Ekese Ifet Oro Inyenede Nditoro Jehovah
1. Obufa ndutịm ewe edin̄wam nnyịn ‘inen̄ede itoro Jehovah’?
1 Ke ọfiọn̄ March emi ekebede, ẹma ẹnam obufa ndutịm man mme asuanetop oro ẹnamde utom usiakusụn̄ unọ un̄wam ẹkeme ndinọ hour 30 ke ọfiọn̄ March ye April kpukpru isua ye ke ọfiọn̄ oro esenyịn circuit odiomide ndidi ndise esop. Edieke mme usen oro esenyịn circuit edide edise esop ebede ke ọfiọn̄ kiet odụk ọfiọn̄ efen, mme asuanetop oro ẹyomde ndinọ hour 30 ẹkeme ndimek m̀mê ewe ke otu ọfiọn̄ iba oro ke mmọ ẹdinam utom usiakusụn̄ unọ un̄wam. Kpukpru mme asiakusụn̄ unọ un̄wam ẹkeme ndidụk mbono emi esenyịn circuit esinịmde ye mme asiakusụn̄ ofụri ini ye mme akpan asiakusụn̄, ọtọn̄ọde ke ntọn̄ọ tutu esịm utịt. Emi ọwọrọ ke edieke nnyịn mîkemeke ndinọ hour 50, imosụk ikeme ‘ndinen̄ede ntoro Jehovah’ nte mme asiakusụn̄ unọ un̄wam utịm ikanan̄ ke isua inyụn̄ inọ hour 30!—Ps. 109:30; 119:171.
2. Nso ufọn ke mbon oro ẹdinamde utom usiakusụn̄ unọ un̄wam ke ini edidi esenyịn circuit ẹdibọ?
2 Ke Ini Esenyịn Circuit Edide Edise Esop: Idahaemi ediwak owo ẹyekeme ndinam utom usiakusụn̄ unọ un̄wam ke ini esenyịn circuit edide edise esop ẹnyụn̄ ẹtiene ẹbọ nsịnudọn̄ oro mme owo ẹsibọde ke ini ẹsan̄ade ye enye ke an̄wautom. (Rome 1:11, 12) Ediwak mme asiakusụn̄ unọ un̄wam ẹyema ndida nduọkodudu usen kiet ke urua oro man mmọ ẹsan̄a ye esenyịn circuit. Mbon eken oro ẹsinamde utom idịbi udia ke ufọturua ẹkeme ndibụp enye m̀mê enye ayasan̄a ye mmimọ ke Saturday m̀mê Sunday. N̄ko, mme asiakusụn̄ unọ un̄wam ẹyenen̄ede ẹbọ nsịnudọn̄ ke ini ẹtienede ẹdụk mbono oro ẹsinịmde ye mme asiakusụn̄ ofụri ini ye mme akpan asiakusụn̄!
3. Ntak emi ini Editi edide ata eti ini ndinam utom usiakusụn̄ unọ un̄wam?
3 Ke Ọfiọn̄ March ye April: Mbon emi ẹkesinamde utom usiakusụn̄ unọ un̄wam ẹnyụn̄ ẹnọ hour 30 ke ọfiọn̄ kiet kpọt ke ini Editi ẹkeme ‘ndiwa uwa ekọm’ mmọ ke ọfiọn̄ iba idahaemi! (Heb. 13:15) Ọfiọn̄ March ye April ẹfọn etieti se ikpadade inam ekese ke an̄wautom nte asiakusụn̄ unọ un̄wam. Ke utọ ini emi kpukpru isua, nnyịn imesitiene ibuana ke ubịnikọt edikot mme owo ẹdidụk Editi. N̄ko-n̄ko, sia edide ediwak owo ẹsinam ekese ke an̄wautom ke ini Editi, imekeme ndinam utom ye nsio nsio mme asuanetop. Ke ẹma ẹkenịm Editi ẹma, nnyịn imesifiak ikese mbon oro ẹkewụtde udọn̄ emi ẹkedukde Editi inyụn̄ isịn udọn̄ inọ mmọ ẹdidụk akpan utịn̄ikọ an̄wa. Ndi esịt fo oyonụk fi ada ifet efen efen emi ebererede mi anam utom usiakusụn̄ unọ un̄wam?—Luke 6:45.