Nso Ididi Ini Iso Fo?

EDIEKE Abasi Ata Ọkpọsọn̄ edide akakan ke ifiọk, ọfiọkde kpukpru n̄kpọ ke eset, idahaemi, ye ke ini iso, nte kpukpru n̄kpọ itịbede ukem ukem nte Abasi ekebemde iso okụt mmọ? Edieke Abasi ekebemde iso okụt onyụn̄ ebiere usụn̄ edinam ye se itịbede ke akpatre inọ kpukpru owo, nte ẹkeme ndinen̄ede ndọhọ ke nnyịn imenyene ifụre ndimek usụn̄ uwem nnyịn, kpa ini iso nnyịn?

Ẹneni ẹban̄a mme mbụme ẹmi ke ediwak isua ikie. Mfan̄a emi ke osụk ababahade mme akpan ido ukpono. Nte ẹkeme ndinam ukeme Abasi ndibem iso mfiọk ini iso odu ke n̄kemuyo ye ifụre owo ndinam edimek? Nnyịn ikpoyom ibọrọ ke m̀mọ̀n̄?

Ediwak miliọn owo ke ofụri ekondo ẹyenyịme ẹte ke Abasi esineme nneme ye ubonowo ebe ke Ikọ esie emi ẹwetde-wet emi ọkọnọde ebe ke mme anditịn̄ ikọ ke ibuot esie, mme prọfet. Ke uwụtn̄kpọ, Koran etịn̄ aban̄a mme ediyarade nte ẹtode Abasi: Taurāh (Torah, Ibet, m̀mê mme n̄wed Moses ition), Zabūr (mme Psalm), ye Injīl (Gospel, N̄wed Abasi Christian Usem Greek, m̀mê “Obufa Testament”), ọkọrọ ye se ẹkeyararede ẹnọ mme prọfet Israel.

Ke N̄wed Abasi Christian Usem Greek, nnyịn ikot ite: “Kpukpru n̄wed, eke ẹdade odudu spirit Abasi ẹwet, ẹnyụn̄ ẹdi se ifọnde ndida n̄kpep owo n̄kpọ, nnyụn̄ nsua nnọ owo, nnyụn̄ nnam owo ẹsan̄a nte enende.” (2 Timothy 3:16) Nte an̄wan̄ade, ndausụn̄ m̀mê edinam an̄wan̄a ekededi oro nnyịn ibọde ekpenyene ndinen̄ede nto Abasi ke idemesie. Nte ikpowụtke ifiọk ndien ndidụn̄ọde uwetn̄kpọ mme prọfet Abasi oro ẹkebemde iso ẹdu? Nso ke mmọ ẹyarade ẹban̄a ini iso nnyịn?

Ini Iso Oro Ẹkebemde Iso Ẹwet Ẹnịm

Owo ekededi oro okotde Edisana N̄wed Abasi ọfiọk ete ke ata ediwak prọfesi ke mme itie ikie ẹdọn̄ọ ke mmọ. Mme utọ enịm-mbụk n̄kpọntịbe nte iduọ Babylon eset, edifiak mbọp Jerusalem (ọyọhọ isua ikie itiokiet esịm ọyọhọ isua ition M.E.N.), ye edidaha nda ye iduọ ndidem eset eke Media ye Persia ye Greece kpukpru ẹdi se ẹkebemde iso ẹnọ ọyọhọ ntọt ẹban̄a. (Isaiah 13:17-19; 44:24–45:1; Daniel 8:1-7, 20-22) Edisu eke mme utọ prọfesi oro edi kiet ke otu ata n̄kpọsọn̄ uyarade nte ke Edisana N̄wed Abasi enen̄ede edi Ikọ Abasi, koro Abasi ikpọn̄ enyene odudu ndibem iso n̄kụt nnyụn̄ mbiere se iditịbede ke ini iso. Ke usụn̄ifiọk emi Edisana N̄wed Abasi ke akpanikọ ebem iso ewet ini iso enịm.

