Afo Ama Ikọ Abasi Adan̄a Didie?
“Mmama [ibet, NW] fo didie! enye ke ntie n̄kere ofụri usen.”—PSALM 119:97.
1. Nso idi usụn̄ kiet emi mme owo ẹmi ẹbakde Abasi ẹwụtde ima oro mmọ ẹmade Ikọ Abasi?
EDIWAK miliọn iren ye iban ke mme itie ikie ẹnyene Bible. Edi ukpụhọde odu ke ndinyene Bible ye ndima Ikọ Abasi. Ndi owo ekeme nditịn̄ nte enende ke imọ imama Ikọ Abasi edieke enye mîsiwakke ndikot enye? Ikemeke! Ke edide isio, ndusụk owo ẹmi inikiet ko mîkesidaha Bible ke n̄kpọ ẹkot enye kpukpru usen idahaemi. Mmọ ẹmekpep ndima Ikọ Abasi, ndien ukem nte andiwet psalm, mmọ idahaemi ẹtie ẹkere Ikọ Abasi “ofụri usen.”—Psalm 119:97.
2. Didie ke ẹkesọn̄ọ mbuọtidem owo kiet ke otu Mme Ntiense Jehovah ke ini okodude ke nsọn̄ọn̄kpọ?
2 Owo kiet emi ekekpepde ndima Ikọ Abasi edi Nasho Dori. Ke adianade ye mme ekemmọ andinịm ke akpanikọ, enye ama ọyọ ke ediwak iduọk isua, anamde n̄kpọ Jehovah ke Albania obio esie. Ke ekese ini oro, ẹma ẹkpan Mme Ntiense Jehovah, ndien mme anam-akpanikọ Christian ẹmi ẹkebọ esisịt n̄wed Bible. Kpa ye oro, mbuọtidem Brọda Dori ama aka iso ọsọn̄. Didie ke ekedi ntre? “Utịtmbuba mi,” ntem ke enye ọkọdọhọ, ekedi “ndikot Bible ke nsụhọde n̄kaha ke hour kiet kpukpru usen, emi n̄kanamde ke n̄kpọ nte isua 60 mbemiso mmen̄kekwe usụn̄ aba.” Ibọhọke ke ndondo emi, ofụri Bible ikodụhe ke usem Albanian, edi Brọda Dori ama ekpep usem Greek ke ini eyenọwọn̄, ntre enye ama okot Bible ke usem oro. Edikot Bible kpukpru ini ama omụm Brọda Dori akama ke nsio nsio idomo, ndien ekeme ndimụm nnyịn n̄kama n̄ko.
“Ẹyom” Ikọ Abasi
3. Nso edu ke mme Christian ẹkpekọri ẹban̄a Ikọ Abasi?
3 Apostle Peter ekewet ete: “Nte nsek-nditọ, ẹyom ata mmọn̄-eba Spirit.” (1 Peter 2:2) Kpa nte nsekeyen esinen̄erede oyom mmọn̄eba eka esie, oyom mme Christian ẹmi ẹnyenede udọn̄ ke n̄kpọ eke spirit ẹnyene akwa idatesịt ke ndikot Ikọ Abasi. Ndi nte etiede fi ke idem edi oro? Edieke mîtiehe ntre, kûduọk idotenyịn. Afo n̄ko emekeme ndikọri udọn̄ kaban̄a Ikọ Abasi.
4. Nso ibuana ke ndinam edikot Bible edi ido eke usen ke usen?
4 Man anam ntre, akpa nọ idemfo ntụnọ man anam edikot Bible edi ido ofụri ini, eke usen ke usen ke ekemede. (Utom 17:11) Ekeme ndidi afo udukemeke ndibiat hour kiet kpukpru usen n̄kot Bible nte Nasho Dori akanamde, edi enen̄ede etie nte ke afo emekeme ndisio ndusụk ini nnịm kpukpru usen ndida n̄kere Ikọ Abasi. Ediwak Christian ẹsibak ẹdemede ke minit ifan̄ man ẹtie ẹkere ubak udịmikọ Bible. Ewe usụn̄ ọkpọfọn akan oro ndida ntọn̄ọ usen? Mbon en̄wen ẹsima ndida usen n̄keberi ebe ke ndikot Bible esisịt ini mbemiso ẹdụkde idap. Ndien mbon en̄wen ẹsikot Bible ke ini efen oro eferede mmọ ke idem. Akpan n̄kpọ edi ndikot Bible kpukpru ini. Ekem, ada esisịt ini etie ekere se afo okotde. Ẹyak nnyịn ikere iban̄a uwụtn̄kpọ ndusụk owo ẹmi ẹkebọde ufọn ẹto edikot ye editie n̄kere Ikọ Abasi.
