Ntọt Mme Anditan̄a Obio Ubọn̄

Ndiyom Mbon Oro Ẹdotde ke Mme Obio-In̄wan̄ Australia

ẸSIWAK ndikot akamba esịt esịt ikpehe Australia obio-in̄wan̄. Owo inọhọ ikọ ntiense ke ndusụk ikpehe ke mme nsannsan obio-in̄wan̄ emi ke ufan̄ isua 12. Ntre, Mme Ntiense Jehovah ke obio Darwin, kpa ibuot Ikpehe Edem Edere, ẹma ẹdiomi ubịnikọt usen usụkkiet man ẹyom mbon oro ẹdotde.—Matthew 10:11.

Ẹma ẹtịn̄ enyịn ẹnam ndutịm isua kiet mbemiso ubịnikọt oro, esịnede ediwet mbuwed ndise ikpehe obio-in̄wan̄ oro okponde akan kilomita 800,000—oro edi se ikponde utịm ikata ikan New Zealand. Man ọfiọk nte nsannsan efakutom emi okponde, kam kere nte ukeuke usụn̄-enen ke itie emi ẹbọkde enan̄ ọniọn̄de kilomita 30 ọtọn̄ọde ke inuaotop esịm ufọk! Akande oro, ndusụk itie ubọk enan̄ ẹyom usụn̄ ke n̄kpọ nte kilomita 300 ẹkpọn̄ efen.

Mme Ntiense 145 ẹkebuana ke ubịnikọt oro. Ndusụk ẹketo anyan usụn̄ nte Tasmania ẹdi. Ndusụk ẹkewat okopodudu ubomisọn̄ oro ẹkotde Jeep, ẹsan̄ade ye ufọknna, mme n̄kpatan̄a n̄kpọ udiọn̄ ubomisọn̄, ye aranuwat. Mbon eken ẹkedọn̄ ufọknna mmọ ke ufọkisan̄. Ke adianade do, ẹma ẹbọ bọs iba oro kiet kiet emende owo 22 ndida ntan̄ mbon oro mîkenyeneke okopodudu ubomisọn̄. Mbon oro ẹkesan̄ade ke bọs ẹkekwọrọ ikọ ẹnọ mme andidụn̄ n̄kpri obio ke efakutom oro ẹmekde-mek.

Mbemiso ẹkedahade, nditọete ẹma ẹdiomi mme utịn̄ikọ ye mme nnamn̄wụt man ẹnọ ndausụn̄ ke nte ẹdinọde eti mbụk ke esen esen efakutom emi. Ke uwụtn̄kpọ, oyom ẹtiene mme akpan ibet ẹnyụn̄ ẹdiọn̄ọ ido unam n̄kpọ Mme Amanaisọn̄ man ẹkwọrọ ikọ uforo uforo ke mme obio mmọ. Ẹma ẹneme n̄ko nte ẹkpekpemede mme n̄kpọ-obot ke n̄kann̄kụk oro.

Ẹma ẹnyene ediwak nti ifiọkutom. Ke uwụtn̄kpọ, nditọete ẹma ẹdiomi ndinọ utịn̄ikọ an̄wa ke obio-in̄wan̄ kiet oro Mme Amanaisọn̄ ẹdụn̄de. Ọbọn̄an̄wan obio-in̄wan̄ oro akasan̄a ke idemesie asian mme owo utịn̄ikọ oro. Ke oro ebede, ẹma ẹnọ mbon oro ẹkedụkde utịn̄ikọ oro n̄wed 5 ye ndiye uduot n̄kpri n̄wed 41. Ẹma ẹsobo ye Amanaisọn̄ kiet ke obio-in̄wan̄ efen. Enye ama akam enyene Bible King James Version, edi ama akani onyụn̄ awaha. Ke ini ẹkebụpde m̀mê enye ọfiọk enyịn̄ Abasi, enye ama ọbọrọ ih onyụn̄ osio akani Enyọn̄-Ukpeme ke ekpat kod esie edi. Enye ama okot oto Mark 12:30, ke magazine oro, emi ọdọhọde ete: “Afo enyene ndima Jehovah Abasi fo ke ofụri esịt fo.” Enye ama ọdọhọ ete, “Mmama itie N̄wed Abasi emi etieti.” Ke ẹma ẹkeneme anyan nneme Bible ye enye, enye ama ọbọ obufa Bible ye mme n̄wed eken oro ẹkọn̄ọde ke Bible.

Ke mbọhọ Itụn̄ Inyan̄ibom Carpentaria, akamautom ata akamba itie ubọk enan̄ kiet ama enyene udọn̄ ke etop Obio Ubọn̄. Ke ini ẹkewụtde enye N̄wed Mi eke Mme Mbụk Bible ye Ifiọk Oro Adade Osịm Nsinsi Uwem,a enye ama obụp m̀mê n̄wed ndomokiet idụhe ke usem Kriol. Emi ekedi esen n̄kpọ koro okposụkedi ediwak mme Amanaisọn̄ ẹsemde Kriol, mbon oro ẹkemede ndikot enye iwakke. Mme asuanetop ẹma ẹdifiọk ke kpukpru mbonutom 50 ke itie ubọk enan̄ oro ẹkeme ndikot usem Kriol. Akamautom ama okop inemesịt ndibọ ediwak n̄wed ke usem Kriol, onyụn̄ ọnọ nọmba urụk ukopikọ esie man ẹkpekot imọ.

Ke usen usụkkiet oro ẹkenọde ifịk ifịk ikọ ntiense do, ẹma ẹnịm Bible 120, n̄wed 770, magazine 705, ye ndiye uduot n̄kpri n̄wed 1,965. Adianade do, ẹma ẹnam mfiakn̄ka 720, ẹnyụn̄ ẹtọn̄ọ ukpepn̄kpọ Bible 215.

Ke akpanikọ, ke akpatre ẹma enọ mbon oro ẹdotde, oro ẹsuanade ẹyọhọ akamba ikpehe emi, udia eke spirit ẹdia ẹyụhọ.—Matthew 5:6.

[Ikọ idakisọn̄]

[Ndise obio ke page 30]

(Ama oyom ndikụt nte enye enen̄erede etie, se n̄wed)

AUSTRALIA

IKPHEHE EDEM EDERE

Darwin

Itụn̄ Inyan̄ibom Carpentaria

Sydney

TASMANIA