Abasi ke idemesie ọdọhọ ete: “Koro ami ndide Abasi, efen mînyụn̄ idụhe; ndi Abasi, ndien baba kiet eke ebietde mi idụhe. Emi nsiakde akpatre ke akpa, ndien ke eset nsiak se mînamke kan̄a, nte ke uduak mi ayada, ndien nyanam kpukpru se mmade . . . n̄kọm mma ndọhọ, nyonyụn̄ nnam enye edi n̄ko; mma mbot, nyonyụn̄ nnam enye.” (Isaiah 46:9-11; 55:10, 11) Enyịn̄ oro Abasi akadade ayarade idemesie ọnọ mme prọfet esie eke eset edi Jehovah, emi ke ata ata usụn̄ ọwọrọde “Enye Anam Akabade Edi.”a (Genesis 12:7, 8; Exodus 3:13-15; Psalm 83:18) Abasi ayarade idem esie nte Enye emi akabarede edi Andisu ikọ esie, Enye Emi anamde mme uduak esie ẹsu kpukpru ini.

Ntem, Abasi ada odudu esie ndibem iso mfiọk n̄kpọ anam n̄kpọ ke ndinam mme uduak esie ẹsu. Enye esiwak ndida enye nnọ mme idiọkowo ntọt mban̄a ubiereikpe esie emi edide ọkọrọ ye edinọ mme asan̄autom esie idotenyịn kaban̄a edinyan̄a. Edi ndi Abasi ada odudu emi anam n̄kpọ ke usụn̄ oro mînyeneke adan̄a? Nte uyarade ekededi odu ke Edisana N̄wed Abasi aban̄a mme n̄kpọ oro Abasi emekde nditre ndinyene mbemiso ifiọk mban̄a?

Nte Abasi Enyene Mbemiso Ifiọk Aban̄a Kpukpru N̄kpọ?

Kpukpru mfan̄a ẹnọde ndisọn̄ọ akan̄a ẹkọn̄ọ ke se ẹkerede-kere nte ke sia Abasi nte owo mîkemeke ndifan̄a enyenede odudu ndibem iso mfiọk nnyụn̄ mbiere mme n̄kpọntịbe ini iso, ana enye enyene mbemiso ifiọk aban̄a kpukpru n̄kpọ, esịnede mme edinam ini iso eke kpukpru owo. Nte ekikere emi esịne ifiọk, ke usụn̄ ekededi? Se Abasi ayararede ke Edisana N̄wed Abasi owụt se idide isio.

Ke uwụtn̄kpọ, N̄wed Abasi ọdọhọ ete ke ‘Abasi ama odomo Abraham ese’ ke ndidọhọ enye awa eyeneren esie Isaac nte edifọp uwa. Ke ini Abraham okoyomde ndiwa Isaac, Abasi ama akpan enye ndien ọdọhọ ete: “Ke emi ke mfiọk nte afo efefehe Abasi, afo unyụn̄ usịnke mi eyen fo kierakiet.” (Genesis 22:1-12, sịghisịghi ubọkn̄wed edi eke nnyịn.) Nte Abasi ekpeketịn̄ ikọ oro edieke ekpedide enye ama ebem iso ọfiọk ete ke Abraham ayanam ewụhọ emi? Nte enye ekpekedi udomo oro ẹkemede ndida ke akpanikọ?

N̄ko-n̄ko, mme prọfet eset ẹtịn̄ ẹte ke Abasi ama etịn̄ aban̄a idemesie ndien ndien nte ‘atuade n̄kpọfiọk’ aban̄a n̄kpọ oro enye akanamde m̀mê ekekerede ndinam. Ke uwụtn̄kpọ, Abasi ama ọdọhọ ete ke imọ ‘imatua n̄kpọfiọk [otode ikọ Hebrew oro na·chamʹ] koro imọ ikenịmde Saul ke edidem Israel.’ (1 Samuel 15:11, 35; men Jeremiah 18:7-10; Jonah 3:10 domo.) Sia Abasi edide mfọnmma, mme ufan̄ikọ ẹmi ikemeke ndiwọrọ nte ke Abasi ama anam ndudue ke ndimek Saul ete edi akpa edidem Israel. Utu ke oro, enyene ndidi mmọ ẹwụt nte ke Abasi ama okop mfụhọ nte ke Saul ama akabade etre ndinam akpanikọ onyụn̄ ọsọn̄ ibuot. Abasi ndida utọ ikọ oro ntịn̄ mban̄a idemesie ikpowụtke ifiọk edieke ekpedide enye ama ebem iso ọfiọk mme edinam Saul.