Andiwet Psalm Emi Akamade Ibet Abasi
5, 6. Okposụkedi ekemede ndidi nnyịn ifiọkke enye enyịn̄, nso ke nnyịn ikeme ndikpep nto andiwet Psalm 119 ọyọhọ 119 ebe ke ndikot nnyụn̄ ntie n̄kere se enye ekewetde?
5 Andiwet Psalm 119 ọyọhọ 119 ama enen̄ede enyene ntotụn̄ọ esịtekọm aban̄a Ikọ Abasi. Anie ekewet psalm oro? Owo isiakke andiwet ke Bible. Nte ededi, nnyịn imekpep ndusụk n̄kpọ iban̄a enye ito udọn̄ikọ, ndien nnyịn imọfiọk ite ke enye ama enyene mme mfịna ke uwem. Ndusụk ọdiọn̄ọ esie ẹmi ẹkpekedide mme andituak ibuot nnọ Jehovah iketieneke inyene ima oro enye ekenyenede ọnọ mme edumbet Bible. Nte ededi, andiwet psalm ikayakke edu mmọ akpan enye ndinam se inende. (Psalm 119:23) Edieke afo odụn̄de m̀mê anamde utom ye owo emi mîkponoke mme edumbet Bible, afo emekeme ndikụt nte idaha andiwet psalm oro ebietde okwommọ.
6 Okposụkedi ekedide owo Abasi, andiwet psalm oro ikedịghe andikụt idem ke edinen ke baba usụn̄ kiet. Enye ama enyịme mme unana mfọnmma esie in̄wan̄în̄wan̄. (Psalm 119:5, 6, 67) Nte ededi, enye ikayakke idiọkn̄kpọ akara enye. “Eyenọwọn̄ ada nso anam usụn̄ esiemmọ asana?” ntre ke enye okobụp. Ibọrọ esie ekedi: “[Ebe ke ndikpeme] enye nte ikọ fo asan̄ade.” (Psalm 119:9) Ekem, ke ọsọn̄ọde etịn̄ ọkpọsọn̄ odudu oro Ikọ Abasi enyenede ndinam owo ọfọn, andiwet psalm oro ama adian ete: “Mmada ikọ fo ndịp ke esịt mi, man n̄kûdue fi.” (Psalm 119:11) Odudu oro ekemede ndin̄wam nnyịn ifep ndidue Abasi enen̄ede ọsọn̄!
7. Ntak emi n̄kparawa owo akpan akpan ẹkpenyenede udọn̄ edikot Bible ke usen ke usen?
7 Ọfọn mme uyen Christian ndikere mban̄a mme ikọ andiwet psalm. N̄kparawa Christian ẹdu ke en̄wan mfịn. Devil ekpenen̄ede ama ndibiat otu n̄kpri mme andituak ibuot nnọ Jehovah. Utịtmbuba Satan edi nditap n̄kparawa Christian man ẹyak idem ẹnọ mme udọn̄ obụkidem ẹnyụn̄ ẹbiat mme ibet Abasi. Mme ndise senima ye mme edinam ekebe ndise ẹwak ndiwụt mme ekikere Devil. Nta ke mme utọ edinam oro ẹsitie nte ẹdi ndiye owo ye se ẹmade; ẹsinam mme oburobụt ebuana oro mmọ ẹnyenede ẹtie nte nnennen n̄kpọ. Nso etop ke ẹnọ? ‘Ọfọn mbon oro mîdọhọ ndọ ndinyene ebuana idan̄ ama akam edi mmọ ẹnen̄ede ẹma kiet eken.’ Ke mfụhọ, ke isua kiet kiet ediwak n̄kparawa Christian ẹsiduọ ke afia utọ ekikere oro. Ndusụk mmọ ẹma ẹtop mbuọtidem mmọ ẹduọk. Ntre mfịghe akaka iso! Edi ndi mfịghe emi ọsọn̄ ubọk tutu idịghe se mbufo n̄kpri owo ẹkemede ndiyọ? N̄wan̄ansa-o! Jehovah omowụt n̄kparawa Christian usụn̄ ndikan ndiọi udọn̄. Mmọ ẹkeme ndibiọn̄ọ n̄kpọekọn̄ ekededi oro Devil ekemede ndisio ndi ebe ke ‘ndikpeme nte Ikọ Abasi asan̄ade, nnyụn̄ nda ikọ Abasi ndịp ke esịt mmọ.’ Afo esibiat ini adan̄a didie ke ọkpọkpọ ukpepn̄kpọ Bible ye editie n̄kere ofụri ini?
