Utịtmbuba Oro Odotde ke Obufa Isua Utom

1. Ewe utịtmbuba ke nnyịn ikpekere iban̄a ke obufa isua utom?

¹ Ana nnyịn inịm mme utịtmbuba edieke iyomde ndinam n̄kọri ke n̄kan̄ eke spirit. Mme utịtmbuba ewe ke afo enịm ọnọ idemfo ke obufa isua utom oro edide mi? Ndinam utom usiakusụn̄ unọ un̄wam, ekpedi ọfiọn̄ kiet m̀mê iba edi ata eti utịtmbuba. Sia inem inem utom emi esiyomde ẹbabak ẹnam ntịmidem, ata nnennen ini edi emi nditọn̄ọ ntịm idem. Ntak emi ekpekerede aban̄a utom usiakusụn̄ unọ un̄wam nte utịtmbuba?

2. Ntak emi ikpanamde utom usiakusụn̄ unọ un̄wam edi utịtmbuba?

² Mme Ntak Emi Ikpanamde Utom Usiakusụn̄ Unọ Un̄wam: Ndinam utom usiakusụn̄ unọ un̄wam anam nnyịn inem Ete nnyịn eke heaven esịt “ata ọyọhọ ọyọhọ” ebe ke ndisịn ekese ini ke utom ukwọrọikọ. (1 Thess. 4:1) Nte nnyịn itiede ikere kpukpru se Jehovah anamde ọnọ nnyịn, esịt esinụk nnyịn nditịn̄ nnọ mbon efen mban̄a enye. (Ps. 34:1, 2) Jehovah etịm ọfiọk onyụn̄ okop inemesịt aban̄a n̄waidem oro nnyịn owo kiet kiet inamde man inam ekese ke utom ukwọrọikọ. (Heb. 6:10) Ndifiọk ke Jehovah okop inemesịt aban̄a ọkpọsọn̄ utom nnyịn ọnọ nnyịn akwa idatesịt.—1 Chron. 29:9.

3, 4. Didie ke nnyịn ibọ ufọn ito edinam utom usiakusụn̄ unọ un̄wam?

³ Nte ido edide, edieke anamde n̄kpọ ndien ndien, n̄kpọ oro ayakabade emem utom, afo oyonyụn̄ okop inem ndinam enye. Ndisịn ekese ini ke utom ukwọrọikọ idiyakke fi okop ndịk ke ini etịn̄de ikọ ọnọ owo ke an̄wautom. Afo eyetịm enyene usọ ke nditọn̄ọ nneme ye ke ndida Bible nnam n̄kpọ. Adan̄a nte enemede aban̄a mbuọtidem fo, ntre ke enye editetịm ọsọn̄. Ediwak mbon oro mîkenyeneke ukpepn̄kpọ Bible ẹmenyene ke adan̄aemi ẹnamde utom usiakusụn̄ unọ un̄wam.

⁴ Utom usiakusụn̄ unọ un̄wam ekeme n̄ko ndin̄wam owo anam n̄kọri ke n̄kan̄ eke spirit. Akani asiakusụn̄ ofụri ini kiet oro ekekerede ke imọ ima isịn idem ikaha ke utom idịbi udia ama ebiere ndinam utom usiakusụn̄ unọ un̄wam ke ọfiọn̄ kiet. Enye ọkọdọhọ ete: “Idem ama enen̄ede akpa mi nte ọfiọn̄ kiet oro ọkọnọde mi odudu ntre ke n̄kan̄ eke spirit. Mma mbiere ndika iso ke utom usiakusụn̄ unọ un̄wam, ndien emi ama anam mfiak n̄kabade ndi asiakusụn̄ ofụri ini.”

5. Didie ke nnyịn ikeme nditre ndikere ke nnyịn inyeneke ukeme ndinam utom usiakusụn̄ unọ un̄wam?

⁵ Ndikan Mme N̄kpọ Ubiọn̄ọ: Ndusụk owo ẹkeme ndimen̄e ndinam utom usiakusụn̄ unọ un̄wam sia mmọ ẹkerede ke mmimọ inyeneke ukeme nte mme ọkwọrọikọ. Edieke afo ekerede ke imọ ikemeke ndinam utom usiakusụn̄ unọ un̄wam ke ntak emi, Jehovah ekeme ndin̄wam fi nte enye akan̄wamde Jeremiah. (Jer. 1:6-10) Okposụkedi Moses ‘okodobide inua onyụn̄ odobide edeme,’ Jehovah ama ada enye anam uduak Esie. (Ex. 4:10-12) Edieke afo ekerede ke imọ inyeneke ukeme, bọn̄ akam ben̄e Jehovah uko.

6. Didie ke ekeme ndinam utom usiakusụn̄ unọ un̄wam kpa ye unana nsọn̄idem m̀mê ke ntak oro enyenede ekese n̄kpọ ndinam?

⁶ Nte afo emen̄e ndinam utom usiakusụn̄ unọ un̄wam ke ntak unana nsọn̄idem mîdịghe ke ntak enyenede ekese n̄kpọ ndinam? Edieke afo edide owo n̄kpọnnam, ndinam n̄kpọ ke ukeme fo ekeme ndin̄wam fi anam utom usiakusụn̄ unọ un̄wam. Edieke afo enyenede ekese n̄kpọ ndinam, emekeme ndidiomi ndinam ndusụk mme n̄kpọ oro mînen̄ekede idi akpan n̄kpọ ke ọfiọn̄ en̄wen. Ndusụk mbon oro ẹsinamde utom idịbi udia kpukpru ini ẹsidep ifet ẹnam utom usiakusụn̄ unọ un̄wam ebe ke ndisịn n̄wed ntre utom usen kiet m̀mê iba.—Col. 4:5.

