Mme Esenyịn Oro Ẹdade Usụn̄—Esenyịn Ufọkn̄wed Utom Ukara Abasi
1 Esenyịn Ufọkn̄wed Utom Ukara Abasi edi ebiowo ke n̄kan̄ eke spirit emi akpade utom ke ukwọrọikọ ye ukpepn̄kpọ emi onyụn̄ odotde ukpono ye edidianakiet nnyịn. (1 Tim. 5:17) Nso idi mme mbiomo esie?
2 Enye ese n̄kpọ aban̄a itie ubon n̄wed Ufọkn̄wed Utom Ukara Abasi ke Ufọkmbono Obio Ubọn̄. Enye enen̄ede enyene udọn̄ ke ndisịn udọn̄ nnọ kpukpru mbon oro ẹdotde ẹsịn enyịn̄ ke ufọkn̄wed. Enye okụt ete ke ẹnịm eti n̄wetnnịm n̄kpọ man otodo ẹnọ se ẹnọde ẹnam ke nde ke nde ke nsụhọde n̄kaha urua ita ke iso mbemiso ikpehe ufọkn̄wed kiet kiet. Oyom enye etịm ọdiọn̄ọ esop, enyenede eyen ufọkn̄wed kiet kiet ke ekikere ye mme ukeme esie. Okposụkedi enye ekemede ndinyene eyenete efen oro an̄wamde enye ndinam ndutịm ufọkn̄wed, esenyịn emi ọnọ ọkpọkpọ ndausụn̄ oro odotde ke edinọ mme ikpehe ẹnamde.
3 Man ọnọ ukpep ke ufọkn̄wed uforo uforo, esenyịn enyene nditịm idem ifịk ifịk ke urua kiet kiet, ekpepde kpukpru se ẹnọde ẹnam ọyọhọ ọyọhọ. Emi an̄wam enye anam esop odu ke nduaidem aban̄a ukpepn̄kpọ, ebiere m̀mê ẹkụre se ẹnọde ẹnam nnennen nnennen, onyụn̄ osio mme akpan n̄kpọ oro ẹdisịnde ke edifiak-nse ẹwetde-wet owụt.
4 Ke eyen ufọkn̄wed kiet kiet okụrede utịn̄ikọ esie, esenyịn oyotoro eyen ufọkn̄wed onyụn̄ anam an̄wan̄a ntak emi ndusụk edu utịn̄ikọ ọkọfọnde m̀mê ntak oyomde ẹnam n̄kọri. Ke ini owo ekededi oyomde ukpep efen efen kaban̄a nte enye ekpetịmde se ẹnọde enye anam ke ufọkn̄wed, esenyịn m̀mê owo oro enye emekde ekeme ndinọ ọkpọkpọ un̄wam.
5 Man ibọ ufọn ọyọhọ ọyọhọ ito ọkpọsọn̄ utom esenyịn Ufọkn̄wed Utom Ukara Abasi ye mme ọnọitem efen ekededi oro ẹnamde utom ke idak ndausụn̄ esie, nnyịn ikpenyene ndidụk ufọkn̄wed kpukpru ini. Nnyịn n̄ko ikpenyene ndinam kpukpru se ẹnọde nnyịn inam inyụn̄ ida item oro nnyịn ibọde ọkọrọ ye mbon oro ẹnọde nditọ ufọkn̄wed eken isịn ke edinam. Ke usụn̄ emi, nnyịn iyofori ukeme nnyịn sụn̄sụn̄ ke edinọ etop Obio Ubọn̄ an̄wa an̄wa ye ke ufọk ke ufọk.—Utom 20:20; 1 Tim. 4:13, 15.