Tịm Idem Nọ Tọsịn Isua Oro Edide Akpan N̄kpọ!
TỌSỊN Isua Ukara Christ ayada mme edidiọn̄ ẹmi inua mîkemeke nditịn̄ ọsọk ekpụk ubonowo. Ke idak ima ima ndausụn̄ Jesus, ẹyesio ubonowo ke idiọk idaha oro enye odude ke emi ẹsịn ke ubọn̄ ubọn̄ mfọnmma. Kere se oro ekemede ndiwọrọ nnọ fi. Ata eti nsọn̄idem! Kere nte edemerede usenubọk kiet kiet onyụn̄ okopde idem inem akan usen oro ekebemde iso. Ediwak miliọn irenowo, iban, ye nditọwọn̄ ẹsak iso ẹse ndidu uwem ke inem inem ini oro. Mmọ ẹdori enyịn ke enye, ẹbọn̄ akam ẹyom enye. Ukpepn̄kpọ Bible mmọ anam mmọ ẹnịm ke akpanikọ nte ke mmọ ẹkeme ndidara mme edidiọn̄ ẹmi.
Nte ededi, ana Jesus Christ osobo kpukpru mme andibiọn̄ọ itie edikara esie efep ke isọn̄ mbemiso ọtọn̄ọde Ukara Ọ-tọsịn Isua esie. Enye edinam emi ke ekọn̄ emi ẹkotde Armageddon ke Bible. (Ediyarade 16:16) Mme ata Christian ke isọn̄ iditieneke in̄wana ekọn̄ oro. Enye edi ekọn̄ Abasi. Enye idinyụn̄ in̄wanake ke akpan ebiet kiet kpọt. Bible ọdọhọ ete ke enye eyesịm utịt ererimbot. Ẹyewot mme asua itie edikara Christ. Baba owo mmọ kiet idibọhọke!—Jeremiah 25:33.
Ekem Jesus ọyọwọn̄ọde ntịn̄enyịn esie ese Satan kpa Devil ye mme demon esie. Kụt idaha oro ke enyịn ikike, nte andiwet n̄wed Ediyarade okokụtde: “Ekem n̄kụt angel [Jesus Christ] otode ke heaven osụhọde, akama ukpọhọde editụn̄ọ ukpe ye akwa n̄kpọkọbi ke ubọk. Enye onyụn̄ omụm dragon, akani urụkikọt, emi edide Andidori ikọt Abasi ikọ ye Satan, onyụn̄ ọkọbi enye ke thousand isua.” (Ediyarade 20:1, 2) Ekem, ẹyesobo Satan ye mme demon esie ke nsinsi.—Matthew 25:41.
“Akwa otuowo, eke baba owo kiet mîkemeke ndibat,” ẹyebọhọ Armageddon. (Ediyarade 7:9) Christ ayada mmọ emi usụn̄ man ẹbọ ufọn ọyọhọ ọyọhọ ẹto “idịm mmọn̄ uwem,” ukem nte ekpemerọn̄ adade erọn̄ esie usụn̄ aka idịm mmọn̄ oro anyan̄ade uwem. (Ediyarade 7:17) Sia Satan ye mme demon esie mîdibiọn̄ọke n̄kọri eke spirit mmọ, ẹyen̄wam mme andibọhọ Armageddon ẹmi sụn̄sụn̄ ndikan ntụhọ unam idiọkn̄kpọ mmọ tutu mmọ ẹsịm mfọnmma ke akpatre!
Ke idak ima ima itie edikara Christ, mme idaha udu uwem ẹyeka iso ndifọn n̄kan. Ebede ke Jesus Christ, Jehovah Abasi oyosio kpukpru ntak ubiak ye mfụhọ efep. Enye “ọyọkwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba.” (Ediyarade 21:4) Prọfet Isaiah ada n̄kpọ emi ọkọyọhọ, ọdọhọde ete: “Ndien enyịn ẹyen̄wan̄a mme nnan, utọn̄ ẹyenyụn̄ ẹsịrede mbon inan. Ndien mbụn̄ọ ẹyenek nte edop, edeme imụm oyonyụn̄ ọkwọ.” (Isaiah 35:5, 6) Ndien mme akpan̄kpa, “ikpọ ye n̄kpri,” ẹyefiak ẹdidu uwem ye idotenyịn unana edifiak n̄kpa tutu amama!—Ediyarade 20:12.
Idem idahaemi, ke ẹtan̄ “akwa otuowo” oro ẹdibọhọde Armageddon ẹbok. Mmọ ke ẹtịm idem ẹnọ Tọsịn Isua Ukara Christ. Okposụkedi mmọ mîdiọn̄ọke ini emi ukara oro editọn̄ọde, mmọ ẹnyene mbuọtidem nte ke edikem ini Abasi, enye ọyọtọn̄ọ. Afo emekeme ndidu ke otu mmọ, edi ana afo n̄ko eben̄e idem—idịghe ke ndinyam inyene fo nnyụn̄ nnam isan̄ n̄ka akpan ebiet, edi ebe ke ndinyene nnennen ifiọk mban̄a Jehovah Abasi ye mme uduak esie ebe ke ukpepn̄kpọ Bible. Mme Ntiense Jehovah ẹyedara ndiwụt fi nte ukpepn̄kpọ Bible ekemede ndinyene ufọn nnọ fi ye ubon fo ke ata mfọn. Mme andisio magazine emi ẹyekop inemesịt ndinọ fi ntọt efen efen.
[Ekebe ke page 7]
Tọsịn Isua Oro—Ata Ata m̀mê Ndamban̄a Isua?
Sia ẹkedade ndamban̄a usem ẹwet ata ediwak itie ke n̄wed Ediyarade eke Bible, mbụme edemede. Nso kaban̄a Tọsịn Isua Ukara Christ oro ẹtịn̄de ẹban̄a ke Ediyarade? Nte enye edi ata ata m̀mê ndamban̄a ini?
Ofụri uyarade odu nte ke ẹtin̄ ẹban̄a ata ata ini edide tọsịn isua. Kere: Apostle Paul etịn̄ aban̄a Tọsịn Isua Ukara Christ, emi ẹdikpede ikpe ẹnọ ubonowo, nte usen. (Utom 17:31; Ediyarade 20:4) Apostle Peter ekewet ete ke usen kiet (hour 24) etie nte tọsịn isua ke enyịn Jehovah. (2 Peter 3:8) Oro owụt nte ke “usen” ikpe emi ebịghi ke ata ata tọsịn isua kiet. Ke adianade do, ke Ediyarade 20:3, 5-7 (NW), nnyịn ikot ke nsio nsio itie inan̄ iban̄a “tọsịn isua oro,” idịghe “tọsịn isua.” Etie nte emi anyan ubọk owụt ata ata iduọk ini oro enyenede akpan udomo.