Mme Ntọt

◼ N̄wed ẹnọde ke September: Nso ke Bible Enen̄ede Ekpep? Domo nditọn̄ọ ukpepn̄kpọ Bible ke akpa ediwaha. Edieke edide enyeneufọk enyenyene n̄wed emi, edi inyịmeke ẹnịm ukpepn̄kpọ Bible ye imọ, mme asuanetop ẹkeme ndinọ n̄kani magazine m̀mê ediye uduot ekpri n̄wed ekededi emi edemerede enye udọn̄. October: Enyọn̄-Ukpeme ye Awake! Ke ebiet ẹwụtde udọn̄, nọ tract Ndi Akpama Ndifiọk Akpanikọ?, nyụn̄ domo nditọn̄ọ ukpepn̄kpọ Bible. November: Nso Idi Etop Bible? Ke adianade ye emi, mîdịghe edieke emi mîdụhe, ẹmekeme ndinọ ekededi ke otu ediye uduot ekpri n̄wed emi enyenede page 32, oro ẹdọhọde ẹnọ ke August 2011. December: Akakan Owo Oro Akanam Odude Uwem. Edieke enyeneufọk enyenede nditọ, nọ n̄wed Kpep N̄kpọ to Akwa Andikpep m̀mê N̄wed Mi eke Mme Mbụk Bible.

◼ Ẹdinọ akpan utịn̄ikọ an̄wa ini Editi eke 2012 ke urua April 2, 2012. Ama ekem ẹyesiak ibuotikọ utịn̄ikọ emi. Esop ndomokiet ikpenyeneke ndinọ akpan utịn̄ikọ emi mbemiso Editi.

◼ Mme asuanetop oro ẹdinamde utom usiakusụn̄ unọ un̄wam ke March 2012 ẹyekeme ndimek m̀mê mmimọ idinọ hour 30 m̀mê hour 50. Adianade do, edieke esenyịn circuit edide edise esop mbufo ke March, kpukpru mbon oro ẹnamde utom usiakusụn̄ unọ un̄wam, edide mmọ ẹnọ hour 30 m̀mê 50, ẹyedụk mbono oro esenyịn circuit edinịmde ye mme asiakusụn̄ ofụri ini, ọtọn̄ọde ke ntọn̄ọ tutu esịm utịt.

◼ Ke September, mme esenyịn circuit ẹma ẹtọn̄ọ ndinọ utịn̄ikọ an̄wa oro ibuotikọ edide, “Diana Kiet ye Ikọt Abasi Oro Ẹkopde Inemesịt.”

◼ Nnyịn iyom nditi kpukpru owo nte ke owo ikpedehedei iwet adres n̄kọk itieutom nte adres andinọ leta ke ọkpọkpọ leta ekededi. Emi esịne kpukpru leta ye mme n̄wed oro ẹnọde ẹsọk mbon oro ẹnyenede udọn̄, mbon oro mîsidụhe ke ufọk, m̀mê mbon oro ẹdụn̄de ke mme ebiet oro ọsọn̄de ndisịm man ẹnọ mmọ ikọ ntiense. Asuanetop ekeme ndida ọkpọkpọ adres esie, koro utom ukwọrọikọ esie abuana ọkpọkpọ utom oro enye anamde ọnọ Abasi. (Matt. 28:19, 20; Rome 10:14, 15) Nte ededi, edieke enye ekerede ke iwụtke ọniọn̄ ndiwet ọkpọkpọ adres esie ke ini enye adade leta ọnọ ikọ ntiense, enye ekeme ndiwet enyịn̄ esie ye adres Ufọkmbono Obio Ubọn̄.—Se Ekebe Mbụme ke Utom Obio Ubọn̄ Nnyịn eke May 2002.