Ekebe Mbụme

◼ Anie akpasiak ikwọ oro ẹdade ẹberede Ufọkn̄wed Utom Ukara Abasi, Esoputom, An̄wan̄wa Mbono Esop, ye Ukpepn̄kpọ Enyọn̄-Ukpeme, ndien didie ke ẹkpenam emi?

Ẹdọn̄ mme ikwọ oro ẹdidade ẹberede Ufọkn̄wed Utom Ukara Abasi eke urua ke urua ke Ndutịm Ufọkn̄wed Utom Ukara Abasi emi odude ke esịne-esịt Utom Obio Ubọn̄ Nnyịn eke October. Mme ikwọ oro ẹdidade ẹberede ẹnyụn̄ ẹberi Esoputom eke urua kiet kiet ẹdu ke ọyọhọ page 2 ke Utom Obio Ubọn̄ Nnyịn. Kpasụk ntre, mme ikwọ Ukpepn̄kpọ Enyọn̄-Ukpeme eke urua ke urua ẹdu ke ọyọhọ page 2 ke nsiondi Enyọn̄-Ukpeme kiet kiet. Mme ikwọ emi ẹdade ẹnịm mbono esop kiet kiet ẹdi ubak mbono esop oro, ntre eyenete oro ẹnịmde ikpehe mbono esop oro ekpenyene ndisiak ikwọ oro utu ke eyenete oro ekenịmde ikpehe mbono esop oro osụk okụrede.

Ke uwụtn̄kpọ, esenyịn Ufọkn̄wed Utom Ukara Abasi ọyọkọm otuowo, asiak ikwọ oro ẹdidade ẹberede, onyụn̄ enịm ufọkn̄wed, ndien ke oro ebede, okot akpa etịn̄ikọ ke Esoputom edi mbot utịn̄ikọ. Eyenete oro editọn̄ọde Esoputom ekpenyene ndisiak ikwọ oro ẹdidade ẹberede Esoputom.

Ke ukem usụn̄ oro, etieibuot okpokoro editọn̄ọ An̄wan̄wa Mbono Esop. Enye ọyọkọm otuowo onyụn̄ ọdọhọ mmọ ẹtiene ẹdiana ke ndikwọ ikwọ oro etịn̄ikọ ekemekde. Etieibuot okpokoro (m̀mê eyenete efen emi odotde oro ẹma ẹkebabak ẹsian enye) ediberede mbono esop oro ke akam. Enye oyokot etịn̄ikọ onyụn̄ asiak ibuotikọ utịn̄ikọ esie. Ke utịn̄ikọ okụrede, etieibuot okpokoro ọyọkọm etịn̄ikọ ke utịn̄ikọ esie, edi emi iwọrọke ndifiak ntịn̄ ibio ibio se etịn̄ikọ eketịn̄de. Enye ọyọtọt ibuotikọ utịn̄ikọ an̄wa urua efen, ndien ekem ọdọhọ kpukpru owo ẹbet man ẹtiene ẹbuana ke Ukpepn̄kpọ Enyọn̄-Ukpeme. Ufọn idụhe etie ibuot okpokoro ndibụp m̀mê otuowo ẹkpema ẹnọ ima ye ekọm mmọ ẹsọk esop etịn̄ikọ oro otode-to edi. Ekem, etieibuot okpokoro oyokot ada Ukpepn̄kpọ Enyọn̄-Ukpeme ọdọk edi mbot utịn̄ikọ.

Ada Ukpepn̄kpọ Enyọn̄-Ukpeme edisiak akpa ikwọ oro ẹdidade ẹberede ukpepn̄kpọ oro. Enye eyetiene mme item oro ẹnọde ke nte ẹkpenịmde ukpepn̄kpọ oro ndien ekem asiak ikwọ ediberi. Ada Ukpepn̄kpọ Enyọn̄-Ukpeme edikot eyenete oro ọkọnọde utịn̄ikọ an̄wa ediberi mbono esop oro ke akam.

Nditiene mme ndausụn̄ emi ayan̄wam kpukpru nnyịn isinịm mme mbono esop nnyịn ke ukem usụn̄.