Ẹkpebe Unenikpe Jehovah
1 ‘Jehovah ama edinen ikpe.’ (Ps. 37:28) Ntem, okposụkedi enye ama ekebiere ke ẹyesobo idiọk ererimbot emi, enye anam ndutịm man ẹbem iso ẹnọ ntọt. (Mark 13:10) Emi ọnọ mme owo ifet nditua n̄kpọfiọk n̄kabade esịt man ẹnyan̄a mmọ. (2 Pet. 3:9) Nte nnyịn imodomo ndikpebe unenikpe Jehovah? Nte unana inemesịt ye ndutụhọ oro ẹnọmọde ekpụk ubonowo ẹnụk nnyịn ndibuana idotenyịn Obio Ubọn̄ ye mbon en̄wen? (N̄ke 3:27) Ima oro imade unenikpe oyonụk nnyịn ndinyene ọyọhọ ebuana ke utom ukwọrọikọ.
2 Ẹkwọrọ Ikọ ye Unana Asari: Nnyịn ‘inam se inende’ ke ndinam kpukpru owo ẹfiọk uduak Abasi ye unana asari. (Mic. 6:8) Ana nnyịn ibiọn̄ọ anana-mfọnmma ntụhọ edibemiso nda nte mbon en̄wen ẹtiede ke enyọn̄ enyọn̄ mbiere ikpe nnọ mmọ. (Jas. 2:1-4, 9) Jehovah ‘oyom kpukpru owo ẹnyene edinyan̄a, ẹnyụn̄ ẹsịm ifiọk akpanikọ.’ (1 Tim. 2:4) Ikọ akpanikọ Abasi ekeme ndinam ikpọ ukpụhọde ke uwem mme owo. (Heb. 4:12) Ndifiọk emi ekeme ndinam nnyịn ika ibịne mme owo ye uko, idem ọkpọkọm mbon oro mîkọnọhọ n̄kpan̄utọn̄ ke mbemiso.
3 Eyenete an̄wan kiet oro akanamde utom ke ufọkurua ama okop ndịk aban̄a nte owo urua kiet oro esiwahade ndien ndien ekesikamade idem. Nte ededi, ke ini eti ifet ekeberede, enye ama odomo ndinọ owo emi ikọ ntiense mban̄a Paradise oro Abasi ọn̄wọn̄ọde. Enye ama etịn̄ uyat uyat ete ke imọ isinịmke ikpîkpu mbụk ke akpanikọ, n̄ko nte ke imọ idi owo nsọn̄ibuot oro enyenede mbumehe uda n̄kpọsọn̄ ibọk. Edi eyenete an̄wan oro ikakpaha mba. Usen kiet, owo emi ama obụp se eyenete an̄wan oro ekerede aban̄a nnyan idet imọ, ntre enye ama ada mbufiọk asian owo emi se Bible etịn̄de aban̄a n̄kpọ emi. (1 Cor. 11:14) Ke ndan̄nsiere, ekedi inem inem n̄kpọ n̄kpaidem ọnọ enye ndikụt owo emi nte akwatde ntan̄ebek esie onyụn̄ afatde idet oro! Owo oro ama ọdọhọ ẹkpep imọ Bible, ndien eyenete kiet ama okop inemesịt ndinam oro, enye ama anam n̄kọri adade esịm uyakidem ye baptism. Ukem nte owo emi, ediwak mbon oro ẹnamde n̄kpọ Jehovah mfịn ẹwụt esịtekọm ẹban̄a n̄kaiso ukeme ofụri esịt mbon oro ẹkedade etop Obio Ubọn̄ ẹsọk mmọ.
4 Ke mîbịghike, Jehovah ọyọsọhi ukwan̄ido efep ke isọn̄. (2 Pet. 3:10, 13) Ke esisịt ini oro osụhọde, ẹyak nnyịn ikpebe unenikpe Jehovah ebe ke ndinọ kpukpru owo ifet ndibọhọ nsobo oro asakde iso ese idiọk ererimbot Satan.—1 John 2:17.