8. Didie ke mme uwụtn̄kpọ oro ẹnọde ke ikpehe ekikere emi ekeme ndin̄wam fi ndikọri esịtekọm nnọ Ibet Moses?
8 Andiwet Psalm 119 ọyọhọ 119 okofiori ete: “Mmama [ibet, NW] fo didie!” (Psalm 119:97) Ewe ibet ke enye eketịn̄ aban̄a? Ikọ Jehovah oro ẹyararede, esịnede Ibet Moses. Ke akpa ini owo ekeme ndida Ibet emi nte n̄kpọ eset onyụn̄ ekere nte owo ekededi akpamade enye. Nte ededi, nte nnyịn itiede ikere nsio nsio ikpehe Ibet Moses, nte andiwet psalm ekekerede, nnyịn imekeme ndikụt ọniọn̄ oro odude ke Ibet oro. Ke ẹsiode ediwak ikpehe ntịn̄nnịm Ibet oro ẹfep, mme ibet usana idem ye eke udia ẹdu, ẹmi ẹkenamde ẹsana ẹnyụn̄ ẹnyene nsọn̄idem. (Leviticus 7:23, 24, 26; 11:2-8) Ibet oro ama esịn udọn̄ ọnọ edinam akpanikọ ke mbubehe onyụn̄ eteme nditọ Israel ete ẹtua mme ekemmọ andituak ibuot oro ẹkedude ke unana mbọm. (Exodus 22:26, 27; 23:6; Leviticus 19:35, 36; Deuteronomy 24:17-21) Ẹkenyene ndibiere ikpe ye unana asari. (Deuteronomy 16:19; 19:15) Nte andiwet Psalm 119 ọkọkọde ifiọk ke uwem, enye nte eyịghe mîdụhe ama okụt nte n̄kpọ ọkọfọnde ye mbon oro ẹkedade Ibet Abasi ẹsịn ke edinam, ndien ima oro enye akamade Ibet oro ama etetịm ọkọri. Kpasụk ntre mfịn, nte mme Christian ẹkụtde unen ke ndida mme edumbet Bible nsịn ke edinam, ima ye esịtekọm oro mmọ ẹnyenede ẹnọ Ikọ Abasi ọkọri.
Eyen Ọbọn̄ Oro Ekenyenede Uko Ndidi Isio
9. Nso edu ke Edidem Hezekiah ọkọkọri aban̄a Ikọ Abasi?
9 Se isịnede ke Psalm 119 ọyọhọ 119 ẹnen̄ede ẹdu ke n̄kemuyo ye se nnyịn ifiọkde iban̄a Hezekiah ke ini emi enye okosụk edide ekpri eyen ọbọn̄. Ndusụk nditọ ukpepn̄kpọ Bible ẹnọ ekikere ẹte ke Hezekiah ekedi andiwet psalm oro. Ke adan̄aemi owo mîtịmke ifiọk emi, nnyịn imọfiọk ite ke Hezekiah ama enyene akwa ukpono ọnọ Ikọ Abasi. Ebede ke usụn̄ uwem esie, enye ama owụt ke imọ ikenen̄ede idu ke n̄kemuyo ye mme ikọ Psalm 119:97. Bible etịn̄ aban̄a Hezekiah ete: “Enye eyịre ye Jehovah, inyụn̄ itreke nditiene enye, edi enịm mbet esie oro Jehovah eketemede Moses.”—2 Ndidem 18:6.
10. Nso nsịnudọn̄ ke uwụtn̄kpọ Hezekiah ọnọ mme Christian oro mme ete ye eka oro mîbakke Abasi ẹbọkde?
10 Ke kpukpru mbụk, Hezekiah ikọkọrike ke ubon emi abakde Abasi. Ete esie, Edidem Ahaz, ekedi anana-mbuọtidem okpono-ndem emi ke nsụhọde n̄kaha ọkọfọpde kiet ke otu nditọiren esie—eyeneka Hezekiah—ye uwem nte uwa ọnọ nsunsu abasi! (2 Ndidem 16:3) Kpa ye idiọk uwụtn̄kpọ emi, Hezekiah ama “anam usụn̄ esiemmọ asana” ọbọhọ mme odudu ukpono ndem ebe ke ndimehe ye Ikọ Abasi.—2 Chronicles 29:2.
