Fori Ukeme Ufiọkn̄kpọ Fo

¹ Akama-mfụhọ ukperedem ini emi nnyịn idude idahaemi amada ikpọ mfịghe ye n̄kpọsọn̄ idomo etiene ikọt Abasi ke kpukpru ebiet. (2 Tim. 3:1-5) Kpukpru nnyịn imoyom nsịnudọn̄ man isọn̄ọ ida ke mbuọtidem. (1 Cor. 16:13) Ye un̄wam Jehovah, nnyịn imekeme ndinam ntre nte nnyịn ikade iso ndikop Ikọ esie kpukpru ini, iberide edem ke spirit esie, inyụn̄ isọn̄ọde iyịre ye esop esie.—Ps. 37:28; Rome 8:38, 39; Edi. 2:10.

² Ye eti ntak, ẹma ẹtat ibuotikọ oro “Ẹkọri Ẹkabade Ikpọ Owo ke Ukeme Ufiọkn̄kpọ” ke ndutịm Usen Akpan Mbono emi osụk ebede mi. Enye ọkọkọn̄ọ ke 1 Corinth 14:20, ke ebiet emi nnyịn ikotde mme ikọ apostle Paul emi: “Nditọ-ete mi, ẹkûdi nditọwọn̄ ke ekikere, edi ke edinam ibak ẹtie nte nsek nditọ; edi ke ekikere ẹtie nte ikpọ owo.” Nso ke afo ekekere aban̄a ndutịm oro?

³ “Nso n̄kpọ nsịnudọn̄ ke emi ekedi ntem!” “Emi ekedi nnennen n̄kpọ oro nnyịn ikoyomde!” Mmọ emi ẹdi iba ke otu ikọ oro ẹketịn̄de. Owo kiet emi mîkakam idịghe Ntiense, oro okodụkde usen akpan mbono oro man ese nte eyen esie an̄wan emi edide isua 12 anade baptism ọkọdọhọ ete ke imọ ima inen̄ede ikop inemesịt ke ndutịm oro ndien ke imokụt nte enye edinyenede ufọn ọnọ ubon imọ. Nte etie fi ntre ke idem? Ẹyak nnyịn iti ndusụk akpan n̄kpọ ke ndutịm oro.

⁴ Oyom Nnennen Ifiọk Man Ẹfori Ukeme Ufiọkn̄kpọ: Ke utịn̄ikọ ediberede oro, “Fori Mme Ukeme Ufiọkn̄kpọ Fo Idahaemi,” nso ke etịn̄ikọ okodori nsọn̄uyo nte edide se ẹyomde ke ndise mban̄a mme n̄kpọ-ata eke usen mfịn? Ẹyom se ikande ukeme ufiọk n̄kpọ. Ana nnyịn ifori inyụn̄ inam ukeme ifiọk Bible nnyịn otụn̄ọ, mbak kpukpru idiọkn̄kpọ oro nnyịn isobode ẹdikan nnyịn ubọk. Mbufiọk emi oyom ndausụn̄ Abasi. Ukem nte andiwet psalm, ana nnyịn iben̄e Jehovah ke akam ite anam nnyịn ifiọk mme ibet ye mme n̄kpọ editi esie man nnyịn ikeme ndinam n̄kpọ esie ke ofụri esịt.—Ps. 119:1, 2, 34.

