Osụhọdeidem Owo Africa Oro Akamade Ikọ Abasi
IDEM esiwak ndikpa isenowo emi ẹkade Africa ndikụt nte ememde utom nditọn̄ọ nneme Bible ye mbon emi ẹtode do. Mme owo ẹsiwak ndikpan̄ utọn̄ ke ini ẹbụpde mme utọ mbụme nte, “Nso idi Obio Ubọn̄ Abasi?” m̀mê “Ndi ata usọbọ odu kaban̄a mme utọ mfịna nte unana udia, udọn̄ọ, ekọn̄, ye ubiatibet?” Ediwak mmọ ẹsima isenowo ẹwụt mmimọ ibọrọ ke Bible. Emi esiwak ndida n̄kesịm ukpepn̄kpọ Bible ofụri ini. Ndien nte nditọ ukpepn̄kpọ ẹnamde n̄kọri eke spirit, mmọ ẹsina baptism ẹkabade ẹdi mme Christian.
Ẹsiak owo kiet ke otu akpa mbon Africa oro ẹkenamde n̄kpọ ntre ke Bible ke Utom 8:26-40. Enye ekedi owo Ethiopia emi akakade Jerusalem ndituak ibuot nnọ ata Abasi, kpa Jehovah.
Nte ẹwụtde ke ndise emi, eren Ethiopia emi awat ke chariot esie ọnyọn̄ ufọk ke okot ikpan̄wed. Owo emi enye mîfiọkke asan̄a ebịne enye okobụp ete: “Nte afo emetịm ọfiọk se afo okotde?” Owo Ethiopia oro osụhọde idem enyịme ke imọ imoyom un̄wam, onyụn̄ ekpe Philip, ọkwọrọikọ Christian oro enye mîfiọkke, ubọk, ete ọdọk editie ye imọ ke chariot. Ekem enye ọdọhọ Philip anam itie N̄wed Abasi oro imọ ikokotde an̄wan̄a imọ. Philip anam an̄wan̄a ke edi ntịn̄nnịm ikọ emi okosude ke n̄kpa Messiah, kpa Jesus Christ. Philip eneme n̄ko mme n̄kpọ en̄wen oro ẹban̄ade “eti mbụk emi aban̄ade Jesus,” emi nte eyịghe mîdụhe esịnede Jesus ndiset ke n̄kpa.
Ke ama okokop mme utịbe utịbe akpanikọ emi, owo Ethiopia oro oyom ndikabade ndi mbet Jesus, onyụn̄ obụp ete: “Nso ibiọn̄ọ mi ndina baptism?” Ke ama akana baptism, osụhọdeidem owo Africa emi afiak odụk usụn̄ unyọn̄, Bible inyụn̄ itịn̄ke n̄kpọ ndomokiet iban̄a enye aba.
Mfịn, Mme Ntiense Jehovah ke ẹn̄wam ata ediwak owo ke ofụri ererimbot ẹkpep ukem “eti mbụk” oro. Ke ẹnịm n̄kpọ nte ukpepn̄kpọ Bible miliọn itiokiet ke mfọn idahaemi.