Didie ke Nnyịn Ikeme Ndin̄wam?
1 Mme Ntiense Jehovah ẹsiwak ndibụp, “Didie ke nnyịn ikeme ndin̄wam?” ke ini mmọ ẹkopde ẹban̄a unọmọ emi etịbede ke ndusụk itie ke ererimbot. Nte mbụk oro ke Utom 11:27-30 owụtde, mme Christian eke akpa isua ikie ẹma ẹnọ n̄kpọ un̄wam ẹsọk nditọete emi ẹdụn̄de ke Judea ke ntak akan̄ oro eketịbede.
2 Mfịn, esop Abasi enyịme ẹsinọ okụk man ẹda ẹn̄wam mbon unọmọ ke ini oto-obot afanikọn̄ m̀mê ke ini afanikọn̄ ubọkowo etịbede ye ke mme ini efen oro ẹyomde un̄wam.
3 Ke uwụtn̄kpọ, isua oko, ediwak nditọete ẹma ẹtịp n̄kpọ man ẹda ẹn̄wam mbon unọmọ ke ini mbufụt inyan̄ ọkọtọde emen Edem Usụk Asia. Ẹma ẹnen̄ede ẹdara etịbe ofụri esịt emi ẹkenọde esop Abasi mi man ẹda ẹn̄wam mbon unọmọ. Nte ededi, ke ndusụk idụt, ke ini ẹnọde san̄asan̄a etịbe kaban̄a akpan unọmọ, esiyom ẹda utọ okụk oro ẹnam sụk n̄kpọ oro andinọ ọkọdọhọde ẹnam ke ufan̄ ini oro ẹkenọde, inamke n̄kpọ m̀mê ẹma ẹse ẹban̄a mfịna nditọete nnyịn ke n̄kann̄kụk oro m̀mê owo ikesehe iban̄a.
4 Ke ntak oro, nnyịn idọhọ yak ẹsinọ okụk oro ẹyomde ẹda ẹn̄wam mbon unọmọ ke enyịn̄ utom ofụri ererimbot. Okụk emi ke ẹda ẹn̄wam mbon unọmọ, ẹnyụn̄ ẹda ẹse ẹban̄a mme n̄kpọ eke spirit oro nditọete Christian nnyịn ẹyomde ke ofụri ererimbot. Edieke ke ndusụk ntak, owo oyomde ndinọ san̄asan̄a un̄wam ẹda ẹnam n̄kpọ efen, iyadara ndibọ un̄wam oro, iyonyụn̄ ida enye inam n̄kpọ ke ebiet ekededi oro ẹyomde un̄wam. Nte ededi, nnyịn iyenen̄ede ima ẹnọ mme utọ etịbe oro ye unana editịn̄ ebiet ẹyomde ẹnọ enye aka m̀mê se ẹyomde ẹda enye ẹnam.
5 Ndinọ mme etịbe nnyịn man ẹda ẹsịn ke utom ofụri ererimbot anam ẹnyene ediwak okụk ndida nse mban̄a kpukpru ikpehe utom Obio Ubọn̄ utu ke ndinịm nnọ mme n̄kpọntịbe ini iso kpọt. Emi odu ke n̄kemuyo ye se ẹtịn̄de ke Ephesus 4:16, ẹte nnyịn inam utom ọtọkiet ndinọ se ẹyomde man ‘idem ọkọri onyụn̄ ọsọn̄ọ owụhọ ke ima.’