⁵ Ke ikpehe oro eketienede, esenyịn circuit ama owụt ete ke ebede ke Ikọ ye esop esie, Jehovah ọnọ nnyịn “Mme Un̄wam Ndikọri N̄kabade Akwa Owo ke Ifiọk Bible.” Ẹkekabade ifiọk nte “ukeme ndida n̄kụt n̄kpọ nnyụn̄ mfiọk se ibuanade ebe ke ndifiọk mme ebuana oro nsio nsio ikpehe ye ofụri n̄kpọ ẹnyenede, ke ntem etịmde ọfiọk enye.” Anie ekeme ndin̄wam nnyịn ndifori ukeme emi? Jehovah ọnọ mme enọ ke owo man ẹn̄wam nnyịn ndinam n̄kọri eke spirit. (Eph. 4:11, 12) Esop esie eke isọn̄ esịn udọn̄ ọnọ nnyịn ndikot Ikọ Abasi kpukpru usen ndinyụn̄ ndụk kpukpru mme mbono esop kpukpru ini. (Ps. 1:2) Ẹkpep nnyịn nte ikpakamade Bible ye mme n̄wed Christian nnyịn ke ọkpọkpọ ukpepn̄kpọ ye ukpepn̄kpọ ubon ọkọrọ ye editịm idem nnọ mme mbono esop ye utom an̄wautom. Nte afo emesibọ ufọn oto kpukpru ndutịm emi? Nte afo ke aka iso enyene ọkpọkpọ ndutịm edikot Bible ofụri ini? Emi edi akpan n̄kpọ edieke anade nnyịn itre nditiene mme edu, n̄kon̄ine, mme ukpepn̄kpọ akwaifiọk, ye mme abian̄a abian̄a odudu ererimbot.—Col. 2:6-8.

⁶ Ana Inọ Ukeme Ufiọkn̄kpọ Nnyịn Ukpep: Ke akpa utịn̄ikọ esie, oro ibuotikọ ekedide “Kpeme Idaha eke Spirit ebe ke Ndinọ Mme Ukeme Ikike Fo Ukpep,” etịn̄ikọ oro otode-to edi ama anam an̄wan̄a nte ke mbon oro ẹdude ke ererimbot ikemeke ndidiọn̄ọ se inende ye se ikwan̄ade. (Isa. 5:20, 21) Emi oto mmọ ndisịn ndinen idaha Abasi. Ke edide isio, nnyịn emi ima ikọbọ ukpep ke n̄kan̄ eke spirit ke esop Jehovah imọdiọn̄ọ idaha Abasi, emi ọnọde mme edinam ye edu uwem nnyịn ndausụn̄. Ntem, nnyịn idu ke idaha ndidomo mfiọk se ifọnde ye se inende ke enyịn Jehovah ye se idude ke n̄kemuyo ye mfọnmma uduak esie.—Rome 12:2.

⁷ Man ifep ntịme ntịme ekikere ererimbot emi ye idiọk utịp emi otode oro, ana nnyịn ika iso inọ ukeme ufiọkn̄kpọ nnyịn ukpep. Didie ke ẹkeme ndinam emi? Nte ẹwetde ke Mme Hebrew 5:12-14, apostle Paul ama ọsọn̄ọ etịn̄ ufọn edin̄wọn̄ se ikande sụk “mmọn̄eba” ikọ Abasi. Nnyịn imoyom ọkpọsọn̄ udia eke spirit, utọ nte enye emi nnyịn ibọde ito edikpep ntịn̄nnịm ikọ Isaiah ke Ukpepn̄kpọ N̄wed Esop. Ndien ana nnyịn isọp ndida se nnyịn ikpepde nsịn ke edinam ke uwem nnyịn. Ke ini nnyịn inamde ntre, nnyịn imenyene nsọn̄ọ nte ke edumbet ye mme idaha Jehovah ẹnen. Emi ọnọ ukeme ukere n̄kpọ nnyịn ukpep nditịm mfiọk se ifọnde ye se idiọkde.

