enye onyụn̄ ekeme nditịn̄ n̄kpọ emi ke ikọ idemesie. Kot mme udịmikọ kiet kiet ke ekebe oro ye mme itien̄wed oro ẹwetde ẹdian. Ekem dọhọ eyen ukpepn̄kpọ ada mme itien̄wed oro anam se ẹtịn̄de do an̄wan̄a.—Utom 17:2, 3.