Mme Mbono Esop Ẹnyene Ufọn Ẹnọ N̄kparawa Owo
1 N̄kaiferi kiet ọkọdọhọ ete: “Ndusụk ini nsikere ke n̄kpọ ẹsọn̄ ye n̄kparawa owo ẹkan ke uwem. Mme owo oro ẹnamde use, ẹdade n̄kpọsọn̄ ibọk, ẹnyụn̄ ẹn̄wọn̄de n̄kpọsọn̄ mmịn ẹdu ẹkan nnyịn ẹkụk.” Ndi nte afo ekerede edi oro? Edieke edide ntre, afo ekere ke nso idin̄wam fi ndin̄wana ye ndiọi odudu emi? Afo omoyom mbuọtidem, ọkpọsọn̄ mbuọtidem kaban̄a nte mme usụn̄ Jehovah ẹnende, koro ke ẹsiode oro ẹfep “owo ikemeke ndinem Abasi esịt.” (Heb. 11:6) Ndidụk mme mbono esop ayan̄wam fi ndisọn̄ọ mme edinịm ke akpanikọ Christian fo ye ubiere fo ndifep ndinam se idiọkde.
2 Mme Mbono Esop Ẹnyene Ekese N̄kpọ Ndinọ Fi: Nso isinam edinem udia ye mme n̄kpet n̄kpet ufan ẹdi n̄kpọ inemesịt? Nte idịghe ndidian eti udia ye inem inem ebuana ke emem emem idaha? Ọfọn, mme mbono esop nnyịn ẹnam nnyịn ikop ukem inemesịt oro, edi ke usụn̄ ifiọk eke spirit.
3 Mme n̄kpọ oro ẹnemede ke mme mbono esop ẹdi se ibọpde-bọp, ọtọn̄ọde ke mme n̄kpọ oro ẹnyenede ebuana ye mme mfịna uwem ofụri usen esịm edikpep mme aduai-owo-idem ntịn̄nnịm ikọ Bible. Ẹsinọ nti item oro ẹkpepde fi nte ekemede ndidu uwem ke mfọnn̄kan usụn̄ nnyụn̄ nse mban̄a mme mfịna oro afo osobode. Nsan̄a oro ẹkụtde ke mme mbono esop ẹdi mfọnn̄kan ke ebiet ekededi, ndien idaha eke spirit oro odude edi inem inem onyụn̄ ọnọ ukpeme. (Ps. 133:1) Eyịghe idụhe uyen kiet ọkọdọhọde ete: “Ami nsika ufọkn̄wed kpukpru usen, ndien enye anam idem emem mi. Edi mme mbono esop ẹtie nte ebiet ubọhọ ke desat, emi anamde mfiak n̄kop nsọn̄idem ndiyọ ke ufọkn̄wed ke usen efen.” Uyen efen ọkọdọhọ ete: “Mmokụt nte ke n̄kpet n̄kpet itie ebuana ye mbon oro ẹmade Jehovah an̄wam mi ndisịk n̄kpere enye.”
4 Ke ndisịn enyịn̄ ke Ufọkn̄wed Utom Ukara Abasi, afo emekpep nditan̄ ntọt Bible mbok ọtọkiet, etịm enye esịn ke utịn̄ikọ, ndien ekem etịn̄ enye ke ido nneme ọnọ otuowo ke Ufọkmbono Obio Ubọn̄. Kere ban̄a ufọn edidi se ẹnọde ukpep ndikpep akpanikọ oro anyan̄ade uwem ke Ikọ Abasi ye usọ! M̀mọ̀n̄ en̄wen ke n̄kparawa owo ẹkeme ndibọ utọ eti ukpep oro?
5 Nte Ẹkemede Ndibọ Ata Ekese Ufọn Nto Mme Mbono Esop: Man ẹbọ ata ekese ufọn ẹto mme mbono esop, akpan n̄kpọ ita ẹbuana. Mmọ emi ẹdi ntịmidem, editiene mbuana, ye edida nsịn ke edinam.