11. Nte Hezekiah ekesede, n̄kpọ ẹketie didie ye ete esie oro mîkanamke akpanikọ?
11 Nte Hezekiah ọkọkọride okpon, enye ama okụt nnennen nnennen nte okpono-ndem ete esie ekesede aban̄a mme mbubehe Ukara. Mme asua ẹma ẹkan Judah ẹkụk. Rezin, edidem Syria ama odu, emi akadianade ye Edidem Pekah eke Israel ke ndikan Jerusalem n̄kụk. (2 Ndidem 16:5, 6) Mbon Edom ye mbon Philistine ẹma ẹdu, ẹmi ẹkekụtde unen ke ndin̄wana ye Judah ke mbuari ẹnyụn̄ ẹkam ẹdade ndusụk obio Judah ẹnyene. (2 Chronicles 28:16-19) Ahaz akanam n̄kpọ didie aban̄a mme afanikọn̄ ẹmi? Utu ke ndiben̄e un̄wam nto Jehovah ndin̄wana ye Syria, Ahaz akaka ebịne edidem Assyria, adade gold ye silver, esịnede eke usịnetịbe temple, ọnọ enye ubọkedem. Edi emi ikadaha emem oro ebịghide isọk Judah.—2 Ndidem 16:6, 8.
12. Ebede ke ndinam nso ke Hezekiah ekekeme nditre ndinam mme ndudue oro ete esie akanamde?
12 Ke akpatre, Ahaz ama akpa Hezekiah onyụn̄ akabade edi edidem ke edide isua 25. (2 Chronicles 29:1) Enye ekedi ekpri akparawa, edi oro ikakpanke enye ndidi edidem oro okụtde unen. Utu ke ndikpebe edu uwem ete esie oro mîkanamke akpanikọ, enye ama ọsọn̄ọ eyịre ke Ibet Jehovah. Emi ama esịne san̄asan̄a ewụhọ oro ẹkenọde ndidem: “Ke adan̄aemi [edidem] editiede ke ebekpo ubọn̄ esie, yak enye akan̄a n̄wed-ibet emi ke idem esie esịn ke n̄wed efen, asan̄a ye n̄wed emi odude ke iso mme oku, mme Levite: ndien n̄wed oro oyodu enye ke ubọk, enye onyụn̄ okot n̄wed kpukpru usen uwem esie: kpan̄ enye ekpekpep ndibak Jehovah Abasi esie, nnyụn̄ nnịm kpukpru ikọ n̄wed-mbet emi, ye mme ewụhọ ẹmi, man enye anam mmọ.” (Deuteronomy 17:18, 19) Ebede ke ndikot Ikọ Abasi ke usen ke usen, Hezekiah ama ekpep ndibak Jehovah onyụn̄ efep ndinam mme ndudue oro anana-uten̄e Abasi ete esie akanamde.
13. Didie ke Christian ekeme nditịm nnịm nte ke kpukpru se imọ inamde ọyọwọrọ usụn̄, ke usụn̄ifiọk eke spirit?
13 Idịghe ndidem Israel kpọt ke ẹkesịn udọn̄ ẹnọ ẹte ẹkere ẹban̄a Ikọ Abasi kpukpru ini edi kpukpru nditọ Israel oro ẹbakde Abasi ẹkenyene ndinam ntre. Akpa Psalm etịn̄ aban̄a owo emi enen̄erede okop inemesịt nte owo emi ‘mbet Jehovah adatde enye esịt; enye onyụn̄ osụk ekere mbet esie ke uwemeyo ye ke okoneyo.’ (Psalm 1:1, 2) Andiwet psalm eketịn̄ aban̄a utọ owo oro ete: “Kpukpru se enye anamde ọwọrọ usụn̄.” (Psalm 1:3) Ke edide isio, Bible etịn̄ aban̄a owo emi ananade mbuọtidem ke Jehovah Abasi ete: “Enye edi owo esịt iba, eke mînyeneke nsọn̄ọ-nda ke kpukpru usụn̄ esie.” (James 1:8) Kpukpru nnyịn imoyom ndikop inemesịt nnyụn̄ n̄kụt unen. Edikot Bible oro enyenede uduak kpukpru ini ekeme nditịp nsịn ke inemesịt nnyịn.