7. Ntak emi ọfọnde ndibọn̄ akam mban̄a edinam utom usiakusụn̄ unọ un̄wam?

⁷ Nte Ẹkpenamde Enye: Bọn̄ akam ban̄a se aduakde ndinam. Ben̄e Jehovah ọdiọn̄ ukeme oro afo esịnde nditat utom ukwọrọikọ. (Rome 12:11, 12) Enye ekeme ndin̄wam fi etịm ebiere nte akpanamde ukpụhọde ke ndutịm fo. (Jas. 1:5) Edieke mîdọn̄ke fi ndisiak usụn̄, ben̄e Jehovah an̄wam fi okop inem ukwọrọikọ.—Luke 10:1, 17.

8. Didie ke ndida se Mme N̄ke 15:22 etịn̄de nsịn ke edinam ekeme ndin̄wam fi anam utom usiakusụn̄ unọ un̄wam?

⁸ Ẹneme ọtọkiet nte ubon ẹban̄a utịtmbuba edinam utom usiakusụn̄ unọ un̄wam. (N̄ke 15:22) Iso-ọfọn mbonubon ẹkeme ndin̄wam owo kiet ke ubon anam usiakusụn̄ unọ un̄wam. Tịn̄ nọ mbon en̄wen ke esop ke ikpama ndisiak usụn̄, akpan akpan mbon oro ẹdude ke ukem idaha ye afo. Emi ekeme ndinam fi enen̄ede enyene ifiopesịt aban̄a utom usiakusụn̄ unọ un̄wam.

9. Mme ọfiọn̄ ewe ke afo ekeme ndimek ndinam utom usiakusụn̄ unọ un̄wam?

⁹ Nte afo odụn̄ọrede mme ndutịm oro anamde aban̄a utom ukwọrọikọ ke obufa isua utom, ini ewe ke afo ekere ke eyekeme ndinam utom usiakusụn̄ unọ un̄wam? Edieke afo esinamde utom kpukpru ini mîdịghe edieke esikade ufọkn̄wed, afo emekeme ndimek ọfiọn̄ oro enyenede ini nduọkodudu m̀mê enye oro enyenede Saturday ition ye Sunday ition. Ke uwụtn̄kpọ, September, December, March, ye August ẹnyene utịturua ition. Ọfiọn̄ May enyene Saturday ition, ndien ọfiọn̄ June enyene Sunday ition. Edieke afo mûkopke nsọn̄idem, kere ban̄a mme ọfiọn̄ oro eyo esifọnde. Afo n̄ko emekeme ndikere mban̄a edinam utom usiakusụn̄ unọ un̄wam ke ọfiọn̄ oro esenyịn circuit odiomide ndidi esop mbufo. Ke ini esenyịn circuit edide, afo eyenyene ifet efen efen nditiene ndụk akpa ikpehe mbono oro ẹsinịmde ye mme asiakusụn̄ ofụri ini ke urua oro. Sia Editi isua efen ọduọde ke March 22, ọfiọn̄ March, April, ye May ẹdidi ata nti ọfiọn̄ ndinam utom usiakusụn̄ unọ un̄wam. Ke ndondo oro emekde ọfiọn̄ m̀mê mme ọfiọn̄ oro oyomde ndinam utom usiakusụn̄ unọ un̄wam, tọn̄ọ ndiwet ndutịm oro edin̄wamde fi esịm ibat hour oro ẹyomde.

10. Nso ke afo ekeme ndinam edieke afo mûkemeke ndinam utom usiakusụn̄ unọ un̄wam?

¹⁰ Idem ọkpọkọm afo ekere ke imọ ikemeke ndinam utom usiakusụn̄ unọ un̄wam ke obufa isua utom emi edide, afo emekeme ndisụk nnyene edu usiakusụn̄. Ka iso ndinam kpukpru se afo ekemede ke utom ukwọrọikọ sia etịmde ọfiọk ke Jehovah okop inemesịt ke ukeme ofụri ukpọn̄ oro afo esịnde ke utom esie. (Gal. 6:4) N̄wam mbon oro ẹkemede ndinam utom usiakusụn̄ unọ un̄wam nyụn̄ sịn udọn̄ nọ mmọ. Afo emekeme ndinam ukpụhọde ke ndutịm fo man etiene mbon oro ẹnamde utom usiakusụn̄ abuana ke an̄wautom ke ndusụk usen ke urua.

11. Ntak emi nnyịn ikpanamde n̄kpọ usọp usọp idahaemi?

¹¹ Ikọt Jehovah ẹfiọk ke ini edi emi oro anade ẹnam n̄kpọ usọp usọp. Utom odu oro anade ẹnam—edikwọrọ eti mbụk. Uwem ediwak owo odu ke itiendịk, ndien ini emi osụhọde iniọn̄ke aba. (1 Cor. 7:29-31) Ima oro imade Abasi ye mme mbọhọidụn̄ nnyịn oyonụk nnyịn ndinam kpukpru se ikemede ke utom ukwọrọikọ. Edieke isịnde ukeme inyụn̄ inamde eti ndutịm, nnyịn imekeme ndinam utom usiakusụn̄ unọ un̄wam ke nsụhọde n̄kaha ọfiọn̄ kiet ke obufa isua utom oro edide, ndien ke akpanikọ, emi edi utịtmbuba oro odotde!