2000—N̄wọrọnda Isua?
NTE odu n̄kpọ ekededi oro edide san̄asan̄a aban̄a isua 2000? Mme owo oro ẹdụn̄de ke mme idụt N̄kan̄ Edem Usoputịn ke ofụri ofụri ẹse enye nte akpa isua ke ọyọhọ tọsịn isua ita. Ke ẹnam akamba ntịmidem ndidia usọrọ esie. Ke ẹwụk ikpọ n̄kanika ilektrọnịk man ẹbat mme sekọn tutu obufa tọsịn isua ọtọn̄ọ. Ke ẹtịm unek Usọrọ Ukabadeisua. Ke ẹnyam mme ọfọn̄idem oro ẹwetde mme ufiet utịt ọ-tọsịn isua ke mme ufọkurua n̄kpri obio ọkọrọ ye ke ufọkurua ikpọ obio.
Mme ufọkabasi, n̄kpri ye ikpọ, ẹyebuana ke usọrọ ofụri isua kiet emi. Ke ntọn̄ọ ntọn̄ọ isua efen, ẹdori enyịn Pope John Paul II ndika Israel man akada mbon Roman Catholic usụn̄ ke se ẹkotde “usọrọ tọsịn isua jubilee eke Ufọkabasi Roman Catholic.” Ẹnọ ekikere ẹte ke n̄kpọ nte mme akaisan̄ miliọn iba ye ubak ẹsịm miliọn itiokiet, ọtọn̄ọde ke mme enyene-ifịk ẹsịm mbon oro ẹnyenede ọkpọsọn̄ udọn̄, ẹduak ndika Israel isua efen.
Ntak emi ata ediwak owo ẹduakde ndika Israel? Ke etịn̄de ikọ ke ibuot pope, Roger Cardinal Etchegaray, akwa owo ukara Pope, ọkọdọhọ ete: “Isua 2000 edi usọrọ Christ ye uwem esie ke idụt emi. Ke ntre enye edi sụk ndammana n̄kpọ Pope ndidi mi.” Didie ke ẹda isua 2000 ẹkebuan ye Christ? Ẹwak ndikere ke isua 2000 anam nnennen isua 2,000 tọn̄ọ ke emana Christ. Edi nte enye anam? Nnyịn iyokụt.
Isua 2000 akam enen̄ede edi akpan n̄kpọ ọnọ mme andibuana ke ndusụk otu ido ukpono. Mmọ ẹnịm ke akpanikọ ẹte ke n̄kpọ nte isua efen m̀mê n̄kpọ ntre, Jesus ayafiak edi Obot Olive ndien ẹyen̄wana ekọn̄ Armageddon, oro ẹtịn̄de ẹban̄a ke n̄wed Ediyarade, ke itịghede Megiddo. (Ediyarade 16:14-16) Ke ẹbetde mme n̄kpọntịbe ẹmi ye ọkpọsọn̄ udọn̄, ediwak mme andidụn̄ United States ke mme itie ikie ke ẹnyam mme ufọk ye ekese inyene mmọ ndien ke ẹwọrọ idụn̄ ẹka Israel. Ke ufọn mbon oro mîkemeke ndiwọrọ n̄kpọn̄ ufọk mmọ, nte mbụk ọdọhọde, ọwọrọiso ọkwọrọikọ kiet ke United States ọn̄wọn̄ọ ndisuan etop edifiak ndi Jesus ke ekebe ndise—ke usụn̄ etịmde omụm owo udọn̄!
Ke mme idụt N̄kan̄ Edem Usoputịn, ndutịm usọrọ ọyọhọ tọsịn isua ita ke ọsọn̄ ubọk. Nte ededi, mme owo ke mme idụt eken ke ẹka iso ke mbubehe mmọ. Mme owo ẹmi—n̄wakn̄kan ibat mme andidụn̄ ererimbot—inịmke ke akpanikọ ite ke Jesus eyen Nazareth ekedi Messiah. Mmọ inyụn̄ inen̄ekede inyịme ido ubat usenọfiọn̄ M.C.-A.D.a Ke uwụtn̄kpọ, ediwak mbon Muslim ẹkama n̄wed usenọfiọn̄ mmọ, emi owụtde ke isua efen edidi 1420—idịghe 2000. Mbon Muslim ẹbat isua mmọ tọn̄ọde ke usenọfiọn̄ emi prọfet Muḥammad ekefehede ọkpọn̄ Mecca aka Medina. Ke ofụri ofụri, mme owo ke ofụri ererimbot ẹkama nsio nsio n̄wed usenọfiọn̄ 40.
Nte isua 2000 enyene se ọwọrọde ọnọ mme Christian? Nte January 1, 2000, edi usen oro enen̄erede enyene akpan n̄kpọ oro ọwọrọde? Ẹyebọrọ mme mbụme ẹmi ke ibuotikọ oro etienede.
[Ikọ idakisọn̄]
a Ke ndutịm ubat usenọfiọn̄ M.C.-A.D., ẹwụt mme n̄kpọntịbe oro ẹkadade itie mbemiso ini oro ẹdọhọde nte Jesus akamanade nte mme isua “M.C.” (mbemiso Christ); ẹwụt mbon oro ẹkedade itie ke oro ebede nte mme isua “A.D.” (Anno Domini—“ke isua Ọbọn̄ nnyịn.”) Nte ededi, mme ẹnyene-ifiọk nditọ ukpepn̄kpọ ẹmek ndida mme ikọ eke ererimbot oro “M.E.N.” (mbemiso Eyo Nnyịn) ye “E.N.” (Eyo Nnyịn).