Ikọ Abasi Ama Omụm Jesus Akama
14. Didie ke Jesus okowụt ima ọnọ Ikọ Abasi?
14 Isan̄ kiet, ete ye eka Jesus ẹma ẹkụt enye etiede ke ufọt mme andikpep ke temple ke Jerusalem. “Idem [akakpa nta ke Ibet Abasi didie ntem] aban̄a ọniọn̄ ye mme ibọrọ Esie”! (Luke 2:46, 47) Oro ekedi ke ini Jesus ekedide isua 12 ke emana. Ih, idem ke ini ekedide uyen, enye nte an̄wan̄ade ama ama Ikọ Abasi. Ke ukperedem, Jesus ama ada N̄wed Abasi asua ọnọ Devil, ọdọhọde ete: “Idịghe uyo ikpọn̄ ke owo edida idu uwem, edi edida kpukpru ikọ eke ẹwọrọde Abasi ke inua odu.” (Matthew 4:3-10) Esisịt ini ke oro ebede, Jesus ama ọkwọrọ ikọ ọnọ mme andidụn̄ Nazareth obio emana esie, adade N̄wed Abasi.—Luke 4:16-21.
15. Didie ke Jesus ekenịm uwụtn̄kpọ ke ini ọkọkwọrọde ikọ ọnọ mbon en̄wen?
15 Jesus ama esikot oto Ikọ Abasi ndien ndien ndisọn̄ọ mme ukpepn̄kpọ esie. ‘N̄kpaidem ama omụm’ mme andikpan̄ utọn̄ nnọ enye “aban̄a ukpepn̄kpọ esie.” (Matthew 7:28) Ndien nte eyịghe mîdụhe—mme ukpepn̄kpọ Jesus ẹketo Jehovah Abasi ke idemesie! Jesus ọkọdọhọ ete: “Ukpep-n̄kpọ eke nnọde idịghe Okịm, edi edi eke Andidọn̄ Mi. Owo eke etịn̄de oto idem esie oyom ubọn̄ ọnọ idem esie; edi owo eke oyomde ubọn̄ andidọn̄ enye, owo oro edi akpanikọ, ukwan̄ido inyụn̄ idụhe enye ke esịt.”—John 7:16, 18.
16. Ke nso udomo ke Jesus okowụt ima oro enye amade Ikọ Abasi?
16 Ke mîbietke andiwet Psalm 119, Jesus ikenyeneke “ukwan̄ido.” Enye ikenyeneke idiọkn̄kpọ, Eyen Abasi, emi “[okosụhọrede] idem, akabade osụk ibuot tutu osụn̄ọ ke n̄kpa.” (Philippi 2:8; Mme Hebrew 7:26) Edi, kpa ye oro ekedide mfọnmma, Jesus ama ekpep onyụn̄ enịm Ibet Abasi. Emi ekedi akpan n̄kpọ ke enye ndisọn̄ọ mmụm nsọn̄ọnda esie n̄kama. Ke ini Peter akadade ofụt odomo ndikpan ẹkûmụm Andikpep esie, Jesus ama asua ọnọ apostle oro onyụn̄ obụp ete: “Ese ete n̄kemeke ndikpe Ete Mi ubọk, mbọ Enye se ibede legion mme angel duopeba idaha emi? Edi se ẹwetde, ẹte, N̄kpọ enyene ndiwọrọ ntem, edinam didie ndien osu?” (Matthew 26:53, 54) Ih, N̄wed Abasi ndisu ama enyene se ọwọrọde ọnọ Jesus akan enye ndibọhọ ibak ibak ye esuene esuene n̄kpa. Nso n̄wọrọnda ima ke enye ekenyene ntem ọnọ Ikọ Abasi!
