Ẹkpeme Idem ye “Nditọete Abian̄a”
1. Nso ke apostle Paul eketịn̄ aban̄a “nditọete abian̄a”?
1 Kiet ke otu mfịna oro apostle Paul okosobode nte Christian, emi enye ekewetde aban̄a, ekedi afanikọn̄ ke ubọk “nditọete abian̄a” oro ẹkedude ke mme esop. Enye ọkọdọhọ ke mmọ ‘ẹken̄wọn ẹdụk ndịbe ndịbe’ ndien ke owo mîdụhe ke ukpeme ke mmọ ẹyeda afanikọn̄ ẹdi. (2 Cor. 11:26; Gal. 2:4) Ekeme ndidi nditọete abian̄a emi ẹma ẹnam Paul enen̄ede okop mfụhọ ye editịmede esịt.
2. Nso ke mme owo ẹnam ke ndondo emi?
2 Ke ndondo emi, mme owo oro ẹnamde nte idi Mme Ntiense Jehovah ẹmeda mfịna ẹsọk ndusụk nditọete nnyịn. Utọ nditọete abian̄a oro ẹkeme ndinam nte idi mbon nnanenyịn emi ẹkesobode mbabuat n̄kpọntịbe, mîdịghe ẹnam nte idọdọn̄ọ m̀mê idi mbon n̄kpọnnam ke ufọkibọk oro odude ekpere, emi ẹyomde un̄wam. Mbon eken ẹkeme ndidọhọ ke ida mbubehe idi oro ẹdinamde nditọete ẹforo. Ke ndusụk idaha, mbon oro ẹnamde nte idi Mme Ntiense ẹsika ẹbịne nditọete mîdịghe ẹda Intanet ẹwet ẹdọhọ ke odu eyenete oro enyenede mfịna okụk emi oyomde un̄wam, ndien ẹsiak ban̄k oro mmọ ẹyomde nditọete ẹkpe okụk ẹsịn.
3. Ndi akpana ima oro imade ekemmọ mme Christian osụhọde ke mme akpatre usen emi? Nam an̄wan̄a.
3 Nte nnyịn isan̄ade ikpere utịt editịm n̄kpọ emi, oyom ima oro imade ekemmọ nditọete nnyịn “ọdọdiọn̄” okpon. (Phil. 1:9) N̄ko, ndiọi owo ye mbon abian̄a ẹyedọdiọn̄ ẹdiọk ẹka iso. (2 Tim. 3:13) Ntem, didie ke ikeme ndidu ke ukpeme ndien ke ukem ini oro inam se ẹyomde ẹto nnyịn nte mme Christian ke nditua nditọete nnyịn oro ẹnen̄erede ẹyom un̄wam, mbọm?—Matt. 10:16, 17; Jas. 2:15, 16.
4. (a) Ntak emi ọkpọfọnde idu ke ukpeme? (b) Didie ke ikpada edumbet oro odude ke Job 34:3 isịn ke edinam?
4 Ntak Oyomde Idu ke Ukpeme: Okposụkedi emi mîyomke inyene eyịghe iban̄a mme owo nte mîdotke, enen̄ede oyom inyene ọniọn̄, inyụn̄ idu ke ukpeme, ‘ikûse kpukpru ikọ ke akpanikọ’ mbak mbon abian̄a ẹdibian̄a nnyịn. (N̄ke 14:15) Ikọ Abasi esịn udọn̄ ọnọ nnyịn ndidomo se mme owo ẹtịn̄de nse utu ke ndinyịme kpukpru se ikopde nnan nnan. Enye ọdọhọ ete: “Koro utọn̄ odomode ikọ, nte emi nsịn̄ atabide udia.” (Job 34:3) Nte emi idịghe akpanikọ? Ukem nte isitabide udia ise mbemiso idiade, ndi nnyịn n̄ko ikpodomoke se mme owo ẹtịn̄de ye nte mmọ ẹnamde n̄kpọ ise mbemiso inịmde se mmọ ẹtịn̄de ke akpanikọ?
5. Nso ke ikpanam man ifiọk owo oro enen̄erede edi kiet ke otu Mme Ntiense Jehovah?
5 Owo oro enen̄erede edi eyenete idiyatke esịt edieke ibụpde enye mbụme man ifiọk owo oro enye edide. Apostle Paul ama eteme ete: “Ẹdomo kpukpru n̄kpọ ẹse.” (1 Thess. 5:21, Edisana Ŋwed Abasi Ibom) Ikọ Greek oro apostle Paul akadade etịn̄ ikọ mi oro ẹkabarede “ẹdomo” n̄ko ekenyene n̄kpọ ndinam ye edidomo mme ọsọn̄urua ukwak nse m̀mê mmọ ẹnen̄ede ẹsọn̄ idem. Ntre, owụt eti ibuot ndidomo mfiọk m̀mê owo enen̄ede edi eyenete mbak mme oburobụt owo ẹdibian̄a nnyịn.
6. (a) Didie ke ikeme ndida ukem ukem kpukpru ini ke adan̄aemi in̄wamde mme owo? (b) Ntak emi ikpan̄wamde nditọete nnyịn-e?
6 Edieke in̄wamde mbon oro ẹnen̄erede ẹdi nditọete nnyịn, nnyịn ididi mme ‘andima emi iyịrede owo ikan eyeneka.’ (N̄ke 18:24) Ke adianade do, mmọ ẹyen̄wam nnyịn ke ini iyomde un̄wam. Luke 6:38 ọdọhọ ke mmọ ‘ẹdida udomo eke idade idomo inọ mmọ ẹdomo ẹnọ nnyịn ke usiene.’ Ke adan̄aemi edin̄wam mme owo edide akpan n̄kpọ ke utuakibuot nnyịn, oyom ika iso idu ke ukpeme.—Jas. 1:27.