Ukem ikọ oro odu ke N̄wed Abasi eke ata eset emi, ke etịn̄de aban̄a mme usen Noah, enye ọdọhọ ete: “Jehovah atua n̄kpọfiọk koro enye akanamde owo ke isọn̄, esịt onyụn̄ ayat enye. Ndien Jehovah ọdọhọ ete, Nyọsọhi owo ẹmi mbotde ke iso isọn̄ mfep; . . . koro mmatua n̄kpọfiọk koro n̄kanamde mmọ.” (Genesis 6:6, 7) Mi n̄ko, emi owụt ete ke Abasi ikebemke iso ibiere mme edinam owo inịm. Abasi akatua n̄kpọfiọk, ofụhọ, idem onyụn̄ okop ubiak, idịghe koro mme edinam esie ẹkekwan̄ade, edi koro ukwan̄ n̄kpọ owo ẹkewakde. Andibot akatua n̄kpọfiọk nte ke ama oyom ẹsobo ofụri ubonowo ẹfep ke mîbọhọke Noah ye ubon esie. Abasi ọnọ nnyịn nsọn̄ọ ete: “N̄kpa idiọkowo inemke mi esịt.”—Ezekiel 33:11; men Deuteronomy 32:4, 5 domo.

Ntre ndi Abasi ama ebem iso ọfiọk ndien akam owụkde ete Adam ọduọ odụk idiọkn̄kpọ, ọkọrọ ye mme akama-nsobo utịp oro emi edidade ọsọk ubon eke owo? Se nnyịn inemede owụt ete ke emi ikemeke ndidi akpanikọ. Adianade do, edieke Abasi ekebemde iso ọfiọk kpukpru emi, enye akpakakabade edi anditọn̄ọ idiọkn̄kpọ ke ini enye akanamde owo, ndien Abasi okpokokoi edi ntak idiọkn̄kpọ ye ndutụhọ ofụri owo. Nte an̄wan̄ade, owo ikemeke ndinam emi odu ke n̄kemuyo ye se Abasi ayararede aban̄a idem esie ke N̄wed Abasi. Enye edi Abasi ima ye unenikpe emi asuade ukwan̄ido.—Psalm 33:5; Mme N̄ke 15:9; 1 John 4:8.

Utịt Iba Ẹmi Ẹnade ẹnọ Owo

Edisana N̄wed Abasi iyarakede ite ke Abasi ama ebem iso ebiere ini iso nnyịn owo kiet kiet enịm, m̀mê ndibem iso mbiere se iditịbede. Utu ke oro, se enye ayararede edi nte ke Abasi ama ebem iso etịn̄ utịt iba kpọt ẹmi owo ekemede ndinyene. Abasi ọnọ kpukpru owo ifụre uduak ndimek se ididide utịt esie. Ke anyan ini ko prọfet Moses ama etịn̄ ọnọ nditọ Israel ete: “Mmada uwem ye n̄kpa, . . . nnịm fi ke iso; mek uwem, ndien, man afo ye nditọ fo ẹdu uwem: man afo ama Jehovah Abasi fo onyụn̄ okop uyo esie, onyụn̄ eyịre ye enye: koro enye edide uwem fo, ye uniọn̄ mme usen fo.” (Deuteronomy 30:19, 20, sịghisịghi ubọkn̄wed edi eke nnyịn.) Prọfet Abasi oro Jesus ama ebem iso odụri owo utọn̄ ete: “Ẹbe ke mfafaha inuaotop ẹdụk: koro inuaotop emi adade owo aka nsobo atara, ọkpọusụn̄ onyụn̄ an̄wan̄a; mme andidụk ke esịt ẹnyụn̄ ẹwak. Koro inuaotop emi adade owo esịm uwem afafaha, usụn̄ onyụn̄ esịre; ndien mme andikụt enye iwakke.” (Matthew 7:13, 14) Usụn̄ iba, utịt iba. Ini iso nnyịn ọkọn̄ọ ke mme edinam nnyịn. Ndikop uyo Abasi ọwọrọ uwem, ndisọn̄ ibuot ye enye ọwọrọ n̄kpa.—Rome 6:23.

