Ikpehe 1: Ndinịm Ukpepn̄kpọ Bible Oro Enyenede Uforo
Nso Idi Ukpepn̄kpọ Bible?
1 Ke ofụri ererimbot, ikọt Abasi ke ẹnịm n̄kpọ nte ukpepn̄kpọ Bible miliọn itiokiet kpukpru ọfiọn̄. Ebede ke ndida nti usụn̄ unọ ukpep nnam n̄kpọ, nnyịn imekeme ndin̄wam nditọ ukpepn̄kpọ Bible emi ẹkọri ẹsịm uyakidem ye baptism ẹnyụn̄ ‘ẹkeme ndikpep owo en̄wen.’ (2 Tim. 2:2) Nte afo akpama ndin̄wam eyen ukpepn̄kpọ fo anam utọ n̄kọri oro? Ọtọn̄ọde ke nsiondi emi, Utom Obio Ubọn̄ Nnyịn eyesịne udịm udịm ibuotikọ oro ẹdinamde mme akpan ikpehe ke ukpepn̄kpọ Bible oro enyenede uforo an̄wan̄a.
2 Ini Oro Ẹkpetọtde Ukpepn̄kpọ Bible: Edieke afo osiode ibuotikọ ke kiet ke otu mme n̄wed oro ẹtorode ẹnọ ọtọn̄ọ ndineme nneme Bible ke nde ke nde kpukpru ini, okposụkedi nneme oro ẹdide mbio mbio, afo enịm ukpepn̄kpọ Bible. Ke akpanikọ, emi edi ukpepn̄kpọ Bible, idem ọkpọkọm enịm enye ke enyịnusụn̄ m̀mê ke urụk ukopikọ. Ẹkeme nditọt ukpepn̄kpọ oro ke ẹma ẹkenịm enye ikaba ọtọn̄ọde ke ini oro ẹkenamde ndutịm ukpepn̄kpọ ẹwụt ẹnyụn̄ ẹtịmde ẹkụt ẹte ukpepn̄kpọ emi ayaka iso.
3 Ediye uduot ekpri n̄wed Oyom ye n̄wed Ifiọk ẹdi mme n̄wed oro ẹdade ẹnịm ediwak ukpepn̄kpọ Bible. Ke ẹma ẹkekpep mmọ ẹkụre, edieke uyarade odude nte ke owo oro ke anam n̄kọri, idem ọkpọkọm edi sụn̄sụn̄, n̄ko nte ke enye owụt esịtekọm aban̄a se enye ekpepde, do ẹkeme ndida n̄wed Tuak Ibuot nọ Abasi n̄ka iso ke ukpepn̄kpọ oro. Ẹkeme ndikpep ediye uduot ekpri n̄wed oro Afo Emekeme Ndidi Ufan Abasi! ye mbon oro ẹnyenede esisịt ifiọkn̄wed m̀mê oro mîkemeke ndikot n̄wed.
4 Ukpepn̄kpọ Bible aman̄wam ediwak miliọn owo ẹkabade ẹdi mme ata mbet Jesus Christ. (Matt. 28:19, 20) Ebede ke ndida item oro ẹnọde ke mme nsiondi oro ẹdidide nsịn ke edinam, afo emekeme ndinịm mme ukpepn̄kpọ Bible oro ẹnyenede uforo.