Ọyọhọ Tọsịn Isua Ita—Nte Enye Eyesu Idotenyịn Fo?
NTỊMIDEM ọmọtọn̄ọ. Ubọk n̄kanika oro ọkọn̄ọde ke iso ufọk uwụt n̄kpọusọ ye unam kọnsat Beaubourg ke Paris, France, omowụt second ifan̄ ẹsụhọde. Enye eyekaiso ye unana nduọkodudu ndisan̄a mfiak edem tutu osịm ufọt okoneyo December 31, 1999. Ke ini oro, n̄kpọ oro ẹkekụtde ini kiet kpọt ke Eyo Nnyịn eyetịbe: kpa edibe ndụk obufa tọsịn isua, ọyọhọ tọsịn isua ita.
“2000, ke udomo ekededi, edi ‘n̄kpon n̄kan n̄kpọntịbe’ oro akanam ẹdoride enyịn ndikụt ke mbụk ubonowo,” ntre ke anam ndụn̄ọde mban̄a ebuana otuowo, kpa Bernward Joerges eke Berlin, Germany, ọnọ ekikere. Ntak enyenede utọ ekikere oro-o? Kamse, isua 2000 edi n̄kpasịp isua kiet efen oro ẹdiande ke ubatini. Akande oro, mbon oro ẹtienede n̄wed usenọfiọn̄ mbon Edem Usoputịn ikpọn̄îkpọn̄ ẹdiọn̄ọ usenọfiọn̄ emi. Nte ekemde ye n̄wed usenọfiọn̄ mbon Islām, 2000 C.E. ọduọ ke isua 1420 eke mbon Islam; nte ekemde ye n̄wed usenọfiọn̄ mme Jew, 5760 A.M.
Edi ke mbụme oro ọkọbọrọde ke n̄wedmbụk n̄kpọntịbe mbon Sweden oro ẹkotde Dagens Nyheter, Professor Joerges anam an̄wan̄a ete: “Ke ntak usiak idụt ye uda ukara, ubatini nnyịn eke Gregory, oro ọkọtọn̄ọde ke ini oro ẹkedade nte usen emana Christ, emenyene n̄kọri ke ediwak ikpehe ererimbot.” Isua 2000 ke ntre edidi onịm-mbụk isua ke ofụri ekondo ọnọ ekese ubonowo. Professor Joerges ọdọhọ ete: “Kpukpru owo ẹyebụk mbụk uwem mmọ ọkọrọ ye kpukpru n̄kpọ ekededi oro enyenede ebuana ye n̄kpọntịbe emi.”
Edi, ediwak owo ẹnyene ekese n̄kpọ ke ekikere akan ikpîkpu edinịm idiọn̄ọ ke ini. Joerges ọdọhọ ete: “Ikpọ mbubehe ye ndutịm ‘unịm idiọn̄ọ,’ ndiwụt se enye ọwọrọde, ye edida ndara n̄kpọntịbe emi ama ọtọtọn̄ọ ke kpukpru ikpehe uwem ye ke kpukpru idaha ebuana otuowo.” Enye adian ete “ke ofụri ekondo, mme anam ikpọ mbubehe ye ‘mme owụt n̄kpọurua’ ke ẹdiomi ke ẹnyụn̄ ẹnam ndutịm ẹnọ ikpọ edinam.” Mbon eken oro ẹsitịn̄de ini iso ẹdọhọ ẹte ke “nnyịn iyesion̄o ata ekese n̄wed oro aban̄ade isua ikie oro ekebede idi. Kpukpru ufọkutom usuanmbụk n̄kpọntịbe ẹyedama idat ẹban̄a tọsịn isua oro edide do. Ufọkutom TV mbon West Germany ke odiomi ndida hour 24 nsuan mbụk mban̄a n̄kpọntịbe emi ke ofụri ererimbot.”
Mme asuan mbụk n̄kpọntịbe ẹyesịn ekese editịm ẹban̄a akpatre nsekeyen oro edimanade ke 1999 ye akpa nsekeyen oro edimanade ke 2000. Mme ọkọ-mbụk n̄kpọntịbe ẹyenyene udọn̄ ndidụn̄ọde mfiọk ibat ibat mbon oro ẹsụhọde ẹmi ẹkemanade ke ọyọhọ isua ikie 19, man ẹbụp nte ẹtiede mmọ ke idem ndikodu uwem ke isua ikie ita ye tọsịn isua iba! Ndusụk owo ẹkam ẹkere ẹte ke kpukpru editịm oro ẹsịnde ẹban̄a tọsịn isua emi eyeda ọkpọsọn̄ nduaidem ọsọk ata ediwak owo. Nte ekemde ye mbuka ikọ oro ẹkebemde iso ẹtịn̄, ke ufọt okoneyo mbemiso Usiere Obufa Isua oro, ediwak owo ẹyeyịri idem ẹwot.
