Se Idin̄wamde Nnyịn Idi Nti Mme Ọkwọrọikọ—Nyene Afan̄ Magazine

Ntak Emi Edide Akpan N̄kpọ: Ediwak owo emi ẹsimade ndikot magazine nnyịn isimaha nditie ye nnyịn n̄kpep Bible. Ekeme ndidi mmọ ẹkere ke imenyene ufọkabasi mmimọ, m̀mê ke ini ididụhe ndisitie n̄kpep Bible. Edi mmọ ndisikot magazine nnyịn ekeme ndinam ọdọn̄ mmọ ndikpep Bible. (1 Pet. 2:2) Mmọ ẹkeme ndiyom ndidiọn̄ọ n̄kpọ mban̄a ibuotikọ kiet oro enen̄erede otụk mmọ, mîdịghe n̄kpọ ekeme nditịbe oro anamde mmọ ẹyom ndien ndikpan̄ utọn̄ nnọ nnyịn. Ndisika mbịne mmọ kpukpru ini ayanam mmọ ẹmehe ye nnyịn onyụn̄ anam nnyịn ifiọk se mmọ ẹmade ye se ifịnade mmọ. Ndien nte ini akade, imekeme nditọn̄ọ ukpepn̄kpọ Bible ye mmọ.