Kpep N̄kpọ To Mme Asuanetop Oro Ẹnen̄erede Ẹdiọn̄ọ Ndikwọrọ Ikọ
Esịt enem nnyịn ndinyene mme asuanetop oro ẹnen̄erede ẹdiọn̄ọ ndikwọrọ ikọ. Ndusụk mmọ ẹnam n̄kpọ Jehovah ke ata ediwak isua. Edi ekeme ndidi ndondo emi ke mbon eken ẹkpep nti usụn̄ oro ẹkpekwọrọde ikọ. Kpukpru mme asuanetop emi ẹkụt nte Jesus adade esop Abasi usụn̄ ke utịt ini emi ke ndinam ẹkwọrọ ikọ ẹsịm nsio nsio itie ẹnyụn̄ ẹkpep ata ediwak owo Bible. (Matt. 28:19, 20) Ke ini mmọ ẹkwọrọde ikọ, Abasi esinọ mmọ “odudu eke ebede ukeme owo,” emi esin̄wamde mmọ ke ini nsọn̄ọn̄kpọ ye ke ini idomo. (2 Cor. 4:7) Imenyene ediwak n̄kpọ ndikpep nto mme asuanetop emi ẹnen̄erede ẹdiọn̄ọ ndikwọrọ ikọ. Esinenem mmọ ndida ifet ekededi oro mmọ ẹnyenede n̄kpep mme owo se mmọ ẹkekpepde. (Ps. 71:18) Ntem ọfọn iyom usụn̄ ikpep n̄kpọ ito mmọ. Didie ke ikpanam emi?
Ke Ini Isan̄ade ye Mmọ Ikwọrọ Ikọ: Oyom ẹnọ mbufa mme asuanetop ukpep man mmo ẹkeme ndisikwọrọ ikọ ọfọn. Mmọ ẹkeme ndikpep ediwak n̄kpọ edieke mmọ ẹsisede nte mbon emi ẹnamde utom emi ẹbighi ẹsikwọrọde ikọ ẹnyụn̄ ẹkpepde mme owo n̄kpọ. (Se ọyọhọ ikpehe ekikere ita ke ekpri ibuotikọ emi “N̄wam Mbufa Owo,” oro odude ke ibuotikọ emi “Ka Iso Sịn Ifịk Kwọrọ Ikọ,” ke Enyọn̄-Ukpeme eke February 15, 2015.) Nso ke afo ekekpep oto asuanetop emi enen̄erede ọdiọn̄ọ ndikwọrọ ikọ, ke ini akasan̄ade ye enye ọkwọrọ ikọ?
Ndi emekeme ndidọhọ asuanetop oro enen̄erede ọdiọn̄ọ ndikwọrọ ikọ ke ikpama ndisan̄a ye enye n̄ka ukwọrọikọ? Edieke idem mîyakke enye ọwọrọ ke ufọk, emekeme ndida eyen ukpepn̄kpọ fo n̄ka ufọk esie ndusụk ini man etie ye enye ẹkpep eyen ukpepn̄kpọ oro n̄kpọ. Ke ini okụrede ukpepn̄kpọ oro, bụp enye m̀mê amanam ọfọn.
Yom Ini Kese Mmọ: Sio ini sitie ye mmọ neme nneme man enen̄ede emehe ye mmọ. Dọhọ owo mmọ kiet edidụk utuakibuot ubon mbufo, nyụn̄ da ini oro bụp enye n̄kpọ. Ndi emekeme ndika ufọk esie n̄kenịm utuakibuot ubon mbufo edieke idem mîyakke enye ọwọrọ ke ufọk? Bụp enye nte enye akasan̄ade ọdiọn̄ọ akpanikọ. Nso ufọn ke ndidiọn̄ọ akpanikọ anam ọnọ enye? Nti n̄kpọ ewe ke enye okụt nte etịbede ke esop tọn̄ọ enye okodụk esop? Nso isinam enye okop inemesịt anam n̄kpọ Jehovah?
Diọn̄ọ ke idịghe kpukpru n̄kpọ ke mme asuanetop oro ẹnen̄erede ẹdiọn̄ọ ndikwọrọ ikọ ẹkeme ndinam. Kpukpru nnyịn inyene nsio nsio enọ, ukem ntre ke onyụn̄ edi ye mmọ. (Rome 12:6-8) Ndusụk mmọ ẹkpon owo, ntre emi ekeme ndinam mmọ ẹkûsukeme ndisan̄a ye nnyịn n̄kwọrọ ikọ ke anyanini m̀mê ẹkûkeme nditiene nnyịn nnam mme n̄kpọ eken nte mmọ ẹkesinamde. Edi imosụk ikeme ndikpep n̄kpọ nto mmọ sia mmọ ẹnen̄ede ẹdiọn̄ọ ndinam n̄kpọ Jehovah.