Kpa ye mme utọ ebe ubọk edinam ntre, an̄wan̄a nte ke n̄kpọntịbe emi edemede owo udọn̄. Ye ediwak owo ẹmi ẹdude ke ererimbot oro ntịme akande ubọk mi, ẹda obufa tọsịn isua emi nte n̄kpọ oro akamade idotenyịn, kpa usụn̄ oro ẹsan̄ade ẹkesịm ini iso oro ọfọnde akan. Ndusụk owo ẹwọn̄ọde ẹbịne ifiọk ntaifiọk ye ifiọk ubot obufa n̄kpọ ndida ini iso ndi emi ididiade nti n̄kpọ idinyụn̄ idude uwem ibịghi, emi edinamde esisịt utom inyụn̄ ibiat ekese ini ke ufọk; emi robot idinyan̄ade nnyịn osio ke ekikak ekikak utom, emi ẹditemde mmọn̄ inam akabade edi aran uwat o-moto. Mmọ ẹda ẹkụt ini iso oro TV osiode ndise ke idemesie, television enyenede urụk ukopikọ, ukwak usio ndiye nsio nsio ndise, ye urụk ukopikọ oro akabarede ikọ ke ebe oro. Mmọ emekere ẹban̄a edinam ndụn̄ọde ke Ọfiọn̄, Mars, m̀mê mme ekondo eken, nnyụn̄ mbụhọde ọsọn̄urua inyene mmọ.
Edi idịghe kpukpru owo ẹnyene eti ekikere ntre. Ndusụk mme anam ndụn̄ọde ẹkụt obufa tọsịn isua nte edide ini emi ibat ibat owo ke ererimbot ọkọride ebe ubọk, n̄kann̄kụk onyụn̄ abiarade. Usabade ofụm eyenam ofụm ke isọn̄ ofiop. Mme ice ẹyetara ndien akpainyan̄ ẹyetọ ẹdọk, ẹfụkde ikọt ye obio ẹnyụn̄ ẹnamde ediwak million acre in̄wan̄ ẹkabade ẹdi desert. Mmọ ẹma ẹbemiso ẹda ẹkụt n̄wụre ke ndutịm uforo ererimbot, unana nsọn̄ọnda ke ukara ukaraidem oro enyen̄ede mme ukara ye mme n̄kaowo, ubiatibet oro owo mîkemeke ndikara, ndien ndiọk n̄kan kpukpru, edi nsobo ekọn̄ nuclear oro edisobode ofụri ubonowo.
Mme ẹtịn̄ ini iso ẹka anyan ke ekikere mmọ okposụkedi oro mmọ mîtịmke idiọn̄ọ ke ini edide edisịm ini oro tọsịn isua emi edidide. Ata ediwak n̄kpọ oro enyịn mîkwe abuana man ẹtịn̄ ini iso nnennen nnennen. Ata etịn̄ ini iso kiet emen edinam ntre odomo ye edibre orụk nsa oro ẹkotde chess: “Mbemiso mbrede nsa efen, ami nyese ediwak nsa oro odude nte n̄kekeme. Edi ke ini owo enye eken ebrede eke esie, ami nyefiak ntọn̄ọ ndibre.”
Edi ini kpọt edikam ebiere se isua 2000 edidade edi. Emi nte ededi, iwọrọke ite ke ini iso fo idinyeneke iwụk. Bible ọmọnọ in̄wan̄în̄wan̄ uyarade nte ke nnyịn ke isana ikpere edisịm ọyọhọ tọsịn isua oro enyenede n̄kpon n̄kan se ọwọrọde akan enye oro ọkọtọn̄ọde ke se mîsịmke isua duop ẹmi ẹkebede. Tọsịn Isua emi eyekpon akan se owo ekededi ekemede ndidori enyịn mban̄a! Emi enen̄ede ọwọrọ nso? Nso ke enye edibuana? Nnyịn imọnọ fi ikot ndidụn̄ọde udiana ibuotikọ nnyịn mfiọk se Bible enyenede nditịn̄.