‘Utom Eke Ẹnamde Idiwọrọke Idi Ikpîkpu’
1 Nso ọnọ-nsịnudọn̄ ekikere ke emi edi ntem! Utom Jehovah emi ẹnamde idịghe ke ikpîkpu. (1 Cor. 15:58) Ke edide isio, kere nte mme owo ẹnamde utom ọkpọsọn̄ ke anyan ini, ẹdomode ndifori idaha mmọ ke uwem m̀mê idaha uforo mmọ. Mmọ ẹkeme ndibịne akwa ifiọkn̄wed ke ediwak isua mîdịghe ẹdụk ufụn ẹnọ utom man ẹkụt unen ke n̄kan̄ eke obụkidem. Edi, ke ntak “ini ye unọmọ,” mmọ ẹkeme nditre ndinyene uku oro mmọ ẹyomde tutu amama, mîdịghe ẹkeme ndinyịk mmọ ndinyene n̄kpọ obụkidem oro osụhọrede akan se mmọ ẹkeyomde. Nte “idomo eke mîwọrọke usụn̄,” ọkpọsọn̄ utom mmọ edi ikpîkpu. (Eccl. 1:14; 9:11) Do, edi akpan n̄kpọ didie ntem ete nnyịn iyọhọ ye n̄kukụre utom oro mîdiwọrọke idi ikpîkpu koro enye enyenede nsinsi ufọn!
2 Utom Oro Enen̄erede Enyene Ufọn: Ndikwọrọ eti mbụk Obio Ubọn̄ Abasi edi ata akpan utom ke isọn̄. Enye edi utom emi anade ẹnam, edide mme owo ẹkpan̄ utọn̄ m̀mê ikpan̄ke. Nnyịn iyom ndidọhọ nte Paul ọkọdọhọde ete: “Iyịp owo baba kiet ikọbọke mi. Koro mmen̄kefeheke ndikwọrọ ofụri uduak Abasi nnọ mbufo.”—Utom 20:26, 27.
3 Nso inemesịt esidu ntem ke ini mme owo ẹkpan̄de utọn̄ ẹnyụn̄ ẹnamde n̄kpọ ẹban̄a etop Obio Ubọn̄! N̄kaiferi kiet ama ataba eyeneka eka esie an̄wan ke n̄kpa. Enye ama esikere m̀mê eyeneka eka imọ akaka m̀mọ̀n̄—heaven m̀mê hell? Enye ama ọbọn̄ akam ọnọ Abasi oyom un̄wam, adade enyịn̄ oro Jehovah, nte eyeneka esie ekekpepde enye ndinam. Ikebịghike enye ama ekpep Bible onyụn̄ odụk mme mbono esop Christian. Enye ama enyene obufa ekikere aban̄a uwem ofụri ofụri onyụn̄ etre ndidụk nsan̄a ye otu mme abiatibet ke efak. N̄kaiferi emi ama etre ndin̄wọn̄ sika, ndida n̄kpọsọn̄ ibọk, ye ndiyịp inọ. Enye ọdọhọ ete: “Ima nnyenede nnọ Jehovah kpọt akanam mi n̄kpọn̄ utọ idiọk usụn̄ uwem oro. Jehovah kpọt ekekeme ndinọ mi idotenyịn nsinsi uwem ke akwa mbọm esie.” Enye ibiatke aba uwem esie ke ndibịne mme ikpîkpu n̄kpọ.
4 Idem ke ini mme owo ẹsịnde ndikpan̄ utọn̄, afo osụk ananam se idotde. Mmọ ẹfiọk ẹte ke Mme Ntiense Jehovah ẹmewaha ẹdise mmimọ. Emi ọsọn̄ọ nsọn̄ọnda, edinam akpanikọ, ye ima fo. Ntre, nte utom emi afo anamde ke Ọbọn̄ edi ikpîkpu? Baba-o!