Nte Afo ke Ọbọ Ufọn?

¹ Ediwak miliọn owo mfịn ẹyom ndifiọk nte mmọ ẹkemede ndikan mme mfịna nnyụn̄ ndu inem uwem. Mmọ ẹsisịn ifịk ẹkot mme n̄wed unọ idem un̄wam mîdịghe ẹyom un̄wam ẹto mme otu ye mme esop ndibọ item ke nte ẹkpenamde uwem mmọ ọfọn akan. Eyedi ndusụk owo ẹkeme ndiwụt esisịt ufọn oro mmọ ẹbọde. Edi, etienede nte uwem etiede mfịn, nte mme owo ke ofụri ofụri ẹkpep ndidu inem uwem oro ọnọde uyụhọ ebe ke mme ndutịm unọ item owo? Ọsọsọn̄ ndidọhọ ntre!—1 Cor. 3:18-20.

² Ke n̄kan̄ eken, Andibot nnyịn ọnọ kpukpru mbon oro ẹdikpan̄de utọn̄ ata nti item ke mfọn. Jehovah oyom kpukpru owo ẹbọ ufọn ẹto ukpepn̄kpọ esie. Enye ọmọnọ Ikọ esie eke odudu spirit ke ntatubọk man ada ubonowo usụn̄ ke edinen ido, ndien enye anam ẹtan̄a eti mbụk Obio Ubọn̄ esie ke ofụri isọn̄. (Ps. 19:7, 8; Matt. 24:14; 2 Tim. 3:16) Ata uwem inemesịt enyene ebuana nnennen nnennen ye ndinịm mme ewụhọ Jehovah.—Isa. 48:17, 18.

³ Ndausụn̄ Jehovah enen̄ede ọfọn akan enye oro ẹnọde ke mme n̄wed unọ idem un̄wam m̀mê mme ndutịm edinam n̄kọri oro ererimbot ọnọde. Nnyịn imekeme ndinyene ata un̄wam ye mme nsinsi ufọn edieke nnyịn ibọde ọyọhọ ufọn ito mme enọ Jehovah nte ẹwụtde ke Ikọ esie ẹnyụn̄ ẹkpepde ke esop esie.—1 Pet. 3:10-12.

⁴ Bọ Ufọn to Mme Mbono Esop: Mfịn, Jehovah omowụt ata udọn̄ ke ndikpep nnyịn mme usụn̄ esie, ndien nnyịn ibọ ufọn ebe ke ndinam item esie. Mme mbono esop nnyịn ition eke urua ke urua ẹnọ uyarade ima ima edikere mban̄a Jehovah. Ke ini nnyịn idụkde mme mbono esop, ifiọk oro nnyịn inyenede iban̄a Abasi ọkọri. Nnyịn ikpep nte ikemede ndikpeme idem nnyịn ke idiọkn̄kpọ ebe ke ndisan̄a n̄kpere Jehovah. Ke usụn̄ emi ke nnyịn ikop idatesịt.

⁵ N̄kpọ efen efen ẹdu. Ke mme mbono esop nnyịn imekeme ‘ndinyene in̄wan̄în̄wan̄ esịt.’ (2 Cor. 6:13) Emi esịne ndifiọk mbon en̄wen ke esop. Nnyịn imọbọ ufọn ito nsịnudọn̄ edem mbiba, utọ nte enye oro apostle Paul ekewetde aban̄a ke leta esie oro ọkọnọde ẹsọk mbon Rome. (Rome 1:11, 12) Ke ini ekewetde n̄wed ọnọ ẹsọk mme Hebrew, enye ama ọsọn̄ọ eteme mbon oro ẹkemede ndidi ẹma ẹkọri edu edisịn itie ebuana Christian.—Heb. 10:24, 25.

⁶ Ẹbuan uyụhọ idatesịt eke uwem nnennen nnennen ye edinyene udọn̄ ke mfọnọn̄kpọ mbon en̄wen. Ẹsịn udọn̄ ẹnọ nnyịn ndiyom usụn̄ nditịp n̄kpọ nsịn ke inemesịt mbon en̄wen. Ke ntre, mme mbono esop Christian nnyịn ẹnen̄ede ẹdi kaban̄a ọkpọkpọ ufọn nnyịn ye kaban̄a ufọn mbon oro nnyịn inyenede eti itie ebuana ye mmọ. Ẹyom nnyịn ibuana ke ofụri esịt.

⁷ Ukem akpan n̄kpọ oro ke apostle Paul okosio owụt ke item oro enye ọkọnọde Timothy ke ini enye ekewetde ete: “Sịn idem nyene uten̄e Abasi.” (1 Tim. 4:7) Nnyịn imekeme ndibụp idem nnyịn ite: ‘Ndi ami ke nsịn idem? Ndi ami ke n̄kpep ndibọ ufọn nto se ami n̄kpepde ke mme mbono esop?’ Ibọrọ nnyịn ẹdidi ih edieke nnyịn inọde ntịn̄enyịn ke se nnyịn ikopde ke mme mbono esop inyụn̄ idomode ndida se nnyịn ikpepde nsịn ke edinam. Ye enyịn mbuọtidem, ana nnyịn ikeme ndikụt se ibede nditọete oro ẹnọde ukpep inyụn̄ ikụt Jehovah nte Akwa Anditeme ikọt esie.—Isa. 30:20.

