Se Utom Ukwọrọikọ Nnyịn Anamde
1. Didie ke Jehovah ese utom ukwọrọikọ nnyịn, ndien didie ke mme owo ẹse utom emi?
1 Ikọ Abasi etịn̄ aban̄a mme Christian nte ẹsan̄ade idara idara ẹnam utom Jehovah, nte n̄kpọ eke mmọ ẹnamde isan̄ edikan. (2 Cor. 2:14-16) Nte nnyịn inamde mme owo ẹnyene ifiọk Abasi, utom ukwọrọikọ nnyịn etie nte edinem ufịk emi ẹsion̄ode ẹnọ Jehovah. Ndusụk owo ẹma inem inem ufịk eti mbụk emi; mbon eken imaha. Edi ata ediwak owo ndinana udọn̄ iwọrọke ke nnyịn ikwe unen ke utom ukwọrọikọ nnyịn. Kere ban̄a se utom ukwọrọikọ nnyịn anamde.
2. Utom ukwọrọikọ ọnọ nnyịn ifet ndiwụt nso?
2 Ndikpono Jehovah: Satan ọdọhọ ke mme owo ẹnam n̄kpọ Jehovah ke ntak ibụk. (Job 1:9-11) Utom ukwọrọikọ Christian ọnọ nnyịn ifet ndiwụt ke nnyịn ituak ibuot inọ Abasi ke ofụri esịt. Ediwak mme asuanetop ke ẹka iso ndinam ewụhọ edikwọrọ ikọ nnyụn̄ nnam mme mbet kpa ye nsọn̄ọn̄kpọ oro mmọ ẹsobode m̀mê unana udọn̄ oro mme owo ke ofụri ofụri ẹwụtde. Utọ nsọn̄ọnda oro adat Jehovah esịt!—N̄ke 27:11.
3. Ntak enen̄ede edi akpan n̄kpọ nte nnyịn ika iso inam mme owo ẹfiọk enyịn̄ ye uduak Abasi?
3 Ke adianade do, utom ukwọrọikọ nnyịn anam uduak Abasi osu. Jehovah etịn̄ aban̄a nsobo oro edisịmde ererimbot Satan ete: “Mme idụt ẹyefiọk ẹte ke ami [ndi] Jehovah.” (Ezek. 39:7) Man mme idụt ẹfiọk emi, oyom mme asan̄autom Abasi ẹka iso ẹtịn̄ enyịn̄ ye uduak esie ẹnọ “kpukpru idụt ye esien ye usem ye obio.”—Edi. 14:6, 7.
4. Didie ke ẹda utom ukwọrọikọ ẹbiere ikpe ẹnọ mme owo?
4 Se Ẹdade Ẹbiere Ikpe: Ẹda edikwọrọ eti mbụk n̄ko ẹbiere ikpe ẹnọ mme owo. Apostle Paul ọkọdọhọ ke Christ Jesus ayada usiene ọsọk “mmọ eke mîfiọkke Abasi ye mmọ eke mîsụkke ibuot inọ eti mbụk Ọbọn̄ nnyịn Jesus.” (2 Thess. 1:8, 9) Ẹdibiere ikpe ẹnọ mme owo ẹtiene nte mmọ ẹnamde n̄kpọ ẹban̄a eti mbụk. Nso akwa mbiomo ke emi ọnọ mme asan̄autom Abasi ntem! Man ibọhọ ubiomikpe iyịp, ana nnyịn inam mme owo ẹfiọk etop Obio Ubọn̄ emi anyan̄ade uwem.—Utom 20:26, 27.
5. Didie ke utom ukwọrọikọ nnyịn owụt ke Abasi enyene mbọm?
5 Ukeme oro nnyịn isịnde man in̄wam mbọhọidụn̄ nnyịn enyene unyịme Abasi owụt ke Jehovah enyene mbọm. (1 Tim. 2:3, 4) Sia ifiọkde ke mme owo ke ẹnam ukpụhọde ke uwem mmọ, nnyịn inyene ndika mbịne mmọ ndien ndien, nnyụn̄ n̄kesịn udọn̄ nnọ mmọ ẹyom Jehovah ke adan̄aemi ini osụk odude. Edieke inamde ntre, nnyịn iyowụt ke imenyene ‘esịt mbọm nte Abasi nnyịn’ emi “mîyomke owo ndomokiet atak edi [oyomde] kpukpru owo ẹkabade esịt.”—Luke 1:78; 2 Pet. 3:9.
6. Nso ufọn ke nnyịn ibọ ito ndiyọhọ ke utom Jehovah?
6 Ndibọ Ufọn ke Idem Nnyịn: Ndiyọhọ ke utom Jehovah ekpeme nnyịn. Enye an̄wam nnyịn ‘nditie mbet nnyụn̄ nsọn̄ọ nnyene edidu usen Jehovah ke ekikere’ onyụn̄ ekpeme nnyịn mbak idiọk editịm n̄kpọ emi edibiat nnyịn. (2 Pet. 3:11-14; Titus 2:11, 12) Ntre, ẹyak nnyịn ‘isọn̄ọ ida, ikûyak n̄kpọ esịghede nnyịn, inyene ekese ndinam ke utom Ọbọn̄ kpukpru ini’ sia ifiọkde ite ke ukeme oro nnyịn isịnde ke utom ukwọrọikọ Christian ididịghe ikpîkpu.—1 Cor. 15:58.