6 Tịm Idem Nọ Mmọ: Sio ini nịm kpukpru ini nditịm idem nnọ mme mbono esop. Kûyak utom ufọkn̄wed, utom ibio ini, m̀mê mme edinam unọ idem nduọkodudu ẹbọ fi ini oro afo oyomde man ebem iso odụn̄ọde n̄kpọ oro ẹdinemede ke mbono esop kiet kiet. Edi n̄kpọ un̄wam ndinyene eti ndutịm ofụri ini. Akpa ye akakan, san̄a ikpat kiet ye ndutịm edikot Bible eke urua ke urua ke Ufọkn̄wed Utom Ukara Abasi. Oyom esisịt ini kpọt ke usen ke usen ndikot nnyụn̄ ntie n̄kere mme ibuot oro ẹnọde ẹkot. Sio ini nịm nditịm idem nnọ Ukpepn̄kpọ N̄wed Esop ye Ukpepn̄kpọ Enyọn̄-Ukpeme. Ndusụk owo ẹsinam emi ke nsụhọde n̄kaha usen kiet m̀mê iba mbemiso mme mbono esop oro. Adan̄a nte ekemede, nam kpa ntre ye mme ikpehe oro ẹdiomide ẹnọ Esoputom ke urua kiet kiet.
7 Tiene Buana ke Mmọ: Bible ọdọhọ ete ke ini Jesus ekedide isua 12 ke emana, ẹma ẹkụt enye ke temple, akpan̄de utọn̄, obụpde mme mbụme, onyụn̄ ọnọde mme ibọrọ. (Luke 2:46, 47) Ke ikọ efen, enye ama abuana ọyọhọ ọyọhọ. Afo eyenen̄ede ọbọ ufọn oto mme mbono esop ke ini afo esịnde ukeme nditiene mbuana ke mmọ.—N̄ke 15:23.
8 Oyom afo enen̄ede owụk ntịn̄enyịn ke se ẹkpepde ke mme mbono esop. Ndusụk ini ndikpan̄ utọn̄ ke utịn̄ikọ esisọn̄ akan ndinọnọ utịn̄ikọ. Ntak-a? Ekikere fo ekeme ndiyo ke ini owo efen etịn̄de ikọ. Didie ke afo ekeme ndikan emi? Ebe ke ndiwet mme akpan n̄kpọ. Wet mme akpan n̄kpọ oro afo oyomde ndifiak nse nte ini akade. Ndiwet mme akpan n̄kpọ ayan̄wam fi owụk ekikere fo ke ndutịm. N̄ko, kụbọde mme itien̄wed Abasi, nyụn̄ tiene se mmọ ke ini etịn̄ikọ okotde.
9 Adianade do, nam edi utịtmbuba fo ndinyene ebuana ke nneme mbụme ye ibọrọ kiet kiet ke mme mbono esop. Afo ayakam enen̄ede ọbọ ufọn edieke afo etịmde ekere se afo oyomde nditịn̄. Mme N̄ke 15:28 ọdọhọ ete: “Esịt eti owo etịm ekere ndibọrọ.”
10 Da Se Ekpepde Sịn ke Edinam: Akpatre n̄kpọ edi ndikụt nte ke se afo ekpepde ‘anam utom ke esịt fo.’ (1 Thess. 2:13) Nte afo adade nti n̄kpọ oro afo ekpepde ke mbono esop kiet kiet esịn ke edinam, afo eyetịm asan̄a ekpere Jehovah Abasi. Enye eyedi ata owo ọnọ fi, ndien afo eyenyene akwa idatesịt ye uyụhọ nte afo ‘asan̄ade ke akpanikọ,’ anamde enye edi okwo.—3 John 4.
11 N̄kpri nditọete iren ye iban, nte mbufo ẹtịmde idem ẹnọ mme mbono esop, ẹtienede ẹbuana ke mmọ, ẹnyụn̄ ẹdade se mbufo ẹkpepde ẹsịn ke edinam kpukpru ini, mbufo ẹyenen̄ede ẹkop inem mbono esop. Ke ukem ini oro, mbufo ẹyebọ kpukpru ufọn oro mbufo ẹkemede ẹto mmọ. Mbuọtidem mbufo ọyọsọn̄, kpasụk ntre ye ubiere mbufo ndinam akpanikọ nnọ Ete mbufo eke heaven, Jehovah.—Ps. 145:18.