Abasi “owụk kpukpru owo ke kpukpru ebiet, ete mmọ ẹkabade esịt: koro Enye emenịm usen eke Enye edikpede ikpe ọnọ ererimbot ke edinen ido.” (Utom 17:30, 31) Kpa nte n̄wakn̄kan owo ke eyo Noah ẹkemekde ndisọn̄ ibuot ye Abasi ndien ẹsobo mmọ ẹfep, ukem ntre mfịn n̄wakn̄kan owo isụkke ibuot inọ mme ewụhọ Abasi. Kpa ye oro, Abasi ibemke iso ibiere m̀mê anie ke ẹdisobo ndien m̀mê anie edibọ edinyan̄a. Ke akpanikọ, Ikọ Abasi ọdọhọ ete ke enye “iyomke baba owo kiet atak, edi oyom kpukpru owo ẹtua n̄kpọfiọk ẹkabade esịt.” (2 Peter 3:9) Idem mme ata idiọkowo ẹkeme ndikabade esịt, ẹkop item, ẹnyụn̄ ẹnam mme ukpụhọde oro ẹyomde man ẹnyene mfọn Abasi.—Isaiah 1:18-20; 55:6, 7; Ezekiel 33:14-16; Rome 2:4-8.

Ye mbon oro ẹsụkde ibuot, Abasi ọn̄wọn̄ọ nsinsi uwem ke emem emem paradise, isọn̄ emi ẹnamde asana ọbọhọ kpukpru idiọkido, afai, ye ekọn̄, ererimbot emi biọn̄, ndutụhọ, udọn̄ọ, ye n̄kpa mîdidụhe aba. (Psalm 37:9-11; 46:9; Isaiah 2:4; 11:6-9; 25:6-8; 35:5, 6; Ediyarade 21:4) Ẹyenam idem mme akpa n̄kpa ẹset ẹnyụn̄ ẹnọ mmọ ifet ndinam n̄kpọ Abasi.—Daniel 12:2; John 5:28, 29.

“Tịn̄ enyịn ke owo eke ọfọnde ama, nyụn̄ se edinen owo,” ntre ke andiwet psalm ọdọhọ, “koro eti utịt anade ọnọ owo emem. Ẹyenyụn̄ ẹsobo mme idiọkowo ọtọkiet: ẹyesịbe eti utịt mme idiọkowo ẹfep.” (Psalm 37:37, 38) Nso ididi ini iso fo? Kpukpru esịne fi ke ubọk. Mme andimịn̄ magazine emi ẹyedara ndinọ fi ntọt efen efen man an̄wam fi enyene inem inem, emem emem ini iso ọnọ idemfo.

[Mme Ikọ idakisọn̄]

[Se Ẹwetde ke Ikpọ Abisi ke page 6]

Abasi ada odudu esie ndibem iso mfiọk n̄kpọ anam n̄kpọ ke ndisu mme uduak esie

[Se Ẹwetde ke Ikpọ Abisi ke page 8]

Abasi “iyomke baba owo kiet atak, edi oyom kpukpru owo ẹtua n̄kpọfiọk ẹkabade esịt.” 2 Peter 3:9

[Ndise ke page 7]

Ke ekpedide Abasi ama ebem iso ọfiọk ete ke Abraham eyenyịme ndiwa eyeneren esie, nte enye ekpekedi udomo edinam akpanikọ?