⁸ Ufọkn̄wed Utom Ukara Abasi ye Esoputom: Ẹdiomi mbono esop iba emi man ẹn̄wam nnyịn inyene uforo ke utom ukwọrọikọ Christian. Ufọkn̄wed Utom Ukara Abasi edi kpasụk ke ntak oro—ufọkn̄wed emi enyenede nditọ ufọkn̄wed oro ẹbọde ukpep ye item kpukpru ini. Afo emenyene ifet ndiwụt n̄kọri fo nte owo oro etịn̄de ikọ an̄wan̄wa ye andikpep Ikọ Abasi. Edi man ọbọ n̄kponn̄kan ufọn oto ufọkn̄wed oro, ana afo esịn enyịn̄, odụk, abuana kpukpru ini, onyụn̄ esịn esịt ke se ẹnọde fi anam. Ndibọ nnyụn̄ nda item oro ẹnọde nsịn ke edinam ayan̄wam fi anam n̄kọri.

⁹ Esoputom ekpep nnyịn nte utom ukwọrọikọ Christian edide akpan n̄kpọ onyụn̄ owụt nnyịn nte nnyịn ikemede ndibuana ke utom edinam mme mbet. Nte afo ye ubon fo ẹmebọ ufọn ọyọhọ ọyọhọ ẹto se ẹnamde ke mbono esop iba emi? Ebe ye n̄wan ẹdide Christian ẹdọhọ ẹte: “Ke Esoputom kiet, nnyịn ima ikop ke nnyịn ikpenyene ndineme itien̄wed eke usen ke usen nte ubon. Nnyịn ikesinamke emi, edi idahaemi nnyịn ke inam.” Didie ke mmọ ẹbọ ufọn? Mmọ ẹdọhọ ẹte: “Nnyịn imokụt ke nneme nnyịn ke okpokoro udia enen̄ede enyene inem. Mfan̄a idụhe aba ke ini udia.” Nte idem n̄kpri nditọ mmọ ẹbọ ufọn ẹto mme mbono esop? Ih. Eka ọdọhọ ete: “Ana in̄wan̄în̄wan̄ nte ke mme mbono esop ẹnen̄ede ẹtụk nditọ nnyịn. Urua kiet nnyịn ima imụm eyeneren nnyịn edide isua itiokiet nte osude nsu. Edi urua oro, utịn̄ikọ item ke mbono esop akaban̄a usu nsu. Ye akwa mfụhọ ke iso esie, eyeneren nnyịn ama emenede enyịn ese ete esie onyụn̄ okop ọkpọsọn̄ bụt. Enye ama ekpep n̄kpọ, ndien nnyịn ikenyeneke aba mfịna ke oro ebede.”

¹⁰ Eyenete an̄wan kiet edide asiakusụn̄ ọdọhọ ete ke imọ imenem esịt nte ke ẹsinọ mme ekikere ke Esoputom ndifori utom ukwọrọikọ nnyịn. Ntak-a? Enye anam an̄wan̄a ete: “Ama esifek mi. Ndusụk ini n̄kesikere ke ekikere oro ẹnọde ke Utom Obio Ubọn̄ Nnyịn idinyeneke ufọn. Edi ke Esoputom, ke ini n̄kokopde ẹdọhọde nnyịn ẹte idomo enye ise, mma n̄kop nduaidem ndida mme ekikere oro nnam n̄kpọ. Enye anam utom ukwọrọikọ edi n̄kpọ nduaidem!” Ke ama akada ekikere ẹkenọde ẹte ẹdomo nditọn̄ọ ukpepn̄kpọ Bible ke akpa ediwaha anam n̄kpọ ke ediwak urua, enye ama ọtọn̄ọ ukpepn̄kpọ ke akpa ediwaha ye eyenan̄wan oro ekesibọn̄de akam oyom un̄wam.

¹¹ Ke ini afo okopde utịn̄ikọ oro esịnede item Bible kaban̄a ọkpọkpọ edimek oro afo anamde, nte afo emesikere ke Jehovah etịn̄ ikọ oro ọnọ fi nnennen nnennen? Eyenete eren kiet ekekere ntre. Enye ọkọdọhọ ete: “Ndondo emi ke mbono esop kiet, ẹma ẹnọ utịn̄ikọ oro eyenete kiet ekenemede mme orụk unọ idem inemesịt oro ẹdotde ye mme Christian ye mbon oro mîdotke. Ami mma nsima ndise utop ita ke ekebe ndise. Edi ke mbono esop oro ama akasuana, mma mbiere nte ke mbre mbuba emi esịne ke otu unọ idem inemesịt oro mîdotke ye mme Christian. Ntre ami nsisehe enye aba.” Ih, okposụkedi eyenete emi ekenyenede ima ọnọ n̄kpọ oro etiede afai afai, enye ke nsụhọdeidem ama etiene ndausụn̄ Jehovah.—Ps. 11:5.

