Wụt Esịtekọm Ban̄a Ndutịm Oro Jehovah Anamde man An̄wam Fi Ekpep nte Okpokotde Onyụn̄ Ewetde N̄kpọ
1 Ufọkn̄wed oro ẹkpepde nte ẹkotde ẹnyụn̄ ẹwetde n̄kpọ ke esop edi ubak Ufọkn̄wed Utom Ukara Abasi. Ẹtịm enye man ẹn̄wam mme asuanetop ye mbon oro ẹnyenede udọn̄, emi mîfiọkke n̄wed, ẹkpep nte ẹkotde ẹnyụn̄ ẹwetde n̄kpọ. Ke Nigeria, ata ediwak owo ẹwụt esịtekọm ẹban̄a ufọkn̄wed emi, ndien idahaemi mmọ ẹkeme ndikot n̄wed nnyụn̄ n̄kpep mme owo Ikọ Abasi edifọn edifọn. Edieke afo mûfiọkke ndikot nnyụn̄ n̄wet n̄kpọ, ndien ufọkn̄wed oro ẹkpepde nte ẹkotde ẹnyụn̄ ẹwetde n̄kpọ odu ke esop mbufo, ndi afo oyowụt esịtekọm aban̄a ndutịm emi? Didie ke afo ekeme ndinam emi?
2 Sịn Enyịn̄ Nyụn̄ Wụt Ata Udọn̄: Edieke mûkemeke ndikot nnyụn̄ n̄wet n̄kpọ, afo ekpenyene ndisịn enyịn̄ ke ufọkn̄wed oro ẹkpepde nte ẹkotde ẹnyụn̄ ẹwetde n̄kpọ. Kûyak bụt m̀mê ntan̄idem ọbiọn̄ọ fi ndinam ntre. (Men 2 Ndidem 5:10-14 domo.) Ke ndondo oro afo esịnde enyịn̄, nen̄ede sịn idem kpep n̄kpọ. (N̄ke 21:5) Emi abuana ndika ke ini, ndinọ ọyọhọ n̄kpan̄utọn̄ ke ini ukpepn̄kpọ akade iso, ye ndinyene ọkpọsọn̄ udọn̄ ndikpep n̄kpọ. Afo n̄ko enyene ndinam utomufọk oro ẹnọde ọfọn—kot nyụn̄ fiak se ukpepn̄kpọ oro ẹdikpepde mbemiso usen ekemde. Emi edi ndusụk usụn̄ oro ẹkemede ndiwụt esịtekọm mban̄a ndutịm oro Jehovah anamde man ẹkpep nte ẹkotde ẹnyụn̄ ẹwetde n̄kpọ.
3 Nen̄ede Tịm Idem: Eyen ufọkn̄wed esiyom n̄kpọutom ndida mbọ ukpep. Ke ntre, afo ekpenyene ndisikama mme n̄kpọutom emi—oro edi Bible, n̄wed ukpepn̄kpọ oro How to Read and Write, n̄wed uwetn̄kpọ, ye eton̄wed m̀mê benetap—ndụk ufọkn̄wed oro ẹkpepde nte ẹkotde ẹnyụn̄ ẹwetde n̄kpọ. Edieke akamade kpukpru n̄kpọ emi, afo eyenen̄ede ọbọ ufọn oto ndutịm oro. Emi n̄ko oyowụt ke omowụt esịtekọm aban̄a ndutịm oro Jehovah anamde.
4 Nyene Uduak Fo ke Ekikere: Jehovah esiyom mme asan̄autom esie ẹfiọk ndikot nnyụn̄ n̄wet n̄kpọ man ẹbọ ufọn ọyọhọ ọyọhọ ẹto Ikọ esie, inamke n̄kpọ m̀mê nso idi idaha mmọ ke uwem. (Josh. 1:8; Deut. 6:8, 9; 17:18, 19) Ke ntre, ata akpan ntak oro anamde esịn enyịn̄ ke ufọkn̄wed oro ẹkpepde nte ẹkotde ẹnyụn̄ ẹwetde n̄kpọ edi man ekeme ndikot nnyụn̄ nnam Ikọ Abasi an̄wan̄a nnennen nnennen, man ọkọri ke n̄kan̄ eke spirit onyụn̄ an̄wam mbon en̄wen ẹfiọk etop Obio Ubọn̄. Ndinyene uduak emi ke ekikere ayan̄wam fi ndiyọ mme n̄kpọ-ata oro ẹdude ke ndikpep nte ẹkotde ẹnyụn̄ ẹwetde n̄kpọ.