⁸ Ke mfụhọ, ndusụk owo ẹmetuak ukot ẹduọn̄ọ ke n̄kan̄ eke spirit. Ntak-a? Mmọ iwụkke ntịn̄enyịn mmọ ke n̄kpọ oro ọfọnde onyụn̄ enende ke enyịn Jehovah. Nte utịp, mmọ ẹmekabade ẹdi mme andima mme edinam ekebe ukopikọ ye ekebe ndise emi N̄wed Abasi akpande, ikwọ oro asabarede owo, m̀mê idiọk odudu otode itie uneme nneme kọmputa. Ke ndinam n̄kpọ ye eti ibuot, nnyịn iyefep ndidi se odudu mme owo oro ẹdide oburobụt, ndisịme, m̀mê ndiọi owo akarade.—N̄ke 13:20; Gal. 5:7; 1 Tim. 6:20, 21.

⁹ Ana Mme Uyen Ẹdi “Nsek Nditọ ke Edinam Idiọk”: Ndutịm emi ekenyene ikpehe iba oro ẹkesịnde udọn̄ akpan akpan ẹnọ mme uyen ndifori ukeme ufiọkn̄kpọ mmọ. Etịn̄ikọ ama owụt nte ke edidi “nsek nditọ ke edinam idiọk” ọwọrọ ndinana ifiọk, oro edi, ndinana nduduọhọ nte nsek nditọ, ke ebuana ye mme n̄kpọ oro ẹdehede ke enyịn Jehovah. (1 Cor. 14:20) Ẹma ẹsịn udọn̄ ẹnọ kpukpru nnyịn ndinen̄ede ntịn̄ enyịn n̄kpeme nte nnyịn idade ini nnyịn inam n̄kpọ, man nnyịn ibiọn̄ọ kpukpru orụk idiọkn̄kpọ inyụn̄ ifep ndidi se mmọ ẹsabarede. (Eph. 5:15-17) Ẹma ẹsịn udọn̄ ẹnọ nnyịn ndikere mban̄a udomo ini oro nnyịn ibiatde ke ndikot mme n̄wed oro mîtịpke nnennen nnennen isịn ke n̄kọri ye ifiọk eke spirit nnyịn. Nte afo ama anam oro? Nso utịp ke emi ekenyene? Ke adianade ye edikot Bible ke usen ke usen, biere ndika iso n̄kot mme n̄wed oro esop ọnọde. Ndinam emi ayan̄wam kpukpru nnyịn, esịnede n̄kpri owo ‘ndinyene asian.’—N̄ke 4:7-9.

¹⁰ “Bọ Ufọn to Edida Mme Edumbet Bible Nsịn ke Edinam ye Mbufiọk”: Oro ekedi ibuotikọ akpatre utịn̄ikọ ke ndutịm Usen Akpan Mbono oro. Etịn̄ikọ oro otode-to edi ama anam an̄wan̄a nte ke Jehovah edi Andinọ mbufiọk emi ọnọde uwem, emi enen̄erede okon̄ akan eke ofụri ubonowo. Kam kere owo ndinyene ifet edibọ mbufiọk nto Jehovah! Enye ke ntatubọk ọnọ mbon oro ẹyomde enye ẹnyụn̄ ẹben̄ede enye ke esịt akpanikọ ye mbuọtidem. (N̄ke 2:3-5, 9; 28:5) Nte afo ke ọbọ ufọn oto enọ esie?

¹¹ Ẹma ẹsịn udọn̄ ẹnọ nnyịn ndikpep ndidiọn̄ọ mme edumbet nte nnyịn ikotde Bible. (2 Tim. 3:16, 17) Kpep mmọ ye ntịn̄enyịn man etịm ọfiọk se Jehovah ọdọhọde. Da ini nditie n̄kere mme edumbet emi nyụn̄ dọn̄ mmọ ke ekikere ye ke esịt fo. Emi ọyọnọ ukeme ufiọkn̄kpọ fo ukpep man afo ekeme ndikụt unen ke ini anamde mme ubiere ke uwem. (Josh. 1:8) Ẹyak nnyịn ikere iban̄a idaha ifan̄ emi ediwak owo ẹsobode inyụn̄ ise nte edida mme edumbet Bible nsịn ke edinam ekemede ndin̄wam nnyịn ndikụt unen.

