Mme Usụn̄ Unyene Nneme

Nditọn̄ọ Ukpepn̄kpọ Bible ke Akpa Saturday ke October

“Ke ndiọkeyo emi, kpukpru nnyịn imosobo mme n̄kpọ-ata oro ẹnọde mme ubon mfịna. Afo ekere ke m̀mọ̀n̄ ke ikeme ndikụt eti ndausụn̄ oro edin̄wamde nnyịn inam uwem ubon nnyịn enem?” Bet ibọrọ. Ekem yak nsiondi Enyọn̄-Ukpeme eke October 1 nọ enyeneufọk, nyụn̄ neme se idude ke kiet ke otu n̄kpri ibuotikọ oro ẹdude ke page 16 ye 17 ye enye, nyụn̄ kot ke nsụhọde n̄kaha itie N̄wed Abasi kiet oro ẹsiakde ẹsịn. Nọ mme magazine, nyụn̄ diomi ndifiak n̄ka n̄kọbọrọ mbụme kiet ke otu mme mbụme eken.

Enyọn̄-Ukpeme October 1

Wụt ikpaedem magazine nyụn̄ bụp, “Ekpetie fi didie ke idem edieke ọkpọfiọkde ke se ẹtịn̄de ẹnọ fi ẹban̄a Abasi edi nsu? [Bet ibọrọ.] Se se Jesus eketịn̄de aban̄a nte ikemede ndifiọk se idide akpanikọ ye nsu. [Kot John 17:17.] Omokụt do ke Bible kpọt asian nnyịn akpanikọ oro aban̄ade Abasi. Magazine emi eneme nsu ition oro ẹsude ẹdori Abasi edi emi Bible ayararede.”

Awake! October

“Nnyịn isan̄a ise mme ubon mfịn. Afo ọkpọdọhọ ke nso idi n̄kponn̄kan n̄kpọ-ata oro mme ete ye eka ẹsobode mfịn nte mmọ ẹbọkde nditọ mmọ? [Bet ibọrọ.] Ediwak mme ete ye eka ẹsika Bible ẹkeyom item. Ke uwụtn̄kpọ, mme ikọ ọniọn̄ emi ẹsinen̄ede ẹn̄wam ke ini ẹnọde nditọ ntụnọ. [Kot Ephesus 4:31.] Magazine emi owụt nte item Bible ekemede ndin̄wam mme ete ye eka ẹbọk nditọ mmọ, ọtọn̄ọde ke ini emi mmọ ẹdide nsek tutu mmọ ẹkpon ẹwọrọ owo.”