“Ẹtat Ubọk, Ẹnyịme Ndinọ Owo N̄kpọ”
1 Ke ediwak isua ikie ẹmi ẹkebede apostle Paul ama eteme Timothy ete esịn udọn̄ ọnọ ekemmọ mme andinịm ke akpanikọ ete “ẹfọn ido, ẹnyụn̄ ẹnam nti utom uwak-uwak, ẹnyụn̄ ẹtat ubọk, ẹnyịme ndinọ owo n̄kpọ.” (1 Tim. 6:18) Paul ama eti mme Christian ẹdide mme Hebrew n̄ko ete “ẹkûfre ndinam eti n̄kpọ ndinyụn̄ mfọn ido ye owo.” (Heb. 13:16) Ntak emi enye ekewetde mme item ẹmi? Koro enye ama ọfiọk ete ke “ubọn̄ ye ukpono ye emem ẹyedoro kpukpru owo eke ẹnamde eti ido.”—Rome 2:10.
2 Ke ntak idaha esie nte Andibot, Jehovah Abasi edi Andinyene kpukpru n̄kpọ. (Edi. 4:10b) Nnyịn ke akpanikọ imowụt esịtekọm ke se enye adade inyene esie anam ke ufọn nnyịn. Kpa ye edu unana esịtekọm eke ediwak owo, Ata Edikon̄ ke aka iso ndiyak kpukpru owo ẹbọ ufọn ẹto mme enọ ntatubọk esie man ẹdu uwem. (Matt. 5:45) Enye ama akam ọnọ ata edima Eyen esie nte uwa man nnyịn ikpenyene uwem nsinsi. Nte ima oro ẹwụtde nnyịn ikponụkke nnyịn ndiwụt esịtekọm ebe ke ndifọn ido ye mme ekemmọ owo?—2 Cor. 5:14, 15.
3 Nso ke Nnyịn Ikeme Ndinọ? Odot nnyịn ndida se ededi oro nnyịn inyenede nnam n̄kpọ ke usụn̄ oro enende ke enyịn Abasi. Ke akpanikọ nnyịn iyom ndinọ utom Obio Ubọn̄ ofụri ererimbot ibetedem ke n̄kan̄ eke obụk ye eke spirit. Nte ededi, eti mbụk edi ata eti n̄kpọuto emi owo ekededi ekemede ndinyene, koro enye edide “odudu Abasi, emi ọwọrọde edinyan̄a.” (Rome 1:16) Ebede ke ndida ini ye inyene nnyịn kpukpru ọfiọn̄ mbuana ke utom edikwọrọ ikọ ye edinọ ukpep, nnyịn imekeme ndibuana n̄kpọuto eke spirit emi ye mbon en̄wen, adade ekesịm mmọ ndinyene nsinsi uwem.
4 Jehovah enen̄ede okop inemesịt ke ini nnyịn in̄wamde mme ubuene. Enye ọn̄wọn̄ọ ndinọ mme edidiọn̄, enye onyụn̄ eti nnyịn n̄ko ete: “Inyene ididoroke ke usen iyatesịt: edi eti ido osio owo ke n̄kpa.” (N̄ke 11:4; 19:17) Ndinọ utom Obio Ubọn̄ ibetedem ke n̄kpọ obụkidem nnyụn̄ nnyene ọyọhọ ebuana ke edikwọrọ eti mbụk ẹdi mme utịbe utịbe usụn̄ oro nnyịn ikemede ndiwụt nte ke nnyịn imenen̄ede itat ubọk, inyịme ndinọ owo n̄kpọ.