¹² An̄wan̄wa Mbono Esop, Ukpepn̄kpọ Enyọn̄-Ukpeme, ye Ukpepn̄kpọ N̄wed Esop: Mme utịn̄ikọ an̄wa oro nnyịn isikopde ke urua ke urua ẹsịne nsio nsio ibuot nneme Bible. Nso ke afo ekpep oto mme utịn̄ikọ emi? Christian ebe kiet ama etịn̄ mme ufọn oro enye ọkọbọde ete: “Utịn̄ikọ an̄wa kiet ama osion̄o kpukpru mbun̄wụm spirit owụt. Etịn̄ikọ ama etịn̄ aban̄a idemesie ete ke man otodo ikọri mme mbun̄wụm emi, imọ isisio akpan edu kiet inyụn̄ inam n̄kpọ iban̄a oro ke urua kiet. Ke utịturua oro, imọ itie ikere nte imọ ikanamde n̄kpọ ke ndiwụt mbun̄wụm oro ke mme edinam imọ eke usen ke usen. Ekem imọ inam n̄kpọ iban̄a edu efen ke urua efen. Ami mma mma ekikere oro nnyụn̄ ntọn̄ọ ndinam oro ke idemmi.” Nso editịm nda se ẹkpepde nsịn ke edinam ke oro ekedi ntem!

¹³ Ukpepn̄kpọ Enyọn̄-Ukpeme ekpep nnyịn ndida mme edumbet Bible nsịn ke edinam ke nsio nsio idaha ke uwem. Emi an̄wam nnyịn ndinam ekikere ye esịt ẹna sụn̄ kpa ye mme editịmede esịt eke uwem. Ukpepn̄kpọ Enyọn̄-Ukpeme n̄ko anam nnyịn isan̄a ikpat kiet ye akpanikọ oro ọkọride-kọri. Ke uwụtn̄kpọ, nte nnyịn ikọbọhọ ufọn ito mme ibuotikọ ukpepn̄kpọ Enyọn̄-Ukpeme eke May 1, 1999, oro ẹkedọhọde: “Mme N̄kpọ Ẹmi Ẹnyene Ndiwọrọ,” “Yak Enye eke Okotde N̄wed Etịm Ọfiọk,” ye “Ẹdu ke Ukpeme Ẹnyụn̄ Ẹsịn Ifịk!” Didie ke mme ukpepn̄kpọ emi ẹketụk fi ọkpọkpọ? Nte afo omowụt ebe ke mme edinam fo nte ke afo amanam mme item Jesus ẹban̄ade ini iso? Nte afo ke etịm idem ọnọ udomo emi edide ke iso ke ini nnyịn idikụtde “n̄kpọ mbubiam nsobo . . . nte adade ke edisana ebiet”? (Matt. 24:15-22) Nte mme utịtmbuba ye usụn̄ uwem fo ẹwụt nte ke se idide ata akpan n̄kpọ ikan inọ fi idịghe ndikọ inyene obụkidem mbon, edi edi ndinam enyịn̄ Jehovah asana? Nte nnyịn ikpepke ndibọ ufọn idahaemi ito Ukpepn̄kpọ Enyọn̄-Ukpeme?

¹⁴ Kere adan̄a n̄kpọ oro nnyịn isikpepde ke Ukpepn̄kpọ N̄wed Esop ke urua kiet kiet. Idahaemi nnyịn ikpep n̄wed Daniel eke Bible. Ke ọfiọn̄ inan̄ emi nnyịn ikpepde n̄wed Bible oro, nte nnyịn ikwe nte mbuọtidem nnyịn ọkọride ke urua kiet kiet? Ukem nte Daniel edima prọfet Jehovah oro, nnyịn imọsọn̄ọ mbuọtidem nnyịn man nnyịn ikpekeme ndiyọ.

¹⁵ Jehovah Ekpep Nnyịn Ndidu Uwem Idatesịt: Nnyịn imesifep ekese iduọesịt ke ini ikpan̄de utọn̄ ke mme ewụhọ Abasi. Akan oro, nnyịn imọfiọk se ndidu uwem idatesịt enen̄erede ọwọrọ. Ke nditiene ndausụn̄ Jehovah, nnyịn imakabade idi mme andibuana ke utom esie, idịghe sụk mme andidada nse. Ndien mbon oro ẹnamde utom Abasi ẹdi mbon oro ẹkopde inemesịt.—1 Cor. 3:9; Jas. 1:25.

¹⁶ Ke mme mbono esop, kere ban̄a nte afo edidade mme n̄kpọ oro afo okopde ke mme mbono esop isịn ke edinam ifịk ifịk. (John 13:17) Nam n̄kpọ Abasi ye ifiopesịt, ke ofụri esịt fo. Idatesịt fo oyokpon. Uwem fo eyenyene uforo onyụn̄ enyene uduak akan. Ih, afo ọyọbọ ufọn.