Mbon En̄wen Oro Ẹkekpebede Christ
17. Ikọ Abasi ekedi akpan n̄kpọ adan̄a didie ọnọ apostle Paul?
17 Apostle Paul ekewet ọnọ ẹsọk mme ekemmọ Christian ete: “Mbufo ẹkabade ẹkpebe mi, kpa nte ami n̄kpebede Christ.” (1 Corinth 11:1) Ukem nte Andikpep esie, Paul ama ọkọri ima ọnọ N̄wed Abasi. Enye eketịn̄ ete: “Mmenen̄ede mma Ibet Abasi ke ata esịt idem mi.” (Rome 7:22, The Jerusalem Bible) Paul ama esikot oto Ikọ Abasi ndien ndien. (Utom 13:32-41; 17:2, 3; 28:23) Ke ini enye ọkọnọde Timothy, edima ekemmọ asan̄autom, mme akpatre item esie, Paul ama ọsọn̄ọ etịn̄ akpan udeme oro Ikọ Abasi ekpenyenede ke uwem ofụri usen eke kpukpru “owo Abasi.”—2 Timothy 3:15-17.
18. Siak uwụtn̄kpọ owo kiet emi, ke eyomfịn, okowụtde ukpono ọnọ Ikọ Abasi.
18 Ediwak anam-akpanikọ asan̄autom Jehovah eyomfịn ẹmekpebe ima oro Jesus amade Ikọ Abasi kpasụk ntre. Ke ntọn̄ọ ntọn̄ọ isua ikie emi, akparawa kiet ama ọbọ Bible oto ufan. Enye eketịn̄ utịp oro ọsọn̄urua enọ emi enyenede ke idemesie ntem: “Ami mma mbiere nte ke ana nsikot itie kiet ke Bible emi kpukpru usen ke ofụri eyouwem mi.” Akparawa oro ekedi Frederick Franz, ndien ima oro enye akamade Bible ama ada ekesịm enye ndidu anyan uwem oro okokụtde unen ke utom Jehovah. Ẹsiti enye ke ima ima usụn̄ ke ukeme esie ndikot kpukpru ibuot n̄wed Bible ke ibuot.
19. Didie ke ndusụk owo ẹdiomi edikot Bible eke urua ke urua eke Ufọkn̄wed Utom Ukara Abasi?
19 Mme Ntiense Jehovah ẹdori akwa nsọn̄uyo ke edikot Bible kpukpru ini. Kpukpru urua, ke nditịm idem nnọ kiet ke otu mme mbono esop Christian mmọ, kpa Ufọkn̄wed Utom Ukara Abasi, mmọ ẹsikot ndusụk ibuot n̄wed Bible. Ẹsineme mme akpan n̄kpọ ẹtode itie Bible oro ẹkenọde ẹkot ke mbono esop. Esifere ndusụk Ntiense ke idem ndibahade edikot Bible eke urua ndọn̄ ke n̄kpri ikpehe itiaba nnyụn̄ n̄kot ikpehe kiet kiet ke usen. Nte mmọ ẹkotde, mmọ ẹsitie ẹkere se ẹkotde. Edieke ẹkemede, mmọ ẹsida mme n̄wed ẹkọn̄ọde ke Bible ẹnam ndụn̄ọde efen efen.
20. Nso ke oyom man ẹnyene ini ndikot Bible kpukpru ini?
20 Ekeme ndiyom afo “ededep ifet” oto mme edinam en̄wen man okot Bible kpukpru ini. (Ephesus 5:16) Nte ededi, mme ufọn ẹyekan mme n̄kpọ ekededi oro ẹyakde ẹtak. Nte afo ọkọride edu edikot Bible kpukpru ini, ima oro afo amade Ikọ Abasi ọyọkọri. Ke mîbịghike, oyonụk fi nditiene andiwet psalm ndọhọ: “Mmama [ibet, NW] fo didie! enye ke ntie n̄kere ofụri usen.” (Psalm 119:97) Utọ edu oro ayada ekese ufọn edi idahaemi ye ke ini iso, nte ibuotikọ oro etienede ediwụtde.
Nte Afo Emeti?
◻ Didie ke andiwet Psalm 119 ekenyene ntotụn̄ọ ima ọnọ Ikọ Abasi?
◻ Mme ukpepn̄kpọ ewe ke nnyịn ikeme ndikpep nto uwụtn̄kpọ Jesus ye eke Paul?
◻ Didie ke nnyịn ke idem nnyịn ikeme ndikọri ke ima oro imade Ikọ Abasi?
[Mme ndise ke page 10]
Mme anam-akpanikọ ndidem ẹkenyene ndikot Ikọ Abasi kpukpru ini. Nte afo emesikot?
[Ndise ke page 12]
Idem ke edide ekpri eyen, Jesus ama ama Ikọ Abasi