Ubịnikọt Oro Enyenede Nti Utịp
Urua ita mbemiso mme esop ẹkade mbono district, mmọ ẹyefiak ẹnam ubịnikọt man ẹkot mbon oro ẹnyenede udọn̄ ke efakutom mmọ ẹdidụk mbono. Enyene eti ntak emi ẹsinamde ubịnikọt emi kpukpru isua. Mbon oro ẹsibọde n̄wedikot ẹnyụn̄ ẹdụkde mbono emi ẹsima mme utịn̄ikọ oro ẹdade ẹto N̄wed Abasi, ẹma mme itieutom emi mme anamutom unyịmesịt ẹsede ẹban̄a ẹnyụn̄ ẹnamde n̄kpọ ke nde ke nde, ẹma nti edu nnyịn ye nte idianade kiet. (Ps. 110:3; 133:1; Isa. 65:13, 14) Kpa ye emi edide akpanikọ, ndi ubịnikọt nnyịn esinyene nti utịp akpan akpan edieke anade mbon oro ẹnyenede udọn̄ ẹto ata anyan usụn̄ ẹdidụk mbono?
Ke ẹma ẹkekụre mbono district eke 2011, n̄wan kiet emi okokụtde n̄wedikot ke enyịnusụn̄ esie ama ọnọ leta ẹsọk n̄kọk itieutom. Enye ekesidedịbe ke ini Mme Ntiense Jehovah ẹkade ufọk esie. Enye ekewet ete: “Sia n̄kenyenede ediye ufọkidụn̄ ye eti ebe, n̄kekere ke mmenyene kpukpru n̄kpọ oro ẹkemede ndinam mi n̄kop inemesịt. Edi n̄kosụk n̄kopke inemesịt, n̄konyụn̄ mfiọkke ntak emi ndude uwem. Ntre mma mbiere ndiwat kilomita 320 n̄kodụk edinam eke Saturday.” Mbono oro ama enen̄ede enem enye tutu enye okot ebe esie ọdọhọ ke imọ idinyọn̄ke idi usen oro, ke imọn̄ ida idụk mbono ke Sunday n̄ko. “Mma n̄kop kpukpru utịn̄ikọ, nsobo ye ediwak Mme Ntiense Jehovah, nnyụn̄ mbiere ke nditreke do.” Ke enye ama ekesịm ufọk, enye ama ọtọn̄ọ ndikpep n̄kpọ ndien ke ọfiọn̄ inan̄ ẹbede enye ama akabade edi asuanetop oro mînaha baptism. “Esịt enem mi ke mma n̄kụt n̄wedikot oro ke enyinusụn̄ mi, koro idahaemi mmenen̄ede mfiọk ntak emi ndude uwem!”
Ndusụk mbon oro ẹbọde n̄wedikot ẹyedụk mbono. Ntre, nen̄ede sịn idem suan n̄wedikot emi. Da n̄wedikot emi osụhọde di obio mbono, nyụn̄ da mmọ nọ ikọ ntiense ido nneme.
[Ekebe ke page 3]
Didie ke Idinọ Mme Owo N̄wedikot?
Man ikeme ndikụre efakutom nnyịn, oyoyom inam nneme nnyịn edi ibio ibio. Imekeme ndidọhọ ite: “Mmọkọm-o. Nnyịn itiene ibuana ke ubịnikọt ofụri ererimbot ndisuan n̄wedikot emi. Okwo edi emi. Oyokụt ntọt efen efen ke n̄wedikot emi.” Nam nneme fo esịne ufiop. Ke ini edemede n̄wedikot ke mme utịturua, ekpenyene ndinọ mme magazine n̄ko ke ini odotde ndinam ntre.