¹² ‘Nte akpana ntiene ndusụk ido usịnen̄kpọ ye ukamaidem?’ N̄kon̄ine usịnen̄kpọ ye ukamaidem ererimbot emi esiwak ndiwụt edu nsọn̄ibuot. Utọ edu emi anam mme owo ẹsịne n̄kpọ oro mîdotke mînyụn̄ iyehe m̀mê man ẹdemede udọn̄ idan̄. Mme edumbet Bible ewe ẹdin̄wam nnyịn ndibiọn̄ọ mme utọ ntụhọ oro? Ke ima ikọnọ ukeme ufiọkn̄kpọ nnyịn ukpep, nnyịn iyekere iban̄a edumbet oro odude ke 1 Timothy 2:9, 10, ndisịne n̄kpọ “eke owụtde bụt ye eti ibuot . . . , koro oro odot ye [mme owo] emi ẹdọhọde ẹte imenyene uten̄e Abasi.” Mme edumbet efen oro ẹnyenede ebuana ẹsịne mbon oro ẹsiakde ke 2 Corinth 6:3 ye Colossae 3:18, 20.

¹³ ‘Nso ke n̄keme ndinam man nsọn̄ọ mbọbọ ubon mi?’ Eti nneme ke otu mme andibuana ke ubon edi akpan n̄kpọ. James 1:19 asian nnyịn ete: “Yak kpukpru owo ẹsọp ndikop ikọ, ẹkûsọp nditịn̄ ikọ, ẹkûsọp ndiyat esịt.” Oyom mme andibuana ke ubon ẹkpan̄ utọn̄ ẹnyụn̄ ẹtịn̄ ikọ ẹnọ kiet eken koro nneme ubon edide n̄kpọ edem mbiba. Idem ke ini se nnyịn itịn̄de edide akpanikọ, edieke ẹtịn̄de enye ibak ibak, ke edu n̄kohodeidem, m̀mê ye unana usọ, enye ekeme ndinọ unan akan ndikọk unan. Ntre edide nnyịn idi ebendọ m̀mê n̄wanndọ, ete m̀mê eka, m̀mê eyen, nnyịn ikpenyene ndiyak ikọ nnyịn “enyene inem ke esịt kpukpru ini, nte ẹsịnde inụn̄ ke esịt.”—Col. 4:6.

¹⁴ ‘Nte ami mmenyene edu uma-inyene?’ Uma-inyene edi mfịghe ererimbot oro anamde uwem owo awak n̄kukọhọ. Enye iberekede usụn̄ edinyene inemesịt. (Eccl. 5:10; Luke 12:15; 1 Tim. 6:9, 10) Man an̄wam nnyịn ifep afia uma-inyene, Jesus ama ekpep nnyịn akpan edumbet emi: Nam enyịn fo ẹnen̄ede ẹse. Ndidu uwem emi adade ukem ukem, emi mîwakke n̄kukọhọ abuana ndiwụk ntịn̄enyịn nnyịn ke mme ufọn n̄kpọ Obio Ubọn̄, inamde kpukpru n̄kpọ eken ẹdi udiana.—Matt. 6:22, 23, 33.

¹⁵ Se Uduak Nnyịn Ekpedide: Nnyịn imenyene ndinen edumbet oro ẹkemede ndiberi edem ke Ikọ Abasi man ada nnyịn usụn̄ ke ndinam mme ubiere. Oyom nnyịn ikpep mme edumbet emi, itie ikere mmọ, inyụn̄ ifiọk nte ikpadade mmọ isịn ke edinam ke uwem nnyịn. Ntem, ke ‘ndinọ ukeme ufiọkn̄kpọ nnyịn ukpep ndidiọn̄ọ se ifọnde ye se idiọkde,’ nnyịn iyọbọ ufọn inyụn̄ inọ Jehovah ukpono.—Heb. 5:14.