5 Ndin̄wụm Mfri Obio Ubọn̄: Jehovah ye Eyen esie ẹyom nnyịn inen̄ede in̄wụm mfri Obio Ubọn̄. (John 15:8) Nte ededi, afo ndikụt unen ke ndinam emi enen̄ede ọkọn̄ọ ke afo ndikeme ndikot nnyụn̄ n̄wet n̄kpọ. Kere ban̄a ifiọkutom emi: Eyenete oro mîkekemeke ndikot nnyụn̄ n̄wet n̄kpọ akaka ukwọrọikọ eke ufọk ke ufọk ke akpa ini. Owo Protestant kiet oro okokụtde ke enye ifiọkke ndikot n̄wed ọkọdọhọ ete: ‘Kûkwọrọ ikọ unọ mi tutu afo ọfiọk ndikot Bible ke idem fo.’ Okposụkedi obufa asuanetop oro okodomode nditịn̄ ikọ nnọ owo oro, enye ikamaha ndikpan̄ utọn̄, onyụn̄ ọdọhọ ke inyeneke se ọkọi ekemede ndikpep owo efen. Eyenete oro mîkekemeke ndikot nnyụn̄ n̄wet n̄kpọ do ama ebiere ndikpep ndikot n̄wed. Utu ke ndiyụhọ n̄kukụre ye editiene ndụk ufọkn̄wed oro ẹkpepde nte ẹkotde ẹnyụn̄ ẹwetde n̄kpọ, enye ama esikpep n̄kpọ n̄ko ke idemesie kpukpru usen ke urua itiokiet. Ebiet ekededi oro enye akade, enye ama esida n̄wed esie onyụn̄ ọdọhọ mbon oro ẹfiọkde ndikot n̄wed ẹn̄wam imọ ẹkot ndusụk ikọ. Nso ikedi utịp? Ke urua itiokiet ẹma ẹkebe, enye ama afiak aka ukwọrọikọ onyụn̄ afiak aka ebịne ete oro ekesịnde ndikpan̄ utọn̄ nnọ enye ke akpa ini oro enye ọkọtọn̄ọde ukwọrọikọ. Ama akpa owo Protestant oro idem ndikụt eyenete oro mîkekemeke ndikot nnyụn̄ n̄wet n̄kpọ do ekemede ndikot Bible nnọ enye, ndien enye ama enyene udọn̄ ke se eyenete oro ekekpepde. Ndikpep nte ẹkotde ẹnyụn̄ ẹwetde n̄kpọ, ndinyụn̄ nda ifiọk oro n̄kpep mbon efen akpanikọ edi eti usụn̄ ndiwụt esịtekọm mban̄a mme ndutịm oro Jehovah anamde—Matt. 24:14; 28:19, 20; John 8:32; 17:3.
6 Nyene Mbuọtidem: Mfịn, ediwak ikpọ owo ẹkop ndịk ndisịn enyịn̄ ke ufọkn̄wed oro ẹkpepde nte ẹkotde ẹnyụn̄ ẹwetde n̄kpọ, ndien etie ndusụk mbon oro ẹma ẹkesịn enyịn̄ nte ke mmọ idikemeke ndikot nnyụn̄ n̄wet n̄kpọ tutu amama. Nte ededi, afo emekeme ndikan utọ akamba n̄kpọ ubiọn̄ọ emi ebe ke ndinyene mbuọtidem ke nsọn̄ọ oro Jesus ọnọde mi ke Matthew 17:20. Ke ntre, sịn esịt ke se afo ekpepde ke ufọkn̄wed oro ẹkpepde nte ẹkotde ẹnyụn̄ ẹwetde n̄kpọ. Nen̄ede sịn idem ke ufọkn̄wed oro. Yak Jehovah okụt ofụri ukeme oro afo esịnde ndifiọk ndikot nnyụn̄ n̄wet n̄kpọ, ndien enye ayan̄wam fi ekeme ndikot nnyụn̄ n̄wet n̄kpọ. Eyenete eren kiet oro mîkọfiọkke ndikot nnyụn̄ n̄wet n̄kpọ ama esịn enyịn̄ ke ufọkn̄wed oro ẹkpepde nte ẹkotde ẹnyụn̄ ẹwetde n̄kpọ ke esop mmọ, ndien enye ama anam n̄kọri ata etieti tutu enye akabade edi andikpep ke ufọkn̄wed oro ke esop mmọ! Ke akpanikọ, “Abasi emekeme ndinam kpukpru n̄kpọ.” (Matt. 19:26) Edieke afo ọbuọtde idem ye Jehovah onyụn̄ enen̄erede esịn ukeme, ibịghike, afo emekeme ndidi kiet ke otu ediwak mbon oro ẹkemede ndikot nnyụn̄ n̄wet n̄kpọ ke ntak mmọ ẹwụtde esịtekọm ẹban̄a ndutịm oro Jehovah anamde man ẹkpep nte ẹkotde ẹnyụn̄ ẹwetde n̄kpọ.