Emekeme Nditọn̄ọ Ukpepn̄kpọ Bible ke Afan̄ Magazine
1. Nso ikanam esop Abasi esisịn udọn̄ ọnọ mme asuanetop ẹnyene mme afan̄ magazine?
1 Ediwak owo isimaha nditiene nnyịn n̄kpep Bible, edi mmọ ẹsima ndikot mme magazine nnyịn. Emi akanam esop Abasi esisịn udọn̄ ọnọ mme asuanetop ẹte ẹsinyene afan̄ magazine, oro edi, mbon emi mmọ ẹsidade magazine ẹsọk kpukpru ini. Nte mme owo ẹkotde mme magazine nnyịn kpukpru ini, emi esinam Ikọ Abasi ọdọn̄ mmọ. (1 Pet. 2:2) Nte ini akade, se mmọ ẹkekotde ekeme ndinen̄ede ntụk mmọ onyụn̄ anam mmọ ẹnyịme nditiene nnyịn n̄kpep Bible.
2. Didie ke ikpan̄wam mbon oro isinọde magazine ẹka iso ẹnyene udọn̄?
2 ‘Duọk Mmọn̄’ ke N̄kpasịp Akpanikọ: Utu ke ndinyụn̄ nyak magazine nnọ owo ndaha nnyọn̄, domo ndinyene nneme ye owo oro man etịm emehe ye enye. Emi ayan̄wam fi etịm ọdiọn̄ọ enye, ọdiọn̄ọ se enye amade, ye se enye enịmde ke akpanikọ, oyonyụn̄ anam ọfiọk nte enyenede nneme ye enye. (N̄ke 16:23) Tịm idem ini kiet kiet oro oyomde ndinam mfiakn̄ka. Edieke ekemede, da esisịt ini yom akpan n̄kpọ oro editịn̄de ye itie Bible emi edikotde ke magazine oro man ekeme ndiduọk mmọn̄ ke n̄kpasịp akpanikọ. (1 Cor. 3:6) Wet usenọfiọn̄ oro akakade, n̄wed emi ọkọnọde, se ekenemede, ye mme itie Bible emi okokotde.
3. Ikafan̄ ke ikpafiak ibịne mbon oro ikọnọde magazine?
3 Akpafiak Ebịne Mmọ Ikafan̄? Akpafiak ebịne mmọ ini kiet ke ọfiọn̄ man ada mbufa magazine ọsọk mmọ. Edi edieke ekemede, owo oro esinọde magazine do onyụn̄ amade, emekeme ndifiak n̄ka awak akan oro. Ke uwụtn̄kpọ, ke urua kiet m̀mê iba ẹbede, emekeme ndifiak n̄ka mbịne enye n̄kọdọhọ: “N̄konyụn̄ ndọhọ n̄waha ndiwụt fi n̄kpọ ke magazine oro n̄kọnọde fi do.” Emi ayanam afiak ọdọn̄ owo oro ndikot ibuotikọ oro ke magazine oro. Edieke edide enye ama okokot, emekeme ndibụp enye n̄kpọ mban̄a ibuotikọ oro onyụn̄ eneme ye enye ibio ibio. Mîdịghe edieke enye esimade ndikot n̄wed nnyịn, emekeme ndida tract, ediye uduot ekpri n̄wed, m̀mê n̄wed emi inọde ke an̄wautom ke ọfiọn̄ oro nsọk enye.
4. Nso ke ikeme ndinam ke ini ke ini man ise m̀mê mbon oro isinọde magazine ẹyenyịme ndikpep Bible?
4 Kûbebet owo oro ọdọhọ fi edikpep Bible ye imọ. Dọhọ enye ke imọn̄ ikpep Bible ye enye. Idem edieke enye mîkenyịmeke ndikpep Bible ke ini edem, emekeme ndisiwụt enye “Mme Mbụme Bible Oro Ẹbọrọde” ke Enyọn̄-Ukpeme man ese m̀mê enye ayama ẹtie ntre ẹneme. Emekeme ndida emi ntọn̄ọ ukpepn̄kpọ Bible ke enyịnusụn̄. Edi edieke mûkemeke nditọn̄ọ ukpepn̄kpọ Bible, emekeme ndika iso nda magazine nsọk owo oro man enye osụk aka iso enyene udọn̄.